Kaṭhinakkhandhakaṃ
[95] Tena samayena buddho bhagavā sāvatthiyaṃ viharati jetavane
anāthapiṇḍikassa ārāme . tena kho pana samayena tiṃsamattā
pāṭheyyakā bhikkhū sabbe āraññakā sabbe piṇḍapātikā sabbe
paṃsukūlikā sabbe tecīvarikā sāvatthiṃ gacchantā bhagavantaṃ dassanāya
upakaṭṭhāya vassūpanāyikāya nāsakkhiṃsu sāvatthiyaṃ vassūpanāyikaṃ
sambhāvetuṃ antarāmagge sākete vassaṃ upagacchiṃsu . te
ukkaṇṭhitarūpā vassaṃ vasiṃsu āsanne va no bhagavā viharati ito
chasu yojanesu na ca mayaṃ labhāma bhagavantaṃ dassanāyāti.
{95.1} Athakho te bhikkhū vassaṃ vutthā temāsaccayena katāya
pavāraṇāya deve vassante udakasaṅgahe udakacikkhalle okapuṇṇehi
cīvarehi kilantarūpā yena sāvatthī jetavanaṃ anāthapiṇḍikassa ārāmo
yena bhagavā tenupasaṅkamiṃsu upasaṅkamitvā bhagavantaṃ abhivādetvā
ekamantaṃ nisīdiṃsu . āciṇṇaṃ kho panetaṃ buddhānaṃ bhagavantānaṃ
āgantukehi bhikkhūhi saddhiṃ paṭisammodituṃ.
{95.2} Athakho bhagavā te bhikkhū etadavoca kacci bhikkhave khamanīyaṃ kacci
yāpanīyaṃ kacci samaggā sammodamānā avivadamānā phāsukaṃ vassaṃ vasittha
na ca piṇḍakena kilamitthāti . khamanīyaṃ bhagavā yāpanīyaṃ bhagavā samaggā ca
mayaṃ bhante sammodamānā avivadamānā vassaṃ vasimhā na ca piṇḍakena
Kilamimhā idha mayaṃ bhante tiṃsamattā pāṭheyyakā bhikkhū sāvatthiṃ
āgacchantā bhagavantaṃ dassanāya upakaṭṭhāya vassūpanāyikāya
nāsakkhimhā sāvatthiyaṃ vassūpanāyikaṃ sambhāvetuṃ antarāmagge
sākete vassaṃ upagacchimhā te mayaṃ bhante ukkaṇṭhitarūpā vassaṃ
vasimhā āsanne va no bhagavā viharati ito chasu yojanesu na ca mayaṃ
labhāma bhagavantaṃ dassanāyāti athakho mayaṃ bhante vassaṃ vutthā
temāsaccayena katāya pavāraṇāya deve vassante udakasaṅgahe
udakacikkhalle okapuṇṇehi cīvarehi kilantarūpā addhānaṃ āgatāti.
[96] Athakho bhagavā etasmiṃ nidāne etasmiṃ pakaraṇe dhammiṃ
kathaṃ katvā bhikkhū āmantesi anujānāmi bhikkhave vassaṃ vutthānaṃ
bhikkhūnaṃ kaṭhinaṃ attharituṃ . atthatakaṭhinānaṃ vo bhikkhave pañca kappissanti
anāmantacāro asamādānacāro gaṇabhojanaṃ yāvadatthacīvaraṃ yo ca
tattha cīvaruppādo so nesaṃ bhavissatīti . atthatakaṭhinānaṃ vo bhikkhave
imāni pañca kappissanti . evañca pana bhikkhave kaṭhinaṃ attharitabbaṃ.
Byattena bhikkhunā paṭibalena saṅgho ñāpetabbo suṇātu me bhante
saṅgho idaṃ saṅghassa kaṭhinadussaṃ uppannaṃ . yadi saṅghassa pattakallaṃ
saṅgho imaṃ kaṭhinadussaṃ itthannāmassa bhikkhuno dadeyya kaṭhinaṃ attharituṃ.
Esā ñatti.
{96.1} Suṇātu me bhante saṅgho idaṃ saṅghassa kaṭhinadussaṃ
uppannaṃ . saṅgho imaṃ kaṭhinadussaṃ itthannāmassa bhikkhuno deti
Kaṭhinaṃ attharituṃ . yassāyasmato khamati imassa kaṭhinadussassa
itthannāmassa bhikkhuno dānaṃ kaṭhinaṃ attharituṃ so tuṇhassa yassa
nakkhamati so bhāseyya . dinnaṃ idaṃ saṅghena kaṭhinadussaṃ
itthannāmassa bhikkhuno kaṭhinaṃ attharituṃ . khamati saṅghassa tasmā
tuṇhī. Evametaṃ dhārayāmīti.
Evaṃ kho bhikkhave atthataṃ hoti kaṭhinaṃ evaṃ anatthataṃ
[97] Kathañca bhikkhave anatthataṃ hoti kaṭhinaṃ . Na ullikhitamattena
atthataṃ hoti kaṭhinaṃ . na dhovanamattena atthataṃ hoti kaṭhinaṃ . na
cīvaravicāraṇamattena atthataṃ hoti kaṭhinaṃ . na chedanamattena atthataṃ
hoti kaṭhinaṃ . na bandhanamattena atthataṃ hoti kaṭhinaṃ . na ovaṭṭika-
karaṇamattena atthataṃ hoti kaṭhinaṃ . na kaṇḍasakaraṇamattena atthataṃ
hoti kaṭhinaṃ . na daḷhīkammakaraṇamattena atthataṃ hoti kaṭhinaṃ . na
anuvātakaraṇamattena atthataṃ hoti kaṭhinaṃ . na paribhaṇḍakaraṇamattena
atthataṃ hoti kaṭhinaṃ . na ovaṭṭeyyakaraṇamattena 1- atthataṃ hoti
kaṭhinaṃ . na kambalamaddanamattena atthataṃ hoti kaṭhinaṃ . na nimittakatena
atthataṃ hoti kaṭhinaṃ . na parikathākatena atthataṃ hoti kaṭhinaṃ. Na kukkukatena
atthataṃ hoti kaṭhinaṃ . na sannidhikatena atthataṃ hoti kaṭhinaṃ . na
nissaggiyena atthataṃ hoti kaṭhinaṃ . na akappakatena atthataṃ hoti
@Footnote: 1 Sī. Yu. ovaddheyyakaraṇamattena. Ma. ovadeyyakaraṇamattena.
Kaṭhinaṃ . na aññatra saṅghāṭiyā atthataṃ hoti kaṭhinaṃ . na
aññatra uttarāsaṅgena atthataṃ hoti kaṭhinaṃ . na aññatra
antaravāsakena atthataṃ hoti kaṭhinaṃ . na aññatra pañcakena vā
atirekapañcakena vā tadaheva sañchinnena samaṇḍalīkatena atthataṃ
hoti kaṭhinaṃ . na 1- aññatra puggalassa atthārā atthataṃ hoti
kaṭhinaṃ . na sammā ceva atthataṃ hoti kaṭhinaṃ . tañce nissīmaṭṭho
anumodati evaṃpi anatthataṃ hoti kaṭhinaṃ . evaṃ kho bhikkhave anatthataṃ
hoti kaṭhinaṃ.
