Pārivāsikakkhandhakaṃ
[320] Tena samayena buddho bhagavā sāvatthiyaṃ viharati jetavane
anāthapiṇḍikassa ārāme . tena kho pana samayena pārivāsikā
bhikkhū sādiyanti pakatattānaṃ bhikkhūnaṃ abhivādanaṃ paccuṭṭhānaṃ
añjalikammaṃ sāmīcikammaṃ āsanābhihāraṃ seyyābhihāraṃ pādodakaṃ pādapīṭhaṃ
pādakathalikaṃ pattacīvarapaṭiggahaṇaṃ nahāne piṭṭhiparikammaṃ . ye te
bhikkhū appicchā .pe. te ujjhāyanti khīyanti vipācenti kathaṃ
hi nāma pārivāsikā bhikkhū sādiyissanti pakatattānaṃ bhikkhūnaṃ abhivādanaṃ
paccuṭṭhānaṃ añjalikammaṃ sāmīcikammaṃ āsanābhihāraṃ seyyābhihāraṃ
pādodakaṃ pādapīṭhaṃ pādakathalikaṃ pattacīvarapaṭiggahaṇaṃ nahāne
piṭṭhiparikammanti. Athakho te bhikkhū bhagavato etamatthaṃ ārocesuṃ.
[321] Athakho bhagavā etasmiṃ nidāne etasmiṃ pakaraṇe
bhikkhusaṅghaṃ sannipātāpetvā bhikkhū paṭipucchi saccaṃ kira bhikkhave
pārivāsikā bhikkhū sādiyanti pakatattānaṃ bhikkhūnaṃ abhivādanaṃ paccuṭṭhānaṃ
añjalikammaṃ sāmīcikammaṃ āsanābhihāraṃ seyyābhihāraṃ pādodakaṃ
pādapīṭhaṃ pādakathalikaṃ pattacīvarapaṭiggahaṇaṃ nahāne piṭṭhiparikammanti .
Saccaṃ bhagavāti 1-.
{321.1} Vigarahi buddho bhagavā kathaṃ hi nāma bhikkhave
pārivāsikā bhikkhū sādiyissanti pakatattānaṃ bhikkhūnaṃ abhivādanaṃ
paccuṭṭhānaṃ añjalikammaṃ sāmīcikammaṃ āsanābhihāraṃ seyyābhihāraṃ
@Footnote: 1 Yu. itisaddo natthi.
Pādodakaṃ pādapīṭhaṃ pādakathalikaṃ pattacīvarapaṭiggahaṇaṃ nahāne
piṭṭhiparikammaṃ . netaṃ bhikkhave appasannānaṃ vā pasādāya pasannānaṃ vā
bhiyyobhāvāya .pe. vigarahitvā dhammiṃ kathaṃ katvā bhikkhū āmantesi
na bhikkhave pārivāsikena bhikkhunā sāditabbaṃ pakatattānaṃ bhikkhūnaṃ
abhivādanaṃ paccuṭṭhānaṃ añjalikammaṃ sāmīcikammaṃ āsanābhihāro
seyyābhihāro pādodakaṃ pādapīṭhaṃ pādakathalikaṃ pattacīvarapaṭiggahaṇaṃ nahāne
piṭṭhiparikammaṃ yo sādiyeyya āpatti dukkaṭassa.
{321.2} Anujānāmi bhikkhave pārivāsikānaṃ bhikkhūnaṃ mithu yathāvuḍḍhaṃ
abhivādanaṃ paccuṭṭhānaṃ añjalikammaṃ sāmīcikammaṃ āsanābhihāraṃ seyyābhihāraṃ
pādodakaṃ pādapīṭhaṃ pādakathalikaṃ pattacīvarapaṭiggahaṇaṃ nahāne piṭṭhiparikammaṃ.
{321.3} Anujānāmi bhikkhave pārivāsikānaṃ bhikkhūnaṃ pañca
yathāvuḍḍhaṃ uposathaṃ pavāraṇaṃ vassikasāṭikaṃ oṇojanaṃ bhattañca 1- .
Tenahi bhikkhave pārivāsikānaṃ bhikkhūnaṃ vattaṃ paññāpessāmi yathā
pārivāsikehi bhikkhūhi vattitabbaṃ.
[322] Pārivāsikena bhikkhave bhikkhunā sammā vattitabbaṃ .
Tatrāyaṃ sammāvattanā na upasampādetabbaṃ na nissayo dātabbo
na sāmaṇero upaṭṭhāpetabbo na bhikkhunovādakasammati sāditabbā
sammatenapi bhikkhuniyo na ovaditabbā yāya āpattiyā saṅghena
parivāso dinno hoti sā āpatti na āpajjitabbā aññā
@Footnote: 1 Ma. Yu. casaddo na dissati.
Vā tādisikā tato vā pāpiṭṭhatarā kammaṃ na garahitabbaṃ
kammikā na garahitabbā na pakatattassa bhikkhuno uposatho ṭhapetabbo
na pavāraṇā ṭhapetabbā na savacanīyaṃ kātabbaṃ na anuvādo
paṭṭhapetabbo na okāso kāretabbo na codetabbo na
sāretabbo na bhikkhū bhikkhūhi sampayojetabbaṃ.
[323] Na bhikkhave pārivāsikena bhikkhunā pakatattassa bhikkhuno
purato gantabbaṃ na purato nisīditabbaṃ yo hoti saṅghassa
āsanapariyanto seyyāpariyanto vihārapariyanto so tassa
padātabbo tena ca so sāditabbo na bhikkhave pārivāsikena
bhikkhunā pakatattena bhikkhunā 1- puresamaṇena vā pacchāsamaṇena
vā kulāni upasaṅkamitabbāni na āraññikaṅgaṃ samāditabbaṃ na
piṇḍapātikaṅgaṃ samāditabbaṃ na ca 2- tappaccayā piṇḍapāto
nīharāpetabbo mā maṃ jāniṃsūti.
[324] Pārivāsikena bhikkhave bhikkhunā āgantukena ārocetabbaṃ
āgantukassa ārocetabbaṃ uposathe ārocetabbaṃ pavāraṇāya
ārocetabbaṃ sace gilāno hoti dūtenapi ārocāpetabbaṃ 3- .
[325] Na bhikkhave pārivāsikena bhikkhunā sabhikkhukā āvāsā
abhikkhuko āvāso gantabbo aññatra pakatattena aññatra
antarāyā na bhikkhave pārivāsikena bhikkhunā sabhikkhukā āvāsā
abhikkhuko anāvāso gantabbo aññatra pakatattena aññatra
@Footnote: 1 Yu. pakatattassa bhikkhuno . 2 Yu. casaddo na dissati . 3 Ma. Yu. ārocetabbaṃ.
Antarāyā na bhikkhave pārivāsikena bhikkhunā sabhikkhukā āvāsā
abhikkhuko āvāso vā anāvāso vā gantabbo aññatra
pakatattena aññatra antarāyā na bhikkhave pārivāsikena bhikkhunā
sabhikkhukā anāvāsā abhikkhuko āvāso gantabbo aññatra pakatattena
aññatra antarāyā na bhikkhave pārivāsikena bhikkhunā sabhikkhukā
anāvāsā abhikkhuko anāvāso gantabbo aññatra pakatattena
aññatra antarāyā na bhikkhave pārivāsikena bhikkhunā sabhikkhukā
anāvāsā abhikkhuko āvāso vā anāvāso vā gantabbo aññatra
pakatattena aññatra antarāyā na bhikkhave pārivāsikena bhikkhunā
sabhikkhukā āvāsā vā anāvāsā vā abhikkhuko āvāso gantabbo
aññatra pakatattena aññatra antarāyā na bhikkhave
pārivāsikena bhikkhunā sabhikkhukā āvāsā vā anāvāsā vā
abhikkhuko anāvāso gantabbo aññatra pakatattena aññatra
antarāyā na bhikkhave pārivāsikena bhikkhunā sabhikkhukā āvāsā vā
anāvāsā vā abhikkhuko āvāso vā anāvāso vā gantabbo
aññatra pakatattena aññatra antarāyā.
