[737] Acchariyañca vo bhikkhave desissāmi acchariyagāmiñca
maggaṃ taṃ suṇātha. Katamañca bhikkhave acchariyaṃ .pe.
[738] Abbhutañca vo bhikkhave desissāmi abbhutagāmiñca
maggaṃ taṃ suṇātha. Katamañca bhikkhave abbhutaṃ .pe.
[739] Anītikañca vo bhikkhave desissāmi anītikagāmiñca
maggaṃ taṃ suṇātha. Katamañca bhikkhave anītikaṃ .pe.
[740] Anītikadhammañca vo bhikkhave desissāmi anītikadhammagāmiñca
maggaṃ taṃ suṇātha. Katamañca bhikkhave anītikadhammaṃ .pe.
[741] Nibbānañca vo bhikkhave desissāmi nibbānagāmiñca
maggaṃ taṃ suṇātha. Katamañca bhikkhave nibbānaṃ .pe.
[742] Abyāpajjhañca 1- vo bhikkhave desissāmi
abyāpajjhagāmiñca 2- maggaṃ taṃ suṇātha . katamañca bhikkhave
abyāpajjhaṃ .pe.
[743] Virāgañca vo bhikkhave desissāmi virāgagāmiñca maggaṃ
taṃ suṇātha. Katamo ca bhikkhave virāgo .pe.
[744] Suddhiñca vo bhikkhave desissāmi suddhigāmiñca maggaṃ taṃ
suṇātha. Katamā ca bhikkhave suddhi .pe.
[745] Muttiñca vo bhikkhave desissāmi muttigāmiñca maggaṃ
taṃ suṇātha. Katamā ca bhikkhave mutti .pe.
[746] Anālayañca vo bhikkhave desissāmi anālayagāmiñca
maggaṃ taṃ suṇātha. Katamo ca bhikkhave anālayo .pe.
[747] Dīpañca vo bhikkhave desissāmi dīpagāmiñca maggaṃ
taṃ suṇātha. Katamañca bhikkhave dīpaṃ .pe.
[748] Leṇañca vo bhikkhave desissāmi leṇagāmiñca maggaṃ
taṃ suṇātha. Katamañca bhikkhave leṇaṃ .pe.
@Footnote: 1 Ma. abyābajjhañca . 2 Ma. abyābajjhagāmiñca. evamuparipi.
[749] Tāṇañca vo bhikkhave desissāmi tāṇagāmiñca maggaṃ
taṃ suṇātha. Katamañca bhikkhave tāṇaṃ .pe.
[750] Saraṇañca vo bhikkhave desissāmi saraṇagāmiñca maggaṃ
taṃ suṇātha. Katamañca bhikkhave saraṇaṃ .pe.
[751] Parāyanañca vo bhikkhave desissāmi parāyanagāmiñca maggaṃ
taṃ suṇātha . katamañca bhikkhave parāyanaṃ . yo bhikkhave rāgakkhayo
dosakkhayo mohakkhayo . idaṃ vuccati bhikkhave parāyanaṃ . katamo
ca bhikkhave parāyanagāmimaggo . kāyagatāsati . ayaṃ vuccati bhikkhave
parāyanagāmimaggo . iti kho bhikkhave desitaṃ vo mayā parāyanaṃ
desito parāyanagāmimaggo . yaṃ bhikkhave satthārā karaṇīyaṃ sāvakānaṃ
hitesinā anukampakena anukampaṃ upādāya kataṃ vo taṃ mayā .
Etāni bhikkhave rukkhamūlāni etāni suññāgārāni . jhāyatha bhikkhave
mā pamādattha mā pacchā vippaṭisārino ahuvattha . ayaṃ vo
amhākaṃ anusāsanīti. (yathā asaṅkhataṃ vitthāritaṃ tathā vitthāretabbaṃ).
Dutiyo vaggo samatto.
Tassuddānaṃ
asaṅkhataṃ anataṃ anāsavaṃ saccañca pāraṃ nipuṇaṃ sududdasaṃ
ajajjarantaṃ 1- dhuvaṃ apalokinaṃ anidassanaṃ nippapañcasantaṃ.
Amataṃ paṇītañca sivañca khemaṃ taṇhakkhayo acchariyañca abbhutaṃ
anītikaṃ anītikadhammaṃ nibbānametaṃ sugatena desitaṃ.
@Footnote: 1 Ma. ajajjaraṃ.
Abyāpajjho virāgo ca suddhi mutti anālayo
dīpaṃ leṇañca tāṇañca saraṇañca parāyananti.
Asaṅkhatasaṃyuttaṃ samattaṃ.
------
Abyākatasaṃyuttaṃ
[752] Ekaṃ samayaṃ bhagavā sāvatthiyaṃ viharati jetavane anāthapiṇḍikassa
ārāme . tena kho pana samayena khemā bhikkhunī kosalesu cārikaṃ
caramānā antarā ca sāvatthiṃ antarā ca sāketaṃ toraṇavatthusmiṃ
vāsaṃ upagatā hoti . atha kho rājā pasenadikosalo sāketā
sāvatthiṃ gacchanto antarā ca sāvatthiṃ antarā ca sāketaṃ 1-
toraṇavatthusmiṃ ekarattivāsaṃ upagacchati 2- . atha kho rājā
pasenadikosalo aññataraṃ purisaṃ āmantesi ehi tvaṃ ambho
purisa toraṇavatthusmiṃ tathārūpaṃ samaṇaṃ vā brāhmaṇaṃ vā jāna
yamahaṃ ajja payirupāseyyanti . evaṃ devāti kho so puriso
rañño pasenadikosalassa paṭissutvā kevalakappaṃ toraṇavatthuṃ 3-
āhiṇḍanto nāddasa tathārūpaṃ samaṇaṃ vā brāhmaṇaṃ vā yaṃ
rājā pasenadikosalo payirupāseyya.
[753] Addasā kho so puriso khemaṃ bhikkhuniṃ toraṇavatthusmiṃ
vāsaṃ upagataṃ disvāna yena rājā pasenadikosalo tenupasaṅkami
upasaṅkamitvā rājānaṃ pasenadikosalaṃ etadavoca natthi kho deva
toraṇavatthusmiṃ tathārūpo samaṇo vā brāhmaṇo vā yaṃ devo
payirupāseyya . atthi ca kho deva khemā nāma bhikkhunī tassa
bhagavato sāvikā arahato sammāsambuddhassa . tassā kho pana
@Footnote: 1 Ma. Yu. antarā ca sāketaṃ antarā ca sāvatthiṃ. 2 Ma. Yu. upagacchi.
@3 Yu. toraṇavatthusmiṃ.
Ayyāya evaṃkalyāṇo kittisaddo abbhuggato paṇḍitā
byattā medhāvinī bahussutā cittakathī 1- kalyāṇapaṭibhāṇāti .
Taṃ devo payirupāsatūti.
[754] Atha kho rājā pasenadikosalo yena khemā bhikkhunī
tenupasaṅkami upasaṅkamitvā khemaṃ bhikkhuniṃ abhivādetvā ekamantaṃ
nisīdi . ekamantaṃ nisinno kho rājā pasenadikosalo khemaṃ bhikkhuniṃ
etadavoca kiṃ nu kho ayye hoti tathāgato paraṃ maraṇāti .
Abyākataṃ kho etaṃ mahārāja bhagavatā hoti tathāgato paraṃ maraṇāti.
Kiṃ panayye na hoti tathāgato paraṃ maraṇāti . etampi kho mahārāja
abyākataṃ bhagavatā na hoti tathāgato paraṃ maraṇāti . kiṃ nu
kho ayye hoti ca na ca hoti tathāgato paraṃ maraṇāti .
Abyākataṃ kho etaṃ mahārāja bhagavatā hoti ca na ca hoti tathāgato
paraṃ maraṇāti . kiṃ panayye neva hoti na na hoti tathāgato
paraṃ maraṇāti . etampi kho mahārāja abyākataṃ bhagavatā neva
hoti na na hoti tathāgato paraṃ maraṇāti.
[755] Kiṃ nu kho ayye hoti tathāgato paraṃ maraṇāti iti
puṭṭhā samānā abyākataṃ kho etaṃ mahārāja bhagavatā hoti tathāgato
paraṃ maraṇāti vadesi . kiṃ panayye na hoti tathāgato paraṃ maraṇāti
iti puṭṭhā samānā etampi kho mahārāja abyākataṃ bhagavatā na
hoti tathāgato paraṃ maraṇāti vadesi . kiṃ nu kho ayye hoti
@Footnote: 1 Ma. cittakathā.
Ca na ca hoti tathāgato paraṃ maraṇāti iti puṭṭhā samānā
abyākataṃ kho etaṃ mahārāja bhagavatā hoti ca na ca hoti
tathāgato paraṃ maraṇāti vadesi . kiṃ panayye neva hoti na na
hoti tathāgato paraṃ maraṇāti iti puṭṭhā samānā etampi kho
mahārāja abyākataṃ bhagavatā neva hoti na na hoti tathāgato paraṃ
maraṇāti vadesi . ko nu kho ayye hetu ko paccayo yenetaṃ
abyākataṃ bhagavatāti.
