Suttanipāte dutiyo cūḷavaggo
paṭhamaṃ ratanasuttaṃ
[314] |314.647| 1 Yānīdhabhūtāni samāgatāni
bhummāni vā yāni va antalikkhe
sabbeva bhūtā sumanā bhavantu
|314.648| athopi sakkacca suṇantu bhāsitaṃ
tasmā hi bhūtā nisāmetha sabbe
mettaṃ karotha mānusiyā pajāya.
Divā ca ratto ca haranti ye baliṃ
tasmā hi ne rakkhatha appamattā.
|314.649| Yaṃ kiñci vittaṃ idha vā huraṃ vā
saggesu vā yaṃ ratanaṃ paṇītaṃ
na no samaṃ atthi tathāgatena
idampi buddhe ratanaṃ paṇītaṃ.
Etena saccena suvatthi hotu.
|314.650| Khayaṃ virāgaṃ amataṃ paṇītaṃ
Yadajjhagā sakyamunī samāhito
na tena dhammena samatthi kiñci
idampi dhamme ratanaṃ paṇītaṃ.
Etena saccena suvatthi hotu.
|314.651| Yambuddhaseṭṭho 1- parivaṇṇayī suciṃ
samādhimānantarikaññamāhu
samādhinā tena samo na vijjati
idampi dhamme ratanaṃ paṇītaṃ.
Etena saccena suvatthi hotu.
|314.652| Ye puggalā aṭṭhasataṃ pasaṭṭhā
cattāri etāni yugāni honti
te dakkhiṇeyyā sugatassa sāvakā
etesu dinnāni mahapphalāni
idampi saṅghe ratanaṃ paṇītaṃ.
Etena saccena suvatthi hotu.
|314.653| Ye suppayuttā manasā daḷhena
nikkāmino gotamasāsanamhi
te pattipattā amataṃ vigayha
laddhā mudhā nibbutiṃ bhuñjamānā
idampi saṅghe ratanaṃ paṇītaṃ.
@Footnote: 1 Ma. yaṃ ....
Etena saccena suvatthi hotu.
|314.654| Yathindakhīlo paṭhaviṃ sito siyā
catubbhi vātebhi asampakampiyo
tathūpamaṃ sappurisaṃ vadāmi
yo ariyasaccāni avecca passati
idampi saṅghe ratanaṃ paṇītaṃ.
Etena saccena suvatthi hotu.
|314.655| Ye ariyasaccāni vibhāvayanti
gambhīrapaññena sudesitāni
kiñcāpi te honti bhusappamattā
na te bhavaṃ aṭṭhamamādiyanti
idampi saṅghe ratanaṃ paṇītaṃ.
Etena saccena suvatthi hotu.
|314.656| Sahāvassa dassanasampadāya
tayassu dhammā jahitā bhavanti
sakkāyadiṭṭhi vicikicchitañca
sīlabbataṃ vāpi yadatthi kiñci
|314.657| catūhapāyehi ca vippamutto
cha 1- cābhiṭhānāni abhabbo 2- kātuṃ
idampi saṅghe ratanaṃ paṇītaṃ.
@Footnote: 1 Ma. chaccābhiṭhānāni. 2 Ma. abhabba kātuṃ.
Etena saccena suvatthi hotu.
|314.658| Kiñcāpi so kammaṃ 1- karoti pāpakaṃ
kāyena vācāyuda cetasā vā
abhabbo so tassa paṭicchadāya
abhabbatā diṭṭhapadassa vuttā
idampi saṅghe ratanaṃ paṇītaṃ.
Etena saccena suvatthi hotu.
|314.659| Vanappagumbe yathā phussitagge
gimhānamāse paṭhamasmiṃ gimhe
tathūpamaṃ dhammavaraṃ adesayi
nibbānagāmiṃ paramaṃ hitāya
idampi buddhe ratanaṃ paṇītaṃ.
Etena saccena suvatthi hotu.
|314.660| Varo varaññū varado varāharo
anuttaro dhammavaraṃ adesayi
idampi buddhe ratanaṃ paṇītaṃ.
Etena saccena suvatthi hotu.
|314.661| Khīṇaṃ purāṇaṃ navaṃ natthi sambhavaṃ
virattacittāyatike 2- bhavasmiṃ
te khīṇabījā aviruḷhichandā
@Footnote: 1 Ma. kamma . 2 Po. Yu. virattacittā āyatike.
Nibbanti dhīrā yathāyampadīpo 1-
idampi saṅghe ratanaṃ paṇītaṃ.
Etena saccena suvatthi hotu.
|314.662| Yānīdha bhūtāni samāgatāni
bhummāni vā yāni va antalikkhe
tathāgataṃ devamanussapūjitaṃ
buddhaṃ namassāma suvatthi hotu.
|314.663| Yānīdha bhūtāni samāgatāni
bhummāni vā yāni va antalikkhe
tathāgataṃ devamanussapūjitaṃ
dhammaṃ namassāma suvatthi hotu.
|314.664| Yānīdha bhūtāni samāgatāni
bhummāni vā yāni va antalikkhe
tathāgataṃ devamanussapūjitaṃ
saṅghaṃ namassāma suvatthi hotu.
Ratanasuttaṃ paṭhamaṃ.
-----------
@Footnote: 1 Ma. yathāyaṃ.
