[203] Anāpatti asañcicca ajānantassa namaraṇādhippāyassa
ummattakassa khittacittassa 1- vedanaṭṭassa 2- ādikammikassāti.
Manussaviggahapārājikamhi paṭhamabhāṇavāraṃ niṭṭhitaṃ.
[204] Saṃvaṇṇanā nisīdanto musalodukkhalena ca
vuḍḍhapabbajitā santo laggaṃ maṃsaṃ visenapi 3-
tayo ca vatthukammehi iṭṭhakāhipare tayo
vāsī gopānasī ceva aṭṭakotaraṇaṃ pati
sedanatthuñca sambāho nahāpanābbhañjanena ca
uṭṭhāpento nipātento annapānena māraṇaṃ
jāragabbho sapattī ca mātāputtaṃ ubho vadhi
@Footnote: 1-2 ime dve pāṭhā yuropiyamarammapotthakesu na dissanti.
@3 vuḍḍhapabbajitābhisanno aggaṃ vimaṃsanā visanti tesu potthakesu
@āgataṃ.
Ubho na miyyare maddā tāpaṃ vañjhā vijāyinī
patodaṃ niggahe yakkho vāḷayakkhañca pāhiṇi
taṃ maññamāno pahari saggañca nirayaṃ bhaṇe
āḷaviyā tayo rukkhā dāyehi apare tayo
mā kilamesi na tuyhaṃ takkaṃ socirakena 1- cāti.
[205] Tena kho pana samayena aññataro bhikkhu gilāno hoti.
Tassa bhikkhū kāruññena maraṇavaṇṇaṃ saṃvaṇṇesuṃ . so bhikkhu
kālamakāsi . tesaṃ kukkuccaṃ ahosi kacci nu kho mayaṃ pārājikaṃ
āpattiṃ āpannāti . athakho te bhikkhū bhagavato etamatthaṃ
ārocesuṃ. Āpattiṃ tumhe bhikkhave āpannā pārājikanti.
[206] Tena kho pana samayena aññataro piṇḍacāriko bhikkhu
pīṭhake pilotikāya paṭicchannaṃ dārakaṃ nisīdanto ottharitvā māresi .
Tassa kukkuccaṃ ahosi kacci nu kho ahaṃ pārājikaṃ āpattiṃ
āpannoti . athakho so bhikkhu bhagavato etamatthaṃ ārocesi .
Anāpatti bhikkhu pārājikassa na ca bhikkhave appaṭivekkhitvā
āsane nisīditabbaṃ yo nisīdeyya āpatti dukkaṭassāti.
[207] Tena kho pana samayena aññataro bhikkhu bhattagge antaraghare
āsanaṃ paññāpento musale ussite ekaṃ musalaṃ aggahesi . dutiyo
musalo paripatitvā aññatarassa dārakassa matthake avatthāsi .
@Footnote: 1 Yu. Ma. takkasuvīrakena. Rā. takkaṃ sovirakena.
So kālamakāsi . tassa kukkuccaṃ ahosi .pe. kiṃcitto tvaṃ
bhikkhūti . asañcicco ahaṃ bhagavāti . anāpatti bhikkhu asañciccāti.
Tena kho pana samayena aññataro bhikkhu bhattagge antaraghare āsanaṃ
paññāpento udukkhalabhaṇḍikaṃ akkamitvā pavaṭṭesi aññataraṃ dārakaṃ
ottharitvā māresi . tassa kukkuccaṃ ahosi .pe. anāpatti
bhikkhu asañciccāti.
[208] Tena kho pana samayena pitāpattā bhikkhūsu pabbajitā
honti . kāle ārocite putto pitaraṃ etadavoca gaccha bhante
saṅgho taṃ paṭimānetīti piṭṭhiyaṃ gahetvā paṇāmesi . so papatitvā
kālamakāsi . tassa kukkuccaṃ ahosi .pe. kiṃcitto tvaṃ bhikkhūti .
Nāhaṃ bhagavā maraṇādhippāyoti. Anāpatti bhikkhu namaraṇādhippāyassāti.
{208.1} Tena kho pana samayena pitāputtā bhikkhūsu pabbajitā
honti . kāle ārocite putto pitaraṃ etadavoca gaccha bhante saṅgho
taṃ paṭimānetīti maraṇādhippāyo piṭṭhayaṃ gahetvā paṇāmesi . so
papatitvā kālamakāsi . tassa kukkuccaṃ ahosi .pe. āpattiṃ tvaṃ
bhikkhu āpanno pārājikanti.
{208.2} Tena kho pana samayena pitāputtā bhikkhūsu pabbajitā
honti . kāle ārocite putto pitaraṃ etadavoca gaccha bhante saṅgho
taṃ paṭimānetīti maraṇādhippāyo piṭṭhiyaṃ gahetvā paṇāmesi . so
papatitvā na kālamakāsi . tassa kukkuccaṃ ahosi .pe. Anāpatti bhikkhu
Pārājikassa āpatti thullaccayassāti.
[209] Tena kho pana samayena aññatarassa bhikkhuno bhuñjantassa
maṃsaṃ kaṇṭhe vilaggaṃ hoti . aññataro bhikkhu tassa bhikkhuno gīvāyaṃ
pahāraṃ adāsi . salohitaṃ maṃsaṃ pati . so bhikkhu kālamakāsi. Tassa
kukkuccaṃ ahosi .pe. anāpatti bhikkhu namaraṇādhippāyassāti .
