บทนำ พระวินัยปิฎก พระสุตตันตปิฎก พระอภิธรรมปิฎก ค้นพระไตรปิฎก ชาดก หนังสือธรรมะ |
ThaiVersion PaliThai PaliRoman |
[23] Tena kho pana samayena rañño māgadhassa seniyassa bimbisārassa ārāme ambā phalino 2- honti . raññā ca 3- māgadhena seniyena bimbisārena anuññātaṃ hoti yathāsukhaṃ ayyā ambaṃ paribhuñjantūti . chabbaggiyā bhikkhū taruṇaññeva ambaṃ pātāpetvā paribhuñjiṃsu . rañño ca māgadhassa seniyassa bimbisārassa ambena attho hoti . athakho rājā māgadho seniyo bimbisāro manusse āṇāpesi gacchatha bhaṇe ārāmaṃ gantvā ambaṃ @Footnote: 1 Ma. Yu. diṭṭhānugatiṃ āpajjati. 2 Yu. phalitā. 3 Ma. ayaṃ pāṭho natthi. Āharathāti . evaṃ devāti kho te manussā rañño māgadhassa seniyassa bimbisārassa paṭissutvā ārāmaṃ gantvā ārāmapālaṃ 1- etadavocuṃ devassa bhaṇe ambena attho ambaṃ dethāti . natthayyā ambaṃ taruṇaññeva ambaṃ pātāpetvā bhikkhū paribhuñjiṃsūti . athakho te manussā rañño māgadhassa seniyassa bimbisārassa etamatthaṃ ārocesuṃ . suparibhuttaṃ bhaṇe ayyehi ambaṃ apica bhagavatā mattā vaṇṇitāti . manussā ujjhāyanti khīyanti vipācenti kathaṃ hi nāma samaṇā sakyaputtiyā na mattaṃ jānitvā rañño ambaṃ paribhuñjissantīti. Assosuṃ kho bhikkhū tesaṃ manussānaṃ ujjhāyantānaṃ khīyantānaṃ vipācentānaṃ .pe. athakho te bhikkhū bhagavato etamatthaṃ ārocesuṃ .pe. Na bhikkhave ambaṃ paribhuñjitabbaṃ yo paribhuñjeyya āpatti dukkaṭassāti. [24] Tena kho pana samayena aññatarassa pūgassa saṅghabhattaṃ hoti. Sūpe ambapesikā 2- pakkhittā honti . bhikkhū kukkuccāyantā na paṭiggaṇhanti .pe. paṭiggaṇhatha bhikkhave paribhuñjatha anujānāmi bhikkhave ambapesikanti. [25] Tena kho pana samayena aññatarassa pūgassa saṅghabhattaṃ hoti . tena pariyāpuṇiṃsu ambapesikaṃ 3- kātuṃ. Bhattagge sakaleheva ambehi caranti 4- . bhikkhū kukkuccāyantā na paṭiggaṇhanti .pe. @Footnote: 1 Yu. ārāmapāle. 2 Ma. Yu. abbapesikāyo. 3 Yu. pesikaṃ. 4 Ma. denti. Paṭiggaṇhatha bhikkhave paribhuñjatha anujānāmi bhikkhave pañcahi samaṇakappehi phalaṃ paribhuñjituṃ aggiparicitaṃ satthaparicitaṃ nakhaparicitaṃ abījaṃ nibbaṭṭabījaññeva 1- pañcamaṃ anujānāmi bhikkhave imehi pañcahi samaṇakappehi phalaṃ paribhuñjitunti. [26] Tena kho pana samayena aññataro bhikkhu ahinā daṭṭho kālakato hoti . bhagavato etamatthaṃ ārocesuṃ .pe. naha 2- nūna so bhikkhave bhikkhu [3]- cattāri ahirājakulāni mettena cittena phari . sace hi so bhikkhave bhikkhu [3]- cattāri ahirājakulāni mettena cittena phareyya na hi so bhikkhave bhikkhu ahinā daṭṭho kālaṃ kareyya. Katamāni cattāri ahirājakulāni . virūpakkhaṃ ahirājakulaṃ erāpathaṃ ahirājakulaṃ chabyāputtaṃ ahirājakulaṃ kaṇhāgotamakaṃ ahirājakulaṃ naha 2- nūna so bhikkhave bhikkhu imāni cattāri ahirājakulāni mettena cittena phari . sace hi so bhikkhave bhikkhu imāni cattāri ahirājakulāni mettena cittena phareyya na hi so bhikkhave bhikkhu ahinā daṭṭho kālaṃ kareyya . anujānāmi bhikkhave imāni cattāri ahirājakulāni mettena cittena pharituṃ attaguttiyā attarakkhāya attaparittāya 4- . evañca pana bhikkhave kātabbaṃ [27] Virūpakkhehi me mettaṃ mettaṃ erāpathehi me chabyāputtehi me mettaṃ mettaṃ kaṇhāgotamakehi ca @Footnote: 1 Yu. nivaṭṭabījaññeva. 2 Ma. na hi. 3 Ma. imāni. 