[84] Tena kho pana samayena assajipunabbasukā nāma kiṭāgirismiṃ
āvāsikā honti alajjino pāpabhikkhū . te evarūpaṃ anācāraṃ
ācaranti mālāvacchaṃ ropentipi ropāpentipi siñcantipi
siñcāpentipi ocinantipi ocināpentipi ganthentipi
ganthāpentipi ekatovaṇṭikamālaṃ karontipi kārāpentipi
ubhatovaṇṭikamālaṃ karontipi kārāpentipi mañjarikaṃ karontipi
kārāpentipi vidhutikaṃ 1- karontipi kārāpentipi vaṭaṃsakaṃ karontipi
kārāpentipi āveḷaṃ karontipi kārāpentipi uracchadaṃ karontipi
kārāpentipi te kulitthīnaṃ kuladhītānaṃ kulakumārīnaṃ kulasuṇhānaṃ kuladāsīnaṃ
ekatovaṇṭikamālaṃ harantipi harāpentipi ubhatovaṇṭikamālaṃ harantipi
harāpentipi mañjarikaṃ harantipi harāpentipi vidhutikaṃ harantipi
harāpentipi vaṭaṃsakaṃ harantipi harāpentipi āveḷaṃ harantipi
harāpentipi uracchadaṃ harantipi harāpentipi te kulitthīhi kuladhītāhi
kulakumārīhi kulasuṇhāhi kuladāsīhi saddhiṃ ekabhājanepi bhuñjanti
@Footnote: 1 Ma. vidhūtikaṃ.
Ekathālakepi pivanti ekāsanepi nisīdanti ekamañcepi tuvaṭṭenti
ekattharaṇāpi tuvaṭṭenti ekapāvuraṇāpi tuvaṭṭenti
ekattharaṇapāvuraṇāpi tuvaṭṭenti vikālepi bhuñjanti majjampi
pivanti mālāgandhavilepanampi dhārenti naccantipi gāyantipi vādentipi
lāsentipi naccantiyāpi naccanti naccantiyāpi gāyanti naccantiyāpi
vādenti naccantiyāpi lāsenti gāyantiyāpi naccanti gāyantiyāpi
gāyanti gāyantiyāpi vādenti gāyantiyāpi lāsenti vādentiyāpi
naccanti vādentiyāpi gāyanti vādentiyāpi vādenti vādentiyāpi
lāsenti lāsentiyāpi naccanti lāsentiyāpi gāyanti
lāsentiyāpi vādenti lāsentiyāpi lāsenti aṭṭhapadepi kīḷanti
dasapadepi kīḷanti ākāsepi kīḷanti parihārapathepi kīḷanti santikāyapi
kīḷanti khalikāyapi kīḷanti ghaṭikāyapi 1- kīḷanti salākahatthenapi
kīḷanti akkhenapi kīḷanti paṅkacirenapi 2- kīḷanti vaṅkakenapi kīḷanti
mokkhacikāyapi kīḷanti ciṅgulakenapi kīḷanti pattāḷhakenapi kīḷanti
rathakenapi kīḷanti dhanukenapi kīḷanti akkharikāyapi kīḷanti manesikāyapi
kīḷanti yathāvajjenapi kīḷanti hatthismimpi sikkhanti assasmimpi
sikkhanti rathasamimpi sikkhanti dhanusmimpi sikkhanti tharusmimpi sikkhanti
hatthissapi purato dhāvanti assassapi purato dhāvanti rathassapi
purato dhāvanti dhāvantipi ādhāvantipi usseḷhentipi 3-
@Footnote: 1 Yu. ghaṭikenapi . 2 Ma. Yu. paṅgacīrenapi . 3 Ma. usseḷenti.
Apphoṭentipi 1- nibbujjhantipi muṭṭhīhipi yujjhanti raṅgamajjhepi saṅghāṭiṃ
pattharitvā naccantiṃ 2- evaṃ vadenti idha bhagini naccassūti
nalāṭikaṃpi denti vividhaṃpi anācāraṃ ācaranti.
[85] Tena kho pana samayena aññataro bhikkhu kāsīsu vassaṃ
vuttho sāvatthiṃ gacchanto bhagavantaṃ dassanāya yena kiṭāgiri
tadavasari.
{85.1} Athakho so bhikkhu pubbaṇhasamayaṃ nivāsetvā
pattacīvaramādāya kiṭāgiriṃ piṇḍāya pāvisi pāsādikena abhikkantena
paṭikkantena ālokitena vilokitena sammiñjitena pasāritena
okkhittacakkhu iriyāpathasampanno . manussā taṃ bhikkhuṃ passitvā
evamāhaṃsu kvāyaṃ abalabalo viya mandamando viya bhākuṭikabhākuṭiko
viya ko imassa upagatassa piṇḍakaṃpi dassati amhākaṃ pana ayyā
assajipunabbasukā saṇhā sakhilā sukhasambhāsā mihitapubbaṅgamā
ehisvāgatavādino abbhākuṭikā uttānamukhā pubbabhāsino tesaṃ kho
nāma piṇḍo dātabboti.
{85.2} Addasā kho aññataro upāsako taṃ bhikkhuṃ kiṭāgirismiṃpi
piṇḍāya carantaṃ disvāna yena so bhikkhu tenupasaṅkami upasaṅkamitvā
taṃ bhikkhuṃ abhivādetvā etadavoca api bhante piṇḍo labbhatīti .
Na kho āvuso piṇḍo labbhatīti. Ehi bhante gharaṃ gamissāmāti.
{85.3} Athakho so upāsako taṃ bhikkhuṃ gharaṃ netvā bhojetvā
etadavoca kahaṃ bhante ayyo gamissatīti .
@Footnote: 1 Yu. appoṭhenti . 2 Ma. Yu. naccakiṃ.
Sāvatthiṃ kho ahaṃ āvuso gamissāmi bhagavantaṃ dassanāyāti.