Tena kho pana samayena aññatarassa bhikkhuno bhuñjantassa maṃsaṃ kaṇṭhe
vilaggaṃ hoti . aññataro bhikkhu maraṇādhippāyo tassa bhikkhuno gīvāyaṃ
pahāraṃ adāsi . salohitaṃ maṃsaṃ pati . so bhikkhu kālamakāsi. Tassa
kukkuccaṃ ahosi .pe. Āpattiṃ tvaṃ bhikkhu āpanno pārājikanti.
{209.1} Tena kho pana samayena aññatarassa bhikkhuno bhuñjantassa
maṃsaṃ kaṇṭhe vilaggaṃ hoti . aññataro bhikkhu maraṇādhippāyo tassa
bhikkhuno gīvāyaṃ pahāraṃ adāsi. Salohitaṃ maṃsaṃ pati. So bhikkhu na kālamakāsi.
Tassa kukkuccaṃ ahosi .pe. anāpatti bhikkhu pārājikassa āpatti
thullaccayassāti.
[210] Tena kho pana samayena aññataro piṇḍacāriko bhikkhu
visagataṃ piṇḍapātaṃ labhitvā paṭikkamanaṃ haritvā bhikkhūnaṃ aggakārikaṃ
adāsi . te bhikkhū kālamakaṃsu . tassa kukkuccaṃ ahosi .pe. Kiṃcitto
tvaṃ bhikkhūti. Nāhaṃ bhagavā jānāmīti. Anāpatti bhikkhu ajānantassāti.
{210.1} Tena kho pana samayena aññataro bhikkhu
Vīmaṃsādhippāyo aññatarassa bhikkhuno visaṃ adāsi . so bhikkhu
kālamakāsi . tassa kukkuccaṃ ahosi .pe. kiṃcitto tvaṃ
bhikkhūti . vīmaṃsādhippāyo ahaṃ bhagavāti . anāpatti bhikkhu
pārājikassa āpatti thullaccayassāti.
[211] Tena kho pana samayena āḷavikā 1- bhikkhū vihāravatthuṃ
karonti . aññataro bhikkhu heṭṭhā hutvā silaṃ uccāresi .
Uparimena bhikkhunā duggahitā silā heṭṭhimassa bhikkhuno matthake
avatthāsi . so bhikkhu kālamakāsi . tassa kukkuccaṃ ahosi
.pe. Anāpatti bhikkhu asañciccāti.
{211.1} Tena kho pana samayena āḷavikā bhikkhū vihāravatthuṃ karonti.
Aññataro bhikkhu heṭṭhā hutvā silaṃ uccāresi . uparimo bhikkhu
maraṇādhippāyo heṭṭhimassa bhikkhuno matthake silaṃ muñci . so bhikkhu
kālamakāsi . tassa kukkuccaṃ ahosi .pe. āpattiṃ tvaṃ bhikkhu āpanno
pārājikanti.
{211.2} Tena kho pana samayena āḷavikā bhikkhū vihāravatthuṃ karonti.
Aññataro bhikkhu heṭṭhā hutvā silaṃ uccāresi . uparimo bhikkhu
maraṇādhippāyo heṭṭhimassa bhikkhuno matthake silaṃ muñci . so bhikkhu
na kālamakāsi . tassa kukkuccaṃ ahosi .pe. anāpatti bhikkhu
pārājikassa āpatti thullaccayassāti . tena kho pana samayena
āḷavikā bhikkhū vihārassa kuḍḍaṃ uṭṭhāpenti . aññataro
@Footnote: 1 Yu. Ma. āḷavakā.
Bhikkhu heṭṭhā hutvā iṭṭhakaṃ uccāresi . uparimena bhikkhunā
duggahitā iṭṭhakā heṭṭhimassa bhikkhuno matthake avatthāsi . so
bhikkhu kālamakāsi . tassa kukkuccaṃ ahosi .pe. anāpatti
bhikkhu asañciccāti.
{211.3} Tena kho pana samayena āḷavikā bhikkhū vihārassa kuḍḍaṃ
uṭṭhāpenti . aññataro bhikkhu heṭṭhā hutvā iṭṭhakaṃ uccāresi .
Uparimo bhikkhu maraṇādhippāyo heṭṭhimassa bhikkhuno matthake iṭṭhakaṃ
muñci . so bhikkhu kālamakāsi .pe. so bhikkhu na kālamakāsi. Tassa
kukkuccaṃ ahosi .pe. anāpatti bhikkhu pārājikassa āpatti
thullaccayassāti.
{211.4} Tena kho pana samayena āḷavikā bhikkhū navakammaṃ karonti.
Aññataro bhikkhu heṭṭhā hutvā vāsiṃ uccāresi . uparimena bhikkhunā
duggahitā vāsī heṭṭhimassa bhikkhuno matthake avatthāsi . so bhikkhu
kālamakāsi. Tassa kukkuccaṃ ahosi .pe. Anāpatti bhikkhu asañciccāti.
{211.5} Tena kho pana samayena āḷavikā bhikkhū navakammaṃ karonti.
