ขอนอบน้อมแด่
พระผู้มีพระภาคอรหันตสัมมาสัมพุทธเจ้า
                      พระองค์นั้น
บทนำ พระวินัยปิฎก พระสุตตันตปิฎก พระอภิธรรมปิฎก ค้นพระไตรปิฎก ชาดก หนังสือธรรมะ
     ฉบับหลวง   ฉบับมหาจุฬาฯ   บาลีอักษรไทย   PaliRoman 
อ่านหน้า[ต่าง] แรกอ่านหน้า[ต่าง] ที่แล้วแสดงหมายเลขหน้า
ในกรณี :- 
   บรรทัดแรกของแต่ละหน้าอ่านหน้า[ต่าง] ถัดไปอ่านหน้า[ต่าง] สุดท้าย คลิกเพื่อเปลี่ยน ฐญ เป็นแบบดั้งเดิม
พระไตรปิฎกเล่มที่ ๓๖ ภาษาบาลี อักษรไทย พระอภิธรรมปิฎกเล่มที่ ๓ อภิ. ธาตุกถา เจว ปุคฺคลปญฺญตฺติ จ

                                        ติกนิทฺเทโส
     [๘๔]   กตโม  จ  ปุคฺคโล  นิราโส  อิเธกจฺโจ  ปุคฺคโล  ทุสฺสีโล
โหติ   ปาปธมฺโม   อสุจิสงฺกสฺสรสมาจาโร   ปฏิจฺฉนฺนกมฺมนฺโต  อสฺสมโณ
สมณปฏิญฺโญ    อพฺรหฺมจารี    พฺรหฺมจารีปฏิญฺโญ    อนฺโตปูติ   อวสฺสุโต
กสมฺพุกชาโต   โส   สุณาติ   อิตฺถนฺนาโม   กิร  ภิกฺขุ  อาสวานํ  ขยา
อนาสวํ   เจโตวิมุตฺตึ   ปญฺญาวิมุตฺตึ   ทิฏฺเฐว   ธมฺเม   สยํ   อภิญฺญา
สจฺฉิกตฺวา   อุปสมฺปชฺช   วิหรตีติ   ตสฺส   น   เอวํ   โหติ   กุทาสฺสุ
นามาหมฺปิ   อาสวานํ  ขยา  อนาสวํ  เจโตวิมุตฺตึ  ปญฺญาวิมุตฺตึ  ทิฏฺเฐว
ธมฺเม    สยํ    อภิญฺญา   สจฺฉิกตฺวา   อุปสมฺปชฺช   วิหริสฺสามีติ   อยํ
วุจฺจติ ปุคฺคโล นิราโส ฯ
     {๘๔.๑}   กตโม  จ ปุคฺคโล อาสํโส อิเธกจฺโจ ปุคฺคโล สีลวา โหติ
กลฺยาณธมฺโม   โส   สุณาติ   อิตฺถนฺนาโม   กิร  ภิกฺขุ  อาสวานํ  ขยา
อนาสวํ   เจโตวิมุตฺตึ   ปญฺญาวิมุตฺตึ   ทิฏฺเฐว   ธมฺเม   สยํ   อภิญฺญา
สจฺฉิกตฺวา   อุปสมฺปชฺช  วิหรตีติ  ตสฺส  เอวํ  โหติ  กุทาสฺสุ  นามาหมฺปิ
อาสวานํ   ขยา   อนาสวํ   เจโตวิมุตฺตึ   ปญฺญาวิมุตฺตึ  ทิฏฺเฐว  ธมฺเม
สยํ    อภิญฺญา    สจฺฉิกตฺวา   อุปสมฺปชฺช   วิหริสฺสามีติ   อยํ   วุจฺจติ
ปุคฺคโล อาสํโส ฯ
     {๘๔.๒}   กตโม   จ   ปุคฺคโล   วิคตาโส  อิเธกจฺโจ  ปุคฺคโล
อาสวานํ    ขยา    อนาสวํ    เจโตวิมุตฺตึ    ปญฺญาวิมุตฺตึ    ทิฏฺเฐว
ธมฺเม   สยํ   อภิญฺญา   สจฺฉิกตฺวา   อุปสมฺปชฺช   วิหรติ   โส  สุณาติ
อิตฺถนฺนาโม      กิร      ภิกฺขุ      อาสวานํ     ขยา     อนาสวํ
เจโตวิมุตฺตึ   ปญฺญาวิมุตฺตึ   ทิฏฺเฐว   ธมฺเม   สยํ  อภิญฺญา  สจฺฉิกตฺวา
อุปสมฺปชฺช   วิหรตีติ   ตสฺส   น   เอวํ   โหติ   กุทาสฺสุ   นามาหมฺปิ
อาสวานํ   ขยา   อนาสวํ   เจโตวิมุตฺตึ   ปญฺญาวิมุตฺตึ  ทิฏฺเฐว  ธมฺเม
สยํ  อภิญฺญา  สจฺฉิกตฺวา  อุปสมฺปชฺช  วิหริสฺสามีติ  ฯ  ตํ  กิสฺส  เหตุ ฯ
ยาหิสฺส    ปุพฺเพ    อวิมุตฺตสฺส   วิมุตฺตาสา   สา   ปฏิปสฺสทฺธา   อยํ
วุจฺจติ ปุคฺคโล วิคตาโส ฯ
                         ตตฺถ กตเม ตโย คิลานูปมา ปุคฺคลา ฯ
     [๘๕]   ตโย  คิลานา  อิเธกจฺโจ  คิลาโน  ลภนฺโต  วา สปฺปายานิ
โภชนานิ  อลภนฺโต  วา  สปฺปายานิ  โภชนานิ  ลภนฺโต  วา  สปฺปายานิ
เภสชฺชานิ   อลภนฺโต  วา  สปฺปายานิ  เภสชฺชานิ  ลภนฺโต  วา  ปฏิรูปํ
อุปฏฺฐากํ   อลภนฺโต   วา   ปฏิรูปํ   อุปฏฺฐากํ   เนว  วุฏฺฐาติ  ตมฺหา
อาพาธา ฯ
     {๘๕.๑}   อิธ  ปเนกจฺโจ  คิลาโน ลภนฺโต วา สปฺปายานิ โภชนานิ
อลภนฺโต  วา  สปฺปายานิ  โภชนานิ  ลภนฺโต  วา  สปฺปายานิ เภสชฺชานิ
อลภนฺโต   วา   สปฺปายานิ  เภสชฺชานิ  ลภนฺโต  วา  ปฏิรูปํ  อุปฏฺฐากํ
อลภนฺโต วา ปฏิรูปํ อุปฏฺฐากํ วุฏฺฐาติ ตมฺหา อาพาธา ฯ
     {๘๕.๒}   อิธ  ปเนกจฺโจ  คิลาโน  ลภนฺโต  สปฺปายานิ  โภชนานิ
โน   อลภนฺโต  ลภนฺโต  สปฺปายานิ  เภสชฺชานิ  โน  อลภนฺโต  ลภนฺโต
ปฏิรูปํ   อุปฏฺฐากํ   โน  อลภนฺโต  วุฏฺฐาติ  ตมฺหา  อาพาธา  ฯ  ตตฺร
ยฺวายํ    คิลาโน    ลภนฺโต   สปฺปายานิ   โภชนานิ   โน   อลภนฺโต
ลภนฺโต    สปฺปายานิ   เภสชฺชานิ   โน   อลภนฺโต   ลภนฺโต   ปฏิรูปํ
อุปฏฺฐากํ   โน   อลภนฺโต   วุฏฺฐาติ   ตมฺหา   อาพาธา   อิมํ  คิลานํ
ปฏิจฺจ    ภควตา    คิลานภตฺตํ    อนุญฺญาตํ   คิลานเภสชฺชํ   อนุญฺญาตํ
คิลานุปฏฺฐาโก    อนุญฺญาโต   อิมญฺจ   ปน   คิลานํ   ปฏิจฺจ   อญฺเญปิ
คิลานา อุปฏฺฐาตพฺพา ฯ