{85.4} Tenahi bhante mama vacanena bhagavato pāde sirasā
vandāhi evañca vadehi duṭṭho bhante kiṭāgirismiṃ āvāso
assajipunabbasukā nāma kiṭāgirismiṃ āvāsikā alajjino
pāpabhikkhū te evarūpaṃ anācāraṃ ācaranti mālāvacchaṃ ropentipi
ropāpentipi siñcantipi siñcāpentipi ocinantipi ocināpentipi
ganthentipi ganthāpentipi ekatovaṇṭikamālaṃ karontipi kārāpentipi
ubhatovaṇṭikamālaṃ karontipi kārāpentipi mañjarikaṃ karontipi
kārāpentipi vidhutikaṃ karontipi kārāpentipi vaṭaṃsakaṃ karontipi
kārāpentipi āveḷaṃ karontipi kārāpentipi uracchadaṃ karontipi
kārāpentipi
{85.5} te kulitthīnaṃ kuladhītānaṃ kulakumārīnaṃ kulasuṇhānaṃ
kuladāsīnaṃ ekatovaṇṭikamālaṃ harantipi harāpentipi ubhatovaṇṭikamālaṃ
harantipi harāpentipi mañjarikaṃ harantipi harāpentipi vidhutikaṃ
harantipi harāpentipi vaṭaṃsakaṃ harantipi harāpentipi āveḷaṃ
harantipi harāpentipi uracchadaṃ harantipi harāpentipi
{85.6} te kulitthīhi kuladhītāhi kulakumārīhi kulasuṇhāhi
kuladāsīhi saddhiṃ ekabhājanepi bhuñjanti ekathālakepi pivanti
ekāsanepi nisīdanti ekamañcepi tuvaṭṭenti ekattharaṇāpi
tuvaṭṭenti ekapāvuraṇāpi tuvaṭṭenti ekattharaṇapāvuraṇāpi
tuvaṭṭenti vikālepi bhuñjanti majjaṃpi pivanti mālāgandhavilepanaṃpi
dhārenti naccantipi gāyantipi vādentipi lāsentipi
Naccantiyāpi naccanti naccantiyāpi gāyanti naccantiyāpi vādenti
naccantiyāpi lāsenti gāyantiyāpi naccanti gāyantiyāpi gāyanti
gāyantiyāpi vādenti gāyantiyāpi lāsenti vādentiyāpi naccanti
vādentiyāpi gāyanti vādentiyāpi vādenti vādentiyāpi lāsenti
lāsentiyāpi naccanti lāsentiyāpi gāyanti lāsentiyāpi vādenti *-
lāsentiyāpi lāsenti
{85.7} aṭṭhapadepi kīḷanti dasapadepi kīḷanti ākāsepi
kīḷanti parihārapathepi kīḷanti santikāyapi kīḷanti khalikāyapi
kīḷanti ghaṭikāyapi kīḷanti salākahatthenapi kīḷanti akkhenapi kīḷanti
paṅkacirenapi kīḷanti vaṅkakenapi kīḷanti mokkhacikāyapi kīḷanti
ciṅgulakenapi kīḷanti pattāḷhakenapi kīḷanti rathakenapi kīḷanti
dhanukenapi kīḷanti akkharikāyapi kīḷanti manesikāyapi kīḷanti
yathāvajjenapi kīḷanti
{85.8} hatthismiṃpi sikkhanti assasmiṃpi sikkhanti rathasmiṃpi
sikkhanti dhanusmiṃpi sikkhanti tharusmiṃpi sikkhanti hatthissapi purato
dhāvanti assassapi purato dhāvanti rathassapi purato dhāvanti
dhāvantipi ādhāvantipi usseḷhentipi apphoṭentipi nibbujjhantipi
muṭṭhīhipi yujjhanti raṅgamajjhepi saṅghāṭiṃ pattharitvā naccantiṃ evaṃ
vadenti idha bhagini naccassūti nalāṭikaṃpi denti vividhaṃpi anācāraṃ
ācaranti yepi te bhante manussā pubbe saddhā ahesuṃ pasannā
tepi etarahi assaddhā appasannā yānipi tāni saṅghassa pubbe
dānapathāni tānipi etarahi upacchinnāni riñcanti pesalā
@Footnote:* mīkārkṛ´์ khagœ vādantei peḌna vādenti
Bhikkhū nivasanti pāpabhikkhū sādhu bhante bhagavā kiṭāgiriṃ bhikkhū
pahiṇeyya yathāyaṃ kiṭāgirismiṃ āvāso saṇṭhaheyyāti.
{85.9} Evamāvusoti kho so bhikkhu tassa upāsakassa paṭissuṇitvā 1-
uṭṭhāyāsanā yena sāvatthī tena pakkāmi anupubbena yena sāvatthī [2]-
jetavanaṃ anāthapiṇḍikassa ārāmo yena bhagavā tenupasaṅkami
upasaṅkamitvā bhagavantaṃ abhivādetvā ekamantaṃ nisīdi.
[86] Āciṇṇaṃ kho panetaṃ buddhānaṃ bhagavantānaṃ āgantukehi
bhikkhūhi saddhiṃ paṭisammodituṃ . athakho bhagavā taṃ bhikkhuṃ etadavoca
kacci bhikkhu khamanīyaṃ kacci yāpanīyaṃ kacci appakilamathena addhānaṃ
āgato kuto ca tvaṃ bhikkhu āgacchasīti . khamanīyaṃ bhagavā
yāpanīyaṃ bhagavā appakilamathena cāhaṃ bhante addhānaṃ āgato
idhāhaṃ bhante kāsīsu vassaṃ vuttho sāvatthiṃ āgacchanto bhagavantaṃ
dassanāya yena kiṭāgiri tadavasariṃ athakhvāhaṃ bhante pubbaṇhasamayaṃ
nivāsetvā pattacīvaramādāya kiṭāgiriṃ piṇḍāya pāvisiṃ addasā
kho maṃ bhante aññataro upāsako kiṭāgirismiṃ piṇḍāya carantaṃ
disvāna yenāhaṃ tenupasaṅkami upasaṅkamitvā maṃ abhivādetvā
etadavoca api bhante piṇḍo labbhatīti na kho āvuso
piṇḍo labbhatīti ehi bhante gharaṃ gamissāmāti athakho bhante
so upāsako maṃ gharaṃ netvā bhojetvā etadavoca kahaṃ bhante
ayyo gamissatīti sāvatthiṃ kho ahaṃ āvuso gamissāmi bhagavantaṃ
@Footnote: 1 Yu. paṭissutvā . 2 Ma. yena.