Aññataro bhikkhu heṭṭhā hutvā vāsiṃ uccāresi . uparimo bhikkhu
maraṇādhippāyo heṭṭhimassa bhikkhuno matthake vāsiṃ muñci . so bhikkhu
kālamakāsi .pe. so bhikkhu na kālamakāsi . tassa kukkuccaṃ ahosi
.pe. anāpatti bhikkhu pārājikassa āpatti thullaccayassāti .
Tena kho pana samayena āḷavikā bhikkhū navakammaṃ karonti. Aññataro bhikkhu
Heṭṭhā hutvā gopānasiṃ uccāresi . uparimena bhikkhunā duggahitā
gopānasī heṭṭhimassa bhikkhuno matthake avatthāsi . so bhikkhu
kālamakāsi . tassa kukkuccaṃ ahosi .pe. anāpatti bhikkhu
asañciccāti.
{211.6} Tena kho pana samayena āḷavikā bhikkhū navakammaṃ
karonti . aññataro bhikkhu heṭṭhā hutvā gopānasiṃ uccāresi .
Uparimo bhikkhu maraṇādhippāyo heṭṭhimassa bhikkhuno matthake
gopānasiṃ muñci . so bhikkhu kālamakāsi .pe. so bhikkhu na
kālamakāsi . tassa kukkuccaṃ ahosi .pe. anāpatti bhikkhu
pārājikassa āpatti thullaccayassāti.
{211.7} Tena kho pana samayena āḷavikā bhikkhū navakammaṃ karontā
aṭṭakaṃ bandhanti . aññataro bhikkhu aññataraṃ bhikkhuṃ etadavoca āvuso
atra ṭhito bandhāhīti . So tatra ṭhito bandhanto paripatitvā kālamakāsi.
Tassa kukkuccaṃ ahosi .pe. kiṃcitto tvaṃ bhikkhūti . nāhaṃ bhagavā
maraṇādhippāyoti. Anāpatti bhikkhu namaraṇādhippāyassāti.
{211.8} Tena kho pana samayena āḷavikā bhikkhū navakammaṃ karontā
aṭṭakaṃ bandhanti . aññataro bhikkhu maraṇādhippāyo aññataraṃ bhikkhuṃ
etadavoca āvuso atra ṭhito bandhāhīti . so tatra ṭhito bandhanto
paripatitvā kālamakāsi .pe. paripatitvā na kālamakāsi . tassa
kukkuccaṃ ahosi .pe. anāpatti bhikkhu pārājikassa āpatti
thullaccayassāti.
[212] Tena kho pana samayena aññataro bhikkhu vihāraṃ chādetvā
Otarati . aññataro bhikkhu taṃ bhikkhuṃ etadavoca āvuso ito
otarāhīti . so tena otaranto paripatitvā kālamakāsi . tassa
kukkuccaṃ ahosi .pe. Anāpatti bhikkhu namaraṇādhippāyassāti.
{212.1} Tena kho pana samayena aññataro bhikkhu vihāraṃ chādetvā
otarati . aññataro bhikkhu maraṇādhippāyo taṃ bhikkhuṃ etadavoca āvuso
ito otarāhīti . so tena otaranto paripatitvā kālamakāsi .pe.
Paripatitvā na kālamakāsi . tassa kukkuccaṃ ahosi .pe. anāpatti
bhikkhu pārājikassa āpatti thullaccayassāti.
[213] Tena kho pana samayena aññataro bhikkhu anabhiratiyā
pīḷito gijjhakūṭaṃ abhirūhitvā papāte papatanto aññataraṃ vilīvakāraṃ
ottharitvā māresi . tassa kukkuccaṃ ahosi .pe. anāpatti
bhikkhu pārājikassa na ca bhikkhave attānaṃ pātetabbaṃ yo pāteyya
āpatti dukkaṭassāti.
{213.1} Tena kho pana samayena chabbaggiyā bhikkhū gijjhakūṭaṃ
pabbataṃ abhirūhitvā davāya silaṃ pavijjhiṃsu . sā 1- aññataraṃ
gopālakaṃ ottharitvā māresi 2- . tesaṃ kukkuccaṃ ahosi
.pe. anāpatti bhikkhave pārājikassa na ca bhikkhave davāya
silā pavijjhitabbā yo pavijjheyya āpatti dukkaṭassāti.
[214] Tena kho pana samayena aññataro bhikkhu gilāno
@Footnote: 1 yuropiyamarammapotthakesu ayaṃ pāṭho na dissati. rāmaññapotthake
@pana silāti dissati. 2 Yu. Ma. māresuṃ.
Hoti . taṃ bhikkhū sedesuṃ . so bhikkhu kālamakāsi . tesaṃ
kukkuccaṃ ahosi .pe. Anāpatti bhikkhave namaraṇādhippāyassāti.
{214.1} Tena kho pana samayena aññataro bhikkhu gilāno hoti. Taṃ
bhikkhū maraṇādhippāyā sedesuṃ . so bhikkhu kālamakāsi .pe. So bhikkhu
na kālamakāsi . tesaṃ kukkuccaṃ ahosi .pe. anāpatti bhikkhave
pārājikassa āpatti thullaccayassāti.
