|
| บทนำ พระวินัยปิฎก พระสุตตันตปิฎก พระอภิธรรมปิฎก ค้นพระไตรปิฎก ชาดก หนังสือธรรมะ |
10. Mahāvāṇijajātakaṃ.
Vāṇijā samitiṃ katvāti idaṃ satthā jetavane viharanto sāvatthīvāsino
vāṇije ārabbha kathesi.
Te kira vohāratthāya gacchantā satthu mahādānaṃ datvā
saraṇesu ca sīlesu ca patiṭṭhāya bhante sace arogā āgamissāma
puna tumhākaṃ pāde vandissāmāti vatvā pañcasatehi sakaṭehi
nikkhamitvā kantāraṃ patvā maggaṃ asallakkhetvā maggamūḷhā
nirudake nirāhāre araññe vicarantā ekaṃ nāgapariggahitaṃ nigrodharukkhaṃ
disvā sakaṭāni mocetvā rukkhamūle nisīdiṃsu. Te tassa
udakatiṇāniviya nīlāni siniddhāni pattāni udakapuṇṇāniviya ca
sākhāni disvā cintayiṃsu imasmiṃ rukkhe udakaṃ sañcaraṇaṃviya paññāyati
imassa purimasākhaṃ chindāma pānīyaṃ yo dassatīti. Atheko rukkhaṃ
abhirūhitvā sākhaṃ chindi. Tālakhandhappamāṇā udakadhārā pavatti.
Te tattha nhātvā pivitvā ca dakkhiṇasākhaṃ chindiṃsu. Tato
nānaggarasabhojanaṃ nikkhami. Taṃ bhuñjitvā pacchimasākhaṃ chindiṃsu.
Tato alaṅkataitthiyo nikkhamiṃsu. Tāhi saddhiṃ abhiramitvā uttarasākhaṃ
chindiṃsu. Tato satta ratanāni nikkhamiṃsu. Tāni gahetvā pañca
sakaṭastāni pūretvā sāvatthiṃ paccāgantvā dhanaṃ saṅgopetvā
gandhamālādihatthā jetavanaṃ gantvā satthāraṃ vanditvā pūjetvā
ekamantaṃ nisinnā dhammakathaṃ sutvā nimantetvā punadivase mahādānaṃ
Datvā bhante imasmiṃ dāne amhākaṃ dhanadāyikāya rukkhadevatāya
pattiṃ demāti pattiṃ adaṃsu. Satthā niṭṭhitabhattakicco katararukkhadevatāya
pattiṃ dethāti pucchi. Vāṇijā nigrodharukkhe dhanassa laddhakāraṇaṃ
tathāgatassa ārocesuṃ. Satthā tumhe tāva mattaññutāya
taṇhāvasikā ahutvā dhanaṃ labhittha pubbe pana amattaññutāya
taṇhāvasikā dhanañca jīvitañca jahiṃsūti vatvā tehi yācito atītaṃ āhari
atīte bārāṇasīnagaraṃ tadeva kantāraṃ sveva nigrodho. Vāṇijā
maggamūḷhā tameva nigrodhaṃ passiṃsu.
Tamatthaṃ satthā abhisambuddho hutvā kathento gāthā āha
vāṇijā samitiṃ katvā nānāraṭṭhato āgatā
dhanahārā pakkamiṃsu ekaṃ katvāna gāmaṇiṃ.
Te taṃ kantāramāgamma appabhakkhaṃ anūdakaṃ
mahānigrodhamaddakkhuṃ sītacchāyaṃ manoramaṃ.
Tepi tattha nisīditvā tassa rukkhassa chādiyā
vāṇijā samacintesuṃ bālā mohena pārutā.
Allāyate ayaṃ rukkho api vārīva sandati
iṅghassa purimaṃ sākhaṃ mayaṃ chindāma vāṇijā.
Sā ca chinnāva pagghari vāri acchaṃ anāvilaṃ
te tattha nhātvā pivitvā ca yāva icchiṃsu vāṇijā.
Dutiyaṃ samacintesuṃ bālā mohena pārutā
iṅghassa dakkhiṇaṃ sākhaṃ mayaṃ chindāma vāṇijā.
Sā ca chinnāva pagghari sālimaṃsodanaṃ bahuṃ
appodakavaṇṇe kummāse siṅgividalasupiyo
te tattha bhutvā khāditvā yāva icchiṃsu vāṇijā.
