[647] Athakho āyasmā sabbakāmī rattiyā paccūsasamayaṃ
paccuṭṭhāya 1- āyasmantaṃ revataṃ etadavoca katamena tvaṃ bhummi
vihārena etarahi bahulaṃ viharasīti . mettāvihārena kho ahaṃ bhante
etarahi bahulaṃ viharāmīti . kullakavihārena kira tvaṃ bhummi etarahi bahulaṃ
@Footnote: 1 Yu. ayaṃ pāṭho natthi.
Viharasi kullakavihāro heso 1- bhummi yadidaṃ mettāti . pubbepi
me bhante gihibhūtassa āciṇṇā mettā tenāhaṃ etarahipi
mettāvihārena bahulaṃ viharāmi apica mayā cirappattaṃ arahattaṃ
thero pana bhante katamena vihārena etarahi bahulaṃ viharatīti .
Suññatāvihārena kho ahaṃ bhummi etarahi bahulaṃ viharāmīti .
Mahāpurisavihārena kira bhante thero etarahi bahulaṃ viharati
mahāpurisavihāro eso bhante yadidaṃ suññatāti . pubbepi
me bhummi gihibhūtassa āciṇṇā suññatā tenāhaṃ etarahipi
suññatāvihārena bahulaṃ viharāmi apica mayā cirappattaṃ arahattanti.
[648] Ayañcarahi therānaṃ bhikkhūnaṃ antarā kathā vippakatā .
Athāyasmā sambhūto sāṇavāsī 2- anuppatto hoti . athakho
āyasmā sambhūto sāṇavāsī yenāyasmā sabbakāmī tenupasaṅkami
upasaṅkamitvā āyasmantaṃ sabbakāmiṃ abhivādetvā ekamantaṃ nisīdi .
Ekamantaṃ nisinno kho āyasmā sambhūto sāṇavāsī āyasmantaṃ
sabbakāmiṃ etadavoca ime bhante vesālikā vajjiputtakā bhikkhū
vesāliyaṃ dasa vatthūni dīpenti kappati siṅgiloṇakappo kappati
dvaṅgulakappo kappati gāmantarakappo kappati āvāsakappo
kappati anumatikappo kappati āciṇṇakappo kappati
@Footnote: 1 Ma. Yu. eso. 2 Ma. Yu. ito paraṃ tasminti pāṭho dissati.
Amathitakappo kappati jalogiṃ pātuṃ kappati adasakaṃ nisīdanaṃ kappati
jātarūparajatanti therena bhante upajjhāyassa mūle bahu dhammo
ca vinayo ca pariyatto therassa bhante dhammañca vinayañca
paccavekkhantassa kathaṃ hoti ke nu kho dhammavādino pācīnakā
vā bhikkhū pāṭheyyakā vāti . tayāpi kho āvuso upajjhāyassa
mūle bahu dhammo ca vinayo ca pariyatto tuyhaṃ pana āvuso
dhammañca vinayañca paccavekkhantassa kathaṃ hoti ke nu kho
dhammavādino pācīnakā vā bhikkhū pāṭheyyakā vāti . mayhaṃ
kho bhante dhammañca vinayañca paccavekkhantassa evaṃ hoti
adhammavādino pācīnakā bhikkhū dhammavādino pāṭheyyakā bhikkhūti
apicāhaṃ na tāva diṭṭhiṃ āvikaromi appevanāma maṃ imasmiṃ
adhikaraṇe sammanneyyāti . mayhaṃpi kho āvuso dhammañca vinayañca
paccavekkhantassa evaṃ hoti adhammavādino pācīnakā bhikkhū
dhammavādino pāṭheyyakā bhikkhūti apicāhaṃ na tāva diṭṭhiṃ
āvikaromi appevanāma maṃ imasmiṃ adhikaraṇe sammanneyyāti.
[649] Athakho saṅgho taṃ adhikaraṇaṃ vinicchinitukāmo sannipati .
Tasmiṃ kho pana adhikaraṇe vinicchiyamāne anantāni 1- ceva bhassāni
jāyanti na cekassa bhāsitassa attho viññāyati . athakho
āyasmā revato saṅghaṃ ñāpesi suṇātu me bhante saṅgho
@Footnote: 1 Ma. Yu. anaggāni.
Amhākaṃ imasmiṃ adhikaraṇe vinicchiyamāne anantāni ceva bhassāni
jāyanti na cekassa bhāsitassa attho viññāyati . yadi saṅghassa
pattakallaṃ saṅgho imaṃ adhikaraṇaṃ ubbāhikāya vūpasameyya .