[326] Na bhikkhave pārivāsikena bhikkhunā sabhikkhukā āvāsā
sabhikkhuko āvāso gantabbo yatthassu bhikkhū nānāsaṃvāsakā
aññatra pakatattena aññatra antarāyā na bhikkhave pārivāsikena
bhikkhunā sabhikkhukā āvāsā sabhikkhuko anāvāso gantabbo
Yatthassu bhikkhū nānāsaṃvāsakā aññatra pakatattena aññatra
antarāyā na bhikkhave pārivāsikena bhikkhunā sabhikkhukā āvāsā
sabhikkhuko āvāso vā anāvāso vā gantabbo yatthassu
bhikkhū nānāsaṃvāsakā aññatra pakatattena aññatra antarāyā
na bhikkhave pārivāsikena bhikkhunā sabhikkhukā anāvāsā sabhikkhuko
āvāso gantabbo yatthassu bhikkhū nānāsaṃvāsakā aññatra
pakatattena aññatra antarāyā na bhikkhave pārivāsikena bhikkhunā
sabhikkhukā anāvāsā sabhikkhuko anāvāso gantabbo yatthassu
bhikkhū nānāsaṃvāsakā aññatra pakatattena aññatra antarāyā
na bhikkhave pārivāsikena bhikkhunā sabhikkhukā anāvāsā sabhikkhuko
āvāso vā anāvāso vā gantabbo yatthassu bhikkhū
nānāsaṃvāsakā aññatra pakatattena aññatra antarāyā na bhikkhave
pārivāsikena bhikkhunā sabhikkhukā āvāsā vā anāvāsā vā
sabhikkhuko āvāso gantabbo yatthassu bhikkhū nānāsaṃvāsakā
aññatra pakatattena aññatra antarāyā na bhikkhave pārivāsikena
bhikkhunā sabhikkhukā āvāsā vā anāvāsā vā sabhikkhuko anāvāso
gantabbo yatthassu bhikkhū nānāsaṃvāsakā aññatra pakatattena
aññatra antarāyā na bhikkhave pārivāsikena bhikkhunā sabhikkhukā
āvāsā vā anāvāsā vā sabhikkhuko āvāso vā anāvāso
vā gantabbo yatthassu bhikkhū nānāsaṃvāsakā aññatra pakatattena
Aññatra antarāyā.
[327] Gantabbo bhikkhave pārivāsikena bhikkhunā sabhikkhukā
āvāsā sabhikkhuko āvāso yatthassu bhikkhū samānasaṃvāsakā yaṃ
jaññā sakkomi ajjeva gantunti gantabbo bhikkhave
pārivāsikena bhikkhunā sabhikkhukā āvāsā sabhikkhuko anāvāso
yatthassu bhikkhū samānasaṃvāsakā yaṃ jaññā sakkomi ajjeva gantunti
gantabbo bhikkhave pārivāsikena bhikkhunā sabhikkhukā āvāsā
sabhikkhuko āvāso vā anāvāso vā yatthassu bhikkhū
samānasaṃvāsakā yaṃ jaññā sakkomi ajjeva gantunti
{327.1} gantabbo bhikkhave pārivāsikena bhikkhunā sabhikkhukā
anāvāsā sabhikkhuko āvāso yatthassu bhikkhū samānasaṃvāsakā yaṃ
jaññā sakkomi ajjeva gantunti gantabbo bhikkhave pārivāsikena
bhikkhunā sabhikkhukā anāvāsā sabhikkhuko anāvāso yatthassu bhikkhū
samānasaṃvāsakā yaṃ jaññā sakkomi ajjeva gantunti gantabbo
bhikkhave pārivāsikena bhikkhunā sabhikkhukā anāvāsā sabhikkhuko
āvāso vā anāvāso vā yatthassu bhikkhū samānasaṃvāsakā
yaṃ jaññā sakkomi ajjeva gantunti gantabbo bhikkhave
pārivāsikena bhikkhunā sabhikkhukā āvāsā vā anāvāsā vā
sabhikkhuko āvāso yatthassu bhikkhū samānasaṃvāsakā yaṃ jaññā
sakkomi ajjeva gantunti gantabbo bhikkhave pārivāsikena
Bhikkhunā sabhikkhukā āvāsā vā anāvāsā vā sabhikkhuko anāvāso
yatthassu bhikkhū samānasaṃvāsakā yaṃ jaññā sakkomi ajjeva
gantunti gantabbo bhikkhave pārivāsikena bhikkhunā sabhikkhukā
āvāsā vā anāvāsā vā sabhikkhuko āvāso vā anāvāso
vā yatthassu bhikkhū samānasaṃvāsakā yaṃ jaññā sakkomi
ajjeva gantunti.
[328] Na bhikkhave pārivāsikena bhikkhunā pakatattena bhikkhunā
saddhiṃ ekacchanne āvāse vatthabbaṃ na ekacchanne anāvāse
vatthabbaṃ na ekacchanne āvāse vā anāvāse vā vatthabbaṃ
pakatattaṃ bhikkhuṃ disvā āsanā vuṭṭhātabbaṃ pakatatto bhikkhu
āsanena nimantetabbo na pakatattena bhikkhunā saddhiṃ ekāsane
nisīditabbaṃ na nīce āsane nisinne ucce āsane nisīditabbaṃ
na chamāyaṃ nisinne āsane nisīditabbaṃ na ekacaṅkame caṅkamitabbaṃ
na nīce caṅkame caṅkamante ucce caṅkame caṅkamitabbaṃ na
chamāyaṃ caṅkamante caṅkame caṅkamitabbaṃ.
[329] Na bhikkhave pārivāsikena bhikkhunā pārivāsikena
vuḍḍhatarena bhikkhunā saddhiṃ .pe. mūlāya paṭikassanārahena bhikkhunā
saddhiṃ .pe. mānattārahena bhikkhunā saddhiṃ .pe. mānattacārikena
bhikkhunā saddhiṃ .pe. abbhānārahena bhikkhunā saddhiṃ ekacchanne
āvāse vatthabbaṃ na ekacchanne anāvāse vatthabbaṃ na
Ekacchanne āvāse vā anāvāse vā vatthabbaṃ na ekāsane
nisīditabbaṃ na nīce āsane nisinne ucce āsane nisīditabbaṃ
na chamāyaṃ nisinne āsane nisīditabbaṃ na ekacaṅkame caṅkamitabbaṃ
na nīce caṅkame caṅkamante ucce caṅkame caṅkamitabbaṃ na chamāyaṃ
caṅkamante caṅkame caṅkamitabbaṃ.
[330] Pārivāsikacatuttho ce bhikkhave parivāsaṃ dadeyya
mūlāya paṭikasseyya mānattaṃ dadeyya tabbīso 1- abbheyya
akammaṃ taṃ 2- na ca karaṇīyanti.
Catunavutipārivāsikavattaṃ niṭṭhitaṃ.
[331] Athakho āyasmā upāli yena bhagavā tenupasaṅkami
upasaṅkamitvā bhagavantaṃ abhivādetvā ekamantaṃ nisīdi ekamantaṃ
nisinno kho āyasmā upāli bhagavantaṃ etadavoca katī 3- nu kho
bhante pārivāsikassa bhikkhuno ratticchedāti . tayo kho upāli
pārivāsikassa bhikkhuno ratticchedā sahavāso vippavāso
anārocanā ime kho upāli tayo pārivāsikassa bhikkhuno
ratticchedāti.
[332] Tena kho pana samayena sāvatthiyaṃ mahābhikkhusaṅgho
sannipatito hoti . na sakkonti pārivāsikā bhikkhū parivāsaṃ
@Footnote: 1 Ma. Yu. vīso . 2 Ma. Yu. ayaṃ saddo natthi . 3 Ma. Yu. kati.
Sodhetuṃ . te bhikkhū 1- bhagavato etamatthaṃ ācoresuṃ. Anujānāmi
bhikkhave parivāsaṃ nikkhipituṃ evañca pana bhikkhave nikkhipitabbo .
