AtthaPali Vol.37

7 Sāketajātakaṃ ko nu kho bhagavā hetūti idaṃ satthā sāketaṃ upanissāya viharanto sāketabrāhmaṇaṃ ārabbha kathesi. Vatthu panettha atītampi paccuppannampi heṭṭhā ekanipāte kathitameva. Tathāgatassa pana vihāraṃ gatakāle bhikkhū sineho nāmesa bhante kathaṃ patiṭṭhātīti pucchantā paṭhamaṃ gāthamāhaṃsu ko nu kho bhagavā hetu ekacce idha puggale atīva hadayaṃ nibbāti cittaṃ vāpi ^1- pasīdatīti. Tassattho ko nu kho hetu yena idhekacce puggale diṭṭhamatte yeva hadayaṃ ativiya nibbāti ^2- suvāsitassa udakassa ghaṭasahassena parisittaṃ viya sītalaṃ hoti, ekacce na nibbāti, ekacce diṭṭhamatte yeva cittaṃ pasīdati mudu hoti pemavasena alaliyati, ekacce na alliyatīti. Atha nesaṃ satthā pemakāraṇaṃ dassento dutiyaṃ gāthamāha pubbe va sannivāsena paccuppannahitena vā evantaṃ jāyate pemaṃ uppalaṃva yathodaketi. Tassattho bhikkhave pemaṃ nāmetaṃ dvīhi kāraṇehi jāyati, pubbe purimabhave mātā vā pitā vā dhītā vā putto vā bhātā @Footnote: ¹ cittañcāpītipi . ² nibbāyatītipi. Vā bhaginī vā pati vā bhariyā vā sahāyo vā mitto vā hutvā yo yena saddhiṃ ekaṭṭhāne vuṭṭhapubbo tassa iminā pubbe va sannivāsena bhavantarepi anubandhanto sopi sineho na vijahati, imasmiṃ attabhāve katena paccuppannahitena vā evaṃ taṃ jāyate pemaṃ, imehi dvīhi kāraṇehi taṃ pemaṃ jāyati. Yathā kiṃ. Uppalaṃ va yathodaketi. Vakārassa rassattaṃ kataṃ. Samuccayatthe cesa vutto. Tasmā uppalañca sesañca jalajapupphaṃ yathā udake jāyamānaṃ dve kāraṇāni nissāya jāyati udakañceva kalalañca, tathā cetehi dvīhi kāraṇehi pemaṃ jāyatīti. Evamettha attho daṭṭhabbo. Satthā imaṃ dhammadesanaṃ āharitvā jātakaṃ samodhānesi. Tadā brāhmaṇo ca brāhmaṇī ca imeva dve janā ahesuṃ, putto pana ahamevāti. Sāketajātakaṃ sattamaṃ. -----------

The Pali Atthakatha in Roman Book 37 page 313-314. http://84000.org/tipitaka/atthapali/read_rm.php?B=37&A=6201 อรรถกถาบาลีอักษรไทย :- http://84000.org/tipitaka/atthapali/read_th.php?B=37&A=6201 อ่านอรรถกถาแปลไทย :- http://84000.org/tipitaka/attha/attha.php?b=27&i=323 เนื้อความพระไตรปิฎกฉบับหลวง :- http://84000.org/tipitaka/read/r.php?B=27&A=1839 พระไตรปิฎกฉบับบาลีอักษรไทย :- http://84000.org/tipitaka/read/pali_read.php?B=27&A=1833 The Pali Tipitaka in Roman Character :- http://84000.org/tipitaka/read/roman_read.php?B=27&A=1833 Contents of The Tipitaka Volume 27 http://84000.org/tipitaka/read/?index_27