[756] Tenahi mahārāja taññevettha paṭipucchissāmi yathā te
khameyya tathā naṃ byākareyyāsi . taṃ kiṃ maññasi mahārāja atthi te
koci gaṇako vā muddiko vā saṅkhāyako vā yo pahoti gaṅgāya
vālikaṃ gaṇetuṃ ettakā vālikā iti vā ettakāni vālikasatāni
iti vā ettakāni vālikasahassāni iti vā ettakāni
vālikasatasahassāni iti vāti . no hetaṃ ayye . atthi pana te
koci gaṇako vā muddiko vā saṅkhāyako vā yo pahoti mahāsamudde
udakaṃ gaṇetuṃ ettakāni udakāḷhakāni iti vā ettakāni
udakāḷhakasatāni iti vā ettakāni udakāḷhakasahassāni iti
vā ettakāni udakāḷhakasatasahassāni iti vāti . no hetaṃ
ayye . taṃ kissa hetu . mahayye samuddo gambhīro appameyyo
duppariyogāhoti 1-.
[757] Evameva kho mahārāja yena rūpena tathāgataṃ
@Footnote: 1 duppariyogāḷhoti vā pāṭho.
Paññāpayamāno paññapeyya 1- taṃ rūpaṃ tathāgatassa pahīnaṃ
ucchinnamūlaṃ tālāvatthukataṃ anabhāvaṅgataṃ āyatiṃ anuppādadhammaṃ .
Rūpasaṅkhyā vimutto kho mahārāja tathāgato gambhīro appameyyo
duppariyogāho seyyathāpi mahārāja 2- mahāsamuddo . hoti
tathāgato paraṃ maraṇātipi na upeti na hoti tathāgato paraṃ maraṇātipi
na upeti hoti ca na ca hoti tathāgato paraṃ maraṇātipi na upeti
neva hoti na na hoti tathāgato paraṃ maraṇātipi na upeti.
{757.1} Yāya vedanāya tathāgataṃ paññāpayamāno
paññapeyya sā vedanā tathāgatassa pahīnā ucchinnamūlā
tālāvatthukatā anabhāvaṅgatā āyatiṃ anuppādadhammā .
Vedanāsaṅkhyā vimutto kho mahārāja tathāgato gambhīro
appameyyo duppariyogāho seyyathāpi mahārāja mahāsamuddo .
Hoti tathāgato paraṃ maraṇātipi na upeti na hoti tathāgato paraṃ
maraṇātipi na upeti hoti ca na ca hoti tathāgato paraṃ maraṇātipi
na upeti neva hoti na na hoti tathāgato paraṃ maraṇātipi na upeti.
{757.2} Yāya saññāya tathāgataṃ .pe. yehi saṅkhārehi
tathāgataṃ paññāpayamāno paññapeyya te saṅkhārā tathāgatassa
pahīnā ucchinnamūlā tālāvatthukatā anabhāvaṅgatā āyatiṃ
anuppādadhammā . saṅkhārasaṅkhyā vimutto kho mahārāja
tathāgato gambhīro appameyyo duppariyogāho
seyyathāpi mahārāja mahāsamuddo . hoti tathāgato paraṃ
maraṇātipi na upeti na hoti tathāgato paraṃ maraṇātipi na
@Footnote: 1 Ma. Yu. paññāpeyya. evamuparipi. 2 Ma. Yu. ayaṃ pāṭho natthi. evamuparipi.
Upeti hoti ca na ca hoti tathāgato paraṃ maraṇātipi na upeti
neva hoti na na hoti tathāgato paraṃ maraṇātipi na upeti .
Yena viññāṇena tathāgataṃ paññāpayamāno paññapeyya
taṃ viññāṇaṃ tathāgatassa pahīnaṃ ucchinnamūlaṃ tālāvatthukataṃ
anabhāvaṅgataṃ āyatiṃ anuppādadhammaṃ . viññāṇasaṅkhyā
vimutto kho mahārāja tathāgato gambhīro appameyyo
duppariyogāho seyyathāpi mahārāja mahāsamuddo . hoti
tathāgato paraṃ maraṇātipi na upeti na hoti tathāgato paraṃ
maraṇātipi na upeti hoti ca na ca hoti tathāgato paraṃ
maraṇātipi na upeti neva hoti na na hoti tathāgato paraṃ
maraṇātipi na upetīti . atha kho rājā pasenadikosalo
khemāya bhikkhuniyā bhāsitaṃ abhinanditvā anumoditvā
uṭṭhāyāsanā khemaṃ bhikkhuniṃ abhivādetvā padakkhiṇaṃ katvā
pakkāmi.
[758] Atha kho rājā pasenadikosalo aparena samayena yena
bhagavā tenupasaṅkami upasaṅkamitvā bhagavantaṃ abhivādetvā
ekamantaṃ nisīdi . ekamantaṃ nisinno kho rājā pasenadikosalo
bhagavantaṃ etadavoca kiṃ nu kho bhante hoti tathāgato paraṃ maraṇāti.
Abyākataṃ kho etaṃ mahārāja mayā hoti tathāgato paraṃ maraṇāti .
Kiṃ pana bhante na hoti tathāgato paraṃ maraṇāti . etampi kho
mahārāja abyākataṃ mayā na hoti tathāgato paraṃ maraṇāti .
Kiṃ nu kho bhante hoti ca na ca hoti tathāgato paraṃ
Maraṇāti . abyākataṃ kho etaṃ mahārāja mayā hoti ca na
ca hoti tathāgato paraṃ māṇāti . kiṃ pana bhante neva hoti
na na hoti tathāgato paraṃ maraṇāti . etampi kho mahārāja
abyākataṃ mayā neva hoti na na hoti tathāgato paraṃ maraṇāti .
Kiṃ nu kho bhante hoti tathāgato paraṃ maraṇāti iti puṭṭho
samāno abyākataṃ kho etaṃ mahārāja mayā hoti tathāgato
paraṃ maraṇāti vadesi .pe. kiṃ pana bhante neva hoti na na
hoti tathāgato paraṃ maraṇāti iti puṭṭho samāno etampi kho
mahārāja abyākataṃ mayā neva hoti na na hoti tathāgato
paraṃ maraṇāti vadesi . ko nu kho bhante hetu ko paccayo
yenetaṃ abyākataṃ bhagavatāti.
[759] Tenahi mahārāja taññevettha paṭipucchissāmi yathā
te khameyya tathā naṃ byākareyyāsi . taṃ kiṃ maññasi mahārāja
atthi te koci gaṇako vā muddiko vā saṅkhāyako vā yo
pahoti gaṅgāya vālikaṃ gaṇetuṃ ettakā vālikā iti vā .pe.
Ettakāni vālikasatasahassāni iti vāti . no hetaṃ bhante .
Atthi pana te koci gaṇako vā muddiko vā saṅkhāyako vā
yo pahoti mahāsamudde udakaṃ gaṇetuṃ ettakāni udakāḷhakāni
iti vā .pe. ettakāni udakāḷhakasatasahassāni iti vāti .
No hetaṃ bhante . taṃ kissa hetu . mahā hi 1- bhante samuddo
@Footnote: 1 Ma. Yu. hisaddo na dissati.
Gambhīro appameyyo duppariyogāhoti.
[760] Evameva kho mahārāja yena rūpena tathāgataṃ
paññāpayamāno paññapeyya taṃ rūpaṃ tathāgatassa pahīnaṃ
ucchinnamūlaṃ tālāvatthukataṃ anabhāvaṅgataṃ āyatiṃ anuppādadhammaṃ .
Rūpasaṅkhyā vimutto kho mahārāja tathāgato gambhīro appameyyo
duppariyogāho seyyathāpi mahārāja samuddo . hoti tathāgato
paraṃ maraṇātipi na upeti . na hoti tathāgato paraṃ maraṇātipi
na upeti hoti ca na ca hoti tathāgato paraṃ maraṇātipi na upeti
neva hoti na na hoti tathāgato paraṃ maraṇātipi na upeti . Yāya
vedanāya. Yāya saññāya. Yehi saṅkhārehi.
{760.1} Yena viññāṇena tathāgataṃ paññāpayamāno
paññapeyya taṃ viññāṇaṃ tathāgatassa pahīnaṃ ucchinnamūlaṃ
tālāvatthukataṃ anabhāvaṅgataṃ āyatiṃ anuppādadhammaṃ .
Viññāṇasaṅkhyā vimutto kho mahārāja tathāgato gambhīro
appameyyo duppariyogāho seyyathāpi mahārāja mahāsamuddo .
Hoti tathāgato paraṃ maraṇātipi na upeti na hoti tathāgato
paraṃ maraṇātipi na upeti hoti ca na ca hoti tathāgato paraṃ
maraṇātipi na upeti neva hoti na na hoti tathāgato paraṃ
maraṇātipi na upetīti.
