[429] Yo panāti yo yādiso .pe. bhikkhūti .pe. ayaṃ
imasmiṃ atthe adhippeto bhikkhūti . sañcarittaṃ samāpajjeyyāti
itthiyā vā pahito purisassa santike gacchati purisena vā pahito
itthiyā santike gacchati . itthiyā vā purisamatinti purisassa
matiṃ itthiyā vā āroceti . purisassa vā itthīmatinti itthiyā
matiṃ purisassa vā āroceti . jāyattane vāti jāyā bhavissasi .
Jārattane vāti jārī bhavissasi . antamaso taṃkhaṇikāyapīti muhuttikā
@Footnote: 1 Yu. Ma. samāpajjīti.
Bhavissasi. Saṅghādisesoti .pe. Tenapi vuccati saṅghādisesoti.
[430] Dasa itthiyo māturakkhitā piturakkhitā mātāpiturakkhitā
bhāturakkhitā bhaginīrakkhitā ñātirakkhitā gottarakkhitā dhammarakkhitā
sārakkhā saparidaṇḍā.
[431] Dasa bhariyāyo dhanakkītā chandavāsinī bhogavāsinī paṭavāsinī
odapattakinī obhatacumbaṭā dāsī ca bhariyā ca kammakārī ca bhariyā
ca dhajāhaṭā muhuttikā.
[432] Māturakkhitā nāma mātā rakkhati gopeti issariyaṃ
kāreti vasaṃ vatteti . piturakkhitā nāma pitā rakkhati gopeti
issariyaṃ kāreti vasaṃ vatteti . mātāpiturakkhitā nāma mātāpitaro
rakkhanti gopenti issariyaṃ kārenti vasaṃ vattenti .
Bhāturakkhitā nāma bhātā rakkhati gopeti issariyaṃ kāreti vasaṃ
vatteti . bhaginīrakkhitā nāma bhaginī rakkhati gopeti issariyaṃ
kāreti vasaṃ vatteti . ñātirakkhitā nāma ñātakā rakkhanti
gopenti issariyaṃ kārenti vasaṃ vattenti . gottarakkhitā nāma
sagottā rakkhanti gopenti issariyaṃ kārenti vasaṃ vattenti. Dhammarakkhitā
nāma sahadhammikā rakkhanti gopenti issariyaṃ kārenti vasaṃ
vattenti . sārakkhā nāma gabbhepi pariggahitā hoti mayhaṃ esāti
antamaso mālāgulaparikkhittāpi . saparidaṇḍā nāma kenaci daṇḍo
ṭhapito hoti yo itthannāmaṃ itthiṃ gacchati ettako daṇḍoti.
[433] Dhanakkītā nāma dhanena kīṇitvā vāseti . chandavāsinī
nāma piyo piyaṃ vāseti . bhogavāsinī nāma bhogaṃ datvā
vāseti . paṭavāsinī nāma paṭaṃ datvā vāseti . odapattakinī
nāma udakapattaṃ āmasitvā vāseti . obhatacumbaṭā nāma cumbaṭaṃ
oropetvā vāseti . dāsī nāma dāsī ceva hoti bhariyā ca.
Kammakārī nāma kammakārī ceva hoti bhariyā ca . dhajāhaṭā nāma
karamarānītā vuccati. Muhuttikā nāma taṃkhaṇikā vuccati.
[434] Puriso bhikkhuṃ pahiṇati 1- gaccha bhante itthannāmaṃ
māturakkhitaṃ brūhi hohi kira itthannāmassa bhariyā dhanakkītāti
paṭiggaṇhāti vīmaṃsati paccāharati āpatti saṅghādisesassa . puriso
bhikkhuṃ pahiṇati gaccha bhante itthannāmaṃ piturakkhitaṃ brūhi .pe.
Mātāpiturakkhitaṃ brūhi . bhāturakkhitaṃ brūhi . bhaginīrakkhitaṃ brūhi .
Ñātirakkhitaṃ brūhi . gottarakkhitaṃ brūhi . dhammarakkhitaṃ brūhi .
Sārakkhaṃ brūhi . saparidaṇḍaṃ brūhi hohi kira itthannāmassa
bhariyā dhanakkītāti paṭiggaṇhāti vīmaṃsati paccāharati āpatti
saṅghādisesassa.
Nikkhepapadāni.
[435] Puriso bhikkhuṃ pahiṇati gaccha bhante itthannāmaṃ
māturakkhitañca piturakkhitañca brūhi hotha kira itthannāmassa
@Footnote: 1 pahiṇātīti amhākaṃ khanti.
Bhariyāyo dhanakkītāti paṭiggaṇhāti vīmaṃsati paccāharati āpatti
saṅghādisesassa . puriso bhikkhuṃ pahiṇati gaccha bhante itthannāmaṃ
māturakkhitañca mātāpiturakkhitañca brūhi .pe. māturakkhitañca
bhāturakkhitañca . māturakkhitañca bhaginīrakkhitañca . māturakkhitañca
ñātirakkhitañca . māturakkhitañca gottarakkhitañca . māturakkhitañca
dhammarakkhitañca . māturakkhitañca sārakkhañca . māturakkhitañca
saparidaṇḍañca brūhi hotha kira itthannāmassa bhariyāyo dhanakkītāti
paṭiggaṇhāti vīmaṃsati paccāharati āpatti saṅghādisesassa.
Khaṇḍacakkaṃ.
[436] Puriso bhikkhuṃ pahiṇati gaccha bhante itthannāmaṃ piturakkhitañca
mātāpiturakkhitañca brūhi hotha kira itthannāmassa
bhariyāyo dhanakkītāti paṭiggaṇhāti vīmaṃsati paccāharati āpatti
saṅghādisesassa . puriso bhikkhuṃ pahiṇati gaccha bhante itthannāmaṃ
piturakkhitañca bhāturakkhitañca . piturakkhitañca bhaginīrakkhitañca .
Piturakkhitañca ñātirakkhitañca . piturakkhitañca gottarakkhitañca .
Piturakkhitañca dhammarakkhitañca . piturakkhitañca sārakkhañca .
Piturakkhitañca saparidaṇḍañca brūhi hotha kira itthannāmassa
bhariyāyo dhanakkītāti paṭiggaṇhāti vīmaṃsati paccāharati āpatti
saṅghādisesassa . puriso bhikkhuṃ pahiṇati gaccha bhante itthannāmaṃ
piturakkhitañca māturakkhitañca brūhi hotha kira itthannāmassa
Bhariyāyo dhanakkītāti paṭiggaṇhāti vīmaṃsati paccāharati āpatti
saṅghādisesassa.
Baddhacakkaṃ 1-.
[437] Puriso bhikkhuṃ pahiṇati gaccha bhante itthannāmaṃ mātāpiturakkhitañca
bhāturakkhitañca . mātāpiturakkhitañca bhaginīrakkhitañca .
Mātāpiturakkhitañca ñātirakkhitañca . mātāpiturakkhitañca gottarakkhitañca .
Mātāpiturakkhitañca dhammarakkhitañca . mātāpiturakkhitañca
sārakkhañca . mātāpiturakkhitañca saparidaṇḍañca . mātāpiturakkhitañca
māturakkhitañca . mātāpiturakkhitañca piturakkhitañca brūhi
hotha kira itthannāmassa bhariyāyo dhanakkītāti paṭiggaṇhāti vīmaṃsati
paccāharati āpatti saṅghādisesassa.
Dutiyaṃ baddhacakkaṃ.
[438] Puriso bhikkhuṃ pahiṇati gaccha bhante itthannāmaṃ bhāturakkhitañca
bhaginīrakkhitañca . bhāturakkhitañca ñātirakkhitañca . bhāturakkhitañca
gottarakkhitañca . bhāturakkhitañca dhammarakkhitañca . bhāturakkhitañca
sārakkhañca . bhāturakkhitañca saparidaṇḍañca . bhāturakkhitañca
māturakkhitañca . bhāturakkhitañca piturakkhitañca . bhāturakkhitañca
mātāpiturakkhitañca brūhi hotha kira itthannāmassa
@Footnote: 1 Yu. Ma. baddhacakkamūlaṃ saṅkhittaṃ. ito paraṃ tattha dutiyabaddhacakkādīni
@avibhajitvā avasānabaddhacakkameva vibhattaṃ.
Bhariyāyo dhanakkītāti paṭiggaṇhāti vīmaṃsati paccāharati
āpatti saṅghādisesassa.
