[174] Tena kho pana samayena chabbaggiyā bhikkhū dīghāni
dantakaṭṭhāni khādanti teheva sāmaṇere 1- ākoṭenti . bhagavato
etamatthaṃ ārocesuṃ .pe. na bhikkhave dīghaṃ dantakaṭṭhaṃ khāditabbaṃ
yo khādeyya āpatti dukkaṭassa anujānāmi bhikkhave aṭṭhaṅgulaparamaṃ
dantakaṭṭhaṃ na ca teneva 2- sāmaṇero ākoṭetabbo yo
ākoṭeyya āpatti dukkaṭassāti.
[175] Tena kho pana samayena aññatarassa bhikkhuno atimandāhakaṃ 3-
dantakaṭṭhaṃ khādantassa kaṇṭhe vilaggaṃ hoti . bhagavato etamatthaṃ
ārocesuṃ .pe. na bhikkhave atimandāhakaṃ 3- dantakaṭṭhaṃ khāditabbaṃ
yo khādeyya āpatti dukkaṭassa anujānāmi bhikkhave caturaṅgulaṃ pacchimaṃ
dantakaṭṭhanti.
[176] Tena kho pana samayena chabbaggiyā bhikkhū dāyaṃ āḷepenti 4-.
Manussā ujjhāyanti khīyanti vipācenti .pe. seyyathāpi davaḍāhakāti
.pe. bhagavato etamatthaṃ ārocesuṃ .pe. Na bhikkhave dāyo āḷepetabbo
yo āḷepeyya āpatti dukkaṭassāti.
[177] Tena kho pana samayena vihārā tiṇagahaṇā honti .
Davaḍāhe ḍayhamāne vihārā ḍayhanti . bhikkhū kukkuccāyanti
@Footnote: 1 Ma. Yu. sāmaṇeraṃ. 2 Ma. Yu. tena. 3 Ma. Yu. atimaṭāhakaṃ. 4 Ma. Yu.
@ālimpenti.
Paṭaggiṃ dātuṃ parittaṃ kātuṃ . bhagavato etamatthaṃ ārocesuṃ .
Anujānāmi bhikkhave davaḍāhe ḍayhamāne paṭaggiṃ dātuṃ parittaṃ
kātunti.
[178] Tena kho pana samayena chabbaggiyā bhikkhū rukkhaṃ
abhirūhanti rukkhā rukkhaṃ saṅkamanti . manussā ujjhāyanti khīyanti
vipācenti .pe. seyyathāpi makkaṭāti .pe. bhagavato etamatthaṃ
ārocesuṃ .pe. na bhikkhave rukkho abhirūhitabbo yo abhirūheyya
āpatti dukkaṭassāti.
[179] Tena kho pana samayena aññatarassa bhikkhuno kosalesu
janapadesu sāvatthiṃ gacchantassa antarāmagge hatthī pariyuṭṭhāsi .
Athakho so bhikkhu rukkhamūlaṃ upadhāvitvā kukkuccāyanto rukkhaṃ
nābhirūhi 1- . so hatthī aññena agamāsi . athakho so bhikkhu
sāvatthiṃ gantvā bhikkhūnaṃ etamatthaṃ ārocesi . bhikkhū bhagavato
etamatthaṃ ārocesuṃ . anujānāmi bhikkhave sati karaṇīye porisiyaṃ 2-
rukkhaṃ abhirūhituṃ āpadāsu yāvadatthanti.
[180] Tena kho pana samayena meṭṭhakokuṭṭhā 3- nāma bhikkhū
dve bhātikā honti brāhmaṇajātikā kalyāṇavācā kalyāṇa-
vākkaraṇā . te yena bhagavā tenupasaṅkamiṃsu upasaṅkamitvā
bhagavantaṃ abhivādetvā ekamantaṃ nisīdiṃsu . ekamantaṃ nisinnā
@Footnote: 1 Yu. na abhirūhati. 2 Ma. porisaṃ. 3 Ma. yameḷakekuḷā. Yu. yameḷutekulā.
Kho te bhikkhū bhagavantaṃ etadavocuṃ etarahi bhante bhikkhū nānānāmā
nānāgottā nānājaccā nānākulā pabbajitā te sakāya
niruttiyā buddhavacanaṃ dūsenti handa mayaṃ bhante buddhavacanaṃ
chandaso āropemāti . vigarahi buddho bhagavā kathaṃ hi nāma
tumhe moghapurisā evaṃ vakkhatha handa mayaṃ bhante buddhavacanaṃ
chandaso āropemāti netaṃ moghapurisā appasannānaṃ vā pasādāya
.pe. vigarahitvā dhammiṃ kathaṃ katvā bhikkhū āmantesi na bhikkhave
buddhavacanaṃ chandaso āropetabbaṃ yo āropeyya āpatti
dukkaṭassa anujānāmi bhikkhave sakāya niruttiyā buddhavacanaṃ
pariyāpuṇitunti.
[181] Tena kho pana samayena chabbaggiyā bhikkhū lokāyataṃ
pariyāpuṇanti . manussā ujjhāyanti khīyanti vipācenti .pe.
Seyyathāpi gihī kāmabhoginoti . assosuṃ kho bhikkhū tesaṃ manussānaṃ
ujjhāyantānaṃ khīyantānaṃ vipācentānaṃ .pe. athakho te bhikkhū
bhagavato etamatthaṃ ārocesuṃ .pe. api nu kho bhikkhave lokāyate
sāradassāvī imasmiṃ dhammavinaye vuḍḍhiṃ virūḷhiṃ vepullaṃ āpajjeyyāti.
