Vinayapiṭake mahāvaggassa
dutiyo bhāgo
----------
cammakkhandhakaṃ
[1] Tena samayena buddho bhagavā rājagahe viharati gijjhakūṭe
pabbate . tena kho pana samayena rājā māgadho seniyo bimbisāro
asītiyā gāmikasahassesu 1- issariyādhipaccaṃ 2- rajjaṃ kāreti .
Tena kho pana samayena campāyaṃ soṇo nāma koḷiviso seṭṭhiputto
sukhumālo hoti . tassa pādatalesu lomāni jātāni honti .
Athakho rājā māgadho seniyo bimbisāro tāni asītiṃ gāmikasahassāni
sannipātāpetvā kenacideva karaṇīyena soṇassa koḷivisassa santike
dūtaṃ pāhesi āgacchatu soṇo icchāmi soṇassa āgatanti.
{1.1} Athakho soṇassa koḷivisassa mātāpitaro soṇaṃ koḷivisaṃ
etadavocuṃ rājā te tāta soṇa pāde dakkhitukāmo mā kho tvaṃ
tāta soṇa yena rājā tena pāde abhippasāreyyāsi rañño purato
pallaṅkena nisīda nisinnassa te rājā pāde dakkhissatīti . athakho
soṇaṃ koḷivisaṃ sivikāya ānesuṃ . athakho soṇo koḷiviso yena rājā
māgadho seniyo bimbisāro tenupasaṅkami upasaṅkamitvā rājānaṃ
māgadhaṃ seniyaṃ bimbisāraṃ abhivādetvā rañño purato pallaṅkena nisīdi.
@Footnote: 1 Ma. Yu. gāmasahassesu. 2 Ma. Yu. issarādhipaccaṃ.
Addasā 1- kho rājā māgadho seniyo bimbisāro soṇassa koḷivisassa
pādatalesu lomāni jātāni . [2]- athakho rājā māgadho seniyo
bimbisāro tāni asītiṃ gāmikasahassāni diṭṭhadhammike atthe anusāsitvā
uyyojesi tumhe khvattha bhaṇe mayā diṭṭhadhammike atthe anusāsitā
gacchatha bhagavantaṃ 3- payirūpāsatha so no bhagavā samparāyike atthe
anusāsissatīti . athakho tāni asīti gāmikasahassāni yena gijjhakūṭo
pabbato tenupasaṅkamiṃsu.
{1.2} Tena kho pana samayena āyasmā sāgato bhagavato upaṭṭhāko
hoti . athakho tāni asīti gāmikasahassāni yenāyasmā sāgato
tenupasaṅkamiṃsu upasaṅkamitvā āyasmantaṃ sāgataṃ etadavocuṃ imāni
bhante asīti gāmikasahassāni idhūpasaṅkantāni 4- bhagavantaṃ dassanāya
sādhu mayaṃ bhante labheyyāma bhagavantaṃ dassanāyāti . tenahi tumhe
āyasmanto muhuttaṃ idheva tāva hotha yāvāhaṃ bhagavantaṃ paṭivedemīti.
Athakho āyasmā sāgato tesaṃ asītiyā gāmikasahassānaṃ purato
pekkhamānānaṃ pāṭikāya nimmujjitvā bhagavato purato ummujjitvā
bhagavantaṃ etadavoca imāni bhante asīti gāmikasahassāni
idhūpasaṅkantāni 5- bhagavantaṃ dassanāya yassadāni bhante
bhagavā kālaṃ maññatīti . tenahi tvaṃ sāgata vihārappacchāyāyaṃ
āsanaṃ paññāpehīti . evaṃ bhanteti kho āyasmā
@Footnote: 1 Ma. Yu. addasa. 2 Po. disvāna. 3 Ma. Yu. taṃ bhagavantaṃ.
@4-5 Ma. idhūpasaṅkamantāni.
Sāgato bhagavato paṭissuṇitvā pīṭhaṃ gahetvā bhagavato purato
nimmujjitvā tesaṃ asītiyā gāmikasahassānaṃ purato pekkhamānānaṃ
pāṭikāya ummujjitvā vihārappacchāyāyaṃ āsanaṃ paññāpesi .
Athakho bhagavā vihārā nikkhamitvā vihārappacchāyāyaṃ paññatte
āsane nisīdi . athakho tāni asīti gāmikasahassāni yena bhagavā
tenupasaṅkamiṃsu upasaṅkamitvā bhagavantaṃ abhivādetvā ekamantaṃ
nisīdiṃsu . athakho tāni asīti gāmikasahassāni āyasmantaṃyeva
sāgataṃ samannāharanti no tathā bhagavantaṃ.
{1.3} Athakho bhagavā tesaṃ asītiyā gāmikasahassānaṃ cetasā
cetoparivitakkamaññāya āyasmantaṃ sāgataṃ āmantesi tenahi
tvaṃ sāgata bhiyyoso mattāya uttarimanussadhammaṃ iddhipāṭihāriyaṃ
dassehīti . evaṃ bhanteti kho āyasmā sāgato bhagavato paṭissuṇitvā
vehāsaṃ abbhuggantvā ākāse antalikkhe caṅkamatipi tiṭṭhatipi
nisīdatipi seyyaṃpi kappeti padhūpāyatipi 1- pajjalatipi antaradhāyatipi .
Athakho āyasmā sāgato ākāse antalikkhe anekavihitaṃ uttarimanussadhammaṃ
iddhipāṭihāriyaṃ dassetvā bhagavato pādesu sirasā nipatitvā bhagavantaṃ
etadavoca satthā me bhante bhagavā sāvakohamasmi satthā me bhante
bhagavā sāvakohamasmīti . athakho tāni asīti gāmikasahassāni acchariyaṃ
vata bho abbhutaṃ vata bho sāvako hi 2- nāma evaṃmahiddhiko bhavissati
evaṃmahānubhāvo aho nūna satthāti bhagavantaṃyeva samannāharanti
@Footnote: 1 Ma. dhūmāyatipi. Yu. dhūpāyatipi. 2 Ma. Yu. pi.
No tathā āyasmantaṃ sāgataṃ . athakho bhagavā tesaṃ asītiyā
gāmikasahassānaṃ cetasā cetoparivitakkamaññāya anupubbīkathaṃ
kathesi seyyathīdaṃ dānakathaṃ sīlakathaṃ saggakathaṃ kāmānaṃ ādīnavaṃ
okāraṃ saṅkilesaṃ nekkhamme ānisaṃsaṃ pakāsesi . yadā te bhagavā
aññāsi kallacitte muducitte vinīvaraṇacitte udaggacitte
pasannacitte atha yā buddhānaṃ sāmukkaṃsikā dhammadesanā taṃ
pakāsesi dukkhaṃ samudayaṃ nirodhaṃ maggaṃ.
{1.4} Seyyathāpi nāma suddhaṃ vatthaṃ apagatakāḷakaṃ sammadeva rajanaṃ
paṭiggaṇheyya evameva tesaṃ asītiyā gāmikasahassānaṃ tasmiṃyeva
āsane virajaṃ vītamalaṃ dhammacakkhuṃ udapādi yaṅkiñci samudayadhammaṃ
sabbantaṃ nirodhadhammanti . te diṭṭhadhammā pattadhammā viditadhammā
pariyogāḷhadhammā tiṇṇavicikicchā vigatakathaṃkathā vesārajjappattā
aparappaccayā satthu sāsane bhagavantaṃ etadavocuṃ abhikkantaṃ bhante
abhikkantaṃ bhante seyyathāpi bhante nikkujjitaṃ vā ukkujjeyya
paṭicchannaṃ vā vivareyya mūḷhassa vā maggaṃ ācikkheyya andhakāre vā
telappajjotaṃ dhāreyya cakkhumanto rūpāni dakkhantīti evameva bhagavatā
anekapariyāyena dhammo pakāsito ete mayaṃ bhante bhagavantaṃ saraṇaṃ
gacchāma dhammañca bhikkhusaṅghañca upāsake no bhagavā dhāretu
ajjatagge pāṇupete saraṇaṅgateti.
[2] Athakho soṇassa koḷivisassa etadahosi yathā yathā kho
Ahaṃ bhagavatā dhammaṃ desitaṃ ājānāmi nayidaṃ sukaraṃ agāraṃ
ajjhāvasatā ekantaparipuṇṇaṃ ekantaparisuddhaṃ saṅkhalikhitaṃ brahmacariyaṃ
carituṃ yannūnāhaṃ kesamassuṃ ohāretvā kāsāyāni vatthāni
acchādetvā agārasmā anagāriyaṃ pabbajeyyanti . athakho tāni
asīti gāmikasahassāni bhagavato bhāsitaṃ abhinanditvā anumoditvā
uṭṭhāyāsanā bhagavantaṃ abhivādetvā padakkhiṇaṃ katvā pakkamiṃsu.
{2.1} Athakho soṇo koḷiviso acirapakkantesu asītiyā
gāmikasahassesu yena bhagavā tenupasaṅkami upasaṅkamitvā bhagavantaṃ
abhivādetvā ekamantaṃ nisīdi . ekamantaṃ nisinno kho soṇo
koḷiviso bhagavantaṃ etadavoca yathā yathāhaṃ bhante bhagavatā dhammaṃ
desitaṃ ājānāmi nayidaṃ sukaraṃ agāraṃ ajjhāvasatā ekantaparipuṇṇaṃ
ekantaparisuddhaṃ saṅkhalikhitaṃ brahmacariyaṃ carituṃ icchāmahaṃ bhante
kesamassuṃ ohāretvā kāsāyāni vatthāni acchādetvā agārasmā
anagāriyaṃ pabbajituṃ pabbājetu maṃ bhante bhagavāti . alattha
kho soṇo koḷiviso bhagavato santike pabbajjaṃ alattha upasampadaṃ .
Acirupasampanno ca panāyasmā soṇo sītavane viharati . tassa
accāraddhaviriyassa caṅkamato pādā bhijjiṃsu . caṅkamo lohitena
phuṭṭho 1- hoti seyyathāpi gavāghātanaṃ . athakho āyasmato
soṇassa rahogatassa paṭisallīnassa evaṃ cetaso parivitakko udapādi
@Footnote: 1 Ma. Yu. phuṭo.