Tatiyaṃ baddhacakkaṃ.
[439] Puriso bhikkhuṃ pahiṇati gaccha bhante itthannāmaṃ bhaginīrakkhitañca
ñātirakkhitañca . bhaginīrakkhitañca gottarakkhitañca . bhaginīrakkhitañca
dhammarakkhitañca . bhaginīrakkhitañca sārakkhañca . bhaginīrakkhitañca
saparidaṇḍañca . bhaginīrakkhitañca māturakkhitañca . bhaginīrakkhitañca
piturakkhitañca . bhaginīrakkhitañca mātāpiturakkhitañca . bhaginīrakkhitañca
bhāturakkhitañca brūhi hotha kira itthannāmassa bhariyāyo dhanakkītāti
paṭiggaṇhāti vīmaṃsati paccāharati āpatti saṅghādisesassa.
Catutthaṃ baddhacakkaṃ.
[440] Puriso bhikkhuṃ pahiṇati gaccha bhante itthannāmaṃ ñātirakkhitañca
gottarakkhitañca . ñātirakkhitañca dhammarakkhitañca . ñātirakkhitañca
sārakkhañca . ñātirakkhitañca saparidaṇḍañca . ñātirakkhitañca
māturakkhitañca . ñātirakkhitañca piturakkhitañca . ñātirakkhitañca
mātāpiturakkhitañca . ñātirakkhitañca bhāturakkhitañca . ñātirakkhitañca
bhaginīrakkhitañca brūhi hotha kira itthannāmassa bhariyāyo dhanakkītāti
paṭiggaṇhāti vīmaṃsati paccāharati āpatti saṅghādisesassa.
Pañcamaṃ baddhacakkaṃ.
[441] Puriso bhikkhuṃ pahiṇati gaccha bhante itthannāmaṃ gottarakkhitañca
dhammarakkhitañca . gottarakkhitañca sārakkhañca . gottarakkhitañca
saparidaṇḍañca . gottarakkhitañca māturakkhitañca . gottarakkhitañca
piturakkhitañca . gottarakkhitañca mātāpiturakkhitañca .
Gottarakkhitañca bhāturakkhitañca . gottarakkhitañca bhaginīrakkhitañca .
Gottarakkhitañca ñātirakkhitañca brūhi hotha kira itthannāmassa
bhariyāyo dhanakkītāti paṭiggaṇhāti vīmaṃsati paccāharati āpatti
saṅghādisesassa.
Chaṭṭhaṃ baddhacakkaṃ.
[442] Puriso bhikkhuṃ pahiṇati gaccha bhante itthannāmaṃ dhammarakkhitañca
sārakkhañca . dhammarakkhitañca saparidaṇḍañca . dhammarakkhitañca
māturakkhitañca . dhammarakkhitañca piturakkhitañca . dhammarakkhitañca
mātāpiturakkhitañca . dhammarakkhitañca bhāturakkhitañca .
Dhammarakkhitañca bhaginīrakkhitañca . dhammarakkhitañca ñātirakkhitañca .
Dhammarakkhitañca gottarakkhitañca brūhi hotha kira itthannāmassa
bhariyāyo dhanakkītāti paṭiggaṇhāti vīmaṃsati paccāharati āpatti
saṅghādisesassa.
Sattamaṃ baddhacakkaṃ.
[443] Puriso bhikkhuṃ pahiṇati gaccha bhante itthannāmaṃ sārakkhañca
saparidaṇḍañca . sārakkhañca māturakkhitañca . sārakkhañca
Piturakkhitañca . sārakkhañca mātāpiturakkhitañca . sārakkhañca
bhāturakkhitañca . sārakkhañca bhaginīrakkhitañca . sārakkhañca
ñātirakkhitañca . sārakkhañca gottarakkhitañca . sārakkhañca
dhammarakkhitañca brūhi hotha kira itthannāmassa bhariyāyo dhanakkītāti
paṭiggaṇhāti vīmaṃsati paccāharati āpatti saṅghādisesassa.
Aṭṭhamaṃ baddhacakkaṃ.
[444] Puriso bhikkhuṃ pahiṇati gaccha bhante itthannāmaṃ
saparidaṇḍañca māturakkhitañca . saparidaṇḍañca piturakkhitañca .
Saparidaṇḍañca mātāpīturakkhitañca . saparidaṇḍañca bhāturakkhitañca .
Saparidaṇḍañca bhaginīrakkhitañca . saparidaṇḍañca ñātirakkhitañca .
Saparidaṇḍañca gottarakkhitañca . saparidaṇḍañca dhammarakkhitañca .
Saparidaṇḍañca sārakkhañca brūhi hotha kira itthannāmassa bhariyāyo
dhanakkītāti paṭiggaṇhāti vīmaṃsati paccāharati āpatti saṅghādisesassa.
Navamaṃ baddhacakkaṃ.
Ekamūlakaṃ niṭṭhitaṃ.
[445] Dumūlakaṃ timūlakaṃ catumūlakaṃ pañcamūlakaṃ chamūlakaṃ sattamūlakaṃ
aṭṭhamūlakaṃ navamūlakaṃ evameva kātabbaṃ 1-.
Idaṃ dasamūlakaṃ.
@Footnote: 1 Yu. potthake evaṃ dumūlakaṃpi timūlakaṃpi yāvanavamūlakaṃ kātabbanti
@āgataṃ. Ma. potthake ca tatheva. timūlakaṃpīti pana na hoti.
[446] Puriso bhikkhuṃ pahiṇati gaccha bhante itthannāmaṃ māturakkhitañca
piturakkhitañca mātāpiturakkhitañca bhāturakkhitañca bhaginīrakkhitañca
ñātirakkhitañca gottarakkhitañca dhammarakkhitañca sārakkhañca
saparidaṇḍañca brūhi hotha kira itthannāmassa bhariyāyo dhanakkītāti
paṭiggaṇhāti vīmaṃsati paccāharati āpatti saṅghādisesassa.
Dhanakkītācakkaṃ 1- niṭṭhitaṃ.
[447] Puriso bhikkhuṃ pahiṇati gaccha bhante itthannāmaṃ māturakkhitaṃ
brūhi hohi kira itthannāmassa bhariyā chandavāsinī bhogavāsinī paṭavāsinī
odapattakinī obhatacumbaṭā dāsī ca bhariyā ca kammakārī ca bhariyā ca
dhajāhaṭā muhuttikāti paṭiggaṇhāti vīmaṃsati paccāharati āpatti
saṅghādisesassa .pe. puriso bhikkhuṃ pahiṇati gaccha bhante itthannāmaṃ
piturakkhitaṃ brūhi. Mātāpiturakkhitaṃ brūhi. Bhāturakkhitaṃ brūhi. Ñātirakkhitaṃ
brūhi . gottarakkhitaṃ brūhi . dhammarakkhitaṃ brūhi . sārakkhaṃ
brūhi . saparidaṇḍaṃ brūhi hohi kira itthannāmassa bhariyā muhuttikāti
paṭiggaṇhāti vīmaṃsati paccāharati āpatti saṅghādisesassa.
Nikkhepapadāni.
[448] Puriso bhikkhuṃ pahiṇati gaccha bhante itthannāmaṃ māturakkhitañca
piturakkhitañca brūhi hotha kira itthannāmassa bhariyāyo muhuttikāti
paṭiggaṇhāti vīmaṃsati paccāharati āpatti saṅghādisesassa . puriso
@Footnote: 1 Yu. Ma. dhanakkītāitthīcakkaṃ.
Bhikkhuṃ pahiṇati gaccha bhante itthannāmaṃ māturakkhitañca mātāpiturakkhitañca.
Māturakkhitañca bhāturakkhitañca . māturakkhitañca bhaginīrakkhitañca .
Māturakkhitañca ñātirakkhitañca . māturakkhitañca gottarakkhitañca .
Māturakkhitañca dhammarakkhitañca . māturakkhitañca sārakkhañca .
Māturakkhitañca saparidaṇḍañca brūhi hotha kira itthannāmassa
bhariyāyo muhuttikāti paṭiggaṇhāti vīmaṃsati paccāharati āpatti
saṅghādisesassa.
Khaṇḍacakkaṃ.
[449] Puriso bhikkhuṃ pahiṇati gaccha bhante itthannāmaṃ piturakkhitañca
mātāpiturakkhitañca brūhi hotha kira itthannāmassa bhariyāyo
muhuttikāti paṭiggaṇhāti vīmaṃsati paccāharati āpatti
saṅghādisesassa . puriso bhikkhuṃ pahiṇati gaccha bhante itthannāmaṃ
piturakkhitañca bhāturakkhitañca . piturakkhitañca bhaginīrakkhitañca .
