paliTIPITAKA Volume 2 - Vinaya Pitaka 2

[575] Tena samayena buddho bhagavā cetiyesu cārikaṃ caramāno yena bhaddavatikā tena pāyāsi . addasaṃsu kho gopālakā pasupālakā kasakā ^1- pathāvino bhagavantaṃ durato va āgacchantaṃ disvāna bhagavantaṃ etadavocuṃ mā kho bhante bhagavā ambatitthaṃ agamāsi ambatitthe bhante jaṭilassa assame nāgo paṭivasati iddhimā āsīviso ^2- ghoraviso so bhagavantaṃ mā viheṭhesīti . evaṃ vutte bhagavā tuṇhī ahosi . dutiyampi kho .pe. tatiyampi kho gopālakā pasupālakā kasakā ^3- pathāvino bhagavantaṃ etadavocuṃ mā kho bhante bhagavā ambatitthaṃ agamāsi ambatitthe bhante jaṭilassa assame nāgo paṭivasati iddhimā āsīviso ^4- ghoraviso so bhagavantaṃ mā viheṭhesīti. Tatiyampi kho bhagavā tuṇhī ahosi. {575.1} Athakho bhagavā anupubbena cārikaṃ caramāno yena bhaddavatikā tadavasari . tatra sudaṃ bhagavā bhaddavatikāyaṃ viharati . Athakho āyasmā sāgato yena ambatitthaṃ ^5- jaṭilassa assamo tenupasaṅkami upasaṅkamitvā agyāgāraṃ pavisitvā tiṇasanthārakaṃ paññāpetvānisīdi ^6- pallaṅkaṃ ābhujitvā ujuṃ kāyaṃ paṇidhāya parimukhaṃ satiṃ upaṭṭhapetvā . addasā kho so nāgo āyasmantaṃ sāgataṃ @Footnote: ^1-3 Ma. kassakā . 2-4 Ma. āsiviso . ⁵ Ma. ambatitthassa. Sī. Yu. @ambatitthakassa . ⁶ Ma. paññapetvā.

--------------------------------------------------------------------------------------------- page383.

Paviṭṭhaṃ disvāna dukkhī ^1- dummano padhūpāsi ^2- . Āyasmāpi sāgato padhūpāsi ^2- . athakho so nāgo makkhaṃ asahamāno pajjali . Āyasmāpi sāgato tejodhātuṃ samāpajjitvā pajjali . athakho āyasmā sāgato tassa nāgassa tejasā tejaṃ pariyādayitvā ^3- yena bhaddavatikā tenupasaṅkami . athakho bhagavā bhaddavatikāyaṃ yathābhirantaṃ viharitvā yena kosambī tena cārikaṃ pakkāmi . Assosuṃ kho kosambikā upāsakā ayyo kira sāgato ambatitthakena nāgena saddhiṃ saṅgāmesīti. {575.2} Athakho bhagavā anupubbena cārikaṃ caramāno yena kosambī tadavasari . athakho kosambikā upāsakā bhagavato paccuggamanaṃ karitvā yenāyasmā sāgato tenupasaṅkamiṃsu upasaṅkamitvā āyasmantaṃ sāgataṃ abhivādetvā ekamantaṃ aṭṭhaṃsu . ekamantaṃ ṭhitā kho kosambikā upāsakā āyasmantaṃ sāgataṃ etadavocuṃ kiṃ bhante ayyānaṃ dullabhañca manāpañca kiṃ paṭiyādemāti . Evaṃ vutte chabbaggiyā bhikkhū kosambike upāsake etadavocuṃ atthāvuso kāpotikā nāma pasannā bhikkhūnaṃ dullabhā ca manāpā ca taṃ paṭiyādethāti . athakho kosambikā upāsakā ghare ghare kāpotikaṃ pasannaṃ paṭiyādetvā ^4- āyasmantaṃ sāgataṃ piṇḍāya carantaṃ ^5- disvāna āyasmantaṃ sāgataṃ etadavocuṃ pivatu bhante ayyo sāgato kāpotikaṃ pasannaṃ @Footnote: ¹ Ma. ayaṃ pāṭho natthi . ² Ma. padhūpāyi . ³ Ma. pariyādiyitvā . ⁴ ito paraṃ @addasaṃsūti pāṭhena bhavitabbaṃ . ⁵ Ma. Yu. paviṭṭhaṃ.