[98] Kathañca bhikkhave atthataṃ hoti kaṭhinaṃ . ahatena atthataṃ
hoti kaṭhinaṃ . ahatakappena atthataṃ hoti kaṭhinaṃ . pilotikāya
atthataṃ hoti kaṭhinaṃ . paṃsukūlena atthataṃ hoti kaṭhinaṃ . pāpaṇikena
atthataṃ hoti kaṭhinaṃ . animittakatena atthataṃ hoti kaṭhinaṃ .
Aparikathākatena atthataṃ hoti kaṭhinaṃ . akukkukatena atthataṃ hoti
kaṭhinaṃ . asannidhikatena atthataṃ hoti kaṭhinaṃ . anissaggiyena atthataṃ
hoti kaṭhinaṃ . kappakatena atthataṃ hoti kaṭhinaṃ . saṅghāṭiyā
atthataṃ hoti kaṭhinaṃ . uttarāsaṅgena atthataṃ hoti kaṭhinaṃ .
Antaravāsakena atthataṃ hoti kaṭhinaṃ . pañcakena vā atirekapañcakena
vā tadaheva sañchinnena samaṇḍalīkatena atthataṃ hoti kaṭhinaṃ .
Puggalassa atthārā atthataṃ hoti kaṭhinaṃ . sammā ceva atthataṃ
hoti kaṭhinaṃ . tañce sīmaṭṭho anumodati evaṃpi atthataṃ
@Footnote: 1 Ma. Yu. nasaddo natthi.
Hoti kaṭhinaṃ. Evaṃ kho bhikkhave atthataṃ hoti kaṭhinaṃ.
[99] Kathañca bhikkhave ubbhataṃ hoti kaṭhinaṃ . aṭṭhimā bhikkhave
mātikā kaṭhinassa ubbhārāya pakkamanantikā niṭṭhānantikā
sanniṭṭhānantikā nāsanantikā savanantikā āsāvacchedikā
sīmātikkantikā sahubbhārāti.
[100] Bhikkhu atthatakaṭhino katacīvaraṃ ādāya pakkamati na
paccessanti . tassa bhikkhuno pakkamanantiko kaṭhinuddhāro .
Bhikkhu atthatakaṭhino cīvaraṃ ādāya pakkamati . tassa bahisīmagatassa
evaṃ hoti idhevimaṃ cīvaraṃ kāressaṃ na paccessanti . so taṃ cīvaraṃ
kāreti . tassa bhikkhuno niṭṭhānantiko kaṭhinuddhāro . bhikkhu
atthatakaṭhino cīvaraṃ ādāya pakkamati . tassa bahisīmagatassa evaṃ
hoti nevimaṃ cīvaraṃ kāressaṃ na paccessanti . tassa bhikkhuno
sanniṭṭhānantiko kaṭhinuddhāro . bhikkhu atthatakaṭhino cīvaraṃ
ādāya pakkamati . tassa bahisīmagatassa evaṃ hoti idhevimaṃ
cīvaraṃ kāressaṃ na paccessanti . so taṃ cīvaraṃ kāreti . Tassa taṃ
cīvaraṃ kayiramānaṃ nassati . tassa bhikkhuno nāsanantiko kaṭhinuddhāro .
Bhikkhu atthatakaṭhino cīvaraṃ ādāya pakkamati paccessanti .
So bahisīmagato taṃ cīvaraṃ kāreti . so katacīvaro suṇāti
ubbhataṃ kira tasmiṃ āvāse kaṭhinanti . tassa bhikkhuno savanantiko
kaṭhinuddhāro . bhikkhu atthatakaṭhino cīvaraṃ ādāya pakkamati
Paccessanti . so bahisīmagato taṃ cīvaraṃ kāreti . so katacīvaro
paccessaṃ paccessanti bahiddhā kaṭhinuddhāraṃ vītināmeti . tassa
bhikkhuno sīmātikkantiko kaṭhinuddhāro . bhikkhu atthatakaṭhino
cīvaraṃ ādāya pakkamati paccessanti . so bahisīmagato taṃ cīvaraṃ
kāreti . so katacīvaro paccessaṃ paccessanti sambhuṇāti
kaṭhinuddhāraṃ. Tassa bhikkhuno saha bhikkhūhi kaṭhinuddhāro.
Ādāyasattakaṃ niṭṭhitaṃ paṭhamaṃ.
[101] Bhikkhu atthatakaṭhino katacīvaraṃ samādāya pakkamati na
paccessanti . tassa bhikkhuno pakkamanantiko kaṭhinuddhāro .
Bhikkhu atthatakaṭhino cīvaraṃ samādāya pakkamati . tassa bahisīmagatassa
evaṃ hoti idhevimaṃ cīvaraṃ kāressaṃ na paccessanti . so taṃ cīvaraṃ
kāreti . tassa bhikkhuno niṭṭhānantiko kaṭhinuddhāro . bhikkhu
atthatakaṭhino cīvaraṃ samādāya pakkamati . tassa bahisīmagatassa
evaṃ hoti nevimaṃ cīvaraṃ kāressaṃ na paccessanti . tassa
bhikkhuno sanniṭṭhānantiko kaṭhinuddhāro . bhikkhu atthatakaṭhino
cīvaraṃ samādāya pakkamati . tassa bahisīmagatassa evaṃ hoti idhevimaṃ
cīvaraṃ kāressaṃ na paccessanti . so taṃ cīvaraṃ kāreti . tassa
bhikkhuno taṃ cīvaraṃ kayiramānaṃ nassati . tassa bhikkhuno nāsanantiko
kaṭhinuddhāro . bhikkhu atthatakaṭhino cīvaraṃ samādāya pakkamati
paccessanti . so bahisīmagato taṃ cīvaraṃ kāreti . so katacīvaro
Suṇāti ubbhataṃ kira tasmiṃ āvāse kaṭhinanti . tassa bhikkhuno
savanantiko kaṭhinuddhāro . bhikkhu atthatakaṭhino cīvaraṃ samādāya
pakkamati paccessanti . so bahisīmagato taṃ cīvaraṃ kāreti .
So katacīvaro paccessaṃ paccessanti bahiddhā kaṭhinuddhāraṃ
vītināmeti . tassa bhikkhuno sīmātikkantiko kaṭhinuddhāro .
Bhikkhu atthatakaṭhino cīvaraṃ samādāya pakkamati paccessanti . so
bahisīmagato taṃ cīvaraṃ kāreti . so katacīvaro paccessaṃ paccessanti
sambhuṇāti kaṭhinuddhāraṃ. Tassa bhikkhuno saha bhikkhūhi kaṭhinuddhāro.
