พระไตรปิฎกเล่มที่ ๕ ภาษาบาลี อักษรไทย
พระวินัยปิฎกเล่มที่ ๕ วินย. มหาวคฺโค (๒)

                               กฐินกฺขนฺธกํ
     [๙๕]   เตน  สมเยน  พุทฺโธ  ภควา  สาวตฺถิยํ  วิหรติ  เชตวเน
อนาถปิณฺฑิกสฺส   อาราเม   ฯ   เตน   โข   ปน   สมเยน  ตึสมตฺตา
ปาเฐยฺยกา   ภิกฺขู   สพฺเพ   อารญฺญกา   สพฺเพ   ปิณฺฑปาติกา  สพฺเพ
ปํสุกูลิกา   สพฺเพ   เตจีวริกา   สาวตฺถึ   คจฺฉนฺตา  ภควนฺตํ  ทสฺสนาย
อุปกฏฺฐาย     วสฺสูปนายิกาย     นาสกฺขึสุ    สาวตฺถิยํ    วสฺสูปนายิกํ
สมฺภาเวตุํ    อนฺตรามคฺเค    สาเกเต    วสฺสํ   อุปคจฺฉึสุ   ฯ   เต
อุกฺกณฺฐิตรูปา   วสฺสํ   วสึสุ   อาสนฺเน   ว  โน  ภควา  วิหรติ  อิโต
ฉสุ โยชเนสุ น จ มยํ ลภาม ภควนฺตํ ทสฺสนายาติ ฯ
     {๙๕.๑}   อถโข  เต  ภิกฺขู  วสฺสํ  วุตฺถา  เตมาสจฺจเยน  กตาย
ปวารณาย   เทเว   วสฺสนฺเต   อุทกสงฺคเห  อุทกจิกฺขลฺเล  โอกปุณฺเณหิ
จีวเรหิ   กิลนฺตรูปา   เยน  สาวตฺถี  เชตวนํ  อนาถปิณฺฑิกสฺส  อาราโม
เยน    ภควา   เตนุปสงฺกมึสุ   อุปสงฺกมิตฺวา   ภควนฺตํ   อภิวาเทตฺวา
เอกมนฺตํ   นิสีทึสุ   ฯ   อาจิณฺณํ   โข   ปเนตํ   พุทฺธานํ   ภควนฺตานํ
อาคนฺตุเกหิ ภิกฺขูหิ สทฺธึ ปฏิสมฺโมทิตุํ ฯ
     {๙๕.๒}   อถโข ภควา เต ภิกฺขู เอตทโวจ กจฺจิ ภิกฺขเว ขมนียํ กจฺจิ
ยาปนียํ  กจฺจิ  สมคฺคา  สมฺโมทมานา  อวิวทมานา  ผาสุกํ  วสฺสํ  วสิตฺถ
น  จ  ปิณฺฑเกน  กิลมิตฺถาติ  ฯ  ขมนียํ  ภควา ยาปนียํ ภควา สมคฺคา จ
มยํ  ภนฺเต  สมฺโมทมานา  อวิวทมานา  วสฺสํ  วสิมฺหา  น  จ  ปิณฺฑเกน
กิลมิมฺหา   อิธ   มยํ   ภนฺเต   ตึสมตฺตา   ปาเฐยฺยกา  ภิกฺขู  สาวตฺถึ
อาคจฺฉนฺตา     ภควนฺตํ     ทสฺสนาย     อุปกฏฺฐาย    วสฺสูปนายิกาย
นาสกฺขิมฺหา     สาวตฺถิยํ    วสฺสูปนายิกํ    สมฺภาเวตุํ    อนฺตรามคฺเค
สาเกเต   วสฺสํ   อุปคจฺฉิมฺหา   เต   มยํ  ภนฺเต  อุกฺกณฺฐิตรูปา  วสฺสํ
วสิมฺหา  อาสนฺเน  ว  โน  ภควา  วิหรติ  อิโต  ฉสุ โยชเนสุ น จ มยํ
ลภาม   ภควนฺตํ   ทสฺสนายาติ   อถโข   มยํ   ภนฺเต   วสฺสํ   วุตฺถา
เตมาสจฺจเยน    กตาย   ปวารณาย   เทเว   วสฺสนฺเต   อุทกสงฺคเห
อุทกจิกฺขลฺเล โอกปุณฺเณหิ จีวเรหิ กิลนฺตรูปา อทฺธานํ อาคตาติ ฯ
     [๙๖]   อถโข  ภควา  เอตสฺมึ  นิทาเน  เอตสฺมึ  ปกรเณ  ธมฺมึ
กถํ   กตฺวา   ภิกฺขู   อามนฺเตสิ   อนุชานามิ   ภิกฺขเว  วสฺสํ  วุตฺถานํ
ภิกฺขูนํ  กฐินํ  อตฺถริตุํ  ฯ  อตฺถตกฐินานํ  โว  ภิกฺขเว  ปญฺจ  กปฺปิสฺสนฺติ
อนามนฺตจาโร    อสมาทานจาโร   คณโภชนํ   ยาวทตฺถจีวรํ   โย   จ
ตตฺถ  จีวรุปฺปาโท  โส  เนสํ  ภวิสฺสตีติ  ฯ  อตฺถตกฐินานํ  โว  ภิกฺขเว
อิมานิ  ปญฺจ  กปฺปิสฺสนฺติ  ฯ  เอวญฺจ  ปน  ภิกฺขเว  กฐินํ  อตฺถริตพฺพํ ฯ
พฺยตฺเตน   ภิกฺขุนา   ปฏิพเลน  สงฺโฆ  ญาเปตพฺโพ  สุณาตุ  เม  ภนฺเต
สงฺโฆ   อิทํ   สงฺฆสฺส   กฐินทุสฺสํ  อุปฺปนฺนํ  ฯ  ยทิ  สงฺฆสฺส  ปตฺตกลฺลํ
สงฺโฆ  อิมํ  กฐินทุสฺสํ  อิตฺถนฺนามสฺส  ภิกฺขุโน  ทเทยฺย  กฐินํ  อตฺถริตุํ ฯ
เอสา ญตฺติ ฯ
     {๙๖.๑}   สุณาตุ   เม   ภนฺเต  สงฺโฆ  อิทํ  สงฺฆสฺส  กฐินทุสฺสํ
อุปฺปนฺนํ   ฯ   สงฺโฆ   อิมํ   กฐินทุสฺสํ   อิตฺถนฺนามสฺส   ภิกฺขุโน  เทติ
กฐินํ    อตฺถริตุํ    ฯ    ยสฺสายสฺมโต    ขมติ   อิมสฺส   กฐินทุสฺสสฺส
อิตฺถนฺนามสฺส   ภิกฺขุโน   ทานํ   กฐินํ   อตฺถริตุํ   โส   ตุณฺหสฺส  ยสฺส
นกฺขมติ    โส    ภาเสยฺย    ฯ    ทินฺนํ   อิทํ   สงฺเฆน   กฐินทุสฺสํ
อิตฺถนฺนามสฺส   ภิกฺขุโน   กฐินํ   อตฺถริตุํ   ฯ   ขมติ   สงฺฆสฺส  ตสฺมา
ตุณฺหี ฯ เอวเมตํ ธารยามีติ ฯ
     เอวํ โข ภิกฺขเว อตฺถตํ โหติ กฐินํ เอวํ อนตฺถตํ
     [๙๗]   กถญฺจ  ภิกฺขเว  อนตฺถตํ  โหติ  กฐินํ  ฯ น อุลฺลิขิตมตฺเตน
อตฺถตํ   โหติ   กฐินํ  ฯ  น  โธวนมตฺเตน  อตฺถตํ  โหติ  กฐินํ  ฯ  น
จีวรวิจารณมตฺเตน   อตฺถตํ   โหติ   กฐินํ  ฯ  น  เฉทนมตฺเตน  อตฺถตํ
โหติ  กฐินํ  ฯ  น  พนฺธนมตฺเตน  อตฺถตํ  โหติ  กฐินํ  ฯ  น โอวฏฺฏิก-
กรณมตฺเตน   อตฺถตํ   โหติ   กฐินํ   ฯ  น  กณฺฑสกรณมตฺเตน  อตฺถตํ
โหติ   กฐินํ   ฯ   น  ทฬฺหีกมฺมกรณมตฺเตน  อตฺถตํ  โหติ  กฐินํ  ฯ  น
อนุวาตกรณมตฺเตน   อตฺถตํ   โหติ   กฐินํ   ฯ   น  ปริภณฺฑกรณมตฺเตน
อตฺถตํ   โหติ   กฐินํ  ฯ  น  โอวฏฺเฏยฺยกรณมตฺเตน  ๑-  อตฺถตํ  โหติ
กฐินํ  ฯ  น  กมฺพลมทฺทนมตฺเตน  อตฺถตํ  โหติ  กฐินํ  ฯ  น นิมิตฺตกเตน
อตฺถตํ  โหติ  กฐินํ  ฯ  น ปริกถากเตน อตฺถตํ โหติ กฐินํ ฯ น กุกฺกุกเตน
อตฺถตํ   โหติ   กฐินํ   ฯ  น  สนฺนิธิกเตน  อตฺถตํ  โหติ  กฐินํ  ฯ  น
นิสฺสคฺคิเยน   อตฺถตํ   โหติ   กฐินํ   ฯ  น  อกปฺปกเตน  อตฺถตํ  โหติ
@เชิงอรรถ: ๑ สี. ยุ. โอวทฺเธยฺยกรณมตฺเตน ฯ ม. โอวเทยฺยกรณมตฺเตน ฯ
กฐินํ   ฯ   น   อญฺญตฺร   สงฺฆาฏิยา   อตฺถตํ   โหติ   กฐินํ   ฯ  น
อญฺญตฺร    อุตฺตราสงฺเคน    อตฺถตํ   โหติ   กฐินํ   ฯ   น   อญฺญตฺร
อนฺตรวาสเกน   อตฺถตํ   โหติ   กฐินํ   ฯ  น  อญฺญตฺร  ปญฺจเกน  วา
อติเรกปญฺจเกน    วา    ตทเหว   สญฺฉินฺเนน   สมณฺฑลีกเตน   อตฺถตํ
โหติ   กฐินํ   ฯ   น  ๑-  อญฺญตฺร  ปุคฺคลสฺส  อตฺถารา  อตฺถตํ  โหติ
กฐินํ   ฯ  น  สมฺมา  เจว  อตฺถตํ  โหติ  กฐินํ  ฯ  ตญฺเจ  นิสฺสีมฏฺโฐ
อนุโมทติ  เอวํปิ  อนตฺถตํ  โหติ  กฐินํ  ฯ  เอวํ  โข  ภิกฺขเว  อนตฺถตํ
โหติ กฐินํ ฯ
     [๙๘]   กถญฺจ  ภิกฺขเว  อตฺถตํ  โหติ  กฐินํ  ฯ  อหเตน  อตฺถตํ
โหติ   กฐินํ   ฯ   อหตกปฺเปน   อตฺถตํ   โหติ   กฐินํ  ฯ  ปิโลติกาย
อตฺถตํ   โหติ   กฐินํ  ฯ  ปํสุกูเลน  อตฺถตํ  โหติ  กฐินํ  ฯ  ปาปณิเกน
อตฺถตํ   โหติ   กฐินํ   ฯ   อนิมิตฺตกเตน   อตฺถตํ   โหติ   กฐินํ   ฯ
อปริกถากเตน   อตฺถตํ   โหติ   กฐินํ   ฯ   อกุกฺกุกเตน  อตฺถตํ  โหติ
กฐินํ   ฯ   อสนฺนิธิกเตน  อตฺถตํ  โหติ  กฐินํ  ฯ  อนิสฺสคฺคิเยน  อตฺถตํ
โหติ   กฐินํ   ฯ   กปฺปกเตน   อตฺถตํ   โหติ   กฐินํ   ฯ  สงฺฆาฏิยา
อตฺถตํ   โหติ   กฐินํ   ฯ   อุตฺตราสงฺเคน   อตฺถตํ   โหติ   กฐินํ  ฯ
อนฺตรวาสเกน   อตฺถตํ  โหติ  กฐินํ  ฯ  ปญฺจเกน  วา  อติเรกปญฺจเกน
วา   ตทเหว   สญฺฉินฺเนน   สมณฺฑลีกเตน   อตฺถตํ   โหติ   กฐินํ   ฯ
ปุคฺคลสฺส   อตฺถารา   อตฺถตํ   โหติ   กฐินํ   ฯ  สมฺมา  เจว  อตฺถตํ
โหติ    กฐินํ    ฯ    ตญฺเจ    สีมฏฺโฐ   อนุโมทติ   เอวํปิ   อตฺถตํ
@เชิงอรรถ: ๑ ม. ยุ. นสทฺโท นตฺถิ ฯ
โหติ กฐินํ ฯ เอวํ โข ภิกฺขเว อตฺถตํ โหติ กฐินํ ฯ
     [๙๙]   กถญฺจ  ภิกฺขเว  อุพฺภตํ  โหติ  กฐินํ  ฯ  อฏฺฐิมา  ภิกฺขเว
มาติกา     กฐินสฺส     อุพฺภาราย     ปกฺกมนนฺติกา     นิฏฺฐานนฺติกา
สนฺนิฏฺฐานนฺติกา      นาสนนฺติกา      สวนนฺติกา      อาสาวจฺเฉทิกา
สีมาติกฺกนฺติกา สหุพฺภาราติ ฯ
     [๑๐๐]   ภิกฺขุ   อตฺถตกฐิโน   กตจีวรํ   อาทาย   ปกฺกมติ   น