     [๘๖]   เอวเมว   ตโย  คิลานูปมา  ปุคฺคลา  สนฺโต  สํวิชฺชมานา
โลกสฺมึ   ฯ   กตเม   ตโย   ฯ   อิเธกจฺโจ   ปุคฺคโล  ลภนฺโต  วา
ตถาคตํ   ทสฺสนาย   อลภนฺโต   วา   ตถาคตํ  ทสฺสนาย  ลภนฺโต  วา
ตถาคตปฺปเวทิตํ   ธมฺมวินยํ   สวนาย   อลภนฺโต   วา  ตถาคตปฺปเวทิตํ
ธมฺมวินยํ สวนาย เนว โอกฺกมติ นิยามํ กุสเลสุ ธมฺเมสุ สมฺมตฺตํ
     {๘๖.๑}   อิธ  ปเนกจฺโจ  ปุคฺคโล  ลภนฺโต  วา ตถาคตํ ทสฺสนาย
อลภนฺโต   วา   ตถาคตํ   ทสฺสนาย   ลภนฺโต   วา   ตถาคตปฺปเวทิตํ
ธมฺมวินยํ    สวนาย    อลภนฺโต    วา    ตถาคตปฺปเวทิตํ   ธมฺมวินยํ
สวนาย โอกฺกมติ นิยามํ กุสเลสุ ธมฺเมสุ สมฺมตฺตํ ฯ
     {๘๖.๒}   อิธ  ปเนกจฺโจ  ปุคฺคโล  ลภนฺโต  ตถาคตํ ทสฺสนาย โน
อลภนฺโต   ลภนฺโต   ตถาคตปฺปเวทิตํ  ธมฺมวินยํ  สวนาย  โน  อลภนฺโต
โอกฺกมติ นิยามํ กุสเลสุ ธมฺเมสุ สมฺมตฺตํ ฯ
     {๘๖.๓}   ตตฺร  ยฺวายํ  ปุคฺคโล  ลภนฺโต  ตถาคตํ  ทสฺสนาย  โน
อลภนฺโต   ลภนฺโต   ตถาคตปฺปเวทิตํ  ธมฺมวินยํ  สวนาย  โน  อลภนฺโต
โอกฺกมติ  นิยามํ  กุสเลสุ  ธมฺเมสุ  สมฺมตฺตํ  อิมํ  ปุคฺคลํ  ปฏิจฺจ ภควตา
ธมฺมเทสนา    อนุญฺญาตา   อิมญฺจ   ปน   ปุคฺคลํ   ปฏิจฺจ   อญฺเญสมฺปิ
ธมฺโม   เทเสตพฺโพ   ฯ   อิเม   ตโย   คิลานูปมา   ปุคฺคลา  สนฺโต
สํวิชฺชมานา โลกสฺมึ ฯ
     [๘๗]   กตโม   จ  ปุคฺคโล  กายสกฺขี  อิเธกจฺโจ  ปุคฺคโล  อฏฺฐ
วิโมกฺเข   กาเยน   ผุสิตฺวา   วิหรติ  ปญฺญาย  จสฺส  ทิสฺวา  เอกจฺเจ
อาสวา ปริกฺขีณา โหนฺติ อยํ วุจฺจติ ปุคฺคโล กายสกฺขี ฯ
     {๘๗.๑}   กตโม  จ  ปุคฺคโล  ทิฏฺฐิปฺปตฺโต  อิเธกจฺโจ ปุคฺคโล อิทํ
ทุกฺขนฺติ   ยถาภูตํ   ปชานาติ   อยํ   ทุกฺขสมุทโยติ   ยถาภูตํ  ปชานาติ
อยํ   ทุกฺขนิโรโธติ   ยถาภูตํ  ปชานาติ  อยํ  ทุกฺขนิโรธคามินี  ปฏิปทาติ
ยถาภูตํ   ปชานาติ   ตถาคตปฺปเวทิตา  จสฺส  ธมฺมา  ปญฺญาย  โวทิฏฺฐา
โหนฺติ   โวจริตา   ปญฺญาย  จสฺส  ทิสฺวา  เอกจฺเจ  อาสวา  ปริกฺขีณา
โหนฺติ อยํ วุจฺจติ ปุคฺคโล ทิฏฺฐิปฺปตฺโต ฯ
     {๘๗.๒}   กตโม  จ  ปุคฺคโล  สทฺธาวิมุตฺโต อิเธกจฺโจ ปุคฺคโล อิทํ
ทุกฺขนฺติ   ยถาภูตํ   ปชานาติ   ฯเปฯ   ตถาคตปฺปเวทิตา  จสฺส  ธมฺมา
ปญฺญาย   โวทิฏฺฐา   โหนฺติ  โวจริตา  ปญฺญาย  จสฺส  ทิสฺวา  เอกจฺเจ
อาสวา  ปริกฺขีณา  โหนฺติ  โน  จ  โข  ยถา  ทิฏฺฐิปฺปตฺตสฺส  อยํ วุจฺจติ
ปุคฺคโล สทฺธาวิมุตฺโต ฯ
     [๘๘]   กตโม    จ   ปุคฺคโล   คูถภาณี   อิเธกจฺโจ   ปุคฺคโล
มุสาวาที   โหติ   สภคฺคโต   วา   ปริสคฺคโต  วา  ญาติมชฺฌคโต  วา
ปูคมชฺฌคโต   วา   ราชกุลมชฺฌคโต   วา   อภินีโต   สกฺขิปุฏฺโฐ  เอหิ
โภ  ปุริส  ยํ  ชานาสิ  ตํ  วเทหีติ  โส  อชานํ  วา อาห ๑- ชานามีติ
ชานํ  วา  อาห  น  ชานามีติ  อปสฺสํ  วา  อาห  ปสฺสามีติ  ปสฺสํ  วา
อาห  น  ปสฺสามีติ  อิติ  อตฺตเหตุ  วา  ปรเหตุ  วา  อามิสกิญฺจิกฺขเหตุ
@เชิงอรรถ:  ยุ. อหํ ฯ
วา สมฺปชานมุสา ภาสิตา โหติ อยํ วุจฺจติ ปุคฺคโล คูถภาณี ฯ
     {๘๘.๑}   กตโม  จ  ปุคฺคโล ปุปฺผภาณี อิเธกจฺโจ ปุคฺคโล มุสาวาทํ
ปหาย   มุสาวาทา   ปฏิวิรโต   โหติ   สภคฺคโต  วา  ปริสคฺคโต  วา
ญาติมชฺฌคโต   วา   ปูคมชฺฌคโต   วา   ราชกุลมชฺฌคโต  วา  อภินีโต
สกฺขิปุฏฺโฐ  เอหิ  โภ  ปุริส  ยํ  ชานาสิ  ตํ วเทหีติ โส อชานํ วา อาห
น  ชานามีติ  ชานํ  วา  อาห ชานามีติ อปสฺสํ วา อาห น ปสฺสามีติ ปสฺสํ
วา  อาห  ปสฺสามีติ  อิติ  อตฺตเหตุ  วา  ปรเหตุ  วา อามิสกิญฺจิกฺขเหตุ
วา น สมฺปชานมุสา ภาสิตา โหติ อยํ วุจฺจติ ปุคฺคโล ปุปฺผภาณี ฯ
     {๘๘.๒}   กตโม  จ  ปุคฺคโล  มธุภาณี  อิเธกจฺโจ ปุคฺคโล ยา สา
วาจา   เนฬา   กณฺณสุขา   เปมนียา   หทยงฺคมา   โปรี  พหุชนกนฺตา
พหุชนมนาปา   ตถารูปึ   วาจํ   ภาสิตา   โหติ   อยํ  วุจฺจติ  ปุคฺคโล
มธุภาณี ฯ
     [๘๙]   กตโม   จ   ปุคฺคโล   อรุกูปมจิตฺโต  อิเธกจฺโจ  ปุคฺคโล
โกธโน  โหติ  อุปายาสพหุโล  อปฺปมฺปิ  วุตฺโต  สมาโน  อภิสชฺชติ กุปฺปติ
พฺยาปชฺชติ    ปติฏฺฐียติ    โกปญฺจ   โทสญฺจ   อปฺปจฺจยญฺจ   ปาตุกโรติ