Samādāyasattakaṃ niṭṭhitaṃ dutiyaṃ.
[102] Bhikkhu atthatakaṭhino vippakatacīvaraṃ ādāya pakkamati. Tassa
bahisīmagatassa evaṃ hoti idhevimaṃ cīvaraṃ kāressaṃ na paccessanti . so taṃ
cīvaraṃ kāreti . tassa bhikkhuno niṭṭhānantiko kaṭhinuddhāro . bhikkhu
atthatakaṭhino vippakatacīvaraṃ ādāya pakkamati . tassa bahisīmagatassa
evaṃ hoti nevimaṃ cīvaraṃ kāressaṃ na paccessanti . tassa bhikkhuno
sanniṭṭhānantiko kaṭhinuddhāro . bhikkhu atthatakaṭhino vippakatacīvaraṃ ādāya
pakkamati . tassa bahisīmagatassa evaṃ hoti idhevimaṃ cīvaraṃ kāressaṃ na
paccessanti . so taṃ cīvaraṃ kāreti. Tassa taṃ cīvaraṃ kayiramānaṃ nassati.
Tassa bhikkhuno nāsanantiko kaṭhinuddhāro . bhikkhu atthatakaṭhino
vippakatacīvaraṃ ādāya pakkamati paccessanti . so bahisīmagato taṃ
Cīvaraṃ kāreti . so katacīvaro suṇāti ubbhataṃ kira tasmiṃ āvāse
kaṭhinanti . tassa bhikkhuno savanantiko kaṭhinuddhāro . bhikkhu
atthatakaṭhino vippakatacīvaraṃ ādāya pakkamati paccessanti . so
bahisīmagato taṃ cīvaraṃ kāreti . so katacīvaro paccessaṃ paccessanti
bahiddhā 1- kaṭhinuddhāraṃ vītināmeti . tassa bhikkhuno sīmātikkantiko
kaṭhinuddhāro . bhikkhu atthatakaṭhino vippakatacīvaraṃ ādāya pakkamati
paccessanti . so bahisīmagato taṃ cīvaraṃ kāreti . so katacīvaro
paccessaṃ paccessanti sambhuṇāti kaṭhinuddhāraṃ . tassa bhikkhuno
saha bhikkhūhi kaṭhinuddhāro.
Ādāyachakkaṃ niṭṭhitaṃ tatiyaṃ.
[103] Bhikkhu atthatakaṭhino vippakatacīvaraṃ samādāya pakkamati .
Tassa bahisīmagatassa evaṃ hoti idhevimaṃ cīvaraṃ kāressaṃ na
paccessanti . so taṃ cīvaraṃ kāreti . tassa bhikkhuno niṭṭhānantiko
kaṭhinuddhāro . bhikkhu atthatakaṭhino vippakatacīvaraṃ samādāya
pakkamati . tassa bahisīmagatassa evaṃ hoti nevimaṃ cīvaraṃ kāressaṃ
na paccessanti . tassa bhikkhuno sanniṭṭhānantiko kaṭhinuddhāro .
Bhikkhu atthatakaṭhino vippakatacīvaraṃ samādāya pakkamati . tassa
bahisīmagatassa evaṃ hoti idhevimaṃ cīvaraṃ kāressaṃ na paccessanti .
So taṃ cīvaraṃ kāreti . tassa taṃ cīvaraṃ kayiramānaṃ nassati. Tassa bhikkhuno
nāsanantiko kaṭhinuddhāro . bhikkhu atthatakaṭhino vippakatacīvaraṃ
@Footnote: 1 Po. bahisīmāya.
Samādāya pakkamati paccessanti . so bahisīmagato taṃ cīvaraṃ
kāreti . so katacīvaro suṇāti ubbhataṃ kira tasmiṃ āvāse
kaṭhinanti . tassa bhikkhuno savanantiko kaṭhinuddhāro . bhikkhu
atthatakaṭhino vippakatacīvaraṃ samādāya pakkamati paccessanti .
So bahisīmagato taṃ cīvaraṃ kāreti . So katacīvaro paccessaṃ paccessanti
bahiddhā kaṭhinuddhāraṃ vītināmeti . tassa bhikkhuno sīmātikkantiko
kaṭhinuddhāro . bhikkhu atthatakaṭhino vippakatacīvaraṃ samādāya pakkamati
paccessanti . so bahisīmagato taṃ cīvaraṃ kāreti . so katacīvaro
paccessaṃ paccessanti sambhuṇāti kaṭhinuddhāraṃ . tassa bhikkhuno
saha bhikkhūhi kaṭhinuddhāro.
Samādāyachakkaṃ niṭṭhitaṃ catutthaṃ.
[104] Bhikkhu atthatakaṭhino cīvaraṃ ādāya pakkamati . tassa
bahisīmagatassa evaṃ hoti idhevimaṃ cīvaraṃ kāressaṃ na paccessanti .
So taṃ cīvaraṃ kāreti . tassa bhikkhuno niṭṭhānantiko kaṭhinuddhāro.
Bhikkhu atthatakaṭhino cīvaraṃ ādāya pakkamati . tassa bahisīmagatassa
evaṃ hoti nevimaṃ cīvaraṃ kāressaṃ na paccessanti . tassa bhikkhuno
sanniṭṭhānantiko kaṭhinuddhāro . bhikkhu atthatakaṭhino cīvaraṃ
ādāya pakkamati . tassa bahisīmagatassa evaṃ hoti idhevimaṃ cīvaraṃ
kāressaṃ na paccessanti . so taṃ cīvaraṃ kāreti . tassa taṃ cīvaraṃ
kayiramānaṃ nassati. Tassa bhikkhuno nāsanantiko kaṭhinuddhāro.
[105] Bhikkhu atthatakaṭhino cīvaraṃ ādāya pakkamati na
paccessanti . tassa bahisīmagatassa evaṃ hoti idhevimaṃ cīvaraṃ
kāressanti . so taṃ cīvaraṃ kāreti . tassa bhikkhuno niṭṭhānantiko
kaṭhinuddhāro . bhikkhu atthatakaṭhino cīvaraṃ ādāya pakkamati na
paccessanti . tassa bahisīmagatassa evaṃ hoti nevimaṃ cīvaraṃ
kāressanti . tassa bhikkhuno sanniṭṭhānantiko kaṭhinuddhāro .
Bhikkhu atthatakaṭhino cīvaraṃ ādāya pakkamati na paccessanti .
Tassa bahisīmagatassa evaṃ hoti idhevimaṃ cīvaraṃ kāressanti . so
taṃ cīvaraṃ kāreti . tassa taṃ cīvaraṃ kayiramānaṃ nassati . tassa
bhikkhuno nāsanantiko kaṭhinuddhāro.