Ye kho keci bhagavato sāvakā āraddhaviriyā viharanti ahantesaṃ
aññataro atha ca pana me nānupādāya āsavehi cittaṃ vimuccati
saṃvijjanti kho pana me kule bhogā sakkā bhoge ca bhuñjituṃ puññāni
ca kātuṃ yannūnāhaṃ hīnāyāvattitvā bhoge ca bhuñjeyyaṃ puññāni
ca kareyyanti.
{2.2} Athakho bhagavā āyasmato soṇassa cetasā cetoparivitakkamaññāya
seyyathāpi nāma balavā puriso sammiñjitaṃ vā bāhaṃ pasāreyya
pasāritaṃ vā bāhaṃ sammiñjeyya evameva gijjhakūṭe pabbate
antarahito sītavane pāturahosi . athakho bhagavā sambahulehi bhikkhūhi
saddhiṃ senāsanacārikaṃ āhiṇḍanto yenāyasmato soṇassa caṅkamo
tenupasaṅkami . addasā 1- kho bhagavā āyasmato soṇassa caṅkamaṃ
lohitena phuṭṭhaṃ 2- disvāna bhikkhū āmantesi kassa nvāyaṃ bhikkhave
caṅkamo lohitena phuṭṭho seyyathāpi gavāghātananti . āyasmato
bhante soṇassa accāraddhaviriyassa caṅkamato pādā bhijjiṃsu tassāyaṃ
caṅkamo lohitena phuṭṭho seyyathāpi gavāghātananti.
{2.3} Athakho bhagavā yenāyasmato soṇassa vihāro tenupasaṅkami
upasaṅkamitvā paññatte āsane nisīdi . āyasmāpi kho
soṇo bhagavantaṃ abhivādetvā ekamantaṃ nisīdi . ekamantaṃ
nisinnaṃ kho āyasmantaṃ soṇaṃ bhagavā etadavoca nanu te soṇa
rahogatassa paṭisallīnassa evaṃ cetaso parivitakko udapādi
ye kho keci bhagavato sāvakā āraddhaviriyā viharanti
@Footnote: 1 Ma. Yu. addasa. 2 Ma. Yu. phuṭaṃ. sabbattha īdisameva.
Ahantesaṃ aññataro atha ca pana me nānupādāya āsavehi
cittaṃ vimuccati saṃvijjanti kho pana me kule bhogā sakkā
bhoge ca bhuñjituṃ puññāni ca kātuṃ yannūnāhaṃ hīnāyāvattitvā
bhoge ca bhuñjeyyaṃ puññāni ca kareyyanti . evaṃ bhanteti .
Taṃ kiṃ maññasi soṇa kusalo tvaṃ pubbe āgārikabhūto vīṇāya
tantissareti . evaṃ bhanteti . taṃ kiṃ maññasi soṇa yadā
te vīṇāya tantiyo accāyikā 1- honti apinu te vīṇā tasmiṃ
samaye saravatī vā hoti kammaññā vāti . no hetaṃ bhanteti .
Taṃ kiṃ maññasi soṇa yadā te vīṇāya tantiyo atisithilā
honti apinu te vīṇā tasmiṃ samaye saravatī vā hoti kammaññā
vāti . no hetaṃ bhanteti . taṃ kiṃ maññasi soṇa yadā te
vīṇāya tantiyo neva accāyikā honti nātisithilā same
guṇe patiṭṭhitā apinu te vīṇā tasmiṃ samaye saravatī vā hoti
kammaññā vāti. Evaṃ bhanteti.
{2.4} Evameva kho soṇa accāraddhaviriyaṃ uddhaccāya saṃvattati
atilīnaviriyaṃ kosajjāya saṃvattati tasmātiha tvaṃ soṇa viriyasamataṃ
adhiṭṭhāhi 2- indriyānañca samataṃ paṭivijjha tattha ca nimittaṃ
gaṇhāhīti. Evaṃ bhanteti kho āyasmā soṇo bhagavato paccassosi.
{2.5} Athakho bhagavā āyasmantaṃ soṇaṃ iminā
ovādena ovaditvā seyyathāpi nāma balavā
@Footnote: 1 Ma. Yu. accāyatā. 2 Ma. Yu. adhiṭṭhaha.
Puriso sammiñjitaṃ vā bāhaṃ pasāreyya pasāritaṃ vā bāhaṃ
sammiñjeyya evameva sītavane āyasmato soṇassa pamukhe
antarahito gijjhakūṭe pabbate pāturahosi . athakho āyasmā
soṇo aparena samayena viriyasamataṃ adhiṭṭhāsi indriyānañca
samataṃ paṭivijjhi tattha ca nimittaṃ aggahesi.
{2.6} Athakho āyasmā soṇo eko vūpakaṭṭho appamatto ātāpī
pahitatto viharanto nacirasseva yassatthāya kulaputtā 1- sammadeva
agārasmā anagāriyaṃ pabbajanti 2- tadanuttaraṃ brahmacariyapariyosānaṃ
diṭṭhe va dhamme sayaṃ abhiññā sacchikatvā upasampajja vihāsi khīṇā
jāti vusitaṃ brahmacariyaṃ kataṃ karaṇīyaṃ nāparaṃ itthattāyāti abbhaññāsi 3-.
Aññataro ca panāyasmā soṇo arahataṃ ahosi.
[3] Athakho āyasmato soṇassa arahattaṃ pattassa etadahosi
yannūnāhaṃ bhagavato santike aññaṃ byākareyyanti . athakho
āyasmā soṇo yena bhagavā tenupasaṅkami upasaṅkamitvā bhagavantaṃ
abhivādetvā ekamantaṃ nisīdi . ekamantaṃ nisinno kho āyasmā
soṇo bhagavantaṃ etadavoca yo so bhante bhikkhu arahaṃ khīṇāsavo
vusitavā katakaraṇīyo ohitabhāro anuppattasadattho parikkhīṇa-
bhavasaṃyojano sammadaññāvimutto so chaṭṭhānāni adhimutto hoti
nekkhammādhimutto hoti pavivekādhimutto hoti abyāpajjhādhimutto
hoti upādānakkhayādhimutto hoti taṇhakkhayādhimutto
@Footnote: 1 Ma. kulaputto. 2 Ma. pabbajati. 3 Po. Ma. abhiññāsi.
Hoti asammohādhimutto hoti
{3.1} siyā kho pana bhante idhekaccassa āyasmato evamassa kevalaṃ
saddhāmattakaṃ nūna ayamāyasmā nissāya nekkhammādhimuttoti na kho
panetaṃ bhante evaṃ daṭṭhabbaṃ khīṇāsavo bhante bhikkhu vusitavā katakaraṇīyo
karaṇīyamattānaṃ asamanupassanto katassa vā paṭicayaṃ khayā rāgassa
vītarāgattā nekkhammādhimutto hoti khayā dosassa vītadosattā
nekkhammādhimutto hoti khayā mohassa vītamohattā nekkhammādhimutto
hoti
{3.2} siyā kho pana bhante idhekaccassa āyasmato evamassa
lābhasakkārasilokaṃ nūna ayamāyasmā nikāmayamāno pavivekādhimuttoti 1-
na kho panetaṃ bhante evaṃ daṭṭhabbaṃ khīṇāsavo bhante bhikkhu vusitavā
katakaraṇīyo karaṇīyamattānaṃ asamanupassanto katassa vā paṭicayaṃ
khayā rāgassa vītarāgattā pavivekādhimutto hoti khayā dosassa
vītadosattā pavivekādhimutto hoti khayā mohassa vītamohattā
pavivekādhimutto hoti
{3.3} siyā kho pana bhante idhekaccassa āyasmato evamassa
sīlabbataparāmāsaṃ nūna ayamāyasmā sārato paccāgacchanto
abyāpajjhādhimuttoti 2- na kho panetaṃ bhante evaṃ daṭṭhabbaṃ
khīṇāsavo bhante bhikkhu vusitavā katakaraṇīyo karaṇīyamattānaṃ
asamanupassanto katassa vā paṭicayaṃ khayā rāgassa vītarāgattā
abyāpajjhādhimutto hoti khayā dosassa vītadosattā
abyāpajjhādhimutto hoti khayā mohassa vītamohattā
@Footnote: 1 Ma. pavivekādhimutto hoti. 2 Ma. abyāpajjhādhimutto hoti.
Abyāpajjhādhimutto hoti khayā rāgassa vītarāgattā
upādānakkhayādhimutto hoti khayā dosassa vītadosattā
upādānakkhayādhimutto hoti khayā mohassa vītamohattā
upādānakkhayādhimutto hoti khayā rāgassa vītarāgattā
taṇhakkhayādhimutto hoti khayā dosassa vītadosattā
taṇhakkhayādhimutto hoti khayā mohassa vītamohattā
taṇhakkhayādhimutto hoti khayā rāgassa vītarāgattā
asammohādhimutto hoti khayā dosassa vītadosattā
asammohādhimutto hoti khayā mohassa vītamohattā
asammohādhimutto hoti
{3.4} evaṃ sammāvimuttacittacittassa bhante bhikkhuno bhusā
cepi cakkhuviññeyyā rūpā cakkhussa āpāthaṃ āgacchanti nevassa
cittaṃ pariyādiyanti amissīkatamevassa cittaṃ hoti ṭhitaṃ āneñjappattaṃ 1-
vayañcassānupassati bhusā cepi sotaviññeyyā saddā ... ghāna-
viññeyyā gandhā ... jivhāviññeyyā rasā ... kāyaviññeyyā
phoṭṭhabbā ... manoviññeyyā dhammā manassa āpāthaṃ
āgacchanti nevassa cittaṃ pariyādiyanti amissīkatamevassa cittaṃ
hoti ṭhitaṃ āneñjappattaṃ vayañcassānupassati seyyathāpi bhante
selo pabbato acchiddo asusiro ekaghano puratthimāya cepi
disāya āgaccheyya bhusā vātavuṭṭhi neva naṃ saṅkampeyya na
sampakampeyya na sampavedheyya pacchimāya cepi disāya āgaccheyya
@Footnote: 1 Sī. Yu. ānejjappattaṃ.
Bhusā vātavuṭṭhi .pe. uttarāya cepi disāya āgaccheyya bhusā
vātavuṭṭhi .pe. dakkhiṇāya cepi disāya āgaccheyya bhusā
vātavuṭṭhi neva naṃ saṅkampeyya na sampakampeyya na sampavedheyya
evameva kho bhante evaṃ sammāvimuttacittassa bhikkhuno bhusā cepi
cakkhuviññeyyā rūpā cakkhussa āpāthaṃ āgacchanti nevassa cittaṃ
pariyādiyanti amissīkatamevassa cittaṃ hoti ṭhitaṃ āneñjappattaṃ
vayañcassānupassati bhusā cepi sotaviññeyyā saddā ...