Tena pārivāsikena bhikkhunā ekaṃ bhikkhuṃ upasaṅkamitvā ekaṃsaṃ
uttarāsaṅgaṃ karitvā ukkuṭikaṃ nisīditvā añjaliṃ paggahetvā
evamassa vacanīyo parivāsaṃ nikkhipāmīti . nikkhitto hoti
parivāso. Vattaṃ nikkhipāmīti. Nikkhitto hoti parivāsoti 2-.
[333] Tena kho pana samayena sāvatthiyā bhikkhū tahiṃ tahiṃ 3-
pakkamiṃsu . sakkonti 4- pārivāsikā bhikkhū parivāsaṃ sodhetuṃ .
Te bhikkhū 1- bhagavato etamatthaṃ ārocesuṃ . anujānāmi bhikkhave
parivāsaṃ samādātuṃ 5- . evañca pana bhikkhave samāditabbo 6- . tena
pārivāsikena bhikkhunā ekaṃ bhikkhuṃ upasaṅkamitvā ekaṃsaṃ uttarāsaṅgaṃ
karitvā ukkuṭikaṃ nisīditvā añjaliṃ paggahetvā evamassa vacanīyo
parivāsaṃ samādiyāmīti . samādinno hoti parivāso . vattaṃ
samādiyāmīti. Samādinno hoti parivāsoti 2-.
Pārivāsikavattaṃ niṭṭhitaṃ.
@Footnote: 1 Ma. Yu. te bhikkhūti natthi. 2 Ma. Yu. itisaddo natthi . 3 Ma. Yu. tahaṃ tahaṃ.
@4 yebhuyyena na sakkontīti pāṭho dissati. ettha nasaddena paṭisedho ayuttarūpoyeva
@parivāsasamādānassa sodhetuṃ samatthakāle bhagavatā anujāniyamānattā. purato
@vakkhamāne mānattasamādānepi eseva nayo . 5 Ma. samādiyituṃ. Yu. samādituṃ.
@6 Ma. samādiyitabbo. ito paraṃ sabbattha eseva nayo.
[334] Tena kho pana samayena mūlāya paṭikassanārahā bhikkhū
sādiyanti pakatattānaṃ bhikkhūnaṃ abhivādanaṃ paccuṭṭhānaṃ añjalikammaṃ
sāmīcikammaṃ āsanābhihāraṃ seyyābhihāraṃ pādodakaṃ pādapīṭhaṃ pādakathalikaṃ
pattacīvarapaṭiggahaṇaṃ nahāne piṭṭhiparikammaṃ . ye te bhikkhū appicchā
.pe. te ujjhāyanti khīyanti vipācenti kathaṃ hi nāma mūlāya
paṭikassanārahā bhikkhū sādiyissanti pakatattānaṃ bhikkhūnaṃ abhivādanaṃ
paccuṭṭhānaṃ añjalikammaṃ sāmīcikammaṃ āsanābhihāraṃ seyyābhihāraṃ
pādodakaṃ pādapīṭhaṃ pādakathalikaṃ pattacīvarapaṭiggahaṇaṃ nahāne
piṭṭhiparikammanti. Athakho te bhikkhū bhagavato etamatthaṃ ārocesuṃ.
[335] Athakho bhagavā etasmiṃ nidāne etasmiṃ pakaraṇe
bhikkhusaṅghaṃ sannipātāpetvā bhikkhū paṭipucchi saccaṃ kira bhikkhave
mūlāya paṭikassanārahā bhikkhū sādiyanti pakatattānaṃ bhikkhūnaṃ abhivādanaṃ
paccuṭṭhānaṃ .pe. nahāne piṭṭhiparikammanti . saccaṃ bhagavāti .
Vigarahi buddho bhagavā kathaṃ hi nāma bhikkhave mūlāya paṭikassanārahā
bhikkhū sādiyissanti pakatattānaṃ bhikkhūnaṃ abhivādanaṃ paccuṭṭhānaṃ .pe.
Nahāne piṭṭhiparikammaṃ netaṃ bhikkhave appasannānaṃ vā
pasādāya .pe. vigarahitvā dhammiṃ kathaṃ katvā bhikkhū āmantesi
na bhikkhave mūlāya paṭikassanārahena bhikkhunā sāditabbaṃ pakatattānaṃ
bhikkhūnaṃ abhivādanaṃ paccuṭṭhānaṃ .pe. nahāne piṭṭhiparikammaṃ yo
sādiyeyya āpatti dukkaṭassa . anujānāmi bhikkhave mūlāya
Paṭikassanārahānaṃ bhikkhūnaṃ mithu yathāvuḍḍhaṃ abhivādanaṃ paccuṭṭhānaṃ .pe.
Nahāne piṭṭhiparikammaṃ . anujānāmi bhikkhave mūlāya paṭikassanārahānaṃ
bhikkhūnaṃ pañca yathāvuḍḍhaṃ uposathaṃ pavāraṇaṃ vassikasāṭikaṃ oṇojanaṃ
bhattañca . tenahi bhikkhave mūlāya paṭikassanārahānaṃ bhikkhūnaṃ vattaṃ
paññāpessāmi yathā mūlāya paṭikassanārahehi bhikkhūhi vattitabbaṃ.
[336] Mūlāya paṭikassanārahena bhikkhave bhikkhunā sammā
vattitabbaṃ . tatrāyaṃ sammāvattanā na upasampādetabbaṃ na nissayo
dātabbo na sāmaṇero upaṭṭhāpetabbo na bhikkhunovādakasammati
sāditabbā sammatenapi bhikkhuniyo na ovaditabbā yāya āpattiyā
[1]- Mūlāya paṭikassanāraho [2]- hoti sā āpatti na āpajjitabbā
aññā vā tādisikā tato vā pāpiṭṭhatarā kammaṃ na garahitabbaṃ
kammikā na garahitabbā na pakatattassa bhikkhuno uposatho
ṭhapetabbo na pavāraṇā ṭhapetabbā na savacanīyaṃ kātabbaṃ na
anuvādo paṭṭhapetabbo na okāso kāretabbo na codetabbo
na sāretabbo na bhikkhū 3- bhikkhūhi sampayojetabbaṃ.
[337] Na bhikkhave mūlāya paṭikassanārahena bhikkhunā pakatattassa
bhikkhuno purato gantabbaṃ na purato nisīditabbaṃ yo hoti
saṅghassa āsanapariyanto seyyāpariyanto vihārapariyanto so
tassa padātabbo tena ca so sāditabbo . na bhikkhave
mūlāya paṭikassanārahena bhikkhunā pakatattena bhikkhunā puresamaṇena
@Footnote: 1 Ma. Yu. saṅghena . 2 Ma. Yu. kato . 3 Ma. ayaṃ pāṭho na dissati.
Vā pacchāsamaṇena vā kulāni upasaṅkamitabbāni na āraññikaṅgaṃ
samāditabbaṃ na piṇḍapātikaṅgaṃ samāditabbaṃ na ca tappaccayā
piṇḍapāto nīharāpetabbo mā maṃ jāniṃsūti.
[338] Na bhikkhave mūlāya paṭikassanārahena bhikkhunā sabhikkhukā
āvāsā abhikkhuko 1- āvāso gantabbo aññatra pakatattena
aññatra antarāyā na bhikkhave mūlāya paṭikassanārahena bhikkhunā
sabhikkhukā āvāsā abhikkhuko anāvāso gantabbo aññatra
pakatattena aññatra antarāyā na bhikkhave mūlāya paṭikassanārahena
bhikkhunā sabhikkhukā āvāsā abhikkhuko āvāso vā anāvāso
vā gantabbo aññatra pakatattena aññatra antarāyā na
bhikkhave mūlāya paṭikassanārahena bhikkhunā sabhikkhukā anāvāsā
abhikkhuko āvāso gantabbo aññatra pakatattena aññatra
antarāyā
{338.1} na bhikkhave mūlāya paṭikassanārahena bhikkhunā
sabhikkhukā anāvāsā abhikkhuko anāvāso gantabbo aññatra
pakatattena aññatra antarāyā na bhikkhave mūlāya paṭikassanārahena
bhikkhunā sabhikkhukā anāvāsā abhikkhuko āvāso vā anāvāso
vā gantabbo aññatra pakatattena aññatra antarāyā na bhikkhave
mūlāya paṭikassanārahena bhikkhunā sabhikkhukā āvāsā vā anāvāsā
vā abhikkhuko āvāso gantabbo .pe. abhikkhuko anāvāso gantabbo
.pe. abhikkhuko āvāso vā anāvāso vā gantabbo aññatra
@Footnote: 1 Yu. sabhikkhuko.
