Tassuddānaṃ
[613] Pabbajjaṃ gotamī yāci nānuññāsi tathāgato
kapilavatthu vesāliṃ agamāsi vināyako.
Rajokiṇṇā 3- koṭṭhakesu 4- ānandassa pavedayi.
@Footnote: 1 Ma. bhikkhunikhandhako dasamo. 2 Ma. imasmiṃ khandhake vatthū ekasataṃ.
@3 Yu. rajokiṇṇe. 4 Ma. rajokiṇṇena koṭṭhake.
Bhabboti nayato yāci mātāti posikāti ca.
Vassasataṃ tadahu ca abhikkhu paccāsiṃsanā 1-
pavāraṇā garudhammā dve vassā anakkosanā
ovaṭo ca aṭṭha dhammā 2- yāvajīvānuvattanā.
Garudhammapaṭiggaho sā vassā upasampadā.
Vassasahassaṃ pañceva kumbhathenaka 3- setaṭṭhi
mañjeṭṭhikā upamāhi 4- evaṃ saddhammahiṃsanā
pāḷiṃ bandheyyupamāhi 5- puna saddhammasaṇṭhiti
upasampādetuṃ ayyā yathāvuḍḍhābhivādanā
na karissanti kimeva sādhāraṇāsādhāraṇaṃ
ovādaṃ pātimokkhañca kena nu kho upassayaṃ
na jānanti ca ācikkhi na karonti ca bhikkhūhi 6-
paṭiggahetuṃ bhikkhūhi bhikkhunīhi paṭiggaho
ācikkhi kammaṃ bhikkhūhi ujjhāyanti bhikkhūhi 7- vā
ācikkhituṃ bhaṇḍanañca ropetvā uppalāya ca
sāvatthiyā kaddamodake 8- avandi kāya ūru ca
aṅgajātaṃ ca obhāsaṃ sampayojenti vaggikā
avandiyo daṇḍakammaṃ bhikkhuniyo tathā puna
@Footnote: 1 Ma. paccāsīsanā. 2 Yu. ovādenaṭṭha te dhammā. 3 Yu. kumbhathenakā.
@4 Ma. mañjiṭṭhitaupamāhi. Yu. mañcaṭṭhika upamāhi. 5 Ma. āḷiṃ bandheyya pāve.
@Yu. āḷiṃ bandheyya pā eva. 6 Ma. Yu. bhikkhuhi. 7 Ma. Yu. bhikkhunīhi vā.
@8 Ma. Yu. kaddamoda.
Āvaraṇañca ovādaṃ nu kho kappati pakkami
bālāvatthuvinicchayā 1- ovādaṃ saṅgho pañcahi
duve tisso na gaṇhanti bālā gilānagāmikaṃ
araññaṃ nārocenti ca puna paccāgacchanti ca 2-
dīghaṃ vilivacammañca dussā ca veṇi vaṭṭi ca
coḷaveṇi ca vaṭṭi ca suttaveṇi ca vaṭṭikā
aṭṭhillaṃ gohanukena hatthakocchaṃ padaṃ 3- tathā
ūru mukhaṃ dantamaṃsaṃ ālimpo madda cuṇṇanā
lañcenti aṅgarāgañca mukharāgaṃ tathā duve
avaṅgaṃ viseso loko 4- sālokena sanaccanaṃ 5-
vesi 6- pānāgāraṃ sūnaṃ āpaṇaṃ vaḍḍhi vāṇijā
dāsaṃ dāsiṃ kammakaraṃ kammakāriṃ upaṭṭhayuṃ 7-
tiracchāna haritaki 8- sandhārayanti namātakaṃ 9-
nīlaṃ pītaṃ lohitakaṃ mañjeṭṭhakaṇhacīvarā 10-
mahāraṅga mahānāmā 11- ca acchinnā dīghameva ca
puppha phala 12- kañcukañca tirīṭañceva dhārayuṃ.
Bhikkhunīsikkhamānāya sāmaṇerāya accaye 13-
@Footnote: 1 Yu. bālāvatthuvinicchayo. 2 Ma. Yu. āraññakā nārocenti na paccāgacchanti ca.