ปจฺเจสฺสนฺติ    ฯ    ตสฺส   ภิกฺขุโน   ปกฺกมนนฺติโก   กฐินุทฺธาโร   ฯ
ภิกฺขุ   อตฺถตกฐิโน   จีวรํ   อาทาย   ปกฺกมติ   ฯ  ตสฺส  พหิสีมคตสฺส
เอวํ  โหติ  อิเธวิมํ  จีวรํ  กาเรสฺสํ  น  ปจฺเจสฺสนฺติ  ฯ  โส  ตํ จีวรํ
กาเรติ   ฯ   ตสฺส   ภิกฺขุโน   นิฏฺฐานนฺติโก   กฐินุทฺธาโร   ฯ  ภิกฺขุ
อตฺถตกฐิโน   จีวรํ   อาทาย   ปกฺกมติ   ฯ   ตสฺส  พหิสีมคตสฺส  เอวํ
โหติ   เนวิมํ   จีวรํ   กาเรสฺสํ   น   ปจฺเจสฺสนฺติ  ฯ  ตสฺส  ภิกฺขุโน
สนฺนิฏฺฐานนฺติโก     กฐินุทฺธาโร    ฯ    ภิกฺขุ    อตฺถตกฐิโน    จีวรํ
อาทาย    ปกฺกมติ   ฯ   ตสฺส   พหิสีมคตสฺส   เอวํ   โหติ   อิเธวิมํ
จีวรํ  กาเรสฺสํ  น  ปจฺเจสฺสนฺติ  ฯ  โส  ตํ  จีวรํ  กาเรติ  ฯ ตสฺส ตํ
จีวรํ  กยิรมานํ  นสฺสติ  ฯ  ตสฺส  ภิกฺขุโน  นาสนนฺติโก  กฐินุทฺธาโร  ฯ
ภิกฺขุ    อตฺถตกฐิโน    จีวรํ    อาทาย    ปกฺกมติ   ปจฺเจสฺสนฺติ   ฯ
โส   พหิสีมคโต   ตํ   จีวรํ   กาเรติ   ฯ   โส   กตจีวโร   สุณาติ
อุพฺภตํ   กิร   ตสฺมึ   อาวาเส  กฐินนฺติ  ฯ  ตสฺส  ภิกฺขุโน  สวนนฺติโก
กฐินุทฺธาโร    ฯ    ภิกฺขุ    อตฺถตกฐิโน    จีวรํ   อาทาย   ปกฺกมติ
ปจฺเจสฺสนฺติ   ฯ  โส  พหิสีมคโต  ตํ  จีวรํ  กาเรติ  ฯ  โส  กตจีวโร
ปจฺเจสฺสํ   ปจฺเจสฺสนฺติ   พหิทฺธา   กฐินุทฺธารํ   วีตินาเมติ   ฯ   ตสฺส
ภิกฺขุโน    สีมาติกฺกนฺติโก    กฐินุทฺธาโร    ฯ    ภิกฺขุ    อตฺถตกฐิโน
จีวรํ   อาทาย   ปกฺกมติ   ปจฺเจสฺสนฺติ   ฯ  โส  พหิสีมคโต  ตํ  จีวรํ
กาเรติ    ฯ    โส    กตจีวโร   ปจฺเจสฺสํ   ปจฺเจสฺสนฺติ   สมฺภุณาติ
กฐินุทฺธารํ ฯ ตสฺส ภิกฺขุโน สห ภิกฺขูหิ กฐินุทฺธาโร ฯ
                        อาทายสตฺตกํ นิฏฺฐิตํ ปฐมํ ฯ
     [๑๐๑]   ภิกฺขุ   อตฺถตกฐิโน   กตจีวรํ   สมาทาย   ปกฺกมติ  น
ปจฺเจสฺสนฺติ    ฯ    ตสฺส   ภิกฺขุโน   ปกฺกมนนฺติโก   กฐินุทฺธาโร   ฯ
ภิกฺขุ   อตฺถตกฐิโน   จีวรํ   สมาทาย   ปกฺกมติ  ฯ  ตสฺส  พหิสีมคตสฺส
เอวํ  โหติ  อิเธวิมํ  จีวรํ  กาเรสฺสํ  น  ปจฺเจสฺสนฺติ  ฯ  โส  ตํ จีวรํ
กาเรติ   ฯ   ตสฺส   ภิกฺขุโน   นิฏฺฐานนฺติโก   กฐินุทฺธาโร   ฯ  ภิกฺขุ
อตฺถตกฐิโน    จีวรํ    สมาทาย    ปกฺกมติ   ฯ   ตสฺส   พหิสีมคตสฺส
เอวํ   โหติ   เนวิมํ   จีวรํ   กาเรสฺสํ   น   ปจฺเจสฺสนฺติ   ฯ  ตสฺส
ภิกฺขุโน    สนฺนิฏฺฐานนฺติโก    กฐินุทฺธาโร    ฯ    ภิกฺขุ   อตฺถตกฐิโน
จีวรํ   สมาทาย   ปกฺกมติ  ฯ  ตสฺส  พหิสีมคตสฺส  เอวํ  โหติ  อิเธวิมํ
จีวรํ   กาเรสฺสํ  น  ปจฺเจสฺสนฺติ  ฯ  โส  ตํ  จีวรํ  กาเรติ  ฯ  ตสฺส
ภิกฺขุโน   ตํ   จีวรํ   กยิรมานํ  นสฺสติ  ฯ  ตสฺส  ภิกฺขุโน  นาสนนฺติโก
กฐินุทฺธาโร    ฯ    ภิกฺขุ    อตฺถตกฐิโน   จีวรํ   สมาทาย   ปกฺกมติ
ปจฺเจสฺสนฺติ   ฯ  โส  พหิสีมคโต  ตํ  จีวรํ  กาเรติ  ฯ  โส  กตจีวโร
สุณาติ   อุพฺภตํ   กิร   ตสฺมึ   อาวาเส   กฐินนฺติ   ฯ  ตสฺส  ภิกฺขุโน
สวนนฺติโก    กฐินุทฺธาโร   ฯ   ภิกฺขุ   อตฺถตกฐิโน   จีวรํ   สมาทาย
ปกฺกมติ   ปจฺเจสฺสนฺติ   ฯ   โส   พหิสีมคโต   ตํ   จีวรํ  กาเรติ  ฯ
โส     กตจีวโร    ปจฺเจสฺสํ    ปจฺเจสฺสนฺติ    พหิทฺธา    กฐินุทฺธารํ
วีตินาเมติ    ฯ    ตสฺส   ภิกฺขุโน   สีมาติกฺกนฺติโก   กฐินุทฺธาโร   ฯ
ภิกฺขุ   อตฺถตกฐิโน   จีวรํ   สมาทาย   ปกฺกมติ   ปจฺเจสฺสนฺติ  ฯ  โส
พหิสีมคโต  ตํ  จีวรํ  กาเรติ  ฯ  โส  กตจีวโร  ปจฺเจสฺสํ  ปจฺเจสฺสนฺติ
สมฺภุณาติ กฐินุทฺธารํ ฯ ตสฺส ภิกฺขุโน สห ภิกฺขูหิ กฐินุทฺธาโร ฯ
                     สมาทายสตฺตกํ นิฏฺฐิตํ ทุติยํ ฯ
     [๑๐๒]   ภิกฺขุ  อตฺถตกฐิโน  วิปฺปกตจีวรํ  อาทาย  ปกฺกมติ ฯ ตสฺส
พหิสีมคตสฺส  เอวํ  โหติ  อิเธวิมํ จีวรํ กาเรสฺสํ น ปจฺเจสฺสนฺติ ฯ  โส ตํ
จีวรํ   กาเรติ  ฯ  ตสฺส  ภิกฺขุโน  นิฏฺฐานนฺติโก  กฐินุทฺธาโร  ฯ  ภิกฺขุ
อตฺถตกฐิโน   วิปฺปกตจีวรํ   อาทาย   ปกฺกมติ   ฯ   ตสฺส  พหิสีมคตสฺส
เอวํ  โหติ  เนวิมํ  จีวรํ  กาเรสฺสํ  น  ปจฺเจสฺสนฺติ  ฯ  ตสฺส  ภิกฺขุโน
สนฺนิฏฺฐานนฺติโก  กฐินุทฺธาโร  ฯ  ภิกฺขุ   อตฺถตกฐิโน วิปฺปกตจีวรํ อาทาย
ปกฺกมติ  ฯ  ตสฺส  พหิสีมคตสฺส  เอวํ  โหติ  อิเธวิมํ  จีวรํ  กาเรสฺสํ น
ปจฺเจสฺสนฺติ  ฯ  โส  ตํ  จีวรํ กาเรติ ฯ ตสฺส ตํ จีวรํ กยิรมานํ นสฺสติ ฯ
ตสฺส    ภิกฺขุโน   นาสนนฺติโก   กฐินุทฺธาโร   ฯ   ภิกฺขุ   อตฺถตกฐิโน
วิปฺปกตจีวรํ   อาทาย   ปกฺกมติ   ปจฺเจสฺสนฺติ   ฯ  โส  พหิสีมคโต  ตํ
จีวรํ   กาเรติ  ฯ  โส  กตจีวโร  สุณาติ  อุพฺภตํ  กิร  ตสฺมึ  อาวาเส
กฐินนฺติ    ฯ   ตสฺส   ภิกฺขุโน   สวนนฺติโก   กฐินุทฺธาโร   ฯ   ภิกฺขุ
อตฺถตกฐิโน   วิปฺปกตจีวรํ   อาทาย   ปกฺกมติ   ปจฺเจสฺสนฺติ   ฯ   โส
พหิสีมคโต  ตํ  จีวรํ  กาเรติ  ฯ  โส  กตจีวโร  ปจฺเจสฺสํ  ปจฺเจสฺสนฺติ
พหิทฺธา   ๑-  กฐินุทฺธารํ  วีตินาเมติ  ฯ  ตสฺส  ภิกฺขุโน  สีมาติกฺกนฺติโก
กฐินุทฺธาโร   ฯ   ภิกฺขุ   อตฺถตกฐิโน   วิปฺปกตจีวรํ   อาทาย  ปกฺกมติ
ปจฺเจสฺสนฺติ   ฯ  โส  พหิสีมคโต  ตํ  จีวรํ  กาเรติ  ฯ  โส  กตจีวโร
ปจฺเจสฺสํ    ปจฺเจสฺสนฺติ   สมฺภุณาติ   กฐินุทฺธารํ   ฯ   ตสฺส   ภิกฺขุโน
สห ภิกฺขูหิ กฐินุทฺธาโร ฯ
                       อาทายฉกฺกํ นิฏฺฐิตํ ตติยํ ฯ
     [๑๐๓]   ภิกฺขุ   อตฺถตกฐิโน  วิปฺปกตจีวรํ  สมาทาย  ปกฺกมติ  ฯ
ตสฺส    พหิสีมคตสฺส    เอวํ   โหติ   อิเธวิมํ   จีวรํ   กาเรสฺสํ   น
ปจฺเจสฺสนฺติ  ฯ  โส  ตํ  จีวรํ  กาเรติ  ฯ  ตสฺส  ภิกฺขุโน นิฏฺฐานนฺติโก
กฐินุทฺธาโร     ฯ    ภิกฺขุ    อตฺถตกฐิโน    วิปฺปกตจีวรํ    สมาทาย
ปกฺกมติ   ฯ   ตสฺส   พหิสีมคตสฺส  เอวํ  โหติ  เนวิมํ  จีวรํ  กาเรสฺสํ
น   ปจฺเจสฺสนฺติ   ฯ   ตสฺส  ภิกฺขุโน  สนฺนิฏฺฐานนฺติโก  กฐินุทฺธาโร  ฯ
ภิกฺขุ    อตฺถตกฐิโน    วิปฺปกตจีวรํ    สมาทาย   ปกฺกมติ   ฯ   ตสฺส
พหิสีมคตสฺส   เอวํ  โหติ  อิเธวิมํ  จีวรํ  กาเรสฺสํ  น  ปจฺเจสฺสนฺติ  ฯ
โส  ตํ  จีวรํ  กาเรติ  ฯ  ตสฺส ตํ จีวรํ กยิรมานํ นสฺสติ ฯ ตสฺส ภิกฺขุโน
นาสนนฺติโก    กฐินุทฺธาโร    ฯ    ภิกฺขุ    อตฺถตกฐิโน   วิปฺปกตจีวรํ
@เชิงอรรถ: ๑ โป. พหิสีมาย ฯ
สมาทาย    ปกฺกมติ   ปจฺเจสฺสนฺติ   ฯ   โส   พหิสีมคโต   ตํ   จีวรํ
กาเรติ   ฯ   โส   กตจีวโร   สุณาติ   อุพฺภตํ   กิร  ตสฺมึ  อาวาเส
กฐินนฺติ    ฯ   ตสฺส   ภิกฺขุโน   สวนนฺติโก   กฐินุทฺธาโร   ฯ   ภิกฺขุ
อตฺถตกฐิโน    วิปฺปกตจีวรํ    สมาทาย    ปกฺกมติ    ปจฺเจสฺสนฺติ   ฯ
โส  พหิสีมคโต  ตํ  จีวรํ  กาเรติ  ฯ โส กตจีวโร ปจฺเจสฺสํ ปจฺเจสฺสนฺติ
พหิทฺธา   กฐินุทฺธารํ   วีตินาเมติ   ฯ   ตสฺส   ภิกฺขุโน  สีมาติกฺกนฺติโก
กฐินุทฺธาโร   ฯ   ภิกฺขุ   อตฺถตกฐิโน   วิปฺปกตจีวรํ  สมาทาย  ปกฺกมติ