Saṅgho cattāro pācīnake bhikkhū cattāro pāṭheyyake bhikkhū uccini
pācīnakānaṃ bhikkhūnaṃ āyasmantañca sabbakāmiṃ āyasmantañca
sāḷhaṃ āyasmantañca ujjasobhitaṃ āyasmantañca vāsabhagāmikaṃ
pāṭheyyakānaṃ bhikkhūnaṃ āyasmantañca revataṃ āyasmantañca sambhūtaṃ
sāṇavāsiṃ āyasmantañca yasaṃ kākaṇḍakaputtaṃ āyasmantañca
sumananti 1-. Athakho āyasmā revato saṅghaṃ ñāpesi
{649.1} suṇātu me bhante saṅgho amhākaṃ imasmiṃ adhikaraṇe
vinicchiyamāne anantāni ceva bhassāni jāyanti na cekassa bhāsitassa
attho viññāyati . yadi saṅghassa pattakallaṃ saṅgho cattāro pācīnake
bhikkhū cattāro pāṭheyyake bhikkhū sammanneyya ubbāhikāya imaṃ
adhikaraṇaṃ vūpasametuṃ. Esā ñatti.
{649.2} Suṇātu me bhante saṅgho amhākaṃ imasmiṃ adhikaraṇe
vinicchiyamāne anantāni ceva bhassāni jāyanti na cekassa bhāsitassa
attho viññāyati . saṅgho cattāro pācīnake bhikkhū cattāro
pāṭheyyake bhikkhū sammannati ubbāhikāya imaṃ adhikaraṇaṃ
vūpasametuṃ . yassāyasmato khamati catunnaṃ pācīnakānaṃ [2]-
catunnaṃ pāṭheyyakānaṃ bhikkhūnaṃ sammati ubbāhikāya imaṃ adhikaraṇaṃ
@Footnote: 1 Yu. itisaddo natthi. 2 Ma. Yu. bhikkhūnaṃ.
Vūpasametuṃ so tuṇhassa yassa nakkhamati so bhāseyya.
{649.3} Sammatā saṅghena cattāro pācīnakā bhikkhū cattāro
pāṭheyyakā bhikkhū ubbāhikāya imaṃ adhikaraṇaṃ vūpasametuṃ . khamati
saṅghassa tasmā tuṇhī. Evametaṃ dhārayāmīti.
[650] Tena kho pana samayena ajito nāma bhikkhu dasavasso
saṅghassa pātimokkhuddesako hoti . athakho saṅgho āyasmantaṃpi
ajitaṃ sammannati therānaṃ bhikkhūnaṃ āsanapaññāpakaṃ . athakho therānaṃ
bhikkhūnaṃ etadahosi kattha nu kho mayaṃ imaṃ adhikaraṇaṃ vūpasameyyāmāti.
Athakho therānaṃ bhikkhūnaṃ etadahosi ayaṃ kho vālikārāmo ramaṇīyo
appasaddo appanigghoso yannūna mayaṃ vālikārāme imaṃ adhikaraṇaṃ
vūpasameyyāmāti . athakho therā bhikkhū vālikārāmaṃ agamaṃsu taṃ
adhikaraṇaṃ vinicchinitukāmā.
[651] Athakho āyasmā revato saṅghaṃ ñāpesi suṇātu me
bhante saṅgho yadi saṅghassa pattakallaṃ ahaṃ āyasmantaṃ sabbakāmiṃ
vinayaṃ puccheyyanti . āyasmā sabbakāmī saṅghaṃ ñāpesi suṇātu
me āvuso saṅgho yadi saṅghassa pattakallaṃ ahaṃ revatena
vinayaṃ puṭṭho vissajjeyyanti.
[652] Athakho āyasmā revato āyasmantaṃ sabbakāmiṃ etadavoca
kappati bhante siṅgiloṇakappoti . ko so āvuso siṅgiloṇakappoti.
Kappati bhante siṅginā loṇaṃ pariharituṃ yattha aloṇikaṃ 1-
@Footnote: 1 Ma. Yu. aloṇakaṃ.
Bhavissati tattha paribhuñjissāmīti . nāvuso kappatīti . kattha
paṭikkhittanti . sāvatthiyā suttavibhaṅgeti . kiṃ āpajjatīti .
Sannidhikārakabhojane pācittiyanti . suṇātu me bhante saṅgho
idaṃ paṭhamaṃ vatthuṃ 1- saṅghena vinicchitaṃ . itipīdaṃ vatthuṃ uddhammaṃ
ubbinayaṃ apagatasatthusāsanaṃ. Idaṃ paṭhamaṃ salākaṃ nikkhipāmi.
[653] Kappati bhante dvaṅgulakappoti . ko so āvuso
dvaṅgulakappoti . kappati bhante dvaṅgulāya chāyāya vītivattāya
vikāle bhojanaṃ bhuñjitunti . nāvuso kappatīti . kattha paṭikkhittanti.
