บาลีพระไตรปิฎกเล่มที่ ๓๗ - พระอภิธรรมปิฎกเล่มที่ ๔

                                    ชีวิตา โวโรปนกถา
     [๑๕๐๒]   ทิฏฺฐิสมฺปนฺโน    ปุคฺคโล    สญฺจิจฺจ   ปาณํ   ชีวิตา
โวโรเปยฺยาติ   ฯ   อามนฺตา   ฯ   ทิฏฺฐิสมฺปนฺโน   ปุคฺคโล   สญฺจิจฺจ
มาตรํ   ชีวิตา   โวโรเปยฺย  ฯเปฯ  ปิตรํ  ชีวิตา  โวโรเปยฺย  ฯเปฯ
อรหนฺตํ  ชีวิตา  โวโรเปยฺย  ฯเปฯ  ทุฏฺเฐน  จิตฺเตน  ตถาคตสฺส โลหิตํ
อุปฺปาเทยฺย ฯเปฯ สงฺฆํ ภินฺเทยฺยาติ ฯ น เหวํ วตฺตพฺเพ ฯเปฯ
     [๑๕๐๓]   ทิฏฺฐิสมฺปนฺโน    ปุคฺคโล    สญฺจิจฺจ   ปาณํ   ชีวิตา
โวโรเปยฺยาติ    ฯ   อามนฺตา   ฯ   ทิฏฺฐิสมฺปนฺโน   ปุคฺคโล   สตฺถริ
อคารโวติ   ฯ   น   เหวํ   วตฺตพฺเพ   ฯเปฯ  ธมฺเม  ฯเปฯ  สงฺเฆ
ฯเปฯ สิกฺขาย อคารโวติ ฯ น เหวํ วตฺตพฺเพ ฯเปฯ
     [๑๕๐๔]   นนุ   ทิฏฺฐิสมฺปนฺโน   ปุคฺคโล   สตฺถริ  สคารโวติ  ฯ
อามนฺตา   ฯ   หญฺจิ   ทิฏฺฐิสมฺปนฺโน   ปุคฺคโล   สตฺถริ  สคารโว  โน
วต   เร   วตฺตพฺเพ   ทิฏฺฐิสมฺปนฺโน   ปุคฺคโล   สญฺจิจฺจ  ปาณํ  ชีวิตา
โวโรเปยฺยาติ   ฯ   นนุ  ทิฏฺฐิสมฺปนฺโน  ปุคฺคโล  ธมฺเม  ฯเปฯ  สงฺเฆ
ฯเปฯ   สิกฺขาย   สคารโวติ   ฯ   อามนฺตา   ฯ  หญฺจิ  ทิฏฺฐิสมฺปนฺโน
ปุคฺคโล   สิกฺขาย   สคารโว   โน   วต  เร  วตฺตพฺเพ  ทิฏฺฐิสมฺปนฺโน
ปุคฺคโล สญฺจิจฺจ ปาณํ ชีวิตา โวโรเปยฺยาติ ฯ
     [๑๕๐๕]   ทิฏฺฐิสมฺปนฺโน  ปุคฺคโล  สตฺถริ  อคารโวติ ฯ อามนฺตา ฯ
ทิฏฺฐิสมฺปนฺโน   ปุคฺคโล   พุทฺธถูเป   โอหเนยฺย  โอมุตฺเตยฺย  นิฏฺฐุเภยฺย
พุทฺธถูเป อปพฺยามโต ^๑-  กเรยฺยาติ ฯ น เหวํ วตฺตพฺเพ ฯเปฯ
     [๑๕๐๖]   ทิฏฺฐิสมฺปนฺโน    ปุคฺคโล    สญฺจิจฺจ   ปาณํ   ชีวิตา
โวโรเปยฺยาติ   ฯ   อามนฺตา   ฯ   นนุ   วุตฺตํ   ภควตา  เสยฺยถาปิ
ภิกฺขเว  มหาสมุทฺโท  ฐิตธมฺโม  เวลนฺนาติวตฺตติ  เอวเมว  โข  ภิกฺขเว
ยํ   มยา   สาวกานํ   สิกฺขาปทํ  ปญฺญตฺตํ  ตํ  มม  สาวกา  ชีวิตเหตุปิ
นาติกฺกมนฺตีติ  ^๒-  อตฺเถว  สุตฺตนฺโตติ  ฯ อามนฺตา ฯ เตน หิ น วตฺตพฺพํ
ทิฏฺฐิสมฺปนฺโน ปุคฺคโล สญฺจิจฺจ ปาณํ ชีวิตา โวโรเปยฺยาติ ฯ
                                    ชีวิตาโวโรปนกถา ฯ
@เชิงอรรถ: ๑. ม. อพฺยาสกโต. ^๒ ขุ. อุ. ๑๒๗ ฯ

เนื้อความพระไตรปิฎกฉบับภาษาบาลี อักษรไทย เล่มที่ ๓๗ หน้าที่ ๕๐๑-๕๐๒. https://84000.org/tipitaka/read/pali_read.php?B=37&A=9970&w=&modeTY=2 อ่านเทียบพระไตรปิฎกฉบับภาษาบาลี อักษรโรมัน :- https://84000.org/tipitaka/read/roman_read.php?B=37&A=9970&modeTY=2 อ่านเทียบพระไตรปิฎกภาษาไทยฉบับหลวง :- https://84000.org/tipitaka/read/byitem.php?book=37&item=1502&items=5 อ่านเทียบพระไตรปิฎกฉบับมหาจุฬาฯ :- https://84000.org/tipitaka/pitaka_item/m_siri.php?B=37&siri=141 ศึกษาอรรถกถานี้ได้ที่ :- https://84000.org/tipitaka/attha/attha.php?b=37&i=1502 อ่านอรรถกถาภาษาบาลีอักษรไทย :- https://84000.org/tipitaka/atthapali/read_th.php?B=55&A=5967 The Pali Atthakatha in Roman :- https://84000.org/tipitaka/atthapali/read_rm.php?B=55&A=5967 สารบัญพระไตรปิฎกเล่มที่ ๓๗ https://84000.org/tipitaka/read/?index_37 https://84000.org/tipitaka/english/?index_37