Piturakkhitañca ñātirakkhitañca . piturakkhitañca gottarakkhitañca .
Piturakkhitañca dhammarakkhitañca . piturakkhitañca sārakkhañca .
Piturakkhitañca saparidaṇḍañca . piturakkhitañca māturakkhitañca brūhi
hotha kira itthannāmassa bhariyāyo muhuttikāti paṭiggaṇhāti vīmaṃsati
paccāharati āpatti saṅghādisesassa.
Baddhacakkaṃ.
Mūlaṃ saṅkhittaṃ.
[450] Puriso bhikkhuṃ pahiṇati gaccha bhante itthannāmaṃ
saparidaṇḍañca māturakkhitañca brūhi hotha kira itthannāmassa
bhariyāyo muhuttikāti paṭiggaṇhāti vīmaṃsati paccāharati āpatti
saṅghādisesassa . puriso bhikkhuṃ pahiṇati gaccha bhante itthannāmaṃ
saparidaṇḍañca piturakkhitañca . saparidaṇḍañca mātāpiturakkhitañca .
Saparidaṇḍañca bhāturakkhitañca . saparidaṇḍañca bhaginīrakkhitañca .
Saparidaṇḍañca ñātirakkhitañca . saparidaṇḍañca gottarakkhitañca .
Saparidaṇḍañca dhammarakkhitañca . saparidaṇḍañca sārakkhañca brūhi
hotha kira itthannāmassa bhariyāyo muhuttikāti paṭiggaṇhāti vīmaṃsati
paccāharati āpatti saṅghādisesassa.
Ekamūlakaṃ niṭṭhitaṃ.
[451] Dumūlakaṃ timūlakaṃ catumūlakaṃ pañcamūlakaṃ chamūlakaṃ sattamūlakaṃ
aṭṭhamūlakaṃ navamūlakaṃ evameva kātabbaṃ.
Idaṃ dasamūlakaṃ.
[452] Puriso bhikkhuṃ pahiṇati gaccha bhante itthannāmaṃ māturakkhitañca
piturakkhitañca mātāpiturakkhitañca bhāturakkhitañca bhaginīrakkhitañca
ñātirakkhitañca gottarakkhitañca dhammarakkhitañca sārakkhañca
saparidaṇḍañca brūhi hotha kira itthannāmassa bhariyāyo muhuttikāti
paṭiggaṇhāti vīmaṃsati paccāharati āpatti saṅghādisesassa.
Muhuttikācakkaṃ niṭṭhitaṃ.
[453] Puriso bhikkhuṃ pahiṇati gaccha bhante itthannāmaṃ māturakkhitaṃ
brūhi hohi kira itthannāmassa bhariyā dhanakkītāti paṭiggaṇhāti
vīmaṃsati paccāharati āpatti saṅghādisesassa . puriso bhikkhuṃ pahiṇati
gaccha bhante itthannāmaṃ māturakkhitaṃ brūhi hohi kira itthannāmassa
bhariyā chandavāsinī bhogavāsinī paṭavāsinī odapattakinī obhatacumbaṭā
dāsī ca bhariyā ca kammakārī ca bhariyā ca dhajāhaṭā muhuttikāti
paṭiggaṇhāti vīmaṃsati paccāharati āpatti saṅghādisesassa.
Nikkhepapadāni.
[454] Puriso bhikkhuṃ pahiṇati gaccha bhante itthannāmaṃ māturakkhitaṃ
brūhi hohi kira itthannāmassa bhariyā dhanakkītā ca chandavāsinī cāti
paṭiggaṇhāti vīmaṃsati paccāharati āpatti saṅghādisesassa . puriso
bhikkhuṃ pahiṇati gaccha bhante itthannāmaṃ māturakkhitaṃ brūhi hohi
kira itthannāmassa bhariyā dhanakkītā ca bhogavāsinī ca . dhanakkītā ca
paṭavāsinī ca . dhanakkītā ca odapattakinī ca. Dhanakkītā ca obhatacumbaṭā
ca . dhanakkītā ca dāsī ca bhariyā ca . dhanakkītā ca kammakārī
ca bhariyā ca . dhanakkītā ca dhajāhaṭā ca . dhanakkītā ca muhuttikā
cāti paṭiggaṇhāti vīmaṃsati paccāharati āpatti saṅghādisesassa.
Khaṇḍacakkaṃ niṭṭhitaṃ.
[455] Puriso bhikkhuṃ pahiṇati gaccha bhante itthannāmaṃ māturakkhitaṃ
brūhi hohi kira itthannāmassa bhariyā chandavāsinī ca bhogavāsinī ca
.pe. Chandavāsinī ca muhuttikā ca . chandavāsinī ca dhanakkītā cāti
paṭiggaṇhāti vīmaṃsati paccāharati āpatti saṅghādisesassa.
Baddhacakkaṃ.
Mūlaṃ saṅkhittaṃ.
[456] Puriso bhikkhuṃ pahiṇati gaccha bhante itthannāmaṃ māturakkhitaṃ
brūhi hohi kira itthannāmassa bhariyā muhuttikā ca dhanakkītā ca .
Muhuttikā ca chandavāsinī ca .pe. muhuttikā ca dhajāhaṭā cāti
paṭiggaṇhāti vīmaṃsati paccāharati āpatti saṅghādisesassa.
Ekamūlakaṃ niṭṭhitaṃ.
[457] Dumūlakaṃ timūlakaṃ catumūlakaṃ pañcamūlakaṃ chamūlakaṃ sattamūlakaṃ
aṭṭhamūlakaṃ navamūlakaṃ evameva kātabbaṃ.
Idaṃ dasamūlakaṃ.
[458] Puriso bhikkhuṃ pahiṇati gaccha bhante itthannāmaṃ māturakkhitaṃ
brūhi hohi kira itthannāmassa bhariyā dhanakkītā ca chandavāsinī
ca bhogavāsinī ca paṭavāsinī ca odapattakinī ca obhatacumbaṭā ca
dāsī ca bhariyā ca kammakārī ca bhariyā ca dhajāhaṭā ca muhuttikā
cāti paṭiggaṇhāti vīmaṃsati paccāharati āpatti saṅghādisesassa.
[459] Puriso bhikkhuṃ pahiṇati gaccha bhante itthannāmaṃ piturakkhitaṃ
brūhi . mātāpiturakkhitaṃ brūhi . bhāturakkhitaṃ brūhi .
Bhaginīrakkhitaṃ brūhi . ñātirakkhitaṃ brūhi . gottarakkhitaṃ brūhi .
Dhammarakkhitaṃ brūhi . sārakkhaṃ brūhi . saparidaṇḍaṃ brūhi hohi
kira itthannāmassa bhariyā dhanakkītāti paṭiggaṇhāti vīmaṃsati
paccāharati āpatti saṅghādisesassa . puriso bhikkhuṃ pahiṇati
gaccha bhante itthannāmaṃ saparidaṇḍaṃ brūhi hohi kira itthannāmassa
bhariyā chandavāsinī bhogavāsinī paṭivāsinī odapattakinī obhatacumbaṭā
dāsī ca bhariyā ca kammakārī ca bhariyā ca dhajāhaṭā muhuttikāti
paṭiggaṇhāti vīmaṃsati paccāharati āpatti saṅghādisesassa.
Nikkhepapadāni.
[460] Puriso bhikkhuṃ pahiṇati gaccha bhante itthannāmaṃ
saparidaṇḍaṃ brūhi hohi kira itthannāmassa bhariyā dhanakkītā ca
chandavāsinī cāti paṭiggaṇhāti vīmaṃsati paccāharati āpatti
saṅghādisesassa . puriso bhikkhuṃ pahiṇati gaccha bhante itthannāmaṃ
saparidaṇḍaṃ brūhi hohi kira itthannāmassa bhariyā dhanakkītā ca
bhogavāsinī ca dhanakkītā ca paṭavāsinī ca dhanakkītā ca odapattakinī
ca dhanakkītā ca obhatacumbaṭā ca dhanakkītā ca dāsī ca bhariyā
ca dhanakkītā ca kammakārī ca bhariyā ca dhanakkītā ca dhajāhaṭā ca
dhanakkītā ca muhuttikā cāti paṭiggaṇhāti vīmaṃsati paccāharati
āpatti saṅghādisesassa.