{214.2} Tena kho pana samayena aññatarassa bhikkhuno sīsābhitāpo
hoti . tassa bhikkhū natthuṃ adaṃsu. So bhikkhu kālamakāsi. Tesaṃ kukkuccaṃ
ahosi .pe. anāpatti bhikkhave namaraṇādhippāyassāti . tena kho
pana samayena aññatarassa bhikkhuno sīsābhitāpo hoti . tassa bhikkhū
maraṇādhippāyā natthuṃ adaṃsu . so bhikkhu kālamakāsi. .pe. So bhikkhu
na kālamakāsi . tesaṃ kukkuccaṃ ahosi .pe. anāpatti bhikkhave
pārājikassa āpatti thullaccayassāti.
{214.3} Tena kho pana samayena aññataro bhikkhu gilāno hoti.
Taṃ bhikkhū sambāhesuṃ . so bhikkhu kālamakāsi . tesaṃ kukkuccaṃ ahosi
.pe. anāpatti bhikkhave namaraṇādhippāyassāti . tena kho pana
samayena aññataro bhikkhu gilāno hoti . taṃ bhikkhū maraṇādhippāyā
sambāhesuṃ . so bhikkhu kālamakāsi .pe. so bhikkhu na kālamakāsi.
Tesaṃ kukkuccaṃ ahosi .pe. anāpatti bhikkhave pārājikassa
āpatti thullaccayassāti . tena kho pana samayena
Aññataro bhikkhu gilāno hoti . taṃ bhikkhū nahāpesuṃ . so bhikkhu
kālamakāsi . tesaṃ kukkuccaṃ ahosi .pe. anāpatti bhikkhave
namaraṇādhippāyassāti.
{214.4} Tena kho pana samayena aññataro bhikkhu gilāno
hoti . taṃ bhikkhū maraṇādhippāyā nahāpesuṃ . so bhikkhu kālamakāsi
.pe. so bhikkhu na kālamakāsi . tesaṃ kukkuccaṃ ahosi .pe.
Anāpatti bhikkhave pārājikassa āpatti thullaccayassāti .
Tena kho pana samayena aññataro bhikkhu gilāno hoti . taṃ bhikkhū
telena abbhañjiṃsu . so bhikkhu kālamakāsi . tesaṃ kukkuccaṃ
ahosi .pe. anāpatti bhikkhave namaraṇādhippāyassāti .
Tena kho pana samayena aññataro bhikkhu gilāno hoti . taṃ bhikkhū
maraṇādhippāyā telena abbhañjiṃsu . so bhikkhu kālamakāsi .pe.
So bhikkhu na kālamakāsi . tesaṃ kukkuccaṃ ahosi .pe. anāpatti
bhikkhave pārājikassa āpatti thullaccayassāti.
{214.5} Tena kho pana samayena aññataro bhikkhu gilāno hoti.
Taṃ bhikkhū uṭṭhāpesuṃ . so bhikkhu kālamakāsi . tesaṃ kukkuccaṃ ahosi
.pe. anāpatti bhikkhave namaraṇādhippāyassāti . tena kho pana
samayena aññataro bhikkhu gilāno hoti . taṃ bhikkhū maraṇādhippāyā
uṭṭhāpesuṃ . so bhikkhu kālamakāsi .pe. So bhikkhu na kālamakāsi. Tesaṃ
kukkuccaṃ ahosi .pe. anāpatti bhikkhave pārājikassa āpatti
Thullaccayassāti.
{214.6} Tena kho pana samayena aññataro bhikkhu gilāno hoti.
Taṃ bhikkhū nipātesuṃ . so bhikkhu kālamakāsi. Tesaṃ kukkuccaṃ ahosi .pe.
Anāpatti bhikkhave namaraṇādhippāyassāti . tena kho pana samayena
aññataro bhikkhu gilāno hoti . taṃ bhikkhū maraṇādhippāyā nipātesuṃ.
So bhikkhu kālamakāsi .pe. so bhikkhu na kālamakāsi . tesaṃ
kukkuccaṃ ahosi .pe. anāpatti bhikkhave pārājikassa āpatti
thullaccayassāti . tena kho pana samayena aññataro bhikkhu gilāno
hoti . tassa bhikkhū annaṃ adaṃsu . so bhikkhu kālamakāsi . tesaṃ
kukkuccaṃ ahosi .pe. Anāpatti bhikkhave namaraṇādhippāyassāti.
{214.7} Tena kho pana samayena aññataro bhikkhu gilāno
hoti . tassa bhikkhū maraṇādhippāyā annaṃ adaṃsu . so bhikkhu
kālamakāsi .pe. so bhikkhu na kālamakāsi . tesaṃ kukkuccaṃ ahosi
.pe. anāpatti bhikkhave pārājikassa āpatti thullaccayassāti .
Tena kho pana samayena aññataro bhikkhu gilāno hoti . tassa
bhikkhū pānaṃ adaṃsu . so bhikkhu kālamakāsi . tesaṃ kukkuccaṃ
ahosi .pe. anāpatti bhikkhave namaraṇādhippāyassāti . tena
kho pana samayena aññataro bhikkhu gilāno hoti . tassa bhikkhū
maraṇādhippāyā pānaṃ adaṃsu . so bhikkhu kālamakāsi .pe.
So bhikkhu na kālamakāsi . tesaṃ kukkuccaṃ ahosi .pe. anāpatti
Bhikkhave pārājikassa āpatti thullaccayassāti.