Pakatattena aññatra antarāyā.
[339] Na bhikkhave mūlāya paṭikassanārahena bhikkhunā sabhikkhukā
āvāsā sabhikkhuko āvāso gantabbo yatthassu bhikkhū nānāsaṃvāsakā
aññatra pakatattena aññatra antarāyā na bhikkhave mūlāya
paṭikassanārahena bhikkhunā sabhikkhukā āvāsā sabhikkhuko anāvāso
gantabbo .pe. sabhikkhuko āvāso vā anāvāso vā gantabbo
yatthassu bhikkhū nānāsaṃvāsakā aññatra pakatattena aññatra antarāyā
na bhikkhave mūlāya paṭikassanārahena bhikkhunā sabhikkhukā anāvāsā
sabhikkhuko āvāso gantabbo .pe. sabhikkhuko anāvāso
gantabbo .pe. sabhikkhuko āvāso vā anāvāso vā gantabbo
yatthassu bhikkhū nānāsaṃvāsakā aññatra pakatattena aññatra
antarāyā na bhikkhave mūlāya paṭikassanārahena bhikkhunā sabhikkhukā
āvāsā vā anāvāsā vā sabhikkhuko āvāso gantabbo .pe.
Sabhikkhuko anāvāso gantabbo .pe. sabhikkhuko āvāso
vā anāvāso vā gantabbo yatthassu bhikkhū nānāsaṃvāsakā
aññatra pakatattena aññatra antarāyā.
[340] Gantabbo bhikkhave mūlāya paṭikassanārahena bhikkhunā
sabhikkhukā āvāsā sabhikkhuko āvāso .pe. sabhikkhuko anāvāso
.pe. sabhikkhuko āvāso vā anāvāso vā yatthassu bhikkhū
samānasaṃvāsakā yaṃ jaññā sakkomi ajjeva gantunti gantabbo
Bhikkhave mūlāya paṭikassanārahena bhikkhunā sabhikkhukā anāvāsā
sabhikkhuko āvāso .pe. sabhikkhuko anāvāso .pe. sabhikkhuko
āvāso vā anāvāso vā yatthassu bhikkhū samānasaṃvāsakā
yaṃ jaññā sakkomi ajjeva gantunti gantabbo bhikkhave
mūlāya paṭikassanārahena bhikkhunā sabhikkhukā āvāsā vā
anāvāsā vā sabhikkhuko āvāso .pe. sabhikkhuko anāvāso
.pe. sabhikkhuko āvāso vā anāvāso vā yatthassu bhikkhū
samānasaṃvāsakā yaṃ jaññā sakkomi ajjeva gantunti.
[341] Na bhikkhave mūlāya paṭikassanārahena bhikkhunā pakatattena
bhikkhunā saddhiṃ ekacchanne āvāse vatthabbaṃ na ekacchanne
anāvāse vatthabbaṃ na ekacchanne āvāse vā anāvāse vā
vatthabbaṃ pakatattaṃ bhikkhuṃ disvā āsanā vuṭṭhātabbaṃ pakatatto
bhikkhu āsanena nimantetabbo na pakatattena bhikkhunā saddhiṃ
ekāsane nisīditabbaṃ na nīce āsane nisinne ucce āsane
nisīditabbaṃ na chamāyaṃ nisinne āsane nisīditabbaṃ na ekacaṅkame
caṅkamitabbaṃ na nīce caṅkame caṅkamante ucce caṅkame caṅkamitabbaṃ
na chamāyaṃ caṅkamante caṅkame caṅkamitabbaṃ.
[342] Na bhikkhave mūlāya paṭikassanārahena bhikkhunā pārivāsikena
bhikkhunā saddhiṃ .pe. mūlāya paṭikassanārahena vuḍḍhatarena bhikkhunā
saddhiṃ .pe. mānattārahena bhikkhunā saddhiṃ .pe. mānattacārikena
Bhikkhunā saddhiṃ .pe. abbhānārahena bhikkhunā saddhiṃ ekacchanne
āvāse vatthabbaṃ na ekacchanne anāvāse vatthabbaṃ na ekacchanne
āvāse vā anāvāse vā vatthabbaṃ na ekāsane nisīditabbaṃ
na nīce āsane nisinne ucce āsane nisīditabbaṃ na chamāyaṃ
nisinne āsane nisīditabbaṃ na ekacaṅkame caṅkamitabbaṃ na nīce
caṅkame caṅkamante ucce caṅkame caṅkamitabbaṃ na chamāyaṃ caṅkamante
caṅkame caṅkamitabbaṃ.
[343] Mūlāya paṭikassanārahacatuttho ce bhikkhave parivāsaṃ dadeyya
mūlāya paṭikasseyya mānattaṃ dadeyya tabbīso 1- abbheyya
akammaṃ taṃ 2- na ca karaṇīyanti.
Mūlāya paṭikassanārahavattaṃ niṭṭhitaṃ 3-.
[344] Tena kho pana samayena mānattārahā bhikkhū sādiyanti
pakatattānaṃ bhikkhūnaṃ abhivādanaṃ paccuṭṭhānaṃ .pe. nahāne
piṭṭhiparikammaṃ . ye te bhikkhū appicchā .pe. te ujjhāyanti
khīyanti vipācenti kathaṃ hi nāma mānattārahā bhikkhū sādiyissanti
pakatattānaṃ bhikkhūnaṃ abhivādanaṃ paccuṭṭhānaṃ .pe. nahāne
piṭṭhiparikammanti . athakho te bhikkhū bhagavato etamatthaṃ ārocesuṃ .
Saccaṃ kira bhikkhave mānattārahā bhikkhū sādiyanti pakatattānaṃ
bhikkhūnaṃ abhivādanaṃ paccuṭṭhānaṃ .pe. nahāne piṭṭhiparikammanti .
Saccaṃ bhagavāti . vigarahi buddho bhagavā kathaṃ hi nāma bhikkhave
@Footnote: 1 Ma. taṃ vīso. Yu. vīso. 2 Ma. Yu. tanti natthi. 3 Yu. mūlāya ...
@niṭṭhitanti natthi.
Mānattārahā bhikkhū sādiyissanti pakatattānaṃ bhikkhūnaṃ abhivādanaṃ
paccuṭṭhānaṃ .pe. nahāne piṭṭhiparikammaṃ netaṃ bhikkhave appasannānaṃ
vā pasādāya .pe. vigarahitvā dhammiṃ kathaṃ katvā bhikkhū āmantesi
na bhikkhave mānattārahena bhikkhunā sāditabbaṃ pakatattānaṃ bhikkhūnaṃ
abhivādanaṃ paccuṭṭhānaṃ .pe. nahāne piṭṭhiparikammaṃ yo sādiyeyya
āpatti dukkaṭassa . anujānāmi bhikkhave mānattārahānaṃ bhikkhūnaṃ
mithu yathāvuḍḍhaṃ abhivādanaṃ paccuṭṭhānaṃ .pe. nahāne piṭṭhiparikammaṃ .
Anujānāmi bhikkhave mānattārahānaṃ bhikkhūnaṃ pañca yathāvuḍḍhaṃ
uposathaṃ pavāraṇaṃ vassikasāṭikaṃ oṇojanaṃ bhattañca 1- . tenahi
bhikkhave mānattārahānaṃ bhikkhūnaṃ vattaṃ paññāpessāmi yathā
mānattārahehi bhikkhūhi vattitabbaṃ.
[345] Mānattārahena bhikkhave bhikkhunā sammā vattitabbaṃ .