Dassanāyāti tenahi bhante mama vacanena bhagavato pāde sirasā
vandāhi evañca vadehi duṭṭho bhante kiṭāgirismiṃ āvāso
assajipunabbasukā nāma kiṭāgirismiṃ āvāsikā alajjino pāpabhikkhū
te evarūpaṃ anācāraṃ ācaranti mālāvacchaṃ ropentipi ropāpentipi .pe.
Vividhaṃpi anācāraṃ ācaranti yepi te bhante manussā pubbe
saddhā ahesuṃ pasannā tepi etarahi assaddhā appasannā
yānipi tāni saṅghassa pubbe dānapathāni tānipi etarahi upacchinnāni
riñcanti pesalā bhikkhū nivasanti pāpabhikkhū sādhu bhante
bhagavā kiṭāgiriṃ bhikkhū pahiṇeyya yathāyaṃ kiṭāgirismiṃ āvāso
saṇṭhaheyyāti tato ahaṃ bhagavā āgacchāmīti.
[87] Athakho bhagavā etasmiṃ nidāne etasmiṃ pakaraṇe bhikkhusaṅghaṃ
sannipātāpetvā bhikkhū paṭipucchi saccaṃ kira bhikkhave assajipunabbasukā
nāma kiṭāgirismiṃ āvāsikā alajjino pāpabhikkhū te evarūpaṃ
anācāraṃ ācaranti mālāvacchaṃ ropentipi ropāpentipi .pe.
Vividhaṃpi anācāraṃ ācaranti yepi te manussā pubbe saddhā
ahesuṃ pasannā tepi etarahi assaddhā appasannā yānipi
tāni saṅghassa pubbe dānapathāni tānipi etarahi upacchinnāni
riñcanti pesalā bhikkhū nivasanti pāpabhikkhūti. Saccaṃ bhagavāti 1-.
{87.1} Vigarahi buddho bhagavā ananucchavikaṃ bhikkhave tesaṃ
moghapurisānaṃ .pe. 2- kathaṃ hi nāma te bhikkhave moghapurisā evarūpaṃ
@Footnote: 1 Yu. itisaddo na dissati . 2 Po. Yu. ananucchavikaṃ .pe. akaraṇīyanti ime
@pāṭhā natthi.
Anācāraṃ ācarissanti
{87.2} mālāvacchaṃ ropessantipi ropāpessantipi siñcissantipi
siñcāpessantipi ocinissantipi ocināpessantipi ganthissantipi
ganthāpessantipi ekatovaṇṭikamālaṃ karissantipi kārāpessantipi
ubhatovaṇṭikamālaṃ karissantipi kārāpessantipi mañjarikaṃ karissantipi
kārāpessantipi vidhutikaṃ karissantipi kārāpessantipi vaṭaṃsakaṃ karissantipi
kārāpessantipi āveḷaṃ 1- karissantipi kārāpessantipi uracchadaṃ
karissantipi kārāpessantipi te kulitthīnaṃ kuladhītānaṃ kulakumārīnaṃ
kulasuṇhānaṃ kuladāsīnaṃ ekatovaṇṭikamālaṃ harissantipi harāpessantipi
ubhatovaṇṭikamālaṃ harissantipi harāpessantipi mañjarikaṃ harissantipi
harāpessantipi vidhutikaṃ harissantipi harāpessantipi vaṭaṃsakaṃ harissantipi
harāpessantipi āveḷaṃ 1- harissantipi harāpessantipi uracchadaṃ
harissantipi harāpessantipi
{87.3} te kulitthīhi kuladhītāhi kulakumārīhi kulasuṇhāhi
kuladāsīhi saddhiṃ ekabhājanepi bhuñjissanti ekathālakepi pivissanti
ekāsanepi nisīdissanti ekamañcepi tuvaṭṭessanti ekattharaṇāpi
tuvaṭṭessanti ekapāvuraṇāpi 2- tuvaṭṭessanti ekattharaṇapāvuraṇāpi 2-
tuvaṭṭessanti
{87.4} vikālepi bhuñjissanti majjaṃpi pivissanti mālāgandhavilepanaṃpi
dhāressanti naccissantipi gāyissantipi vādessantipi lāsessantipi
naccantiyāpi naccissanti naccantiyāpi gāyissanti naccantiyāpi
vādessanti naccantiyāpi lāsessanti gāyantiyāpi
@Footnote: 1 Po. āvelikaṃ . 2 Po. ...pāpuraṇepi.
Naccissanti gāyantiyāpi gāyissanti gāyantiyāpi vādessanti gāyantiyāpi
lāsessanti vādentiyāpi naccissanti vādentiyāpi gāyissanti
vādentiyāpi vādessanti vādentiyāpi lāsessanti lāsentiyāpi
naccissanti lāsentiyāpi gāyissanti lāsentiyāpi vādessanti
lāsentiyāpi lāsessanti
{87.5} aṭṭhapadepi kīḷissanti dasapadepi kīḷissanti ākāsepi
kīḷissanti parihārapathepi kīḷissanti santikāyapi kīḷissanti khalikāyapi
kīḷissanti ghaṭikāyapi kīḷissanti salākahatthenapi kīḷissanti
akkhenapi kīḷissanti paṅkacirenapi kīḷissanti vaṅkakenapi kīḷissanti
mokkhacikāyapi kīḷissanti ciṅgulakenapi kīḷissanti pattāḷhakenapi
kīḷissanti rathakenapi kīḷissanti dhanukenapi kīḷissanti akkharikāyapi
kīḷissanti manesikāyapi kīḷissanti yathāvajjenapi kīḷissanti
{87.6} hatthismimpi sikkhissanti assasmimpi sikkhissanti
rathasmimpi sikkhissanti dhanusmimpi sikkhissanti tharusmimpi sikkhissanti
hatthissapi purato dhāvissanti assassapi purato dhāvissanti rathassapi
purato dhāvissanti dhāvissantipi ādhāvissantipi 1- usseḷhessantipi 2-
apphoṭessantipi 3- nibbujjhissantipi muṭṭhīhipi yujjhissanti
{87.7} raṅgamajjhepi saṅghāṭiṃ pattharitvā naccantiṃ evaṃ
vakkhanti 4- idha bhagini naccassūti nalāṭikaṃpi dassanti 5-
vividhaṃpi anācāraṃ ācarissanti yepi 6- te manussā pubbe
saddhā ahesuṃ pasannā tepi etarahi assaddhā appasannā
@Footnote: 1 Po. dhāvissanti ādhāvissantipi vidhāvissantipi. Ma. dhāvissantipi
@ādhāvissantipi. 2 Po. Ma. usselessantipi . 3 Yu. usseḷhissantipi
@appoṭhissantipi. 4 Po. naccissanti evaṃ vadessanti. 5 Po. dassissanti.