ปจฺเจสฺสนฺติ   ฯ  โส  พหิสีมคโต  ตํ  จีวรํ  กาเรติ  ฯ  โส  กตจีวโร
ปจฺเจสฺสํ    ปจฺเจสฺสนฺติ   สมฺภุณาติ   กฐินุทฺธารํ   ฯ   ตสฺส   ภิกฺขุโน
สห ภิกฺขูหิ กฐินุทฺธาโร ฯ
                      สมาทายฉกฺกํ นิฏฺฐิตํ จตุตฺถํ ฯ
     [๑๐๔]   ภิกฺขุ   อตฺถตกฐิโน   จีวรํ  อาทาย  ปกฺกมติ  ฯ  ตสฺส
พหิสีมคตสฺส   เอวํ  โหติ  อิเธวิมํ  จีวรํ  กาเรสฺสํ  น  ปจฺเจสฺสนฺติ  ฯ
โส  ตํ  จีวรํ  กาเรติ  ฯ  ตสฺส  ภิกฺขุโน  นิฏฺฐานนฺติโก  กฐินุทฺธาโร ฯ
ภิกฺขุ   อตฺถตกฐิโน   จีวรํ   อาทาย   ปกฺกมติ   ฯ  ตสฺส  พหิสีมคตสฺส
เอวํ  โหติ  เนวิมํ  จีวรํ  กาเรสฺสํ  น  ปจฺเจสฺสนฺติ  ฯ  ตสฺส  ภิกฺขุโน
สนฺนิฏฺฐานนฺติโก     กฐินุทฺธาโร    ฯ    ภิกฺขุ    อตฺถตกฐิโน    จีวรํ
อาทาย   ปกฺกมติ   ฯ  ตสฺส   พหิสีมคตสฺส  เอวํ  โหติ  อิเธวิมํ  จีวรํ
กาเรสฺสํ  น  ปจฺเจสฺสนฺติ  ฯ  โส  ตํ  จีวรํ  กาเรติ  ฯ  ตสฺส ตํ จีวรํ
กยิรมานํ นสฺสติ ฯ ตสฺส ภิกฺขุโน นาสนนฺติโก กฐินุทฺธาโร ฯ
     [๑๐๕]   ภิกฺขุ    อตฺถตกฐิโน   จีวรํ   อาทาย   ปกฺกมติ   น
ปจฺเจสฺสนฺติ    ฯ   ตสฺส   พหิสีมคตสฺส   เอวํ   โหติ   อิเธวิมํ  จีวรํ
กาเรสฺสนฺติ  ฯ  โส  ตํ  จีวรํ  กาเรติ  ฯ  ตสฺส  ภิกฺขุโน นิฏฺฐานนฺติโก
กฐินุทฺธาโร   ฯ   ภิกฺขุ   อตฺถตกฐิโน   จีวรํ   อาทาย   ปกฺกมติ   น
ปจฺเจสฺสนฺติ    ฯ   ตสฺส   พหิสีมคตสฺส   เอวํ   โหติ   เนวิมํ   จีวรํ
กาเรสฺสนฺติ   ฯ   ตสฺส   ภิกฺขุโน   สนฺนิฏฺฐานนฺติโก   กฐินุทฺธาโร   ฯ
ภิกฺขุ   อตฺถตกฐิโน   จีวรํ   อาทาย   ปกฺกมติ   น   ปจฺเจสฺสนฺติ   ฯ
ตสฺส   พหิสีมคตสฺส   เอวํ   โหติ  อิเธวิมํ  จีวรํ  กาเรสฺสนฺติ  ฯ  โส
ตํ   จีวรํ   กาเรติ   ฯ   ตสฺส  ตํ  จีวรํ  กยิรมานํ  นสฺสติ  ฯ  ตสฺส
ภิกฺขุโน นาสนนฺติโก กฐินุทฺธาโร ฯ
     [๑๐๖]   ภิกฺขุ  อตฺถตกฐิโน  จีวรํ  อาทาย  ปกฺกมติ  อนธิฏฺฐิเตน
เนวสฺส   โหติ   ปจฺเจสฺสนฺติ   น   ปนสฺส   โหติ  น  ปจฺเจสฺสนฺติ  ฯ
ตสฺส    พหิสีมคตสฺส    เอวํ   โหติ   อิเธวิมํ   จีวรํ   กาเรสฺสํ   น
ปจฺเจสฺสนฺติ  ฯ  โส  ตํ  จีวรํ  กาเรติ  ฯ  ตสฺส  ภิกฺขุโน นิฏฺฐานนฺติโก
กฐินุทฺธาโร    ฯ    ภิกฺขุ    อตฺถตกฐิโน    จีวรํ   อาทาย   ปกฺกมติ
อนธิฏฺฐิเตน    เนวสฺส    โหติ    ปจฺเจสฺสนฺติ    น    ปนสฺส   โหติ
น   ปจฺเจสฺสนฺติ   ฯ   ตสฺส   พหิสีมคตสฺส   เอวํ  โหติ  เนวิมํ  จีวรํ
กาเรสฺสํ    น    ปจฺเจสฺสนฺติ   ฯ   ตสฺส   ภิกฺขุโน   สนฺนิฏฺฐานนฺติโก
กฐินุทฺธาโร    ฯ    ภิกฺขุ    อตฺถตกฐิโน    จีวรํ   อาทาย   ปกฺกมติ
อนธิฏฺฐิเตน    เนวสฺส    โหติ    ปจฺเจสฺสนฺติ    น    ปนสฺส   โหติ
น   ปจฺเจสฺสนฺติ   ฯ   ตสฺส   พหิสีมคตสฺส  เอวํ  โหติ  อิเธวิมํ  จีวรํ
กาเรสฺสํ  น  ปจฺเจสฺสนฺติ  ฯ  โส  ตํ  จีวรํ  กาเรติ  ฯ  ตสฺส ตํ จีวรํ
กยิรมานํ นสฺสติ ฯ ตสฺส ภิกฺขุโน นาสนนฺติโก กฐินุทฺธาโร ฯ
     [๑๐๗]   ภิกฺขุ  อตฺถตกฐิโน  จีวรํ  อาทาย  ปกฺกมติ ปจฺเจสฺสนฺติ ฯ
ตสฺส  พหิสีมคตสฺส  เอวํ  โหติ  อิเธวิมํ  จีวรํ กาเรสฺสํ น ปจฺเจสฺสนฺติ ฯ
โส  ตํ  จีวรํ  กาเรติ  ฯ  ตสฺส  ภิกฺขุโน  นิฏฺฐานนฺติโก  กฐินุทฺธาโร ฯ
ภิกฺขุ   อตฺถตกฐิโน   จีวรํ   อาทาย   ปกฺกมติ   ปจฺเจสฺสนฺติ  ฯ  ตสฺส
พหิสีมคตสฺส   เอวํ   โหติ  เนวิมํ  จีวรํ  กาเรสฺสํ  น  ปจฺเจสฺสนฺติ  ฯ
ตสฺส   ภิกฺขุโน   สนฺนิฏฺฐานนฺติโก   กฐินุทฺธาโร   ฯ  ภิกฺขุ  อตฺถตกฐิโน
จีวรํ  อาทาย  ปกฺกมติ  ปจฺเจสฺสนฺติ  ฯ  ตสฺส  พหิสีมคตสฺส  เอวํ  โหติ
อิเธวิมํ  จีวรํ  กาเรสฺสํ  น ปจฺเจสฺสนฺติ ฯ โส ตํ จีวรํ กาเรติ ฯ ตสฺส ตํ
จีวรํ กยิรมานํ นสฺสติ ฯ ตสฺส ภิกฺขุโน นาสนนฺติโก กฐินุทฺธาโร ฯ
     {๑๐๗.๑}   ภิกฺขุ  อตฺถตกฐิโน  จีวรํ อาทาย ปกฺกมติ ปจฺเจสฺสนฺติ ฯ
โส   พหิสีมคโต   ตํ  จีวรํ  กาเรติ  ฯ  โส  กตจีวโร  สุณาติ  อุพฺภตํ
กิร    ตสฺมึ    อาวาเส   กฐินนฺติ   ฯ   ตสฺส   ภิกฺขุโน   สวนนฺติโก
กฐินุทฺธาโร    ฯ    ภิกฺขุ    อตฺถตกฐิโน    จีวรํ   อาทาย   ปกฺกมติ
ปจฺเจสฺสนฺติ   ฯ  โส  พหิสีมคโต  ตํ  จีวรํ  กาเรติ  ฯ  โส  กตจีวโร
ปจฺเจสฺสํ   ปจฺเจสฺสนฺติ   พหิทฺธา   กฐินุทฺธารํ   วีตินาเมติ   ฯ   ตสฺส
ภิกฺขุโน   สีมาติกฺกนฺติโก   กฐินุทฺธาโร   ฯ   ภิกฺขุ   อตฺถตกฐิโน  จีวรํ
อาทาย  ปกฺกมติ  ปจฺเจสฺสนฺติ  ฯ  โส  พหิสีมคโต  ตํ  จีวรํ  กาเรติ ฯ
โส   กตจีวโร   ปจฺเจสฺสํ  ปจฺเจสฺสนฺติ  สมฺภุณาติ  กฐินุทฺธารํ  ฯ  ตสฺส
ภิกฺขุโน สห ภิกฺขูหิ กฐินุทฺธาโร ฯ
     [๑๐๘]   ภิกฺขุ  อตฺถตกฐิโน  จีวรํ  สมาทาย  ปกฺกมติ ฯ (อาทาย-
วารสทิสํ   เอวํ   วิตฺถาเรตพฺพํ   ฯ)  ภิกฺขุ  อตฺถตกฐิโน  วิปฺปกตจีวรํ
อาทาย  ปกฺกมติ  ฯ  ตสฺส  พหิสีมคตสฺส เอวํ โหติ อิเธวิมํ จีวรํ กาเรสฺสํ
น  ปจฺเจสฺสนฺติ  ฯ  โส  ตํ  จีวรํ  กาเรติ ฯ ตสฺส ภิกฺขุโน นิฏฺฐานนฺติโก
กฐินุทฺธาโร ฯ (สมาทายวารสทิสํ เอวํ วิตฺถาเรตพฺพํ ฯ)
     [๑๐๙]   ภิกฺขุ   อตฺถตกฐิโน  วิปฺปกตจีวรํ  สมาทาย  ปกฺกมติ  ฯ
ตสฺส  พหิสีมคตสฺส  เอวํ  โหติ  อิเธวิมํ  จีวรํ กาเรสฺสํ น ปจฺเจสฺสนฺติ ฯ
โส  ตํ  จีวรํ  กาเรติ  ฯ ตสฺส ภิกฺขุโน นิฏฺฐานนฺติโก กฐินุทฺธาโร ฯ ภิกฺขุ
อตฺถตกฐิโน   วิปฺปกตจีวรํ   สมาทาย   ปกฺกมติ   ฯ  ตสฺส  พหิสีมคตสฺส
เอวํ  โหติ  เนวิมํ  จีวรํ  กาเรสฺสํ  น  ปจฺเจสฺสนฺติ  ฯ  ตสฺส  ภิกฺขุโน
สนฺนิฏฺฐานนฺติโก    กฐินุทฺธาโร   ฯ   ภิกฺขุ   อตฺถตกฐิโน   วิปฺปกตจีวรํ
สมาทาย   ปกฺกมติ   ฯ  ตสฺส  พหิสีมคตสฺส  เอวํ  โหติ  อิเธวิมํ  จีวรํ
กาเรสฺสํ  น  ปจฺเจสฺสนฺติ ฯ โส ตํ จีวรํ กาเรติ ฯ ตสฺส ตํ จีวรํ กยิรมานํ
นสฺสติ ฯ ตสฺส ภิกฺขุโน นาสนนฺติโก กฐินุทฺธาโร ฯ
     [๑๑๐]   ภิกฺขุ   อตฺถตกฐิโน   วิปฺปกตจีวรํ   สมาทาย   ปกฺกมติ
น   ปจฺเจสฺสนฺติ   ฯ   ตสฺส   พหิสีมคตสฺส  เอวํ  โหติ  อิเธวิมํ  จีวรํ
กาเรสฺสนฺติ  ฯ  โส  ตํ  จีวรํ  กาเรติ  ฯ  ตสฺส  ภิกฺขุโน นิฏฺฐานนฺติโก
กฐินุทฺธาโร   ฯ   ภิกฺขุ   อตฺถตกฐิโน   วิปฺปกตจีวรํ  สมาทาย  ปกฺกมติ
น   ปจฺเจสฺสนฺติ   ฯ   ตสฺส   พหิสีมคตสฺส   เอวํ  โหติ  เนวิมํ  จีวรํ
กาเรสฺสนฺติ   ฯ   ตสฺส   ภิกฺขุโน   สนฺนิฏฺฐานนฺติโก   กฐินุทฺธาโร   ฯ
ภิกฺขุ   อตฺถตกฐิโน  วิปฺปกตจีวรํ  สมาทาย  ปกฺกมติ  น  ปจฺเจสฺสนฺติ  ฯ
ตสฺส  พหิสีมคตสฺส  เอวํ  โหติ  อิเธวิมํ  จีวรํ  กาเรสฺสนฺติ  ฯ  โส  ตํ
จีวรํ  กาเรติ  ฯ  ตสฺส  ตํ  จีวรํ  กยิรมานํ  นสฺสติ  ฯ  ตสฺส  ภิกฺขุโน
นาสนนฺติโก กฐินุทฺธาโร ฯ
     [๑๑๑]   ภิกฺขุ   อตฺถตกฐิโน   วิปฺปกตจีวรํ   สมาทาย   ปกฺกมติ
อนธิฏฺฐิเตน    เนวสฺส   โหติ   ปจฺเจสฺสนฺติ   น   ปนสฺส   โหติ   น
ปจฺเจสฺสนฺติ   ฯ    ตสฺส   พหิสีมคตสฺส   เอวํ   โหติ   อิเธวิมํ  จีวรํ
กาเรสฺสํ  น  ปจฺเจสฺสนฺติ  ฯ  โส  ตํ  จีวรํ  กาเรติ  ฯ  ตสฺส ภิกฺขุโน