Ghānaviññeyyā gandhā ... jivhāviññeyyā rasā ... Kāyaviññeyyā
phoṭṭhabbā ... manoviññeyyā dhammā manassa āpāthaṃ āgacchanti
nevassa cittaṃ pariyādiyanti amissīkatamevassa cittaṃ hoti ṭhitaṃ
āneñjappattaṃ vayañcassānupassatīti.
[4] Nekkhammaṃ adhimuttassa pavivekañca cetaso
abyāpajjhādhimuttassa upādānakkhayassa ca
taṇhakkhayādhimuttassa asammohañca cetaso
disvā āyatanuppādaṃ sammā cittaṃ vimuccati
tassa sammāvimuttassa santacittassa bhikkhuno
katassa paṭicayo natthi karaṇīyaṃ na vijjati.
Selo yathā ekaghano vātena na samīrati
evaṃ rūpā rasā saddā gandhā phassā ca kevalā
iṭṭhā dhammā aniṭṭhā ca nappavedhenti tādino
Ṭhitaṃ cittaṃ vippamuttaṃ vayañcassānupassatīti.
[5] Athakho bhagavā bhikkhū āmantesi evaṃ kho bhikkhave kulaputtā
aññaṃ byākaronti attho ca vutto attā ca anupanīto atha ca
panidhekacce moghapurisā hasamānakaṃ maññe aññaṃ byākaronti
te pacchā vighātaṃ āpajjantīti . athakho bhagavā āyasmantaṃ soṇaṃ
āmantesi tvaṃ khosi soṇa sukhumālo anujānāmi te soṇa
ekapalāsikaṃ upāhananti . ahaṃ kho bhante asītisakaṭavāhe hiraññaṃ 1-
ohāya agārasmā anagāriyaṃ pabbajito sattahatthikañca anīkaṃ [2]-
tassa me bhavissanti vattāro soṇo koḷiviso asītisakaṭavāhe
hiraññaṃ 3- ohāya agārasmā anagāriyaṃ pabbajito sattahatthikañca
anīkaṃ sodānāyaṃ ekapalāsikāsu upāhanāsu sattoti sace bhagavā
bhikkhusaṅghassa anujānissati ahaṃpi paribhuñjissāmi no ce bhagavā
bhikkhusaṅghassa anujānissati ahaṃpi na paribhuñjissāmīti . athakho
bhagavā etasmiṃ nidāne etasmiṃ pakaraṇe 4- dhammiṃ kathaṃ katvā bhikkhū
āmantesi anujānāmi bhikkhave ekapalāsikaṃ upāhanaṃ na bhikkhave
diguṇā upāhanā dhāretabbā na tiguṇā upāhanā dhāretabbā na
gaṇaṅgaṇupāhanā dhāretabbā yo dhāreyya āpatti dukkaṭassāti.
[6] Tena kho pana samayena chabbaggiyā bhikkhū sabbanīlikā
upāhanāyo dhārenti .pe. sabbapītikā upāhanāyo dhārenti .
@Footnote: 1-3 Ma. hiraññe. 2 Ma. athāhaṃ bhante ekapalāsikaṃ ce pariharissāmīti dissati.
@4 Yu. etasmiṃ pakaraṇeti ime pāṭhā na dissanti.
Sabbalohitikā upāhanāyo dhārenti . sabbamañjeṭṭhikā 1-
upāhanāyo dhārenti . sabbakaṇhā upāhanāyo dhārenti .
Sabbamahāraṅgarattā upāhanāyo dhārenti . sabbamahānāmarattā
upāhanāyo dhārenti . manussā ujjhāyanti khīyanti vipācenti
seyyathāpi gihī kāmabhoginoti . bhagavato etamatthaṃ ārocesuṃ .
Na bhikkhave sabbanīlikā upāhanā dhāretabbā na sabbapītikā
upāhanā dhāretabbā na sabbalohitikā upāhanā dhāretabbā
na sabbamañjeṭṭhikā upāhanā dhāretabbā na sabbakaṇhā
upāhanā dhāretabbā na sabbamahāraṅgarattā upāhanā
dhāretabbā na sabbamahānāmarattā upāhanā dhāretabbā yo
dhāreyya āpatti dukkaṭassāti.
{6.1} Tena kho pana samayena chabbaggiyā bhikkhū nīlakavaddhikā
upāhanāyo dhārenti . pītakavaddhikā upāhanāyo dhārenti .
Lohitakavaddhikā upāhanāyo dhārenti . mañjeṭṭhikavaddhikā
upāhanāyo dhārenti . kaṇhavaddhikā upāhanāyo dhārenti .
Mahāraṅgarattavaddhikā 2- upāhanāyo dhārenti . mahānāmarattavaddhikā
upāhanāyo dhārenti . manussā ujjhāyanti khīyanti
vipācenti seyyathāpi gihī kāmabhoginoti . bhagavato etamatthaṃ
ārocesuṃ . na bhikkhave nīlakavaddhikā upāhanā dhāretabbā
na pītakavaddhikā upāhanā dhāretabbā na lohitakavaddhikā
upāhanā dhāretabbā na mañjiṭṭhikāvaddhikā *- upāhanā dhāretabbā
@Footnote: 1 Ma. mañceṭṭhikā. sabbattha īdisameva. 2 Ma. sabbamahāraṅgarattavaddhikā.
@* gœdī‡thūka n‡ācaÃapeḌna mañjeṭṭhikavaddhikā
Na kaṇhavaddhikā upāhanā dhāretabbā na mahāraṅgarattavaddhikā
upāhanā dhāretabbā na mahānāmarattavaddhikā upāhanā
dhāretabbā yo dhāreyya āpatti dukkaṭassāti.
{6.2} Tena kho pana samayena chabbaggiyā bhikkhū khallakavaddhā
upāhanāyo dhārenti . puṭavaddhā upāhanāyo dhārenti .
Pāliguṇṭhimā upāhanāyo dhārenti . tūlapuṇṇikā upāhanāyo
dhārenti . tittirapattikā upāhanāyo dhārenti . Meṇḍavisāṇavaddhikā
upāhanāyo dhārenti . ajavisāṇavaddhikā upāhanāyo dhārenti .
Vicchikāḷikā upāhanāyo dhārenti . Morapiñjaparisibbitā 1- upāhanāyo
dhārenti . citrā upāhanāyo dhārenti . Manussā ujjhāyanti khīyanti
vipācenti seyyathāpi gihī kāmabhoginoti. Bhagavato etamatthaṃ ārocesuṃ.
Na bhikkhave khallakavaddhā upāhanā dhāretabbā na puṭavaddhā
upāhanā dhāretabbā na pāliguṇṭhimā upāhanā dhāretabbā
na tūlapuṇṇikā upāhanā dhāretabbā na tittirapattikā upāhanā
dhāretabbā na meṇḍavisāṇavaddhikā upāhanā dhāretabbā na
ajavisāṇavaddhikā upāhanā dhāretabbā na vicchikāḷikā upāhanā
dhāretabbā na morapiñjaparisibbitā upāhanā dhāretabbā na
citrā upāhanā dhāretabbā yo dhāreyya āpatti dukkaṭassāti.
{6.3} Tena kho pana samayena chabbaggiyā bhikkhū sīhacammaparikkhaṭā
upāhanāyo dhārenti . byagghacammaparikkhaṭā upāhanāyo
@Footnote: 1 Yu. -pijjha-. Ma. -piñcha-.
Dhārenti . dīpicammaparikkhaṭā upāhanāyo dhārenti .
Ajinacammaparikkhaṭā upāhanāyo dhārenti . uddacammaparikkhaṭā
upāhanāyo dhārenti . majjāricammaparikkhaṭā 1- upāhanāyo
dhārenti . kāḷakacammaparikkhaṭā upāhanāyo dhārenti .
Ulūkacammaparikkhaṭā 2- upāhanāyo dhārenti . manussā ujjhāyanti
khīyanti vipācenti seyyathāpi gihī kāmabhoginoti . bhagavato
etamatthaṃ ārocesuṃ . na bhikkhave sīhacammaparikkhaṭā upāhanā
dhāretabbā na byagghacammaparikkhaṭā upāhanā dhāretabbā
na dīpicammaparikkhaṭā upāhanā dhāretabbā na ajinacammaparikkhaṭā
upāhanā dhāretabbā na uddacammaparikkhaṭā upāhanā dhāretabbā
na majjāricammaparikkhaṭā upāhanā dhāretabbā na kāḷakacammaparikkhaṭā
upāhanā dhāretabbā na ulūkacammaparikkhaṭā upāhanā dhāretabbā
yo dhāreyya āpatti dukkaṭassāti.
[7] Athakho bhagavā pubbaṇhasamayaṃ nivāsetvā pattacīvaramādāya
rājagahaṃ piṇḍāya pāvisi aññatarena bhikkhunā pacchāsamaṇena .
Athakho so bhikkhu khañjamāno bhagavantaṃ piṭṭhito piṭṭhito anubandhi .
Addasā kho aññataro upāsako gaṇaṅgaṇupāhanaṃ ārohitvā
bhagavantaṃ dūrato va āgacchantaṃ disvāna upāhanā orohitvā
yena bhagavā tenupasaṅkami upasaṅkamitvā bhagavantaṃ abhivādetvā
yena so bhikkhu tenupasaṅkami upasaṅkamitvā taṃ bhikkhuṃ
@Footnote: 1 Ma. mañjāri-. 2 Ma. uvaka-.
Abhivādetvā etadavoca kissa bhante ayyo khañjatīti . pādā me
āvuso phālitāti . gaṇha 1- bhante upāhanāyoti . alaṃ āvuso
paṭikkhittā bhagavatā gaṇaṅgaṇupāhanāti . gaṇhāhetā bhikkhu
upāhanāyoti . athakho bhagavā etasmiṃ nidāne etasmiṃ pakaraṇe
dhammiṃ kathaṃ katvā bhikkhū āmantesi anujānāmi bhikkhave omukkaṃ
gaṇaṅgaṇupāhanaṃ na bhikkhave navā gaṇaṅgaṇupāhanā dhāretabbā
yo dhāreyya āpatti dukkaṭassāti.
