บาลีพระไตรปิฎกเล่มที่ ๓๗ - พระอภิธรรมปิฎกเล่มที่ ๔

                                       มนุสฺสโลกกถา
     [๑๗๓๓]   น  วตฺตพฺพํ  พุทฺโธ  ภควา  มนุสฺสโลเก  อฏฺฐาสีติ  ฯ
อามนฺตา   ฯ   นนุ   อตฺถิ   พุทฺธวุตฺถานิ   เจติยานิ   อาราม  วิหาร
คามนิคมนครานิ   รฏฺฐานิ   ชนปทานีติ   ฯ   อามนฺตา  ฯ  หญฺจิ  อตฺถิ
พุทฺธวุตฺถานิ      เจติยานิ     อารามวิหารคามนิคมนครานิ     รฏฺฐานิ
ชนปทานิ เตน วต เร วตฺตพฺเพ พุทฺโธ ภควา มนุสฺสโลเก อฏฺฐาสีติ ฯ
     [๑๗๓๔]   น  วตฺตพฺพํ  พุทฺโธ  ภควา  มนุสฺสโลเก  อฏฺฐาสีติ  ฯ
อามนฺตา  ฯ  นนุ  ภควา  ลุมฺพินิยา  ชาโต  โพธิยา  มูเล  อภิสมฺพุทฺโธ
พาราณสิยํ  ภควตา  ธมฺมจกฺกํ  ปวตฺติตํ  ปาวาเล  เจติเย  อายุสงฺขาโร
โอสฺสฏฺโฐ    กุสินารายํ    ภควา    ปรินิพฺพุโตติ   ฯ   อามนฺตา   ฯ
หญฺจิ   ภควา   ลุมฺพินิยา  ชาโต  ฯเปฯ  กุสินารายํ  ภควา  ปรินิพฺพุโต
เตน วต เร วตฺตพฺเพ พุทฺโธ ภควา มนุสฺสโลเก อฏฺฐาสีติ ฯ
     [๑๗๓๕]   น  วตฺตพฺพํ  พุทฺโธ  ภควา  มนุสฺสโลเก  อฏฺฐาสีติ  ฯ
อามนฺตา  ฯ  นนุ  วุตฺตํ  ภควตา  เอกมิทาหํ  ภิกฺขเว  สมยํ  อุกฺกฏฺฐายํ
วิหรามิ    สุภควเน    สาลราชมูเลติ    เอกมิทาหํ    ภิกฺขเว   สมยํ
อุรุเวลายํ    วิหรามิ   อชปาลนิโคฺรเธ   ปฐมาภิสมฺพุทฺโธติ   เอกมิทาหํ
ภิกฺขเว  สมยํ  ราชคเห  วิหรามิ  เวฬุวเน  กลนฺทกนิวาเปติ  เอกมิทาหํ
ภิกฺขเว    สมยํ    สาวตฺถิยํ    วิหรามิ    เชตวเน    อนาถปิณฺฑิกสฺส
อาราเมติ   เอกมิทาหํ   ภิกฺขเว   สมยํ   เวสาลิยํ  วิหรามิ  มหาวเน
กุฏาคารสาลายนฺติ   อตฺเถว   สุตฺตนฺโตติ   ฯ   อามนฺตา  ฯ  เตน  หิ
พุทฺโธ ภควา มนุสฺสโลเก อฏฺฐาสีติ ฯ
     [๑๗๓๖]   พุทฺโธ  ภควา  มนุสฺสโลเก  อฏฺฐาสีติ  ฯ  อามนฺตา  ฯ
นนุ   ภควา   โลเก   ชาโต   โลเก  สํวฑฺโฒ  โลกํ  อภิภุยฺย  วิหรติ
อนุปลิตฺโต   โลเกนาติ   ฯ  อามนฺตา  ฯ  หญฺจิ  ภควา  โลเก  ชาโต
โลเก   สํวฑฺโฒ   โลกํ  อภิภุยฺย  วิหรติ  อนุปลิตฺโต  โลเกน  โน  วต
เร วตฺตพฺเพ พุทฺโธ ภควา มนุสฺสโลเก อฏฺฐาสีติ ฯ
                                     มนุสฺสโลกกถา ฯ
                                          ------------

เนื้อความพระไตรปิฎกฉบับภาษาบาลี อักษรไทย เล่มที่ ๓๗ หน้าที่ ๕๙๒-๕๙๓. https://84000.org/tipitaka/read/pali_read.php?B=37&A=11740&w=&modeTY=2 อ่านเทียบพระไตรปิฎกฉบับภาษาบาลี อักษรโรมัน :- https://84000.org/tipitaka/read/roman_read.php?B=37&A=11740&modeTY=2 อ่านเทียบพระไตรปิฎกภาษาไทยฉบับหลวง :- https://84000.org/tipitaka/read/byitem.php?book=37&item=1733&items=4 อ่านเทียบพระไตรปิฎกฉบับมหาจุฬาฯ :- https://84000.org/tipitaka/pitaka_item/m_siri.php?B=37&siri=195 ศึกษาอรรถกถานี้ได้ที่ :- https://84000.org/tipitaka/attha/attha.php?b=37&i=1733 อ่านอรรถกถาภาษาบาลีอักษรไทย :- https://84000.org/tipitaka/atthapali/read_th.php?B=55&A=6697 The Pali Atthakatha in Roman :- https://84000.org/tipitaka/atthapali/read_rm.php?B=55&A=6697 สารบัญพระไตรปิฎกเล่มที่ ๓๗ https://84000.org/tipitaka/read/?index_37 https://84000.org/tipitaka/english/?index_37