@3 Yu. pari. 4 Yu. avaṅga viseso loke. 5 Ma. naccena ca. Yu. sanaccena ca.
@6 Ma. Yu. vesī. 7 Yu. kammakariṃ upaṭṭhahaṃ. 8 Ma. Yu. harītaki.
@9 Ma. Yu. namatakaṃ. 10 Ma. Yu. mañcaṭṭhakaṇhacīvaro. 11 Ma. Yu. mahānāma.
@12 Yu. pala. 13 Yu. apiccaye.
Niyyādite parikkhāre bhikkhuniyo ca issarā
bhikkhussa sāmaṇerassa upāsakassupāsikā
aññesañca parikkhāre niyyāte bhikkhū 1- issarā.
Mallā 2- gabbhaṃ pattamūlaṃ byañjanaṃ āmisena ca
ussannañca bāḷhataraṃ sannidhikataāmisaṃ
bhikkhūnaṃ yādisaṃ heṭṭhaṃ bhikkhunīnaṃ tathā kare.
Senāsanaṃ utuniyo makkhiyati paṭāni ca
chijjati 3- sabbakālañca animittāpi 4- dissare
nimittā lohitā ceva tatheva dhuvalohitā
dhuvacoḷapaggharantī 5- sikhariṇitthipaṇḍakā
vepurisī ca sambhinnā ubhatobyañjanāpi 6- ca
animittādito katvā yāva ubhayabyañjanā
etaṃ peyyālato heṭṭhaṃ 7- kuṭṭhaṃ gaṇḍo kilāsi ca
sosāpamāro mānusī itthīsi bhujissāsi ca
anaṇā na rājabhaṭī anuññātā ca vīsati
paripuṇṇā ca kinnāmā kānāmā te pavattinī
catuvīsantarāyānaṃ pucchitvā upasampadā.
Vitthāyanti ananusiṭṭhā saṅghamajjhe tatheva ca
upajjhāgāha saṅghāṭi uttarantaravāsako
saṅkacchudakasāṭi ca 8- ācikkhitvāna pesaye
@Footnote: 1 Ma. niyyāte bhikkhu. Yu. niyyante bhikkhu. 2 Ma. mallī. Yu. malle.
@3 Ma. Yu. chijjanti. 4 Yu. animittādi. 5 Yu. dhuvacoḷaṃ paggharaṇi.
@6 Yu. ubhatobyañjanā ca yā. 7 Ma. Yu. heṭṭhā. 8 Ma. saṅkaccudakasāṭi ca.
@Yu. saṅkacchadakasāṭi ca.
Bālā asammate kato yāce pucchantarāyikā
ekatoupasampannā bhikkhusaṅghe tathā puna
chāyā utudivasā ca saṅgīti tayo nissaye
aṭṭha akaraṇīyāni kālaṃ sabbattha aṭṭhadhā 1-
na pavārenti bhikkhunī bhikkhusaṅghaṃ tatheva ca
kolāhalaṃ purebhattaṃ vikāle ca kulāhalaṃ 2-
uposathaṃ pavāraṇaṃ savacanaṃ anūvadaṃ 3-
okāsaṃ code sārenti paṭikkhittaṃ mahesinā.
Tatheva bhikkhu bhikkhunī anuññātaṃ mahesinā.
Yānaṃ gilānaṃ yuttañca yānugghātaḍḍhakāsikā
bhikkhu sikkhā sāmaṇera sāmaṇerī ca bāliyā 4-
araññe upāsakena uddosito upassayaṃ
na sammati navakammaṃ nisinnagabbhaekikā
sāgārañca garudhammaṃ appaccakkhā yā 5- ca saṅkami
abhivādana kesā ca nakhā ca vaṇakammanā 6-
pallaṅkena gilānā ca vaccaṃ cuṇṇena vāsitaṃ
jantāghare paṭisote atitthe purisena ca
mahāgotamī āyāci ānando cāpi yoniso.
Parisā catasso honti pabbajjā 7- jinasāsane.
@Footnote: 1 Ma. aṭṭheva. Yu. aṭṭha vā. 2 Ma. Yu. kolāhalaṃ. 3 Ma. savacanīyānuvādanaṃ.
@Yu. savacani anuvādanaṃ. 4 Ma. Yu. bālāya. 5 Ma. Yu. paccakkhāya ca.