Rājagahe suttavibhaṅgeti . kiṃ āpajjatīti. Vikālabhojane pācittiyanti.
Suṇātu me bhante saṅgho idaṃ dutiyaṃ vatthuṃ saṅghena vinicchitaṃ. Itipīdaṃ
vatthuṃ uddhammaṃ ubbinayaṃ apagatasatthusāsanaṃ . idaṃ dutiyaṃ salākaṃ
nikkhipāmi.
[654] Kappati bhante gāmantarakappoti . ko so āvuso
gāmantarakappoti . kappati bhante idāni gāmantaraṃ gamissāmīti
bhuttāvinā pavāritena anatirittaṃ bhojanaṃ bhuñjitunti . nāvuso
kappatīti . kattha paṭikkhittanti . sāvatthiyā suttavibhaṅgeti .
Kiṃ āpajjatīti . anatirittabhojane pācittiyanti . suṇātu me
bhante saṅgho idaṃ tatiyaṃ vatthuṃ saṅghena vinicchitaṃ . itipīdaṃ
vatthuṃ uddhammaṃ ubbinayaṃ apagatasatthusāsanaṃ . idaṃ tatiyaṃ salākaṃ
nikkhipāmi.
@Footnote: 1 Ma. vatthu.
[655] Kappati bhante āvāsakappoti . ko so āvuso
āvāsakappoti . kappati bhante sambahulā āvāsā samānasīmā
nānūposathaṃ 1- kātunti . nāvuso kappatīti . kattha paṭikkhittanti.
Rājagahe uposathasaṃyutteti . kiṃ āpajjatīti . vinayātisāre
dukkaṭanti . suṇātu me bhante saṅgho idaṃ catutthaṃ vatthuṃ saṅghena
vinicchitaṃ . itipīdaṃ vatthuṃ uddhammaṃ ubbinayaṃ apagatasatthusāsanaṃ .
Idaṃ catutthaṃ salākaṃ nikkhipāmi.
[656] Kappati bhante anumatikappoti . ko so āvuso
anumatikappoti . kappeti bhante vaggena saṅghena kammaṃ kātuṃ
āgate bhikkhū anumānessāmāti 2- . nāvuso kappatīti . kattha
paṭikkhittanti . campeyyake vinayavatthusminti . kiṃ āpajjatīti .
Vinayātisāre dukkaṭanti . suṇātu me bhante saṅgho idaṃ pañcamaṃ
vatthuṃ saṅghena vinicchitaṃ . itipīdaṃ vatthuṃ uddhammaṃ ubbinayaṃ
apagatasatthusāsanaṃ. Idaṃ pañcamaṃ salākaṃ nikkhipāmi.
[657] Kappati bhante āciṇṇakappoti . ko so āvuso
āciṇṇakappoti . kappati bhante idaṃ me upajjhāyena
ajjhāciṇṇaṃ idaṃ me ācariyena ajjhāciṇṇanti ajjhācaritunti .
Āciṇṇakappo kho āvuso ekacco kappati ekacco na
kappatīti . suṇātu me bhante saṅgho idaṃ chaṭṭhaṃ vatthuṃ saṅghena
@Footnote: 1 Ma. nānuposathaṃ. 2 Ma. anumatiṃ ānessāma.
Vinicchitaṃ . itipīdaṃ vatthuṃ uddhammaṃ ubbinayaṃ apagatasatthusāsanaṃ .
Idaṃ chaṭṭhaṃ salākaṃ nikkhipāmi.
[658] Kappati bhante amathitakappoti . ko so āvuso
amathitakappoti . kappati bhante yaṃ taṃ khīraṃ khīrabhāvaṃ vijahitaṃ
asampattaṃ dadhibhāvaṃ bhuttāvinā pavāritena anatirittaṃ pātunti .
Nāvuso kappatīti . kattha paṭikkhittanti . sāvatthiyā suttavibhaṅgeti.
Kiṃ āpajjatīti . anatirittabhojane pācittiyanti . suṇātu me
bhante saṅgho idaṃ sattamaṃ vatthuṃ saṅghena vinicchitaṃ . itipīdaṃ vatthuṃ
uddhammaṃ ubbinayaṃ apagatasatthusāsanaṃ . idaṃ sattamaṃ salākaṃ
nikkhipāmi.
[659] Kappati bhante jalogiṃ pātunti . kā sā āvuso
jalogīti . kappati bhante yā sā surā asutā 1- asampattā
majjabhāvaṃ sā pātunti . nāvuso kappatīti . kattha paṭikkhittanti .
