Atthakatha Book 47 : PALI ROMAN
Paṭisaṃ.A.1 (saddhamma.1)

                    38. Vīriyārambhañāṇaniddesavaṇṇanā
     [89] Vīriyārambhañāṇaniddese anuppannānanti ekasmiṃ attabhāve,
ekasmiṃ vā ārammaṇe anibbattānaṃ. Anamatagge hi saṃsāre anuppannā akusalā
nāma natthi, kusalā pana atthi. Pāpakānanti lāmakānaṃ. Akusalānaṃ
dhammānanti akosallasambhūtānaṃ dhammānaṃ. Anuppādāyāti na uppādanatthāya.
Uppannānanti imasmiṃ attabhāve nibbattānaṃ. Pahānāyāti pajahanatthāya.
Anuppannānaṃ kusalānaṃ dhammānanti imasmiṃ attabhāve anibbattapabbānaṃ
kosallasambhūtānaṃ dhammānaṃ. Uppādāyāti uppādanatthāya. Uppannānanti imasmiṃ
attabhāve nibbattānaṃ. Ṭhitiyāti ṭhitatthāya. Asammosāyāti avināsanatthāya
bhiyyobhāvāyāti punappunabhāvāya. Vepullāyāti vipulabhāvāya. Bhāvanāyāti vaḍḍhiyā.
Pāripūriyāti paripūraṇatthāya.
     Idāni akusalesu kāmacchandaṃ, kusalesu nekkhammaṃ visesetvā dassetuṃ
anuppannassa kāmacchandassātiādimāha. Tattha kāmacchandoti samādhippaṭipakkho
kāmarāgo. Nekkhammanti paṭhamajjhānasamādhi, paṭhamajjhānaṃ vā, sabbe evaṃ vā
kusalā dhammā nekkhammaṃ.
     Idāni sabbakilesānaṃ sabbakilesappaṭipakkhassa arahattamaggassa ca vasena
yojetvā dassetuṃ anuppannānaṃ sabbakilesānantiādimāha. Tattha uppannassa
arahattamaggassa ṭhitiyātiādīsu uppādakkhaṇe uppannassa arahattamaggassa
ṭhitikkhaṇabhaṅgakkhaṇavasena "ṭhitiyā"tiādiyojanā veditabbā. Vibhaṅgaṭṭhakathāyampi "yā
cassa pavatti, ayameva ṭhiti nāmā"ti 1- vuttaṃ. Keci pana "arahattamaggassa
pubbabhāgamaggo daṭṭhabbo"ti vadanti.
                   Vīriyārambhañāṇaniddesavaṇṇanā niṭṭhitā.
@Footnote: 1 abhi.A. 2/404/323


             The Pali Atthakatha in Roman Book 47 page 342.
http://84000.org/tipitaka/atthapali/read_rm.php?B=47&A=7633
             อรรถกถาบาลีอักษรไทย :-
http://84000.org/tipitaka/atthapali/read_th.php?B=47&A=7633
             อ่านอรรถกถาแปลไทย :-
http://84000.org/tipitaka/attha/attha.php?b=31&i=237
             เนื้อความพระไตรปิฎกฉบับหลวง :-
http://84000.org/tipitaka/read/r.php?B=31&A=2597
             พระไตรปิฎกฉบับบาลีอักษรไทย :-
http://84000.org/tipitaka/read/pali_read.php?B=31&A=3032
             The Pali Tipitaka in Roman Character :-
http://84000.org/tipitaka/read/roman_read.php?B=31&A=3032
             Contents of The Tipitaka Volume 31
http://84000.org/tipitaka/read/?index_31