[8] Tena kho pana samayena bhagavā ajjhokāse anupāhano
caṅkamati . satthā anupāhano caṅkamatīti therā bhikkhū anupāhanā
caṅkamanti . chabbaggiyā bhikkhū satthari anupāhane caṅkamamāne
theresupi bhikkhūsu anupāhanesu caṅkamamānesu saupāhanā caṅkamanti .
Ye te bhikkhū appicchā .pe. te ujjhāyanti khīyanti vipācenti
kathaṃ hi nāma chabbaggiyā bhikkhū satthari anupāhane caṅkamamāne theresupi
bhikkhūsu anupāhanesu caṅkamamānesu saupāhanā caṅkamissantīti.
{8.1} Athakho te bhikkhū bhagavato etamatthaṃ ārocesuṃ. Saccaṃ kira
bhikkhave chabbaggiyā bhikkhū satthari anupāhane caṅkamamāne theresupi
bhikkhūsu anupāhanesu caṅkamamānesu saupāhanā caṅkamantīti . saccaṃ
bhagavāti . vigarahi buddho bhagavā kathaṃ hi nāma te bhikkhave moghapurisā
satthari anupāhane caṅkamamāne theresupi bhikkhūsu anupāhanesu
caṅkamamānesu saupāhanā caṅkamissanti ime hi nāma
@Footnote: 1 Ma. Yu. handa.
Bhikkhave gihino odātavasanā 1- abhijīvanikassa 2- sippassa kāraṇā
ācariyesu sagāravā sappatissā sabhāgavuttikā viharissanti idha
kho taṃ bhikkhave sobhetha yaṃ tumhe evaṃ svākkhāte dhammavinaye
pabbajitā samānā ācariyesu ācariyamattesu upajjhāyesu
upajjhāyamattesu sagāravā sappatissā sabhāgavuttikā vihareyyātha
netaṃ bhikkhave appasannānaṃ vā pasādāya .pe. vigarahitvā dhammiṃ
kathaṃ katvā bhikkhū āmantesi na bhikkhave ācariyesu ācariyamattesu
upajjhāyesu upajjhāyamattesu anupāhanesu caṅkamamānesu
saupāhanena caṅkamitabbaṃ yo caṅkameyya āpatti dukkaṭassa na [3]-
bhikkhave ajjhārāme upāhanā dhāretabbā yo dhāreyya āpatti
dukkaṭassāti.
[9] Tena kho pana samayena aññatarassa bhikkhuno pādakhīlābādho
hoti . bhikkhū taṃ bhikkhuṃ pariggahetvā uccāraṃpi passāvaṃpi
nikkhāmenti . addasā kho bhagavā senāsanacārikaṃ āhiṇḍanto te
bhikkhū taṃ bhikkhuṃ pariggahetvā uccāraṃpi passāvaṃpi nikkhāmente
disvāna yena te bhikkhū tenupasaṅkami upasaṅkamitvā te bhikkhū
etadavoca kiṃ imassa bhikkhave bhikkhuno ābādhoti . imassa
bhante āyasmato pādakhīlābādho imaṃ mayaṃ pariggahetvā uccāraṃpi
passāvaṃpi nikkhāmemāti.
[10] Athakho bhagavā etasmiṃ nidāne etasmiṃ pakaraṇe dhammiṃ
@Footnote: 1 Ma. odātavatthavasanakā. 2 Ma. abhijīvinikassa. 3 Ma. Yu. ca.
Kathaṃ katvā bhikkhū āmantesi anujānāmi bhikkhave yassa pādā
vā dukkhā pādā vā phālitā pādakhīlābādho vā upāhanaṃ
dhāretunti . tena kho pana samayena bhikkhū adhotehi pādehi
mañcaṃpi pīṭhaṃpi abhirūhanti cīvarampi senāsanampi dussati . bhagavato
etamatthaṃ ārocesuṃ . anujānāmi bhikkhave idāni mañcaṃ vā
pīṭhaṃ vā abhirūhissāmīti upāhanaṃ dhāretunti.
{10.1} Tena kho pana samayena bhikkhū rattiyā 1- [1]- uposathaggaṃpi
sannisajjaṃpi gacchantā andhakāre khāṇuṃpi kaṇṭakaṃpi akkamanti pādā
dukkhā honti . bhagavato etamatthaṃ ārocesuṃ . anujānāmi bhikkhave
ajjhārāme upāhanaṃ dhāretuṃ ukkaṃ padīpaṃ kattaradaṇḍanti.
{10.2} Tena kho pana samayena chabbaggiyā bhikkhū rattiyā
paccūsasamayaṃ paccuṭṭhāya kaṭṭhapādukāyo abhirūhitvā ajjhokāse
caṅkamanti uccāsaddā mahāsaddā khaṭakhaṭasaddā anekavihitaṃ
tiracchānakathaṃ kathentā seyyathīdaṃ rājakathaṃ corakathaṃ mahāmattakathaṃ
senākathaṃ bhayakathaṃ 2- yuddhakathaṃ annakathaṃ pānakathaṃ vatthakathaṃ sayanakathaṃ
mālākathaṃ gandhakathaṃ ñātikathaṃ yānakathaṃ gāmakathaṃ nigamakathaṃ nagarakathaṃ
janapadakathaṃ itthīkathaṃ purisakathaṃ sūrakathaṃ visikhākathaṃ kumbhaṭṭhānakathaṃ
pubbapetakathaṃ nānattakathaṃ lokakkhāyikaṃ samuddakkhāyikaṃ
itibhavābhavakathaṃ iti vā kīṭakaṃpi akkamitvā mārenti bhikkhūpi
samādhimhā cāventi . ye te bhikkhū appicchā .pe. te
ujjhāyanti khīyanti vipācenti kathaṃ hi nāma chabbaggiyā bhikkhū
@Footnote: 1 Po. Ma. rattiyo. 2 Ma. sabhākathaṃ.
Rattiyā paccūsasamayaṃ paccuṭṭhāya kaṭṭhapādukāyo abhirūhitvā
ajjhokāse caṅkamissanti uccāsaddā mahāsaddā khaṭakhaṭasaddā
anekavihitaṃ tiracchānakathaṃ kathentā seyyathīdaṃ rājakathaṃ corakathaṃ
.pe. itibhavābhavakathaṃ iti vā kīṭakaṃpi akkamitvā māressanti
bhikkhūpi samādhimhā cāvessantīti.
{10.3} Athakho te bhikkhū bhagavato etamatthaṃ ārocesuṃ .
Saccaṃ kira bhikkhave chabbaggiyā bhikkhū rattiyā paccūsasamayaṃ paccuṭṭhāya
kaṭṭhapādukāyo abhirūhitvā ajjhokāse caṅkamanti uccāsaddā
mahāsaddā khaṭakhaṭasaddā anekavihitaṃ tiracchānakathaṃ kathentā
seyyathīdaṃ rājakathaṃ corakathaṃ .pe. itibhavābhavakathaṃ iti vā kīṭakaṃpi
akkamitvā mārenti bhikkhūpi samādhimhā cāventīti . saccaṃ
bhagavāti .pe. vigarahitvā dhammiṃ kathaṃ katvā bhikkhū āmantesi
na bhikkhave kaṭṭhapādukā dhāretabbā yo dhāreyya āpatti
dukkaṭassāti.
[11] Athakho bhagavā rājagahe yathābhirantaṃ viharitvā yena
bārāṇasī tena cārikaṃ pakkāmi anupubbena cārikaṃ caramāno
yena bārāṇasī tadavasari . tatra sudaṃ bhagavā bārāṇasiyaṃ viharati
isipatane migadāye . tena kho pana samayena chabbaggiyā bhikkhū
bhagavatā kaṭṭhapādukā paṭikkhittāti tālataruṇe chedāpetvā
tālapattapādukāyo dhārenti tāni tālataruṇāni chinnāni milāyanti .
Manussā ujjhāyanti khīyanti vipācenti kathaṃ hi nāma samaṇā
Sakyaputtiyā tālataruṇe chedāpetvā tālapattapādukāyo
dhāressanti [1]- tālataruṇāni chinnāni milāyanti ekindriyaṃ samaṇā
sakyaputtiyā jīvaṃ viheṭhentīti . assosuṃ kho bhikkhū tesaṃ manussānaṃ
ujjhāyantānaṃ khīyantānaṃ vipācentānaṃ.
{11.1} Athakho te bhikkhū bhagavato etamatthaṃ ārocesuṃ. Saccaṃ
kira bhikkhave chabbaggiyā bhikkhū tālataruṇe chedāpetvā
tālapattapādukāyo dhārenti tāni tālataruṇāni chinnāni
milāyantīti . saccaṃ bhagavāti . vigarahi buddho bhagavā kathaṃ hi nāma
te bhikkhave moghapurisā tālataruṇe chedāpetvā tālapattapādukāyo
dhāressanti tāni tālataruṇāni chinnāni milāyanti jīvasaññino
hi bhikkhave manussā rukkhasmiṃ netaṃ bhikkhave appasannānaṃ vā
pasādāya .pe. vigarahitvā dhammiṃ kathaṃ katvā bhikkhū āmantesi
na bhikkhave tālapattapādukā dhāretabbā yo dhāreyya āpatti
dukkaṭassāti.
{11.2} Tena kho pana samayena chabbaggiyā bhikkhū bhagavatā
tālapattapādukā paṭikkhittāti veḷutaruṇe chedāpetvā
veḷupattapādukāyo dhārenti tāni veḷutaruṇāni chinnāni
milāyanti . manussā ujjhāyanti khīyanti vipācenti kathaṃ hi
nāma samaṇā sakyaputtiyā veḷutaruṇe chedāpetvā
veḷupattapādukāyo dhāressanti tāni veḷutaruṇāni
chinnāni milāyanti ekindriyaṃ samaṇā sakyaputtiyā jīvaṃ
viheṭhentīti . assosuṃ kho bhikkhū tesaṃ manussānaṃ ujjhāyantānaṃ
@Footnote: 1 Ma. Yu. tāni.
Khīyantānaṃ vipācentānaṃ . athakho te bhikkhū bhagavato etamatthaṃ
ārocesuṃ .pe. na bhikkhave veḷupattapādukā dhāretabbā yo
dhāreyya āpatti dukkaṭassāti.