เสยฺยถาปิ  นาม  ทุฏฺฐารุโก  กฏฺเฐน  วา  กฐลาย วา ฆฏฺฏิโต ภิยฺโยโส
มตฺตาย   อาสวํ   เทติ   เอวเมว  อิเธกจฺโจ  ปุคฺคโล  โกธโน  โหติ
อุปายาสพหุโล   อปฺปมฺปิ   วุตฺโต  สมาโน  อภิสชฺชติ  กุปฺปติ  พฺยาปชฺชติ
ปติฏฺฐียติ   โกปญฺจ   โทสญฺจ   อปฺปจฺจยญฺจ   ปาตุกโรติ   อยํ   วุจฺจติ
ปุคฺคโล อรุกูปมจิตฺโต ฯ
     {๘๙.๑}   กตโม    จ    ปุคฺคโล   วิชฺชูปมจิตฺโต   อิเธกจฺโจ
ปุคฺคโล    อิทํ    ทุกฺขนฺติ    ยถาภูตํ   ปชานาติ   อยํ   ทุกฺขสมุทโยติ
ยถาภูตํ    ปชานาติ    อยํ   ทุกฺขนิโรโธติ   ยถาภูตํ   ปชานาติ   อยํ
ทุกฺขนิโรธคามินี    ปฏิปทาติ    ยถาภูตํ   ปชานาติ   เสยฺยถาปิ   นาม
จกฺขุมา   ปุริโส   รตฺตนฺธการติมิสาย   วิชฺชนฺตริกาย   รูปานิ  ปสฺเสยฺย
เอวเมว   อิเธกจฺโจ   ปุคฺคโล   อิทํ  ทุกฺขนฺติ  ยถาภูตํ  ปชานาติ  อยํ
ทุกฺขสมุทโยติ   ยถาภูตํ  ปชานาติ  อยํ  ทุกฺขนิโรโธติ  ยถาภูตํ  ปชานาติ
อยํ    ทุกฺขนิโรธคามินี   ปฏิปทาติ   ยถาภูตํ   ปชานาติ   อยํ   วุจฺจติ
ปุคฺคโล วิชฺชูปมจิตฺโต ฯ
     {๘๙.๒}   กตโม    จ    ปุคฺคโล   วชิรูปมจิตฺโต   อิเธกจฺโจ
ปุคฺคโล   อาสวานํ   ขยา   อนาสวํ  เจโตวิมุตฺตึ  ปญฺญาวิมุตฺตึ  ทิฏฺเฐว
ธมฺเม    สยํ   อภิญฺญา   สจฺฉิกตฺวา   อุปสมฺปชฺช   วิหรติ   เสยฺยถาปิ
นาม   วชิรสฺส   นตฺถิ   กิญฺจิ  อเภชฺชํ  นาม  มณิ  วา  ปาสาโณ  วา
เอวเมว   อิเธกจฺโจ   ปุคฺคโล   อาสวานํ  ขยา  อนาสวํ  เจโตวิมุตฺตึ
ปญฺญาวิมุตฺตึ   ทิฏฺเฐว   ธมฺเม   สยํ   อภิญฺญา   สจฺฉิกตฺวา  อุปสมฺปชฺช
วิหรติ อยํ วุจฺจติ ปุคฺคโล วชิรูปมจิตฺโต ฯ
     [๙๐]   กตโม   จ   ปุคฺคโล   อนฺโธ   อิเธกจฺจสฺส   ปุคฺคลสฺส
ตถารูปํ   จกฺขุ   น   โหติ   ยถารูเปน   จกฺขุนา  อนธิคตํ  วา  โภคํ
อธิคจฺเฉยฺย   อธิคตํ   วา   โภคํ   ผาตึ  กเรยฺย  ตถารูปมฺปิสฺส  จกฺขุ
น    โหติ    ยถารูเปน    จกฺขุนา   กุสลากุสเล   ธมฺเม   ชาเนยฺย
สาวชฺชานวชฺเช    ธมฺเม    ชาเนยฺย   หีนปฺปณีเต   ธมฺเม   ชาเนยฺย
กณฺหสุกฺกสปฺปฏิภาเค ธมฺเม ชาเนยฺย อยํ วุจฺจติ ปุคฺคโล อนฺโธ ฯ
     {๙๐.๑}   กตโม จ ปุคฺคโล เอกจกฺขุ อิเธกจฺจสฺส ปุคฺคลสฺส ตถารูปํ จกฺขุ
โหติ  ยถารูเปน  จกฺขุนา  อนธิคตํ  วา  โภคํ  อธิคจฺเฉยฺย  อธิคตํ  วา
โภคํ  ผาตึ  กเรยฺย  ตถารูปมฺปิสฺส  จกฺขุ  น  โหติ  ยถารูเปน  จกฺขุนา
กุสลากุสเล    ธมฺเม   ชาเชยฺย   สาวชฺชานวชฺเช   ธมฺเม   ชาเนยฺย
หีนปฺปณีเต   ธมฺเม   ชาเนยฺย   กณฺหสุกฺกสปฺปฏิภาเค   ธมฺเม  ชาเนยฺย
อยํ วุจฺจติ ปุคฺคโล เอกจกฺขุ ฯ
     {๙๐.๒}   กตโม   จ   ปุคฺคโล  ทฺวิจกฺขุ  อิเธกจฺจสฺส  ปุคฺคลสฺส
ตถารูปํ  จกฺขุ  โหติ  ยถารูเปน  จกฺขุนา  อนธิคตํ  วา โภคํ อธิคจฺเฉยฺย
อธิคตํ  วา  โภคํ  ผาตึ  กเรยฺย  ตถารูปมฺปิสฺส  จกฺขุ  โหติ  ยถารูเปน
จกฺขุนา  กุสลากุสเล  ธมฺเม  ชาเนยฺย  สาวชฺชานวชฺเช  ธมฺเม ชาเนยฺย
หีนปฺปณีเต   ธมฺเม   ชาเนยฺย   กณฺหสุกฺกสปฺปฏิภาเค   ธมฺเม  ชาเนยฺย
อยํ วุจฺจติ ปุคฺคโล ทฺวิจกฺขุ ฯ
     [๙๑]   กตโม   จ   ปุคฺคโล   อวกุชฺชปญฺโญ  อิเธกจฺโจ  ปุคฺคโล
อารามํ    คนฺตฺวา   โหติ   อภิกฺขณํ   ภิกฺขูนํ   สนฺติเก   ธมฺมสฺสวนาย
ตสฺส  ภิกฺขู  ธมฺมํ  เทเสนฺติ  อาทิกลฺยาณํ  มชฺเฌกลฺยาณํ ปริโยสานกลฺยาณํ
สาตฺถํ      สพฺยญฺชนํ      เกวลปริปุณฺณํ      ปริสุทฺธํ      พฺรหฺมจริยํ
ปกาเสนฺติ   โส   ตสฺมึ   อาสเน  นิสินฺโน  ตสฺสา  กถาย  เนว  อาทึ
มนสิกโรติ   น   มชฺฌํ  มนสิกโรติ  น  ปริโยสานํ  มนสิกโรติ  วุฏฺฐิโตปิ
ตมฺหา   อาสนา   ตสฺสา   กถาย   เนว   อาทึ  มนสิกโรติ  น  มชฺฌํ
มนสิกโรติ    น   ปริโยสานํ   มนสิกโรติ   เสยฺยถาปิ   นาม   กุมฺโภ
นิกุชฺโช   ตตฺถ   อุทกํ   อาสิตฺตํ   วิวตฺตติ   โน   สณฺฐาติ   เอวเมว
อิเธกจฺโจ   ปุคฺคโล   อารามํ  คนฺตฺวา  โหติ  อภิกฺขณํ  ภิกฺขูนํ  สนฺติเก
ธมฺมสฺสวนาย   ตสฺส   ภิกฺขู  ธมฺมํ  เทเสนฺติ  อาทิกลฺยาณํ  มชฺเฌกลฺยาณํ
ปริโยสานกลฺยาณํ     สาตฺถํ     สพฺยญฺชนํ     เกวลปริปุณฺณํ    ปริสุทฺธํ
พฺรหฺมจริยํ   ปกาเสนฺติ   โส   ตสฺมึ   อาสเน  นิสินฺโน  ตสฺสา  กถาย