@6 Ma. Yu. yepi te ... pāpabhikkhūti ime pāṭhā natthi.
Yānipi tāni saṅghassa pubbe dānapathāni tānipi etarahi
upacchinnāni riñcanti pesalā bhikkhū nivasanti pāpabhikkhū
{87.8} netaṃ bhikkhave appasannānaṃ vā pasādāya .pe. Vigarahitvā
dhammiṃ kathaṃ katvā sārīputtamoggallāne āmantesi gacchatha tumhe
sārīputtā kiṭāgiriṃ gantvā assajipunabbasukānaṃ bhikkhūnaṃ kiṭāgirismā
pabbājanīyakammaṃ karotha tumhākaṃ ete saddhivihārinoti.
{87.9} Kathaṃ mayaṃ bhante assajipunabbasukānaṃ bhikkhūnaṃ kiṭāgirismā
pabbājanīyakammaṃ karoma caṇḍā ca 1- te bhikkhū pharusāti . tenahi
tumhe sārīputtā bahukehi bhikkhūhi saddhiṃ gacchathāti . evaṃ bhanteti
kho sārīputtamoggallānā bhagavato paccassosuṃ.
[88] Evañca pana bhikkhave kātabbaṃ . paṭhamaṃ assajipunabbasukā
bhikkhū codetabbā codetvā sāretabbā sāretvā āpatti
āropetabbā āpattiṃ āropetvā byattena bhikkhunā paṭibalena
saṅgho ñāpetabbo
{88.1} suṇātu me bhante saṅgho ime assajipunabbasukā
bhikkhū kuladūsakā pāpasamācārā imesaṃ pāpakā samācārā
dissanti ceva suyyanti ca kulāni ca imehi duṭṭhāni dissanti ceva
suyyanti ca . yadi saṅghassa pattakallaṃ saṅgho assajipunabbasukānaṃ
bhikkhūnaṃ kiṭāgirismā pabbājanīyakammaṃ kareyya nāssajipunabbasukehi
bhikkhūhi kiṭāgirismiṃ vatthabbanti. Esā ñatti.
@Footnote: 1 Ma. Yu. casaddo na vijjati.
{88.2} Suṇātu me bhante saṅgho ime assajipunabbasukā bhikkhū
kuladūsakā pāpasamācārā imesaṃ pāpakā samācārā dissanti ceva
suyyanti ca kulāni ca imehi duṭṭhāni dissanti ceva suyyanti ca. Saṅgho
assajipunabbasukānaṃ bhikkhūnaṃ kiṭāgirismā pabbājanīyakammaṃ karoti
nāssajipunabbasukehi bhikkhūhi kiṭāgirismiṃ vatthabbanti . yassāyasmato
khamati assajipunabbasukānaṃ bhikkhūnaṃ kiṭāgirismā pabbājanīyakammassa
karaṇaṃ nāssajipunabbasukehi bhikkhūhi kiṭāgirismiṃ vatthabbanti so
tuṇhassa yassa nakkhamati so bhāseyya.
{88.3} Dutiyampi etamatthaṃ vadāmi . suṇātu me bhante saṅgho
ime assajipunabbasukā bhikkhū kuladūsakā pāpasamācārā imesaṃ
pāpakā samācārā dissanti ceva suyyanti ca kulāni ca imehi
duṭṭhāni dissanti ceva suyyanti ca . saṅgho assajipunabbasukānaṃ
bhikkhūnaṃ kiṭāgirismā pabbājanīyakammaṃ karoti nāssajipunabbasukehi
bhikkhūhi kiṭāgirismiṃ vatthabbanti . yassāyasmato khamati
assajipunabbasukānaṃ bhikkhūnaṃ kiṭāgirismā pabbājanīyakammassa
karaṇaṃ nāssajipunabbasukehi bhikkhūhi kiṭāgirismiṃ vatthabbanti
so tuṇhassa yassa nakkhamati so bhāseyya.
{88.4} Tatiyampi etamatthaṃ vadāmi . suṇātu me bhante
saṅgho ime assajipunabbasukā bhikkhū kuladūsakā pāpasamācārā
imesaṃ pāpakā samācārā dissanti ceva suyyanti ca kulāni ca
imehi duṭṭhāni dissanti ceva suyyanti ca . saṅgho
Assajipunabbasukānaṃ bhikkhūnaṃ kiṭāgirismā pabbājanīyakammaṃ karoti
nāssajipunabbasukehi bhikkhūhi kiṭāgirismiṃ vatthabbanti . yassāyasmato
khamati assajipunabbasukānaṃ bhikkhūnaṃ kiṭāgirismā pabbājanīyakammassa
karaṇaṃ nāssajipunabbasukehi bhikkhūhi kiṭāgirismiṃ vatthabbanti so
tuṇhassa yassa nakkhamati so bhāseyya.
{88.5} Kataṃ saṅghena assajipunabbasukānaṃ bhikkhūnaṃ kiṭāgirismā
pabbājanīyakammaṃ nāssajipunabbasukehi bhikkhūhi kiṭāgirismiṃ vatthabbanti
khamati saṅghassa tasmā tuṇhī. Evametaṃ dhārayāmīti.
[89] Tīhi bhikkhave aṅgehi samannāgataṃ pabbājanīyakammaṃ
adhammakammañceva hoti avinayakammañca duvūpasantañca asammukhā
kataṃ hoti appaṭipucchā kataṃ hoti appaṭiññāya kataṃ hoti
imehi kho bhikkhave tīhaṅgehi samannāgataṃ pabbājanīyakammaṃ
adhammakammañceva hoti avinayakammañca duvūpasantañca.
[90] Aparehipi bhikkhave tīhaṅgehi samannāgataṃ pabbājanīyakammaṃ
adhammakammañceva hoti avinayakammañca duvūpasantañca anāpattiyā
kataṃ hoti adesanāgāminiyā āpattiyā kataṃ hoti desitāya
āpattiyā kataṃ hoti imehi kho bhikkhave tīhaṅgehi samannāgataṃ
pabbājanīyakammaṃ adhammakammañceva hoti avinayakammañca duvūpasantañca.