Tatrāyaṃ sammāvattanā na upasampādetabbaṃ na nissayo dātabbo
na sāmaṇero upaṭṭhāpetabbo na bhikkhunovādakasammati sāditabbā
sammatenapi bhikkhuniyo na ovaditabbā yāya āpattiyā mānattāraho
hoti sā āpatti na āpajjitabbā aññā vā tādisikā
tato vā pāpiṭṭhatarā kammaṃ na garahitabbaṃ kammikā na garahitabbā
na pakatattassa bhikkhuno uposatho ṭhapetabbo na pavāraṇā
ṭhapetabbā na savacanīyaṃ kātabbaṃ na anuvādo paṭṭhapetabbo
na okāso kāretabbo na codetabbo na sāretabbo na
@Footnote: 1 Ma. casaddo natthi.
Bhikkhū bhikkhūhi sampayojetabbaṃ.
[346] Na bhikkhave mānattārahena bhikkhunā pakatattassa bhikkhuno
purato gantabbaṃ na purato nisīditabbaṃ yo hoti saṅghassa
āsanapariyanto seyyāpariyanto vihārapariyanto so tassa
padātabbo tena ca so sāditabbo . na bhikkhave mānattārahena
bhikkhunā pakatattena bhikkhunā puresamaṇena vā pacchāsamaṇena vā
kulāni upasaṅkamitabbāni na āraññikaṅgaṃ samāditabbaṃ na
piṇḍapātikaṅgaṃ samāditabbaṃ 1- na ca tappaccayā piṇḍapāto
nīharāpetabbo mā maṃ jāniṃsūti.
[347] Mānattārahena bhikkhave bhikkhunā āgantukena ārocetabbaṃ
āgantukassa ārocetabbaṃ uposathe ārocetabbaṃ pavāraṇāya
ārocetabbaṃ devasikaṃ ārocetabbaṃ sace gilāno hoti
dūtenapi ārocāpetabbaṃ 2-.
[348] Na bhikkhave mānattārahena bhikkhunā sabhikkhukā āvāsā
abhikkhuko āvāso gantabbo aññatra pakatattena aññatra
antarāyā na bhikkhave mānattārahena bhikkhunā sabhikkhukā āvāsā
abhikkhuko anāvāso gantabbo aññatra pakatattena aññatra
antarāyā na bhikkhave mānattārahena bhikkhunā sabhikkhukā āvāsā
@Footnote: 1 Ma. samādātabbaṃ. 2 Ma. Yu. mānattārahena bhikkhave .pe. dūtenapi ārocāpetabbanti
@natthi.
Abhikkhuko āvāso vā anāvāso vā gantabbo aññatra pakatattena
aññatra antarāyā na bhikkhave mānattārahena bhikkhunā sabhikkhukā
anāvāsā abhikkhuko āvāso gantabbo .pe. abhikkhuko anāvāso
gantabbo .pe. abhikkhuko āvāso vā anāvāso vā gantabbo
aññatra pakatattena aññatra antarāyā na bhikkhave mānattārahena
bhikkhunā sabhikkhukā āvāsā vā anāvāsā vā abhikkhuko āvāso
gantabbo .pe. abhikkhuko anāvāso gantabbo .pe. abhikkhuko
āvāso vā anāvāso vā gantabbo aññatra pakatattena
aññatra antarāyā.
[349] Na bhikkhave mānattārahena bhikkhunā sabhikkhukā āvāsā
sabhikkhuko āvāso gantabbo .pe. Sabhikkhuko anāvāso gantabbo .pe.
Sabhikkhuko āvāso vā anāvāso vā gantabbo yatthassu
bhikkhū nānāsaṃvāsakā aññatra pakatattena aññatra antarāyā
na bhikkhave mānattārahena bhikkhunā sabhikkhukā anāvāsā sabhikkhuko
āvāso gantabbo .pe. sabhikkhuko anāvāso gantabbo .pe.
Sabhikkhuko āvāso vā anāvāso vā gantabbo yatthassu bhikkhū
nānāsaṃvāsakā aññatra pakatattena aññatra antarāyā na
bhikkhave mānattārahena bhikkhunā sabhikkhukā āvāsā vā anāvāsā vā
sabhikkhuko āvāso gantabbo .pe. Sabhikkhuko anāvāso gantabbo .pe.
Sabhikkhuko āvāso vā anāvāso vā gantabbo yatthassu
Bhikkhū nānāsaṃvāsakā aññatra pakatattena aññatra antarāyā.
[350] Gantabbo bhikkhave mānattārahena bhikkhunā sabhikkhukā
āvāsā sabhikkhuko āvāso .pe. sabhikkhuko anāvāso .pe.
Sabhikkhuko āvāso vā anāvāso vā yatthassu bhikkhū
samānasaṃvāsakā yaṃ jaññā sakukomi ajjeva gantunti gantabbo
bhikkhave mānattārahena bhikkhunā sabhikkhukā anāvāsā sabhikkhuko
āvāso .pe. sabhikkhuko anāvāso .pe. sabhikkhuko āvāso
vā anāvāso vā yatthassu bhikkhū samānasaṃvāsakā yaṃ jaññā
sakkomi ajjeva gantunti gantabbo bhikkhave mānattārahena
bhikkhunā sabhikkhukā āvāsā vā anāvāsā vā sabhikkhuko āvāso .pe.
Sabhikkhuko anāvāso .pe. sabhikkhuko āvāso vā anāvāso
vā yatthassu bhikkhū samānasaṃvāsakā yaṃ jaññā sakkomi
ajjeva gantunti.
[351] Na bhikkhave mānattārahena bhikkhunā pakatattena bhikkhunā
saddhiṃ ekacchanne āvāse vatthabbaṃ na ekacchanne anāvāse
vatthabbaṃ na ekacchanne āvāse vā anāvāse vā vatthabbaṃ
pakatattaṃ bhikkhuṃ disvā āsanā vuṭṭhātabbaṃ pakatatto bhikkhu
āsanena nimantetabbo na pakatattena bhikkhunā saddhiṃ ekāsane
nisīditabbaṃ na nīce āsane nisinne ucce āsane nisīditabbaṃ
na chamāyaṃ nisinne āsane nisīditabbaṃ na ekacaṅkame caṅkamitabbaṃ
Na nīce caṅkame caṅkamante ucce caṅkame caṅkamitabbaṃ na chamāyaṃ
caṅkamante caṅkame caṅkamitabbaṃ.
[352] Na bhikkhave mānattārahena bhikkhunā pārivāsikena bhikkhunā
saddhiṃ .pe. mūlāya paṭikassanārahena bhikkhunā saddhiṃ .pe.
Mānattārahena vuḍḍhatarena bhikkhunā saddhiṃ .pe. mānattacārikena
bhikkhunā saddhiṃ .pe. abbhānārahena bhikkhunā saddhiṃ ekacchanne
āvāse vatthabbaṃ na ekacchanne anāvāse vatthabbaṃ na
ekacchanne āvāse vā anāvāse vā vatthabbaṃ na ekāsane
nisīditabbaṃ na nīce āsane nisinne ucce āsane nisīditabbaṃ na
chamāyaṃ nisinne āsane nisīditabbaṃ na ekacaṅkame caṅkamitabbaṃ
na nīce caṅkame caṅkamante ucce caṅkame caṅkamitabbaṃ na chamāyaṃ
caṅkamante caṅkame caṅkamitabbaṃ.
[353] Mānattārahacatuttho ce bhikkhave parivāsaṃ dadeyya mūlāya
paṭikasseyya mānattaṃ dadeyya tabbīso abbheyya akammaṃ taṃ
na ca karaṇīyanti.
Mānattārahavattaṃ niṭṭhitaṃ 1-.
[354] Tena kho pana samayena mānattacārikā bhikkhū sādiyanti
pakatattānaṃ bhikkhūnaṃ abhivādanaṃ paccuṭṭhānaṃ añjalikammaṃ sāmīcikammaṃ
āsanābhihāraṃ seyyābhihāraṃ pādodakaṃ pādapīṭhaṃ pādakathalikaṃ
pattacīvarapaṭiggahaṇaṃ nahāne piṭṭhiparikammaṃ . ye te bhikkhū
@Footnote: 1 Yu. mānattārahavattaṃ niṭṭhitanti natthi.
Appicchā .pe. te ujjhāyanti khīyanti vipācenti kathaṃ hi
nāma mānattacārikā bhikkhū sādiyissanti pakatattānaṃ bhikkhūnaṃ
abhivādanaṃ paccuṭṭhānaṃ .pe. nahāne piṭṭhiparikammanti . athakho
te bhikkhū bhagavato etamatthaṃ ārocesuṃ.