4 Ma. Yu. Rā. @attaparittaṃ kātuṃ. Apādakehi me mettaṃ mettaṃ dipādakehi 1- me catuppadehi me mettaṃ mettaṃ bahuppadehi me mā maṃ apādako hiṃsi mā maṃ hiṃsi dipādako. Mā maṃ catuppado hiṃsi mā maṃ hiṃsi bahuppado. Sabbe sattā sabbe pāṇā sabbe bhūtā ca kevalā sabbe bhadrāni passantu mā kiñci pāpamāgamā. Appamāṇo buddho appamāṇo dhammo appamāṇo saṅgho pamāṇavantāni siriṃsapāni 2- ahi vicchikā satapadī uṇṇānābhī sarabū mūsikā katā me rakkhā katā me parittā 4- paṭikkamantu bhūtāni sohaṃ namo bhagavato namo sattannaṃ sammāsambuddhānanti [5]-. [28] Tena kho pana samayena aññataro bhikkhu anabhiratiyā pīḷito attano aṅgajātaṃ chindi .pe. bhagavato etamatthaṃ ārocesuṃ. .pe. Aññamhi so bhikkhave moghapuriso chinditabbamhi 6- aññaṃ chindi na hi 7- bhikkhave attano aṅgajātaṃ chinditabbaṃ 8- yo chindeyya āpatti thullaccayassāti. [29] Tena kho pana samayena rājagahakassa seṭṭhissa mahagghassa candanasārassa candanagaṇṭhī uppannā hoti . athakho rājagahakassa @Footnote: 1 Ma. Yu. dvipādakehi. 2 Ma. sirisapāni. 3 Ma. Yu. uṇṇanābhi. @4 Ma. kataṃ me parittaṃ. 5 Yu. anujānāmi bhikkhave lohitaṃ mocetuṃ. @6 Yu. chetabbamhi. 7 Ma. Yu. ayaṃ pāṭho natthi. 8 Ma. Yu. chetabbaṃ. Seṭṭhissa etadahosi yannūnāhaṃ imāya candanagaṇṭhiyā pattaṃ likhāpeyyaṃ 1- likhañca 2- me paribhogaṃ bhavissati pattañca dānaṃ dassāmīti . athakho rājagahako seṭṭhī tāya candanagaṇṭhiyā pattaṃ likhāpetvā sikkāyaṃ uḍḍitvā veḷugge 3- ālaggetvā veḷuparamparāya vāhitvā 4- evamāha yo samaṇo vā brāhmaṇo vā arahā ceva iddhimā ca dinnaṃyeva pattaṃ oharatūti. [30] Athakho pūraṇo kassapo yena rājagahako seṭṭhī tenupasaṅkami upasaṅkamitvā rājagahakaṃ seṭṭhiṃ etadavoca ahaṃ hi gahapati arahā ceva iddhimā ca dehi me pattanti . sace bhante āyasmā arahā ceva iddhimā ca dinnaṃyeva pattaṃ oharatūti . athakho makkhali gosālo ajito kesakambalo 5- pakudho kaccāyano sañjayo veḷaṭṭhaputto 6- niggaṇṭho nāṭaputto yena rājagahako seṭṭhī tenupasaṅkami upasaṅkamitvā rājagahakaṃ seṭṭhiṃ etadavoca ahaṃ hi gahapati arahā ceva iddhimā ca dehi me pattanti . sace bhante āyasmā arahā ceva iddhimā ca dinnaṃyeva pattaṃ oharatūti. [31] Tena kho pana samayena āyasmā ca mahāmoggallāno @Footnote: 1 Ma. lekhāpeyyaṃ. 2 Ma. Yu. lekhañca. 3 Yu. pakkhipitvā veḷagge. @4 Ma. Yu. bandhitvā. 5 Yu. kesakambalī. 6 Yu. belaṭṭhiputto. Āyasmā ca piṇḍolabhāradvājo pubbaṇhasamayaṃ nivāsetvā pattacīvaramādāya rājagahaṃ piṇḍāya pāvisiṃsu . āyasmāpi kho piṇḍolabhāradvājo arahā ceva iddhimā ca . āyasmāpi kho mahāmoggallāno arahā ceva iddhimā ca . athakho āyasmā piṇḍolabhāradvājo āyasmantaṃ mahāmoggallānaṃ etadavoca gacchāvuso moggallāna etaṃ pattaṃ ohara tuyheso pattoti . āyasmāpi kho moggallāno āyasmantaṃ piṇḍolabhāradvājaṃ etadavoca gacchāvuso bhāradvāja etaṃ pattaṃ ohara tuyheso pattoti 1- . athakho āyasmā piṇḍolabhāradvājo vehāsaṃ abbhuggantvā taṃ pattaṃ gahetvā tikkhattuṃ rājagahaṃ anupariyāyi 2-. [32] Tena kho pana samayena rājagahako seṭṭhī saputtadāro sake nivesane ṭhito hoti pañjaliko namassamāno idheva bhante ayyo bhāradvājo amhākaṃ nivesane patiṭṭhātūti . athakho āyasmā piṇḍolabhāradvājo rājagahakassa seṭṭhissa nivesane patiṭṭhāti . @Footnote: 1 Ma. Yu. Rā. tena kho pana samayena āyasmā ca mahāmoggallāno .pe. pāvisiṃsu. @athakho āyasmā piṇḍolabhāradvājo āyasmantaṃ mahāmoggallānaṃ etadavoca āyasmā @kho moggallāno arahā ceva iddhimā ca gacchāvuso moggallāna etaṃ pattaṃ ohara @tuyheso pattoti. āyasmā kho piṇḍolabhāradvājo arahā ceva iddhimā ca gacchāvuso @bhāradvāja etaṃ pattaṃ ohara tuyheso pattoti. 