[91] Aparehipi bhikkhave tīhaṅgehi samannāgataṃ pabbājanīyakammaṃ
adhammakammañceva hoti avinayakammañca duvūpasantañca acodetvā
Kataṃ hoti asāretvā kataṃ hoti āpattiṃ anāropetvā kataṃ
hoti imehi kho bhikkhave .pe.
[92] Aparehipi bhikkhave tīhaṅgehi samannāgataṃ pabbājanīyakammaṃ .pe.
Asammukhā kataṃ hoti adhammena kataṃ hoti vaggena kataṃ hoti
imehi kho bhikkhave tīhaṅgehi samannāgataṃ pabbājanīyakammaṃ .pe.
Appaṭipucchā kataṃ hoti adhammena kataṃ hoti vaggena kataṃ
hoti .pe. appaṭiññāya kataṃ hoti adhammena kataṃ hoti
vaggena kataṃ hoti .pe. anāpattiyā kataṃ hoti adhammena kataṃ
hoti vaggena kataṃ hoti .pe. adesanāgāminiyā āpattiyā
kataṃ hoti adhammena kataṃ hoti vaggena kataṃ hoti .pe.
Desitāya āpattiyā kataṃ hoti adhammena kataṃ hoti vaggena
kataṃ hoti .pe. acodetvā kataṃ hoti adhammena kataṃ hoti
vaggena kataṃ hoti .pe. asāretvā kataṃ hoti adhammena kataṃ
hoti vaggena kataṃ hoti .pe. āpattiṃ anāropetvā kataṃ
hoti adhammena kataṃ hoti vaggena kataṃ hoti imehi kho
bhikkhave tīhaṅgehi samannāgataṃ pabbājanīyakammaṃ adhammakammañceva
hoti avinayakammañca duvūpasantañca.
Adhammakamme dvādasakaṃ niṭṭhitaṃ.
[93] Tīhi bhikkhave aṅgehi samannāgataṃ pabbājanīyakammaṃ
dhammakammañceva hoti vinayakammañca suvūpasantañca sammukhā kataṃ hoti
Paṭipucchā kataṃ hoti paṭiññāya kataṃ hoti .pe.
[94] Aparehipi bhikkhave tīhaṅgehi samannāgataṃ pabbājanīyakammaṃ
dhammakammañceva hoti vinayakammañca suvūpasantañca āpattiyā kataṃ
hoti desanāgāminiyā āpattiyā kataṃ hoti adesitāya āpattiyā
kataṃ hoti imehi kho bhikkhave tīhaṅgehi samannāgataṃ pabbājanīyakammaṃ
dhammakammañceva hoti vinayakammañca suvūpasantañca.
[95] Aparehipi .pe. codetvā kataṃ hoti sāretvā kataṃ
hoti āpattiṃ āropetvā kataṃ hoti imehi kho bhikkhave
tīhaṅgehi samannāgataṃ pabbājanīyakammaṃ .pe.
[96] Aparehipi bhikkhave tīhaṅgehi samannāgataṃ pabbājanīyakammaṃ
dhammakammañceva hoti vinayakammañca suvūpasantañca sammukhā kataṃ
hoti dhammena kataṃ hoti samaggena kataṃ hoti imehi kho
bhikkhave tīhaṅgehi samannāgataṃ pabbājanīyakammaṃ dhammakammañceva .pe.
[97] Aparehipi bhikkhave tīhaṅgehi samannāgataṃ pabbājanīyakammaṃ
.pe. paṭipucchā kataṃ hoti dhammena kataṃ hoti samaggena kataṃ hoti imehi
kho bhikkhave tīhaṅgehi samannāgataṃ pabbājanīyakammaṃ .pe.
[98] Aparehipi .pe. paṭiññāya kataṃ hoti dhammena kataṃ
hoti samaggena kataṃ hoti imehi kho bhikkhave tīhaṅgehi samannāgataṃ
pabbājanīyakammaṃ dhammakammañceva .pe.
[99] Aparehipi bhikkhave tīhaṅgehi samannāgataṃ pabbājanīyakammaṃ
.pe. āpattiyā kataṃ hoti dhammena kataṃ hoti samaggena kataṃ hoti
imehi kho bhikkhave tīhaṅgehi samannāgataṃ pabbājanīyakammaṃ .pe.
[100] Aparehipi bhikkhave tīhaṅgehi samannāgataṃ pabbājanīyakammaṃ
.pe. desanāgāminiyā āpattiyā kataṃ hoti dhammena kataṃ hoti
samaggena kataṃ hoti imehi kho bhikkhave tīhaṅgehi samannāgataṃ
pabbājanīyakammaṃ .pe.
[101] Aparehipi bhikkhave tīhaṅgehi samannāgataṃ pabbājanīyakammaṃ
.pe. adesitāya āpattiyā kataṃ hoti dhammena kataṃ hoti samaggena
kataṃ hoti imehi kho bhikkhave tīhaṅgehi samannāgataṃ pabbājanīyakammaṃ .pe.
[102] Aparehipi bhikkhave tīhaṅgehi samannāgataṃ pabbājanīyakammaṃ
.pe. codetvā kataṃ hoti dhammena kataṃ hoti samaggena kataṃ hoti
imehi kho bhikkhave tīhaṅgehi samannāgataṃ pabbājanīyakammaṃ .pe.
[103] Aparehipi bhikkhave tīhaṅgehi samannāgataṃ pabbājanīyakammaṃ
.pe. sāretvā kataṃ hoti dhammena kataṃ hoti samaggena kataṃ hoti
imehi kho bhikkhave tīhaṅgehi samannāgataṃ pabbājanīyakammaṃ .pe.
[104] Aparehipi .pe. āpattiṃ āropetvā kataṃ hoti dhammena
kataṃ hoti samaggena kataṃ hoti imehi kho bhikkhave tīhaṅgehi samannāgataṃ
pabbājanīyakammaṃ dhammakammañceva hoti vinayakammañca suvūpasantañca.
Dhammakamme dvādasakaṃ niṭṭhitaṃ.
