ขอนอบน้อมแด่
พระผู้มีพระภาคอรหันตสัมมาสัมพุทธเจ้า
                      พระองค์นั้น
บทนำ พระวินัยปิฎก พระสุตตันตปิฎก พระอภิธรรมปิฎก ค้นพระไตรปิฎก ชาดก หนังสือธรรมะ
อ่านหน้า[ต่าง] แรกอ่านหน้า[ต่าง] ที่แล้วแสดงหมายเลขหน้า
ในกรณี :- 
   บรรทัดแรกของแต่ละหน้าอ่านเล่มถัดไป คลิกเพื่อเปลี่ยน ฐญ เป็นแบบดั้งเดิม  
อรรถกถาเล่มที่ ๓ ภาษาบาลีอักษรไทย วินย.อ. (สมนฺต.๓)

     เอตฺตาวตา จ
          อุภโตวิภงฺคขนฺธกปริวารวิภตฺตเทสนํ
          นาโถ วินยปิฏกํ วิเนนฺโต เวเนยฺยํ
          ยํ ชิโน อาห สมธิกสตฺตวีสติสหสฺสมตฺเตน
         ตสฺส คนฺเถน สํวณฺณนา สมตฺตา สมนฺตปาสาทิกา นาม
     ตตฺริทํ สมนฺตปาสาทิกาย สมนฺตปาสาทิกตฺตสฺมึ
          อาจริยปรมฺปรโต นิทานวตฺถุปฺปเภททีปนโต
          ปรสมยวิวชฺชนโต สกสมยวิสุทฺธิโต เจว
          พฺยญฺชนปริโสธนโต ปทตฺถโต ปาลิโยชนากฺกมโต
          สิกฺขาปทวินิจฺฉยโต วิภงฺคนยเภททสฺสนโต
          สมฺปสฺสตํ น ทิสฺสติ กิญฺจิ อปาสาทิกํ ยโต
          เอตฺถ วิญฺญูนมยํ ตสฺมา สมนฺตปาสาทิกาเตฺวว
          สํวณฺณนา ปวตฺตา วินยสฺส วินยทมนกุสเลน
          วุตฺตสฺส โลกนาเถน โลกานุกมฺปมาเนนาติ ฯ
          มหาอฏฺฐกถํ เจว           มหาปจฺจริเมว จ
          กุรุนฺทิญฺจาติ ติสฺโสปิ      สีหลฏฺฐกถา อิมา
          พุทฺธมิตฺโตติ นาเมน      วิสฺสุตสฺส ยสสฺสิโน
          วินยญฺญุสฺส ธีรสฺส          สุตฺวา เถรสฺส สนฺติเก
          มหาเมฆวนุยฺยาเน        ภูมิภาเค ปติฏฺฐิโต
          มหาวิหาโร โย สตฺถุ      มหาโพธิวิภูสิโต
          ยํ ตสฺส ทกฺขิเณ ภาเค     ปธานฆรมุตฺตมํ
          สุจิจาริตฺตสีเลน            ภิกฺขุสงฺเฆน เสวิตํ
          อุฬารกุลสมฺภูโต          สงฺฆุปฏฺฐายโก สทา
          อนากุลาย สทฺธาย         ปสนฺโน รตนตฺตเย
          มหานิคมสามีติ            วิสฺสุโต ตตฺถ การยิ
          จารุปาการสญฺจิตํ          ยํ ปาสาทํ มโนรมํ
          สีตจฺฉายตรูเปตํ            สมฺปนฺนสลิลาสยํ
          วสตา ตตฺร ปาสาเท       มหานิคมสามิโน
          สุจิสีลสมาจารํ              เถรํ พุทฺธสิรึ มยา
          ยา อุทฺทิสิตฺวา อารทฺธา   อิทฺธา วินยวณฺณนา ฯ
          ปาลยนฺตสฺส สกลํ          ลงฺกาทีปํ นิรพฺพุทํ
          รญฺโญ สิรินิวาสสฺส        สิริปาลสฺส ยสสฺสิโน
          สมวีสติเม เขเม            ชยสํวจฺฉเร อยํ
          อารทฺธา เอกวีสมฺหิ        สมฺปตฺเต ปรินิฏฺฐิตา ฯ
          อุปทฺทวากุเล โลเก         นิรุปทฺทวโต อยํ
          เอกสํวจฺฉเรเนว            ยถา นิฏฺฐํ อุปาคตา
          เอวํ สพฺพสฺส โลกสฺส      นิฏฺฐํ ธมฺมูปสญฺหิตา
          สีฆํ คจฺฉนฺตุ อารมฺภา     สพฺเพปิ นิรุปทฺทวา ฯ
          จิรฏฺฐิตตฺถํ ธมฺมสฺส        กโรนฺเตน มยา อิมํ
          สทฺธมฺมพหุมาเนน         ยํ จ ปุญฺญํ สมาจิตํ
          สพฺพสฺส อานุภาเวน       ตสฺส สพฺเพว ปาณิโน
          ภวนฺตุ ธมฺมราชสฺส        สทฺธมฺมรสเสวิโน ฯ
          จิรํ ติฏฺฐตุ สทฺธมฺโม       กาเล วสฺสิ จิรํ ปชํ
          ตปฺเปตุ เทโว ธมฺเมน     ราชา รกฺขตุ เมทนินฺติ ฯ
     ปรมวิสุทฺธสทฺธาพุทฺธิวิริยปฏิมณฺฑิเตน สีลาจารชฺชวมทฺทวาทิ-
คุณสมุทยสมุทิเตน สกสมยสมยนฺตรคหนชฺโฌคาหณสมตฺเถน
ปญฺญาเวยฺยตฺติเยน สมนฺนาคเตน ติปิฏกปริยตฺติปฺปเภเท สาฏฺฐกเถ
สตฺถุสาสเน อปฺปฏิหตญาณปฺปภาเวน มหาเวยฺยากรเณน
กรณสมฺปตฺติชนิตสุขวินิคฺคตมธุโรฬารวจนลาวณฺณยุตฺเตน
ยุตฺตมุตฺตวาทินา วาทิวเรน มหากวินา ปภินฺนปฏิสมฺภิทาปริวาเร
ฉฬาภิญฺญาปฏิสมฺภิทาทิปฺปเภทคุณปฏิมณฺฑิเต อุตฺตริมนุสฺสธมฺเม
สุปติฏฺฐิตพุทฺธีนํ เถรวํสปฺปทีปานํ เถรานํ มหาวิหารวาสีนํ
วํสาลงฺการภูเตน สุวิปุลวิสุทฺธพุทฺธินา พุทฺธโฆโสติ ครูหิ
คหิตนามเธยฺเยน เถเรน กตา อยํ สมนฺตปาสาทิกา นาม วินยสํวณฺณนา
นิฏฺฐิตา ฯ
          ตาว ติฏฺฐตุ โลกสฺมึ       โลกนิตฺถรเณสินํ
          ทสฺเสนฺตี กุลปุตฺตานํ       นยํ สีลวิสุทฺธิยา
          ยาว พุทฺโธติ นามมฺปิ     สุทฺธจิตฺตสฺส ตาทิโน
          โลกมฺหิ โลกเชฏฺฐสฺส      ปวตฺตติ มเหสิโนติ ฯ
                   วินยฏฺฐกถา นิฏฺฐิตา ฯ