Khaṇḍacakkaṃ.
[461] Puriso bhikkhuṃ pahiṇati gaccha bhante itthannāmaṃ saparidaṇḍaṃ
brūhi hohi kira itthannāmassa bhariyā chandavāsinī ca bhogavāsinī ca
chandavāsinī ca paṭavāsinī ca .pe. chandavāsinī ca muhuttikā ca
chandavāsinī ca dhanakkītā cāti paṭiggaṇhāti vīmaṃsati paccāharati
āpatti saṅghādisesassa.
Baddhacakkaṃ.
Mūlaṃ saṅkhittaṃ.
[462] Puriso bhikkhuṃ pahiṇati gaccha bhante itthannāmaṃ saparidaṇḍaṃ
brūhi hohi kira itthannāmassa bhariyā muhuttikā ca dhanakkītā ca
.pe. muhuttikā ca dhajāhaṭā cāti paṭiggaṇhāti vīmaṃsati paccāharati
āpatti saṅghādisesassa.
Ekamūlakaṃ niṭṭhitaṃ.
[463] Dumūlakaṃ timūlakaṃ catumūlakaṃ pañcamūlakaṃ chamūlakaṃ sattamūlakaṃ
aṭṭhamūlakaṃ navamūlakaṃ evameva kātabbaṃ.
Idaṃ dasamūlakaṃ.
[464] Puriso bhikkhuṃ pahiṇati gaccha bhante itthannāmaṃ saparidaṇḍaṃ
brūhi hohi kira itthannāmassa bhariyā dhanakkītā ca chandavāsinī ca
bhogavāsinī ca paṭavāsinī ca odapattakinī ca obhatacumbaṭā ca
dāsī ca bhariyā ca kammakārī ca bhariyā ca dhajāhaṭā ca muhuttikā
cāti paṭiggaṇhāti vīmaṃsati paccāharati āpatti saṅghādisesassa.
[465] Puriso bhikkhuṃ pahiṇati gaccha bhante itthannāmaṃ māturakkhitaṃ
brūhi hohi kira itthannāmassa bhariyā dhanakkītāti paṭiggaṇhāti vīmaṃsati
paccāharati āpatti saṅghādisesassa . puriso bhikkhuṃ pahiṇati gaccha
bhante itthannāmaṃ māturakkhitañca piturakkhitañca brūhi hotha kira itthannāmassa
bhariyāyo dhanakkītā ca chandavāsinī cāti paṭiggaṇhāti vīmaṃsati paccāharati
āpatti saṅghādisesassa . puriso bhikkhuṃ pahiṇati gaccha bhante itthannāmaṃ
māturakkhitañca piturakkhitañca mātāpiturakkhitañca brūhi hotha kira
itthannāmassa bhariyāyo dhanakkītā ca chandavāsinī ca bhogavāsinī cāti
paṭiggaṇhāti vīmaṃsati paccāharati āpatti saṅghādisesassa.
(evaṃ ubhatobaddhakaṃ kātabbaṃ .)
idaṃ sabbamūlakaṃ.
[466] Puriso bhikkhuṃ pahiṇati gaccha bhante itthannāmaṃ māturakkhitañca
piturakkhitañca mātāpiturakkhitañca bhāturakkhitañca bhaginīrakkhitañca
ñātirakkhitañca gottarakkhitañca dhammarakkhitañca sārakkhañca
saparidaṇḍañca brūhi hotha kira itthannāmassa bhariyāyo dhanakkītā
ca chandavāsinī ca bhogavāsinī ca paṭavāsinī ca odapattakinī ca
obhatacumbaṭā ca dāsī ca bhariyā ca kammakārī ca bhariyā ca
dhajāhaṭā ca muhuttikā cāti paṭiggaṇhāti vīmaṃsati paccāharati
āpatti saṅghādisesassa.
Ubhatobaddhakaṃ niṭṭhitaṃ.
[467] Purisassa mātā bhikkhuṃ pahiṇati .pe. purisassa pitā
bhikkhuṃ pahiṇati .pe. purisassa mātāpitaro bhikkhuṃ pahiṇanti .pe.
Purisassa bhātā bhikkhuṃ pahiṇati .pe. purisassa bhaginī bhikkhuṃ pahiṇati
.pe. purisassa ñātakā bhikkhuṃ pahiṇanti .pe. purisassa gottā
bhikkhuṃ pahiṇanti .pe. purisassa sahadhammikā bhikkhuṃ pahiṇanti .
(purisassa peyyālo vitthāretabbo . ubhatobaddhakaṃ yathā purimanayena
tatheva vitthāretabbaṃ .)
[468] Māturakkhitāya mātā bhikkhuṃ pahiṇati gaccha bhante itthannāmaṃ
brūhi hotu itthannāmassa bhariyā dhanakkītāti paṭiggaṇhāti
vīmaṃsati paccāharati āpatti saṅghādisesassa . māturakkhitāya mātā
bhikkhuṃ pahiṇati gaccha bhante itthannāmaṃ brūhi hotu itthannāmassa
bhariyā chandavāsinī bhogavāsinī paṭavāsinī odapattakinī obhatacumbaṭā
dāsī ca bhariyā ca kammakārī ca bhariyā ca dhajāhaṭā muhuttikāti
paṭiggaṇhāti vīmaṃsati paccāharati āpatti saṅghādisesassa.
Nikkhepapadāni.
[469] Māturakkhitāya mātā bhikkhuṃ pahiṇati gaccha bhante itthannāmaṃ
brūhi hotu itthannāmassa bhariyā dhanakkītā ca chandavāsinī
cāti paṭiggaṇhāti vīmaṃsati paccāharati āpatti saṅghādisesassa .
Māturakkhitāya mātā bhikkhuṃ pahiṇati gaccha bhante itthannāmaṃ brūhi
hotu itthannāmassa bhariyā dhanakkītā ca bhogavāsinī ca . dhanakkītā
Ca paṭavāsinī ca . dhanakkītā ca odapattakinī ca . dhanakkītā ca
obhatacumbaṭā ca . dhanakkītā ca dāsī ca bhariyā ca . dhanakkītā
ca kammakārī ca bhariyā ca . dhanakkītā ca dhajāhaṭā ca .
Dhanakkītā ca muhuttikā cāti paṭiggaṇhāti vīmaṃsati paccāharati
āpatti saṅghādisesassa.
Khaṇḍacakkaṃ.
[470] Māturakkhitāya mātā bhikkhuṃ pahiṇati gaccha bhante itthannāmaṃ
brūhi hotu itthannāmassa bhariyā chandavāsinī ca bhogavāsinī ca
.pe. chandavāsinī ca muhuttikā ca . chandavāsinī ca dhanakkītā cāti
paṭiggaṇhāti vīmaṃsati paccāharati āpatti saṅghādisesassa.
Baddhacakkaṃ.
Mūlaṃ saṅkhittaṃ.
[471] Māturakkhitāya mātā bhikkhuṃ pahiṇati gaccha bhante itthannāmaṃ
brūhi hotu itthannāmassa bhariyā muhuttikā ca dhanakkītā ca .pe.
Muhuttikā ca dhajāhaṭā cāti paṭiggaṇhāti vīmaṃsati paccāharati āpatti
saṅghādisesassa.
Ekamūlakaṃ niṭṭhitaṃ.
Evaṃ dumūlakaṃpi yāvanavamūlakaṃ kātabbaṃ.
Idaṃ dasamūlakaṃ.
[472] Māturakkhitāya mātā bhikkhuṃ pahiṇati gaccha bhante itthannāmaṃ
brūhi hotu itthannāmassa bhariyā dhanakkītā ca chandavāsinī ca bhogavāsinī
ca paṭavāsinī ca odapattakinī ca obhatacumbaṭā ca dāsī ca bhariyā ca
kammakārī ca bhariyā ca dhajāhaṭā ca muhuttikā cāti paṭiggaṇhāti
vīmaṃsati paccāharati āpatti saṅghādisesassa.
[473] Piturakkhitāya pitā bhikkhuṃ pahiṇati . mātāpiturakkhitāya
mātāpitaro bhikkhuṃ pahiṇanti . bhāturakkhitāya bhātā bhikkhuṃ pahiṇati .