No hetaṃ bhanteti 1- . imasmiṃ vā pana dhammavinaye sāradassāvī
lokāyataṃ pariyāpuṇeyyāti . no hetaṃ bhanteti 1- . na bhikkhave
lokāyataṃ pariyāpuṇitabbaṃ yo pariyāpuṇeyya āpatti dukkaṭassāti.
@Footnote: 1 Ma. Yu. itisaddo na dissati.
[182] Tena kho pana samayena chabbaggiyā bhikkhū lokāyataṃ vācenti.
Manussā ujjhāyanti khīyanti vipācenti .pe. seyyathāpi gihī
kāmabhoginoti .pe. bhagavato etamatthaṃ ārocesuṃ .pe. na bhikkhave
lokāyataṃ vācetabbaṃ yo vāceyya āpatti dukkaṭassāti.
[183] Tena kho pana samayena chabbaggiyā bhikkhū tiracchānavijjaṃ
pariyāpuṇanti .pe. bhagavato etamatthaṃ ārocesuṃ .pe. na bhikkhave
tiracchānavijjā pariyāpuṇitabbā yo pariyāpuṇeyya āpatti dukkaṭassāti.
[184] Tena kho pana samayena chabbaggiyā bhikkhū tiracchānavijjaṃ
vācenti . manussā ujjhāyanti khīyanti vipācenti .pe. seyyathāpi
gihī kāmabhoginoti .pe. bhagavato etamatthaṃ ārocesuṃ .pe. Na bhikkhave
tiracchānavijjā vācetabbā yo vāceyya āpatti dukkaṭassāti.
[185] Tena kho pana samayena buddho 1- bhagavā mahatiyā
parisāya parivuto dhammaṃ desento khipi . bhikkhū jīvatu bhante bhagavā
jīvatu sugatoti uccāsaddaṃ mahāsaddaṃ akaṃsu . tena saddena
dhammakathā antarā ahosi . athakho bhagavā bhikkhū āmantesi
api nu kho bhikkhave khipite jīvāti vutto 2- tappaccayā jīveyya
@Footnote: 1 Ma. Yu. ayaṃ pāṭho natthi. 2 Yu. vutte.
Vā mareyya vāti . no hetaṃ bhanteti 1- . na bhikkhave khipite
jīvāti vattabbo yo vadeyya āpatti dukkaṭassāti.
[186] Tena kho pana samayena manussā bhikkhūnaṃ khipite jīvatha
bhanteti vadanti . bhikkhū kukkuccāyantā nālapanti . manussā
ujjhāyanti khīyanti vipācenti kathaṃ hi nāma samaṇā sakyaputtiyā
jīvatha bhanteti vuccamānā nālapissantīti . bhagavato etamatthaṃ
ārocesuṃ .pe. gihī bhikkhave maṅgalikā anujānāmi bhikkhave
gihīnaṃ jīvatha bhanteti vuccamānena ciraṃ jīvāti vattunti.
[187] Tena kho pana samayena bhagavā mahatiyā parisāya parivuto
dhammaṃ desento nisinno hoti . aññatarena bhikkhunā lasuṇaṃ
khāyitaṃ hoti . so ca 2- mā bhikkhū byābāhiṃsūti 3- ekamantaṃ nisīdi.
Addasā kho bhagavā taṃ bhikkhuṃ ekamantaṃ nisinnaṃ disvāna bhikkhū
āmantesi kinnu kho so bhikkhave bhikkhu ekamantaṃ nisinnoti .
Etena bhante bhikkhunā lasuṇaṃ khāyitaṃ so ca 2- mā bhikkhū byābāhiṃsūti 3-
ekamantaṃ nisinnoti . api nu kho bhikkhave bhikkhunā 4- taṃ khāditabbaṃ
yaṃ khāditvā evarūpāya dhammakathāya paribāhiro assāti . no
hetaṃ bhanteti . na bhikkhave lasuṇaṃ khāditabbaṃ yo khādeyya āpatti
dukkaṭassāti.
@Footnote: 1 Ma. Yu. itisaddo na paññāyati. 2 Ma. Yu. casaddo natthi. 3 Ma. byābādhiṃsūti.
@Yu. vyābāhiṃsūti 4 Ma. Yu. ayaṃ pāṭho natthi.
[188] Tena kho pana samayena āyasmato sārīputtassa
udaravātābādho hoti . athakho āyasmā mahāmoggallāno
yenāyasmā sārīputto tenupasaṅkami upasaṅkamitvā āyasmantaṃ
sārīputtaṃ etadavoca pubbe te āvuso sārīputta udaravātābādho
kena phāsu hotīti . lasuṇena me āvusoti . bhagavato etamatthaṃ
ārocesuṃ. Anujānāmi bhikkhave ābādhappaccayā lasuṇaṃ khāditunti.
The Pali Tipitaka in Roman Character Volume 7 page 68-73.
https://84000.org/tipitaka/read/roman_item.php?book=7&item=174&items=15
Classified by [Item Number] :-
http://84000.org/tipitaka/read/roman_item.php?book=7&item=174&items=15&mode=bracket
Compare with The Pali Tipitaka in Thai Character :-
https://84000.org/tipitaka/read/pali_item.php?book=7&item=174&items=15
Compare with The Royal Version of Thai Tipitaka :-
https://84000.org/tipitaka/read/byitem.php?book=7&item=174&items=15
Study Atthakatha :-
https://84000.org/tipitaka/attha/attha.php?b=7&i=174
Contents of The Tipitaka Volume 7
https://84000.org/tipitaka/read/?index_7
https://84000.org/tipitaka/english/?index_7
บันทึก ๑๔ พฤศจิกายน พ.ศ. ๒๕๖๐.
การแสดงผลนี้อ้างอิงข้อมูลจากพระไตรปิฎกฉบับภาษาบาลี อักษรโรมัน.
หากพบข้อผิดพลาด กรุณาแจ้งได้ที่ [email protected]