--------------------------------------------------------------------------------------------- page384.

Pivatu bhante ayyo sāgato kāpotikaṃ pasannanti . athakho āyasmā sāgato ghare ghare kāpotikaṃ pasannaṃ pivitvā nagaramhā nikkhamanto nagaradvāre paripati. {575.3} Athakho bhagavā sambahulehi bhikkhūhi saddhiṃ nagaramhā nikkhamanto addasa āyasmantaṃ sāgataṃ nagaradvāre paripatitaṃ disvāna bhikkhū āmantesi gaṇhatha bhikkhave sāgatanti . Evaṃ bhanteti kho te bhikkhū bhagavato paṭissuṇitvā āyasmantaṃ sāgataṃ ārāmaṃ netvā yena bhagavā tena sīsaṃ katvā nipātesuṃ . Athakho āyasmā sāgato parivattitvā yena bhagavā tena pāde katvā seyyaṃ kappesi . athakho bhagavā bhikkhū āmantesi nanu bhikkhave sāgato tathāgate sagāravo ahosi sappatissoti . evaṃ bhante . Api nu kho bhikkhave sāgato etarahi tathāgate sagāravo sappatissoti . no hetaṃ bhante . nanu bhikkhave sāgato ambatitthakena nāgena saṅgāmesīti . evaṃ bhante . api nu kho bhikkhave sāgato etarahi pahoti deḍḍubhenapi ^1- saddhiṃ saṅgāmetunti . no hetaṃ bhante . api nu kho bhikkhave taṃ pātabbaṃ yaṃ pivitvā visaññī assāti . no hetaṃ bhante . Ananucchavikaṃ bhikkhave sāgatassa ananulomikaṃ appaṭirūpaṃ assāmaṇakaṃ akappiyaṃ akaraṇīyaṃ kathaṃ hi nāma bhikkhave sāgato majjaṃ pivissati netaṃ bhikkhave appasannānaṃ vā pasādāya pasannānaṃ vā bhiyyobhāvāya .pe. @Footnote: ¹ Ma. Yu. nāgena.

--------------------------------------------------------------------------------------------- page385.

Evañca pana bhikkhave imaṃ sikkhāpadaṃ uddiseyyātha {575.4} surāmerayapāne pācittiyanti. [576] Surā nāma piṭṭhasurā pūvasurā odanasurā kiṇṇapakkhittā sambhārasaṃyuttā . merayo nāma pupphāsavo phalāsavo madhvāsavo guḷāsavo sambhārasaṃyutto . piveyyāti ^1- antamaso kusaggenapi pivati āpatti pācittiyassa. [577] Majje majjasaññī pivati āpatti pācittiyassa . Majje vematiko pivati āpatti pācittiyassa . majje amajjasaññī pivati āpatti pācittiyassa . amajje majjasaññī āpatti dukkaṭassa . amajje vematiko āpatti dukkaṭassa . amajje amajjasaññī anāpatti. [578] Anāpatti amajjañca hoti majjavaṇṇaṃ majjagandhaṃ majjarasaṃ taṃ pivati sūpasaṃpāke maṃsasaṃpāke telasaṃpāke āmalakaphāṇite amajjaṃ ariṭṭhaṃ pivati ummattakassa ādikammikassāti. Paṭhamasikkhāpadaṃ niṭṭhitaṃ. -------- @Footnote: ¹ ayaṃ pāṭho vicāretabbo mātikāyaṃ anāgatattā.

--------------------------------------------------------------------------------------------- page386.

Dutiyasikkhāpadaṃ