นิฏฺฐานนฺติโก    กฐินุทฺธาโร    ฯ    ภิกฺขุ   อตฺถตกฐิโน   วิปฺปกตจีวรํ
สมาทาย    ปกฺกมติ    อนธิฏฺฐิเตน    เนวสฺส    โหติ    ปจฺเจสฺสนฺติ
น   ปนสฺส   โหติ   น   ปจฺเจสฺสนฺติ   ฯ   ตสฺส   พหิสีมคตสฺส  เอวํ
โหติ   เนวิมํ   จีวรํ   กาเรสฺสํ   น   ปจฺเจสฺสนฺติ  ฯ  ตสฺส  ภิกฺขุโน
สนฺนิฏฺฐานนฺติโก    กฐินุทฺธาโร   ฯ   ภิกฺขุ   อตฺถตกฐิโน   วิปฺปกตจีวรํ
สมาทาย    ปกฺกมติ    อนธิฏฺฐิเตน    เนวสฺส    โหติ    ปจฺเจสฺสนฺติ
น   ปนสฺส   โหติ   น   ปจฺเจสฺสนฺติ   ฯ   ตสฺส   พหิสีมคตสฺส  เอวํ
โหติ   อิเธวิมํ   จีวรํ   กาเรสฺสํ   น  ปจฺเจสฺสนฺติ  ฯ  โส  ตํ  จีวรํ
กาเรติ   ฯ   ตสฺส   ตํ   จีวรํ   กยิรมานํ  นสฺสติ  ฯ  ตสฺส  ภิกฺขุโน
นาสนนฺติโก กฐินุทฺธาโร ฯ
     [๑๑๒]   ภิกฺขุ   อตฺถตกฐิโน   วิปฺปกตจีวรํ   สมาทาย   ปกฺกมติ
ปจฺเจสฺสนฺติ   ฯ   ตสฺส   พหิสีมคตสฺส   เอวํ   โหติ   อิเธวิมํ   จีวรํ
กาเรสฺสํ  น  ปจฺเจสฺสนฺติ  ฯ  โส  ตํ  จีวรํ  กาเรติ  ฯ  ตสฺส ภิกฺขุโน
นิฏฺฐานนฺติโก    กฐินุทฺธาโร    ฯ    ภิกฺขุ   อตฺถตกฐิโน   วิปฺปกตจีวรํ
สมาทาย    ปกฺกมติ    ปจฺเจสฺสนฺติ    ฯ   ตสฺส   พหิสีมคตสฺส   เอวํ
โหติ   เนวิมํ   จีวรํ   กาเรสฺสํ   น   ปจฺเจสฺสนฺติ  ฯ  ตสฺส  ภิกฺขุโน
สนฺนิฏฺฐานนฺติโก    กฐินุทฺธาโร   ฯ   ภิกฺขุ   อตฺถตกฐิโน   วิปฺปกตจีวรํ
สมาทาย   ปกฺกมติ   ปจฺเจสฺสนฺติ   ฯ   ตสฺส  พหิสีมคตสฺส  เอวํ  โหติ
อิเธวิมํ  จีวรํ  กาเรสฺสํ  น  ปจฺเจสฺสนฺติ  ฯ  โส  ตํ  จีวรํ  กาเรติ ฯ
ตสฺส   ตํ   จีวรํ   กยิรมานํ   นสฺสติ   ฯ  ตสฺส  ภิกฺขุโน  นาสนนฺติโก
กฐินุทฺธาโร ฯ
     {๑๑๒.๑}   ภิกฺขุ   อตฺถตกฐิโน   วิปฺปกตจีวรํ  สมาทาย  ปกฺกมติ
ปจฺเจสฺสนฺติ  ฯ  โส  พหิสีมคโต  ตํ  จีวรํ กาเรติ ฯ โส กตจีวโร สุณาติ
อุพฺภตํ   กิร   ตสฺมึ   อาวาเส  กฐินนฺติ  ฯ  ตสฺส  ภิกฺขุโน  สวนนฺติโก
กฐินุทฺธาโร   ฯ   ภิกฺขุ   อตฺถตกฐิโน   วิปฺปกตจีวรํ  สมาทาย  ปกฺกมติ
ปจฺเจสฺสนฺติ  ฯ  โส  พหิสีมคโต ตํ จีวรํ กาเรติ ฯ โส กตจีวโร ปจฺเจสฺสํ
ปจฺเจสฺสนฺติ    พหิทฺธา   กฐินุทฺธารํ   วีตินาเมติ   ฯ   ตสฺส   ภิกฺขุโน
สีมาติกฺกนฺติโก    กฐินุทฺธาโร    ฯ   ภิกฺขุ   อตฺถตกฐิโน   วิปฺปกตจีวรํ
สมาทาย    ปกฺกมติ   ปจฺเจสฺสนฺติ   ฯ   โส   พหิสีมคโต   ตํ   จีวรํ
กาเรติ    ฯ    โส    กตจีวโร   ปจฺเจสฺสํ   ปจฺเจสฺสนฺติ   สมฺภุณาติ
กฐินุทฺธารํ ฯ ตสฺส ภิกฺขุโน สห ภิกฺขูหิ กฐินุทฺธาโร ฯ
                         อาทายภาณวารํ นิฏฺฐิตํ ฯ
     [๑๑๓]   ภิกฺขุ  อตฺถตกฐิโน  จีวราสาย  ปกฺกมติ  ฯ โส พหิสีมคโต
ตํ  จีวราสํ  ปยิรุปาสติ  อนาสาย  ลภติ  อาสาย  น  ลภติ ฯ ตสฺส เอวํ
โหติ  อิเธวิมํ  จีวรํ  กาเรสฺสํ  น  ปจฺเจสฺสนฺติ ฯ โส ตํ จีวรํ กาเรติ ฯ
ตสฺส   ภิกฺขุโน   นิฏฺฐานนฺติโก   กฐินุทฺธาโร   ฯ   ภิกฺขุ   อตฺถตกฐิโน
จีวราสาย   ปกฺกมติ   ฯ   โส   พหิสีมคโต   ตํ   จีวราสํ  ปยิรุปาสติ
อนาสาย  ลภติ  อาสาย  น  ลภติ  ฯ  ตสฺส  เอวํ  โหติ  เนวิมํ  จีวรํ
กาเรสฺสํ    น    ปจฺเจสฺสนฺติ   ฯ   ตสฺส   ภิกฺขุโน   สนฺนิฏฺฐานนฺติโก
กฐินุทฺธาโร ฯ
     {๑๑๓.๑}   ภิกฺขุ  อตฺถตกฐิโน  จีวราสาย ปกฺกมติ ฯ โส พหิสีมคโต
ตํ  จีวราสํ  ปยิรุปาสติ  อนาสาย  ลภติ  อาสาย  น  ลภติ ฯ ตสฺส เอวํ
โหติ  อิเธวิมํ  จีวรํ  กาเรสฺสํ  น  ปจฺเจสฺสนฺติ ฯ โส ตํ จีวรํ กาเรติ ฯ
ตสฺส   ตํ   จีวรํ   กยิรมานํ   นสฺสติ   ฯ  ตสฺส  ภิกฺขุโน  นาสนนฺติโก
กฐินุทฺธาโร   ฯ   ภิกฺขุ   อตฺถตกฐิโน   จีวราสาย   ปกฺกมติ  ฯ  ตสฺส
พหิสีมคตสฺส    เอวํ    โหติ    อิเธวิมํ    จีวราสํ   ปยิรุปาสิสฺสํ   น
ปจฺเจสฺสนฺติ   ฯ  โส  ตํ  จีวราสํ  ปยิรุปาสติ  ฯ  ตสฺส  สา  จีวราสา
อุปจฺฉิชฺชติ ฯ ตสฺส ภิกฺขุโน อาสาวจฺเฉทิโก กฐินุทฺธาโร ฯ
     [๑๑๔]   ภิกฺขุ  อตฺถตกฐิโน  จีวราสาย  ปกฺกมติ  น ปจฺเจสฺสนฺติ ฯ
โส    พหิสีมคโต    ตํ    จีวราสํ    ปยิรุปาสติ    อนาสาย    ลภติ
อาสาย  น  ลภติ  ฯ  ตสฺส  เอวํ  โหติ  อิเธวิมํ  จีวรํ  กาเรสฺสนฺติ ฯ
โส  ตํ  จีวรํ  กาเรติ  ฯ  ตสฺส  ภิกฺขุโน  นิฏฺฐานนฺติโก  กฐินุทฺธาโร ฯ
ภิกฺขุ   อตฺถตกฐิโน   จีวราสาย   ปกฺกมติ   น   ปจฺเจสฺสนฺติ   ฯ  โส
พหิสีมคโต   ตํ   จีวราสํ   ปยิรุปาสติ   อนาสาย   ลภติ   อาสาย  น
ลภติ   ฯ  ตสฺส  เอวํ  โหติ  เนวิมํ  จีวรํ  กาเรสฺสนฺติ  ๑-  ฯ  ตสฺส
ภิกฺขุโน สนฺนิฏฺฐานนฺติโก กฐินุทฺธาโร ฯ
     {๑๑๔.๑}   ภิกฺขุ  อตฺถตกฐิโน  จีวราสาย ปกฺกมติ น ปจฺเจสฺสนฺติ ฯ
โส  พหิสีมคโต  ตํ  จีวราสํ  ปยิรุปาสติ อนาสาย ลภติ อาสาย น ลภติ ฯ
ตสฺส  เอวํ  โหติ อิเธวิมํ จีวรํ กาเรสฺสนฺติ ฯ โส ตํ จีวรํ กาเรติ ฯ ตสฺส
ตํ  จีวรํ  กยิรมานํ  นสฺสติ  ฯ  ตสฺส  ภิกฺขุโน นาสนนฺติโก กฐินุทฺธาโร ฯ
ภิกฺขุ   อตฺถตกฐิโน   จีวราสาย   ปกฺกมติ   น   ปจฺเจสฺสนฺติ  ฯ  ตสฺส
พหิสีมคตสฺส   เอวํ  โหติ  อิเธวิมํ  จีวราสํ  ปยิรุปาสิสฺสนฺติ  ฯ  โส  ตํ
จีวราสํ   ปยิรุปาสติ   ฯ   ตสฺส   สา  จีวราสา  อุปจฺฉิชฺชติ  ฯ  ตสฺส
ภิกฺขุโน อาสาวจฺเฉทิโก กฐินุทฺธาโร ฯ
     [๑๑๕]   ภิกฺขุ   อตฺถตกฐิโน   จีวราสาย   ปกฺกมติ  อนธิฏฺฐิเตน
เนวสฺส   โหติ   ปจฺเจสฺสนฺติ   น   ปนสฺส   โหติ  น  ปจฺเจสฺสนฺติ  ฯ
โส   พหิสีมคโต   ตํ   จีวราสํ   ปยิรุปาสติ   อนาสาย  ลภติ  อาสาย
@เชิงอรรถ: ๑ โป. ม. กาเรสฺสํ น ปจฺเจสฺสนฺติ ฯ
น  ลภติ  ฯ  ตสฺส  เอวํ  โหติ  อิเธวิมํ จีวรํ กาเรสฺสํ น ปจฺเจสฺสนฺติ ฯ
โส  ตํ  จีวรํ  กาเรติ  ฯ  ตสฺส  ภิกฺขุโน  นิฏฺฐานนฺติโก  กฐินุทฺธาโร ฯ
ภิกฺขุ    อตฺถตกฐิโน    จีวราสาย    ปกฺกมติ    อนธิฏฺฐิเตน   เนวสฺส
โหติ  ปจฺเจสฺสนฺติ  น  ปนสฺส  โหติ  น  ปจฺเจสฺสนฺติ  ฯ  โส พหิสีมคโต
ตํ   จีวราสํ   ปยิรุปาสติ  อนาสาย  ลภติ  อาสาย  น  ลภติ  ฯ  ตสฺส
เอวํ  โหติ  เนวิมํ  จีวรํ  กาเรสฺสํ  น  ปจฺเจสฺสนฺติ  ฯ  ตสฺส  ภิกฺขุโน
สนฺนิฏฺฐานนฺติโก กฐินุทฺธาโร ฯ
     {๑๑๕.๑}   ภิกฺขุ   อตฺถตกฐิโน  จีวราสาย  ปกฺกมติ  อนธิฏฺฐิเตน
เนวสฺส   โหติ  ปจฺเจสฺสนฺติ  น  ปนสฺส  โหติ  น  ปจฺเจสฺสนฺติ  ฯ  โส
พหิสีมคโต    ตํ    จีวราสํ    ปยิรุปาสติ   อนาสาย   ลภติ   อาสาย
น  ลภติ  ฯ  ตสฺส  เอวํ  โหติ  อิเธวิมํ จีวรํ กาเรสฺสํ น ปจฺเจสฺสนฺติ ฯ
โส  ตํ  จีวรํ  กาเรติ  ฯ  ตสฺส  ตํ  จีวรํ  กยิรมานํ  นสฺสติ  ฯ  ตสฺส
ภิกฺขุโน     นาสนนฺติโก     กฐินุทฺธาโร    ฯ    ภิกฺขุ    อตฺถตกฐิโน
จีวราสาย   ปกฺกมติ   อนธิฏฺฐิเตน   เนวสฺส   โหติ   ปจฺเจสฺสนฺติ   น
ปนสฺส   โหติ   น   ปจฺเจสฺสนฺติ   ฯ   ตสฺส  พหิสีมคตสฺส  เอวํ  โหติ
อิเธวิมํ   จีวราสํ   ปยิรุปาสิสฺสํ   น  ปจฺเจสฺสนฺติ  ฯ  โส  ตํ  จีวราสํ