[106] Bhikkhu atthatakaṭhino cīvaraṃ ādāya pakkamati anadhiṭṭhitena
nevassa hoti paccessanti na panassa hoti na paccessanti .
Tassa bahisīmagatassa evaṃ hoti idhevimaṃ cīvaraṃ kāressaṃ na
paccessanti . so taṃ cīvaraṃ kāreti . tassa bhikkhuno niṭṭhānantiko
kaṭhinuddhāro . bhikkhu atthatakaṭhino cīvaraṃ ādāya pakkamati
anadhiṭṭhitena nevassa hoti paccessanti na panassa hoti
na paccessanti . tassa bahisīmagatassa evaṃ hoti nevimaṃ cīvaraṃ
kāressaṃ na paccessanti . tassa bhikkhuno sanniṭṭhānantiko
kaṭhinuddhāro . bhikkhu atthatakaṭhino cīvaraṃ ādāya pakkamati
anadhiṭṭhitena nevassa hoti paccessanti na panassa hoti
Na paccessanti . tassa bahisīmagatassa evaṃ hoti idhevimaṃ cīvaraṃ
kāressaṃ na paccessanti . so taṃ cīvaraṃ kāreti . tassa taṃ cīvaraṃ
kayiramānaṃ nassati. Tassa bhikkhuno nāsanantiko kaṭhinuddhāro.
[107] Bhikkhu atthatakaṭhino cīvaraṃ ādāya pakkamati paccessanti.
Tassa bahisīmagatassa evaṃ hoti idhevimaṃ cīvaraṃ kāressaṃ na paccessanti.
So taṃ cīvaraṃ kāreti . tassa bhikkhuno niṭṭhānantiko kaṭhinuddhāro.
Bhikkhu atthatakaṭhino cīvaraṃ ādāya pakkamati paccessanti . tassa
bahisīmagatassa evaṃ hoti nevimaṃ cīvaraṃ kāressaṃ na paccessanti .
Tassa bhikkhuno sanniṭṭhānantiko kaṭhinuddhāro . bhikkhu atthatakaṭhino
cīvaraṃ ādāya pakkamati paccessanti . tassa bahisīmagatassa evaṃ hoti
idhevimaṃ cīvaraṃ kāressaṃ na paccessanti. So taṃ cīvaraṃ kāreti. Tassa taṃ
cīvaraṃ kayiramānaṃ nassati. Tassa bhikkhuno nāsanantiko kaṭhinuddhāro.
{107.1} Bhikkhu atthatakaṭhino cīvaraṃ ādāya pakkamati paccessanti.
So bahisīmagato taṃ cīvaraṃ kāreti . so katacīvaro suṇāti ubbhataṃ
kira tasmiṃ āvāse kaṭhinanti . tassa bhikkhuno savanantiko
kaṭhinuddhāro . bhikkhu atthatakaṭhino cīvaraṃ ādāya pakkamati
paccessanti . so bahisīmagato taṃ cīvaraṃ kāreti . so katacīvaro
paccessaṃ paccessanti bahiddhā kaṭhinuddhāraṃ vītināmeti . tassa
bhikkhuno sīmātikkantiko kaṭhinuddhāro . bhikkhu atthatakaṭhino cīvaraṃ
Ādāya pakkamati paccessanti . so bahisīmagato taṃ cīvaraṃ kāreti.
So katacīvaro paccessaṃ paccessanti sambhuṇāti kaṭhinuddhāraṃ . tassa
bhikkhuno saha bhikkhūhi kaṭhinuddhāro.
[108] Bhikkhu atthatakaṭhino cīvaraṃ samādāya pakkamati. (ādāya-
vārasadisaṃ evaṃ vitthāretabbaṃ .) bhikkhu atthatakaṭhino vippakatacīvaraṃ
ādāya pakkamati . tassa bahisīmagatassa evaṃ hoti idhevimaṃ cīvaraṃ kāressaṃ
na paccessanti . so taṃ cīvaraṃ kāreti. Tassa bhikkhuno niṭṭhānantiko
kaṭhinuddhāro. (samādāyavārasadisaṃ evaṃ vitthāretabbaṃ .)
[109] Bhikkhu atthatakaṭhino vippakatacīvaraṃ samādāya pakkamati .
Tassa bahisīmagatassa evaṃ hoti idhevimaṃ cīvaraṃ kāressaṃ na paccessanti.
So taṃ cīvaraṃ kāreti . Tassa bhikkhuno niṭṭhānantiko kaṭhinuddhāro. Bhikkhu
atthatakaṭhino vippakatacīvaraṃ samādāya pakkamati . tassa bahisīmagatassa
evaṃ hoti nevimaṃ cīvaraṃ kāressaṃ na paccessanti . tassa bhikkhuno
sanniṭṭhānantiko kaṭhinuddhāro . bhikkhu atthatakaṭhino vippakatacīvaraṃ
samādāya pakkamati . tassa bahisīmagatassa evaṃ hoti idhevimaṃ cīvaraṃ
kāressaṃ na paccessanti. So taṃ cīvaraṃ kāreti. Tassa taṃ cīvaraṃ kayiramānaṃ
nassati. Tassa bhikkhuno nāsanantiko kaṭhinuddhāro.
[110] Bhikkhu atthatakaṭhino vippakatacīvaraṃ samādāya pakkamati
Na paccessanti . tassa bahisīmagatassa evaṃ hoti idhevimaṃ cīvaraṃ
kāressanti . so taṃ cīvaraṃ kāreti . tassa bhikkhuno niṭṭhānantiko
kaṭhinuddhāro . bhikkhu atthatakaṭhino vippakatacīvaraṃ samādāya pakkamati
na paccessanti . tassa bahisīmagatassa evaṃ hoti nevimaṃ cīvaraṃ
kāressanti . tassa bhikkhuno sanniṭṭhānantiko kaṭhinuddhāro .
Bhikkhu atthatakaṭhino vippakatacīvaraṃ samādāya pakkamati na paccessanti .
Tassa bahisīmagatassa evaṃ hoti idhevimaṃ cīvaraṃ kāressanti . so taṃ
cīvaraṃ kāreti . tassa taṃ cīvaraṃ kayiramānaṃ nassati . tassa bhikkhuno
nāsanantiko kaṭhinuddhāro.
[111] Bhikkhu atthatakaṭhino vippakatacīvaraṃ samādāya pakkamati
anadhiṭṭhitena nevassa hoti paccessanti na panassa hoti na
paccessanti . tassa bahisīmagatassa evaṃ hoti idhevimaṃ cīvaraṃ
kāressaṃ na paccessanti . so taṃ cīvaraṃ kāreti . tassa bhikkhuno
niṭṭhānantiko kaṭhinuddhāro . bhikkhu atthatakaṭhino vippakatacīvaraṃ
samādāya pakkamati anadhiṭṭhitena nevassa hoti paccessanti
na panassa hoti na paccessanti . tassa bahisīmagatassa evaṃ
hoti nevimaṃ cīvaraṃ kāressaṃ na paccessanti . tassa bhikkhuno
sanniṭṭhānantiko kaṭhinuddhāro . bhikkhu atthatakaṭhino vippakatacīvaraṃ
samādāya pakkamati anadhiṭṭhitena nevassa hoti paccessanti
na panassa hoti na paccessanti . tassa bahisīmagatassa evaṃ
Hoti idhevimaṃ cīvaraṃ kāressaṃ na paccessanti . so taṃ cīvaraṃ
kāreti . tassa taṃ cīvaraṃ kayiramānaṃ nassati . tassa bhikkhuno
nāsanantiko kaṭhinuddhāro.