[215] Tena kho pana samayena aññatarā itthī pavutthapatikā
jārena gabbhinī hoti . sā kulūpakaṃ bhikkhuṃ etadavoca iṅghayya
gabbhapātanaṃ jānāhīti . suṭṭhu bhaginīti tassā gabbhapātanaṃ adāsi .
Dārako kālamakāsi . tassa kukkuccaṃ ahosi .pe. āpattiṃ tvaṃ
bhikkhu āpanno pārājikanti.
{215.1} Tena kho pana samayena aññatarassa purisassa dve
pajāpatiyo honti ekā vañjhā ekā vijāyinī . vañjhā itthī
kulūpakaṃ bhikkhuṃ etadavoca sace sā bhante vijāyissati sabbassa kuṭumbassa
issarā bhavissati iṅghayya tassā gabbhapātanaṃ jānāhīti . suṭṭhu bhaginīti
tassā gabbhapātanaṃ adāsi . dārako kālamakāsi . mātā na
kālamakāsi . tassa kukkuccaṃ ahosi .pe. āpattiṃ tvaṃ bhikkhu āpanno
pārājikanti.
{215.2} Tena kho pana samayena aññatarassa purisassa dve
pajāpatiyo honti ekā vañjhā ekā vijāyinī . vañjhā itthī
kulūpakaṃ bhikkhuṃ etadavoca sace sā bhante vijāyissati sabbassa
kuṭumbassa issarā bhavissati iṅghayya tassā gabbhapātanaṃ jānāhīti .
Suṭṭhu bhaginīti tassā gabbhapātanaṃ adāsi . mātā kālamakāsi .
Dārako na kālamakāsi . tassa kukkuccaṃ ahosi .pe. anāpatti
bhikkhu pārājikassa āpatti thullaccayassāti . tena kho pana
samayena aññatarassa purisassa dve pajāpatiyo honti ekā
Vañjhā ekā vijāyinī . vañjhā itthī kulūpakaṃ bhikkhuṃ etadavoca
sace sā bhante vijāyissati sabbassa kuṭumbassa issarā bhavissati
iṅghayya tassā gabbhapātanaṃ jānāhīti . suṭṭhu bhaginīti tassā
gabbhapātanaṃ adāsi . ubho kālamakaṃsu .pe. ubho na kālamakaṃsu .
Tassa kukkuccaṃ ahosi .pe. anāpatti bhikkhu pārājikassa āpatti
thullaccayassāti.
{215.3} Tena kho pana samayena aññatarā gabbhinī
itthī kulūpakaṃ bhikkhuṃ etadavoca iṅghayya gabbhapātanaṃ jānāhīti .
Tenahi bhagini maddassūti . sā madditvā gabbhaṃ pātesi . tassa
kukkuccaṃ ahosi .pe. Āpattiṃ tvaṃ bhikkhu āpanno pārājikanti.
{215.4} Tena kho pana samayena aññatarā gabbhinī itthī kulūpakaṃ bhikkhuṃ
etadavoca iṅghayya gabbhapātanaṃ jānāhīti . tenahi bhagini tāpehīti.
Sā tāpetvā gabbhaṃ pātesi . tassa kukkuccaṃ ahosi .pe. Āpattiṃ
tvaṃ bhikkhu āpanno pārājikanti . tena kho pana samayena aññatarā
vañjhā itthī kulūpakaṃ bhikkhuṃ etadavoca iṅghayya bhesajjaṃ jānāhi
yenāhaṃ vijāyeyyanti . suṭṭhu bhaginīti tassā bhesajjaṃ adāsi . Sā
kālamakāsi . kukkuccaṃ ahosi .pe. anāpatti bhikkhu pārājikassa
āpatti dukkaṭassāti.
{215.5} Tena kho pana samayena aññatarā vijāyinī itthī kulūpakaṃ bhikkhuṃ
etadavoca iṅghayya bhesajjaṃ jānāhi yenāhaṃ na vijāyeyyanti. Suṭṭhu bhaginīti
tassā bhesajjaṃ adāsi . sā kālamakāsi. Tassa kukkuccaṃ ahosi .pe.
Anāpatti bhikkhu pārājikassa āpatti dukkaṭassāti.
[216] Tena kho pana samayena chabbaggiyā bhikkhū sattarasavaggiyaṃ
bhikkhuṃ aṅgulipatodakena hāsesuṃ . so bhikkhu uttasanto 1- anassāsako
kālamakāsi . tesaṃ kukkuccaṃ ahosi .pe. Anāpatti bhikkhave pārājikassa
āpatti pācittiyassāti 2-.
[217] Tena kho pana samayena sattarasavaggiyā bhikkhū chabbaggiyaṃ
bhikkhuṃ kammaṃ karissāmāti ottharitvā māresuṃ . tesaṃ kukkuccaṃ ahosi
.pe. Anāpatti bhikkhave pārājikassa āpatti pācittiyassāti 3-.
[218] Tena kho pana samayena aññataro bhūtavejjako bhikkhu
yakkhaṃ jīvitā voropesi . tassa kukkuccaṃ ahosi .pe. anāpatti
bhikkhu pārājikassa āpatti thullaccayassāti.
