AtthaPali Vol.3

{501} Idāni sabbasikkhāpadānaṃ ekekena ākārena navadhā saṅgahaṃ dassetuṃ nava saṅgahātiādimāha. Tattha vatthusaṅgahoti vatthunā saṅgaho. Evaṃ sesesupi padattho veditabbo. Ayaṃ panettha atthayojanā. Yasmā hi ekaṃ sikkhāpadampi avatthusmiṃ paññattaṃ Natthi tasmā sabbāni vatthunā saṅgahitānīti evaṃ tāva vatthusaṅgaho veditabbo. Yasmā pana dve āpattikkhandhā sīlavipattiyā saṅgahitā pañca āpattikkhandhā ācāravipattiyā cha sikkhāpadāni ājīvavipattiyā saṅgahitāni tasmā sabbānipi vipattiyā saṅgahitānīti evaṃ vipattisaṅgaho veditabbo. Yasmā pana sattahāpattīhi muttaṃ ekaṃ sikkhāpadaṃpi natthi tasmā sabbāni āpattiyā saṅgahitānīti evaṃ āpattisaṅgaho veditabbo. Sabbāni ca sattasu nagaresu paññattānīti nidānena saṅgahitānīti evaṃ nidānasaṅgaho veditabbo. Yasmā pana ekasikkhāpadaṃpi ajjhācārake puggale asati paññattaṃ natthi tasmā sabbāni puggalena saṅgahitānīti evaṃ puggalasaṅgaho veditabbo. Sabbāni pana pañcahi ceva sattahi ca āpattikkhandhehi saṅgahitāni. Tāni sabbāni na vinā chahi samuṭṭhānehi samuṭṭhahantīti samuṭṭhānena saṅgahitāni. Sabbāni ca catūsu adhikaraṇesu āpattādhikaraṇena saṅgahitāni. Sabbāni sattahi samathehi samathaṃ gacchantīti samathehi saṅgahitāni. Evamettha khandhaadhikaraṇasamuṭṭhāna- samathasaṅgahāpi veditabbā. Sesaṃ pubbe vuttanayamevāti. Samantapāsādikāya vinayasaṃvaṇṇanāya saṅgahavaggavaṇṇanā niṭṭhitā. Niṭṭhitā ca parivārassa anuttānatthapadavaṇṇanāti. ------------------

The Pali Atthakatha in Roman Book 3 page 632-633. http://84000.org/tipitaka/atthapali/rm_line.php?B=3&A=12845 อรรถกถาบาลีอักษรไทย :- http://84000.org/tipitaka/atthapali/read_th.php?B=3&A=12845 อ่านอรรถกถาแปลไทย :- http://84000.org/tipitaka/attha/attha.php?b=8&i=1362 เนื้อความพระไตรปิฎกฉบับหลวง :- http://84000.org/tipitaka/read/r.php?B=8&A=13305 พระไตรปิฎกฉบับบาลีอักษรไทย :- http://84000.org/tipitaka/read/pali_read.php?B=8&A=11134 The Pali Tipitaka in Roman Character :- http://84000.org/tipitaka/read/roman_read.php?B=8&A=11134 Contents of The Tipitaka Volume 4 http://84000.org/tipitaka/read/?index_8