Bhaginīrakkhitāya bhaginī bhikkhuṃ pahiṇati . ñātirakkhitāya ñātakā bhikkhuṃ
pahiṇanti . gottarakkhitāya gottā bhikkhuṃ pahiṇanti . dhammarakkhitāya
sahadhammikā bhikkhuṃ pahiṇanti . sārakkhāya yena pariggahitā hoti so
bhikkhuṃ pahiṇati . saparidaṇḍāya yena daṇḍo ṭhapito hoti so bhikkhuṃ
pahiṇati gaccha bhante itthannāmaṃ brūhi hotu itthannāmassa
bhariyā dhanakkītāti paṭiggaṇhāti vīmaṃsati paccāharati āpatti
saṅghādisesassa . saparidaṇḍāya yena daṇḍo ṭhapito hoti so bhikkhuṃ
pahiṇati gaccha bhante itthannāmaṃ brūhi hotu itthannāmassa bhariyā
chandavāsinī bhogavāsinī paṭavāsinī odapattakinī obhatacumbaṭā dāsī ca
bhariyā ca kammakārī ca bhariyā ca dhajāhaṭā muhuttikāti paṭiggaṇhāti
vīmaṃsati paccāharati āpatti saṅghādisesassa.
Nikkhepapadāni.
[474] Saparidaṇḍāya yena daṇḍo ṭhapito hoti so bhikkhuṃ
pahiṇati gaccha bhante itthannāmaṃ brūhi hotu itthannāmassa bhariyā
dhanakkītā ca chandavāsinī ca .pe. dhanakkītā ca muhuttikā cāti
paṭiggaṇhāti vīmaṃsati paccāharati āpatti saṅghādisesassa.
Khaṇḍacakkaṃ.
[475] Saparidaṇḍāya yena daṇḍo ṭhapito hoti so bhikkhuṃ
pahiṇati gaccha bhante itthannāmaṃ brūhi hotu itthannāmassa bhariyā
chandavāsinī ca bhogavāsinī ca .pe. chandavāsinī ca muhuttikā ca .
Chandavāsinī ca dhanakkītā cāti paṭiggaṇhāti vīmaṃsati paccāharati
āpatti saṅghādisesassa.
Baddhacakkaṃ.
Mūlaṃ saṅkhittaṃ.
[476] Saparidaṇḍāya yena daṇḍo ṭhapito hoti so bhikkhuṃ
pahiṇati gaccha bhante itthannāmaṃ brūhi hotu itthannāmassa bhariyā
muhuttikā ca dhanakkītā ca .pe. muhuttikā ca dhajāhaṭā cāti
paṭiggaṇhāti vīmaṃsati paccāharati āpatti saṅghādisesassa.
Ekamūlakaṃ niṭṭhitaṃ.
Evaṃ dumūlakaṃpi yāvanavamūlakaṃ kātabbaṃ.
Idaṃ dasamūlakaṃ.
[477] Saparidaṇḍāya yena daṇḍo ṭhapito hoti so bhikkhuṃ
pahiṇati gaccha bhante itthannāmaṃ brūhi hotu itthannāmassa bhariyā
dhanakkītā ca chandavāsinī ca bhogavāsinī ca paṭavāsinī ca odapattakinī
ca obhatacumbaṭā ca dāsī ca bhariyā ca kammakārī ca bhariyā ca
dhajāhaṭā ca muhuttikā cāti paṭiggaṇhāti vīmaṃsati paccāharati
āpatti saṅghādisesassa.
[478] Māturakkhitā bhikkhuṃ pahiṇati gaccha bhante itthannāmaṃ
brūhi homi itthannāmassa bhariyā dhanakkītāti paṭiggaṇhāti vīmaṃsati
paccāharati āpatti saṅghādisesassa . māturakkhitā bhikkhuṃ pahiṇati
gaccha bhante itthannāmaṃ brūhi homi itthannāmassa bhariyā chandavāsinī
bhogavāsinī paṭavāsinī odapattakinī obhatacumbaṭā dāsī ca bhariyā
ca kammakārī ca bhariyā ca dhajāhaṭā muhuttikāti paṭiggaṇhāti
vīmaṃsati paccāharati āpatti saṅghādisesassa.
Nikkhepapadāni.
[479] Māturakkhitā bhikkhuṃ pahiṇati gaccha bhante itthannāmaṃ
brūhi homi itthannāmassa bhariyā dhanakkītā ca chandavāsinī ca .pe.
Dhanakkītā ca muhuttikā cāti paṭiggaṇhāti vīmaṃsati paccāharati
āpatti saṅghādisesassa.
Khaṇḍacakkaṃ.
[480] Māturakkhitā bhikkhuṃ pahiṇati gaccha bhante itthannāmaṃ
brūhi homi itthannāmassa bhariyā chandavāsinī ca bhogavāsinī ca
.pe. chandavāsinī ca muhuttikā ca . chandavāsinī ca dhanakkītā
cāti paṭiggaṇhāti vīmaṃsati paccāharati āpatti saṅghādisesassa.
Baddhacakkaṃ.
Mūlaṃ saṅkhittaṃ.
[481] Māturakkhitā bhikkhuṃ pahiṇati gaccha bhante itthannāmaṃ
brūhi homi itthannāmassa bhariyā muhuttikā ca dhanakkītā ca .pe.
Muhuttikā ca dhajāhaṭā cāti paṭiggaṇhāti vīmaṃsati paccāharati
āpatti saṅghādisesassa.
Ekamūlakaṃ niṭṭhitaṃ.
Dumūlakādīnipi evaṃ kātabbāni.
Idaṃ dasamūlakaṃ.
[482] Māturakkhitā bhikkhuṃ pahiṇati gaccha bhante itthannāmaṃ
brūhi homi itthannāmassa bhariyā dhanakkītā ca chandavāsinī ca
bhogavāsinī ca paṭavāsinī ca odapattakinī ca obhatacumbaṭā ca
dāsī ca bhariyā ca kammakārī ca bhariyā ca dhajāhaṭā ca muhuttikā
cāti paṭiggaṇhāti vīmaṃsati paccāharati āpatti saṅghādisesassa.
[483] Piturakkhitā bhikkhuṃ pahiṇati . mātāpiturakkhitā bhikkhuṃ
pahiṇati . bhāturakkhitā bhikkhuṃ pahiṇati . bhaginīrakkhitā bhikkhuṃ pahiṇati .
Ñātirakkhitā bhikkhuṃ pahiṇati . gottarakkhitā bhikkhuṃ pahiṇati. Dhammarakkhitā
bhikkhuṃ pahiṇati . sārakkhā bhikkhuṃ pahiṇati . saparidaṇḍā bhikkhuṃ pahiṇati
gaccha bhante itthannāmaṃ brūhi homi itthannāmassa bhariyā dhanakkītāti
paṭiggaṇhāti vīmaṃsati paccāharati āpatti saṅghādisesassa . saparidaṇḍā
bhikkhuṃ pahiṇati gaccha bhante itthannāmaṃ brūhi homi itthannāmassa bhariyā
chandavāsinī . bhogavāsinī paṭavāsinī odapattakinī obhatacumbaṭā dāsī
ca bhariyā ca kammakārī ca bhariyā ca dhajāhaṭā. Muhuttikāti paṭiggaṇhāti
vīmaṃsati paccāharati āpatti saṅghādisesassa.
Nikkhepapadāni.
[484] Saparidaṇḍā bhikkhuṃ pahiṇati gaccha bhante itthannāmaṃ
brūhi homi itthannāmassa bhariyā dhanakkītā ca chandavāsinī ca .pe.
Dhanakkītā ca muhuttikā cāti paṭiggaṇhāti vīmaṃsati paccāharati
āpatti saṅghādisesassa.
Khaṇḍacakkaṃ.
[485] Saparidaṇḍā bhikkhuṃ pahiṇati gaccha bhante itthannāmaṃ
brūhi homi itthannāmassa bhariyā chandavāsinī ca bhogavāsinī ca
.pe. chandavāsinī ca muhuttikā ca . chandavāsinī ca dhanakkītā cāti
paṭiggaṇhāti vīmaṃsati paccāharati āpatti saṅghādisesassa.
Baddhacakkaṃ.
Mūlaṃ saṅkhittaṃ.
[486] Saparidaṇḍā bhikkhuṃ pahiṇati gaccha bhante itthannāmaṃ
brūhi homi itthannāmassa bhariyā muhuttikā ca dhanakkītā ca .pe.
Muhuttikā ca dhajāhaṭā cāti paṭiggaṇhāti vīmaṃsati paccāharati
āpatti saṅghādisesassa.
Ekamūlakaṃ niṭṭhitaṃ.