[219] Tena kho pana samayena aññataro bhikkhu aññataraṃ bhikkhuṃ
vāḷayakkhaṃ vihāraṃ pāhesi . taṃ yakkhā jīvitā voropesuṃ . tassa
kukkuccaṃ ahosi .pe. Anāpatti bhikkhu namaraṇādhippāyassāti.
{219.1} Tena kho pana samayena aññataro bhikkhu maraṇādhippāyo
aññataraṃ bhikkhuṃ vāḷayakkhaṃ vihāraṃ pāhesi. Taṃ yakkhā jīvitā voropesuṃ.
.pe. Taṃ yakkhā na jīvitā voropesuṃ . tassa kukkuccaṃ ahosi .pe.
Anāpatti bhikkhu pārājikassa āpatti thullaccayassāti.
{219.2} Tena kho pana samayena aññataro bhikkhu aññataraṃ bhikkhuṃ vāḷakantāraṃ
@Footnote: 1 Yu. Ma. uttanto. 2-3 Yu. Ma. anāpatti bhikkhave pārājikassāti.
Pāhesi . taṃ vāḷā jīvitā voropesuṃ . tassa kukkuccaṃ ahosi
.pe. Anāpatti bhikkhu namaraṇādhippāyassāti.
{219.3} Tena kho pana samayena aññataro bhikkhu maraṇādhippāyo
aññataraṃ bhikkhuṃ vāḷakantāraṃ pāhesi . Taṃ vāḷā jīvitā voropesuṃ .pe.
Taṃ vāḷā jīvitā na voropesuṃ . tassa kukkuccaṃ ahosi .pe.
Anāpatti bhikkhu pārājikassa āpatti thullaccayassāti.
{219.4} Tena kho pana samayena aññataro bhikkhu aññataraṃ bhikkhuṃ
corakantāraṃ pāhesi . Taṃ corā jīvitā voropesuṃ. Tassa kukkuccaṃ ahosi
.pe. Anāpatti bhikkhu namaraṇādhippāyassāti.
{219.5} Tena kho pana samayena aññataro bhikkhu maraṇādhippāyo
aññataraṃ bhikkhuṃ corakantāraṃ pāhesi . taṃ corā jīvitā voropesuṃ
.pe. taṃ corā na jīvitā voropesuṃ. Tassa kukkuccaṃ ahosi. Anāpatti
bhikkhu pārājikassa āpatti thullaccayassāti.
[220] Tena kho pana samayena aññataro bhikkhu taṃ maññamāno
taṃ jīvitā voropesi . taṃ maññamāno aññaṃ jīvitā voropesi .
Aññaṃ maññamāno taṃ jīvitā voropesi . aññaṃ maññamāno
aññaṃ jīvitā voropesi . tassa kukkuccaṃ ahosi .pe. āpattiṃ
tvaṃ bhikkhu āpanno pārājikanti.
[221] Tena kho pana samayena aññataro bhikkhu amanussena
gahito hoti . aññataro bhikkhu tassa bhikkhuno pahāraṃ adāsi .
So bhikkhu kālamakāsi . tassa kukkuccaṃ ahosi .pe. anāpatti
Bhikkhu namaraṇādhippāyassāti.
{221.1} Tena kho pana samayena aññataro bhikkhu amanussena
gahito hoti . aññataro bhikkhu maraṇādhippāyo tassa bhikkhuno pahāraṃ
adāsi . so bhikkhu kālamakāsi .pe. so bhikkhu na kālamakāsi. Tassa
kukkuccaṃ ahosi .pe. anāpatti bhikkhu pārājikassa āpatti
thullaccayassāti.
[222] Tena kho pana samayena aññataro bhikkhu kalyāṇakammassa
saggakathaṃ kathesi . so adhimutto kālamakāsi . tassa kukkuccaṃ
ahosi .pe. anāpatti bhikkhu namaraṇādhippāyassāti . tena
kho pana samayena aññataro bhikkhu maraṇādhippāyo kalyāṇakammassa
saggakathaṃ kathesi . so adhimutto kālamakāsi .pe. so adhimutto
na kālamakāsi . tassa kukkuccaṃ ahosi .pe. anāpatti bhikkhu
pārājikassa āpatti thullaccayassāti.
{222.1} Tena kho pana samayena aññataro bhikkhu nerayikassa
nirayakathaṃ kathesi . so uttasitvā kālamakāsi . tassa kukkuccaṃ ahosi
.pe. Anāpatti bhikkhu namaraṇādhippāyassāti.
{222.2} Tena kho pana samayena aññataro bhikkhu maraṇādhippāyo
nerayikassa nirayakathaṃ kathesi . so uttasitvā kālamakāsi .pe. so
uttasitvā na kālamakāsi . tassa kukkuccaṃ ahosi .pe. anāpatti
bhikkhu pārājikassa āpatti thullaccayassāti.
[223] Tena kho pana samayena āḷavikā bhikkhū navakammaṃ
karontā rukkhaṃ chindanti . aññataro bhikkhu aññataraṃ bhikkhuṃ
Etadavoca āvuso atra ṭhito chindāhīti . taṃ tatra ṭhitaṃ chindantaṃ
rukkho ottharitvā māresi . tassa kukkuccaṃ ahosi .pe. Anāpatti
bhikkhu namaraṇādhippāyassāti.