[112] Bhikkhu atthatakaṭhino vippakatacīvaraṃ samādāya pakkamati
paccessanti . tassa bahisīmagatassa evaṃ hoti idhevimaṃ cīvaraṃ
kāressaṃ na paccessanti . so taṃ cīvaraṃ kāreti . tassa bhikkhuno
niṭṭhānantiko kaṭhinuddhāro . bhikkhu atthatakaṭhino vippakatacīvaraṃ
samādāya pakkamati paccessanti . tassa bahisīmagatassa evaṃ
hoti nevimaṃ cīvaraṃ kāressaṃ na paccessanti . tassa bhikkhuno
sanniṭṭhānantiko kaṭhinuddhāro . bhikkhu atthatakaṭhino vippakatacīvaraṃ
samādāya pakkamati paccessanti . tassa bahisīmagatassa evaṃ hoti
idhevimaṃ cīvaraṃ kāressaṃ na paccessanti . so taṃ cīvaraṃ kāreti.
Tassa taṃ cīvaraṃ kayiramānaṃ nassati . tassa bhikkhuno nāsanantiko
kaṭhinuddhāro.
{112.1} Bhikkhu atthatakaṭhino vippakatacīvaraṃ samādāya pakkamati
paccessanti . so bahisīmagato taṃ cīvaraṃ kāreti. So katacīvaro suṇāti
ubbhataṃ kira tasmiṃ āvāse kaṭhinanti . tassa bhikkhuno savanantiko
kaṭhinuddhāro . bhikkhu atthatakaṭhino vippakatacīvaraṃ samādāya pakkamati
paccessanti . so bahisīmagato taṃ cīvaraṃ kāreti. So katacīvaro paccessaṃ
paccessanti bahiddhā kaṭhinuddhāraṃ vītināmeti . tassa bhikkhuno
Sīmātikkantiko kaṭhinuddhāro . bhikkhu atthatakaṭhino vippakatacīvaraṃ
samādāya pakkamati paccessanti . so bahisīmagato taṃ cīvaraṃ
kāreti . so katacīvaro paccessaṃ paccessanti sambhuṇāti
kaṭhinuddhāraṃ. Tassa bhikkhuno saha bhikkhūhi kaṭhinuddhāro.
Ādāyabhāṇavāraṃ niṭṭhitaṃ.
[113] Bhikkhu atthatakaṭhino cīvarāsāya pakkamati . So bahisīmagato
taṃ cīvarāsaṃ payirupāsati anāsāya labhati āsāya na labhati. Tassa evaṃ
hoti idhevimaṃ cīvaraṃ kāressaṃ na paccessanti. So taṃ cīvaraṃ kāreti.
Tassa bhikkhuno niṭṭhānantiko kaṭhinuddhāro . bhikkhu atthatakaṭhino
cīvarāsāya pakkamati . so bahisīmagato taṃ cīvarāsaṃ payirupāsati
anāsāya labhati āsāya na labhati . tassa evaṃ hoti nevimaṃ cīvaraṃ
kāressaṃ na paccessanti . tassa bhikkhuno sanniṭṭhānantiko
kaṭhinuddhāro.
{113.1} Bhikkhu atthatakaṭhino cīvarāsāya pakkamati. So bahisīmagato
taṃ cīvarāsaṃ payirupāsati anāsāya labhati āsāya na labhati. Tassa evaṃ
hoti idhevimaṃ cīvaraṃ kāressaṃ na paccessanti. So taṃ cīvaraṃ kāreti.
Tassa taṃ cīvaraṃ kayiramānaṃ nassati . tassa bhikkhuno nāsanantiko
kaṭhinuddhāro . bhikkhu atthatakaṭhino cīvarāsāya pakkamati . tassa
bahisīmagatassa evaṃ hoti idhevimaṃ cīvarāsaṃ payirupāsissaṃ na
paccessanti . so taṃ cīvarāsaṃ payirupāsati . tassa sā cīvarāsā
Upacchijjati. Tassa bhikkhuno āsāvacchediko kaṭhinuddhāro.
[114] Bhikkhu atthatakaṭhino cīvarāsāya pakkamati na paccessanti.
So bahisīmagato taṃ cīvarāsaṃ payirupāsati anāsāya labhati
āsāya na labhati . tassa evaṃ hoti idhevimaṃ cīvaraṃ kāressanti.
So taṃ cīvaraṃ kāreti . tassa bhikkhuno niṭṭhānantiko kaṭhinuddhāro.
Bhikkhu atthatakaṭhino cīvarāsāya pakkamati na paccessanti . so
bahisīmagato taṃ cīvarāsaṃ payirupāsati anāsāya labhati āsāya na
labhati . tassa evaṃ hoti nevimaṃ cīvaraṃ kāressanti 1- . tassa
bhikkhuno sanniṭṭhānantiko kaṭhinuddhāro.
{114.1} Bhikkhu atthatakaṭhino cīvarāsāya pakkamati na paccessanti.
So bahisīmagato taṃ cīvarāsaṃ payirupāsati anāsāya labhati āsāya na labhati.
Tassa evaṃ hoti idhevimaṃ cīvaraṃ kāressanti. So taṃ cīvaraṃ kāreti. Tassa
taṃ cīvaraṃ kayiramānaṃ nassati . tassa bhikkhuno nāsanantiko kaṭhinuddhāro.
Bhikkhu atthatakaṭhino cīvarāsāya pakkamati na paccessanti . tassa
bahisīmagatassa evaṃ hoti idhevimaṃ cīvarāsaṃ payirupāsissanti . so taṃ
cīvarāsaṃ payirupāsati . tassa sā cīvarāsā upacchijjati . tassa
bhikkhuno āsāvacchediko kaṭhinuddhāro.
[115] Bhikkhu atthatakaṭhino cīvarāsāya pakkamati anadhiṭṭhitena
nevassa hoti paccessanti na panassa hoti na paccessanti .
So bahisīmagato taṃ cīvarāsaṃ payirupāsati anāsāya labhati āsāya
@Footnote: 1 Po. Ma. kāressaṃ na paccessanti.
Na labhati . tassa evaṃ hoti idhevimaṃ cīvaraṃ kāressaṃ na paccessanti.
So taṃ cīvaraṃ kāreti . tassa bhikkhuno niṭṭhānantiko kaṭhinuddhāro.