ปยิรุปาสติ   ฯ   ตสฺส   สา   จีวราสา  อุปจฺฉิชฺชติ  ฯ  ตสฺส  ภิกฺขุโน
อาสาวจฺเฉทิโก กฐินุทฺธาโร ฯ
                         อนาสาโทฬสกํ นิฏฺฐิตํ ฯ
     [๑๑๖]   ภิกฺขุ  อตฺถตกฐิโน  จีวราสาย  ปกฺกมติ  ปจฺเจสฺสนฺติ  ฯ
โส   พหิสีมคโต   ตํ   จีวราสํ   ปยิรุปาสติ   อาสาย  ลภติ  อนาสาย
น  ลภติ  ฯ  ตสฺส  เอวํ  โหติ  อิเธวิมํ จีวรํ กาเรสฺสํ น ปจฺเจสฺสนฺติ ฯ
โส  ตํ  จีวรํ  กาเรติ  ฯ  ตสฺส  ภิกฺขุโน  นิฏฺฐานนฺติโก  กฐินุทฺธาโร ฯ
ภิกฺขุ    อตฺถตกฐิโน    จีวราสาย    ปกฺกมติ   ปจฺเจสฺสนฺติ   ฯ   โส
พหิสีมคโต   ตํ   จีวราสํ   ปยิรุปาสติ   อาสาย   ลภติ   อนาสาย  น
ลภติ  ฯ  ตสฺส  เอวํ  โหติ  เนวิมํ  จีวรํ  กาเรสฺสํ  น  ปจฺเจสฺสนฺติ ฯ
ตสฺส ภิกฺขุโน สนฺนิฏฺฐานนฺติโก กฐินุทฺธาโร ฯ
     {๑๑๖.๑}   ภิกฺขุ  อตฺถตกฐิโน  จีวราสาย  ปกฺกมติ  ปจฺเจสฺสนฺติ ฯ
โส   พหิสีมคโต   ตํ  จีวราสํ  ปยิรุปาสติ  อาสาย  ลภติ  อนาสาย  น
ลภติ  ฯ  ตสฺส  เอวํ  โหติ  อิเธวิมํ  จีวรํ  กาเรสฺสํ  น ปจฺเจสฺสนฺติ ฯ
โส  ตํ  จีวรํ  กาเรติ  ฯ  ตสฺส ตํ จีวรํ กยิรมานํ นสฺสติ ฯ ตสฺส ภิกฺขุโน
นาสนนฺติโก   กฐินุทฺธาโร   ฯ   ภิกฺขุ  อตฺถตกฐิโน  จีวราสาย  ปกฺกมติ
ปจฺเจสฺสนฺติ   ฯ   ตสฺส   พหิสีมคตสฺส   เอวํ   โหติ  อิเธวิมํ  จีวราสํ
ปยิรุปาสิสฺสํ  น  ปจฺเจสฺสนฺติ  ฯ  โส  ตํ  จีวราสํ  ปยิรุปาสติ  ฯ  ตสฺส
สา    จีวราสา    อุปจฺฉิชฺชติ   ฯ   ตสฺส   ภิกฺขุโน   อาสาวจฺเฉทิโก
กฐินุทฺธาโร ฯ
     [๑๑๗]   ภิกฺขุ  อตฺถตกฐิโน  จีวราสาย  ปกฺกมติ  ปจฺเจสฺสนฺติ  ฯ
โส   พหิสีมคโต   สุณาติ   อุพฺภตํ   กิร   ตสฺมึ  อาวาเส  กฐินนฺติ  ฯ
ตสฺส   เอวํ   โหติ   ยโต   ตสฺมึ   อาวาเส   อุพฺภตํ  กฐินํ  อิเธวิมํ
จีวราสํ   ปยิรุปาสิสฺสนฺติ   ฯ   โส   ตํ   จีวราสํ  ปยิรุปาสติ  อาสาย
ลภติ  อนาสาย  น  ลภติ  ฯ  ตสฺส  เอวํ โหติ อิเธวิมํ จีวรํ กาเรสฺสํ น
ปจฺเจสฺสนฺติ  ฯ  โส  ตํ  จีวรํ  กาเรติ  ฯ  ตสฺส  ภิกฺขุโน นิฏฺฐานนฺติโก
กฐินุทฺธาโร  ฯ  ภิกฺขุ  อตฺถตกฐิโน  จีวราสาย  ปกฺกมติ  ปจฺเจสฺสนฺติ  ฯ
โส  พหิสีมคโต  สุณาติ  อุพฺภตํ  กิร  ตสฺมึ  อาวาเส  กฐินนฺติ  ฯ  ตสฺส
เอวํ โหติ ยโต ตสฺมึ อาวาเส อุพฺภตํ กฐินํ อิเธวิมํ จีวราสํ ปยิรุปาสิสฺสนฺติ ฯ
โส  ตํ  จีวราสํ  ปยิรุปาสติ  อาสาย  ลภติ  อนาสาย  น  ลภติ ฯ ตสฺส
เอวํ  โหติ  เนวิมํ  จีวรํ  กาเรสฺสํ  น  ปจฺเจสฺสนฺติ  ฯ  ตสฺส  ภิกฺขุโน
สนฺนิฏฺฐานนฺติโก กฐินุทฺธาโร ฯ
     {๑๑๗.๑}   ภิกฺขุ  อตฺถตกฐิโน  จีวราสาย  ปกฺกมติ  ปจฺเจสฺสนฺติ ฯ
โส  พหิสีมคโต  สุณาติ  อุพฺภตํ  กิร  ตสฺมึ  อาวาเส  กฐินนฺติ  ฯ  ตสฺส
เอวํ   โหติ   ยโต   ตสฺมึ   อาวาเส  อุพฺภตํ  กฐินํ  อิเธวิมํ  จีวราสํ
ปยิรุปาสิสฺสนฺติ   ฯ   โส   ตํ   จีวราสํ   ปยิรุปาสติ   อาสาย   ลภติ
อนาสาย  น  ลภติ  ฯ  ตสฺส  เอวํ  โหติ  อิเธวิมํ  จีวรํ  กาเรสฺสํ  น
ปจฺเจสฺสนฺติ   ฯ  โส  ตํ  จีวรํ  กาเรติ  ฯ  ตสฺส  ตํ  จีวรํ  กยิรมานํ
นสฺสติ    ฯ   ตสฺส   ภิกฺขุโน   นาสนนฺติโก   กฐินุทฺธาโร   ฯ   ภิกฺขุ
อตฺถตกฐิโน   จีวราสาย   ปกฺกมติ   ปจฺเจสฺสนฺติ   ฯ   โส  พหิสีมคโต
สุณาติ  อุพฺภตํ  กิร  ตสฺมึ  อาวาเส  กฐินนฺติ  ฯ  ตสฺส  เอวํ โหติ ยโต
ตสฺมึ  อาวาเส  อุพฺภตํ กฐินํ อิเธวิมํ จีวราสํ ปยิรุปาสิสฺสํ น ปจฺเจสฺสนฺติ ฯ
โส   ตํ   จีวราสํ  ปยิรุปาสติ  ฯ  ตสฺส  สา  จีวราสา  อุปจฺฉิชฺชติ  ฯ
ตสฺส ภิกฺขุโน อาสาวจฺเฉทิโก กฐินุทฺธาโร ฯ
     [๑๑๘]   ภิกฺขุ  อตฺถตกฐิโน  จีวราสาย  ปกฺกมติ  ปจฺเจสฺสนฺติ  ฯ
โส   พหิสีมคโต   ตํ  จีวราสํ  ปยิรุปาสติ  อาสาย  ลภติ  อนาสาย  น
ลภติ  ฯ  โส  ตํ  จีวรํ  กาเรติ  ฯ  โส  กตจีวโร  สุณาติ  อุพฺภตํ กิร
ตสฺมึ  อาวาเส  กฐินนฺติ  ฯ  ตสฺส  ภิกฺขุโน  สวนนฺติโก  กฐินุทฺธาโร  ฯ
ภิกฺขุ    อตฺถตกฐิโน    จีวราสาย   ปกฺกมติ   ปจฺเจสฺสนฺติ   ฯ   ตสฺส
พหิสีมคตสฺส    เอวํ    โหติ    อิเธวิมํ    จีวราสํ   ปยิรุปาสิสฺสํ   น
ปจฺเจสฺสนฺติ   ฯ  โส  ตํ  จีวราสํ  ปยิรุปาสติ  ฯ  ตสฺส  สา  จีวราสา
อุปจฺฉิชฺชติ ฯ ตสฺส ภิกฺขุโน อาสาวจฺเฉทิโก กฐินุทฺธาโร ฯ
     {๑๑๘.๑}   ภิกฺขุ  อตฺถตกฐิโน  จีวราสาย  ปกฺกมติ  ปจฺเจสฺสนฺติ ฯ
โส   พหิสีมคโต   ตํ  จีวราสํ  ปยิรุปาสติ  อาสาย  ลภติ  อนาสาย  น
ลภติ  ฯ  โส  ตํ  จีวรํ  กาเรติ  ฯ  โส กตจีวโร ปจฺเจสฺสํ ปจฺเจสฺสนฺติ
พหิทฺธา   กฐินุทฺธารํ   วีตินาเมติ   ฯ   ตสฺส   ภิกฺขุโน  สีมาติกฺกนฺติโก
กฐินุทฺธาโร  ฯ  ภิกฺขุ  อตฺถตกฐิโน  จีวราสาย  ปกฺกมติ  ปจฺเจสฺสนฺติ  ฯ
โส   พหิสีมคโต   ตํ  จีวราสํ  ปยิรุปาสติ  อาสาย  ลภติ  อนาสาย  น
ลภติ  ฯ  โส  ตํ  จีวรํ  กาเรติ  ฯ  โส กตจีวโร ปจฺเจสฺสํ ปจฺเจสฺสนฺติ
สมฺภุณาติ กฐินุทฺธารํ ฯ ตสฺส ภิกฺขุโน สห ภิกฺขูหิ กฐินุทฺธาโร ฯ
                          อาสาโทฬสกํ นิฏฺฐิตํ ฯ
     [๑๑๙]   ภิกฺขุ   อตฺถตกฐิโน   เกนจิเทว  กรณีเยน  ปกฺกมติ  ฯ
ตสฺส    พหิสีมคตสฺส    จีวราสา   อุปฺปชฺชติ   ฯ   โส   ตํ   จีวราสํ
ปยิรุปาสติ   อนาสาย   ลภติ  อาสาย  น  ลภติ  ฯ  ตสฺส  เอวํ  โหติ
อิเธวิมํ  จีวรํ  กาเรสฺสํ  น  ปจฺเจสฺสนฺติ  ฯ โส ตํ จีวรํ กาเรติ ฯ ตสฺส
ภิกฺขุโน   นิฏฺฐานนฺติโก   กฐินุทฺธาโร  ฯ  ภิกฺขุ  อตฺถตกฐิโน  เกนจิเทว
กรณีเยน   ปกฺกมติ   ฯ   ตสฺส   พหิสีมคตสฺส   จีวราสา  อุปฺปชฺชติ  ฯ
โส   ตํ   จีวราสํ   ปยิรุปาสติ  อนาสาย  ลภติ  อาสาย  น  ลภติ  ฯ
ตสฺส   เอวํ   โหติ   เนวิมํ   จีวรํ   กาเรสฺสํ   น   ปจฺเจสฺสนฺติ  ฯ
ตสฺส ภิกฺขุโน สนฺนิฏฺฐานนฺติโก กฐินุทฺธาโร ฯ
     {๑๑๙.๑}   ภิกฺขุ  อตฺถตกฐิโน  เกนจิเทว  กรณีเยน  ปกฺกมติ  ฯ
ตสฺส  พหิสีมคตสฺส  จีวราสา  อุปฺปชฺชติ  ฯ  โส  ตํ  จีวราสํ  ปยิรุปาสติ
อนาสาย  ลภติ  อาสาย  น  ลภติ  ฯ  ตสฺส  เอวํ  โหติ  อิเธวิมํ จีวรํ
กาเรสฺสํ  น  ปจฺเจสฺสนฺติ ฯ โส ตํ จีวรํ กาเรติ ฯ ตสฺส ตํ จีวรํ กยิรมานํ
นสฺสติ    ฯ   ตสฺส   ภิกฺขุโน   นาสนนฺติโก   กฐินุทฺธาโร   ฯ   ภิกฺขุ
อตฺถตกฐิโน   เกนจิเทว   กรณีเยน   ปกฺกมติ   ฯ   ตสฺส  พหิสีมคตสฺส
จีวราสา  อุปฺปชฺชติ  ฯ  ตสฺส  เอวํ  โหติ  อิเธวิมํ  จีวราสํ ปยิรุปาสิสฺสํ
น  ปจฺเจสฺสนฺติ  ฯ  โส  ตํ  จีวราสํ  ปยิรุปาสติ  ฯ  ตสฺส สา จีวราสา
อุปจฺฉิชฺชติ ฯ ตสฺส ภิกฺขุโน อาสาวจฺเฉทิโก กฐินุทฺธาโร ฯ
     [๑๒๐]   ภิกฺขุ   อตฺถตกฐิโน   เกนจิเทว   กรณีเยน   ปกฺกมติ
น   ปจฺเจสฺสนฺติ   ฯ   ตสฺส  พหิสีมคตสฺส  จีวราสา  อุปฺปชฺชติ  ฯ  โส
ตํ   จีวราสํ   ปยิรุปาสติ   อนาสาย   ลภติ   อาสาย   น   ลภติ  ฯ
ตสฺส   เอวํ   โหติ   อิเธวิมํ   จีวรํ   กาเรสฺสนฺติ  ฯ  โส  ตํ  จีวรํ
กาเรติ   ฯ   ตสฺส   ภิกฺขุโน   นิฏฺฐานนฺติโก   กฐินุทฺธาโร   ฯ  ภิกฺขุ
อตฺถตกฐิโน    เกนจิเทว   กรณีเยน   ปกฺกมติ   น   ปจฺเจสฺสนฺติ   ฯ