{223.1} Tena kho pana samayena āḷavikā bhikkhū navakammaṃ karontā
rukkhaṃ chindanti . aññataro bhikkhu maraṇādhippāyo aññataraṃ bhikkhuṃ
etadavoca āvuso atra ṭhito chindāhīti . Taṃ tatra ṭhitaṃ chindantaṃ rukkho
ottharitvā māresi .pe. rukkho ottharitvā na māresi . tassa
kukkuccaṃ ahosi .pe. anāpatti bhikkhu pārājikassa āpatti
thullaccayassāti.
[224] Tena kho pana samayena chabbaggiyā bhikkhū dāyaṃ ālimpesuṃ.
Manussā daḍḍhā kālamakaṃsu . tesaṃ kukkuccaṃ ahosi .pe. anāpatti
bhikkhave namaraṇādhippāyassāti.
{224.1} Tena kho pana samayena chabbaggiyā bhikkhū maraṇādhippāyā
dāyaṃ ālimpesuṃ . manussā daḍḍhā kālamakaṃsu .pe. manussā daḍḍhā
na kālamakaṃsu . tesaṃ kukkuccaṃ ahosi .pe. Anāpatti bhikkhave pārājikassa
āpatti thullaccayassāti.
[225] Tena kho pana samayena aññataro bhikkhu āghātanaṃ
gantvā coraghātakaṃ etadavoca āvuso māyimaṃ kilamesi ekena
pahārena jīvitā voropehīti . suṭṭhu bhanteti ekena pahārena
jīvitā voropesi . tassa kukkuccaṃ ahosi .pe. āpattiṃ tvaṃ
bhikkhu āpanno pārājikanti . tena kho pana samayena aññataro
bhikkhu āghātanaṃ gantvā coraghātaṃ etadavoca āvuso māyimaṃ
Kilamesi ekena pahārena jīvitā voropehīti . so nāhaṃ tuyhaṃ
vacanaṃ karissāmīti taṃ jīvitā voropesi . tassa kukkuccaṃ ahosi
.pe. Anāpatti bhikkhu pārājikassa āpatti dukkaṭassāti.
[226] Tena kho pana samayena aññataro puriso kulaghare 1-
hatthapādacchinno ñātakehi samparikiṇṇo hoti . aññataro
bhikkhu te manusse etadavoca āvuso icchatha imassa maraṇanti .
Āma bhante icchāmāti . tenahi takkaṃ pāyethāti . te taṃ
takkaṃ pāyesuṃ . so kālamakāsi . tassa kukkuccaṃ ahosi .pe.
Āpattiṃ tvaṃ bhikkhu āpanno pārājikanti.
{226.1} Tena kho pana samayena aññataro puriso kulaghare
hatthapādacchinno ñātakehi samparikiṇṇo hoti . aññatarā
bhikkhunī te manusse etadavoca āvuso icchatha imassa maraṇanti .
Āmayye icchāmāti . tenahi loṇasocirakaṃ 2- pāyethāti . Te taṃ
loṇasocirakaṃ pāyesuṃ . so kālamakāsi . tassā kukkuccaṃ ahosi.
Athakho sā bhikkhunī bhikkhunīnaṃ etamatthaṃ ārocesi . bhikkhuniyo bhikkhūnaṃ
etamatthaṃ ārocesuṃ . bhikkhū bhagavato etamatthaṃ ārocesuṃ. Āpattiṃ
sā bhikkhave bhikkhunī āpannā pārājikanti.
Tatiyapārājikaṃ niṭṭhitaṃ.
------------
@Footnote: 1 Yu. Ma. ñātighare. 2-3 Yu. Ma. loṇasucīrakaṃ.
Catutthapārājikakaṇḍaṃ
[227] Tena samayena buddho bhagavā vesāliyaṃ viharati mahāvane
kūṭāgārasālāyaṃ . tena kho pana samayena sambahulā sandiṭṭhā
sambhattā bhikkhū vaggumudāya nadiyā tīre vassaṃ upagacchiṃsu . tena
kho pana samayena vajjī dubbhikkhā hoti dvīhitikā setaṭṭhikā
salākāvuttā na sukarā uñchena paggahena yāpetuṃ . athakho tesaṃ
bhikkhūnaṃ etadahosi etarahi kho vajjī dubbhikkhā dvīhitikā setaṭṭhikā
salākāvuttā na sukarā uñchena paggahena yāpetuṃ kena nu kho
mayaṃ upāyena samaggā sammodamānā avivadamānā phāsukaṃ vassaṃ
vaseyyāma na ca piṇḍakena kilameyyāmāti.
{227.1} Ekacce evamāhaṃsu handa mayaṃ āvuso gihīnaṃ kammantaṃ
adhiṭṭhema evante amhākaṃ dātuṃ maññissanti evaṃ mayaṃ samaggā
sammodamānā avivadamānā phāsukaṃ vassaṃ vasissāma na ca piṇḍakena
kilamissāmāti . ekacce evamāhaṃsu alaṃ āvuso kiṃ gihīnaṃ kammantaṃ
adhiṭṭhitena handa mayaṃ āvuso gihīnaṃ dūteyyaṃ harāma evante amhākaṃ
dātuṃ maññissanti evaṃ mayaṃ samaggā sammodamānā avivadamānā phāsukaṃ
vassaṃ vasissāma na ca piṇḍakena kilamissāmāti. Ekacce evamāhaṃsu alaṃ
āvuso kiṃ gihīnaṃ kammantaṃ adhiṭṭhitena kiṃ gihīnaṃ dūteyyaṃ haṭena 1- handa
@Footnote: 1 haraṇenātipi pāṭho.