เนว  อาทึ  มนสิกโรติ  น  มชฺฌํ  มนสิกโรติ  น  ปริโยสานํ  มนสิกโรติ
วุฏฺฐิโตปิ   ตมฺหา   อาสนา   ตสฺสา   กถาย   เนว  อาทึ  มนสิกโรติ
น   มชฺฌํ   มนสิกโรติ  น  ปริโยสานํ  มนสิกโรติ  อยํ  วุจฺจติ  ปุคฺคโล
อวกุชฺชปญฺโญ ฯ
     {๙๑.๑}   กตโม  จ  ปุคฺคโล  อุจฺจงฺคปญฺโญ  อิเธกจฺโจ  ปุคฺคโล
อารามํ    คนฺตฺวา   โหติ   อภิกฺขณํ   ภิกฺขูนํ   สนฺติเก   ธมฺมสฺสวนาย
ตสฺส     ภิกฺขู     ธมฺมํ     เทเสนฺติ    อาทิกลฺยาณํ    มชฺเฌกลฺยาณํ
ปริโยสานกลฺยาณํ     สาตฺถํ     สพฺยญฺชนํ     เกวลปริปุณฺณํ    ปริสุทฺธํ
พฺรหฺมจริยํ  ปกาเสนฺติ  โส  ตสฺมึ  อาสเน  นิสินฺโน ตสฺสา กถาย อาทิมฺปิ
มนสิกโรติ   มชฺฌมฺปิ   มนสิกโรติ   ปริโยสานมฺปิ   มนสิกโรติ   วุฏฺฐิโต
จ  โข  ตมฺหา  อาสนา  ตสฺสา  กถาย  เนว  อาทึ  มนสิกโรติ น มชฺฌํ
มนสิกโรติ   น   ปริโยสานํ   มนสิกโรติ   เสยฺยถาปิ   นาม   ปุริสสฺส
อุจฺจงฺเคปิ    นานาขชฺชกานิ    อากิณฺณานิ    ติลา   ตณฺฑุลา   โมทกา
พทรา  โส  ตมฺหา  อาสนา  วุฏฺฐหนฺโต  สติสมฺโมสา  ปกิเรยฺย เอวเมว
อิเธกจฺโจ   ปุคฺคโล   อารามํ  คนฺตฺวา  โหติ  อภิกฺขณํ  ภิกฺขูนํ  สนฺติเก
ธมฺมสฺสวนาย   ตสฺส   ภิกฺขู  ธมฺมํ  เทเสนฺติ  อาทิกลฺยาณํ  มชฺเฌกลฺยาณํ
ปริโยสานกลฺยาณํ     สาตฺถํ     สพฺยญฺชนํ     เกวลปริปุณฺณํ    ปริสุทฺธํ
พฺรหฺมจริยํ   ปกาเสนฺติ   โส   ตสฺมึ   อาสเน  นิสินฺโน  ตสฺสา  กถาย
อาทิมฺปิ   มนสิกโรติ   มชฺฌมฺปิ   มนสิกโรติ   ปริโยสานมฺปิ   มนสิกโรติ
วุฏฺฐิโต  จ  โข  ตมฺหา  อาสนา  ตสฺสา  กถาย  เนว  อาทึ มนสิกโรติ
น   มชฺฌํ   มนสิกโรติ  น  ปริโยสานํ  มนสิกโรติ  อยํ  วุจฺจติ  ปุคฺคโล
อุจฺจงฺคปญฺโญ ฯ
     {๙๑.๒}   กตโม   จ   ปุคฺคโล   ปุถุปญฺโญ  อิเธกจฺโจ  ปุคฺคโล
อารามํ   คนฺตฺวา   โหติ  อภิกฺขณํ  ภิกฺขูนํ  สนฺติเก  ธมฺมสฺสวนาย  ตสฺส
ภิกฺขู   ธมฺมํ   เทเสนฺติ   อาทิกลฺยาณํ   มชฺเฌกลฺยาณํ  ปริโยสานกลฺยาณํ
สาตฺถํ    สพฺยญฺชนํ    เกวลปริปุณฺณํ   ปริสุทฺธํ   พฺรหฺมจริยํ   ปกาเสนฺติ
โส   ตสฺมึ   อาสเน   นิสินฺโน   ตสฺสา   กถาย   อาทิมฺปิ  มนสิกโรติ
มชฺฌมฺปิ    มนสิกโรติ    ปริโยสานมฺปิ   มนสิกโรติ   วุฏฺฐิโตปิ   ตมฺหา
อาสนา   ตสฺสา    กถาย   อาทิมฺปิ   มนสิกโรติ   มชฺฌมฺปิ  มนสิกโรติ
ปริโยสานมฺปิ   มนสิกโรติ   เสยฺยถาปิ   นาม   กุมฺโภ  อุกฺกุชฺโช  ตตฺถ
อุทกํ   อาสิตฺตํ   สณฺฐาติ   โน  วิวตฺตติ  เอวเมว  อิเธกจฺโจ  ปุคฺคโล
อารามํ   คนฺตฺวา   โหติ  อภิกฺขณํ  ภิกฺขูนํ  สนฺติเก  ธมฺมสฺสวนาย  ตสฺส
ภิกฺขู   ธมฺมํ   เทเสนฺติ   อาทิกลฺยาณํ   มชฺเฌกลฺยาณํ  ปริโยสานกลฺยาณํ
สาตฺถํ    สพฺยญฺชนํ    เกวลปริปุณฺณํ   ปริสุทฺธํ   พฺรหฺมจริยํ   ปกาเสนฺติ
โส   ตสฺมึ   อาสเน   นิสินฺโน   ตสฺสา   กถาย   อาทิมฺปิ  มนสิกโรติ
มชฺฌมฺปิ    มนสิกโรติ    ปริโยสานมฺปิ   มนสิกโรติ   วุฏฺฐิโตปิ   ตมฺหา
อาสนา   ตสฺสา   กถาย   อาทิมฺปิ   มนสิกโรติ   มชฺฌมฺปิ   มนสิกโรติ
ปริโยสานมฺปิ มนสิกโรติ อยํ วุจฺจติ ปุคฺคโล ปุถุปญฺโญ ฯ
     [๙๒]   กตโม   จ   ปุคฺคโล  กาเมสุ  จ  ภเวสุ  จ  อวีตราโค
โสตาปนฺนสกทาคามิโน   อิเม   วุจฺจนฺติ   ปุคฺคลา   กาเมสุ  จ  ภเวสุ
จ   อวีตราคา   ฯ   กตโม   จ   ปุคฺคโล  กาเมสุ  วีตราโค  ภเวสุ
อวีตราโค    อนาคามี    อยํ   วุจฺจติ   ปุคฺคโล   กาเมสุ   วีตราโค
ภเวสุ อวีตราโค ฯ
     {๙๒.๑}   กตโม  จ  ปุคฺคโล  กาเมสุ จ ภเวสุ จ วีตราโค อรหา
อยํ วุจฺจติ ปุคฺคโล กาเมสุ จ ภเวสุ จ วีตราโค ฯ
     [๙๓]   กตโม   จ  ปุคฺคโล  ปาสาณเลขูปโม  อิเธกจฺโจ  ปุคฺคโล
อภิณฺหํ   กุชฺฌติ   โส   จ   ขฺวสฺส   โกโธ   จิรํ   ทีฆรตฺตํ   อนุเสติ
เสยฺยถาปิ   นาม   ปาสาเณ   เลขา   น  ขิปฺปํ  ลุชฺชติ  วาเตน  วา
อุทเกน   วา   จิรฏฺฐิติกา  โหติ  เอวเมว  อิเธกจฺโจ  ปุคฺคโล  อภิณฺหํ
กุชฺฌติ   โส   จ   ขฺวสฺส   โกโธ  จิรํ  ทีฆรตฺตํ  อนุเสติ  อยํ  วุจฺจติ
ปุคฺคโล ปาสาณเลขูปโม ฯ
     {๙๓.๑}   กตโม  จ  ปุคฺคโล  ปฐวีเลขูปโม  อิเธกจฺโจ  ปุคฺคโล