Bhikkhu atthatakaṭhino cīvarāsāya pakkamati anadhiṭṭhitena nevassa
hoti paccessanti na panassa hoti na paccessanti . so bahisīmagato
taṃ cīvarāsaṃ payirupāsati anāsāya labhati āsāya na labhati . tassa
evaṃ hoti nevimaṃ cīvaraṃ kāressaṃ na paccessanti . tassa bhikkhuno
sanniṭṭhānantiko kaṭhinuddhāro.
{115.1} Bhikkhu atthatakaṭhino cīvarāsāya pakkamati anadhiṭṭhitena
nevassa hoti paccessanti na panassa hoti na paccessanti . so
bahisīmagato taṃ cīvarāsaṃ payirupāsati anāsāya labhati āsāya
na labhati . tassa evaṃ hoti idhevimaṃ cīvaraṃ kāressaṃ na paccessanti.
So taṃ cīvaraṃ kāreti . tassa taṃ cīvaraṃ kayiramānaṃ nassati . tassa
bhikkhuno nāsanantiko kaṭhinuddhāro . bhikkhu atthatakaṭhino
cīvarāsāya pakkamati anadhiṭṭhitena nevassa hoti paccessanti na
panassa hoti na paccessanti . tassa bahisīmagatassa evaṃ hoti
idhevimaṃ cīvarāsaṃ payirupāsissaṃ na paccessanti . so taṃ cīvarāsaṃ
payirupāsati . tassa sā cīvarāsā upacchijjati . tassa bhikkhuno
āsāvacchediko kaṭhinuddhāro.
Anāsādoḷasakaṃ niṭṭhitaṃ.
[116] Bhikkhu atthatakaṭhino cīvarāsāya pakkamati paccessanti .
So bahisīmagato taṃ cīvarāsaṃ payirupāsati āsāya labhati anāsāya
na labhati . tassa evaṃ hoti idhevimaṃ cīvaraṃ kāressaṃ na paccessanti.
So taṃ cīvaraṃ kāreti . tassa bhikkhuno niṭṭhānantiko kaṭhinuddhāro.
Bhikkhu atthatakaṭhino cīvarāsāya pakkamati paccessanti . so
bahisīmagato taṃ cīvarāsaṃ payirupāsati āsāya labhati anāsāya na
labhati . tassa evaṃ hoti nevimaṃ cīvaraṃ kāressaṃ na paccessanti.
Tassa bhikkhuno sanniṭṭhānantiko kaṭhinuddhāro.
{116.1} Bhikkhu atthatakaṭhino cīvarāsāya pakkamati paccessanti.
So bahisīmagato taṃ cīvarāsaṃ payirupāsati āsāya labhati anāsāya na
labhati . tassa evaṃ hoti idhevimaṃ cīvaraṃ kāressaṃ na paccessanti.
So taṃ cīvaraṃ kāreti . tassa taṃ cīvaraṃ kayiramānaṃ nassati. Tassa bhikkhuno
nāsanantiko kaṭhinuddhāro . bhikkhu atthatakaṭhino cīvarāsāya pakkamati
paccessanti . tassa bahisīmagatassa evaṃ hoti idhevimaṃ cīvarāsaṃ
payirupāsissaṃ na paccessanti . so taṃ cīvarāsaṃ payirupāsati . tassa
sā cīvarāsā upacchijjati . tassa bhikkhuno āsāvacchediko
kaṭhinuddhāro.
[117] Bhikkhu atthatakaṭhino cīvarāsāya pakkamati paccessanti .
So bahisīmagato suṇāti ubbhataṃ kira tasmiṃ āvāse kaṭhinanti .
Tassa evaṃ hoti yato tasmiṃ āvāse ubbhataṃ kaṭhinaṃ idhevimaṃ
cīvarāsaṃ payirupāsissanti . so taṃ cīvarāsaṃ payirupāsati āsāya
Labhati anāsāya na labhati . tassa evaṃ hoti idhevimaṃ cīvaraṃ kāressaṃ na
paccessanti . so taṃ cīvaraṃ kāreti . tassa bhikkhuno niṭṭhānantiko
kaṭhinuddhāro . bhikkhu atthatakaṭhino cīvarāsāya pakkamati paccessanti .
So bahisīmagato suṇāti ubbhataṃ kira tasmiṃ āvāse kaṭhinanti . tassa
evaṃ hoti yato tasmiṃ āvāse ubbhataṃ kaṭhinaṃ idhevimaṃ cīvarāsaṃ payirupāsissanti.
So taṃ cīvarāsaṃ payirupāsati āsāya labhati anāsāya na labhati. Tassa
evaṃ hoti nevimaṃ cīvaraṃ kāressaṃ na paccessanti . tassa bhikkhuno
sanniṭṭhānantiko kaṭhinuddhāro.
{117.1} Bhikkhu atthatakaṭhino cīvarāsāya pakkamati paccessanti.
So bahisīmagato suṇāti ubbhataṃ kira tasmiṃ āvāse kaṭhinanti . tassa
evaṃ hoti yato tasmiṃ āvāse ubbhataṃ kaṭhinaṃ idhevimaṃ cīvarāsaṃ
payirupāsissanti . so taṃ cīvarāsaṃ payirupāsati āsāya labhati
anāsāya na labhati . tassa evaṃ hoti idhevimaṃ cīvaraṃ kāressaṃ na
paccessanti . so taṃ cīvaraṃ kāreti . tassa taṃ cīvaraṃ kayiramānaṃ
nassati . tassa bhikkhuno nāsanantiko kaṭhinuddhāro . bhikkhu
atthatakaṭhino cīvarāsāya pakkamati paccessanti . so bahisīmagato
suṇāti ubbhataṃ kira tasmiṃ āvāse kaṭhinanti . tassa evaṃ hoti yato
tasmiṃ āvāse ubbhataṃ kaṭhinaṃ idhevimaṃ cīvarāsaṃ payirupāsissaṃ na paccessanti.
So taṃ cīvarāsaṃ payirupāsati . tassa sā cīvarāsā upacchijjati .
Tassa bhikkhuno āsāvacchediko kaṭhinuddhāro.
[118] Bhikkhu atthatakaṭhino cīvarāsāya pakkamati paccessanti .
So bahisīmagato taṃ cīvarāsaṃ payirupāsati āsāya labhati anāsāya na
labhati . so taṃ cīvaraṃ kāreti . so katacīvaro suṇāti ubbhataṃ kira
tasmiṃ āvāse kaṭhinanti . tassa bhikkhuno savanantiko kaṭhinuddhāro .
Bhikkhu atthatakaṭhino cīvarāsāya pakkamati paccessanti . tassa
bahisīmagatassa evaṃ hoti idhevimaṃ cīvarāsaṃ payirupāsissaṃ na
paccessanti . so taṃ cīvarāsaṃ payirupāsati . tassa sā cīvarāsā
upacchijjati. Tassa bhikkhuno āsāvacchediko kaṭhinuddhāro.