ตสฺส    พหิสีมคตสฺส    จีวราสา   อุปฺปชฺชติ   ฯ   โส   ตํ   จีวราสํ
ปยิรุปาสติ   อนาสาย   ลภติ  อาสาย  น  ลภติ  ฯ  ตสฺส  เอวํ  โหติ
เนวิมํ    จีวรํ    กาเรสฺสนฺติ   ฯ   ตสฺส   ภิกฺขุโน   สนฺนิฏฺฐานนฺติโก
กฐินุทฺธาโร ฯ
     {๑๒๐.๑}   ภิกฺขุ   อตฺถตกฐิโน   เกนจิเทว   กรณีเยน  ปกฺกมติ
น   ปจฺเจสฺสนฺติ   ฯ   ตสฺส   พหิสีมคตสฺส   จีวราสา   อุปฺปชฺชติ   ฯ
โส   ตํ   จีวราสํ   ปยิรุปาสติ  อนาสาย  ลภติ  อาสาย  น  ลภติ  ฯ
ตสฺส  เอวํ  โหติ  อิเธวิมํ  จีวรํ  กาเรสฺสนฺติ  ฯ โส ตํ จีวรํ กาเรติ ฯ
ตสฺส   ตํ   จีวรํ   กยิรมานํ   นสฺสติ   ฯ  ตสฺส  ภิกฺขุโน  นาสนนฺติโก
กฐินุทฺธาโร   ฯ   ภิกฺขุ   อตฺถตกฐิโน   เกนจิเทว   กรณีเยน  ปกฺกมติ
น   ปจฺเจสฺสนฺติ   ฯ   ตสฺส   พหิสีมคตสฺส   จีวราสา   อุปฺปชฺชติ   ฯ
ตสฺส  เอวํ  โหติ  อิเธวิมํ  จีวราสํ  ปยิรุปาสิสฺสนฺติ  ฯ  โส  ตํ จีวราสํ
ปยิรุปาสติ   ฯ   ตสฺส   สา   จีวราสา  อุปจฺฉิชฺชติ  ฯ  ตสฺส  ภิกฺขุโน
อาสาวจฺเฉทิโก กฐินุทฺธาโร ฯ
     [๑๒๑]   ภิกฺขุ   อตฺถตกฐิโน   เกนจิเทว   กรณีเยน   ปกฺกมติ
อนธิฏฺฐิเตน    เนวสฺส   โหติ   ปจฺเจสฺสนฺติ   น   ปนสฺส   โหติ   น
ปจฺเจสฺสนฺติ   ฯ   ตสฺส   พหิสีมคตสฺส   จีวราสา   อุปฺปชฺชติ   ฯ  โส
ตํ   จีวราสํ   ปยิรุปาสติ  อนาสาย  ลภติ  อาสาย  น  ลภติ  ฯ  ตสฺส
เอวํ  โหติ  อิเธวิมํ  จีวรํ  กาเรสฺสํ  น  ปจฺเจสฺสนฺติ  ฯ  โส  ตํ จีวรํ
กาเรติ   ฯ   ตสฺส   ภิกฺขุโน   นิฏฺฐานนฺติโก   กฐินุทฺธาโร   ฯ  ภิกฺขุ
อตฺถตกฐิโน    เกนจิเทว   กรณีเยน   ปกฺกมติ   อนธิฏฺฐิเตน   เนวสฺส
โหติ   ปจฺเจสฺสนฺติ   น   ปนสฺส   โหติ   น   ปจฺเจสฺสนฺติ   ฯ  ตสฺส
พหิสีมคตสฺส   จีวราสา   อุปฺปชฺชติ   ฯ   โส   ตํ  จีวราสํ  ปยิรุปาสติ
อนาสาย  ลภติ  อาสาย  น  ลภติ  ฯ  ตสฺส  เอวํ  โหติ  เนวิมํ  จีวรํ
กาเรสฺสํ    น    ปจฺเจสฺสนฺติ   ฯ   ตสฺส   ภิกฺขุโน   สนฺนิฏฺฐานนฺติโก
กฐินุทฺธาโร ฯ
     {๑๒๑.๑}   ภิกฺขุ   อตฺถตกฐิโน   เกนจิเทว   กรณีเยน  ปกฺกมติ
อนธิฏฺฐิเตน    เนวสฺส    โหติ    ปจฺเจสฺสนฺติ    น    ปนสฺส   โหติ
น   ปจฺเจสฺสนฺติ   ฯ   ตสฺส   พหิสีมคตสฺส   จีวราสา   อุปฺปชฺชติ   ฯ
โส   ตํ   จีวราสํ   ปยิรุปาสติ  อนาสาย  ลภติ  อาสาย  น  ลภติ  ฯ
ตสฺส   เอวํ   โหติ   อิเธวิมํ   จีวรํ   กาเรสฺสํ   น  ปจฺเจสฺสนฺติ  ฯ
โส  ตํ  จีวรํ  กาเรติ  ฯ  ตสฺส  ตํ  จีวรํ  กยิรมานํ  นสฺสติ  ฯ  ตสฺส
ภิกฺขุโน   นาสนนฺติโก   กฐินุทฺธาโร   ฯ  ภิกฺขุ  อตฺถตกฐิโน  เกนจิเทว
กรณีเยน    ปกฺกมติ    อนธิฏฺฐิเตน    เนวสฺส    โหติ    ปจฺเจสฺสนฺติ
น   ปนสฺส   โหติ   น   ปจฺเจสฺสนฺติ  ฯ  ตสฺส  พหิสีมคตสฺส  จีวราสา
อุปฺปชฺชติ   ฯ   ตสฺส   เอวํ   โหติ   อิเธวิมํ   จีวราสํ   ปยิรุปาสิสฺสํ
น  ปจฺเจสฺสนฺติ  ฯ  โส  ตํ  จีวราสํ  ปยิรุปาสติ  ฯ  ตสฺส สา จีวราสา
อุปจฺฉิชฺชติ ฯ ตสฺส ภิกฺขุโน อาสาวจฺเฉทิโก กฐินุทฺธาโร ฯ
                         กรณียโทฬสกํ นิฏฺฐิตํ ฯ
     [๑๒๒]   ภิกฺขุ   อตฺถตกฐิโน   ทิสงฺคมิโก   ปกฺกมติ   จีวรปฏิวิสํ
อปวิลายมาโน   ๑-   ตเมนํ   ทิสงฺคตํ   ๒-  ภิกฺขู  ปุจฺฉนฺติ  กหํ  ตฺวํ
อาวุโส  วสฺสํ  วุตฺโถ  กตฺถ  จ  เต  จีวรปฏิวิโสติ  ฯ  โส เอวํ วเทติ
อมุกสฺมึ  อาวาเส  วสฺสํ  วุตฺโถมฺหิ  ตตฺถ  จ  เม  จีวรปฏิวิโสติ  ฯ เต
เอวํ  วเทนฺติ  คจฺฉาวุโส ตํ จีวรํ อาหร มยนฺเต อิธ จีวรํ  กริสฺสามาติ ฯ
โส  ตํ  อาวาสํ  คนฺตฺวา  ภิกฺขู  ปุจฺฉติ  กหํ เม อาวุโส จีวรปฏิวิโสติ ฯ
เต  เอวํ  วเทนฺติ  อยนฺเต  อาวุโส  จีวรปฏิวิโส  กหํ  คมิสฺสสีติ ฯ โส
เอวํ   วเทติ  อมุกํ  [๓]-  นาม  อาวาสํ  คมิสฺสามิ  ตตฺถ  เม  ภิกฺขู
จีวรํ  กริสฺสนฺตีติ  ฯ  เต  เอวํ   วเทนฺติ อลํ อาวุโส มา [๔]- อคมาสิ
มยนฺเต   อิธ  จีวรํ  กริสฺสามาติ  ฯ  ตสฺส  เอวํ  โหติ  อิเธวิมํ  จีวรํ
กาเรสฺสํ  น  ปจฺเจสฺสนฺติ  ฯ  โส  ตํ  จีวรํ  กาเรติ  ฯ  ตสฺส ภิกฺขุโน
นิฏฺฐานนฺติโก    กฐินุทฺธาโร    ฯ    ภิกฺขุ    อตฺถตกฐิโน   ทิสงฺคมิโก
ปกฺกมติ   ฯเปฯ    ตสฺส   ภิกฺขุโน   สนฺนิฏฺฐานนฺติโก   กฐินุทฺธาโร  ฯ
ภิกฺขุ    อตฺถตกฐิโน    ทิสงฺคมิโก   ปกฺกมติ   ฯเปฯ   ตสฺส   ภิกฺขุโน
นาสนนฺติโก กฐินุทฺธาโร ฯ
     [๑๒๓]   ภิกฺขุ   อตฺถตกฐิโน   ทิสงฺคมิโก   ปกฺกมติ   จีวรปฏิวิสํ
อปวิลายมาโน   ฯ   ตเมนํ  ทิสงฺคตํ  ภิกฺขู  ปุจฺฉนฺติ  กหํ  ตฺวํ  อาวุโส
@เชิงอรรถ: ๑ สี. อปวีณายมาโน ฯ โป. ยุ. อปจินยมาโน ฯ ๒ โป. ทิสงฺคมิกํ ฯ ๓ ม. จ ฯ
@๔ โป. ตฺวํ ฯ
วสฺสํ   วุตฺโถ  กตฺถ  จ  ๑-  เต  จีวรปฏิวิโสติ  ฯ  โส  เอวํ  วเทติ
อมุกสฺมึ   อาวาเส   วสฺสํ   วุตฺโถมฺหิ  ตตฺถ  จ  เม  จีวรปฏิวิโสติ  ฯ
เต   เอวํ   วเทนฺติ   คจฺฉาวุโส   ตํ   จีวรํ   อาหร   มยนฺเต  อิธ
จีวรํ   กริสฺสามาติ   ฯ   โส  ตํ  อาวาสํ  คนฺตฺวา  ภิกฺขู  ปุจฺฉติ  กหํ
เม   อาวุโส   จีวรปฏิวิโสติ  ฯ  เต  เอวํ  วเทนฺติ  อยนฺเต  อาวุโส
จีวรปฏิวิโสติ   ฯ   โส   ตํ   จีวรํ   อาทาย  ตํ  อาวาสํ  คจฺฉติ  ฯ
ตเมนํ   อนฺตรามคฺเค   ภิกฺขู   ปุจฺฉนฺติ   อาวุโส   กหํ   คมิสฺสสีติ  ฯ
โส   เอวํ   วเทติ   อมุกํ   นาม   อาวาสํ   คมิสฺสามิ   ตตฺถ   เม
ภิกฺขู   จีวรํ   กริสฺสนฺตีติ   ฯ   เต  เอวํ  วเทนฺติ  อลํ  อาวุโส  มา
อคมาสิ   มยนฺเต   อิธ   จีวรํ   กริสฺสามาติ   ฯ   ตสฺส  เอวํ  โหติ
อิเธวิมํ  จีวรํ  กาเรสฺสํ  น  ปจฺเจสฺสนฺติ  ฯ  โส  ตํ  จีวรํ  กาเรติ ฯ
ตสฺส ภิกฺขุโน นิฏฺฐานนฺติโก กฐินุทฺธาโร ฯ
     {๑๒๓.๑}   ภิกฺขุ   อตฺถตกฐิโน   ทิสงฺคมิโก  ปกฺกมติ  จีวรปฏิวิสํ
อปวิลายมาโน   ฯ   ตเมนํ  ทิสงฺคตํ  ภิกฺขู  ปุจฺฉนฺติ  กหํ  ตฺวํ  อาวุโส
วสฺสํ  วุตฺโถ  กตฺถ  จ  เต  จีวรปฏิวิโสติ  ฯ  โส  เอวํ วเทติ อมุกสฺมึ
อาวาเส   วสฺสํ  วุตฺโถมฺหิ  ตตฺถ  จ  เม  จีวรปฏิวิโสติ  ฯ  เต  เอวํ
วเทนฺติ  คจฺฉาวุโส  ตํ  จีวรํ  อาหร  มยนฺเต  อิธ  จีวรํ กริสฺสามาติ ฯ
โส  ตํ  อาวาสํ  คนฺตฺวา  ภิกฺขู  ปุจฺฉติ  กหํ เม อาวุโส จีวรปฏิวิโสติ ฯ
เต   เอวํ  วเทนฺติ  อยนฺเต  อาวุโส  จีวรปฏิวิโสติ  ฯ  โส  ตํ  จีวรํ
อาทาย     ตํ     อาวาสํ    คจฺฉติ    ฯ    ตเมนํ    อนฺตรามคฺเค
@เชิงอรรถ: ๑ โป. กตฺถจิ จสทฺโท นตฺถิ ฯ
ภิกฺขู   ปุจฺฉนฺติ   อาวุโส   กหํ  คมิสฺสสีติ  ฯ  โส  เอวํ  วเทติ  อมุกํ
นาม   อาวาสํ   คมิสฺสามิ   ตตฺถ   เม   ภิกฺขู   จีวรํ  กริสฺสนฺตีติ  ฯ
เต   เอวํ   วเทนฺติ   อลํ  อาวุโส  มา  อคมาสิ  มยนฺเต  อิธ  จีวรํ
กริสฺสามาติ    ฯ    ตสฺส    เอวํ   โหติ   เนวิมํ   จีวรํ   กาเรสฺสํ
น ปจฺเจสฺสนฺติ ฯ ตสฺส ภิกฺขุโน สนฺนิฏฺฐานนฺติโก กฐินุทฺธาโร ฯ
     {๑๒๓.๒}   ภิกฺขุ   อตฺถตกฐิโน   ทิสงฺคมิโก  ปกฺกมติ  จีวรปฏิวิสํ