อภิณฺหํ   กุชฺฌติ   โส   จ   ขฺวสฺส   โกโธ  น  จิรํ  ทีฆรตฺตํ  อนุเสติ
เสยฺยถาปิ   นาม  ปฐวิยา  เลขา  ขิปฺปํ  ลุชฺชติ  วาเตน  วา  อุทเกน
วา   น   จิรฏฺฐิติกา   โหติ   เอวเมว   อิเธกจฺโจ   ปุคฺคโล  อภิณฺหํ
กุชฺฌติ   โส  จ  ขฺวสฺส  โกโธ  น  จิรํ  ทีฆรตฺตํ  อนุเสติ  อยํ  วุจฺจติ
ปุคฺคโล ปฐวีเลขูปโม ฯ
     {๙๓.๒}   กตโม    จ    ปุคฺคโล   อุทกเลขูปโม   อิเธกจฺโจ
ปุคฺคโล      อคาเฬฺหนปิ      วุจฺจมาโน     ผรุเสนปิ     วุจฺจมาโน
อมนาเปนปิ     วุจฺจมาโน     สํสนฺทติ     เจว     สนฺธียติ    เจว
สมฺโมทติ   เจว   เสยฺยถาปิ   นาม   อุทเก   เลขา   ขิปฺปํ   ลุชฺชติ
น   จิรฏฺฐิติกา   โหติ   เอวเมว   อิเธกจฺโจ   ปุคฺคโล   อคาเฬฺหนปิ
วุจฺจมาโน  ผรุเสนปิ  วุจฺจมาโน  อมนาเปนปิ  วุจฺจมาโน  สํสนฺทติ  เจว
สนฺธียติ เจว สมฺโมทติ เจว อยํ วุจฺจติ ปุคฺคโล อุทกเลขูปโม ฯ
                       ตตฺถ กตเม ตโย โปตฺถกูปมา ปุคฺคลา ฯ
     [๙๔]   ตโย   โปตฺถกา   นโวปิ   โปตฺถโก   ทุพฺพณฺโณ   เจว
โหติ   ทุกฺขสมฺผสฺโส   จ   อปฺปคฺโฆ  จ  มชฺฌิโมปิ  โปตฺถโก  ทุพฺพณฺโณ
เจว   โหติ   ทุกฺขสมฺผสฺโส   จ   อปฺปคฺโฆ   จ   ชิณฺโณปิ   โปตฺถโก
ทุพฺพณฺโณ   เจว   โหติ   ทุกฺขสมฺผสฺโส   จ  อปฺปคฺโฆ  จ  ฯ  ชิณฺณมฺปิ
โปตฺถกํ อุกฺขลิปริมชฺชนํ วา กโรนฺติ สงฺการกูเฏ วา นํ ฉฑฺเฑนฺติ ฯ
     [๙๕]   เอวเมว  ตโยเม  โปตฺถกูปมา  ปุคฺคลา  สนฺโต สํวิชฺชมานา
ภิกฺขูสุ  ฯ กตเม ตโย ฯ  นโว เจปิ ภิกฺขุ โหติ ทุสฺสีโล ปาปธมฺโม อิทมสฺส
ทุพฺพณฺณตาย    เสยฺยถาปิ   โส   โปตฺถโก   ทุพฺพณฺโณ   ตถูปโม   อยํ
ปุคฺคโล   เย   โข   ปนสฺส   เสวนฺติ  ภชนฺติ  ปยิรุปาสนฺติ  ทิฏฺฐานุคตึ
อาปชฺชนฺติ    เตสนฺตํ    โหติ   ทีฆรตฺตํ   อหิตาย   ทุกฺขาย   อิทมสฺส
ทุกฺขสมฺผสฺสตาย   เสยฺยถาปิ   โส   โปตฺถโก   ทุกฺขสมฺผสฺโส   ตถูปโม
อยํ   ปุคฺคโล   เยสํ   โข   ปน   ปฏิคฺคณฺหาติ  จีวรปิณฺฑปาตเสนาสน-
คิลานปจฺจยเภสชฺชปริกฺขารํ      เตสนฺตํ     น     มหปฺผลํ     โหติ
น    มหานิสํสํ    อิทมสฺส   อปฺปคฺฆตาย   เสยฺยถาปิ   โส   โปตฺถโก
อปฺปคฺโฆ   ตถูปโม   อยํ   ปุคฺคโล  มชฺฌิโม  เจปิ  ภิกฺขุ  โหติ  ฯเปฯ
เถโร   เจปิ   ภิกฺขุ   โหติ  ทุสฺสีโล  ปาปธมฺโม  อิทมสฺส  ทุพฺพณฺณตาย
เสยฺยถาปิ    โส    โปตฺถโก    ทุพฺพณฺโณ    ตถูปโม   อยํ   ปุคฺคโล
เย   โข   ปนสฺส  เสวนฺติ  ภชนฺติ  ปยิรุปาสนฺติ  ทิฏฺฐานุคตึ  อาปชฺชนฺติ
เตสนฺตํ   โหติ   ทีฆรตฺตํ   อหิตาย   ทุกฺขาย  อิทมสฺส  ทุกฺขสมฺผสฺสตาย
เสยฺยถาปิ   โส   โปตฺถโก  ทุกฺขสมฺผสฺโส  ตถูปโม  อยํ  ปุคฺคโล  เยสํ
โข   ปน   ปฏิคฺคณฺหาติ   จีวรปิณฺฑปาตเสนาสนคิลานปจฺจยเภสชฺชปริกฺขารํ
เตสนฺตํ   น    มหปฺผลํ   โหติ   น   มหานิสํสํ   อิทมสฺส  อปฺปคฺฆตาย
เสยฺยถาปิ    โส    โปตฺถโก    อปฺปคฺโฆ    ตถูปโม   อยํ   ปุคฺคโล
เอวรูโป    เจ    เถโร   ภิกฺขุ   สงฺฆมชฺเฌ   ภณติ   ตเมนํ   ภิกฺขู
เอวมาหํสุ   กึนุ   โข   ตุยฺหํ   พาลสฺส   อพฺยตฺตสฺส   ภณิเตน  ตฺวมฺปิ
นาม   ภณิตพฺพํ   มญฺญสีติ   โส   กุปฺปิโต   อนตฺตมโน   ตถารูปึ  วาจํ
นิจฺฉาเรติ  ยถารูปาย  วาจาย สงฺโฆ อุกฺขิปติ สงฺการกูเฏว นํ โปตฺถกํ  ฯ
อิเม ตโย โปตฺถกูปมา ปุคฺคลา สนฺโต สํวิชฺชมานา ภิกฺขูสุ ฯ
                    ตตฺถ กตเม ตโย กาสิกวตฺถูปมา ปุคฺคลา ฯ
     [๙๖]   ตีณิ    กาสิกวตฺถานิ    นวมฺปิ    กาสิกวตฺถํ   วณฺณวนฺตํ
เจว     โหติ    สุขสมฺผสฺสญฺจ    มหคฺฆญฺจ    มชฺฌิมมฺปิ    กาสิกวตฺถํ
วณฺณวนฺตํ     เจว     โหติ     สุขสมฺผสฺสญฺจ    มหคฺฆญฺจ    ชิณฺณมฺปิ
กาสิกวตฺถํ    วณฺณวนฺตํ    เจว   โหติ   สุขสมฺผสฺสญฺจ   มหคฺฆญฺจ   ฯ
ชิณฺณมฺปิ    กาสิกวตฺถํ    รตนปลิเวฐนํ    วา   กโรนฺติ   คนฺธกรณฺฑเก
วา นํ นิกฺขิปนฺติ ฯ
     [๙๗]   เอวเมว    ตโยเม   กาสิกวตฺถูปมา   ปุคฺคลา   สนฺโต
สํวิชฺชมานา ภิกฺขูสุ ฯ กตเม ตโย ฯ
     {๙๗.๑}   นโว      เจปิ      ภิกฺขุ     โหติ     สีลวา
กลฺยาณธมฺโม    อิทมสฺส    สุวณฺณตาย    เสยฺยถาปิ    ตํ   กาสิกวตฺถํ