Mayaṃ āvuso gihīnaṃ aññamaññassa uttarimanussadhammassa vaṇṇaṃ
bhāsissāma asuko bhikkhu paṭhamassa jhānassa lābhī asuko bhikkhu
dutiyassa jhānassa lābhī asuko bhikkhu tatiyassa jhānassa lābhī
asuko bhikkhu catutthassa jhānassa lābhī asuko bhikkhu sotāpanno
asuko bhikkhu sakadāgāmī asuko bhikkhu anāgāmī asuko bhikkhu
arahā asuko bhikkhu tevijjo asuko bhikkhu chaḷabhiññoti evante
amhākaṃ dātuṃ maññissanti evaṃ mayaṃ samaggā sammodamānā
avivadamānā phāsukaṃ vassaṃ vasissāma na ca piṇḍakena kilamissāmāti .
Esoyeva kho āvuso seyyo yo amhākaṃ gihīnaṃ aññamaññassa
uttarimanussadhammassa vaṇṇo bhāsitoti.
{227.2} Athakho te bhikkhū gihīnaṃ aññamaññassa uttarimanussadhammassa
vaṇṇaṃ bhāsiṃsu asuko bhikkhu paṭhamassa jhānassa lābhī .pe. asuko bhikkhu
catutthassa jhānassa lābhī asuko bhikkhu sotāpanno .pe. asuko bhikkhu
chaḷabhiññoti . athakho te manussā lābhā vata no suladdhaṃ vata no yesaṃ
no evarūpā bhikkhū vassaṃ upagatā na vata no ito pubbe evarūpā
bhikkhū vassaṃ upagatā yathayime bhikkhū sīlavanto kalyāṇadhammāti .
Te 1- na 2- tādisāni bhojanāni attanā bhuñjanti na mātāpitūnaṃ
denti na puttadārassa denti na dāsakammakaraporisassa denti na
mittāmaccānaṃ denti na ñātisālohitānaṃ denti yādisāni
@Footnote: 1-2 Yu. Ma. potthakesu ayaṃ pāṭho sabbattha vāresu āgato.
Bhikkhūnaṃ denti na tādisāni khādanīyāni attanā khādanti na
mātāpitūnaṃ denti .pe. na ñātisālohitānaṃ denti yādisāni
bhikkhūnaṃ denti na 1- tādisāni sāyanīyāni attanā sāyanti na
mātāpitūnaṃ denti .pe. na ñātisālohitānaṃ denti yādisāni
bhikkhūnaṃ denti na 2- tādisāni pānāni attanā pivanti na mātāpitūnaṃ
denti na puttadārassa denti na dāsakammakaraporisassa
denti na mittāmaccānaṃ denti na ñātisālohitānaṃ denti
yādisāni bhikkhūnaṃ denti . athakho te bhikkhū vaṇṇavanto ahesuṃ
pīnindriyā pasannamukhavaṇṇā vippasannacchavivaṇṇā.
{227.3} Āciṇṇaṃ kho panetaṃ vassaṃ vutthānaṃ bhikkhūnaṃ bhagavantaṃ
dassanāya upasaṅkamituṃ . athakho te bhikkhū vassaṃ vutthā temāsaccayena
senāsanaṃ saṃsāmetvā pattacīvaramādāya yena vesālī tena pakkamiṃsu
anupubbena cārikaṃ 3- caramānā 4- yena vesālī yena mahāvanaṃ yena
kūṭāgārasālā yena bhagavā tenupasaṅkamiṃsu upasaṅkamitvā bhagavantaṃ
abhivādetvā ekamantaṃ nisīdiṃsu.
The Pali Tipitaka in Roman Character Volume 1 page 147-167.
http://84000.org/tipitaka/read/roman_item_s.php?book=1&item=203&items=25
Classified by [Item Number] :-
http://84000.org/tipitaka/read/roman_item_s.php?book=1&item=203&items=25&mode=bracket
Compare with The Pali Tipitaka in Thai Character :-
http://84000.org/tipitaka/read/pali_item_s.php?book=1&item=203&items=25
Compare with The Royal Version of Thai Tipitaka :-
http://84000.org/tipitaka/read/byitem_s.php?book=1&item=203&items=25
Study Atthakatha :-
http://84000.org/tipitaka/attha/attha.php?b=1&i=203
The Pali Atthakatha in Thai :-
http://84000.org/tipitaka/atthapali/read_th.php?B=1&A=11910
The Pali Atthakatha in Roman :-
http://84000.org/tipitaka/atthapali/read_rm.php?B=1&A=11910
Contents of The Tipitaka Volume 1
http://84000.org/tipitaka/read/?index_1
บันทึก ๑๔ พฤศจิกายน พ.ศ. ๒๕๖๐.
การแสดงผลนี้อ้างอิงข้อมูลจากพระไตรปิฎกฉบับภาษาบาลี อักษรโรมัน.
หากพบข้อผิดพลาด กรุณาแจ้งได้ที่ [email protected]