@6 Yu. vakakammanā. 7 Yu. pabbajjaṃ.
Saṃvegajananatthāya saddhammassa ca vuḍḍhiyā 1-
āturassā va bhesajjaṃ evaṃ buddhena desitaṃ.
Evaṃ vinītā 2- saddhamme mātugāmāpi ītarā
tā 3- yanti accutaṃ ṭhānaṃ yattha gantvā na socareti.
[4]-
-----------------
@Footnote: 1 Yu. buddhiyā. 2 Yu. viditā. 3 Ma. yā. 4 Ma. bhikkhunīkhandhako niṭṭhito.
Pañcasatikakkhandhakaṃ
[614] Athakho āyasmā mahākassapo bhikkhū āmantesi ekamidāhaṃ
āvuso samayaṃ pāvāya kusināraṃ addhānamaggapaṭipanno mahatā
bhikkhusaṅghena saddhiṃ pañcamattehi bhikkhusatehi athakhvāhaṃ āvuso
maggā okkamma aññatarasmiṃ rukkhamūle nisīdiṃ tena kho pana
samayena aññataro ājīvako kusinārāyaṃ mandāravapupphaṃ gahetvā
pāvaṃ addhānamaggapaṭipanno hoti addasaṃ kho ahaṃ āvuso taṃ
ājīvakaṃ dūrato va āgacchantaṃ disvāna taṃ ājīvakaṃ etadavocaṃ
apāvuso amhākaṃ satthāraṃ jānāsīti āmāvuso jānāmi
ajja sattāhaparinibbuto samaṇo gotamo tato me idaṃ
mandāravapupphaṃ gahitanti tatrāvuso ye te bhikkhū avītarāgā
appekacce bāhā paggayha kandanti chinnapādāva patanti 1-
āvaṭṭanti vivaṭṭanti atikhippaṃ bhagavā parinibbuto atikhippaṃ
sugato parinibbuto atikhippaṃ cakkhuṃ loke antarahitanti ye
pana te bhikkhū vītarāgā te satā sampajānā adhivāsenti
aniccā saṅkhārā taṃ kutettha labbhāti athakhvāhaṃ āvuso
te bhikkhū etadavocaṃ alaṃ āvuso mā socittha mā paridevittha
nanvetaṃ āvuso bhagavatā paṭikacceva akkhātaṃ sabbeheva piyehi
@Footnote: 1 Ma. chinnapātaṃ papatanti. Yu. chinnapapātaṃ papatanti.
Manāpehi nānābhāvo vinābhāvo aññathābhāvo taṃ kutettha
āvuso 1- labbhā yantaṃ jātaṃ bhūtaṃ saṅkhataṃ palokadhammaṃ taṃ vata
mā palujjīti netaṃ ṭhānaṃ vijjatīti tena kho panāvuso samayena
subhaddo nāma vuḍḍhapabbajito tassaṃ parisāyaṃ nisinno hoti
athakho āvuso subhaddo vuḍḍhapabbajito te bhikkhū etadavoca
alaṃ āvuso mā socittha mā paridevittha sumuttā mayaṃ tena
mahāsamaṇena upaddūtā ca mayaṃ homa idaṃ vo kappati idaṃ
vo na kappatīti idāni pana mayaṃ yaṃ icchissāma taṃ karissāma
yaṃ na icchissāma na taṃ karissāmāti handa mayaṃ āvuso
dhammañca vinayañca saṅgāyāma pure adhammo dippati dhammo
paṭibāhiyati avinayo dippati vinayo paṭibāhiyati pure
adhammavādino balavanto honti dhammavādino dubbalā honti
avinayavādino balavanto honti vinayavādino dubbalā hontīti.
[615] Tenahi bhante thero bhikkhū uccinātūti . athakho
āyasmā mahākassapo ekenūnapañcaarahantasatāni uccini . bhikkhū
āyasmantaṃ mahākassapaṃ etadavocuṃ ayaṃ bhante āyasmā ānando
kiñcāpi sekkho samāno abhabbo chandā dosā mohā bhayā
agatiṃ gantuṃ bahu canena bhagavato santike dhammo ca vinayo
ca pariyatto tenahi bhante thero āyasmantaṃpi ānandaṃ
@Footnote: 1 idaṃ ālapanaṃ atirekaṃ maññe.