[105] Tīhi bhikkhave aṅgehi samannāgatassa bhikkhuno ākaṅkhamāno
saṅgho pabbājanīyakammaṃ kareyya bhaṇḍanakārako hoti kalahakārako
vivādakārako bhassakārako saṅghe adhikaraṇakārako bālo hoti abyatto
āpattibahulo anapadāno gihisaṃsaṭṭho viharati ananulomikehi
gihisaṃsaggehi imehi kho bhikkhave tīhaṅgehi samannāgatassa bhikkhuno
ākaṅkhamāno saṅgho pabbājanīyakammaṃ kareyya.
[106] Aparehipi bhikkhave tīhaṅgehi samannāgatassa bhikkhuno
ākaṅkhamāno saṅgho pabbājanīyakammaṃ kareyya adhisīle sīlavipanno
hoti ajjhācāre ācāravipanno hoti atidiṭṭhiyā diṭṭhivipanno
hoti imehi kho bhikkhave tīhaṅgehi samannāgatassa bhikkhuno
ākaṅkhamāno saṅgho pabbājanīyakammaṃ kareyya.
[107] Aparehipi bhikkhave tīhaṅgehi samannāgatassa bhikkhuno
ākaṅkhamāno saṅgho pabbājanīyakammaṃ kareyya buddhassa avaṇṇaṃ
bhāsati dhammassa avaṇṇaṃ bhāsati saṅghassa avaṇṇaṃ bhāsati imehi
kho bhikkhave tīhaṅgehi samannāgatassa bhikkhuno ākaṅkhamāno saṅgho
pabbājanīyakammaṃ kareyya.
[108] Aparehipi bhikkhave tīhaṅgehi samannāgatassa bhikkhuno
ākaṅkhamāno saṅgho pabbājanīyakammaṃ kareyya kāyikena davena
samannāgato hoti vācasikena davena samannāgato hoti kāyikavācasikena
davena samannāgato hoti imehi kho bhikkhave tīhaṅgehi
samannāgatassa bhikkhuno ākaṅkhamāno saṅgho pabbājanīyakammaṃ kareyya.
[109] Aparehipi bhikkhave tīhaṅgehi samannāgatassa bhikkhuno
ākaṅkhamāno saṅgho pabbājanīyakammaṃ kareyya kāyikena anācārena
samannāgato hoti vācasikena anācārena samannāgato hoti
kāyikavācasikena anācārena samannāgato hoti imehi kho bhikkhave
tīhaṅgehi samannāgatassa bhikkhuno ākaṅkhamāno saṅgho pabbājanīyakammaṃ
kareyya.
[110] Aparehipi bhikkhave tīhaṅgehi samannāgatassa bhikkhuno
ākaṅkhamāno saṅgho pabbājanīyakammaṃ kareyya kāyikena upaghātikena
samannāgato hoti vācasikena upaghātikena samannāgato hoti
kāyikavācasikena upaghātikena samannāgato hoti imehi kho bhikkhave
tīhaṅgehi samannāgatassa bhikkhuno ākaṅkhamāno saṅgho pabbājanīyakammaṃ
kareyya.
[111] Aparehipi bhikkhave tīhaṅgehi samannāgatassa bhikkhuno
ākaṅkhamāno saṅgho pabbājanīyakammaṃ kareyya kāyikena micchājīvena
samannāgato hoti vācasikena micchājīvena samannāgato hoti
Kāyikavācasikena micchājīvena samannāgato hoti imehi kho bhikkhave
tīhaṅgehi samannāgatassa bhikkhuno ākaṅkhamāno saṅgho pabbājanīyakammaṃ
kareyya.
[112] Tiṇṇaṃ bhikkhave bhikkhūnaṃ ākaṅkhamāno saṅgho pabbājanīyakammaṃ
kareyya eko bhaṇḍanakārako hoti kalahakārako vivādakārako
bhassakārako saṅghe adhikaraṇakārako eko bālo hoti abyatto
āpattibahulo anapadāno eko gihisaṃsaṭṭho viharati ananulomikehi
gihisaṃsaggehi imesaṃ kho bhikkhave tiṇṇaṃ bhikkhūnaṃ ākaṅkhamāno
saṅgho pabbājanīyakammaṃ kareyya.
[113] Aparesampi bhikkhave tiṇṇaṃ bhikkhūnaṃ ākaṅkhamāno saṅgho
pabbājanīyakammaṃ kareyya eko adhisīle sīlavipanno hoti eko
ajjhācāre ācāravipanno hoti eko atidiṭṭhiyā diṭṭhivipanno
hoti imesaṃ kho bhikkhave tiṇṇaṃ bhikkhūnaṃ ākaṅkhamāno saṅgho
pabbājanīyakammaṃ kareyya.
[114] Aparesampi bhikkhave tiṇṇaṃ bhikkhūnaṃ ākaṅkhamāno saṅgho
pabbājanīyakammaṃ kareyya eko buddhassa avaṇṇaṃ bhāsati eko
dhammassa avaṇṇaṃ bhāsati eko saṅghassa avaṇṇaṃ bhāsati imesaṃ
kho bhikkhave tiṇṇaṃ bhikkhūnaṃ ākaṅkhamāno saṅgho pabbājanīyakammaṃ
kareyya.
[115] Aparesampi bhikkhave tiṇṇaṃ bhikkhūnaṃ ākaṅkhamāno saṅgho
Pabbājanīyakammaṃ kareyya eko kāyikena davena samannāgato
hoti eko vācasikena davena samannāgato hoti eko
kāyikavācasikena davena samannāgato hoti imesaṃ kho bhikkhave
tiṇṇaṃ bhikkhūnaṃ ākaṅkhamāno saṅgho pabbājanīyakammaṃ kareyya.
[116] Aparesampi bhikkhave tiṇṇaṃ bhikkhūnaṃ ākaṅkhamāno saṅgho
pabbājanīyakammaṃ kareyya eko kāyikena anācārena samannāgato
hoti eko vācasikena anācārena samannāgato hoti eko
kāyikavācasikena anācārena samannāgato hoti imesaṃ kho bhikkhave
tiṇṇaṃ bhikkhūnaṃ ākaṅkhamāno saṅgho pabbājanīyakammaṃ kareyya.
[117] Aparesampi bhikkhave tiṇṇaṃ bhikkhūnaṃ ākaṅkhamāno saṅgho
pabbājanīyakammaṃ kareyya eko kāyikena upaghātikena samannāgato
hoti eko vācasikena upaghātikena samannāgato hoti eko
kāyikavācasikena upaghātikena samannāgato hoti imesaṃ kho bhikkhave
tiṇṇaṃ bhikkhūnaṃ ākaṅkhamāno saṅgho pabbājanīyakammaṃ kareyya.