[355] Athakho bhagavā etasmiṃ nidāne etasmiṃ pakaraṇe
bhikkhusaṅghaṃ sannipātāpetvā bhikkhū paṭipucchi saccaṃ kira bhikkhave
mānattacārikā bhikkhū sādiyanti pakatattānaṃ bhikkhūnaṃ abhivādanaṃ
paccuṭṭhānaṃ .pe. nahāne piṭṭhiparikammanti . saccaṃ bhagavāti .
Vigarahi buddho bhagavā kathaṃ hi nāma bhikkhave mānattacārikā
bhikkhū sādiyissanti pakatattānaṃ bhikkhūnaṃ abhivādanaṃ paccuṭṭhānaṃ .pe.
Nahāne piṭṭhiparikammaṃ netaṃ bhikkhave appasannānaṃ vā pasādāya .pe.
Vigarahitvā dhammiṃ kathaṃ katvā bhikkhū āmantesi na bhikkhave
mānattacārikena bhikkhunā sāditabbaṃ pakatattānaṃ bhikkhūnaṃ abhivādanaṃ
paccuṭṭhānaṃ .pe. nahāne piṭṭhiparikammaṃ yo sādiyeyya āpatti
dukkaṭassa . anujānāmi bhikkhave mānattacārikānaṃ bhikkhūnaṃ mithu
yathāvuḍḍhaṃ abhivādanaṃ paccuṭṭhānaṃ .pe. nahāne piṭṭhiparikammaṃ .
Anujānāmi bhikkhave mānattacārikānaṃ bhikkhūnaṃ pañca yathāvuḍḍhaṃ
uposathaṃ pavāraṇaṃ vassikasāṭikaṃ oṇojanaṃ bhattañca . tenahi
bhikkhave mānattacārikānaṃ bhikkhūnaṃ vattaṃ paññāpessāmi yathā
mānattacārikehi bhikkhūhi vattitabbaṃ.
[356] Mānattacārikena bhikkhave bhikkhunā sammā vattitabbaṃ .
Tatrāyaṃ sammāvattanā na upasampādetabbaṃ na nissayo dātabbo
na sāmaṇero upaṭṭhāpetabbo na bhikkhunovādakasammati sāditabbā
sammatenapi bhikkhuniyo na ovaditabbā yāya āpattiyā saṅghena
mānattaṃ dinnaṃ hoti sā āpatti na āpajjitabbā aññā
vā tādisikā tato vā pāpiṭṭhatarā kammaṃ na garahitabbaṃ
kammikā na garahitabbā na pakatattassa bhikkhuno uposatho ṭhapetabbo
na pavāraṇā ṭhapetabbā na savacanīyaṃ kātabbaṃ na anuvādo
paṭṭhapetabbo na okāso kāretabbo na codetabbo na
sāretabbo na bhikkhū bhikkhūhi sampayojetabbaṃ.
[357] Na bhikkhave mānattacārikena bhikkhunā pakatattassa bhikkhuno
purato gantabbaṃ na purato nisīditabbaṃ yo hoti saṅghassa
āsanapariyanto seyyāpariyanto vihārapariyanto so tassa
padātabbo tena ca so sāditabbo . na bhikkhave mānattacārikena
bhikkhunā pakatattena bhikkhunā puresamaṇena vā pacchāsamaṇena vā
kulāni upasaṅkamitabbāni na āraññikaṅgaṃ samāditabbaṃ na
piṇḍapātikaṅgaṃ samāditabbaṃ na ca tappaccayā piṇḍapāto
nīharāpetabbo mā maṃ jāniṃsūti.
[358] Mānattacārikena bhikkhave bhikkhunā āgantukena ārocetabbaṃ
āgantukassa ārocetabbaṃ uposathe ārocetabbaṃ pavāraṇāya
Ārocetabbaṃ devasikaṃ ārocetabbaṃ sace gilāno hoti dūtenapi
ārocāpetabbaṃ.
[359] Na bhikkhave mānattacārikena bhikkhunā sabhikkhukā āvāsā
abhikkhuko āvāso gantabbo aññatra saṅghena aññatra antarāyā
na bhikkhave mānattacārikena bhikkhunā sabhikkhukā āvāsā abhikkhuko
anāvāso gantabbo aññatra saṅghena aññatra antarāyā na
bhikkhave mānattacārikena bhikkhunā sabhikkhukā āvāsā abhikkhuko
āvāso vā anāvāso vā gantabbo aññatra saṅghena aññatra
antarāyā na bhikkhave mānattacārikena bhikkhunā sabhikkhukā
anāvāsā abhikkhuko āvāso gantabbo .pe. abhikkhuko anāvāso
gantabbo .pe. abhikkhuko āvāso vā anāvāso vā gantabbo
aññatra saṅghena aññatra antarāyā na bhikkhave mānattacārikena
bhikkhunā sabhikkhukā āvāsā vā anāvāsā vā abhikkhuko āvāso
gantabbo .pe. abhikkhuko anāvāso gantabbo .pe. abhikkhuko
āvāso vā anāvāso vā gantabbo aññatra saṅghena aññatra
antarāyā.
[360] Na bhikkhave mānattacārikena bhikkhunā sabhikkhukā āvāsā
sabhikkhuko āvāso gantabbo .pe. sabhikkhuko anāvāso
gantabbo .pe. sabhikkhuko āvāso vā anāvāso vā gantabbo
yatthassu bhikkhū nānāsaṃvāsakā aññatra saṅghena aññatra antarāyā na
Bhikkhave mānattacārikena bhikkhunā sabhikkhukā anāvāsā sabhikkhuko
āvāso gantabbo .pe. sabhikkhuko anāvāso gantabbo .pe.
Sabhikkhuko āvāso vā anāvāso vā gantabbo yatthassu bhikkhū
nānāsaṃvāsakā aññatra saṅghena aññatra antarāyā na bhikkhave
mānattacārikena bhikkhunā sabhikkhukā āvāsā vā anāvāsā vā
sabhikkhuko āvāso gantabbo .pe. Sabhikkhuko anāvāso gantabbo .pe.
Sabhikkhuko āvāso vā anāvāso vā gantabbo yatthassu bhikkhū
nānāsaṃvāsakā aññatra saṅghena aññatra antarāyā.
[361] Gantabbo bhikkhave mānattacārikena bhikkhunā sabhikkhukā
āvāsā sabhikkhuko āvāso .pe. sabhikkhuko anāvāso .pe.
Sabhikkhuko āvāso vā anāvāso vā yatthassu bhikkhū
samānasaṃvāsakā yaṃ jaññā sakkomi ajjeva gantunti gantabbo
bhikkhave mānattacārikena bhikkhunā sabhikkhukā anāvāsā sabhikkhuko
āvāso .pe. sabhikkhuko anāvāso .pe. sabhikkhuko āvāso
vā anāvāso vā yatthassu bhikkhū samānasaṃvāsakā yaṃ jaññā
sakkomi ajjeva gantunti gantabbo bhikkhave mānattacārikena
bhikkhunā sabhikkhukā āvāsā vā anāvāsā vā sabhikkhuko āvāso .pe.
Sabhikkhuko anāvāso .pe. sabhikkhuko āvāso vā anāvāso
vā yatthassu bhikkhū samānasaṃvāsakā yaṃ jaññā sakkomi
ajjeva gantunti.
[362] Na bhikkhave mānattacārikena bhikkhunā pakatattena bhikkhunā
saddhiṃ ekacchanne āvāse vatthabbaṃ na ekacchanne anāvāse
vatthabbaṃ na ekacchanne āvāse vā anāvāse vā vatthabbaṃ
pakatattaṃ bhikkhuṃ disvā āsanā vuṭṭhātabbaṃ pakatatto bhikkhu
āsanena nimantetabbo na pakatattena bhikkhunā saddhiṃ ekāsane
nisīditabbaṃ na nīce āsane nisinne ucce āsane nisīditabbaṃ na
chamāyaṃ nisinne āsane nisīditabbaṃ na ekacaṅkame caṅkamitabbaṃ
na nīce caṅkame caṅkamante ucce caṅkame caṅkamitabbaṃ na chamāyaṃ
caṅkamante caṅkame caṅkamitabbaṃ.