อปวิลายมาโน   ฯ   ตเมนํ  ทิสงฺคตํ  ภิกฺขู  ปุจฺฉนฺติ  กหํ  ตฺวํ  อาวุโส
วสฺสํ  วุตฺโถ  กตฺถ  จ  เต  จีวรปฏิวิโสติ  ฯ  โส  เอวํ วเทติ อมุกสฺมึ
อาวาเส   วสฺสํ  วุตฺโถมฺหิ  ตตฺถ  จ  เม  จีวรปฏิวิโสติ  ฯ  เต  เอวํ
วเทนฺติ  คจฺฉาวุโส  ตํ  จีวรํ  อาหร  มยนฺเต  อิธ  จีวรํ กริสฺสามาติ ฯ
โส  ตํ   อาวาสํ  คนฺตฺวา  ภิกฺขู  ปุจฺฉติ กหํ เม อาวุโส จีวรปฏิวิโสติ ฯ
เต  เอวํ  วเทนฺติ  อยนฺเต  อาวุโส จีวรปฏิวิโสติ ฯ โส ตํ จีวรํ อาทาย
ตํ   อาวาสํ   คจฺฉติ  ฯ  ตเมนํ  อนฺตรามคฺเค  ภิกฺขู  ปุจฺฉนฺติ  อาวุโส
กหํ   คมิสฺสสีติ   ฯ  โส  เอวํ  วเทติ  อมุกํ  นาม  อาวาสํ  คมิสฺสามิ
ตตฺถ  เม  ภิกฺขู  จีวรํ  กริสฺสนฺตีติ  ฯ  เต เอวํ วเทนฺติ อลํ อาวุโส มา
อคมาสิ  มยนฺเต  อิธ  จีวรํ  กริสฺสามาติ  ฯ  ตสฺส  เอวํ  โหติ อิเธวิมํ
จีวรํ  กาเรสฺสํ  น  ปจฺเจสฺสนฺติ  ฯ  โส ตํ จีวรํ กาเรติ ฯ ตสฺส ตํ จีวรํ
กยิรมานํ นสฺสติ ฯ ตสฺส ภิกฺขุโน นาสนนฺติโก กฐินุทฺธาโร ฯ
     [๑๒๔]   ภิกฺขุ   อตฺถตกฐิโน   ทิสงฺคมิโก   ปกฺกมติ   จีวรปฏิวิสํ
อปวิลายมาโน   ฯ   ตเมนํ  ทิสงฺคตํ  ภิกฺขู  ปุจฺฉนฺติ  กหํ  ตฺวํ  อาวุโส
วสฺสํ  วุตฺโถ  กตฺถ  จ  เต  จีวรปฏิวิโสติ  ฯ  โส  เอวํ วเทติ อมุกสฺมึ
อาวาเส  วสฺสํ  วุตฺโถมฺหิ  ตตฺถ  จ  เม  จีวรปฏิวิโสติ  ฯ   เต  เอวํ
วเทนฺติ  คจฺฉาวุโส  ตํ  จีวรํ  อาหร  มยนฺเต  อิธ  จีวรํ กริสฺสามาติ ฯ
โส  ตํ  อาวาสํ  คนฺตฺวา  ภิกฺขู  ปุจฺฉติ กหํ เม  อาวุโส จีวรปฏิวิโสติ ฯ
เต  เอวํ  วเทนฺติ  อยนฺเต  อาวุโส จีวรปฏิวิโสติ ฯ โส ตํ จีวรํ อาทาย
ตํ  อาวาสํ  คจฺฉติ  ฯ  ตสฺส  ตํ  อาวาสํ คตสฺส เอวํ โหติ อิเธวิมํ จีวรํ
กาเรสฺสํ  น  ปจฺเจสฺสนฺติ  ฯ  โส  ตํ  จีวรํ  กาเรติ  ฯ  ตสฺส ภิกฺขุโน
นิฏฺฐานนฺติโก กฐินุทฺธาโร ฯ
     {๑๒๔.๑}   ภิกฺขุ  อตฺถตกฐิโน  ทิสงฺคมิโก  ปกฺกมติ  ฯเปฯ  เนวิมํ
จีวรํ   กาเรสฺสํ   น   ปจฺเจสฺสนฺติ  ฯ  ตสฺส  ภิกฺขุโน  สนฺนิฏฺฐานนฺติโก
กฐินุทฺธาโร  ฯ  ภิกฺขุ  อตฺถตกฐิโน  ทิสงฺคมิโก  ปกฺกมติ  ฯเปฯ  อิเธวิมํ
จีวรํ  กาเรสฺสํ  น  ปจฺเจสฺสนฺติ  ฯ  โส ตํ จีวรํ กาเรติ ฯ ตสฺส ตํ จีวรํ
กยิรมานํ นสฺสติ ฯ ตสฺส ภิกฺขุโน นาสนนฺติโก กฐินุทฺธาโร ฯ
                         อปวิลายนนวกํ นิฏฺฐิตํ ฯ
     [๑๒๕]   ภิกฺขุ  อตฺถตกฐิโน  ผาสุวิหาริโก  จีวรํ  อาทาย  ปกฺกมติ
อมุกํ   นาม   อาวาสํ   คมิสฺสามิ  ตตฺถ  เจ  เม  ๑-  ผาสุ  ภวิสฺสติ
@เชิงอรรถ: ๑ สี. ตตฺถ จ เม ฯ ม. ยุ. ตตฺถ เม ฯ
วสิสฺสามิ   โน   เจ   เม   ผาสุ   ภวิสฺสติ   อมุกํ   นาม   อาวาสํ
คมิสฺสามิ   ตตฺถ   เจ   เม   ผาสุ   ภวิสฺสติ   วสิสฺสามิ   โน   เจ
เม   ผาสุ   ภวิสฺสติ   อมุกํ   นาม   อาวาสํ   คมิสฺสามิ   ตตฺถ  เจ
เม    ผาสุ   ภวิสฺสติ   วสิสฺสามิ   โน   เจ   เม   ผาสุ   ภวิสฺสติ
ปจฺเจสฺสนฺติ   ฯ   ตสฺส   พหิสีมคตสฺส   เอวํ   โหติ   อิเธวิมํ   จีวรํ
กาเรสฺสํ   น   ปจฺเจสฺสนฺติ   ฯ   โส   ตํ   จีวรํ  กาเรติ  ฯ  ตสฺส
ภิกฺขุโน นิฏฺฐานนฺติโก กฐินุทฺธาโร ฯ
     {๑๒๕.๑}   ภิกฺขุ  อตฺถตกฐิโน  ผาสุวิหาริโก  จีวรํ อาทาย ปกฺกมติ
อมุกํ  นาม  อาวาสํ  คมิสฺสามิ  ตตฺถ  เจ  เม  ผาสุ  ภวิสฺสติ วสิสฺสามิ
โน  เจ  เม  ผาสุ  ภวิสฺสติ  อมุกํ  นาม อาวาสํ คมิสฺสามิ ตตฺถ เจ เม
ผาสุ  ภวิสฺสติ  วสิสฺสามิ  โน  เจ  เม  ผาสุ ภวิสฺสติ อมุกํ นาม อาวาสํ
คมิสฺสามิ  ตตฺถ  เจ  เม ผาสุ ภวิสฺสติ วสิสฺสามิ โน เจ เม ผาสุ ภวิสฺสติ
ปจฺเจสฺสนฺติ  ฯ  ตสฺส  พหิสีมคตสฺส  เอวํ  โหติ  เนวิมํ จีวรํ กาเรสฺสํ น
ปจฺเจสฺสนฺติ ฯ ตสฺส ภิกฺขุโน สนฺนิฏฺฐานนฺติโก กฐินุทฺธาโร ฯ
     {๑๒๕.๒}   ภิกฺขุ  อตฺถตกฐิโน  ผาสุวิหาริโก  จีวรํ อาทาย ปกฺกมติ
อมุกํ  นาม  อาวาสํ  คมิสฺสามิ  ตตฺถ  เจ  เม  ผาสุ  ภวิสฺสติ วสิสฺสามิ
โน  เจ  เม  ผาสุ  ภวิสฺสติ  อมุกํ  นาม อาวาสํ คมิสฺสามิ ตตฺถ เจ เม
ผาสุ   ภวิสฺสติ   วสิสฺสามิ   โน  เจ  เม  ผาสุ  ภวิสฺสติ  อมุกํ  นาม
อาวาสํ    คมิสฺสามิ    ตตฺถ   เจ   เม   ผาสุ   ภวิสฺสติ   วสิสฺสามิ
โน   เจ   เม   ผาสุ   ภวิสฺสติ   ปจฺเจสฺสนฺติ  ฯ  ตสฺส  พหิสีมคตสฺส
เอวํ   โหติ   อิเธวิมํ   จีวรํ   กาเรสฺสํ   น   ปจฺเจสฺสนฺติ   ฯ  โส
ตํ   จีวรํ   กาเรติ   ฯ   ตสฺส  ตํ  จีวรํ  กยิรมานํ  นสฺสติ  ฯ  ตสฺส
ภิกฺขุโน นาสนนฺติโก กฐินุทฺธาโร ฯ
     {๑๒๕.๓}   ภิกฺขุ   อตฺถตกฐิโน   ผาสุวิหาริโก   จีวรํ   อาทาย
ปกฺกมติ   อมุกํ   นาม   อาวาสํ   คมิสฺสามิ   ตตฺถ   เจ   เม  ผาสุ
ภวิสฺสติ   วสิสฺสามิ  โน  เจ  เม  ผาสุ  ภวิสฺสติ  อมุกํ  นาม  อาวาสํ
คมิสฺสามิ  ตตฺถ  เจ  เม  ผาสุ  ภวิสฺสติ  วสิสฺสามิ  โน  เจ  เม ผาสุ
ภวิสฺสติ  อมุกํ  นาม  อาวาสํ  คมิสฺสามิ  ตตฺถ  เจ  เม  ผาสุ  ภวิสฺสติ
วสิสฺสามิ  โน  เจ  เม  ผาสุ  ภวิสฺสติ  ปจฺเจสฺสนฺติ  ฯ  โส พหิสีมคโต
ตํ   จีวรํ   กาเรติ  ฯ  โส  กตจีวโร  ปจฺเจสฺสํ  ปจฺเจสฺสนฺติ  พหิทฺธา
กฐินุทฺธารํ วีตินาเมติ ฯ ตสฺส ภิกฺขุโน สีมาติกฺกนฺติโก กฐินุทฺธาโร ฯ
     {๑๒๕.๔}   ภิกฺขุ   อตฺถตกฐิโน   ผาสุวิหาริโก   จีวรํ   อาทาย
ปกฺกมติ  อมุกํ  นาม  อาวาสํ  คมิสฺสามิ  ตตฺถ  เจ  เม  ผาสุ  ภวิสฺสติ
วสิสฺสามิ  โน  เจ  เม  ผาสุ  ภวิสฺสติ  อมุกํ  นาม  อาวาสํ  คมิสฺสามิ
ตตฺถ  เจ  เม  ผาสุ  ภวิสฺสติ  วสิสฺสามิ  โน  เจ  เม  ผาสุ  ภวิสฺสติ
อมุกํ   นาม   อาวาสํ   คมิสฺสามิ   ตตฺถ   เจ   เม   ผาสุ  ภวิสฺสติ
วสิสฺสามิ   โน   เจ   เม   ผาสุ   ภวิสฺสติ   ปจฺเจสฺสนฺติ   ฯ   โส
พหิสีมคโต  ตํ  จีวรํ  กาเรติ  ฯ  โส  กตจีวโร  ปจฺเจสฺสํ  ปจฺเจสฺสนฺติ
สมฺภุณาติ กฐินุทฺธารํ ฯ ตสฺส ภิกฺขุโน สห ภิกฺขูหิ กฐินุทฺธาโร ฯ
                        ผาสุวิหารปญฺจกํ นิฏฺฐิตํ ฯ
     [๑๒๖]   เทฺวเม  ภิกฺขเว  กฐินสฺส  ปลิโพธา  เทฺว  อปลิโพธา ฯ
กตเม   จ   ภิกฺขเว   เทฺว   กฐินสฺส   ปลิโพธา  ฯ  อาวาสปลิโพโธ
จ   จีวรปลิโพโธ   จ   ฯ  กถญฺจ  ภิกฺขเว  อาวาสปลิโพโธ  โหติ  ฯ
อิธ   ภิกฺขเว   ภิกฺขุ  วสติ  วา  ตสฺมึ  อาวาเส  สาเปกฺโข  ๑-  วา
ปกฺกมติ    ปจฺเจสฺสนฺติ    ฯ   เอวํ   โข   ภิกฺขเว   อาวาสปลิโพโธ
โหติ  ฯ  กถญฺจ  ภิกฺขเว  จีวรปลิโพโธ  โหติ  ฯ  อิธ  [๒]-  ภิกฺขเว
ภิกฺขุโน   จีวรํ   อกตํ   วา   โหติ   วิปฺปกตํ   วา   จีวราสา   วา
อนุปจฺฉินฺนา   ฯ   เอวํ   โข   ภิกฺขเว  จีวรปลิโพโธ  โหติ  ฯ  อิเม
โข ภิกฺขเว เทฺว กฐินสฺส ปลิโพธา ฯ
     {๑๒๖.๑}   กตเม   จ   ภิกฺขเว  เทฺว  กฐินสฺส  อปลิโพธา  ฯ
อาวาสาปลิโพโธ    จ    จีวราปลิโพโธ    จ   ฯ   กถญฺจ   ภิกฺขเว
อาวาสาปลิโพโธ   โหติ   ฯ   อิธ   ภิกฺขเว   ภิกฺขุ   ปกฺกมติ  ตมฺหา
อาวาสา   จตฺเตน   วนฺเตน  มุตฺเตน  อนเปกฺเขน  น  ปจฺเจสฺสนฺติ  ฯ
