บาลีอรรถกถาเล่มที่ ๕๕

หน้าที่ ๑๓๖.

[๗-๑๐] อิทานิ ตสฺเสว ปฏิญฺญาย ^๑- ธมฺเมน สเมน อตฺตโน วาเท ชยํ ทสฺเสตุํ อนุโลมนเย ปุจฺฉา สกวาทิสฺส, อตฺตโน ลทฺธึ นิสฺสาย ปฏิญฺญา ปรวาทิสฺส. ลทฺธิยา โอกาสํ อทตฺวา ปรมตฺถวเสน ปุน อนุโยโค สกวาทิสฺส, ปรมตฺถวเสน ปุคฺคลสฺส อภาวโต ปฏิกฺเขโป ปรวาทิสฺส. ตโต ปรํ ธมฺเมน สเมน อตฺตโน ชยทสฺสนตฺถํ อาชานาหิ ปฏิกมฺมนฺติอาทิ สพฺพํ สกวาทีวจนเมว โหติ. ตตฺถ สพฺเพสํ ปฏิกมฺมนิคฺคโหปนยนนิคฺคมจตุกฺกานํ เหฏฺฐา วุตฺตนเยเนว อตฺโถ เวทิตพฺโพ. เอวมิทํ ปุคฺคโล นุปลพฺภตีติอาทิกสฺส ปจฺจนีกปญฺจกสฺส อุปลพฺภตีติ- อาทีนํ ปฏิกมฺมนิคฺคโหปนยนนิคฺคมจตุกฺกานญฺจ วเสน ปจฺจนีกานุโลมปญฺจกํ นาม นิทฺทิฏฺฐํ โหติ. เอวเมตานิ ปฐมสจฺฉิกฏฺเฐ เทฺว ปญฺจกานิ นิทฺทิฏฺฐานิ. ตตฺถ ปุริมปญฺจเก ปรวาทิสฺส สกวาทินา กโต นิคฺคโห สุนิคฺคโห, สกวาทิสฺส ปน ปรวาทินา ฉลวาทํ นิสฺสาย ปฏิกมฺมํ กตฺวา อตฺตนา สาธิโต ชโย ทุชฺชโย. ทุติยปญฺจเก สกวาทิสฺส ปรวาทินา กโต นิคฺคโห ทุนฺนิคฺคโห, ปรวาทิสฺส ปน สกวาทินา ธมฺมวาทํ นิสฺสาย ปฏิกมฺมํ ตตฺเถตํ วุจฺจติ:- "นิคฺคโห ปรวาทิสฺส สุทฺโธ ปฐมปญฺจเก อสุทฺโธ ปน ตสฺเสว ปฏิกมฺมชโย ตหึ. นิคฺคโห สกวาทิสฺส อสุทฺโธ ทุติยปญฺจเก วิสุทฺโธ ปน ตสฺเสว ปฏิกมฺมชโย ตหึ. ตสฺมา ทฺวีสุปิ ฐาเนสุ ชโยว สกวาทิโน ธมฺเมน หิ ชโย นาม อธมฺเมน กุโต ชโย. สจฺฉิกฏฺเฐ ยถา เจตฺถ ปญฺจกทฺวยมณฺฑิเต ธมฺมาธมฺมวเสเนว วุตฺโต ชยปราชโย. อิโต ปเรสุ สพฺเพสุ สจฺฉิกฏฺเฐสุ ปณฺฑิโต เอวเมว วิภาเวยฺย อุโภ ชยปราชเย"ติ. @เชิงอรรถ: ^๑ ฉ.ม. "ตสฺเสว ปฏิญฺญายา"ติ ปาโฐ น ทิสฺสติ

อรรถกถาภาษาบาลีอักษรไทย เล่มที่ ๕๕ หน้า ๑๓๖. http://84000.org/tipitaka/pitaka_item/read_th.php?B=55&A=3033&modeTY=2&pagebreak=1 The Pali Atthakatha in Roman :- http://84000.org/tipitaka/atthapali/read_rm.php?B=55&A=3033&modeTY=2&pagebreak=1 อ่านอรรถกถาแปลไทย :- http://84000.org/tipitaka/attha/attha.php?b=37&i=6 เนื้อความพระไตรปิฎกฉบับหลวง :- http://84000.org/tipitaka/read/r.php?B=37&A=99 พระไตรปิฎกฉบับบาลีอักษรไทย :- http://84000.org/tipitaka/read/pali_read.php?B=37&A=87 The Pali Tipitaka in Roman Character :- http://84000.org/tipitaka/read/roman_read.php?B=37&A=87 สารบัญพระไตรปิฎกเล่มที่ ๓๖ http://84000.org/tipitaka/read/?index_37