paliTIPITAKA Volume 7 - Vinaya Pitaka 7

[126] Athakho bhagavā bhaggesu yathābhirantaṃ viharitvā yena sāvatthī tena cārikaṃ pakkāmi anupubbena cārikañcaramāno yena sāvatthī tadavasari . tatra sudaṃ bhagavā sāvatthiyaṃ viharati jetavane anāthapiṇḍikassa ārāme . athakho visākhā migāramātā ghaṭakañca katakañca sammajjaniñca ādāya yena bhagavā tenupasaṅkami upasaṅkamitvā bhagavantaṃ abhivādetvā ekamantaṃ nisīdi . Ekamantaṃ nisinnā kho visākhā migāramātā bhagavantaṃ etadavoca paṭiggaṇhātu me bhante bhagavā ghaṭakañca katakañca sammajjaniñca @Footnote: ¹ Ma. dutiyabhāṇavāro niṭaṭhito. Yaṃ mama assa dīgharattaṃ hitāya sukhāyāti . paṭiggahesi bhagavā ghaṭakañca sammajjaniñca . na bhagavā katakaṃ paṭiggahesi . athakho bhagavā visākhaṃ migāramātaraṃ dhammiyā kathāya sandassesi samādapesi samuttejesi sampahaṃsesi . athakho visākhā migāramātā bhagavatā dhammiyā kathāya sandassitā samādapitā samuttejitā sampahaṃsitā uṭṭhāyāsanā bhagavantaṃ abhivādetvā padakkhiṇaṃ katvā pakkāmi. [127] Athakho bhagavā etasmiṃ nidāne etasmiṃ pakaraṇe dhammiṃ kathaṃ katvā bhikkhū āmantesi anujānāmi bhikkhave ghaṭakañca sammajjaniñca na bhikkhave katakaṃ paribhuñjitabbaṃ yo paribhuñjeyya āpatti dukkaṭassa anujānāmi bhikkhave tisso pādaghaṃsaniyo sakkharaṃ kaṭhalaṃ samuddapheṇakanti. [128] Athakho visākhā migāramātā vidhūpanañca tālavaṇṭañca ādāya yena bhagavā tenupasaṅkami upasaṅkamitvā bhagavantaṃ abhivādetvā ekamantaṃ nisīdi . ekamantaṃ nisinnā kho visākhā migāramātā bhagavantaṃ etadavoca paṭiggaṇhātu me bhante bhagavā vidhūpanañca tālavaṇṭañca yaṃ mama assa dīgharattaṃ hitāya sukhāyāti . paṭiggahesi bhagavā vidhūpanañca tālavaṇṭañca . athakho bhagavā visākhaṃ migāramātaraṃ dhammiyā kathāya sandassesi .pe. Padakkhiṇaṃ katvā pakkāmi. [129] Athakho bhagavā etasmiṃ nidāne etasmiṃ pakaraṇe Dhammiṃ kathaṃ katvā bhikkhū āmantesi anujānāmi bhikkhave vidhūpanañca tālavaṇṭañcāti. [130] Tena kho pana samayena saṅghassa makasavījanī uppannā hoti . bhagavato etamatthaṃ ārocesuṃ . anujānāmi bhikkhave makasavījaninti . cāmarivījanī ^1- uppannā hoti . bhagavato etamatthaṃ ārocesuṃ . na bhikkhave cāmarivījanī ^1- dhāretabbā yo dhāreyya āpatti dukkaṭassa anujānāmi bhikkhave tisso vījaniyo vākamayaṃ usiramayaṃ morapiñchamayanti. [131] Tena kho pana samayena saṅghassa chattaṃ uppannaṃ hoti. Bhagavato etamatthaṃ ārocesuṃ. Anujānāmi bhikkhave chattanti.

The Pali Tipitaka in Roman Character Volume 7 page 50-52. https://84000.org/tipitaka/read/roman_item.php?book=7&item=126&items=6 Classified by [Item Number] :- http://84000.org/tipitaka/read/roman_item.php?book=7&item=126&items=6&mode=bracket Compare with The Pali Tipitaka in Thai Character :- https://84000.org/tipitaka/read/pali_item.php?book=7&item=126&items=6 Compare with The Royal Version of Thai Tipitaka :- https://84000.org/tipitaka/read/byitem.php?book=7&item=126&items=6 Study Atthakatha :- https://84000.org/tipitaka/attha/attha.php?b=7&i=126 Contents of The Tipitaka Volume 7 https://84000.org/tipitaka/read/?index_7 https://84000.org/tipitaka/english/?index_7