วณฺณวนฺตํ   ตถูปโม   อยํ   ปุคฺคโล   เย  โข  ปนสฺส  เสวนฺติ  ภชนฺติ
ปยิรุปาสนฺติ   ทิฏฺฐานุคตึ   อาปชฺชนฺติ   เตสนฺตํ   โหติ  ทีฆรตฺตํ  หิตาย
สุขาย     อิทมสฺส    สุขสมฺผสฺสตาย    เสยฺยถาปิ    ตํ    กาสิกวตฺถํ
สุขสมฺผสฺสํ   ตถูปโม   อยํ   ปุคฺคโล   เยสํ   โข   ปน   ปฏิคฺคณฺหาติ
จีวรปิณฺฑปาตเสนาสนคิลานปจฺจยเภสชฺชปริกฺขารํ      เตสนฺตํ     มหปฺผลํ
โหติ    มหานิสํสํ   อิทมสฺส   มหคฺฆตาย   เสยฺยถาปิ   ตํ   กาสิกวตฺถํ
มหคฺฆํ ตถูปโม อยํ ปุคฺคโล
     {๙๗.๒}   มชฺฌิโม  เจปิ  ภิกฺขุ ฯเปฯ เถโร เจปิ ภิกฺขุ โหติ สีลวา
กลฺยาณธมฺโม    อิทมสฺส    สุวณฺณตาย    เสยฺยถาปิ    ตํ   กาสิกวตฺถํ
วณฺณวนฺตํ   ตถูปโม   อยํ   ปุคฺคโล   เย  โข  ปนสฺส  เสวนฺติ  ภชนฺติ
ปยิรุปาสนฺติ   ทิฏฺฐานุคตึ   อาปชฺชนฺติ   เตสนฺตํ   โหติ  ทีฆรตฺตํ  หิตาย
สุขาย   อิทมสฺส   สุขสมฺผสฺสตาย  เสยฺยถาปิ  ตํ  กาสิกวตฺถํ  สุขสมฺผสฺสํ
ตถูปโม  อยํ  ปุคฺคโล  เยสํ  โข  ปน ปฏิคฺคณฺหาติ จีวรปิณฺฑปาตเสนาสน-
คิลานปจฺจยเภสชฺชปริกฺขารํ   เตสนฺตํ  มหปฺผลํ  โหติ  มหานิสํสํ  อิทมสฺส
มหคฺฆตาย เสยฺยถาปิ ตํ กาสิกวตฺถํ มหคฺฆํ ตถูปโม อยํ ปุคฺคโล
     {๙๗.๓}   เอวรูโป  เจ  เถโร  ภิกฺขุ สงฺฆมชฺเฌ ภณติ ตเมนํ ภิกฺขู
เอวมาหํสุ  อปฺปสทฺทา  อายสฺมนฺโต  โหถ  เถโร  ภิกฺขุ  ธมฺมญฺจ วินยญฺจ
ภณตีติ  ตสฺส  ตํ  วจนํ  อาเธยฺยํ  คจฺฉติ คนฺธกรณฺฑเกว นํ  กาสิกวตฺถํ ฯ
อิเม ตโย กาสิกวตฺถูปมา ปุคฺคลา สนฺโต สํวิชฺชมานา ภิกฺขูสุ ฯ
     [๙๘]   กตโม   จ   ปุคฺคโล   สุปฺปเมยฺโย   อิเธกจฺโจ  ปุคฺคโล
อุทฺธโต    โหติ    อุนฺนโฬ   จปโล   มุขโร   วิกิณฺณวาโจ   มุฏฺฐสฺสติ
อสมฺปชาโน    อสมาหิโต   วิพฺภนฺตจิตฺโต   ปากฏินฺทฺริโย   อยํ   วุจฺจติ
ปุคฺคโล   สุปฺปเมยฺโย   ฯ  กตโม  จ  ปุคฺคโล  ทุปฺปเมยฺโย  อิเธกจฺโจ
ปุคฺคโล   อนุทฺธโต   โหติ   อนุนฺนโฬ   อจปโล  อมุขโร  อวิกิณฺณวาโจ
อุปฏฺฐิตสฺสติ   สมฺปชาโน   สมาหิโต   เอกคฺคจิตฺโต   สํวุตินฺทฺริโย   อยํ
วุจฺจติ ปุคฺคโล ทุปฺปเมยฺโย ฯ
     {๙๘.๑}   กตโม   จ  ปุคฺคโล  อปฺปเมยฺโย  อิเธกจฺโจ  ปุคฺคโล
อาสวานํ   ขยา   อนาสวํ   เจโตวิมุตฺตึ   ปญฺญาวิมุตฺตึ  ทิฏฺเฐว  ธมฺเม
สยํ   อภิญฺญา   สจฺฉิกตฺวา   อุปสมฺปชฺช   วิหรติ   อยํ  วุจฺจติ  ปุคฺคโล
อปฺปเมยฺโย ฯ
     [๙๙]   กตโม   จ   ปุคฺคโล   น   เสวิตพฺโพ  น  ภชิตพฺโพ  น
ปยิรุปาสิตพฺโพ   อิเธกจฺโจ   ปุคฺคโล   หีโน   โหติ   สีเลน  สมาธินา
ปญฺญาย    เอวรูโป    ปุคฺคโล   น   เสวิตพฺโพ   น   ภชิตพฺโพ   น
ปยิรุปาสิตพฺโพ อญฺญตฺร อนุทฺทยา อญฺญตฺร อนุกมฺปา ฯ
     {๙๙.๑}   กตโม  จ  ปุคฺคโล  เสวิตพฺโพ  ภชิตพฺโพ ปยิรุปาสิตพฺโพ
อิเธกจฺโจ   ปุคฺคโล  สทิโส  โหติ  สีเลน  สมาธินา  ปญฺญาย  เอวรูโป
ปุคฺคโล   เสวิตพฺโพ   ภชิตพฺโพ  ปยิรุปาสิตพฺโพ  ฯ  ตํ  กิสฺส  เหตุ  ฯ
สีลสามญฺญคตานํ  สตํ  สีลกถา  จ  โน  ภวิสฺสติ  สา จ โน ผาสุ ภวิสฺสติ
สา   จ   โน   ปวตฺตินี  ภวิสฺสติ  สมาธิสามญฺญคตานํ  สตํ   สมาธิกถา
จ  โน  ภวิสฺสติ  สา  จ  โน  ผาสุ  ภวิสฺสติ สา จ โน ปวตฺตินี ภวิสฺสติ
ปญฺญาสามญฺญคตานํ    สตํ   ปญฺญากถา   จ   โน   ภวิสฺสติ   สา   จ
โน   ผาสุ  ภวิสฺสติ  สา  จ  โน  ปวตฺตินี  ภวิสฺสตีติ  ตสฺมา  เอวรูโป
ปุคฺคโล เสวิตพฺโพ ภชิตพฺโพ ปยิรุปาสิตพฺโพ ฯ
     {๙๙.๒}   กตโม   จ   ปุคฺคโล  สกฺกตฺวา  ครุกตฺวา  เสวิตพฺโพ
ภชิตพฺโพ   ปยิรุปาสิตพฺโพ   อิเธกจฺโจ   ปุคฺคโล   อธิโก  โหติ  สีเลน
สมาธินา     ปญฺญาย    เอวรูโป    ปุคฺคโล    สกฺกตฺวา    ครุกตฺวา
เสวิตพฺโพ   ภชิตพฺโพ   ปยิรุปาสิตพฺโพ  ฯ  ตํ  กิสฺส  เหตุ  ฯ  อปริปูรํ
วา   สีลกฺขนฺธํ   ปริปูเรสฺสามิ   ปริปูรํ   วา   สีลกฺขนฺธํ   ตตฺถ  ตตฺถ
ปญฺญาย    อนุคฺคหิสฺสามิ    อปริปูรํ   วา   สมาธิกฺขนฺธํ   ปริปูเรสฺสามิ
ปริปูรํ    วา    สมาธิกฺขนฺธํ    ตตฺถ   ตตฺถ   ปญฺญาย   อนุคฺคหิสฺสามิ
อปริปูรํ   วา   ปญฺญากฺขนฺธํ   ปริปูเรสฺสามิ   ปริปูรํ   วา  ปญฺญากฺขนฺธํ
ตตฺถ    ตตฺถ   ปญฺญาย   อนุคฺคหิสฺสามีติ   ตสฺมา   เอวรูโป   ปุคฺคโล