Uccinātūti . athakho āyasmā mahākassapo āyasmantaṃpi ānandaṃ
uccini . athakho therānaṃ bhikkhūnaṃ etadahosi kattha nu kho mayaṃ
dhammañca vinayañca saṅgāyeyyāmāti . athakho therānaṃ bhikkhūnaṃ
etadahosi rājagahaṃ kho mahāgocaraṃ pahūtasenāsanaṃ yannūna
mayaṃ rājagahe vassaṃ vasantā dhammañca vinayañca saṅgāyeyyāma
na aññe bhikkhū rājagahe vassaṃ upagaccheyyunti . athakho
āyasmā mahākassapo saṅghaṃ ñāpesi
{615.1} suṇātu me āvuso saṅgho yadi saṅghassa pattakallaṃ
saṅgho imāni pañca bhikkhusatāni sammanneyya rājagahe vassaṃ
vasantāni 1- dhammañca vinayañca saṅgāyituṃ na aññehi bhikkhūhi
rājagahe vassaṃ vasitabbanti. Esā ñatti.
{615.2} Suṇātu me āvuso saṅgho saṅgho imāni pañca
bhikkhusatāni sammannati rājagahe vassaṃ vasantāni dhammañca
vinayañca saṅgāyituṃ na aññehi bhikkhūhi rājagahe vassaṃ vasitabbanti .
Yassāyasmato khamati imesaṃ pañcannaṃ bhikkhusatānaṃ sammati rājagahe
vassaṃ vasantānaṃ 2- dhammañca vinayañca saṅgāyituṃ na aññehi bhikkhūhi
rājagahe vassaṃ vasitabbanti so tuṇhassa yassa nakkhamati so bhāseyya.
{615.3} Sammatāni 3- saṅghena imāni pañca bhikkhusatāni rājagahe
vassaṃ vasantāni dhammañca vinayañca saṅgāyituṃ na aññehi bhikkhūhi
rājagahe vassaṃ vasitabbanti . khamati saṅghassa tasmā tuṇhī .
@Footnote: 1 Yu. vasantā. 2 Yu. vasantā. 3 Yu. sammatā.
Evametaṃ dhārayāmīti.
[616] Athakho therā bhikkhū rājagahaṃ agamaṃsu dhammañca vinayañca
saṅgāyituṃ . athakho therānaṃ bhikkhūnaṃ etadahosi bhagavatā kho
āvuso khaṇḍaphullapaṭisaṅkharaṇaṃ vaṇṇitaṃ handa mayaṃ āvuso
paṭhamaṃ māsaṃ khaṇḍaphullaṃ paṭisaṅkharoma majjhimaṃ māsaṃ sannipatitvā
dhammañca vinayañca saṅgāyissāmāti . athakho therā bhikkhū paṭhamaṃ
māsaṃ khaṇḍaphullaṃ paṭisaṅkhariṃsu.
The Pali Tipitaka in Roman Character Volume 7 page 373-382.
https://84000.org/tipitaka/read/roman_item.php?book=7&item=613&items=4
Classified by [Item Number] :-
http://84000.org/tipitaka/read/roman_item.php?book=7&item=613&items=4&mode=bracket
Compare with The Pali Tipitaka in Thai Character :-
https://84000.org/tipitaka/read/pali_item.php?book=7&item=613&items=4
Compare with The Royal Version of Thai Tipitaka :-
https://84000.org/tipitaka/read/byitem.php?book=7&item=613&items=4
Study Atthakatha :-
https://84000.org/tipitaka/attha/attha.php?b=7&i=613
Contents of The Tipitaka Volume 7
https://84000.org/tipitaka/read/?index_7
https://84000.org/tipitaka/english/?index_7
บันทึก ๑๔ พฤศจิกายน พ.ศ. ๒๕๖๐.
การแสดงผลนี้อ้างอิงข้อมูลจากพระไตรปิฎกฉบับภาษาบาลี อักษรโรมัน.
หากพบข้อผิดพลาด กรุณาแจ้งได้ที่ [email protected]