Dumūlakādīni evameva kātabbāni.
Idaṃ dasamūlakaṃ.
[487] Saparidaṇḍā bhikkhuṃ pahiṇati gaccha bhante itthannāmaṃ
brūhi homi itthannāmassa bhariyā dhanakkītā ca chandavāsinī ca
bhogavāsinī ca paṭavāsinī ca odapattakinī ca obhatacumbaṭā ca
dāsī ca bhariyā ca kammakārī ca bhariyā ca dhajāhaṭā ca muhuttikā
cāti paṭiggaṇhāti vīmaṃsati paccāharati āpatti saṅghādisesassa.
Sabbaṃ cakkapeyyālaṃ 1- niṭṭhitaṃ.
[488] Paṭiggaṇhāti vīmaṃsati paccāharati āpatti saṅghādisesassa.
Paṭiggaṇhāti vīmaṃsati nappaccāharati āpatti thullaccayassa .
Paṭiggaṇhāti na vīmaṃsati paccāharati āpatti thullaccayassa .
Paṭiggaṇhāti na vīmaṃsati nappaccāharati āpatti dukkaṭassa .
Nappaṭiggaṇhāti vīmaṃsati paccāharati āpatti thullaccayassa .
@Footnote: 1 idha cakkapeyyālavidhi yebhuyyena visadiso hoti. patthayantena
@tesu tesu potthakesu oloketabbaṃ.
Nappaṭiggaṇhāti vīmaṃsati nappaccāharati āpatti dukkaṭassa .
Nappaṭiggaṇhāti na vīmaṃsati paccāharati āpatti dukkaṭassa .
Nappaṭiggaṇhāti na vīmaṃsati nappaccāharati anāpatti.
[489] Puriso sambahule bhikkhū āṇāpeti gacchatha bhante
itthannāmaṃ itthiṃ vīmaṃsathāti sabbe paṭiggaṇhanti sabbe vīmaṃsanti
sabbe paccāharanti āpatti sabbesaṃ saṅghādisesassa.
{489.1} Puriso sambahule bhikkhū āṇāpeti gacchatha bhante
itthannāmaṃ itthiṃ vīmaṃsathāti sabbe paṭiggaṇhanti sabbe vīmaṃsanti
ekaṃ paccāharāpenti āpatti sabbesaṃ saṅghādisesassa.
{489.2} Puriso sambahule bhikkhū āṇāpeti gacchatha bhante
itthannāmaṃ itthiṃ vīmaṃsathāti sabbe paṭiggaṇhanti ekaṃ vīmaṃsāpetvā
sabbe paccāharanti āpatti sabbesaṃ saṅghādisesassa.
{489.3} Puriso sambahule bhikkhū āṇāpeti gacchatha bhante
itthannāmaṃ itthiṃ vīmaṃsathāti sabbe paṭiggaṇhanti ekaṃ vīmaṃsāpetvā
ekaṃ paccāharāpenti āpatti sabbesaṃ saṅghādisesassa.
{489.4} Puriso bhikkhuṃ āṇāpeti gaccha bhante itthannāmaṃ itthiṃ
vīmaṃsāti paṭiggaṇhāti vīmaṃsati paccāharati āpatti saṅghādisesassa.
{489.5} Puriso bhikkhuṃ āṇāpeti gaccha bhante itthannāmaṃ itthiṃ
vīmaṃsāti paṭiggaṇhāti vīmaṃsati antevāsiṃ paccāharāpeti āpatti
saṅghādisesassa.
{489.6} Puriso bhikkhuṃ āṇāpeti gaccha bhante itthannāmaṃ
itthiṃ vīmaṃsāti paṭiggaṇhāti antevāsiṃ vīmaṃsāpetvā attanā
paccāharati āpatti saṅghādisesassa . puriso bhikkhuṃ
Āṇāpeti gaccha bhante itthannāmaṃ itthiṃ vīmaṃsāti paṭiggaṇhāti
antevāsiṃ vīmaṃsāpeti antevāsī vīmaṃsitvā bahiddhā paccāharati
āpatti ubhinnaṃ thullaccayassa.
[490] Gacchanto sampādeti āgacchanto visaṃvādeti āpatti
thullaccayassa . gacchanto visaṃvādeti āgacchanto sampādeti
āpatti thullaccayassa . gacchanto sampādeti āgacchanto sampādeti
āpatti saṅghādisesassa . gacchanto visaṃvādeti āgacchanto visaṃvādeti
anāpatti.
[491] Anāpatti saṅghassa vā cetiyassa vā gilānassa vā
karaṇīyena gacchati ummattakassa ādikammikassāti.
[492] Suttā matā ca nikkhantā anitthī itthipaṇḍakā
kalahaṃ katvāna sammodi sañcarittañca paṇḍaketi.
[493] Tena kho pana samayena aññataro puriso aññataraṃ bhikkhuṃ
āṇāpeti gaccha bhante itthannāmaṃ itthiṃ vīmaṃsāti . so gantvā
manusse pucchi kahaṃ itthannāmāti . suttā bhanteti . tassa kukkuccaṃ
ahosi kacci nu kho ahaṃ saṅghādisesassa āpatti āpannoti. Bhagavato
etamatthaṃ ārocesi . anāpatti bhikkhu saṅghādisesassa āpatti
dukkaṭassāti.
{493.1} Tena kho pana samayena aññataro puriso aññataraṃ
bhikkhuṃ āṇāpeti gaccha bhante itthannāmaṃ itthiṃ vīmaṃsāti . so
gantvā manusse pucchi kahaṃ itthannāmāti . matā bhanteti .
Tassa kukkuccaṃ ahosi .pe. anāpatti bhikkhu saṅghādisesassa
āpatti dukkaṭassāti.
{493.2} Tena kho pana samayena aññataro puriso aññataraṃ bhikkhuṃ
āṇāpeti gaccha bhante itthannāmaṃ itthiṃ vīmaṃsāti. So gantvā manusse
pucchi kahaṃ itthannāmāti . nikkhantā bhanteti .pe. anitthī bhanteti
.pe. itthīpaṇḍakā bhanteti . tassa kukkuccaṃ ahosi .pe. Anāpatti
bhikkhu saṅghādisesassa āpatti dukkaṭassāti.
[494] Tena kho pana samayena aññatarā itthī sāmikena saha
bhaṇḍitvā mātugharaṃ agamāsi . kulūpako bhikkhu sammodanīyaṃ akāsi .
Tassa kukkuccaṃ ahosi .pe. alaṃvacanīyā bhikkhūti . nālaṃvacanīyā
bhagavāti. Anāpatti bhikkhu nālaṃvacanīyeti.
[495] Tena kho pana samayena aññataro bhikkhu paṇḍake
sañcarittaṃ samāpajji . tassa kukkuccaṃ ahosi .pe. anāpatti
bhikkhu saṅghādisesassa āpatti thullaccayassāti.
Pañcamasaṅghādisesaṃ niṭṭhitaṃ.
----------
Chaṭṭhasaṅghādisesaṃ
[496] Tena samayena buddho bhagavā rājagahe viharati veḷuvane
kalandakanivāpe . tena kho pana samayena āḷavikā 1- bhikkhū
saññācikāyo kuṭikāyo 2- kārāpenti assāmikāyo attuddesikāyo
appamāṇikāyo . tāyo na niṭṭhānaṃ gacchanti . te yācanabahulā
viññattibahulā viharanti purisaṃ detha purisatthakaraṃ detha goṇaṃ detha
sakaṭaṃ detha vāsiṃ detha pharasuṃ detha kuṭhāriṃ detha kuddālaṃ detha
nikhādanaṃ detha valliṃ detha veḷuṃ detha muñjaṃ detha pabbajaṃ detha
tiṇaṃ detha mattikaṃ dethāti . manussā upaddutā yācanāya upaddutā
viññattiyā bhikkhū disvā ubbijjantipi uttasantipi palāyantipi
aññenapi gacchanti aññenapi mukhaṃ karonti dvāraṃpi thakenti
gāvīpi disvā palāyanti bhikkhūti maññamānā.
[497] Athakho āyasmā mahākassapo rājagahe vassaṃ vuttho
yena āḷavī tena pakkāmi anupubbena cārikaṃ caramāno 3- yena
āḷavī tadavasari . tatra sudaṃ āyasmā mahākassapo āḷaviyaṃ viharati
aggāḷave cetiye . athakho āyasmā mahākassapo pubbaṇhasamayaṃ
nivāsetvā pattacīvaramādāya āḷaviṃ piṇḍāya pāvisi .
