อรรถกถาเล่มที่ ๕๕ ภาษาบาลีอักษรไทย
 ปญฺจ.อ. (ปรมตฺถที.)

                 ๙. นวมนย สมฺปยุตฺเตนสมฺปยุตฺตปทวณฺณนา
     [๓๑๙] อิทานิ สมฺปยุตฺเตนสมฺปยุตฺตปทํ ภาเชตุํ เวทนากฺขนฺเธนาติอาทิ
อารทฺธํ. ตตฺถ ยํ ขนฺธาทิวเสน สมฺปยุตฺตํ, ปุน ตสฺเสว ขนฺธาทีหิ สมฺปโยคํ
ปุจฺฉิตฺวา วิสฺสชฺชนํ กตํ. ตํ รูเปน วา รูปมิสฺสเกหิ วา สพฺพารูปกฺขนฺธ-
สงฺคาหเกหิ วา ปเทหิ สทฺธึ น ยุชฺชติ. รูเปน หิ รูปมิสฺสเกน วา อญฺเญสํ สมฺปโยโค
นตฺถิ, สพฺพารูปกฺขนฺธสงฺคาหเกหิ สพฺเพสํ สมฺปโยคารหานํ ขนฺธาทีนํ คหิตตฺตา
อญฺญํเยว นตฺถิ, ยนฺเตน สห สมฺปโยคํ คจฺเฉยฺย, ตสฺมา ตถารูปานิ ปทานิ
อิธ น คหิตานิ. ยานิ ปน ปทานิ รูเปน อสมฺมิสฺสํ อรูเปกเทสํ ทีเปนฺติ,
ตานิ อิธ คหิตานิ. เตสํ อิทมุทฺทานํ:-
           "อรูปกฺขนฺธา จตฺตาโร      มนายตนเมว จ
            วิญฺญาณธาตุโย สตฺต       เทฺว สจฺจา จุทฺทสินฺทฺริยา.
            ปจฺจเย ทฺวาทส ปทา      ตโต อุปริ โสฬส
            ติเกสุ อฏฺฐ โคจฺฉเก      เตจตฺตาฬีสเมว จ.
            มหนฺตรทุเก สตฺต         ปทา ปิฏฺฐิทุเกสุ ฉ
            นวมสฺส ปทสฺเสเต        นิทฺเทเส สงฺคหํ คตา"ติ.
@เชิงอรรถ: ๑ ฉ.ม. สพฺพวิสฺสชฺชเนสุ     ๒ ฉ.ม. อิจฺเจว
     สพฺพปเญฺหสุ ปน เย ธมฺมา ปุจฺฉาย อุทฺธฏา, เต เยหิ สมฺปยุตฺตา
โหนฺติ, เตสํ วเสน ขนฺธาทิเภโท เวทิตพฺโพ. เวทนากฺขนฺเธน หิ อิตเร
ตโย ขนฺธา สมฺปยุตฺตา, ปุน เตหิ เวทนากฺขนฺโธ สมฺปยุตฺโต, โส เตหิ สญฺญาทีหิ
ตีหิ ขนฺเธหิ เอเกน มนายตเนน สตฺตหิ วิญฺญาณธาตูหิ เอกสฺมึ ธมฺมายตเน
ธมฺมธาตุยา จ เกหิจิ สญฺญาสงฺขาเรเหว สมฺปยุตฺโต. เอเสว นโย สพฺพตฺถาติ.
                  สมฺปยุตฺเตนสมฺปยุตฺตปทวณฺณนา นิฏฺฐิตา.
                          -------------

             อรรถกถาภาษาบาลีอักษรไทย เล่มที่ ๕๕ หน้า ๒๓-๒๔.
http://84000.org/tipitaka/atthapali/read_th.php?B=55&A=481&modeTY=2
             The Pali Atthakatha in Roman :-
http://84000.org/tipitaka/atthapali/read_rm.php?B=55&A=481&modeTY=2
             อ่านอรรถกถาแปลไทย :-
http://84000.org/tipitaka/attha/attha.php?b=36&i=315
             เนื้อความพระไตรปิฎกฉบับหลวง :-
http://84000.org/tipitaka/read/r.php?B=36&A=1358
             พระไตรปิฎกฉบับบาลีอักษรไทย :-
http://84000.org/tipitaka/read/pali_read.php?B=36&A=1447
             The Pali Tipitaka in Roman Character :-
http://84000.org/tipitaka/read/roman_read.php?B=36&A=1447
             สารบัญพระไตรปิฎกเล่มที่ ๓๖
http://84000.org/tipitaka/read/?index_36