[761] Acchariyaṃ bhante abbhutaṃ bhante yatra hi nāma satthu
ceva sāvikāya ca atthena attho byañjanena byañjanaṃ
Saṃsandissati samessati na vihāyissati 1- yadidaṃ aggapadasmiṃ .
Ekamidāhaṃ bhante samayaṃ khemaṃ bhikkhuniṃ upasaṅkamitvā etamatthaṃ
apucchiṃ . sāpi me ayyā etehi padehi etehi byañjanehi
etamatthaṃ byākāsi seyyathāpi bhagavā . acchariyaṃ bhante abbhutaṃ
bhante yatra hi nāma satthu ceva sāvikāya ca atthena attho
byañjanena byañjanaṃ saṃsandissati samessati na vihāyissati
yadidaṃ aggapadasmiṃ . handadāni mayaṃ bhante gacchāma bahukiccā
mayaṃ bahukaraṇīyāti . yassadāni tvaṃ mahārāja kālaṃ maññasīti .
Atha kho rājā pasenadikosalo bhagavato bhāsitaṃ abhinanditvā
anumoditvā uṭṭhāyāsanā bhagavantaṃ abhivādetvā padakkhiṇaṃ
katvā pakkāmīti. Paṭhamaṃ.
[762] Evamme sutaṃ ekaṃ samayaṃ bhagavā vesāliyaṃ viharati
mahāvane kūṭāgārasālāyaṃ . tena kho pana samayena āyasmā
anurādho bhagavato avidūre araññakuṭikāyaṃ viharati . atha kho
sambahulā aññatitthiyā paribbājakā yenāyasmā anurādho
tenupasaṅkamiṃsu upasaṅkamitvā āyasmatā anurādhena saddhiṃ sammodiṃsu
sammodanīyaṃ kathaṃ sārāṇīyaṃ vītisāretvā ekamantaṃ nisīdiṃsu .
Ekamantaṃ nisinnā kho te aññatitthiyā paribbājakā āyasmantaṃ
anurādhaṃ etadavocuṃ yo so āvuso anurādha tathāgato uttamapuriso
paramapuriso paramapattipatto taṃ tathāgato imesu catūsu ṭhānesu
@Footnote: 1 Ma. Yu. na virodhayissati. evamuparipi.
Paññāpayamāno paññapeti hoti tathāgato paraṃ maraṇāti vā
na hoti tathāgato paraṃ maraṇāti vā hoti ca na ca hoti
tathāgato paraṃ maraṇāti vā neva hoti na na hoti tathāgato
paraṃ maraṇāti vāti . yo so āvuso tathāgato uttamapuriso
paramapuriso paramapattipatto taṃ tathāgato aññatra imehi catūhi
ṭhānehi paññāpayamāno paññapeti hoti tathāgato paraṃ maraṇāti
vā na hoti tathāgato paraṃ maraṇāti vā hoti ca na ca
hoti tathāgato paraṃ maraṇāti vā neva hoti na na hoti
tathāgato paraṃ maraṇāti vāti.
[763] Evaṃ vutte te aññatitthiyā paribbājakā āyasmantaṃ
anurādhaṃ etadavocuṃ so cāyaṃ bhikkhu navo bhavissati acirapabbajito
thero vā pana bālo abyattoti . atha kho te aññatitthiyā
paribbājakā āyasmantaṃ anurādhaṃ navavādena ca bālavādena ca
apasādetvā uṭṭhāyāsanā pakkamiṃsu.
{763.1} Atha kho āyasmato anurādhassa acirapakkantesu
aññatitthiyesu paribbājakesu etadahosi sace kho maṃ te
aññatitthiyā paribbājakā uttariṃ puccheyyuṃ kathaṃ byākaramāno
nu khvāhaṃ tesaṃ aññatitthiyānaṃ paribbājakānaṃ vuttavādī ceva
bhagavato assaṃ na ca bhagavantaṃ abhūtena abbhācikkheyyaṃ dhammassa
cānudhammaṃ byākareyyaṃ na ca koci sahadhammiko vādānupāto
gārayhaṃ ṭhānaṃ āgaccheyyāti.
[764] Atha kho āyasmā anurādho yena bhagavā tenupasaṅkami
upasaṅkamitvā bhagavantaṃ abhivādetvā ekamantaṃ nisīdi . ekamantaṃ
nisinno kho āyasmā anurādho bhagavantaṃ etadavoca idhāhaṃ
bhante bhagavato avidūre araññakuṭikāyaṃ viharāmi . atha kho bhante
sambahulā aññatitthiyā paribbājakā yenāhaṃ tenupasaṅkamiṃsu
upasaṅkamitvā mayā saddhiṃ sammodiṃsu sammodanīyaṃ kathaṃ sārāṇīyaṃ
vītisāretvā ekamantaṃ nisīdiṃsu . ekamantaṃ nisinnā kho bhante
te aññatitthiyā paribbājakā maṃ etadavocuṃ yo so āvuso
anurādha tathāgato uttamapuriso paramapuriso paramapattipatto taṃ
tathāgato imesu catūsu ṭhānesu paññāpayamāno paññapeti hoti
tathāgato paraṃ maraṇāti vā .pe. neva hoti na na hoti
tathāgato paraṃ maraṇāti vāti . evaṃ vuttohaṃ bhante te
aññatitthiye paribbājake etadavocaṃ yo so āvuso tathāgato
uttamapuriso paramapuriso paramapattipatto taṃ tathāgato aññatra
imehi catūhi ṭhānehi paññāpayamāno paññapeti hoti tathāgato
paraṃ maraṇāti vā .pe. neva hoti na na hoti tathāgato
paraṃ maraṇāti vāti . evaṃ vutte bhante te aññatitthiyā
paribbājakā maṃ etadavocuṃ so cāyaṃ bhikkhu navo bhavissati
acirapabbajito thero vā pana bālo abyattoti . atha kho maṃ
bhante te aññatitthiyā paribbājakā navavādena ca bālavādena
Ca apasādetvā uṭṭhāyāsanā pakkamiṃsu . tassa mayhaṃ bhante
acirapakkantesu tesu aññatitthiyesu paribbājakesu etadahosi
sace kho maṃ te aññatitthiyā paribbājakā uttariṃ puccheyyuṃ kathaṃ
byākaramāno nu khvāhaṃ tesaṃ aññatitthiyānaṃ paribbājakānaṃ
vuttavādī ceva bhagavato assaṃ na ca bhagavantaṃ abhūtena
abbhācikkheyyaṃ dhammassa cānudhammaṃ byākareyyaṃ na ca koci
sahadhammiko vādānupāto gārayhaṃ ṭhānaṃ gaccheyyāti.
[765] Taṃ kiṃ maññasi anurādha rūpaṃ niccaṃ vā aniccaṃ vāti.
Aniccaṃ bhante . yaṃ panāniccaṃ dukkhaṃ vā taṃ sukhaṃ vāti .
Dukkhaṃ bhante . yaṃ panāniccaṃ dukkhaṃ vipariṇāmadhammaṃ kallaṃ nu
taṃ samanupassituṃ etaṃ mama esohamasmi eso me attāti .
No hetaṃ bhante . vedanā niccā vā aniccā vāti .pe.
Saññā . saṅkhārā . viññāṇaṃ niccaṃ vā aniccaṃ vāti .
Aniccaṃ bhante . yaṃ panāniccaṃ dukkhaṃ vā taṃ sukhaṃ vāti . dukkhaṃ
bhante . yaṃ panāniccaṃ dukkhaṃ vipariṇāmadhammaṃ kallaṃ nu taṃ
samanupassituṃ etaṃ mama esohamasmi eso me attāti .
No hetaṃ bhante.
[766] Tasmātiha anurādha yaṅkiñci rūpaṃ atītānāgatapaccuppannaṃ
ajjhattaṃ vā bahiddhā vā oḷārikaṃ vā sukhumaṃ vā hīnaṃ vā
paṇītaṃ vā yaṃ dūre santike vā sabbaṃ rūpaṃ netaṃ mama nesohamasmi
Na meso attāti . evametaṃ yathābhūtaṃ sammappaññāya
daṭṭhabbaṃ . yā kāci vedanā atītānāgatapaccuppannā .
Yā kāci saññā . ye keci saṅkhārā . yaṅkiñci viññāṇaṃ
atītānāgatapaccuppannaṃ ajjhattaṃ vā bahiddhā vā oḷārikaṃ vā
sukhumaṃ vā hīnaṃ vā paṇītaṃ vā yaṃ dūre santike vā sabbaṃ viññāṇaṃ
netaṃ mama nesohamasmi na meso attāti . evametaṃ yathābhūtaṃ
sammappaññāya daṭṭhabbaṃ . evaṃ passaṃ anurādha sutavā ariyasāvako
rūpasmiṃpi nibbindati vedanāyapi nibbindati saññāyapi nibbindati
saṅkhāresupi nibbindati viññāṇasmiṃpi nibbindati nibbindaṃ
virajjati virāgā vimuccati . vimuttasmiṃ vimuttamiti ñāṇaṃ hoti .
Khīṇā jāti vusitaṃ brahmacariyaṃ kataṃ karaṇīyaṃ nāparaṃ itthattāyāti
pajānāti.