[12] Athakho bhagavā bārāṇasiyaṃ yathābhirantaṃ viharitvā yena
bhaddiyaṃ tena cārikaṃ pakkāmi anupubbena cārikaṃ caramāno
yena bhaddiyaṃ tadavasari . tatra sudaṃ bhagavā bhaddiye viharati
jātiyāvane . tena kho pana samayena bhaddiyā bhikkhū anekavihitaṃ
pādukamaṇḍanānuyogamanuyuttā viharanti tiṇapādukaṃ karontipi
kārāpentipi muñjapādukaṃ karontipi kārāpentipi pabbajapādukaṃ
karontipi kārāpentipi hintālapādukaṃ karontipi kārāpentipi
kamalapādukaṃ karontipi kārāpentipi kambalapādukaṃ karontipi
kārāpentipi riñcanti uddesaṃ paripucchaṃ adhisīlaṃ adhicittaṃ
adhipaññaṃ.
{12.1} Ye te bhikkhū appicchā .pe. te ujjhāyanti khīyanti
vipācenti kathaṃ hi nāma bhaddiyā bhikkhū anekavihitaṃ pādukamaṇḍanānu-
yogamanuyuttā viharissanti tiṇapādukaṃ karissantipi kārāpessantipi
muñjapādukaṃ karissantipi kārāpessantipi pabbajapādukaṃ karissantipi
kārāpessantipi hintālapādukaṃ karissantipi kārāpessantipi
kamalapādukaṃ karissantipi kārāpessantipi kambalapādukaṃ
karissantipi kārāpessantipi riñcissanti uddesaṃ
paripucchaṃ adhisīlaṃ adhicittaṃ adhipaññanti . athakho te bhikkhū
Bhagavato etamatthaṃ ārocesuṃ . saccaṃ kira bhikkhave bhaddiyā bhikkhū
anekavihitaṃ pādukamaṇḍanānuyogamanuyuttā viharanti tiṇapādukaṃ
karontipi kārāpentipi muñjapādukaṃ karontipi kārāpentipi
pabbajapādukaṃ karontipi kārāpentipi hintālapādukaṃ karontipi
kārāpentipi kamalapādukaṃ karontipi kārāpentipi kambalapādukaṃ
karontipi kārāpentipi riñcanti uddesaṃ paripucchaṃ adhisīlaṃ adhicittaṃ
adhipaññanti. Saccaṃ bhagavāti.
{12.2} Vigarahi buddho bhagavā kathaṃ hi nāma te bhikkhave moghapurisā
anekavihitaṃ pādukamaṇḍanānuyogamanuyuttā viharissanti tiṇapādukaṃ
karissantipi kārāpessantipi muñjapādukaṃ karissantipi kārāpessantipi
pabbajapādukaṃ karissantipi kārāpessantipi hintālapādukaṃ karissantipi
kārāpessantipi kamalapādukaṃ karissantipi kārāpessantipi
kambalapādukaṃ karissantipi kārāpessantipi riñcissanti uddesaṃ
paripucchaṃ adhisīlaṃ adhicittaṃ adhipaññaṃ netaṃ bhikkhave appasannānaṃ vā
pasādāya .pe. vigarahitvā dhammiṃ kathaṃ katvā bhikkhū āmantesi na
bhikkhave tiṇapādukā dhāretabbā na muñjapādukā dhāretabbā na
pabbajapādukā dhāretabbā na hintālapādukā dhāretabbā na
kamalapādukā dhāretabbā na kambalapādukā dhāretabbā na
sovaṇṇamayā pādukā dhāretabbā na rūpiyamayā pādukā dhāretabbā
na maṇimayā pādukā dhāretabbā na veḷuriyamayā pādukā dhāretabbā
Na phalikamayā pādukā dhāretabbā na kaṃsamayā pādukā dhāretabbā
na kācamayā pādukā dhāretabbā na tipumayā pādukā dhāretabbā
na sīsamayā pādukā dhāretabbā na tambalohamayā pādukā
dhāretabbā yo dhāreyya āpatti dukkaṭassa na ca bhikkhave
kāci saṅkamanīyā pādukā dhāretabbā yo dhāreyya āpatti
dukkaṭassa anujānāmi bhikkhave tisso pādukāyo dhuvaṭṭhāniyā
asaṅkamanīyāyo vaccapādukaṃ passāvapādukaṃ ācamanapādukanti.
[13] Athakho bhagavā bhaddiye yathābhirantaṃ viharitvā yena
sāvatthī tena cārikaṃ pakkāmi anupubbena cārikaṃ caramāno
yena sāvatthī tadavasari . tatra sudaṃ bhagavā sāvatthiyaṃ viharati
jetavane anāthapiṇḍikassa ārāme . tena kho pana samayena
chabbaggiyā bhikkhū aciravatiyā nadiyā gāvīnaṃ tarantīnaṃ visāṇesupi
gaṇhanti kaṇṇesupi gaṇhanti gīvāyapi gaṇhanti cheppāyapi 1-
gaṇhanti piṭṭhiṃpi abhirūhanti rattacittāpi aṅgajātaṃ chupanti vacchatarīpi
ogāhetvā mārenti . manussā ujjhāyanti khīyanti vipācenti
kathaṃ hi nāma samaṇā sakyaputtiyā gāvīnaṃ tarantīnaṃ visāṇesupi
gahessanti kaṇṇesupi gahessanti gīvāyapi gahessanti cheppāyapi
gahessanti piṭṭhiṃpi abhirūhissanti rattacittāpi aṅgajātaṃ
chupissanti vacchatarīpi ogāhetvā māressanti seyyathāpi gihī
kāmabhoginoti . assosuṃ kho bhikkhū tesaṃ manussānaṃ ujjhāyantānaṃ
@Footnote: 1 Ma. cheppeti.
Khīyantānaṃ vipācentānaṃ . athakho te bhikkhū bhagavato etamatthaṃ
ārocesuṃ . na bhikkhave gāvīnaṃ visāṇesu gahetabbaṃ na kaṇṇesu
gahetabbaṃ na gīvāya gahetabbaṃ na cheppāya gahetabbaṃ na piṭṭhi
abhirūhitabbā yo abhirūheyya āpatti dukkaṭassa na ca bhikkhave
rattacittena aṅgajātaṃ chupitabbaṃ yo chupeyya āpatti thullaccayassa
na vacchatarī māretabbā yo māreyya yathādhammo kāretabboti.
[14] Tena kho pana samayena chabbaggiyā bhikkhū yānena yāyanti
itthīyuttenapi purisantarena purisayuttenapi itthantarena . manussā
ujjhāyanti khīyanti vipācenti seyyathāpi gaṅgāmahiyāyāti 1- .
Bhagavato etamatthaṃ ārocesuṃ . na bhikkhave yānena yāyitabbaṃ yo
yāyeyya āpatti dukkaṭassāti . tena kho pana samayena aññataro
bhikkhu kosalesu janapadesu sāvatthiṃ gacchanto bhagavantaṃ dassanāya
antarāmagge gilāno hoti . athakho so bhikkhu maggā okkamma
aññatarasmiṃ rukkhamūle nisīdi . manussā taṃ bhikkhuṃ passitvā 2-
etadavocuṃ kahaṃ bhante ayyo 3- gamissatīti . sāvatthiṃ kho ahaṃ
āvuso gamissāmi bhagavantaṃ dassanāyāti . ehi bhante
gamissāmāti 4- . nāhaṃ āvuso sakkomi gilānomhīti . ehi
bhante yānaṃ abhirūhāti . alaṃ āvuso paṭikkhittaṃ bhagavatā yānanti.
Kukkuccāyanto yānaṃ nābhirūhi . athakho so bhikkhu sāvatthiṃ gantvā
@Footnote: 1 Ma. Yu. kaṅgāmahiyāyāti. 2 Ma. Yu. disvā. 3 Ma. Yu. ayyo bhante.
@4 Ma. gamissāmīti.
Bhikkhūnaṃ etamatthaṃ ārocesi . bhikkhū bhagavato etamatthaṃ ārocesuṃ.
Athakho bhagavā etasmiṃ nidāne etasmiṃ pakaraṇe dhammiṃ kathaṃ katvā
bhikkhū āmantesi anujānāmi bhikkhave gilānassa yānanti . athakho
bhikkhūnaṃ etadahosi itthīyuttaṃ nu kho purisayuttaṃ nu khoti . bhagavato
etamatthaṃ ārocesuṃ . anujānāmi bhikkhave purisayuttaṃ hatthavaṭṭakanti.
Tena kho pana samayena aññatarassa bhikkhuno yānugghāṭena bāḷhataraṃ
aphāsu ahosi . bhagavato etamatthaṃ ārocesuṃ . anujānāmi bhikkhave
sivikaṃ pāṭaṅkinti.
[15] Tena kho pana samayena chabbaggiyā bhikkhū uccāsayana-
mahāsayanāni dhārenti seyyathīdaṃ āsandiṃ pallaṅkaṃ goṇakaṃ cittakaṃ
paṭikaṃ paṭilikaṃ tūlikaṃ vikatikaṃ uddhalomiṃ ekantalomiṃ kaṭissaṃ koseyyaṃ
kuttakaṃ hatthattharaṃ assattharaṃ rathattharaṃ ajinappaveṇiṃ kaddalimiga-
pavarapaccatharaṇaṃ sauttaracchadaṃ ubhatolohitakūpadhānaṃ . manussā
vihāracārikaṃ āhiṇḍantā passitvā ujjhāyanti khīyanti vipācenti
seyyathāpi gihī kāmabhoginoti . bhagavato etamatthaṃ ārocesuṃ . na
bhikkhave uccāsayanamahāsayanāni dhāretabbāni seyyathīdaṃ āsandi
pallaṅko goṇako cittako paṭikā paṭalikā tūlikā vikatikā
uddhalomī ekantalomī kaṭissaṃ koseyyaṃ kuttakaṃ hatthattharaṃ assattharaṃ
rathattharaṃ ajinappaveṇi kaddalimigapavarapaccattharaṇaṃ sauttaracchadaṃ
ubhatolohitakūpadhānaṃ yo dhāreyya āpatti dukkaṭassāti.
