Atthakatha Book 55 : PALI ROMAN
Pañca.A. (paramatthadī.)

                     14. Vipākapaccayaniddesavaṇṇanā
     [14] Vipākapaccayaniddese vipākā cattāro khandhāti yasmā kammasamuṭṭhānāpi
rūpā vipākā na honti, tasmā "vipākā"ti vatvā "cattāro khandhā"ti
vuttaṃ. Evamayaṃ pāli arūpadhammānaññeva vipākapaccayavasena āgatā. Pañhāvāre
pana "vipākābyākato eko khandho tiṇṇannaṃ khandhānaṃ cittasamuṭṭhānānañca
rūpānaṃ vipākapaccayena paccayo. Paṭisandhikkhaṇe vipākābyākato eko khandho
tiṇṇannaṃ khandhānaṃ kaṭattā ca rūpānaṃ vipākapaccayena paccayo"ti āgatattā
cittasamuṭṭhānakammasamuṭṭhānarūpānampi vipākapaccayo labbhati. Idha pana sāvasesa-
desanā 1- katāti ayaṃ tāvettha pālivaṇṇanā. Ayaṃ pana vipākapaccayo vipākabhāvena
jātito ekavidho, bhūmibhedato kāmāvacarādivasena catudhā bhijjatīti evamettha
nānappakārabhedato viññātabbo vinicchayo.
     Evaṃ bhinne panettha kāmāvacararūpāvacaravipāko attanā sampayuttakkhandhānaṃ 2-
pavatte cittasamuṭṭhānarūpānaṃ paṭisandhiyaṃ kaṭattārūpānañca vipākapaccayo hoti.
Arūpāvacaravipāko sampayuttadhammānaññeva. Lokuttaravipāko pañcavokāre sampayutta-
dhammānañceva cittasamuṭṭhānarūpassa ca, catuvokāre sampayuttadhammānaññeva 3-
vipākapaccayo hotīti evamettha paccayuppannatopi viññātabbo vinicchayoti.
                    Vipākapaccayaniddesavaṇṇanā niṭṭhitā.
                          ------------


             The Pali Atthakatha in Roman Book 55 page 431.
http://84000.org/tipitaka/atthapali/read_rm.php?B=55&A=9734
             อรรถกถาบาลีอักษรไทย :-
http://84000.org/tipitaka/atthapali/read_th.php?B=55&A=9734
             อ่านอรรถกถาแปลไทย :-
http://84000.org/tipitaka/attha/attha.php?b=36&i=452
             เนื้อความพระไตรปิฎกฉบับหลวง :-
http://84000.org/tipitaka/read/r.php?B=36&A=1966
             พระไตรปิฎกฉบับบาลีอักษรไทย :-
http://84000.org/tipitaka/read/pali_read.php?B=36&A=2201
             The Pali Tipitaka in Roman Character :-
http://84000.org/tipitaka/read/roman_read.php?B=36&A=2201
             Contents of The Tipitaka Volume 36
http://84000.org/tipitaka/read/?index_36