[767] Taṃ kiṃ maññasi anurādha rūpaṃ tathāgatoti samanupassasīti .
No hetaṃ bhante . vedanaṃ tathāgatoti samanupassasīti. No hetaṃ bhante.
Saññaṃ tathāgatoti samanupassasīti . no hetaṃ bhante . saṅkhāre
tathāgatoti samanupassasīti . no hetaṃ bhante . viññāṇaṃ tathāgatoti
samanupassasīti. No hetaṃ bhante.
[768] Taṃ kiṃ maññasi anurādha rūpasmiṃ tathāgatoti
samanupassasīti . no hetaṃ bhante . aññatra rūpā tathāgatoti
samanupassasīti . no hetaṃ bhante . vedanāya tathāgatoti
samanupassasīti . no hetaṃ bhante . aññatra vedanāya .pe.
Saññāya .pe. aññatra saññāya .pe. saṅkhāresu .pe.
Aññatra saṅkhārehi .pe. viññāṇasmiṃ tathāgatoti samanupassasīti .
No hetaṃ bhante . aññatra viññāṇā tathāgatoti samanupassasīti .
No hetaṃ bhante.
[769] Taṃ kiṃ maññasi anurādha rūpaṃ vedanaṃ saññaṃ saṅkhāre
viññāṇaṃ tathāgatoti samanupassasīti. No hetaṃ bhante.
[770] Taṃ kiṃ maññasi anurādha yaṃ so arūpī avedano asaññī
asaṅkhāro aviññāṇo tathāgatoti samanupassasīti . no hetaṃ
bhante . ettha ca te anurādha diṭṭhe va dhamme saccato 1- vā
tathato vā anupalabbhiyamāno kallaṃ nu te taṃ veyyākaraṇaṃ yo
so āvuso tathāgato uttamapuriso paramapuriso paramapattipatto
taṃ tathāgato aññatrimehi catūhi ṭhānehi paññāpayamāno paññapeti
hoti tathāgato paraṃ maraṇāti vā .pe. neva hoti na na hoti
tathāgato paraṃ maraṇāti vāti . no hetaṃ bhante . sādhu sādhu
anurādha pubbe cāhaṃ anurādha etarahi ca dukkhañceva paññapemi
dukkhassa ca nirodhanti. Dutiyaṃ.
[771] Ekaṃ samayaṃ āyasmā ca sārīputto āyasmā ca mahākoṭṭhito 2-
bārāṇasiyaṃ viharanti isipatane migadāye . atha kho āyasmā
@Footnote: 1 Ma. saccato thetato tathāgato anupalabbhiyamāno . 2 Ma. Yu. mahākoṭṭhiko.
@evamuparipi.
Mahākoṭṭhito sāyaṇhasamayaṃ paṭisallānā vuṭṭhito yenāyasmā
sārīputto tenupasaṅkami upasaṅkamitvā āyasmatā sārīputtena
saddhiṃ sammodi sammodanīyaṃ kathaṃ sārāṇīyaṃ vītisāretvā ekamantaṃ
nisīdi.
{771.1} Ekamantaṃ nisinno kho āyasmā mahākoṭṭhito
āyasmantaṃ sārīputtaṃ etadavoca kiṃ nu kho āvuso sārīputta hoti
tathāgato paraṃ maraṇāti . abyākataṃ kho etaṃ āvuso bhagavatā hoti
tathāgato paraṃ maraṇāti . kiṃ panāvuso na hoti tathāgato paraṃ
maraṇāti . etampi kho āvuso abyākataṃ bhagavatā na hoti
tathāgato paraṃ maraṇāti . kiṃ nu kho āvuso hoti ca na ca hoti
tathāgato paraṃ maraṇāti . abyākataṃ kho etaṃ āvuso bhagavatā
hoti ca na ca hoti tathāgato paraṃ maraṇāti . kiṃ panāvuso neva
hoti na na hoti tathāgato paraṃ maraṇāti . etampi kho āvuso
abyākataṃ bhagavatā neva hoti na na hoti tathāgato paraṃ maraṇāti.
{771.2} Kiṃ nu kho āvuso hoti tathāgato paraṃ maraṇāti iti
puṭṭho samāno abyākataṃ kho etaṃ āvuso bhagavatā hoti tathāgato
paraṃ maraṇāti vadesi .pe. kiṃ panāvuso neva hoti na na hoti
tathāgato paraṃ maraṇāti iti puṭṭho samāno etampi kho āvuso
abyākataṃ bhagavatā neva hoti na na hoti tathāgato paraṃ maraṇāti
vadesi . ko nu kho āvuso hetu ko paccayo yenetaṃ 1- abyākataṃ
bhagavatāti.
@Footnote: 1 Yu. yena taṃ. evamuparipi.
[772] Hoti tathāgato paraṃ maraṇāti kho āvuso rūpagatametaṃ.
Na hoti tathāgato paraṃ maraṇāti rūpagatametaṃ . hoti ca na ca
hoti tathāgato paraṃ maraṇāti rūpagatametaṃ . neva hoti na
na hoti tathāgato paraṃ maraṇāti rūpagatametaṃ . hoti tathāgato
paraṃ maraṇāti kho āvuso vedanāgatametaṃ . na hoti tathāgato
paraṃ maraṇāti vedanāgatametaṃ . hoti ca na ca hoti tathāgato
paraṃ maraṇāti vedanāgatametaṃ . neva hoti na na hoti tathāgato
paraṃ maraṇāti vedanāgatametaṃ . hoti tathāgato paraṃ maraṇāti
kho āvuso saññāgatametaṃ . na hoti tathāgato paraṃ maraṇāti
saññāgatametaṃ . hoti ca na ca hoti tathāgato paraṃ maraṇāti
saññāgatametaṃ . neva hoti na na hoti tathāgato paraṃ maraṇāti
saññāgatametaṃ . hoti tathāgato paraṃ maraṇāti kho āvuso
saṅkhāragatametaṃ . na hoti tathāgato paraṃ maraṇāti saṅkhāragatametaṃ .
Hoti ca na ca hoti tathāgato paraṃ maraṇāti saṅkhāragatametaṃ .
Neva hoti na na hoti tathāgato paraṃ maraṇāti saṅkhāragatametaṃ .
Hoti tathāgato paraṃ maraṇāti kho āvuso viññāṇagatametaṃ .
Na hoti tathāgato paraṃ maraṇāti viññāṇagatametaṃ . hoti ca na
ca hoti tathāgato paraṃ maraṇāti viññāṇagatametaṃ . neva hoti
na na hoti tathāgato paraṃ maraṇāti viññāṇagatametaṃ . ayaṃ kho
āvuso hetu ayaṃ paccayo yenetaṃ abyākataṃ bhagavatāti. Tatiyaṃ.
[773] Ekaṃ samayaṃ āyasmā ca sārīputto āyasmā ca
mahākoṭṭhito bārāṇasiyaṃ viharanti isipatane migadāye .pe.
Sāyeva pucchā . ko nu kho āvuso hetu ko paccayo yenetaṃ
abyākataṃ bhagavatāti.
[774] Rūpaṃ kho āvuso ajānato apassato yathābhūtaṃ rūpasamudayaṃ
ajānato apassato yathābhūtaṃ rūpanirodhaṃ ajānato apassato
yathābhūtaṃ rūpanirodhagāminīpaṭipadaṃ ajānato apassato yathābhūtaṃ hoti
tathāgato paraṃ maraṇātipissa hoti . na hoti tathāgato paraṃ
maraṇātipissa hoti . hoti ca na ca hoti tathāgato paraṃ maraṇātipissa
hoti . neva hoti na na hoti tathāgato paraṃ maraṇātipissa
hoti . vedanaṃ . saññaṃ . saṅkhāre . viññāṇaṃ ajānato apassato
yathābhūtaṃ viññāṇasamudayaṃ ajānato apassato yathābhūtaṃ viññāṇanirodhaṃ
ajānato apassato yathābhūtaṃ viññāṇanirodhagāminīpaṭipadaṃ
ajānato apassato yathābhūtaṃ hoti tathāgato paraṃ maraṇātipissa
hoti . na hoti tathāgato paraṃ maraṇātipissa hoti . hoti
ca na ca hoti tathāgato paraṃ maraṇātipissa hoti . neva hoti
na na hoti tathāgato paraṃ maraṇātipissa hoti.
[775] Rūpañca kho āvuso jānato passato yathābhūtaṃ rūpasamudayaṃ
jānato passato yathābhūtaṃ rūpanirodhaṃ jānato passato yathābhūtaṃ
rūpanirodhagāminīpaṭipadaṃ jānato passato yathābhūtaṃ hoti tathāgato
Paraṃ maraṇātipissa na hoti .pe. neva hoti na na hoti tathāgato
paraṃ maraṇātipissa na hoti na vedanaṃ . saññaṃ . saṅkhāre .