[16] Tena kho pana samayena chabbaggiyā bhikkhū bhagavatā
uccāsayanamahāsayanāni paṭikkhittānīti mahācammāni dhārenti sīhacammaṃ
byagghacammaṃ dīpicammaṃ . tāni mañcappamāṇenapi chinnāni honti
pīṭhappamāṇenapi chinnāni honti antopi mañce paññattāni
honti bahipi mañce paññattāni honti antopi pīṭhe paññattāni
honti bahipi pīṭhe paññattāni honti . manussā vihāracārikaṃ
āhiṇḍantā passitvā ujjhāyanti khīyanti vipācenti seyyathāpi
gihī kāmabhoginoti . bhagavato etamatthaṃ ārocesuṃ . na bhikkhave
mahācammāni dhāretabbāni sīhacammaṃ byagghacammaṃ dīpicammaṃ yo
dhāreyya āpatti dukkaṭassāti.
[17] Tena kho pana samayena chabbaggiyā bhikkhū bhagavatā mahācammāni
paṭikkhittānīti gocammāni dhārenti . tāni mañcappamāṇenapi
chinnāni honti pīṭhappamāṇenapi chinnāni honti antopi mañce
paññattāni honti bahipi mañce paññattāni honti antopi
pīṭhe paññattāni honti bahipi pīṭhe paññattāni honti .
Aññataropi pāpabhikkhu aññatarassa pāpupāsakassa kulupako
hoti . athakho so pāpabhikkhu pubbaṇhasamayaṃ nivāsetvā
pattacīvaramādāya yena tassa pāpupāsakassa nivesanaṃ tenupasaṅkami
upasaṅkamitvā paññatte āsane nisīdi . athakho so pāpupāsako
yena pāpabhikkhu tenupasaṅkami upasaṅkamitvā taṃ pāpabhikkhuṃ
Abhivādetvā ekamantaṃ nisīdi.
{17.1} Tena kho pana samayena tassa pāpupāsakassa vacchako
hoti taruṇo abhirūpo dassanīyo pāsādiko citro 1- seyyathāpi
dīpicchāpo . athakho so pāpabhikkhu taṃ vacchakaṃ sakkaccaṃ upanijjhāyati.
Athakho so pāpupāsako taṃ pāpabhikkhuṃ etadavoca kissa bhante ayyo
imaṃ vacchakaṃ sakkaccaṃ upanijjhāyatīti . attho me āvuso imassa
vacchakassa cammenāti.
{17.2} Athakho so pāpupāsako taṃ vacchakaṃ vadhitvā cammaṃ vidhūnitvā
tassa pāpabhikkhuno adāsi 2- . athakho so pāpabhikkhu taṃ cammaṃ
saṅghāṭiyā paṭicchādetvā agamāsi . athakho sā gāvī vacchagiddhinī
taṃ pāpabhikkhuṃ piṭṭhito piṭṭhito anubandhi . bhikkhū evamāhaṃsu kissa
tyāyaṃ āvuso gāvī piṭṭhito piṭṭhito anubaddhāti . ahaṃpi kho
āvuso na jānāmi kena myāyaṃ gāvī piṭṭhito piṭṭhito anubaddhāti.
Tena kho pana samayena tassa pāpabhikkhuno saṅghāṭi lohitena makkhitā
hoti. Bhikkhū evamāhaṃsu ayaṃ pana te āvuso saṅghāṭi kiṃ katāti.
{17.3} Athakho so pāpabhikkhu bhikkhūnaṃ etamatthaṃ ārocesi .
Kiṃ pana tvaṃ āvuso pāṇātipāte samādapesīti . evaṃ āvusoti.
Ye te bhikkhū appicchā .pe. te ujjhāyanti khīyanti vipācenti
kathaṃ hi nāma bhikkhu pāṇātipāte samādapessati nanu bhagavatā
anekapariyāyena pāṇātipāto garahito pāṇātipātā veramaṇī
pasatthāti. Athakho te bhikkhū bhagavato etamatthaṃ ārocesuṃ.
@Footnote: 1 Po. vicitto. 2 Ma. Yu. pādāsi.
[18] Athakho bhagavā etasmiṃ nidāne etasmiṃ pakaraṇe bhikkhusaṅghaṃ
sannipātāpetvā taṃ pāpabhikkhuṃ paṭipucchi saccaṃ kira tvaṃ bhikkhu
pāṇātipāte samādapesīti . saccaṃ bhagavāti . vigarahi buddho
bhagavā kathaṃ hi nāma tvaṃ moghapurisa pāṇātipāte samādapessasi
nanu mayā moghapurisa anekapariyāyena pāṇātipāto garahito
pāṇātipātā veramaṇī pasatthā netaṃ moghapurisa appasannānaṃ
vā pasādāya .pe. vigarahitvā dhammiṃ kathaṃ katvā bhikkhū āmantesi
na bhikkhave pāṇātipāte samādapetabbaṃ yo samādapeyya
yathādhammo kāretabbo . na ca 1- bhikkhave gocammaṃ dhāretabbaṃ yo
dhāreyya āpatti dukkaṭassa . na [2]- bhikkhave kiñci cammaṃ dhāretabbaṃ
yo dhāreyya āpatti dukkaṭassāti.
{18.1} Tena kho pana samayena manussānaṃ mañcaṃpi pīṭhaṃpi cammonaddhāni
honti cammavinaddhāni . bhikkhū kukkuccāyantā nābhinisīdanti . bhagavato
etamatthaṃ ārocesuṃ . anujānāmi bhikkhave gihivikataṃ abhinisīdituṃ na tveva
abhinipajjitunti . tena kho pana samayena vihārā cammabandhehi ogumphiyanti.
Bhikkhū kukkuccāyantā nābhinisīdanti . bhagavato etamatthaṃ ārocesuṃ .
Anujānāmi bhikkhave bandhanamattaṃ abhinisīditunti.
[19] Tena kho pana samayena chabbaggiyā bhikkhū saupāhanā
gāmaṃ pavisanti . manussā ujjhāyanti khīyanti vipācenti seyyathāpi
gihī kāmabhoginoti . bhagavato etamatthaṃ ārocesuṃ . na bhikkhave
@Footnote: 1 Po. Ma. Yu. casaddo natthi . 2 Ma. Yu. ca.
Saupāhanena gāmo pavisitabbo yo paviseyya āpatti dukkaṭassāti .
Tena kho pana samayena aññataro bhikkhu gilāno hoti na sakkoti vinā
upāhanena 1- gāmaṃ pavisituṃ . bhagavato etamatthaṃ ārocesuṃ .
Anujānāmi bhikkhave gilānena bhikkhunā saupāhanena gāmaṃ pavisitunti.
[20] Tena kho pana samayena āyasmā mahākaccāno avantīsu
viharati kuraraghare papāte 2- pabbate . tena kho pana samayena
soṇo upāsako kuṭikaṇṇo āyasmato mahākaccānassa
upaṭṭhāko hoti . athakho soṇo upāsako kuṭikaṇṇo yenāyasmā
mahākaccāno tenupasaṅkami upasaṅkamitvā āyasmantaṃ mahākaccānaṃ
abhivādetvā ekamantaṃ nisīdi . ekamantaṃ nisinno kho soṇo
upāsako kuṭikaṇṇo āyasmantaṃ mahākaccānaṃ etadavoca yathā
yathāhaṃ bhante ayyena mahākaccānena dhammaṃ desitaṃ ājānāmi
nayidaṃ sukaraṃ agāraṃ ajjhāvasatā ekantaparipuṇṇaṃ ekantaparisuddhaṃ
saṅkhalikhitaṃ brahmacariyaṃ carituṃ icchāmahaṃ bhante kesamassuṃ ohāretvā
kāsāyāni vatthāni acchādetvā agārasmā anagāriyaṃ pabbajituṃ
pabbājetu maṃ bhante ayyo mahākaccānoti.
{20.1} Evaṃ vutte āyasmā mahākaccāno soṇaṃ
upāsakaṃ kuṭikaṇṇaṃ etadavoca 3- dukkaraṃ kho soṇa yāvajīvaṃ
ekaseyyaṃ ekabhattaṃ brahmacariyaṃ carituṃ 4- iṅgha tvaṃ
@Footnote: 1 Yu. upāhanena vinā . 2 Ma. kururaghare papathake . 3 Ma. Yu. evaṃ vutte ...
@etadavocāti ime pāṭhā na disasanti . 4 Ma. Yu. ayaṃ pāṭho natthi.
Soṇa tattheva agārikabhūto buddhānaṃ sāsanaṃ anuyuñja kālayuttaṃ
ekaseyyaṃ ekabhattaṃ brahmacariyanti.
{20.2} Athakho soṇassa upāsakassa kuṭikaṇṇassa yo ahosi
pabbajjābhisaṅkhāro so paṭippassambhi . dutiyampi kho soṇo
upāsako kuṭikaṇṇo .pe. tatiyampi kho soṇo upāsako
kuṭikaṇṇo yenāyasmā mahākaccāno tenupasaṅkami upasaṅkamitvā
āyasmantaṃ mahākaccānaṃ abhivādetvā ekamantaṃ nisīdi .
Ekamantaṃ nisinno kho soṇo upāsako kuṭikaṇṇo āyasmantaṃ
mahākaccānaṃ etadavoca yathā yathāhaṃ bhante ayyena mahākaccānena
dhammaṃ desitaṃ ājānāmi nayidaṃ sukaraṃ agāraṃ ajjhāvasatā
ekantaparipuṇṇaṃ ekantaparisuddhaṃ saṅkhalikhitaṃ brahmacariyaṃ carituṃ
icchāmahaṃ bhante kesamassuṃ ohāretvā kāsāyāni vatthāni
acchādetvā agārasmā anagāriyaṃ pabbajituṃ pabbājetu maṃ
bhante ayyo mahākaccānoti.
{20.3} Athakho āyasmā mahākaccāno soṇaṃ upāsakaṃ
kuṭikaṇṇaṃ pabbājesi . tena kho pana samayena avantidakkhiṇāpatho
appabhikkhuko hoti . athakho āyasmā mahākaccāno tiṇṇaṃ
vassānaṃ accayena kicchena kasirena tato tato dasavaggaṃ bhikkhusaṅghaṃ
sannipātāpetvā āyasmantaṃ soṇaṃ upasampādesi .
Athakho āyasmato soṇassa vassaṃ vutthassa rahogatassa
paṭisallīnassa evaṃ cetaso parivitakko udapādi sutoyeva
kho me so bhagavā ediso ca ediso cāti na ca mayā
Sammukhā diṭṭho gaccheyyāhaṃ taṃ bhagavantaṃ dassanāya arahantaṃ
sammāsambuddhaṃ sace maṃ upajjhāyo anujāneyyāti.