[363] Na bhikkhave mānattacārikena bhikkhunā pārivāsikena
bhikkhunā saddhiṃ .pe. mūlāya paṭikassanārahena bhikkhunā saddhiṃ .pe.
Mānattārahena bhikkhunā saddhiṃ .pe. mānattacārikena vuḍḍhatarena
bhikkhunā saddhiṃ .pe. abbhānārahena bhikkhunā saddhiṃ ekacchanne
āvāse vatthabbaṃ na ekacchanne anāvāse vatthabbaṃ na
ekacchanne āvāse vā anāvāse vā vatthabbaṃ na ekāsane
nisīditabbaṃ na nīce āsane nisinne ucce āsane nisīditabbaṃ
na chamāyaṃ nisinne āsane nisīditabbaṃ na ekacaṅkame caṅkamitabbaṃ
na nīce caṅkame caṅkamante ucce caṅkame caṅkamitabbaṃ na chamāyaṃ
caṅkamante caṅkame caṅkamitabbaṃ.
[364] Mānattacārikacatuttho ce bhikkhave parivāsaṃ dadeyya
Mūlāya paṭikasseyya mānattaṃ dadeyya tabbīso abbheyya
akammaṃ taṃ na ca karaṇīyanti.
[365] Athakho āyasmā upāli yena bhagavā tenupasaṅkami
upasaṅkamitvā bhagavantaṃ abhivādetvā ekamantaṃ nisīdi . ekamantaṃ
nisinno kho āyasmā upāli bhagavantaṃ etadavoca katī nu kho
bhante mānattacārikassa bhikkhuno ratticchedāti . cattāro kho
upāli mānattacārikassa bhikkhuno ratticchedā sahavāso
vippavāso anārocanā ūne gaṇe carati 1- ime kho upāli
cattāro mānattacārikassa bhikkhuno ratticchedāti.
[366] Tena kho pana samayena sāvatthiyaṃ mahābhikkhusaṅgho
sannipatito hoti . na sakkonti mānattacārikā bhikkhū mānattaṃ
sodhetuṃ . te bhikkhū bhagavato etamatthaṃ ārocesuṃ . anujānāmi
bhikkhave mānattaṃ nikkhipituṃ . evañca pana bhikkhave nikkhipitabbaṃ .
Tena mānattacārikena bhikkhunā ekaṃ bhikkhuṃ upasaṅkamitvā ekaṃsaṃ
uttarāsaṅgaṃ karitvā ukkuṭikaṃ nisīditvā añjaliṃ paggahetvā
evamassa vacanīyo mānattaṃ nikkhipāmīti . nikkhittaṃ hoti mānattaṃ .
Vattaṃ nikkhipāmīti. Nikkhittaṃ hoti mānattanti.
[367] Tena kho pana samayena sāvatthiyā bhikkhū tahiṃ tahiṃ
@Footnote: 1 Ma. Yu. onogaṇena caratītipi onogaṇe caratītipi pāṭho dissati. ūne gaṇe caraṇanti.
Pakkamiṃsu . sakkonti 1- mānattacārikā bhikkhū mānattaṃ sodhetuṃ .
Te bhikkhū bhagavato etamatthaṃ ārocesuṃ . anujānāmi bhikkhave
mānattaṃ samādiyituṃ 2- . evañca pana bhikkhave samāditabbaṃ . tena
mānattacārikena bhikkhunā ekaṃ bhikkhuṃ upasaṅkamitvā ekaṃsaṃ uttarāsaṅgaṃ
karitvā ukkuṭikaṃ nisīditvā añjaliṃ paggahetvā evamassa vacanīyo
mānattaṃ samādiyāmīti . samādinnaṃ hoti mānattaṃ . vattaṃ
samādiyāmīti. Samādinnaṃ hoti mānattanti.
Mānattacārikavattaṃ niṭṭhitaṃ 3-.
[368] Tena kho pana samayena abbhānārahā bhikkhū sādiyanti
pakatattānaṃ bhikkhūnaṃ abhivādanaṃ paccuṭṭhānaṃ .pe. nahāne
piṭṭhiparikammaṃ . ye te bhikkhū appicchā .pe. te ujjhāyanti
khīyanti vipācenti kathaṃ hi nāma abbhānārahā bhikkhū sādiyissanti
pakatattānaṃ bhikkhūnaṃ abhivādanaṃ paccuṭṭhānaṃ .pe. nahāne
piṭṭhiparikammanti. Athakho te bhikkhū bhagavato etamatthaṃ ārocesuṃ.
[369] Athakho bhagavā etasmiṃ nidāne etasmiṃ pakaraṇe
bhikkhusaṅghaṃ sannipātāpetvā bhikkhū paṭipucchi saccaṃ kira bhikkhave
abbhānārahā bhikkhū sādiyanti pakatattānaṃ bhikkhūnaṃ abhivādanaṃ
paccuṭṭhānaṃ .pe. nahāne piṭṭhiparikammanti . saccaṃ bhagavāti .
Vigarahi buddho bhagavā kathaṃ hi nāma bhikkhave abbhānārahā bhikkhū
sādiyissanti pakatattānaṃ bhikkhūnaṃ abhivādanaṃ paccuṭṭhānaṃ .pe. nahāne
@Footnote: 1 Yu. na sakkonti. 2 Yu. samādituṃ. 3 Yu. mānattacārikavattaṃ niṭṭhitanti natthi.
Piṭṭhiparikammaṃ netaṃ bhikkhave appasannānaṃ vā pasādāya .pe.
Vigarahitvā dhammiṃ kathaṃ katvā bhikkhū āmantesi na bhikkhave
abbhānārahena bhikkhunā sāditabbaṃ pakatattānaṃ bhikkhūnaṃ abhivādanaṃ
paccuṭṭhānaṃ .pe. nahāne piṭṭhiparikammaṃ yo sādiyeyya āpatti
dukkaṭassa . anujānāmi bhikkhave abbhānārahānaṃ bhikkhūnaṃ mithu
yathāvuḍḍhaṃ abhivādanaṃ paccuṭṭhānaṃ .pe. nahāne piṭṭhiparikammaṃ .
Anujānāmi bhikkhave abbhānārahānaṃ bhikkhūnaṃ pañca yathāvuḍḍhaṃ uposathaṃ
pavāraṇaṃ vassikasāṭikaṃ oṇojanaṃ bhattañca . tenahi bhikkhave
abbhānārahānaṃ bhikkhūnaṃ vattaṃ paññāpessāmi yathā abbhānārahehi
bhikkhūhi vattitabbaṃ.
[370] Abbhānārahena bhikkhave bhikkhunā sammā vattitabbaṃ .
Tatrāyaṃ sammāvattanā na upasampādetabbaṃ na nissayo
dātabbo na sāmaṇero upaṭṭhāpetabbo .pe. yathā mūlāya
paṭikassanārahassa vattaṃ tathā mānattārahassa ca mānattacārikassa
ca abbhānārahassa ca tiṇṇaṃ ekasadisaṃ vitthāretabbaṃ .pe. na
bhikkhū bhikkhūhi sampayojetabbaṃ.
[371] Na bhikkhave abbhānārahena bhikkhunā pakatattassa bhikkhuno
purato gantabbaṃ na purato nisīditabbaṃ yo hoti saṅghassa
āsanapariyanto seyyāpariyanto vihārapariyanto so tassa padātabbo
tena ca so sāditabbo . na bhikkhave abbhānārahena
Bhikkhunā pakatattena bhikkhunā puresamaṇena vā pacchāsamaṇena vā
kulāni upasaṅkamitabbāni na āraññikaṅgaṃ samāditabbaṃ na
piṇḍapātikaṅgaṃ samāditabbaṃ na ca tappaccayā piṇḍapāto
nīharāpetabbo mā maṃ jāniṃsūti.