Viññāṇaṃ jānato passato yathābhūtaṃ viññāṇasamudayaṃ jānato
passato yathābhūtaṃ viññāṇanirodhaṃ jānato passato yathābhūtaṃ
viññāṇanirodhagāminīpaṭipadaṃ jānato passato yathābhūtaṃ hoti tathāgato
paraṃ maraṇātipissa na hoti . na hoti tathāgato paraṃ maraṇātipissa
na hoti . hoti ca na ca hoti tathāgato paraṃ maraṇātipissa
na hoti . neva hoti na na hoti tathāgato paraṃ maraṇātipissa
na hoti . ayaṃ kho āvuso hetu ayaṃ paccayo yenetaṃ abyākataṃ
bhagavatāti. Catutthaṃ.
[776] Ekaṃ samayaṃ āyasmā ca sārīputto āyasmā ca
mahākoṭṭhito bārāṇasiyaṃ viharanti isipatane migadāye .pe.
Sāyeva pucchā . ko nu kho āvuso hetu ko paccayo yenetaṃ
abyākataṃ bhagavatāti.
[777] Rūpe kho āvuso avigatarāgassa avigatacchandassa
avigatapemassa avigatapipāsassa avigatapariḷāhassa avigatataṇhassa
hoti tathāgato paraṃ maraṇātipissa hoti .pe. neva hoti na na hoti
tathāgato paraṃ maraṇātipissa hoti . vedanāya . saññāya .
Saṅkhāresu . viññāṇe avigatarāgassa avigatacchandassa avigatapemassa
avigatapipāsassa avigatapariḷāhassa avigatataṇhassa hoti tathāgato
Paraṃ maraṇātipissa hoti .pe. neva hoti na na hoti tathāgato
paraṃ maraṇātipissa hoti.
[778] Rūpe ca kho āvuso vigatarāgassa .pe. vedanāya.
Saññāya . saṅkhāresu . viññāṇe vigatarāgassa vigatacchandassa
vigatapemassa vigatapipāsassa vigatapariḷāhassa vigatataṇhassa hoti
tathāgato paraṃ maraṇātipissa na hoti .pe. neva hoti na na
hoti tathāgato paraṃ maraṇātipissa na hoti . ayaṃ kho āvuso
hetu ayaṃ paccayo yenetaṃ abyākataṃ bhagavatāti. Pañcamaṃ.
[779] Ekaṃ samayaṃ āyasmā ca sārīputto āyasmā ca
mahākoṭṭhito bārāṇasiyaṃ viharanti isipatane migadāye . atha kho
āyasmā sārīputto sāyaṇhasamayaṃ paṭisallānā vuṭṭhito
yenāyasmā mahākoṭṭhito tenupasaṅkami upasaṅkamitvā āyasmatā
mahākoṭṭhitena saddhiṃ sammodi sammodanīyaṃ kathaṃ sārāṇīyaṃ vītisāretvā
ekamantaṃ nisīdi . ekamantaṃ nisinno kho āyasmā sārīputto
āyasmantaṃ mahākoṭṭhitaṃ etadavoca kiṃ nu kho āvuso
mahākoṭṭhitā hoti tathāgato paraṃ maraṇāti .pe. kiṃ panāvuso neva
hoti na na hoti tathāgato paraṃ maraṇāti . iti puṭṭho samāno
etampi kho āvuso abyākataṃ bhagavatā neva hoti na na hoti
tathāgato paraṃ maraṇāti vadesi . ko nu kho āvuso hetu ko
paccayo yenetaṃ abyākataṃ bhagavatāti.
[780] Rūpārāmassa kho āvuso rūparatassa rūpasammuditassa
rūpanirodhaṃ ajānato apassato yathābhūtaṃ hoti tathāgato paraṃ
maraṇātipissa hoti . na hoti tathāgato paraṃ maraṇātipissa hoti .
Hoti ca na ca hoti tathāgato paraṃ maraṇātipissa hoti . Neva hoti
na na hoti tathāgato paraṃ maraṇātipissa hoti . vedanārāmassa
kho āvuso vedanāratassa vedanāsammuditassa vedanānirodhaṃ ajānato
apassato yathābhūtaṃ hoti tathāgato paraṃ maraṇātipissa hoti .pe.
Saññārāmassa kho āvuso . saṅkhārārāmassa kho āvuso .
Viññāṇārāmassa kho āvuso viññāṇaratassa viññāṇasammuditassa
viññāṇanirodhaṃ ajānato apassato yathābhūtaṃ hoti tathāgato paraṃ
maraṇātipissa hoti .pe. neva hoti na na hoti tathāgato
paraṃ maraṇātipissa hoti.
[781] Na rūpārāmassa kho āvuso na rūparatassa na rūpasammuditassa
rūpanirodhaṃ jānato passato yathābhūtaṃ hoti tathāgato paraṃ maraṇātipissa
na hoti .pe. Neva hoti na na hoti tathāgato paraṃ maraṇātipissa na hoti.
Na vedanārāmassa kho āvuso . na saññārāmassa kho āvuso .
Na saṅkhārārāmassa kho āvuso . na viññāṇārāmassa kho āvuso
na viññāṇaratassa na viññāṇasammuditassa viññāṇanirodhaṃ jānato
passato yathābhūtaṃ hoti tathāgato paraṃ maraṇātipissa na hoti. Na hoti
Tathāgato .pe. neva hoti na na hoti tathāgato paraṃ maraṇātipissa
na hoti . ayampi 1- kho āvuso hetu ayaṃ paccayo
yenetaṃ abyākataṃ bhagavatāti.
[782] Siyā panāvuso aññopi pariyāyo yena pariyāyenetaṃ 2-
abyākataṃ bhagavatāti . siyā āvuso . bhavārāmassa kho āvuso
bhavaratassa bhavasammuditassa bhavanirodhaṃ ajānato apassato yathābhūtaṃ
hoti tathāgato paraṃ maraṇātipissa hoti .pe. neva hoti na na hoti
tathāgato paraṃ maraṇātipissa hoti.
[783] Na bhavārāmassa kho āvuso na bhavaratassa na bhavasammuditassa
bhavanirodhaṃ jānato passato yathābhūtaṃ hoti tathāgato paraṃ maraṇātipissa
na hoti .pe. neva hoti na na hoti tathāgato paraṃ maraṇātipissa
na hoti. Ayampi kho āvuso pariyāyo yenetaṃ abyākataṃ bhagavatāti.
[784] Siyā panāvuso aññopi pariyāyo yenetaṃ abyākataṃ
bhagavatāti . siyā āvuso . upādānārāmassa kho āvuso
upādānaratassa upādānasammuditassa upādānanirodhaṃ ajānato
apassato yathābhūtaṃ hoti tathāgato paraṃ maraṇātipissa hoti .pe.
Neva hoti na na hoti tathāgato paraṃ maraṇātipissa hoti.
[785] Na upādānārāmassa kho āvuso na upādānaratassa
na upādānasammuditassa upādānanirodhaṃ jānato passato yathābhūtaṃ
@Footnote: 1 Ma. Yu. ayaṃ kho. 2 Ma. yenetaṃ. Yu. yena etaṃ.
Hoti tathāgato paraṃ maraṇātipissa na hoti .pe. neva hoti
na na hoti tathāgato paraṃ maraṇātipissa na hoti . ayampi kho
āvuso pariyāyo yenetaṃ abyākataṃ bhagavatāti.
[786] Siyā panāvuso aññopi pariyāyo yenetaṃ abyākataṃ
bhagavatāti . siyā āvuso . taṇhārāmassa kho āvuso taṇhāratassa
taṇhāsammuditassa taṇhānirodhaṃ ajānato apassato yathābhūtaṃ
hoti tathāgato paraṃ maraṇātipissa hoti .pe. neva hoti na
na hoti tathāgato paraṃ maraṇātipissa hoti.
[787] Na taṇhārāmassa kho āvuso na taṇhāratassa na
taṇhāsammuditassa taṇhānirodhaṃ jānato passato yathābhūtaṃ hoti
tathāgato paraṃ maraṇātipissa na hoti .pe. neva hoti na na
hoti tathāgato paraṃ maraṇātipissa na hoti . ayaṃ kho āvuso
pariyāyo yenetaṃ abyākataṃ bhagavatāti . siyā panāvuso aññopi
pariyāyo yenetaṃ abyākataṃ bhagavatāti . etthadāni āvuso
sārīputta ito uttariṃ kiṃ icchasi taṇhāsaṅkhayavimuttassa āvuso
sārīputta bhikkhuno vattaṃ 1- natthi paññāpanāyāti. Chaṭṭhaṃ.
[788] Atha kho vacchagotto paribbājako yenāyasmā mahāmoggallāno
tenupasaṅkami upasaṅkamitvā āyasmatā mahāmoggallānena saddhiṃ
sammodi sammodanīyaṃ kathaṃ sārāṇīyaṃ vītisāretvā ekamantaṃ
nisīdi . ekamantaṃ nisinno kho vacchagotto paribbājako
@Footnote: 1 Ma. Yu. vaṭṭaṃ.