Suttanipāte dutiyassa cūḷavaggassa dutiyaṃ āmagandhasuttaṃ
[315] |315.665| 2 Sāmākaciṅgulakacīnakāni 1- ca
pattapphalaṃ mūlapphalaṃ gavipphalaṃ
dhammena laddhaṃ satamassamānā
na kāmakāmā alikaṃ bhaṇanti.
|315.666| Yadassamāno sukataṃ suniṭṭhitaṃ
parehi dinnaṃ payataṃ paṇītaṃ
sālīnamannaṃ paribhuñjamāno
so bhuñjasī 2- kassapa āmagandhaṃ.
|315.667| Na āmagandho mama kappatīti
icceva tvaṃ bhāsati brahmabandhu
sālīnamannaṃ paribhuñjamāno
sakuntamaṃsehi susaṅkhatehi.
Pucchāmi taṃ kassapa etamatthaṃ
kathaṃpakāro tava āmagandho
|315.668| pāṇātipāto vadhachedabandhanaṃ
theyyaṃ musāvādo nikatī vañcanāni ca
ajjhenakuttaṃ 3- paradārasevanā
esāmagandho na hi maṃsabhojanaṃ.
@Footnote: 1 Ma. ... ciṅgūlaka .... Yu. sāmākaḍiṅgalakacīnākāni ca. 2 Yu. bhuñjatī.
@3 Yu. ajjena kujjaṃ.
|315.669| Ye idha kāmesu asaññatā janā
rasesu giddhā 1- asucīkamissatā 2-
natthīkadiṭṭhī 3- visamā durannayā
esāmagandho na hi maṃsabhojanaṃ.
|315.670| Ye lūkhasā dāruṇa 4- piṭṭhimaṃsikā
mittadduno nikkaruṇātimānino
adānasīlā na ca denti kassaci
esāmagandho na hi maṃsabhojanaṃ.
|315.671| Kodho mado thambho paccuṭṭhāpanā 5- ca
māyā ussuyā 6- bhassasamussayo ca
mānātimāno ca asabbhi santhavo
esāmagandho na hi maṃsabhojanaṃ.
|315.672| Ye pāpasīlā iṇaghā ca sūcakā 7-
vohārakūṭā idha pāṭirūpikā
narādhamā yedha karonti kibbisaṃ
esāmagandho na hi maṃsabhojanaṃ.
|315.673| Ye idha pāṇesu asaññatā janā
paresamādāya vihesamuyyutā
dussīlaluddhā pharusā anādarā
@Footnote: 1 Po. gedhā. 2 Po. asucibhāvamissitā. Ma. asucibhāvamassitā.
@Yu. asucīkamissitā. 3 Ma. natthikadiṭṭhī. Yu. natthikadiṭṭhi.
@4 Po. Ma. Yu. dāruṇā. 5 Po. Ma. paccupaṭṭhāpanā . 6 Po. Yu. ussuyyā.
@Ma. usūyā. 7 Po. Ma. Yu. iṇaghātasucakā.
Esāmagandho na hi maṃsabhojanaṃ.
|315.674| Etesu giddhā viruddhātipātino
niccuyyutā pecca tamaṃ vajanti ye
patanti sattā nirayaṃ avaṃsirā
esāmagandho na hi maṃsabhojanaṃ.
|315.675| Na macchamaṃsaṃ 1- nānāsakattaṃ
na naggiyaṃ (na 2- muṇḍiyaṃ jaṭā 3- jallaṃ
kharājināni) nāggihutassupasevanā 4-
ye vāpi loke amarā bahū tapā
mantāhutī yaññamutūpasevanā
sodhenti maccaṃ avitiṇṇakaṅkhaṃ.
|315.676| Yo 5- tesu gutto viditindriyo care
dhamme ṭhito ajjavamaddave rato
saṅgātigo sabbadukkhappahīno
na limpati diṭṭhasutesu dhīro.
|315.677| Iccetamatthaṃ bhagavā punappunaṃ
akkhāsi naṃ vedayi mantapāragū
citrāhi gāthāhi munippakāsayi 6-
nirāmagandho asito durannayo.
|315.678| Sutvāna buddhassa subhāsitaṃ padaṃ
@Footnote: 1 Ma. na macchamaṃsānamanāsakattaṃ 2 Yu. nasaddo natthi 3 Po. na muṇḍiyaṃ jaṭā na
@jallā. 4 Po. ... aggihutassupasevanā. Yu. kharājinānivā nāggihutassupasevanāva
@yā. 5 Yu. so. 6 Ma. munī.
Nirāmagandhaṃ sabbadukkhappanudaṃ 1-
nīcamano vandi tathāgatassa
tattheva pabbajjamarocayitthāti.
Āmagandhasuttaṃ dutiyaṃ.
---------
The Pali Tipitaka in Roman Character Volume 25 page 367-375.
http://84000.org/tipitaka/pali/roman_item_s.php?book=25&item=314&items=2
Classified by [Item Number] :-
http://84000.org/tipitaka/pali/roman_item_s.php?book=25&item=314&items=2&mode=bracket
Compare with The Pali Tipitaka in Thai Character :-
http://84000.org/tipitaka/read/pali_item_s.php?book=25&item=314&items=2
Compare with The Royal Version of Thai Tipitaka :-
http://84000.org/tipitaka/read/byitem_s.php?book=25&item=314&items=2
Study Atthakatha :-
http://84000.org/tipitaka/attha/attha.php?b=25&i=314
The Pali Atthakatha in Thai :-
http://84000.org/tipitaka/atthapali/read_th.php?B=29&A=1
The Pali Atthakatha in Roman :-
http://84000.org/tipitaka/atthapali/read_rm.php?B=29&A=1
Contents of The Tipitaka Volume 25
http://84000.org/tipitaka/read/?index_25
บันทึก ๑๔ พฤศจิกายน พ.ศ. ๒๕๖๐.
การแสดงผลนี้อ้างอิงข้อมูลจากพระไตรปิฎกฉบับภาษาบาลี อักษรโรมัน.
หากพบข้อผิดพลาด กรุณาแจ้งได้ที่ [email protected]