Tatiyaṃ samacintesuṃ bālā mohena pārutā
iṅghassa pacchimaṃ sākhaṃ mayaṃ chindāma vāṇijā.
Sā ca chinnāva pagghari nāriyo samalaṅkatā
vicittavatthābharaṇā āmuttamaṇikuṇḍalā.
Apisu vāṇijā ekā nāriyo pañcavīsati
samantā parikariṃsu tassa rukkhassa chādiyā
te tāhi parivāretvā yāva icchiṃsu vāṇijā.
Catutthaṃ samacintesuṃ bālā mohena pārutā
iṅghassa uttaraṃ sākhaṃ mayaṃ chindāma vāṇijā.
Sā ca chinnāva pagghari muttāveḷuriyā bahū
ratanaṃ jātarūpañca kuttiyo paṭiyāni ca
kāsikāni ca vatthāni uṭṭiyāneva kambalā
te tattha bhāre bandhitvā yāva icchiṃsu vāṇijā.
Pañcamaṃ samacintesuṃ bālā mohena pārutā
iṅghassa mūlaṃ chindāma api bhiyyo labhāmhase.
Samuṭṭhahi satthavāho yācamāno katañjali
nigrodhe kiṃ aparajjhatha vāṇijā bhaddamatthu te.
Vārihārī purimā sākhā annapānañca dakkhiṇā
nāridā pacchimā sākhā sabbakāme ca uttarā
nigrodhe kiṃ aparajjhatha vāṇijā bhaddamatthu te.
Yassa rukkhassa chāyā nisīdeyya sayeyya vā
na tassa sākhaṃ bhañjeyya mittadubbho hi pāpako.
Te ca tassa anāditvā ekassa vacanaṃ bahū
nissitā hi kuṭhārīhi mūlato naṃ upakkamunti.
Tattha samitiṃ katvāti bārāṇasiyaṃ samāgamaṃ katvā bahū ekato
hutvāti attho. Pakkamiṃsūti pañcahi sakaṭasatehi bārāṇaseyyakaṃ bhaṇḍaṃ
ādāya pakkamiṃsu. Gāmaṇinti ekaṃ paññavantataraṃ satthavāhaṃ
katvā. Chādiyāti chāyāya. Allāyateti udakabharitoviya
hutvā paññāyati. Chinnāva paggharīti eko rukkhārohaṇakusalo
abhirūhitvā taṃ chindi sā chinnamattā paggharīti dasseti.
Paratopi eseva nayo. Appodakavaṇṇe kummāseti
appodakapāyāsasadise kummāse. Siṅgīti siṅgaverādikaṃ uttaribhaṅgaṃ.
Vidalasupiyoti muggasūpādayo. Vāṇijā ekāti ekekassa vāṇijassa
yattakā vāṇijā tesu ekekassa ekekāva satthavāhassa pana
santike pañcavīsati ṭhitāti attho. Parikariṃsūti parivāresuṃ tāhi
pana saddhiṃyeva nāgarājānubhāvena tāni vitānasayanādīni pagghariṃsu.
Kuttiyoti hatthattharaṇādayo. Paṭiyāni cāti uṇṇāmayapaccattharaṇādīni.
Setakambalānītipi vadantiyeva. Uṭṭiyāneva kambalāti
Uṭṭiyānannāma kambalā atthi. Te tattha bhāre bandhitvāti yāvattakaṃ
icchiṃsu tāvattakaṃ tattha gahetvā pañca sakaṭasatāni pūretvāti
attho. Vāṇijā bhaddamatthu teti ekekaṃ vāṇijaṃ ālapanto
bhaddaṃ te atthūti āha. Annapānañcāti anna pānañca adāsi.
Sabbakāme cāti sabbakāme ca adāsi. Mittadubbhoti mittānaṃ dubbho
mittānaṃ dubbhanapuriso hi pāpako lāmakonāma. Anāditvāti
anādayitvā tassa vacanaṃ agahetvā. Upakkamunti mohā upakkamuṃ
chindituṃ ārabhiṃsu.
Atha ne chindanatthāya rukkhaṃ upagate disvā nāgarājā cintesi
ahaṃ etesaṃ pipāsitānaṃ pānīyaṃ dāpesiṃ tato dibbabhojanaṃ athassa
sayanāniceva paricārikānāriyo ca tato pañcasakaṭasatapūraṃ ratanaṃ
idāni panime rukkhaṃ mūlato chindissāmāti vadanti ativiya luddhā
ṭhapetvā satthavāhaṃ sese māretuṃ vaṭṭatīti. So ettakā
sannaddhayodhā nikkhamantu ettakā dhanuggahā ettakā camminoti
senaṃ vicāresi.