Āyasmantaṃ mahāmoggallānaṃ etadavoca kiṃ nu kho bho moggallāna
sassato lokoti . abyākataṃ kho etaṃ vaccha bhagavatā sassato
lokoti . kiṃ panāvuso bho moggallāna asassato lokoti. Etampi
kho vaccha abyākataṃ bhagavatā asassato lokoti . kiṃ nu kho bho
moggallāna antavā lokoti . abyākataṃ kho etaṃ vaccha bhagavatā
antavā lokoti . kiṃ pana bho moggallāna anantavā lokoti .
Etampi kho vaccha abyākataṃ bhagavatā anantavā lokoti . kiṃ
nu kho bho moggallāna taṃ jīvaṃ taṃ sarīranti . abyākataṃ kho etaṃ
vaccha bhagavatā taṃ jīvaṃ taṃ sarīranti . kiṃ pana bho moggallāna
aññaṃ jīvaṃ aññaṃ sarīranti . etampi kho vaccha abyākataṃ
bhagavatā aññaṃ jīvaṃ aññaṃ sarīranti . kiṃ pana bho moggallāna
hoti tathāgato paraṃ maraṇāti . abyākataṃ kho etaṃ vaccha bhagavatā
hoti tathāgato paraṃ maraṇāti . kiṃ pana bho moggallāna na
hoti tathāgato paraṃ maraṇāti . etampi kho vaccha abyākataṃ
bhagavatā na hoti tathāgato paraṃ maraṇāti . kiṃ nu kho bho
moggallāna hoti ca na ca hoti tathāgato paraṃ maraṇāti .
Abyākataṃ kho etaṃ vaccha bhagavatā hoti ca na ca hoti tathāgato
paraṃ maraṇāti . kiṃ pana bho moggallāna neva hoti na na hoti
tathāgato paraṃ maraṇāti . etampi kho vaccha abyākataṃ bhagavatā
neva hoti na na hoti tathāgato paraṃ maraṇāti.
[789] Ko nu kho bho moggallāna hetu ko paccayo yena
aññatitthiyānaṃ paribbājakānaṃ evaṃ puṭṭhānaṃ evaṃ veyyākaraṇaṃ hoti
sassato lokoti vā asassato lokoti vā antavā lokoti vā
anantavā lokoti vā taṃ jīvaṃ taṃ sarīranti vā aññaṃ jīvaṃ aññaṃ
sarīranti vā hoti tathāgato paraṃ maraṇāti vā na hoti tathāgato
paraṃ maraṇāti vā hoti ca na ca hoti tathāgato paraṃ maraṇāti
vā neva hoti na na hoti tathāgato paraṃ maraṇāti vā . Ko pana
bho moggallāna hetu ko paccayo yena samaṇassa gotamassa evaṃ
puṭṭhassa na evaṃ veyyākaraṇaṃ hoti sassato lokotipi asassato
lokotipi antavā lokotipi anantavā lokotipi taṃ jīvaṃ taṃ sarīrantipi
aññaṃ jīvaṃ aññaṃ sarīrantipi hoti tathāgato paraṃ maraṇātipi na
hoti tathāgato paraṃ maraṇātipi hoti ca na ca hoti tathāgato paraṃ
maraṇātipi neva hoti na na hoti tathāgato paraṃ maraṇātipīti.
[790] Aññatitthiyā ca 1- kho vaccha paribbājakā cakkhuṃ etaṃ
mama esohamasmi eso me attāti samanupassanti .pe. jivhaṃ
etaṃ mama esohamasmi eso me attāti samanupassanti .pe.
Manaṃ etaṃ mama esohamasmi eso me attāti samanupassanti .
Tasmā aññatitthiyānaṃ paribbājakānaṃ evaṃ puṭṭhānaṃ evaṃ veyyākaraṇaṃ
hoti sassato lokoti vā .pe. neva hoti na na hoti tathāgato
paraṃ maraṇāti vā . tathāgato ca kho vaccha arahaṃ sammāsambuddho
@Footnote: 1 Ma. casaddo natthi.
Cakkhuṃ netaṃ mama nesohamasmi na meso attāti samanupassati .pe.
Jivhaṃ netaṃ mama nesohamasmi na meso attāti samanupassati .pe.
Manaṃ netaṃ mama nesohamasmi na meso attāti samanupassati .
Tasmā tathāgatassa evaṃ puṭṭhassa na evaṃ veyyākaraṇaṃ hoti sassato
lokotipi .pe. Neva hoti na na hoti tathāgato paraṃ maraṇātipīti.
[791] Atha kho vacchagotto paribbājako uṭṭhāyāsanā yena bhagavā
tenupasaṅkami upasaṅkamitvā bhagavatā saddhiṃ sammodi sammodanīyaṃ
kathaṃ sārāṇīyaṃ vītisāretvā ekamantaṃ nisīdi . ekamantaṃ nisinno
kho vacchagotto paribbājako bhagavantaṃ etadavoca kiṃ nu kho bho
gotama sassato lokoti . abyākataṃ kho etaṃ vaccha mayā sassato
lokoti .pe. kiṃ pana bho gotama neva hoti na na hoti
tathāgato paraṃ maraṇāti . etampi kho vaccha abyākataṃ mayā neva
hoti na na hoti tathāgato paraṃ maraṇāti . ko nu kho bho gotama
hetu ko paccayo yena aññatitthiyānaṃ paribbājakānaṃ evaṃ
puṭṭhānaṃ evaṃ veyyākaraṇaṃ hoti sassato lokoti vā .pe. neva
hoti na na hoti tathāgato paraṃ maraṇāti vā . ko pana bho gotama
hetu ko paccayo yena bhoto gotamassa evaṃ puṭṭhassa na evaṃ
veyyākaraṇaṃ hoti sassato lokotipi .pe. neva hoti na na hoti
tathāgato paraṃ maraṇātipīti.
[792] Aññatitthiyā kho vaccha paribbājakā cakkhuṃ etaṃ mama
Esohamasmi eso me attāti samanupassanti .pe. jivhaṃ etaṃ
mama esohamasmi eso me attāti samanupassanti .pe. manaṃ
etaṃ mama esohamasmi eso me attāti samanupassanti . tasmā
aññatitthiyānaṃ paribbājakānaṃ evaṃ puṭṭhānaṃ evaṃ veyyākaraṇaṃ hoti
sassato lokoti vā .pe. neva hoti na na hoti tathāgato
paraṃ maraṇāti vā . tathāgato ca kho vaccha arahaṃ sammāsambuddho
cakkhuṃ netaṃ mama nesohamasmi na meso attāti samanupassati .pe.
Jivhaṃ netaṃ mama nesohamasmi na meso attāti samanupassati .pe.
Manaṃ netaṃ mama nesohamasmi na meso attāti samanupassati .
Tasmā tathāgatassa evaṃ puṭṭhassa na evaṃ veyyākaraṇaṃ hoti
sassato lokotipi asassato lokotipi antavā lokotipi anantavā
lokotipi taṃ jīvaṃ taṃ sarīrantipi aññaṃ jīvaṃ aññaṃ sarīrantipi
hoti tathāgato paraṃ maraṇātipi na hoti tathāgato paraṃ maraṇātipi
hoti ca na ca hoti tathāgato paraṃ maraṇātipi neva hoti na na
hoti tathāgato paraṃ maraṇātipīti.
[793] Acchariyaṃ bho gotama abbhutaṃ bho gotama yatra hi nāma
satthu ca sāvakassa ca atthena attho byañjanena byañjanaṃ saṃsandissati
samessati na vihāyissati 1- yadidaṃ aggapadasmiṃ . idānāhaṃ
bho gotama samaṇaṃ mahāmoggallānaṃ upasaṅkamitvā etamatthaṃ
apucchiṃ samaṇopi me mahāmoggallāno etehi padehi etehi
@Footnote: 1 Ma. na virodhayissati.
Byañjanehi etamatthaṃ 1- byākāsi seyyathāpi bhavaṃ gotamo .
Acchariyaṃ bho gotama abbhutaṃ bho gotama yatra hi nāma satthu ca
sāvakassa ca atthena attho byañjanena byañjanaṃ saṃsandissati
samessati na vihāyissati yadidaṃ aggapadasminti. Sattamaṃ.
[794] Atha kho vacchagotto paribbājako yena bhagavā
tenupasaṅkami upasaṅkamitvā bhagavatā saddhiṃ sammodi sammodanīyaṃ
kathaṃ sārāṇīyaṃ vītisāretvā ekamantaṃ nisīdi . ekamantaṃ nisinno
kho vacchagotto paribbājako bhagavantaṃ etadavoca kiṃ nu kho bho
gotama sassato lokoti . abyākataṃ kho etaṃ vaccha mayā sassato
lokoti .pe. kiṃ pana bho gotama neva hoti na na hoti
tathāgato paraṃ maraṇāti . etampi kho vaccha abyākataṃ mayā
neva hoti na na hoti tathāgato paraṃ maraṇāti . ko nu kho
bho gotama hetu ko paccayo yena aññatitthiyānaṃ paribbājakānaṃ
evaṃ puṭṭhānaṃ evaṃ veyyākaraṇaṃ hoti sassato lokoti vā .pe.