{20.4} Athakho āyasmā soṇo sāyaṇhasamayaṃ paṭisallānā
vuṭṭhito yenāyasmā mahākaccāno tenupasaṅkami upasaṅkamitvā
āyasmantaṃ mahākaccānaṃ abhivādetvā ekamantaṃ nisīdi .
Ekamantaṃ nisinno kho āyasmā soṇo āyasmantaṃ mahākaccānaṃ
etadavoca idha mayhaṃ bhante rahogatassa paṭisallīnassa evaṃ cetaso
parivitakko udapādi sutoyeva kho me so bhagavā ediso ca ediso
cāti na ca mayā sammukhā diṭṭho gaccheyyāhaṃ taṃ bhagavantaṃ dassanāya
arahantaṃ sammāsambuddhaṃ sace maṃ upajjhāyo anujāneyyāti
gaccheyyāhaṃ bhante taṃ bhagavantaṃ dassanāya arahantaṃ sammāsambuddhaṃ
sace maṃ upajjhāyo anujānātīti.
{20.5} Sādhu sādhu soṇa gaccha tvaṃ soṇa taṃ bhagavantaṃ dassanāya
arahantaṃ sammāsambuddhaṃ dakkhissasi tvaṃ soṇa taṃ bhagavantaṃ pāsādikaṃ
pasādanīyaṃ santindriyaṃ santamānasaṃ uttamadamathasamathamanuppattaṃ dantaṃ
guttaṃ yatindriyaṃ nāgaṃ tenahi tvaṃ soṇa mama vacanena bhagavato pāde sirasā
vanda upajjhāyo me bhante āyasmā mahākaccāno bhagavato pāde
sirasā vandatīti evañca vadehi avantidakkhiṇāpatho bhante appabhikkhuko
tiṇṇaṃ me vassānaṃ accayena kicchena kasirena tato tato dasavaggaṃ
bhikkhusaṅghaṃ sannipātāpetvā upasampadaṃ alatthaṃ appevanāma bhagavā
Avantidakkhiṇāpathe appatarena gaṇena upasampadaṃ anujāneyya
avantidakkhiṇāpathe bhante kaṇhuttarā bhūmi kharā gokaṇṭakahatā
appevanāma bhagavā avantidakkhiṇāpathe gaṇaṅgaṇupāhanaṃ anujāneyya
avantidakkhiṇāpathe bhante nahānagarukā manussā udakasuddhikā
appevanāma bhagavā avantidakkhiṇāpathe dhuvanahānaṃ anujāneyya
avantidakkhiṇāpathe bhante cammāni attharaṇāni eḷakacammaṃ ajacammaṃ
migacammaṃ seyyathāpi bhante majjhimesu janapadesu eragu moragu
majjāru jantu evameva kho bhante avantidakkhiṇāpathe cammāni
attharaṇāni eḷakacammaṃ ajacammaṃ migacammaṃ appevanāma bhagavā
avantidakkhiṇāpathe cammāni attharaṇāni anujāneyya eḷakacammaṃ
ajacammaṃ migacammaṃ etarahi bhante manussā nissīmagatānaṃ bhikkhūnaṃ
cīvaraṃ denti imaṃ cīvaraṃ itthannāmassa demāti te āgantvā
ārocenti itthannāmehi te āvuso manussehi cīvaraṃ dinnanti
te kukkuccāyantā na sādiyanti mā no nissaggiyaṃ ahosīti
appevanāma bhagavā cīvare pariyāyaṃ ācikkheyyāti.
{20.6} Evaṃ bhanteti kho āyasmā soṇo āyasamto mahākaccānassa
paṭissuṇitvā uṭṭhāyāsanā āyasmantaṃ mahākaccānaṃ abhivādetvā
padakkhiṇaṃ katvā senāsanaṃ saṃsāmetvā pattacīvaramādāya yena sāvatthī
tena pakkāmi anupubbena yena sāvatthī jetavanaṃ anāthapiṇḍikassa
ārāmo yena bhagavā tenupasaṅkami upasaṅkamitvā bhagavantaṃ
Abhivādetvā ekamantaṃ nisīdi . athakho bhagavā āyasmantaṃ ānandaṃ
āmantesi imassa ānanda āgantukassa bhikkhuno senāsanaṃ
paññāpehīti . athakho āyasmā ānando yassa kho maṃ bhagavā
āṇāpeti imassa ānanda āgantukassa bhikkhuno senāsanaṃ
paññāpehīti icchati bhagavā tena bhikkhunā saddhiṃ ekavihāre
vatthuṃ icchati bhagavā āyasmatā soṇena saddhiṃ ekavihāre
vatthunti yasmiṃ vihāre bhagavā viharati tasmiṃ vihāre āyasmato
soṇassa senāsanaṃ paññāpesi.
[21] Athakho bhagavā bahudeva rattiṃ ajjhokāse vītināmetvā
vihāraṃ pāvisi . āyasmāpi kho soṇo bahudeva rattiṃ ajjhokāse
vītināmetvā vihāraṃ pāvisi . athakho bhagavā rattiyā paccūsasamayaṃ
paccuṭṭhāya āyasmantaṃ soṇaṃ ajjhesi paṭibhātu taṃ bhikkhu dhammo
bhāsitunti . evaṃ bhanteti kho āyasmā soṇo bhagavato paṭissuṇitvā
sabbāneva aṭṭhakavaggikāni sarena abhāsi . athakho bhagavā āyasmato
soṇassa sarabhaññapariyosāne abbhānumodi sādhu sādhu bhikkhu suggahitāni
kho te bhikkhu aṭṭhakavaggikāni sumanasikatāni sūpadhāritāni kalyāṇiyāsi
vācāya samannāgato vissaṭṭhāya anelagalāya atthassa viññāpaniyā
kativassosi tvaṃ bhikkhūti . ekavasso ahaṃ bhagavāti. Kissa pana tvaṃ bhikkhu
evaṃciraṃ akāsīti . ciraṃ diṭṭho me bhante kāmesu ādīnavo apica
Sambādhā gharāvāsā bahukiccā bahukaraṇīyāti . athakho bhagavā
etamatthaṃ viditvā tāyaṃ velāyaṃ imaṃ udānaṃ udānesi
disvā ādīnavaṃ loke ñatvā dhammaṃ nirūpadhiṃ
ariyo na ramatī pāpe pāpe na ramatī sucīti 1-.
[22] Athakho āyasmā soṇo paṭisammodati kho maṃ bhagavā
ayaṃ khvassa kālo yaṃ me upajjhāyo paridassīti uṭṭhāyāsanā
ekaṃsaṃ uttarāsaṅgaṃ karitvā bhagavato pādesu sirasā nipatitvā
bhagavantaṃ etadavoca upajjhāyo me bhante āyasmā mahākaccāno
bhagavato pādesu sirasā vandati evañca vadeti avantidakkhiṇāpatho
bhante appabhikkhuko tiṇṇaṃ me vassānaṃ accayena kicchena kasirena
tato tato dasavaggaṃ bhikkhusaṅghaṃ sannipātāpetvā upasampadaṃ
alatthaṃ appevanāma bhagavā avantidakkhiṇāpathe appatarena
gaṇena upasampadaṃ anujāneyya avantidakkhiṇāpathe bhante
kaṇhuttarā bhūmi kharā gokaṇṭakahatā appevanāma bhagavā
avantidakkhiṇāpathe gaṇaṅgaṇupāhanaṃ anujāneyya avantidakkhiṇāpathe
bhante nahānagarukā manussā udakasuddhikā appevanāma bhagavā
avantidakkhiṇāpathe dhuvanahānaṃ anujāneyya avantidakkhiṇāpathe
bhante cammāni attharaṇāni eḷakacammaṃ ajacammaṃ migacammaṃ
seyyathāpi bhante majjhimesu janapadesu eragu moragu majjāru
@Footnote: 1 Yu. sāsane ramati sucīti.
Jantu evameva kho bhante avantidakkhiṇāpathe cammāni attharaṇāni
eḷakacammaṃ ajacammaṃ migacammaṃ appevanāma bhagavā avantidakkhiṇāpathe
cammāni attharaṇāni anujāneyya eḷakacammaṃ ajacammaṃ migacammaṃ
etarahi bhante manussā nissīmagatānaṃ bhikkhūnaṃ cīvaraṃ denti imaṃ cīvaraṃ
itthannāmassa demāti te āgantvā ārocenti itthannāmehi te
āvuso manussehi cīvaraṃ dinnanti te kukkuccāyantā na sādiyanti
mā no nissaggiyaṃ ahosīti appevanāma bhagavā cīvare pariyāyaṃ
ācikkheyyāti.
[23] Athakho bhagavā etasmiṃ nidāne etasmiṃ pakaraṇe dhammiṃ kathaṃ
katvā bhikkhū āmantesi avantidakkhiṇāpatho bhikkhave appabhikkhuko
anujānāmi bhikkhave sabbapaccantimesu janapadesu vinayadharapañcamena
gaṇena upasampadaṃ.
{23.1} Tatrīme paccantimā janapadā puratthimāya disāya kajaṅgalaṃ 1-
nāma nigamo tassa parena mahāsālā tato parā paccantimā janapadā
orato majjhe . puratthimadakkhiṇāya disāya sallavatī nāma nadī tato
parā paccantimā janapadā orato majjhe . dakkhiṇāya disāya
setakaṇṇikaṃ nāma nigamo tato parā paccantimā janapadā orato
majjhe . pacchimāya disāya thūnaṃ nāma brāhmaṇagāmo tato parā
paccantimā janapadā orato majjhe . uttarāya disāya usīraddhajo
nāma pabbato tato parā paccantimā janapadā orato
@Footnote: 1 Ma. gajaṅgalaṃ.
Majjhe . anujānāmi bhikkhave evarūpesu paccantimesu janapadesu
vinayadharapañcamena gaṇena upasampadaṃ . avantidakkhiṇāpathe bhikkhave
kaṇhuttarā bhūmi kharā gokaṇṭakahatā anujānāmi bhikkhave
sabbapaccantimesu janapadesu gaṇaṅgaṇupāhanaṃ . avantidakkhiṇāpathe
bhikkhave nahānagarukā manussā udakasuddhikā anujānāmi bhikkhave
sabbapaccantimesu janapadesu dhuvanahānaṃ . avantidakkhiṇāpathe bhikkhave
cammāni attharaṇāni eḷakacammaṃ ajacammaṃ migacammaṃ seyyathāpi
bhikkhave majjhimesu janapadesu eragu moragu majjāru jantu 1- evameva
kho bhikkhave avantidakkhiṇāpathe cammāni attharaṇāni eḷakacammaṃ
ajacammaṃ migacammaṃ anujānāmi bhikkhave sabbapaccantimesu janapadesu
cammāni attharaṇāni eḷakacammaṃ ajacammaṃ migacammaṃ . idha pana
bhikkhave manussā nissīmagatānaṃ bhikkhūnaṃ cīvaraṃ denti imaṃ cīvaraṃ
itthannāmassa demāti anujānāmi bhikkhave sādituṃ na tāva taṃ
gaṇanupagaṃ yāva na hatthaṃ gacchatīti.