สกฺกตฺวา ครุกตฺวา เสวิตพฺโพ ภชิตพฺโพ ปยิรุปาสิตพฺโพ ฯ
     [๑๐๐]   กตโม   จ   ปุคฺคโล   ชิคุจฺฉิตพฺโพ   น  เสวิตพฺโพ  น
ภชิตพฺโพ   น   ปยิรุปาสิตพฺโพ   อิเธกจฺโจ   ปุคฺคโล   ทุสฺสีโล   โหติ
ปาปธมฺโม     อสุจิสงฺกสฺสรสมาจาโร     ปฏิจฺฉนฺนกมฺมนฺโต    อสฺสมโณ
สมณปฏิญฺโญ    อพฺรหฺมจารี    พฺรหฺมจารีปฏิญฺโญ    อนฺโตปูติ   อวสฺสุโต
กสมฺพุกชาโต  เอวรูโป  ปุคฺคโล  ชิคุจฺฉิตพฺโพ  น  เสวิตพฺโพ น ภชิตพฺโพ
น  ปยิรุปาสิตพฺโพ  ฯ  ตํ  กิสฺส  เหตุ  ฯ  กิญฺจาปิ  เอวรูปสฺส ปุคฺคลสฺส
น    ทิฏฺฐานุคตึ    อาปชฺชติ    อถ   โข   นํ   ปาปโก   กิตฺติสทฺโท
อพฺภุคฺคจฺฉติ    ปาปมิตฺโต   ปุริสปุคฺคโล   ปาปสหาโย   ปาปสมฺปวงฺโกติ
เสยฺยถาปิ   นาม   อหิ   คูถคโต   กิญฺจาปิ   น   ฑํสติ  อถ  โข  นํ
มกฺเขติ   เอวเมว   กิญฺจาปิ   เอวรูปสฺส   ปุคฺคลสฺส   น   ทิฏฺฐานุคตึ
อาปชฺชติ   อถ   โข   นํ  ปาปโก  กิตฺติสทฺโท  อพฺภุคฺคจฺฉติ  ปาปมิตฺโต
ปุริสปุคฺคโล   ปาปสหาโย   ปาปสมฺปวงฺโกติ   ตสฺมา  เอวรูโป  ปุคฺคโล
ชิคุจฺฉิตพฺโพ น เสวิตพฺโพ น ภชิตพฺโพ น ปยิรุปาสิตพฺโพ ฯ
     {๑๐๐.๑}   กตโม  จ  ปุคฺคโล  อชฺฌุเปกฺขิตพฺโพ  น  เสวิตพฺโพ น
ภชิตพฺโพ   น   ปยิรุปาสิตพฺโพ   อิเธกจฺโจ   ปุคฺคโล   โกธโน   โหติ
อุปายาสพหุโล   อปฺปมฺปิ   วุตฺโต  สมาโน  อภิสชฺชติ  กุปฺปติ  พฺยาปชฺชติ
ปติฏฺฐียติ    โกปญฺจ    โทสญฺจ   อปฺปจฺจยญฺจ   ปาตุกโรติ   เสยฺยถาปิ
นาม  ทุฏฺฐารุโก  กฏฺเฐน  วา  กฐลาย  วา  ฆฏฺฏิโต  ภิยฺโยโส มตฺตาย
อาสวํ  เทติ  เอวเมว  อิเธกจฺโจ  ปุคฺคโล  โกธโน โหติ อุปายาสพหุโล
อปฺปมฺปิ   วุตฺโต   สมาโน   อภิสชฺชติ   กุปฺปติ   พฺยาปชฺชติ   ปติฏฺฐียติ
โกปญฺจ    โทสญฺจ    อปฺปจฺจยญฺจ    ปาตุกโรติ    เสยฺยถาปิ    นาม
ตินฺทุกาลาตํ   กฏฺเฐน   วา   กฐลาย   วา  ฆฏฺฏิตํ  ภิยฺโยโส  มตฺตาย
จิจฺจิฏายติ   จิฏิจิฏายติ   เอวเมว   อิเธกจฺโจ  ปุคฺคโล  โกธโน  โหติ
อุปายาสพหุโล   อปฺปมฺปิ   วุตฺโต  สมาโน  อภิสชฺชติ  กุปฺปติ  พฺยาปชฺชติ
ปติฏฺฐียติ   โกปญฺจ   โทสญฺจ  อปฺปจฺจยญฺจ  ปาตุกโรติ  เสยฺยถาปิ  นาม
คูถกูโป  กฏฺเฐน  วา  กฐลาย  วา  ฆฏฺฏิโต  ภิยฺโยโส มตฺตาย ทุคฺคนฺโธ
โหติ   เอวเมว   อิเธกจฺโจ   ปุคฺคโล   โกธโน  โหติ  อุปายาสพหุโล
อปฺปมฺปิ   วุตฺโต   สมาโน   อภิสชฺชติ   กุปฺปติ   พฺยาปชฺชติ   ปติฏฺฐียติ
โกปญฺจ    โทสญฺจ    อปฺปจฺจยญฺจ    ปาตุกโรติ    เอวรูโป   ปุคฺคโล
อชฺฌุเปกฺขิตพฺโพ   น   เสวิตพฺโพ   น  ภชิตพฺโพ  น  ปยิรุปาสิตพฺโพ  ฯ
ตํ   กิสฺส  เหตุ  ฯ  อกฺโกเสยฺยปิ  มํ  ปริภาเสยฺยปิ  มํ  อนตฺถมฺปิ  เม
กเรยฺยาติ   ตสฺมา   เอวรูโป  ปุคฺคโล  อชฺฌุเปกฺขิตพฺโพ  น  เสวิตพฺโพ
น ภชิตพฺโพ น ปยิรุปาสิตพฺโพ ฯ
     {๑๐๐.๒}   กตโม  จ  ปุคฺคโล  เสวิตพฺโพ ภชิตพฺโพ ปยิรุปาสิตพฺโพ
อิเธกจฺโจ   ปุคฺคโล   สีลวา   โหติ   กลฺยาณธมฺโม  เอวรูโป  ปุคฺคโล
เสวิตพฺโพ   ภชิตพฺโพ   ปยิรุปาสิตพฺโพ  ฯ  ตํ  กิสฺส  เหตุ  ฯ  กิญฺจาปิ
เอวรูปสฺส   ปุคฺคลสฺส  น  ทิฏฺฐานุคตึ  อาปชฺชติ  อถ  โข  นํ  กลฺยาโณ
กิตฺติสทฺโท    อพฺภุคฺคจฺฉติ   กลฺยาณมิตฺโต   ปุริสปุคฺคโล   กลฺยาณสหาโย
กลฺยาณสมฺปวงฺโกติ   ตสฺมา   เอวรูโป   ปุคฺคโล   เสวิตพฺโพ  ภชิตพฺโพ
ปยิรุปาสิตพฺโพ ฯ
     [๑๐๑]   กตโม   จ   ปุคฺคโล   สีเลสุ   ปริปูรีการี   สมาธิสฺมึ
มตฺตโสการี    ปญฺญาย    มตฺตโสการี    โสตาปนฺนสกทาคามิโน   อิเม
วุจฺจนฺติ    ปุคฺคลา   สีเลสุ   ปริปูรีการิโน   สมาธิสฺมึ   มตฺตโสการิโน
ปญฺญาย   มตฺตโสการิโน  ฯ  กตโม  จ  ปุคฺคโล  สีเลสุ  จ  ปริปูรีการี
สมาธิสฺมิญฺจ      ปริปูรีการี     ปญฺญาย     มตฺตโสการี     อนาคามี
อยํ   วุจฺจติ   ปุคฺคโล   สีเลสุ  จ  ปริปูรีการี  สมาธิสฺมิญฺจ  ปริปูรีการี
ปญฺญาย   มตฺตโสการี   ฯ   กตโม  จ  ปุคฺคโล  สีเลสุ  จ  ปริปูรีการี
สมาธิสฺมิญฺจ    ปริปูรีการี    ปญฺญาย    จ   ปริปูรีการี   อรหา   อยํ
วุจฺจติ    ปุคฺคโล   สีเลสุ   จ   ปริปูรีการี   สมาธิสฺมิญฺจ   ปริปูรีการี