{118.1} Bhikkhu atthatakaṭhino cīvarāsāya pakkamati paccessanti.
So bahisīmagato taṃ cīvarāsaṃ payirupāsati āsāya labhati anāsāya na
labhati . so taṃ cīvaraṃ kāreti . so katacīvaro paccessaṃ paccessanti
bahiddhā kaṭhinuddhāraṃ vītināmeti . tassa bhikkhuno sīmātikkantiko
kaṭhinuddhāro . bhikkhu atthatakaṭhino cīvarāsāya pakkamati paccessanti .
So bahisīmagato taṃ cīvarāsaṃ payirupāsati āsāya labhati anāsāya na
labhati . so taṃ cīvaraṃ kāreti . so katacīvaro paccessaṃ paccessanti
sambhuṇāti kaṭhinuddhāraṃ. Tassa bhikkhuno saha bhikkhūhi kaṭhinuddhāro.
Āsādoḷasakaṃ niṭṭhitaṃ.
[119] Bhikkhu atthatakaṭhino kenacideva karaṇīyena pakkamati .
Tassa bahisīmagatassa cīvarāsā uppajjati . so taṃ cīvarāsaṃ
payirupāsati anāsāya labhati āsāya na labhati . tassa evaṃ hoti
idhevimaṃ cīvaraṃ kāressaṃ na paccessanti . So taṃ cīvaraṃ kāreti. Tassa
bhikkhuno niṭṭhānantiko kaṭhinuddhāro . bhikkhu atthatakaṭhino kenacideva
karaṇīyena pakkamati . tassa bahisīmagatassa cīvarāsā uppajjati .
So taṃ cīvarāsaṃ payirupāsati anāsāya labhati āsāya na labhati .
Tassa evaṃ hoti nevimaṃ cīvaraṃ kāressaṃ na paccessanti .
Tassa bhikkhuno sanniṭṭhānantiko kaṭhinuddhāro.
{119.1} Bhikkhu atthatakaṭhino kenacideva karaṇīyena pakkamati .
Tassa bahisīmagatassa cīvarāsā uppajjati . so taṃ cīvarāsaṃ payirupāsati
anāsāya labhati āsāya na labhati . tassa evaṃ hoti idhevimaṃ cīvaraṃ
kāressaṃ na paccessanti. So taṃ cīvaraṃ kāreti. Tassa taṃ cīvaraṃ kayiramānaṃ
nassati . tassa bhikkhuno nāsanantiko kaṭhinuddhāro . bhikkhu
atthatakaṭhino kenacideva karaṇīyena pakkamati . tassa bahisīmagatassa
cīvarāsā uppajjati . tassa evaṃ hoti idhevimaṃ cīvarāsaṃ payirupāsissaṃ
na paccessanti . so taṃ cīvarāsaṃ payirupāsati . tassa sā cīvarāsā
upacchijjati. Tassa bhikkhuno āsāvacchediko kaṭhinuddhāro.
[120] Bhikkhu atthatakaṭhino kenacideva karaṇīyena pakkamati
na paccessanti . tassa bahisīmagatassa cīvarāsā uppajjati . so
Taṃ cīvarāsaṃ payirupāsati anāsāya labhati āsāya na labhati .
Tassa evaṃ hoti idhevimaṃ cīvaraṃ kāressanti . so taṃ cīvaraṃ
kāreti . tassa bhikkhuno niṭṭhānantiko kaṭhinuddhāro . bhikkhu
atthatakaṭhino kenacideva karaṇīyena pakkamati na paccessanti .
Tassa bahisīmagatassa cīvarāsā uppajjati . so taṃ cīvarāsaṃ
payirupāsati anāsāya labhati āsāya na labhati . tassa evaṃ hoti
nevimaṃ cīvaraṃ kāressanti . tassa bhikkhuno sanniṭṭhānantiko
kaṭhinuddhāro.
{120.1} Bhikkhu atthatakaṭhino kenacideva karaṇīyena pakkamati
na paccessanti . tassa bahisīmagatassa cīvarāsā uppajjati .
So taṃ cīvarāsaṃ payirupāsati anāsāya labhati āsāya na labhati .
Tassa evaṃ hoti idhevimaṃ cīvaraṃ kāressanti . So taṃ cīvaraṃ kāreti.
Tassa taṃ cīvaraṃ kayiramānaṃ nassati . tassa bhikkhuno nāsanantiko
kaṭhinuddhāro . bhikkhu atthatakaṭhino kenacideva karaṇīyena pakkamati
na paccessanti . tassa bahisīmagatassa cīvarāsā uppajjati .
Tassa evaṃ hoti idhevimaṃ cīvarāsaṃ payirupāsissanti . so taṃ cīvarāsaṃ
payirupāsati . tassa sā cīvarāsā upacchijjati . tassa bhikkhuno
āsāvacchediko kaṭhinuddhāro.
[121] Bhikkhu atthatakaṭhino kenacideva karaṇīyena pakkamati
anadhiṭṭhitena nevassa hoti paccessanti na panassa hoti na
paccessanti . tassa bahisīmagatassa cīvarāsā uppajjati . so
Taṃ cīvarāsaṃ payirupāsati anāsāya labhati āsāya na labhati . tassa
evaṃ hoti idhevimaṃ cīvaraṃ kāressaṃ na paccessanti . so taṃ cīvaraṃ
kāreti . tassa bhikkhuno niṭṭhānantiko kaṭhinuddhāro . bhikkhu
atthatakaṭhino kenacideva karaṇīyena pakkamati anadhiṭṭhitena nevassa
hoti paccessanti na panassa hoti na paccessanti . tassa
bahisīmagatassa cīvarāsā uppajjati . so taṃ cīvarāsaṃ payirupāsati
anāsāya labhati āsāya na labhati . tassa evaṃ hoti nevimaṃ cīvaraṃ
kāressaṃ na paccessanti . tassa bhikkhuno sanniṭṭhānantiko
kaṭhinuddhāro.
{121.1} Bhikkhu atthatakaṭhino kenacideva karaṇīyena pakkamati
anadhiṭṭhitena nevassa hoti paccessanti na panassa hoti
na paccessanti . tassa bahisīmagatassa cīvarāsā uppajjati .
So taṃ cīvarāsaṃ payirupāsati anāsāya labhati āsāya na labhati .
Tassa evaṃ hoti idhevimaṃ cīvaraṃ kāressaṃ na paccessanti .
So taṃ cīvaraṃ kāreti . tassa taṃ cīvaraṃ kayiramānaṃ nassati . tassa
bhikkhuno nāsanantiko kaṭhinuddhāro . bhikkhu atthatakaṭhino kenacideva
karaṇīyena pakkamati anadhiṭṭhitena nevassa hoti paccessanti
na panassa hoti na paccessanti . tassa bahisīmagatassa cīvarāsā
uppajjati . tassa evaṃ hoti idhevimaṃ cīvarāsaṃ payirupāsissaṃ
na paccessanti . so taṃ cīvarāsaṃ payirupāsati . tassa sā cīvarāsā
upacchijjati. Tassa bhikkhuno āsāvacchediko kaṭhinuddhāro.