Neva hoti na na hoti tathāgato paraṃ maraṇāti vā . ko pana
bho gotama hetu ko paccayo yena bhoto gotamassa evaṃ
puṭṭhassa na evaṃ veyyākaraṇaṃ hoti sassato lokotipi .pe.
Neva hoti na na hoti tathāgato paraṃ maraṇātipīti.
[795] Aññatitthiyā kho vaccha paribbājakā rūpaṃ attato
samanupassanti rūpavantaṃ vā attānaṃ attani vā rūpaṃ rūpasmiṃ vā
@Footnote: 1 Ma. tamatthaṃ.
Attānaṃ . vedanaṃ attato samanupassanti .pe. saññaṃ saṅkhāre
viññāṇaṃ attato samanupassanti viññāṇavantaṃ vā attānaṃ
attani vā viññāṇaṃ viññāṇasmiṃ vā attānaṃ . tasmā
aññatitthiyānaṃ paribbājakānaṃ evaṃ puṭṭhānaṃ evaṃ veyyākaraṇaṃ hoti
sassato lokoti vā .pe. neva hoti na na hoti tathāgato
paraṃ maraṇāti vā . tathāgato ca kho vaccha arahaṃ sammāsambuddho
na rūpaṃ attato samanupassati na rūpavantaṃ vā attānaṃ na attani
vā rūpaṃ na rūpasmiṃ vā attānaṃ na vedanaṃ attato samanupassati .pe.
Na saññaṃ . na saṅkhāre . na viññāṇaṃ attato samanupassati
na viññāṇavantaṃ vā attānaṃ na attani vā viññāṇaṃ na
viññāṇasmiṃ vā attānaṃ . tasmā tathāgatassa evaṃ puṭṭhassa
na evaṃ veyyākaraṇaṃ hoti sassato lokotipi .pe. neva hoti
na na hoti tathāgato paraṃ maraṇātipīti.
[796] Atha kho vacchagotto paribbājako uṭṭhāyāsanā
yenāyasmā mahāmoggallāno tenupasaṅkami upasaṅkamitvā āyasmatā
mahāmoggallānena saddhiṃ sammodi sammodanīyaṃ kathaṃ sārāṇīyaṃ
vītisāretvā ekamantaṃ nisīdi . ekamantaṃ nisinno kho vacchagotto
paribbājako āyasmantaṃ mahāmoggallānaṃ etadavoca kiṃ nu kho
bho moggallāna sassato lokoti . abyākataṃ kho etaṃ vaccha
bhagavatā sassato lokoti .pe. kiṃ pana bho moggallāna
Neva hoti na na hoti tathāgato paraṃ maraṇāti . etampi kho
vaccha abyākataṃ bhagavatā neva hoti na na hoti tathāgato paraṃ
maraṇāti . ko nu kho bho moggallāna hetu ko paccayo
yena aññatitthiyānaṃ paribbājakānaṃ evaṃ puṭṭhānaṃ evaṃ
veyyākaraṇaṃ hoti sassato lokoti vā .pe. neva hoti
na na hoti tathāgato paraṃ maraṇāti vā . ko pana bho
moggallāna hetu ko paccayo yena samaṇassa gotamassa
evaṃ puṭṭhassa na evaṃ veyyākaraṇaṃ hoti sassato lokotipi
.pe. Neva hoti na na hoti tathāgato paraṃ maraṇātipīti.
[797] Aññatitthiyā kho vaccha paribbājakā rūpaṃ attato
samanupassanti rūpavantaṃ vā attānaṃ attani vā rūpaṃ rūpasmiṃ vā
attānaṃ . vedanaṃ attato samanupassanti .pe. saññaṃ . saṅkhāre.
Viññāṇaṃ attato samanupassanti viññāṇavantaṃ vā attānaṃ
attani vā viññāṇaṃ viññāṇasmiṃ vā attānaṃ . tasmā
aññatitthiyānaṃ paribbājakānaṃ evaṃ puṭṭhānaṃ evaṃ veyyākaraṇaṃ hoti
sassato lokoti vā .pe. neva hoti na na hoti tathāgato paraṃ
maraṇāti vā . tathāgato ca kho vaccha arahaṃ sammāsambuddho na
rūpaṃ attato samanupassati na rūpavantaṃ vā attānaṃ na attani vā
rūpaṃ na rūpasmiṃ vā attānaṃ . na vedanaṃ attato samanupassati .pe.
Na saññaṃ . na saṅkhāre . na viññāṇaṃ attato samanupassati na
Viññāṇavantaṃ vā attānaṃ na attani vā viññāṇaṃ na viññāṇasmiṃ
vā attānaṃ . tasmā tathāgatassa evaṃ puṭṭhassa na evaṃ
veyyākaraṇaṃ hoti sassato lokotipi asassato lokotipi antavā
lokotipi anantavā lokotipi taṃ jīvaṃ taṃ sarīrantipi aññaṃ jīvaṃ
aññaṃ sarīrantipi hoti tathāgato paraṃ maraṇātipi na hoti tathāgato
paraṃ maraṇātipi hoti ca na ca hoti tathāgato paraṃ maraṇātipi
neva hoti na na hoti tathāgato paraṃ maraṇātipīti.
[798] Acchariyaṃ bho moggallāna abbhutaṃ bho moggallāna
yattha hi nāma satthu ceva sāvakassa ca atthena attho byañjanena
byañjanaṃ saṃsandissati samessati na vihāyissati yadidaṃ aggapadasmiṃ .
Idānāhaṃ bho moggallāna samaṇaṃ gotamaṃ upasaṅkamitvā etamatthaṃ
apucchiṃ samaṇopi me gotamo etehi padehi etehi byañjanehi
etamatthaṃ byākāsi seyyathāpi bhavaṃ moggallāno . acchariyaṃ bho
moggallāna abbhutaṃ bho moggallāna yattha hi nāma satthu
ceva sāvakassa ca atthena attho byañjanena byañjanaṃ saṃsandissati
samessati na vihāyissati yadidaṃ aggapadasminti. Aṭṭhamaṃ.
[799] Atha kho vacchagotto paribbājako yena bhagavā
tenupasaṅkami upasaṅkamitvā bhagavatā saddhiṃ sammodi sammodanīyaṃ
kathaṃ sārāṇīyaṃ vītisāretvā ekamantaṃ nisīdi . ekamantaṃ nisinno
kho vacchagotto paribbājako bhagavantaṃ etadavoca purimāni bho
Gotama divasāni purimatarāni sambahulānaṃ aññatitthiyānaṃ 1-
samaṇabrāhmaṇaparibbājakānaṃ kutuhalasālāyaṃ sannisinnānaṃ
sannipatitānaṃ ayamantarākathā udapādi ayaṃ kho pūraṇo kassapo
saṅghī ceva gaṇī ca gaṇācariyo ca ñāto yasassī titthakaro sādhusammato
bahujanassa so 2- sāvakaṃ abbhatītaṃ kālakataṃ upapattīsu byākaroti
asu amutra upapanno asu amutra upapannoti . yopissa sāvako
uttamapuriso paramapuriso paramapattipatto tampi sāvakaṃ abbhatītaṃ
kālakataṃ upapattīsu byākaroti asu amutra upapanno asu amutra
upapannoti.
{799.1} Ayampi kho makkhali gosālo . ayampi kho nigaṇṭho
nāṭaputto . ayampi kho sañjayo 3- velaṭṭhaputto . ayampi kho
pakudho kaccāno 4- . ayampi kho ajito kesakambalo saṅghī ceva
gaṇī ca gaṇācariyo ca ñāto yasassī titthakaro sādhusammato bahujanassa
sopi sāvakaṃ abbhatītaṃ kālakataṃ uppattīsu byākaroti asu amutra
upapanno asu amutra upapannoti . yopissa sāvako uttamapuriso
paramapuriso paramapattipatto taṃpi sāvakaṃ abbhatītaṃ kālakataṃ upapattīsu
byākaroti asu amutra upapanno asu amutra upapannoti.
{799.2} Ayampi kho samaṇo gotamo saṅghī ceva gaṇī ca gaṇācariyo
ca ñāto yasassī titthakaro sādhusammato bahujanassa sopi sāvakaṃ
abbhatītaṃ kālakataṃ upapattīsu byākaroti asu amutra upapanno asu
@Footnote: 1 Ma. Yu. nānātitthiyānaṃ. 2 Ma. Yu. sopi . 3 Ma. sañcayo . 4 Yu. pakuddho
@kaccāyano.
Amutra upapannoti . yo ca khvassa 1- sāvako uttamapuriso .pe.
Asu amutra upapanno asu amutra upapannoti . apica kho naṃ evaṃ
byākaroti acchejji taṇhaṃ vivattayi saññojanaṃ sammāmānābhisamayā
antamakāsi dukkhassāti . tassa mayhaṃ bho gotama ahudeva kaṅkhā ahu
vicikicchā kathañhi 2- nāma samaṇassa gotamassa dhammo abhiññeyyoti 3-.