ปญฺญาย จ ปริปูรีการี ฯ
     [๑๐๒]   ตตฺถ  กตเม  ตโย  สตฺถาโร  อิเธกจฺโจ  สตฺถา  กามานํ
ปริญฺญํ   ปญฺญาเปติ   น   รูปานํ   ปริญฺญํ   ปญฺญาเปติ   น   เวทนานํ
ปริญฺญํ    ปญฺญาเปติ    อิธ   ปเนกจฺโจ   สตฺถา   กามานญฺจ   ปริญฺญํ
ปญฺญาเปติ    รูปานญฺจ    ปริญฺญํ   ปญฺญาเปติ   น   เวทนานํ   ปริญฺญํ
ปญฺญาเปติ   อิธ   ปเนกจฺโจ   สตฺถา   กามานญฺจ   ปริญฺญํ  ปญฺญาเปติ
รูปานญฺจ ปริญฺญํ ปญฺญาเปติ เวทนานญฺจ ปริญฺญํ ปญฺญาเปติ ฯ
     {๑๐๒.๑}   ตตฺถ  ยฺวายํ  สตฺถา  กามานํ  ปริญฺญํ  ปญฺญาเปติ  น
รูปานํ    ปริญฺญํ    ปญฺญาเปติ    น    เวทนานํ   ปริญฺญํ   ปญฺญาเปติ
รูปาวจรสมาปตฺติยา  ลาภี  สตฺถา  เตน  ทฏฺฐพฺโพ  ฯ ตตฺถ ยฺวายํ สตฺถา
กามานญฺจ    ปริญฺญํ    ปญฺญาเปติ    รูปานญฺจ    ปริญฺญํ    ปญฺญาเปติ
น    เวทนานํ    ปริญฺญํ    ปญฺญาเปติ    อรูปาวจรสมาปตฺติยา   ลาภี
สตฺถา   เตน   ทฏฺฐพฺโพ   ฯ  ตตฺถ  ยฺวายํ  สตฺถา  กามานญฺจ  ปริญฺญํ
ปญฺญาเปติ    รูปานญฺจ    ปริญฺญํ    ปญฺญาเปติ    เวทนานญฺจ   ปริญฺญํ
ปญฺญาเปติ    สมฺมาสมฺพุทฺโธ    สตฺถา    เตน   ทฏฺฐพฺโพ   ฯ   อิเม
ตโย สตฺถาโร ฯ
     [๑๐๓]   ตตฺถ   กตเม   อปเรปิ   ตโย   สตฺถาโร   อิเธกจฺโจ
สตฺถา   ทิฏฺเฐ   เจว   ธมฺเม   อตฺตานํ  สจฺจโต  เถตโต  ปญฺญาเปติ
อภิสมฺปรายญฺจ     อตฺตานํ    สจฺจโต    เถตโต    ปญฺญาเปติ    อิธ
ปเนกจฺโจ   สตฺถา   ทิฏฺเฐ   เจว   ธมฺเม  อตฺตานํ  สจฺจโต  เถตโต
ปญฺญาเปติ   โน   จ   โข   อภิสมฺปรายํ   อตฺตานํ   สจฺจโต  เถตโต
ปญฺญาเปติ   อิธ   ปเนกจฺโจ   สตฺถา   ทิฏฺเฐ   เจว  ธมฺเม  อตฺตานํ
สจฺจโต   เถตโต   น   ปญฺญาเปติ   อภิสมฺปรายญฺจ   อตฺตานํ  สจฺจโต
เถตโต น ปญฺญาเปติ ฯ
     {๑๐๓.๑}   ตตฺถ  ยฺวายํ  สตฺถา ทิฏฺเฐ เจว ธมฺเม อตฺตานํ สจฺจโต
เถตโต    ปญฺญาเปติ    อภิสมฺปรายญฺจ    อตฺตานํ   สจฺจโต   เถตโต
ปญฺญาเปติ   สสฺสตวาโท   สตฺถา   เตน   ทฏฺฐพฺโพ   ฯ  ตตฺถ  ยฺวายํ
สตฺถา  ทิฏฺเฐ  เจว  ธมฺเม  อตฺตานํ  สจฺจโต  เถตโต ปญฺญาเปติ โน จ
โข   อภิสมฺปรายํ   อตฺตานํ  สจฺจโต  เถตโต  ปญฺญาเปติ  อุจฺเฉทวาโท
สตฺถา   เตน  ทฏฺฐพฺโพ  ฯ  ตตฺถ  ยฺวายํ  สตฺถา  ทิฏฺเฐ  เจว  ธมฺเม
อตฺตานํ   สจฺจโต   เถตโต   น   ปญฺญาเปติ   อภิสมฺปรายญฺจ  อตฺตานํ
สจฺจโต  เถตโต  น  ปญฺญาเปติ  สมฺมาสมฺพุทฺโธ  สตฺถา เตน ทฏฺฐพฺโพ ฯ
อิเม อปเรปิ ตโย สตฺถาโร ฯ
                                         ติกนิทฺเทโส ฯ
                                           ----------


             เนื้อความพระไตรปิฎกฉบับภาษาบาลี อักษรไทย เล่มที่ ๓๖ หน้าที่ ๑๖๒-๑๘๐. https://84000.org/tipitaka/read/pali_read.php?B=36&A=3206&w=&modeTY=2              อ่านเทียบพระไตรปิฎกฉบับภาษาบาลี อักษรโรมัน :- https://84000.org/tipitaka/read/roman_read.php?B=36&A=3206&modeTY=2              อ่านเทียบพระไตรปิฎกภาษาไทยฉบับหลวง :- https://84000.org/tipitaka/read/byitem.php?book=36.2&item=84&items=20              อ่านเทียบพระไตรปิฎกฉบับมหาจุฬาฯ :- https://84000.org/tipitaka/pitaka_item/m_siri.php?B=36&siri=29              ศึกษาอรรถกถานี้ได้ที่ :- https://84000.org/tipitaka/attha/attha.php?b=36&i=599              อ่านอรรถกถาภาษาบาลีอักษรไทย :- https://84000.org/tipitaka/atthapali/read_th.php?B=55&A=1461              The Pali Atthakatha in Roman :- https://84000.org/tipitaka/atthapali/read_rm.php?B=55&A=1461              สารบัญพระไตรปิฎกเล่มที่ ๓๖ https://84000.org/tipitaka/read/?index_36 https://84000.org/tipitaka/english/?index_36

อ่านหน้า[ต่าง] แรกอ่านหน้า[ต่าง] ที่แล้วแสดงหมายเลขหน้า
ในกรณี :- 
   บรรทัดแรกของแต่ละหน้าอ่านหน้า[ต่าง] ถัดไปอ่านหน้า[ต่าง] สุดท้าย คลิกเพื่อเปลี่ยน ฐญ เป็นแบบดั้งเดิม

บันทึก ๖ ธันวาคม พ.ศ. ๒๕๕๙. การแสดงผลนี้อ้างอิงข้อมูลจากพระไตรปิฎกฉบับภาษาบาลี อักษรไทย. หากพบข้อผิดพลาด กรุณาแจ้งได้ที่ [email protected]