Kosambiyā suttavibhaṅgeti . kiṃ āpajjatīti . surāmerayapāne
pācittiyanti . suṇātu me bhante saṅgho idaṃ aṭṭhamaṃ vatthuṃ saṅghena
vinicchitaṃ . itipīdaṃ vatthuṃ uddhammaṃ ubbinayaṃ apagatasatthusāsanaṃ .
Idaṃ aṭṭhamaṃ salākaṃ nikkhipāmi.
[660] Kappati bhante adasakaṃ nisīdananti . nāvuso kappatīti.
Kattha paṭikkhittanti . sāvatthiyā suttavibhaṅgeti . kiṃ āpajjatīti .
Chedanake pācittiyanti . suṇātu me bhante saṅgho idaṃ navamaṃ
@Footnote: 1 Ma. āsutā.
Vatthuṃ saṅghena vinicchitaṃ . itipidaṃ vatthuṃ uddhammaṃ ubbinayaṃ
apagatasatthusāsanaṃ. Idaṃ navamaṃ salākaṃ nikkhipāmi.
[661] Kappati bhante jātarūparajatanti . nāvuso kappatīti .
Kattha paṭikkhittanti . rājagahe suttavibhaṅgeti . kiṃ āpajjatīti .
Jātarūparajatappaṭiggahaṇe pācittiyanti . suṇātu me bhante saṅgho
idaṃ dasamaṃ vatthuṃ saṅghena vinicchitaṃ . itipīdaṃ vatthuṃ uddhammaṃ
ubbinayaṃ apagatasatthusāsanaṃ. Idaṃ dasamaṃ salākaṃ nikkhipāmi.
[662] Suṇātu me bhante saṅgho imāni dasa vatthūni saṅghena
vinicchitāni . itipīmāni dasa vatthūni uddhammāni ubbinayāni
apagatasatthusāsanānīti.
[663] Nīhatametaṃ āvuso adhikaraṇaṃ santaṃ vūpasantaṃ suvūpasantaṃ
apica maṃ tvaṃ āvuso saṅghamajjhepi imāni dasa vatthūni puccheyyāsi
tesaṃ bhikkhūnaṃ saññattiyāti . athakho āyasmā revato āyasmantaṃ
sabbakāmiṃ saṅghamajjhepi imāni dasa vatthūni pucchi . puṭṭho
puṭṭho āyasmā sabbakāmī vissajjesi.
Imāya kho pana vinayasaṅgītiyā satta bhikkhusatāni anūnāni
anadhikāni ahesuṃ. Tasmāyaṃ vinayasaṅgīti sattasatikāti vuccatīti.
Sattasatikakkhandhakaṃ niṭṭhitaṃ dvādasamaṃ.
Imamhi khandhake vatthū pañcavīsati.
------------
Tassuddānaṃ
[664] Dasa vatthūni pūretvā kammaṃ dūtena pāvisi
cattāro puna rūpañca kosambi ca pāṭheyyako
maggo soreyyaṃ saṅkassaṃ kaṇṇakujjaṃ udumbaraṃ
sahajāti 1- ca majjhesi assosi kaṃ nu kho mayaṃ
pattanāvāya ujjavi 2- dūratopi 3- udāmassa
dāruṇaṃ 4- saṅgho ca vesāli 5- mettā saṅgho ubbāhikāti.
Cullavaggo samatto .
-----------
@Footnote: 1 Yu. sahaṃjāti. 2 Yu. sā ujji. 3 Ma. rahosi upanāmayaṃ. Yu. dūrahopi.
@4 Ma. garu.. Yu. dārukaṃ. 5 Ma. vesāliṃ.
The Pali Tipitaka in Roman Character Volume 7 page 414-423.
https://84000.org/tipitaka/read/roman_item.php?book=7&item=647&items=18
Classified by [Item Number] :-
http://84000.org/tipitaka/read/roman_item.php?book=7&item=647&items=18&mode=bracket
Compare with The Pali Tipitaka in Thai Character :-
https://84000.org/tipitaka/read/pali_item.php?book=7&item=647&items=18
Compare with The Royal Version of Thai Tipitaka :-
https://84000.org/tipitaka/read/byitem.php?book=7&item=647&items=18
Study Atthakatha :-
https://84000.org/tipitaka/attha/attha.php?b=7&i=647
Contents of The Tipitaka Volume 7
https://84000.org/tipitaka/read/?index_7
https://84000.org/tipitaka/english/?index_7
บันทึก ๑๔ พฤศจิกายน พ.ศ. ๒๕๖๐.
การแสดงผลนี้อ้างอิงข้อมูลจากพระไตรปิฎกฉบับภาษาบาลี อักษรโรมัน.
หากพบข้อผิดพลาด กรุณาแจ้งได้ที่ [email protected]