Cammakkhandhakaṃ pañcamaṃ.
Imamhi khandhake vatthū tesaṭṭhī.
---------
Tassuddānaṃ.
[24] Rājā ca māgadho soṇo 2- asītisahassissaro
sāgato gijjhakūṭasmiṃ bahuṃ dassesi uttariṃ.
@Footnote: 1 Ma. eragū moragū majjhārū jantū. Yu. majjhāru. 2 Ma. Yu. rājā māgadho soṇo.
Pabbajjāraddhabhijjiṃsu vīṇaṃ ekapalāsikaṃ
nīlā pītā lohitikā mañjeṭṭhā kaṇhameva ca.
Mahāraṅga mahānāmā vaddhikā ca paṭikkhipi
khallakā pūṭapālī ca tūlatittirameṇḍajā.
Vicchikā moracitrañca 1- sīhabyagghā ca dīpikā
ajinuddā majjārī 2- ca kāḷolūkaparikkhaṭā 3-.
Phālitupāhanā khīlā dhotakhāṇukhaṭakhaṭā 4-
tālaveḷutiṇañceva muñjapabbajahintalā 5-.
Kamalakambalasovaṇṇā 6- rūpikā maṇi veḷurī 7-
phalikā kaṃsakācā ca tipusīsañca tambakā.
Gāvī yānaṃ gilāno ca purisayuttasīvikā
sayanāni mahācammā 8- gocammehi ca pāpako.
Gihīnaṃ cammavaddhehi pavisanti gilāyano
mahākaccāyano soṇo sarenaṭṭhakavaggikaṃ.
Upasampadaṃ pañcahi gaṇā dhuvasināyanā 9-
sammattharaṇānuññāsi na tāva gaṇanūpagaṃ
adāsīme vare pañca soṇattherassa nāyakoti.
@Footnote: 1 Ma. Yu. moracitrā ca. 2 Sī. majjārā. Ma. mañjārī. 3 Ma. Yu. kāḷaluaparikkhaṭā.
@4 Sī. dhotakhāṇukhaṭakhaṭaṃ. 5 Ma. muñca - hintālā. 6 Ma. kampala-.
@7 Ma. Yu. veḷuriyā. 8 Sī. mahācamma. 9 Ma. upasampadaṃ pañcahi gaṇaṃ gaṇaṅgaṇādhuvasinā.
@Yu. upasampadaṃ pañcagaṇaṃ gaṇaṅgaṇā dhuvasinā.
Bhesajjakkhandhakaṃ
[25] Tena samayena buddho bhagavā sāvatthiyaṃ viharati jetavane
anāthapiṇḍikassa ārāme . tena kho pana samayena bhikkhūnaṃ
sāradikena ābādhena phuṭṭhānaṃ yāgupi pītā uggacchati bhattaṃpi
bhuttaṃ uggacchati . te tena kisā honti lūkhā dubbaṇṇā
uppaṇḍuppaṇḍukajātā dhamanisanthatagattā . addasā kho
bhagavā te bhikkhū kise lūkhe dubbaṇṇe uppaṇḍuppaṇḍukajāte
dhamanisanthatagatte disvāna āyasmantaṃ ānandaṃ āmantesi
kinnu kho ānanda etarahi bhikkhū kisā lūkhā dubbaṇṇā
uppaṇḍuppaṇḍukajātā dhamanisanthatagattāti . etarahi bhante
bhikkhūnaṃ sāradikena ābādhena phuṭṭhānaṃ yāgupi pītā uggacchati
bhattaṃpi bhuttaṃ uggacchati te tena kisā [1]- lūkhā dubbaṇṇā
uppaṇḍuppaṇḍukajātā dhamanisanthatagattāti.
{25.1} Athakho bhagavato rahogatassa paṭisallīnassa evaṃ cetaso
parivitakko udapādi etarahi kho bhikkhūnaṃ sāradikena ābādhena
phuṭṭhānaṃ yāgupi pītā uggacchati bhattaṃpi bhuttaṃ uggacchati te
tena kisā lūkhā dubbaṇṇā uppaṇḍuppaṇḍukajātā
dhamanisanthatagattā kinnu kho ahaṃ bhikkhūnaṃ bhesajjaṃ anujāneyyaṃ yaṃ
bhesajjañceva assa bhesajjasammatañca lokassa āhāratthañca 2-
phareyya na ca oḷāriko āhāro paññāyeyyāti . athakho
@Footnote: 1 Ma. honti. 2 Yu. āhārattañca.
Bhagavato etadahosi imāni kho pañca bhesajjāni seyyathīdaṃ sappi
navanītaṃ telaṃ madhu phāṇitaṃ bhesajjāni ceva bhesajjasammatāni ca
lokassa āhāratthañca pharanti na ca oḷāriko āhāro paññāyati
yannūnāhaṃ bhikkhūnaṃ imāni pañca bhesajjāni anujāneyyaṃ kāle
paṭiggahetvā kāle paribhuñjitunti.
{25.2} Athakho bhagavā sāyaṇhasamaye paṭisallānā vuṭṭhito
etasmiṃ nidāne etasmiṃ pakaraṇe dhammiṃ kathaṃ katvā bhikkhū āmantesi
idha mayhaṃ bhikkhave rahogatassa paṭisallīnassa evaṃ cetaso parivitakko
udapādi etarahi kho bhikkhūnaṃ sāradikena ābādhena phuṭṭhānaṃ yāgupi
pītā uggacchati bhattaṃpi bhuttaṃ uggacchati te tena kisā lūkhā dubbaṇṇā
uppaṇḍuppaṇḍukajātā dhamanisanthatagattā kinnu kho ahaṃ bhikkhūnaṃ
bhesajjaṃ anujāneyyaṃ yaṃ bhesajjañceva assa bhesajjasammatañca lokassa
āhāratthañca phareyya na ca oḷāriko āhāro paññāyeyyāti
tassa mayhaṃ bhikkhave etadahosi imāni kho pañca bhesajjāni seyyathīdaṃ
sappi navanītaṃ telaṃ madhu phāṇitaṃ bhesajjāni ceva bhesajjasammatāni ca
lokassa āhāratthañca pharanti na ca oḷāriko āhāro paññāyati
yannūnāhaṃ bhikkhūnaṃ imāni pañca bhesajjāni anujāneyyaṃ kāle
paṭiggahetvā kāle paribhuñjitunti . anujānāmi bhikkhave tāni
pañca bhesajjāni kāle paṭiggahetvā kāle paribhuñjitunti.
[26] Tena kho pana samayena bhikkhū tāni pañca bhesajjāni kāle
paṭiggahetvā kāle paribhuñjanti . tesaṃ yānipi tāni pākatikāni
lūkhāni bhojanāni tānipi nacchādenti pageva senesikāni 1- . te
tena ceva sāradikena ābādhena phuṭṭhā iminā ca bhattācchādakena 2-
tadubhayena bhiyyoso mattāya kisā honti lūkhā dubbaṇṇā
uppaṇḍuppaṇḍukajātā dhamanisanthatagattā . addasā
kho bhagavā te bhikkhū bhiyyoso mattāya kise lūkhe dubbaṇṇe
uppaṇḍuppaṇḍukajāte dhamanisanthatagatte disvāna āyasmantaṃ
ānandaṃ āmantesi kinnu kho ānanda etarahi bhikkhū bhiyyoso
mattāya kisā lūkhā dubbaṇṇā uppaṇḍuppaṇḍukajātā
dhamanisanthatagattāti . etarahi bhante bhikkhū tāni pañca bhesajjāni
kāle paṭiggahetvā kāle paribhuñjanti tesaṃ yānipi tāni
pākatikāni lūkhāni bhojanāni tānipi nacchādenti pageva
senesikāni te tena ceva sāradikena ābādhena phuṭṭhā iminā
ca bhattācchādakena tadubhayena bhiyyoso mattāya kisā lūkhā
dubbaṇṇā uppaṇḍuppaṇḍukajātā dhamanisanthatagattāti .
Athakho bhagavā etasmiṃ nidāne etasmiṃ pakaraṇe dhammiṃ kathaṃ katvā
bhikkhū āmantesi anujānāmi bhikkhave tāni pañca bhesajjāni
paṭiggahetvā kālepi vikālepi paribhuñjitunti.
@Footnote: 1 Po. sineha-kāni. Ma. senesitāni. 2 Po. bhattacchādakena. Ma. Yu.
@bhattācchandakena.
The Pali Tipitaka in Roman Character Volume 5 page 1-40.
http://84000.org/tipitaka/read/roman_item_s.php?book=5&item=1&items=26
Classified by [Item Number] :-
http://84000.org/tipitaka/read/roman_item_s.php?book=5&item=1&items=26&mode=bracket
Compare with The Pali Tipitaka in Thai Character :-
http://84000.org/tipitaka/read/pali_item_s.php?book=5&item=1&items=26
Compare with The Royal Version of Thai Tipitaka :-
http://84000.org/tipitaka/read/byitem_s.php?book=5&item=1&items=26
Study Atthakatha :-
http://84000.org/tipitaka/attha/attha.php?b=5&i=1
The Pali Atthakatha in Thai :-
http://84000.org/tipitaka/atthapali/read_th.php?B=3&A=3641
The Pali Atthakatha in Roman :-
http://84000.org/tipitaka/atthapali/read_rm.php?B=3&A=3641
Contents of The Tipitaka Volume 5
http://84000.org/tipitaka/read/?index_5
บันทึก ๑๔ พฤศจิกายน พ.ศ. ๒๕๖๐.
การแสดงผลนี้อ้างอิงข้อมูลจากพระไตรปิฎกฉบับภาษาบาลี อักษรโรมัน.
หากพบข้อผิดพลาด กรุณาแจ้งได้ที่ [email protected]