[372] Na bhikkhave abbhānārahena bhikkhunā sabhikkhukā āvāsā
abhikkhuko āvāso gantabbo aññatra pakatattena aññatra
antarāyā na bhikkhave abbhānārahena bhikkhunā sabhikkhukā āvāsā
abhikkhuko anāvāso gantabbo aññatra pakatattena aññatra
antarāyā yathā heṭṭhā tathā vitthāretabbaṃ . .pe. gantabbo
bhikkhave abbhānārahena bhikkhunā sabhikkhukā āvāsā .pe. Anāvāsā .pe.
Āvāsā vā anāvāsā vā sabhikkhuko āvāso .pe. sabhikkhuko
anāvāso .pe. sabhikkhuko āvāso vā anāvāso vā yatthassu
bhikkhū samānasaṃvāsakā yaṃ jaññā sakkomi ajjeva gantunti.
[373] Na bhikkhave abbhānārahena bhikkhunā pakatattena bhikkhunā
saddhiṃ ekacchanne āvāse vatthabbaṃ na ekacchanne anāvāse
vatthabbaṃ na ekacchanne āvāse vā anāvāse vā vatthabbaṃ
pakatattaṃ bhikkhuṃ disvā āsanā vuṭṭhātabbaṃ pakatatto bhikkhu āsanena
nimantetabbo na pakatattena bhikkhunā saddhiṃ ekāsane nisīditabbaṃ
na nīce āsane nisinne ucce āsane nisīditabbaṃ na chamāyaṃ
nisinne āsane nisīditabbaṃ na ekacaṅkame caṅkamitabbaṃ na nīce
Caṅkame caṅkamante ucce caṅkame caṅkamitabbaṃ na chamāyaṃ caṅkamante
caṅkame caṅkamitabbaṃ.
[374] Na bhikkhave abbhānārahena bhikkhunā pārivāsikena bhikkhunā
saddhiṃ .pe. mūlāya paṭikassanārahena bhikkhunā saddhiṃ .pe.
Mānattārahena bhikkhunā saddhiṃ .pe. mānattacārikena bhikkhunā
saddhiṃ .pe. abbhānārahena vuḍḍhatarena bhikkhunā saddhiṃ ekacchanne
āvāse vatthabbaṃ na ekacchanne anāvāse vatthabbaṃ na
ekacchanne āvāse vā anāvāse vā vatthabbaṃ na ekāsane
nisīditabbaṃ na nīce āsane nisinne ucce āsane nisīditabbaṃ
na chamāyaṃ nisinne āsane nisīditabbaṃ na ekacaṅkame caṅkamitabbaṃ
na nīce caṅkame caṅkamante ucce caṅkame caṅkamitabbaṃ na chamāyaṃ
caṅkamante caṅkame caṅkamitabbaṃ.
[375] Abbhānārahacatuttho ce bhikkhave parivāsaṃ dadeyya
mūlāya paṭikasseyya mānattaṃ dadeyya tabbīso abbheyya akammaṃ
taṃ na ca karaṇīyanti.
Abbhānārahavattaṃ niṭṭhitaṃ 1- .
Pārivāsikakkhandhakaṃ niṭṭhitaṃ dutiyaṃ 2-.
Imasmiṃ khandhake vatthū 3- pañca.
----------------------
@Footnote: 1 Yu. abbhānārahavattaṃ niṭṭhitanti natthi . 2 Ma. pārivāsikakkhandhako dutiyo.
@3 Yu. vatthu.
Tassuddānaṃ
[376] Pārivāsikā sādiyanti pakatattānaṃ bhikkhūnaṃ 1-
abhivādanaṃ paccuṭṭhānaṃ añjaliñceva sāmiciṃ
āsanaṃ 2- seyyābhihāraṃ pādodakaṃ pādapīṭhaṃ
pādakathalikaṃ pattacīvarapaṭiggāhaṇaṃ
nahāne piṭṭhiparikammaṃ ujjhāyanteva pesalā 3-.
Dukkaṭaṃ sādiyantassa mithu pañca yathāvuḍḍhaṃ 4-
uposathaṃ pavāraṇaṃ vassikañcāvaṇojanaṃ
bhattaṃ 5- sammā pavattanā pakatattena gacchare 6-
yo ca hoti pariyanto na pure pacchā samaṇena 7-
araññaṃ piṇḍanīhāro 8- āgantuke uposathe 9-
pavāraṇā ca dūtena gantabbo ca sabhikkhuko 10-
@Footnote: 1 Ma. pārivāsikā sādenti pakatattāna bhikkhunaṃ. Yu. pārivāsikā sādenti pakatattena
@bhikkhunā . 2 Ma. abhivādanaṃ paccuṭṭhānaṃ añjaliṃ ca sāmiciyaṃ āsanaṃ. Yu. abhivādanaṃ
@paccuṭṭhānaṃ añjalisāmiyaṃ āsanaṃ . 3 ma seyyābhihāraṃ pādo pīṭhaṃ kathalikaṃ ....
@Yu. seyyābhihāraṃ pādodakaṃ pādapīṭhaṃ pādakathalikaṃ pattaṃ nahāne parikammaṃ ujjhāyanti
@ca pesalā . 4 Yu. pañca punāpare . 5 Ma. Yu. vassikoṇojabhojanaṃ . 6 Ma. Yu.
@sammā ca vattanā tattha pakatattassa gacchanaṃ . 7 Ma. Yu. yo ca hoti pariyanto
@pure pacchā tatheva ca . 8 Ma. āraññapiṇḍanīhāro. Yu. araññapiṇḍanihāro.
@9 Yu. uposathaṃ . 10 Yu. pavāraṇā ca dūto ca gantabbañca sabhikjuke.
Ekacchanne na vatthabbaṃ na chamāyaṃ nisajjite 1-
āsane nīce caṅkame 2- chamāyaṃ caṅkame na ca
vuḍḍhatarena akammaṃ ratticchedā 3- ca sodhanā
nikkhipanaṃ samādānaṃ ñātabbaṃ pārivāsikā 4-
mūlāya mānattārahā tathā mānattacārikā
abbhānārahakā cāpi sambhedanayato puna 5-.
Pārivāsikānaṃ 6- tayo catumānattacārike
na samenti ratticchedā 7- mānattesu ca divāsikaṃ 8-.
Dve kammā sadisā sesā tayo kammā samānatāti 9-.
@Footnote: 1 Ma. Yu. ekacchanne ca vuṭṭhānaṃ tatheva ca nimantaye . 2 Yu. nīcacaṅkame.
@3 Ma. Yu. ratticchedo . 4 Ma. vattaṃ va parivāsike. Yu. ratti vā pārivāsike.
@5 Ma. abbhānārahena yo cāpi sambhedaṃ nayato puna. Yu. abbhānāraho yo cāpi
@sambhedaṃ nayato puna . 6 Ma. Yu. pārivāsikesu . 7 Ma. Yu. samanti racticchedesu.
@8 Ma. Yu. devasi . 9 Ma. Yu. samāsamāti.
The Pali Tipitaka in Roman Character Volume 6 page 128-159.
http://84000.org/tipitaka/read/roman_item_s.php?book=6&item=320&items=57
Classified by [Item Number] :-
http://84000.org/tipitaka/read/roman_item_s.php?book=6&item=320&items=57&mode=bracket
Compare with The Pali Tipitaka in Thai Character :-
http://84000.org/tipitaka/read/pali_item_s.php?book=6&item=320&items=57
Compare with The Royal Version of Thai Tipitaka :-
http://84000.org/tipitaka/read/byitem_s.php?book=6&item=320&items=57
Study Atthakatha :-
http://84000.org/tipitaka/attha/attha.php?b=6&i=320
The Pali Atthakatha in Thai :-
http://84000.org/tipitaka/atthapali/read_th.php?B=3&A=5760
The Pali Atthakatha in Roman :-
http://84000.org/tipitaka/atthapali/read_rm.php?B=3&A=5760
Contents of The Tipitaka Volume 6
http://84000.org/tipitaka/read/?index_6
บันทึก ๑๔ พฤศจิกายน พ.ศ. ๒๕๖๐.
การแสดงผลนี้อ้างอิงข้อมูลจากพระไตรปิฎกฉบับภาษาบาลี อักษรโรมัน.
หากพบข้อผิดพลาด กรุณาแจ้งได้ที่ [email protected]