เอวํ   โข   ภิกฺขเว   อาวาสาปลิโพโธ   โหติ   ฯ   กถญฺจ  ภิกฺขเว
จีวราปลิโพโธ   โหติ  ฯ  อิธ  ภิกฺขเว  ภิกฺขุโน  จีวรํ  กตํ  วา  โหติ
นฏฺฐํ   วา   วินฏฺฐํ   วา   ทฑฺฒํ  วา  จีวราสา  วา  อุปฺปจฺฉินฺนา  ฯ
เอวํ  โข  ภิกฺขเว  จีวราปลิโพโธ  โหติ  ฯ  อิเม  โข  ภิกฺขเว  เทฺว
กฐินสฺส อปลิโพธาติ ฯ
                      กฐินกฺขนฺธกํ นิฏฺฐิตํ สตฺตมํ ฯ
@เชิงอรรถ: ๑ โป. สี. สาเปโข ฯ ๒ โป. ปน ฯ
อิมมฺหิ ขนฺธเก วตฺถู โทฬส ๑- เปยฺยาลมุขานิ เอกํ สตํ อฏฺฐารส ๒- ฯ
                                   ----------
                                  ตสฺสุทฺทานํ ฯ
     [๑๒๗]   ตึส ปาเฐยฺยกา ๓- ภิกฺขู        สาเกตุกฺกณฺฐิตา วสุํ
        วสฺสํ วุตฺโถกปุณฺเณหิ                 อาคมุํ ชินทสฺสนํ
        อิทํ วตฺถุ ๔- กฐินสฺส                  กปฺปิสฺสนฺติ จ ปญฺจกา
        อนามนฺตา อสมาจารา ๕-          ตเถว คณโภชนํ
        ยาวทตฺถญฺจ อุปฺปาโท               อตฺถตานํ ภวิสฺสติ ฯ
        ญตฺติ เอวตฺถตญฺเจว                  เอวญฺเจว อนตฺถตํ
        อุลฺลิขิ โธวนา เจว                     วิจารณญฺจ เฉทนํ
        พนฺธโนวฏฺฏิกณฺฑูส- ๖-            ทฬฺหิกมฺมานุวาติกา
        ปริภณฺฑํ โอวฏฺเฏยฺยํ                  มทฺทนา นิมิตฺตกถา
        กุกฺกุ สนฺนิธิ นิสฺสคฺคิ                  นกปฺปญฺญตฺร เต ตโย
        อญฺญตฺร ปญฺจาติเรเก                สญฺฉินฺเนน สมณฺฑลี
        นาญฺญตฺร ๗- ปุคฺคลา สมฺมา      นิสฺสีมฏฺโฐนุโมทติ
        กฐินํ อนตฺถตํ ๘- โหติ                เอวํ พุทฺเธน เทสิตํ
        อหตกปฺปปิโลติ-                       ปํสุปาปณิกาย จ
        อนิมิตฺตาปริกถา                       อกุกฺกุ อสนฺนิธิ จ
        อนิสฺสคฺคิ กปฺปกเต                    ตถา ติจีวเรน จ
        ปญฺจเก วาติเรเก วา                  ฉินฺเน สมณฺฑลีกเต
@เชิงอรรถ: ๑ โป. โสฬส ฯ ๒ โป. อฏฺฐารสนยานิ ฯ ๓ โป. ปาเวยฺยกา ฯ ๔ โป. ม. ยุ.
@วตฺถุํ ฯ ๕ โป. สมาทตฺตา ฯ ๖ โป. ม. ยุ. -กณฺฑูก ฯ ๗ โป. อญฺญตฺตร ฯ
@๘ โป. อตฺถตํ ฯ
       ปุคฺคลสฺสตฺถรา สมฺมา                สีมฏฺโฐ อนุโมทติ
       เอวํ กฐินตฺถรณํ                         อุพฺภารสฺสฏฺฐมาติกา
       ปกฺกมนนฺติ นฏฺฐานํ                   สนฺนิฏฺฐานญฺจ นาสนํ
       สวนํ อาสาวจฺเฉทิ                       สีมาสอุพฺภรฏฺฐมี ๑-
       กตจีวรมาทาย                           น ปจฺเจสฺสนฺติ คจฺฉติ
       ตสฺส ตํ กฐินุทฺธาโร                     โหติ ปกฺกมนนฺติโก
       อาทาย จีวรํ ยาติ                        นิสฺสีเม อิธ จินฺตยิ
       กาเรสฺสํ น ปจฺเจสฺสนฺติ                นิฏฺฐาเน กฐินุทฺธโร ๒- ฯ
       อาทาย นิสฺสีมํ เนว                     น ปจฺเจสฺสนฺติ มานโส
       ตสฺส ตํ กฐินุทฺธาโร                     สนฺนิฏฺฐานนฺติโก ภเว
       อาทาย จีวรํ ยาติ                        นิสฺสีเม อิธ จินฺตยิ
       กาเรสฺสํ น ปจฺเจสฺสนฺติ                กยิรนฺตสฺส นสฺสติ
       ตสฺส ตํ กฐินุทฺธาโร                     ภวติ นาสนนฺติโก
       อาทาย ยาติ ปจฺเจสฺสํ                 พหิ กาเรติ จีวรํ
       กตจีวโร ๓- สุณาติ                     อุพฺภตํ กฐินํ ตหึ
       ตสฺส ตํ กฐินุทฺธาโร                     ภวติ สวนนฺติโก
       อาทาย ยาติ ปจฺเจสฺสํ                 พหิ กาเรติ จีวรํ
       กตจีวโร พหิทฺธา                        นาเมติ กฐินุทฺธรํ
       ตสฺส ตํ กฐินุทฺธาโร                     สีมาติกฺกนฺติโก ภเว
       อาทาย ยาติ ปจฺเจสฺสํ                 พหิ กาเรติ จีวรํ
@เชิงอรรถ: ๑ โป. ม. สีมสฺสอุพฺภรฏฺฐมี ฯ ๒ โป. ม. ยุ. กฐินุทฺธาโร ฯ ๓ โป. ยุ. จีวรกโต ฯ
@ม. จีวรํกโต ฯ
       กตจีวโร ปจฺเจสฺสํ                       สมฺโภติ กฐินุทฺธรํ ๑-
       ตสฺส ตํ กฐินุทฺธาโร                     สห ภิกฺขูหิ ชายติ
       อาทาย จ สมาทาย ๒-               สตฺต สตฺต วิธี ภเว ๓-
       ปกฺกมนนฺติกา นตฺถิ                   ฉกฺเก วิปฺปกเต ๔- คติ
       อาทาย นิสฺสีมคตํ                      กาเรสฺสํ อิติ ชายติ
       นิฏฺฐานํ สนฺนิฏฺฐานญฺจ               นาสนญฺจ อิเม ตโย
       อาทาย น ปจฺเจสฺสนฺติ                พหิสีเม กโรมิติ
       นิฏฺฐานํ สนฺนิฏฺฐานมฺปิ               นาสนมฺปิ อิทนฺตโย
       อนธิฏฺฐิเตน เนวสฺส                    เหฏฺฐา ตีณิ นยา วิธี
       อาทาย ยาติ ปจฺเจสฺสํ                 พหิสีเม ๕- กโรมิติ
       น ปจฺเจสฺสนฺติ กาเรติ                  นิฏฺฐาเน กฐินุทฺธโร
       สนฺนิฏฺฐานํ นาสนญฺจ                 สวนํ สีมติกฺกมา
       สห ภิกฺขูหิ ชาเยถ                      เอวํ ปณฺณรสํ คติ
       สมาทาย วิปฺปกตา                     สมาทาย ปุนา ตถา
       อิเม เต จตุโร วารา                     สพฺเพ ปณฺณรสา วิธี
       อนาสาย จ อาสาย                    กรณีโย จ เต ตโย
       นยโต ตํ วิชาเนยฺย                     ตโย ทฺวาทส ทฺวาทส
       อปวิลายมาเนว ๖-                    ผาสุ ปญฺจวิธี ๗- ตหึ
       ปลิโพธาปลิโพธา                      อุทฺทานํ นยโต กตนฺติ ฯ
@เชิงอรรถ: ๑ โป. ม. ยุ. กฐินุทฺธารํ ฯ ๒ ม. ยุ. อาทาย สมาทาย จ ฯ ๓ ม. ยุ. คติ ฯ ๔ ยุ.
@ฉจฺจา วิปฺปกตา ฯ ๕ โป. ม. ยุ. พหิสีมํ ฯ ๖ โป. อปวินยมาเนว ฯ ม. อปวิลานา
@น เวตฺถ ฯ ยุ. อปจินนา น เวตฺถ ฯ ๗ ม. ปญฺจวิธา ฯ


             เนื้อความพระไตรปิฎกฉบับภาษาบาลีอักษรไทย เล่มที่ ๕ หน้าที่ ๑๓๕-๑๖๗.
http://84000.org/tipitaka/pali/pali_item_s.php?book=5&item=95&items=33&modeTY=2
             อ่านโดยใช้เครื่องหมาย [เลขข้อ] เป็นเกณฑ์แบ่งข้อ :-
http://84000.org/tipitaka/pali/pali_item_s.php?book=5&item=95&items=33&modeTY=2&mode=bracket
             อ่านเทียบพระไตรปิฎกฉบับภาษาบาลีอักษรโรมัน :-
http://84000.org/tipitaka/read/roman_item_s.php?book=5&item=95&items=33&modeTY=2
             อ่านเทียบพระไตรปิฎกภาษาไทยฉบับหลวง :-
http://84000.org/tipitaka/read/byitem_s.php?book=5&item=95&items=33&modeTY=2
             ศึกษาอรรถกถานี้ได้ที่ :-
http://84000.org/tipitaka/attha/attha.php?b=5&i=95
             The Pali Atthakatha in Thai :-
http://84000.org/tipitaka/atthapali/read_th.php?B=3&A=4277
             The Pali Atthakatha in Roman :-
http://84000.org/tipitaka/atthapali/read_rm.php?B=3&A=4277
             สารบัญพระไตรปิฎกเล่มที่ ๕
http://84000.org/tipitaka/read/?index_5