[118] Aparesampi bhikkhave tiṇṇaṃ bhikkhūnaṃ ākaṅkhamāno saṅgho
pabbājanīyakammaṃ kareyya eko kāyikena micchājīvena samannāgato
hoti eko vācasikena micchājīvena samannāgato hoti eko
kāyikavācasikena micchājīvena samannāgato hoti imesaṃ kho bhikkhave
tiṇṇaṃ bhikkhūnaṃ ākaṅkhamāno saṅgho pabbājanīyakammaṃ kareyya.
Ākaṅkhamānacuddasakaṃ niṭṭhitaṃ.
[119] Pabbājanīyakammakatena bhikkhave bhikkhunā sammā vattitabbaṃ.
Tatrāyaṃ sammāvattanā na upasampādetabbaṃ na nissayo dātabbo
na sāmaṇero upaṭṭhāpetabbo na bhikkhunovādakasammati sāditabbā
sammatenapi bhikkhuniyo na ovaditabbā yāya āpattiyā saṅghena
pabbājanīyakammaṃ kataṃ hoti sā āpatti na āpajjitabbā aññā
vā tādisikā tato vā pāpiṭṭhatarā kammaṃ na garahitabbaṃ kammikā
na garahitabbā na pakatattassa bhikkhuno uposatho ṭhapetabbo
na pavāraṇā ṭhapetabbā na savacanīyaṃ kātabbaṃ na anuvādo
paṭṭhapetabbo na okāso kāretabbo na codetabbo na
sāretabbo na bhikkhū bhikkhūhi sampayojetabbanti.
Pabbājanīyakamme aṭṭhārasavattaṃ niṭṭhitaṃ.
[120] Athakho sārīputtamoggallānappamukho bhikkhusaṅgho kiṭāgiriṃ
gantvā assajipunabbasukānaṃ bhikkhūnaṃ kiṭāgirismā pabbājanīyakammaṃ
akāsi nāssajipunabbasukehi bhikkhūhi kiṭāgirismiṃ vatthabbanti .
Te saṅghena pabbājanīyakammakatā na sammā vattanti na lomaṃ pātenti
na netthāraṃ vattanti bhikkhū na khamāpenti akkosanti paribhāsanti
chandagāmitā dosagāmitā mohagāmitā bhayagāmitā pāpenti
pakkamantipi vibbhamantipi ye te bhikkhū appicchā .pe. te ujjhāyanti
khīyanti vipācenti kathaṃ hi nāma assajipunabbasukā bhikkhū saṅghena
pabbājanīyakammakatā na sammā vattissanti na lomaṃ pātessanti
Na netthāraṃ vattissanti bhikkhū na khamāpessanti akkosissanti
paribhāsissanti chandagāmitā dosagāmitā mohagāmitā bhayagāmitā
pāpessanti pakkamissantipi vibbhamissantipīti . athakho te bhikkhū
bhagavato etamatthaṃ ārocesuṃ.
[121] Athakho bhagavā etasmiṃ nidāne etasmiṃ pakaraṇe bhikkhusaṅghaṃ
sannipātāpetvā bhikkhū paṭipucchi saccaṃ kira bhikkhave assajipunabbasukā
bhikkhū saṅghena pabbājanīyakammakatā na sammā vattanti na lomaṃ
pātenti na netthāraṃ vattanti bhikkhū na khamāpenti akkosanti
paribhāsanti chandagāmitā dosagāmitā mohagāmitā bhayagāmitā pāpenti
pakkamantipi vibbhamantipīti . saccaṃ bhagavāti . vigarahi buddho bhagavā
ananucchavikaṃ bhikkhave tesaṃ moghapurisānaṃ .pe. kathaṃ hi nāma te
bhikkhave moghapurisā saṅghena pabbājanīyakammakatā na sammā vattissanti
na lomaṃ pātessanti na netthāraṃ vattissanti bhikkhū na khamāpessanti
akkosissanti paribhāsissanti chandagāmitā dosagāmitā mohagāmitā
bhayagāmitā pāpessanti pakkamissantipi vibbhamissantipi netaṃ
bhikkhave appasannānaṃ vā pasādāya .pe. vigarahitvā dhammiṃ kathaṃ
katvā bhikkhū āmantesi tenahi bhikkhave saṅgho pabbājanīyakammaṃ
[1]- Paṭippassambhetu 2-.
[122] Pañcahi bhikkhave aṅgehi samannāgatassa bhikkhuno
pabbājanīyakammaṃ na paṭippassambhetabbaṃ upasampādeti nissayaṃ deti
@Footnote: 1 nakāro naṭṭho bhaveyya . 2 po ... saṅghena pabbājanīyakammaṃ (na)
@paṭippassambhetabbaṃ.
Sāmaṇeraṃ upaṭṭhāpeti bhikkhunovādakasammatiṃ sādiyati sammatopi
bhikkhuniyo ovadati imehi kho bhikkhave pañcahaṅgehi samannāgatassa
bhikkhuno pabbājanīyakammaṃ na paṭippassambhetabbaṃ.
[123] Aparehipi bhikkhave pañcahaṅgehi samannāgatassa bhikkhuno
pabbājanīyakammaṃ na paṭippassambhetabbaṃ yāya āpattiyā saṅghena
pabbājanīyakammaṃ kataṃ hoti taṃ āpattiṃ āpajjati aññaṃ vā
tādisikaṃ tato vā pāpiṭṭhataraṃ kammaṃ garahati kammike
garahati imehi kho bhikkhave pañcahaṅgehi samannāgatassa bhikkhuno
pabbājanīyakammaṃ na paṭippassambhetabbaṃ.
[124] Aṭṭhahi bhikkhave aṅgehi samannāgatassa bhikkhuno pabbājanīyakammaṃ
na paṭippassambhetabbaṃ pakatattassa bhikkhuno uposathaṃ
ṭhapeti pavāraṇaṃ ṭhapeti savacanīyaṃ karoti anuvādaṃ paṭṭhapeti
okāsaṃ kāreti codeti sāreti bhikkhū bhikkhūhi sampayojeti
imehi kho bhikkhave aṭṭhahaṅgehi samannāgatassa bhikkhuno
pabbājanīyakammaṃ na paṭippassambhetabbaṃ.