[800] Alañhi te vaccha kaṅkhituṃ alaṃ vicikicchituṃ kaṅkhāniye
ca pana te ṭhāne vicikicchā uppannā . saupādānassa khvāhaṃ
vaccha upapattiṃ paññapemi no anupādānassa . seyyathāpi vaccha
aggi saupādāno jalati no anupādāno evameva khvāhaṃ vaccha
saupādānassa upapattiṃ paññapemi no anupādānassāti .
Yasmiṃ bho gotama samaye acci vātena khittā dūraṃpi gacchati imissā
pana bhavaṃ gotamo kiṃ upādānasmiṃ paññapetīti . yasmiṃ kho vaccha
samaye acci vātena khittā dūraṃ gacchati tamahaṃ vātupādānaṃ
paññapemi vāto hissa vaccha tasmiṃ samaye upādānaṃ hotīti .
Yasmiṃ 4- bho gotama samaye imañca kāyaṃ nikkhipati satto ca aññataraṃ
kāyaṃ anupapanno hoti . imassa pana bhavaṃ gotamo kiṃ upādānasmiṃ
paññapetīti . yasmiṃ kho vaccha samaye imañca kāyaṃ nikkhipati satto ca
aññataraṃ kāyaṃ anupapanno hoti tamahaṃ taṇhupādānaṃ vadāmi
taṇhā hissa vaccha tasmiṃ samaye upādānaṃ hotīti. Navamaṃ.
@Footnote: 1 Ma. yo pissa sāvako . 2 Ma. kathaṃ nāma . 3 Yu. dhammābhiññeyyāti.
@4 Ma. yasmiṃ ca pana bho .... Yu. yasmiṃ pana bho.
[801] Atha kho vacchagotto paribbājako yena bhagavā
tenupasaṅkami upasaṅkamitvā bhagavatā saddhiṃ sammodi sammodanīyaṃ
kathaṃ sārāṇīyaṃ vītisāretvā ekamantaṃ nisīdi . ekamantaṃ nisinno kho
vacchagotto paribbājako bhagavantaṃ etadavoca kiṃ nu kho bho
gotama atthattāti . evaṃ vutte bhagavā tuṇhī ahosi . kiṃ pana
bho gotama natthattāti . dutiyampi kho bhagavā tuṇhī ahosi .
Atha kho vacchagotto paribbājako uṭṭhāyāsanā pakkāmi.
[802] Atha kho āyasmā ānando acirapakkante vacchagotte
paribbājake bhagavantaṃ etadavoca kiṃ nu kho bhante bhagavā
vacchagottassa paribbājakassa pañhaṃ puṭṭho na byākāsīti .
Ahañcānanda vacchagottassa paribbājakassa atthattāti
puṭṭho samāno atthattāti byākareyyaṃ . ye te ānanda
samaṇabrāhmaṇā sassatavādā tesametaṃ saddhiṃ abhavissa .
Ahañcānanda vacchagottassa paribbājakassa natthattāti
puṭṭho samāno natthattāti byākareyyaṃ . ye te ānanda
samaṇabrāhmaṇā ucchedavādā tesametaṃ saddhiṃ abhavissa .
Ahañcānanda vacchagottassa paribbājakassa atthattāti
puṭṭho samāno atthattāti byākareyyaṃ . api nu metaṃ ānanda
anulomaṃ abhavissa ñāṇassa uppādāya sabbe dhammā
anattāti . no hetaṃ bhante . ahañcānanda vacchagottassa
paribbājakassa natthattāti puṭṭho samāno natthattāti
Byākareyyaṃ . sammūḷhassa ānanda vacchagottassa
paribbājakassa bhiyyosammohāya abhavissa ahu vā me
nūna pubbe attā so etarahi natthīti. Dasamaṃ.
[803] Ekaṃ samayaṃ āyasmā sabhiyo kaccāno ñātike viharati
giñjakāvasathe . atha kho vacchagotto paribbājako yenāyasmā
sabhiyo kaccāno tenupasaṅkami upasaṅkamitvā āyasmatā
sabhiyena kaccānena saddhiṃ sammodi sammodanīyaṃ kathaṃ sārāṇīyaṃ
vītisāretvā ekamantaṃ nisīdi . ekamantaṃ nisinno kho
vacchagotto paribbājako āyasmantaṃ sabhiyaṃ kaccānaṃ etadavoca
kiṃ nu kho bho kaccāna hoti tathāgato paraṃ maraṇāti . abyākataṃ
kho etaṃ vaccha bhagavatā hoti tathāgato paraṃ maraṇāti . kiṃ pana
ko kaccāna na hoti tathāgato paraṃ maraṇāti . etampi kho
vaccha abyākataṃ bhagavatā na hoti tathāgato paraṃ maraṇāti .
Kiṃ nu kho bho kaccāna hoti ca na ca hoti tathāgato paraṃ
maraṇāti . abyākataṃ kho etaṃ vaccha bhagavatā hoti ca na ca
hoti tathāgato paraṃ maraṇāti . kiṃ pana bho kaccāna neva
hoti na na hoti tathāgato paraṃ maraṇāti . etampi kho
vaccha abyākataṃ bhagavatā neva hoti na na hoti tathāgato
paraṃ maraṇāti . kiṃ nu kho bho kaccāna hoti tathāgato
paraṃ maraṇāti iti puṭṭho samāno abyākataṃ kho
etaṃ vaccha bhagavatā hoti tathāgato paraṃ maraṇāti
Vadesi . kiṃ pana bho kaccāna na hoti tathāgato paraṃ maraṇāti
iti puṭṭho samāno abyākataṃ kho etaṃ vaccha bhagavatā na
hoti tathāgato paraṃ maraṇāti vadesi . kiṃ nu kho bho kaccāna
hoti ca na ca hoti tathāgato paraṃ maraṇāti iti puṭṭho samāno
abyākataṃ kho etaṃ vaccha bhagavatā hoti ca na ca hoti tathāgato
paraṃ maraṇāti vadesi . kiṃ pana bho kaccāna neva hoti na na
hoti tathāgato paraṃ maraṇāti iti puṭṭho samāno etampi kho
vaccha abyākataṃ bhagavatā neva hoti na na hoti tathāgato paraṃ
maraṇāti vadesi . ko nu kho bho kaccāna hetu ko paccayo
yenetaṃ abyākataṃ samaṇena gotamenāti . yo ca vaccha hetu
yo ca paccayo paññāpanāya rūpīti vā arūpīti vā saññīti
vā asaññīti vā nevasaññināsaññīti vā so ca hetu so
ca paccayo sabbena sabbaṃ sabbathā sabbaṃ aparisesaṃ nirujjheyya .
Kena naṃ paññāpayamāno paññapeyya rūpīti vā arūpīti vā
saññīti vā asaññīti vā nevasaññināsaññīti vāti . kīvaciraṃ
pabbajitosi bho kaccānāti . na ciraṃ āvuso tīṇi vassānīti .
Yassapassa āvuso ettakena 1- ettakameva taṃpassa
bahu ko pana vādo evaṃ 2- abhikkanteti. Ekādasamaṃ.
Abyākatasaṃyuttaṃ samattaṃ.
@Footnote: 1 Ma. Yu. etamettakena. 2 Yu. eva.
Tassuddānaṃ
khemā therī anurādho sārīputtāti 1- koṭṭhito
moggallāno ca vaccho ca kutuhalasālānando
sabhiyo ekādasamanti.
Saḷāyatanavaggasaṃyuttaṃ samattaṃ 2-.
Tassuddānaṃ
saḷāyatanavedanā mātugāmo jambukhādako
sāmaṇḍako moggallāno citto gāmaṇyasaṅkhataṃ 3-
abyākatanti dasa cāti 4-.
-----------
@Footnote: 1 Ma. Yu. sārīputtoti. 2 Ma. saḷāyatanavaggo catuttho. 3 Ma. Yu. gāmaṇi
@saṅkhataṃ . 4 Ma. Yu. dasadhāti.
The Pali Tipitaka in Roman Character Volume 18 page 451-489.
https://84000.org/tipitaka/read/roman_item.php?book=18&item=737&items=67
Classified by [Item Number] :-
http://84000.org/tipitaka/read/roman_item.php?book=18&item=737&items=67&mode=bracket
Compare with The Pali Tipitaka in Thai Character :-
https://84000.org/tipitaka/read/pali_item.php?book=18&item=737&items=67
Compare with The Royal Version of Thai Tipitaka :-
https://84000.org/tipitaka/read/byitem.php?book=18&item=737&items=67
Study Atthakatha :-
https://84000.org/tipitaka/attha/attha.php?b=18&i=737
Contents of The Tipitaka Volume 18
https://84000.org/tipitaka/read/?index_18
https://84000.org/tipitaka/english/?index_18
บันทึก ๑๔ พฤศจิกายน พ.ศ. ๒๕๖๐.
การแสดงผลนี้อ้างอิงข้อมูลจากพระไตรปิฎกฉบับภาษาบาลี อักษรโรมัน.
หากพบข้อผิดพลาด กรุณาแจ้งได้ที่ [email protected]