2 Yu. anupariyāsi. Athakho rājagahako seṭṭhī āyasmato piṇḍolabhāradvājassa hatthato pattaṃ gahetvā mahagghassa khādanīyassa pūretvā āyasmato piṇḍolabhāradvājassa adāsi 1- . athakho āyasmā piṇḍolabhāradvājo taṃ pattaṃ gahetvā ārāmaṃ agamāsi . Assosuṃ kho manussā ayyena kira piṇḍolabhāradvājena rājagahakassa seṭṭhissa patto ohāritoti . te ca manussā uccāsaddā mahāsaddā āyasmantaṃ piṇḍolabhāradvājaṃ piṭṭhito piṭṭhito anubandhiṃsu . assosi kho bhagavā uccāsaddaṃ mahāsaddaṃ sutvāna āyasmantaṃ ānandaṃ āmantesi kiṃ nu kho so ānanda uccāsaddo mahāsaddoti . āyasmatā bhante piṇḍolabhāradvājena rājagahakassa seṭṭhissa patto ohārito assosuṃ kho bhante manussā ayyena kira piṇḍolabhāradvājena rājagahakassa seṭṭhissa patto ohāritoti te ca bhante manussā uccāsaddā mahāsaddā āyasmantaṃ piṇḍolabhāradvājaṃ piṭṭhito piṭṭhito anubandhā 2- so eso bhagavā 3- uccāsaddo mahāsaddoti. [33] Athakho bhagavā etasmiṃ nidāne etasmiṃ pakaraṇe bhikkhusaṅghaṃ sannipātāpetvā āyasmantaṃ piṇḍolabhāradvājaṃ paṭipucchi saccaṃ kira tayā bhāradvāja rājagahakassa seṭṭhissa patto ohāritoti . @Footnote: 1 Yu. pādāsi. 2 Yu. anubaddhā. 3 Ma. Yu. bhante bhagavā. Saccaṃ bhagavāti . vigarahi buddho bhagavā ananucchavikaṃ 1- bhāradvāja ananulomikaṃ appaṭirūpaṃ assāmaṇakaṃ akappiyaṃ akaraṇīyaṃ kathaṃ hi nāma tvaṃ bhāradvāja chavassa dārupattassa kāraṇā gihīnaṃ uttarimanussadhammaṃ iddhipāṭihāriyaṃ dassessasi seyyathāpi nāma 2- bhāradvāja mātugāmo chavassa māsakarūpassa kāraṇā kopinaṃ dasseti evameva kho tayā bhāradvāja chavassa dārupattassa kāraṇā gihīnaṃ uttarimanussadhammaṃ iddhipāṭihāriyaṃ dassitaṃ netaṃ bhāradvāja appasannānaṃ vā pasādāya .pe. vigarahitvā dhammiṃ kathaṃ katvā bhikkhū āmantesi na bhikkhave gihīnaṃ uttarimanussadhammaṃ iddhipāṭihāriyaṃ dassetabbaṃ yo dasseyya āpatti dukkaṭassa bhindathetaṃ bhikkhave dārupattaṃ sakalikaṃ sakalikaṃ karitvā 3- bhikkhūnaṃ añjanapiṃsanaṃ 4- detha na ca bhikkhave dārupatto dhāretabbo yo dhāreyya āpatti dukkaṭassāti.The Pali Tipitaka in Roman Character Volume 7 page 9-16. https://84000.org/tipitaka/read/roman_item.php?book=7&item=23&items=11&mode=bracket Classified by content :- https://84000.org/tipitaka/read/roman_item.php?book=7&item=23&items=11 Compare with The Pali Tipitaka in Thai Character :- https://84000.org/tipitaka/read/pali_item.php?book=7&item=23&items=11&mode=bracket Compare with The Royal Version of Thai Tipitaka :- https://84000.org/tipitaka/read/byitem.php?book=7&item=23&items=11&mode=bracket Study Atthakatha :- https://84000.org/tipitaka/attha/attha.php?b=7&i=23 Contents of The Tipitaka Volume 7 https://84000.org/tipitaka/read/?index_7 https://84000.org/tipitaka/english/?index_7
|
บันทึก ๑๔ พฤศจิกายน พ.ศ. ๒๕๖๐. การแสดงผลนี้อ้างอิงข้อมูลจากพระไตรปิฎกฉบับภาษาบาลี อักษรโรมัน. หากพบข้อผิดพลาด กรุณาแจ้งได้ที่ [email protected]