Pabbājanīyakamme napaṭippassambhetabbaaṭṭhārasakaṃ niṭṭhitaṃ.
[125] Pañcahi bhikkhave aṅgehi samannāgatassa bhikkhuno
pabbājanīyakammaṃ paṭippassambhetabbaṃ na upasampādeti na nissayaṃ
deti na sāmaṇeraṃ upaṭṭhāpeti na bhikkhunovādakasammatiṃ sādiyati
sammatopi bhikkhuniyo na ovadati imehi kho bhikkhave pañcahaṅgehi
Samannāgatassa bhikkhuno pabbājanīyakammaṃ paṭippassambhetabbaṃ.
[126] Aparehipi bhikkhave pañcahaṅgehi samannāgatassa bhikkhuno
pabbājanīyakammaṃ paṭippassambhetabbaṃ yāya āpattiyā saṅghena
pabbājanīyakammaṃ kataṃ hoti taṃ āpattiṃ nāpajjati aññaṃ vā
tādisikaṃ tato vā pāpiṭṭhataraṃ kammaṃ na garahati kammike na
garahati imehi kho bhikkhave pañcahaṅgehi samannāgatassa bhikkhuno
pabbājanīyakammaṃ paṭippassambhetabbaṃ.
[127] Aṭṭhahi bhikkhave aṅgehi samannāgatassa bhikkhuno
pabbājanīyakammaṃ paṭippassambhetabbaṃ na pakatattassa bhikkhuno uposathaṃ
ṭhapeti na pavāraṇaṃ ṭhapeti na savacanīyaṃ karoti na anuvādaṃ paṭṭhapeti
na okāsaṃ kāreti na codeti na sāreti na bhikkhū bhikkhūhi sampayojeti
imehi kho bhikkhave aṭṭhahaṅgehi samannāgatassa bhikkhuno
pabbājanīyakammaṃ paṭippassambhetabbaṃ.
Pabbājanīyakamme paṭippassambhetabbaaṭṭhārasakaṃ niṭṭhitaṃ.
[128] Evañca pana bhikkhave paṭippassambhetabbaṃ . tena
bhikkhave pabbājanīyakammakatena bhikkhunā saṅghaṃ upasaṅkamitvā ekaṃsaṃ
uttarāsaṅgaṃ karitvā vuḍḍhānaṃ bhikkhūnaṃ pāde vanditvā ukkuṭikaṃ
nisīditvā añjaliṃ paggahetvā evamassa vacanīyo ahaṃ bhante
saṅghena pabbājanīyakammakato sammā vattāmi lomaṃ pātemi
netthāraṃ vattāmi pabbājanīyakammassa paṭippassaddhiṃ yācāmīti .
Dutiyampi yācitabbā . tatiyampi yācitabbā . byattena bhikkhunā
paṭibalena saṅgho ñāpetabbo
{128.1} suṇātu me bhante saṅgho ayaṃ itthannāmo bhikkhu
saṅghena pabbājanīyakammakato sammā vattati lomaṃ pāteti
netthāraṃ vattati pabbājanīyakammassa paṭippassaddhiṃ yācati .
Yadi saṅghassa pattakallaṃ saṅgho itthannāmassa bhikkhuno
pabbājanīyakammaṃ paṭippassambheyya. Esā ñatti.
{128.2} Suṇātu me bhante saṅgho ayaṃ itthannāmo bhikkhu
saṅghena pabbājanīyakammakato sammā vattati lomaṃ pāteti netthāraṃ
vattati pabbājanīyakammassa paṭippassaddhiṃ yācati . saṅgho
itthannāmassa bhikkhuno pabbājanīyakammaṃ paṭippassambheti .
Yassāyasmato khamati itthannāmassa bhikkhuno pabbājanīyakammassa
paṭippassaddhi so tuṇhassa yassa nakkhamati so bhāseyya.
{128.3} Dutiyampi etamatthaṃ vadāmi .pe. tatiyampi
etamatthaṃ vadāmi . suṇātu me bhante saṅgho ayaṃ itthannāmo
bhikkhu saṅghena pabbājanīyakammakato sammā vattati lomaṃ pāteti
netthāraṃ vattati pabbājanīyakammassa paṭippassaddhiṃ yācati .
Saṅgho itthannāmassa bhikkhuno pabbājanīyakammaṃ paṭippassambheti .
Yassāyasmato khamati itthannāmassa bhikkhuno pabbājanīyakammassa
paṭippassaddhi so tuṇhassa yassa nakkhamati so bhāseyya.
{128.4} Paṭippassaddhaṃ 1- saṅghena itthannāmassa bhikkhuno
pabbājanīyakammaṃ khamati saṅghassa tasmā tuṇhī. Evametaṃ dhārayāmīti.
@Footnote: 1 Po. paṭippassambhitaṃ.
Pabbājanīyakammaṃ tatiyaṃ niṭṭhitaṃ.
The Pali Tipitaka in Roman Character Volume 6 page 33-57.
http://84000.org/tipitaka/pali/roman_item_s.php?book=6&item=84&items=45
Classified by [Item Number] :-
http://84000.org/tipitaka/pali/roman_item_s.php?book=6&item=84&items=45&mode=bracket
Compare with The Pali Tipitaka in Thai Character :-
http://84000.org/tipitaka/read/pali_item_s.php?book=6&item=84&items=45
Compare with The Royal Version of Thai Tipitaka :-
http://84000.org/tipitaka/read/byitem_s.php?book=6&item=84&items=45
Study Atthakatha :-
http://84000.org/tipitaka/attha/attha.php?b=6&i=84
The Pali Atthakatha in Thai :-
http://84000.org/tipitaka/atthapali/read_th.php?B=3&A=5712
The Pali Atthakatha in Roman :-
http://84000.org/tipitaka/atthapali/read_rm.php?B=3&A=5712
Contents of The Tipitaka Volume 6
http://84000.org/tipitaka/read/?index_6
บันทึก ๑๔ พฤศจิกายน พ.ศ. ๒๕๖๐.
การแสดงผลนี้อ้างอิงข้อมูลจากพระไตรปิฎกฉบับภาษาบาลี อักษรโรมัน.
หากพบข้อผิดพลาด กรุณาแจ้งได้ที่ [email protected]