@Footnote: 1 Yu. āḷavakā. 2 Yu. Ma. kuṭiyo. 3 idaṃ pāṭhadvayaṃ sabbattha
@na dissati.
Manussā āyasmantaṃ mahākassapaṃ passitvā ubbijjantipi uttasantipi
palāyantipi aññenapi gacchanti aññenapi mukhaṃ karonti dvāraṃpi
thakenti . athakho āyasmā mahākassapo āḷaviyaṃ piṇḍāya caritvā
pacchābhattaṃ piṇḍapātapaṭikkanto bhikkhū āmantesi pubbāyaṃ āvuso
āḷavī subhikkhā ahosi sulabhapiṇḍā sukarā uñchena paggahena
yāpetuṃ etarahi kho 1- panāyaṃ āḷavī dubbhikkhā dullabhapiṇḍā na
sukarā uñchena paggahena yāpetuṃ ko nu kho āvuso hetu ko
paccayo yenāyaṃ āḷavī dubbhikkhā dullabhapiṇḍā na sukarā uñchena
paggahena yāpetunti . athakho te bhikkhū āyasmato mahākassapassa
etamatthaṃ ārocesuṃ.
[498] Athakho bhagavā rājagahe yathābhirantaṃ viharitvā yena
āḷavī tena cārikaṃ pakkāmi anupubbena cārikaṃ caramāno yena
āḷavī tadavasari . tatra sudaṃ bhagavā āḷaviyaṃ viharati aggāḷave
cetiye . athakho āyasmā mahākassapo yena bhagavā tenupasaṅkami
upasaṅkamitvā bhagavantaṃ abhivādetvā ekamantaṃ nisīdi . ekamantaṃ
nisinno kho āyasmā mahākassapo bhagavato etamatthaṃ ārocesi .
Athakho bhagavā etasmiṃ nidāne etasmiṃ pakaraṇe bhikkhusaṅghaṃ
sannipātāpetvā āḷavike bhikkhū paṭipucchi saccaṃ kira tumhe bhikkhave
saññācikāyo kuṭikāyo kārāpetha assāmikāyo attuddesikāyo
@Footnote: 1 Yu. Ma. potthakesu ayaṃ pāṭho na hoti.
Appamāṇikāyo tāyo na niṭṭhānaṃ gacchanti te tumhe yācanabahulā
viññattibahulā viharatha purisaṃ detha purisatthakaraṃ detha goṇaṃ detha
sakaṭaṃ detha vāsiṃ detha pharusaṃ detha kuṭhāriṃ detha kuddālaṃ detha
nikhādanaṃ detha valliṃ detha veḷuṃ detha muñjaṃ detha pabbajaṃ detha
tiṇaṃ detha mattikaṃ dethāti manussā upaddutā yācanāya upaddutā
viññattiyā bhikkhū disvā ubbijjantipi uttasantipi palāyantipi
aññenapi gacchanti aññenapi mukhaṃ karonti dvāraṃpi thakenti
gāvīpi disvā palāyanti bhikkhūti maññamānāti. Saccaṃ bhagavāti.
{498.1} Vigarahi buddho bhagavā ananucchavikaṃ moghapurisā .pe. Akaraṇīyaṃ
kathaṃ hi nāma tumhe moghapurisā saññācikāyo kuṭikāyo kārāpessatha
{498.2} assāmikāyo attuddesikāyo appamāṇikāyo tāyo na
niṭṭhānaṃ gacchanti te tumhe yācanabahulā viññattibahulā viharissatha
purisaṃ detha purisatthakaraṃ detha goṇaṃ detha sakaṭaṃ detha vāsiṃ detha
pharusaṃ detha kuṭhāriṃ detha kuddālaṃ detha nikhādanaṃ detha valliṃ detha
veḷuṃ detha muñjaṃ detha pabbajaṃ detha tiṇaṃ detha mattikaṃ dethāti netaṃ
moghapurisā appasannānaṃ vā pasādāya .pe. aññathattāyāti .
Athakho bhagavā āḷavike bhikkhū anekapariyāyena vigarahitvā .pe.
Bhikkhūnaṃ tadanucchavikaṃ tadanulomikaṃ dhammiṃ kathaṃ katvā bhikkhū āmantesi 1-
@Footnote: 1 netaṃ moghapurisā appasannānaṃ vā pasādāya .pe. vigarahitvā
@dhammiṃ kathaṃ katvā bhikkhū āmantesīti sabbapotthakesu āgataṃ.
[499] Bhūtapubbaṃ bhikkhave dve bhātaro isayo gaṅgaṃ nadiṃ
upanissāya vihariṃsu . athakho bhikkhave maṇikaṇṭho nāgarājā gaṅgaṃ
nadiṃ uttaritvā yena kaniṭṭho isi tenupasaṅkami upasaṅkamitvā
kaniṭṭhaṃ isiṃ sattakkhattuṃ bhogehi parikkhipitvā upari muddhani mahantaṃ
phaṇaṃ karitvā aṭṭhāsi . athakho bhikkhave kaniṭṭho isi tassa nāgassa
bhayā kiso ahosi lūkho dubbaṇṇo uppaṇḍuppaṇḍukajāto
dhamanisanthatagatto . addasā kho bhikkhave jeṭṭho isi kaniṭṭhaṃ
isiṃ kisaṃ lūkhaṃ dubbaṇṇaṃ uppaṇḍuppaṇḍukajātaṃ dhamanisanthatagattaṃ
disvāna kaniṭṭhaṃ isiṃ etadavoca kissa tvaṃ bho kiso lūkho
dubbaṇṇo uppaṇḍuppaṇḍukajāto dhamanisanthatagattoti . idha
me bho maṇikaṇṭho nāgarājā gaṅgaṃ nadiṃ uttaritvā yenāhaṃ
tenupasaṅkami upasaṅkamitvā maṃ sattakkhattuṃ bhogehi parikkhipitvā
upari muddhani mahantaṃ phaṇaṃ karitvā aṭṭhāsi tassāhaṃ bho nāgassa
bhayā kiso lūkho dubbaṇṇo uppaṇḍuppaṇḍukajāto dhamanisanthatagattoti .
Icchasi pana tvaṃ bho tassa nāgassa anāgamananti . icchāmahaṃ
bho tassa nāgassa anāgamananti . api pana tvaṃ bho tassa nāgassa
kiñci passasīti . passāmahaṃ bho maṇimassa kaṇṭhe pilandhananti .
Tenahi tvaṃ bho taṃ nāgaṃ maṇiṃ yāca maṇiṃ me bho dehi maṇinā
me atthoti . athakho bhikkhave maṇikaṇṭho nāgarājā gaṅgaṃ
nadiṃ uttaritvā yena kaniṭṭho isi tenupasaṅkami upasaṅkamitvā
Ekamantaṃ aṭṭhāsi . ekamantaṃ ṭhitaṃ kho bhikkhave maṇikaṇṭhaṃ nāgarājānaṃ
kaniṭṭho isi etadavoca maṇiṃ me bho dehi maṇinā me atthoti.
{499.1} Athakho bhikkhave maṇikaṇṭho nāgarājā bhikkhu maṇiṃ
yācati bhikkhussa maṇinā atthoti khippameva agamāsi . dutiyampi
kho bhikkhave maṇikaṇṭho nāgarājā gaṅgaṃ nadiṃ uttaritvā yena
kaniṭṭho isi tenupasaṅkami . addasā kho bhikkhave kaniṭṭho isi
maṇikaṇṭhaṃ nāgarājānaṃ dūrato va āgacchantaṃ disvāna maṇikaṇṭhaṃ
nāgarājānaṃ etadavoca maṇiṃ me bho dehi maṇinā me atthoti.
{499.2} Athakho bhikkhave maṇikaṇṭho nāgarājā bhikkhu maṇiṃ yācati
bhikkhussa maṇinā atthoti tato va paṭinivatti . tatiyampi kho bhikkhave
maṇikaṇṭho nāgarājā gaṅgaṃ nadiṃ uttarati . addasā kho bhikkhave
kaniṭṭho isi maṇikaṇṭhaṃ nāgarājānaṃ gaṅgaṃ nadiṃ uttarantaṃ disvāna
maṇikaṇṭhaṃ nāgarājānaṃ etadavoca maṇiṃ me bho dehi maṇinā me
atthoti . athakho bhikkhave maṇikaṇṭho nāgarājā kaniṭṭhaṃ isiṃ
gāthāhi ajjhabhāsi
mamannapānaṃ vipulaṃ uḷāraṃ
uppajjatīmassa maṇissa hetu
tante na dassaṃ atiyācakosi
na cāpi te assamamāgamissaṃ.