Tamatthaṃ pakāsento satthā āha
tato ca nāgā nikkhamiṃsu sannaddhā pañcavīsati
dhanuggahānaṃ tisatā chasahassā ca camminoti.
Tattha sannaddhāti suvaṇṇaratanādicammikavacchitā. Dhanuggahānaṃ
tisatāti meṇḍavisāṇadhanuggahānaṃ tīṇi satāni. Camminoti yodhā
cammikaphalakahatthā chasahassāti.
Ete hanatha bandhatha mā vo muñcittha jīvitaṃ
ṭhapetvā satthavāhañca sabbe tasmiṃ karotha teti.
Ayaṃ nāgarājena vuttagāthā.
Tattha mā vo muñcittha jīvitanti kassaci ekassāpi jīvitaṃ
mā vo muñcittha.
Nāgā tathā katvā uttarattharaṇādīni pañcasu sakaṭasatesu
āropetvā satthavāhaṃ gahetvā sayaṃ tāni sakaṭāni pājetvā
bārāṇasiṃ gantvā sabbaṃ dhanaṃ tassa gehe paṭisāmetvā taṃ āpucchitvā
attano nāgabhavanameva gatā.
Tamatthaṃ viditvā satthā osānagāthamāha
tasmā hi paṇḍito poso sampassaṃ atthamattano
lobhassa na vasaṃ gacche haneyya disakaṃ manaṃ
evamādīnavaṃ ñatvā taṇhā dukkhassa sambhavaṃ
vītataṇho anādāno sato bhikkhu paribbajeti.
Tattha tasmāti yasmā lobhavasikāva mahāvināsaṃ pattā
satthavāho uttamasampattiṃ tasmā. Haneyya disakaṃ mananti attano
uppajjamānaṃ nānāvidhānaṃ lobhasattānaṃ santakaṃ manaṃ lobhasampayuttaṃ
cittaṃ haneyyāti attho. Evamādīnavanti evaṃ lobhe ādīnavaṃ
jānitvā. Taṇhā dukkhassa sambhavanti jātiādidukkhassa sā ca
taṇhā sambhavo tato evaṃ taṃ dukkhaṃ nibbatti evaṃ taṇhāva
Dukkhassa sambhavaṃ ñatvā vītataṇho anādāno maggenāgatāya satiyā
sato hutvā bhikkhu. Paribbajeti iriyetha vattethāti. Arahattena
desanāya kūṭaṃ gaṇhi.
Imañca pana dhammadesanaṃ āharitvā evaṃ upāsakā pubbe
lobhavasikā vāṇijā mahāvināsaṃ pattā tasmā lobhavasikehi na
bhavitabbanti vatvā saccāni pakāsetvā jātakaṃ samodhānesi
(saccapariyosāne te vāṇijā sotāpattiphale patiṭṭhitā) tadā
nāgarājā sārīputto ahosi satthavāho pana ahamevāti.
Mahāvāṇijajātakaṃ dasamaṃ.
-------------
The Pali Atthakatha in Roman Book 40 page 348-354.
http://84000.org/tipitaka/atthapali/read_rm.php?B=40&A=7093
อรรถกถาบาลีอักษรไทย :-
http://84000.org/tipitaka/atthapali/read_th.php?B=40&A=7093
อ่านอรรถกถาแปลไทย :-
http://84000.org/tipitaka/attha/attha.php?b=27&i=1990
เนื้อความพระไตรปิฎกฉบับหลวง :-
http://84000.org/tipitaka/read/r.php?B=27&A=7711
พระไตรปิฎกฉบับบาลีอักษรไทย :-
http://84000.org/tipitaka/read/pali_read.php?B=27&A=8097
The Pali Tipitaka in Roman Character :-
http://84000.org/tipitaka/read/roman_read.php?B=27&A=8097
Contents of The Tipitaka Volume 27
http://84000.org/tipitaka/read/?index_27
        |
|
บันทึก ๖ กุมภาพันธ์ พ.ศ. ๒๕๖๑. การแสดงผลนี้อ้างอิงข้อมูลจากอรรถกถาฉบับภาษาบาลี อักษรโรมัน. หากพบข้อผิดพลาด กรุณาแจ้งได้ที่ [email protected]