             อรรถกถาภาษาบาลีอักษรไทย เล่มที่ ๓ หน้า ๖๓๔-๖๓๖. http://84000.org/tipitaka/atthapali/read_th.php?B=3&A=12869&modeTY=2              The Pali Atthakatha in Roman :- http://84000.org/tipitaka/atthapali/read_rm.php?B=3&A=12869&modeTY=2              อ่านอรรถกถาแปลไทย :- http://84000.org/tipitaka/attha/attha.php?b=8&i=1366              เนื้อความพระไตรปิฎกฉบับหลวง :- http://84000.org/tipitaka/read/r.php?B=8&A=13386              พระไตรปิฎกฉบับบาลีอักษรไทย :- http://84000.org/tipitaka/read/pali_read.php?B=8&A=11215              The Pali Tipitaka in Roman Character :- http://84000.org/tipitaka/read/roman_read.php?B=8&A=11215              สารบัญพระไตรปิฎกเล่มที่ ๔ http://84000.org/tipitaka/read/?index_8

อ่านหน้า[ต่าง] แรกอ่านหน้า[ต่าง] ที่แล้วแสดงหมายเลขหน้า
ในกรณี :- 
   บรรทัดแรกของแต่ละหน้าอ่านเล่มถัดไป คลิกเพื่อเปลี่ยน ฐญ เป็นแบบดั้งเดิม

บันทึก ๒๖ มกราคม พ.ศ. ๒๕๖๑. การแสดงผลนี้อ้างอิงข้อมูลจากอรรถกถาภาษาบาลีอักษรไทย. หากพบข้อผิดพลาด กรุณาแจ้งได้ที่ [email protected]