Susū yathā sakkharadhotapāṇi
Tāsesi maṃ selamayācamāno 1-
tante na dassaṃ atiyācakosi
na cāpi te assamamāgamissanti.
{499.3} Athakho bhikkhave maṇikaṇṭho nāgarājā bhikkhu maṇiṃ yācati
bhikkhussa maṇinā atthoti pakkāmi . tathā pakkanto va ahosi na
puna paccāgañchi . athakho bhikkhave kaniṭṭho isi tassa nāgassa
dassanīyassa adassanena bhiyyoso mattāya kiso ahosi lūkho
dubbaṇṇo uppaṇḍuppaṇḍukajāto dhamanisanthatagatto . addasā
kho bhikkhave jeṭṭho isi kaniṭṭhaṃ isiṃ bhiyyoso mattāya kisaṃ lūkhaṃ
dubbaṇṇaṃ uppaṇḍuppaṇḍukajātaṃ dhamanisanthatagattaṃ disvāna
kaniṭṭhaṃ isiṃ etadavoca kissa tvaṃ bho bhiyyoso mattāya kiso
lūkho dubbaṇṇo uppaṇḍuppaṇḍukajāto dhamanisanthatagattoti .
Tassāhaṃ bho nāgassa dassanīyassa adassanena bhiyyoso mattāya
kiso lūkho dubbaṇṇo uppaṇḍuppaṇḍukajāto dhamanisanthatagattoti .
Athakho bhikkhave jeṭṭho isi kaniṭṭhaṃ isiṃ gāthāya ajjhabhāsi
na taṃ yāce yassa piyaṃ jigiṃse
desso ca 2- hoti atiyācanāya
@Footnote: 1 selaṃ maṃ yācamānoti padacchedo. 2 sabbattha videssoti
@āgataṃ.
Nāgo maṇiṃ yācito brāhmaṇena
adassanaññeva tadajjhagamāti.
Tesaṃ hi nāma bhikkhave tiracchānagatānaṃ pāṇānaṃ amanāpā bhavissati
yācanā amanāpā viññatti kimaṅgaṃ pana manussabhūtānaṃ.
[500] Bhūtapubbaṃ bhikkhave aññataro bhikkhu himavantapasse viharati
aññatarasmiṃ vanasaṇḍe . tassa kho pana 1- bhikkhave vanasaṇḍassa
avidūre mahantaṃ ninnaṃ pallalaṃ . athakho bhikkhave mahāsakuṇasaṅgho
tasmiṃ pallale divasaṃ gocaraṃ caritvā sāyaṃ taṃ vanasaṇḍaṃ vāsāya
upagacchati . athakho bhikkhave so bhikkhu tassa sakuṇasaṅghassa saddena
ubbāḷho yenāhaṃ tenupasaṅkami upasaṅkamitvā maṃ abhivādetvā
ekamantaṃ nisīdi.
{500.1} Ekamantaṃ nisinnaṃ kho ahaṃ bhikkhave taṃ bhikkhuṃ etadavocaṃ
kacci bhikkhu khamanīyaṃ kacci yāpanīyaṃ kaccisi appakilamathena
addhānaṃ āgato kuto ca tvaṃ bhikkhu āgacchasīti . khamanīyaṃ bhagavā
yāpanīyaṃ bhagavā appakilamathena cāhaṃ bhante addhānaṃ āgato
atthi bhante himavantapasse mahāvanasaṇḍo tassa kho pana bhante
vanasaṇḍassa avidūre mahantaṃ ninnaṃ pallalaṃ athakho bhante mahāsakuṇasaṅgho
tasmiṃ pallale divasaṃ gocaraṃ caritvā sāyaṃ taṃ vanasaṇḍaṃ vāsāya
upagacchati tato ahaṃ bhagavā āgacchāmi tassa sakuṇasaṅghassa
saddena ubbāḷhoti . icchasi pana tvaṃ bhikkhu tassa sakuṇasaṅghassa
@Footnote: 1 yuropiyapotthakeyaṃ pāṭho na paññāyati.
Anāgamananti . icchāmahaṃ bhante tassa sakuṇasaṅghassa anāgamananti .
Tenahi tvaṃ bhikkhu tattha gantvā taṃ vanasaṇḍaṃ ajjhogāhetvā
rattiyā paṭhamaṃ yāmaṃ tikkhattuṃ saddamanussāvehi suṇantu me bhonto
sakuṇā yāvatikā imasmiṃ vanasaṇḍe vāsaṃ upagatā pattena me
attho ekekaṃ me bhonto pattaṃ dadantūti rattiyā majjhimaṃ yāmaṃ
.pe. rattiyā pacchimaṃ yāmaṃ tikkhattuṃ saddamanussāvehi suṇantu
me bhonto sakuṇā yāvatikā imasmiṃ vanasaṇḍe vāsaṃ upagatā
pattena me attho ekekaṃ me bhonto pattaṃ dadantūti.
{500.2} Athakho bhikkhave so bhikkhu tattha gantvā taṃ vanasaṇḍaṃ
ajjhogāhetvā rattiyā paṭhamaṃ yāmaṃ tikkhattuṃ saddamanussāvesi suṇantu
me bhonto sakuṇā yāvatikā imasmiṃ vanasaṇḍe vāsaṃ upagatā pattena
me attho ekekaṃ me bhonto pattaṃ dadantūti rattiyā majjhimaṃ yāmaṃ
.pe. rattiyā pacchimaṃ yāmaṃ tikkhattuṃ saddamanussāvesi suṇantu me
bhonto sakuṇā yāvatikā imasmiṃ vanasaṇḍe vāsaṃ upagatā pattena
me attho ekekaṃ me bhonto pattaṃ dadantūti . Athakho bhikkhave so
sakuṇasaṅgho bhikkhu pattaṃ yācati bhikkhussa pattena atthoti tamhā
vanasaṇḍā pakkāmi tathā pakkanto va ahosi na puna paccāgañchi .
Tesaṃ hi nāma bhikkhave tiracchānagatānaṃ pāṇānaṃ amanāpā bhavissati
yācanā amanāpā viññatti kimaṅgaṃ pana manussabhūtānaṃ.
[501] Bhūtapubbaṃ bhikkhave raṭṭhapālassa kulaputtassa pitā raṭṭhapālaṃ
Kulaputtaṃ gāthāya ajjhabhāsi
apāhante na jānāmi raṭṭhapāla bahū janā 1-
ye maṃ saṅgamma yācanti kasmā maṃ tvaṃ na yācasīti.
Yācako appiyo hoti yācaṃ adadamappiyo
tasmāhantaṃ na yācāmi mā me viddesanā ahūti.
So hi nāma bhikkhave raṭṭhapālo kulaputto sakaṃ pitaraṃ evaṃ vakkhati
kimaṅgaṃ pana jano janaṃ.
The Pali Tipitaka in Roman Character Volume 1 page 302-337.
http://84000.org/tipitaka/read/roman_item_s.php?book=1&item=429&items=73
Classified by [Item Number] :-
http://84000.org/tipitaka/read/roman_item_s.php?book=1&item=429&items=73&mode=bracket
Compare with The Pali Tipitaka in Thai Character :-
http://84000.org/tipitaka/read/pali_item_s.php?book=1&item=427&items=73
Compare with The Royal Version of Thai Tipitaka :-
http://84000.org/tipitaka/read/byitem_s.php?book=1&item=427&items=73
Study Atthakatha :-
http://84000.org/tipitaka/attha/attha.php?b=1&i=427
The Pali Atthakatha in Thai :-
http://84000.org/tipitaka/atthapali/read_th.php?B=2&A=972
The Pali Atthakatha in Roman :-
http://84000.org/tipitaka/atthapali/read_rm.php?B=2&A=972
Contents of The Tipitaka Volume 1
http://84000.org/tipitaka/read/?index_1
บันทึก ๑๔ พฤศจิกายน พ.ศ. ๒๕๖๐.
การแสดงผลนี้อ้างอิงข้อมูลจากพระไตรปิฎกฉบับภาษาบาลี อักษรโรมัน.
หากพบข้อผิดพลาด กรุณาแจ้งได้ที่ [email protected]