Karaṇīyadoḷasakaṃ niṭṭhitaṃ.
[122] Bhikkhu atthatakaṭhino disaṅgamiko pakkamati cīvarapaṭivisaṃ
apavilāyamāno 1- tamenaṃ disaṅgataṃ 2- bhikkhū pucchanti kahaṃ tvaṃ
āvuso vassaṃ vuttho kattha ca te cīvarapaṭivisoti . so evaṃ vadeti
amukasmiṃ āvāse vassaṃ vutthomhi tattha ca me cīvarapaṭivisoti . Te
evaṃ vadenti gacchāvuso taṃ cīvaraṃ āhara mayante idha cīvaraṃ karissāmāti.
So taṃ āvāsaṃ gantvā bhikkhū pucchati kahaṃ me āvuso cīvarapaṭivisoti.
Te evaṃ vadenti ayante āvuso cīvarapaṭiviso kahaṃ gamissasīti. So
evaṃ vadeti amukaṃ [3]- nāma āvāsaṃ gamissāmi tattha me bhikkhū
cīvaraṃ karissantīti . te evaṃ vadenti alaṃ āvuso mā [4]- agamāsi
mayante idha cīvaraṃ karissāmāti . tassa evaṃ hoti idhevimaṃ cīvaraṃ
kāressaṃ na paccessanti . so taṃ cīvaraṃ kāreti . tassa bhikkhuno
niṭṭhānantiko kaṭhinuddhāro . bhikkhu atthatakaṭhino disaṅgamiko
pakkamati .pe. tassa bhikkhuno sanniṭṭhānantiko kaṭhinuddhāro .
Bhikkhu atthatakaṭhino disaṅgamiko pakkamati .pe. tassa bhikkhuno
nāsanantiko kaṭhinuddhāro.
[123] Bhikkhu atthatakaṭhino disaṅgamiko pakkamati cīvarapaṭivisaṃ
apavilāyamāno . tamenaṃ disaṅgataṃ bhikkhū pucchanti kahaṃ tvaṃ āvuso
@Footnote: 1 Sī. apavīṇāyamāno. Po. Yu. apacinayamāno. 2 Po. disaṅgamikaṃ. 3 Ma. ca.
@4 Po. tvaṃ.
Vassaṃ vuttho kattha ca 1- te cīvarapaṭivisoti . so evaṃ vadeti
amukasmiṃ āvāse vassaṃ vutthomhi tattha ca me cīvarapaṭivisoti .
Te evaṃ vadenti gacchāvuso taṃ cīvaraṃ āhara mayante idha
cīvaraṃ karissāmāti . so taṃ āvāsaṃ gantvā bhikkhū pucchati kahaṃ
me āvuso cīvarapaṭivisoti . te evaṃ vadenti ayante āvuso
cīvarapaṭivisoti . so taṃ cīvaraṃ ādāya taṃ āvāsaṃ gacchati .
Tamenaṃ antarāmagge bhikkhū pucchanti āvuso kahaṃ gamissasīti .
So evaṃ vadeti amukaṃ nāma āvāsaṃ gamissāmi tattha me
bhikkhū cīvaraṃ karissantīti . te evaṃ vadenti alaṃ āvuso mā
agamāsi mayante idha cīvaraṃ karissāmāti . tassa evaṃ hoti
idhevimaṃ cīvaraṃ kāressaṃ na paccessanti . so taṃ cīvaraṃ kāreti.
Tassa bhikkhuno niṭṭhānantiko kaṭhinuddhāro.
{123.1} Bhikkhu atthatakaṭhino disaṅgamiko pakkamati cīvarapaṭivisaṃ
apavilāyamāno . tamenaṃ disaṅgataṃ bhikkhū pucchanti kahaṃ tvaṃ āvuso
vassaṃ vuttho kattha ca te cīvarapaṭivisoti . so evaṃ vadeti amukasmiṃ
āvāse vassaṃ vutthomhi tattha ca me cīvarapaṭivisoti . te evaṃ
vadenti gacchāvuso taṃ cīvaraṃ āhara mayante idha cīvaraṃ karissāmāti.
So taṃ āvāsaṃ gantvā bhikkhū pucchati kahaṃ me āvuso cīvarapaṭivisoti.
Te evaṃ vadenti ayante āvuso cīvarapaṭivisoti . so taṃ cīvaraṃ
ādāya taṃ āvāsaṃ gacchati . tamenaṃ antarāmagge
@Footnote: 1 Po. katthaci casaddo natthi.
Bhikkhū pucchanti āvuso kahaṃ gamissasīti . so evaṃ vadeti amukaṃ
nāma āvāsaṃ gamissāmi tattha me bhikkhū cīvaraṃ karissantīti .
Te evaṃ vadenti alaṃ āvuso mā agamāsi mayante idha cīvaraṃ
karissāmāti . tassa evaṃ hoti nevimaṃ cīvaraṃ kāressaṃ
na paccessanti. Tassa bhikkhuno sanniṭṭhānantiko kaṭhinuddhāro.
{123.2} Bhikkhu atthatakaṭhino disaṅgamiko pakkamati cīvarapaṭivisaṃ
apavilāyamāno . tamenaṃ disaṅgataṃ bhikkhū pucchanti kahaṃ tvaṃ āvuso
vassaṃ vuttho kattha ca te cīvarapaṭivisoti . so evaṃ vadeti amukasmiṃ
āvāse vassaṃ vutthomhi tattha ca me cīvarapaṭivisoti . te evaṃ
vadenti gacchāvuso taṃ cīvaraṃ āhara mayante idha cīvaraṃ karissāmāti.
So taṃ āvāsaṃ gantvā bhikkhū pucchati kahaṃ me āvuso cīvarapaṭivisoti.
Te evaṃ vadenti ayante āvuso cīvarapaṭivisoti. So taṃ cīvaraṃ ādāya
taṃ āvāsaṃ gacchati . tamenaṃ antarāmagge bhikkhū pucchanti āvuso
kahaṃ gamissasīti . so evaṃ vadeti amukaṃ nāma āvāsaṃ gamissāmi
tattha me bhikkhū cīvaraṃ karissantīti . te evaṃ vadenti alaṃ āvuso mā
agamāsi mayante idha cīvaraṃ karissāmāti . tassa evaṃ hoti idhevimaṃ
cīvaraṃ kāressaṃ na paccessanti . so taṃ cīvaraṃ kāreti. Tassa taṃ cīvaraṃ
kayiramānaṃ nassati. Tassa bhikkhuno nāsanantiko kaṭhinuddhāro.
[124] Bhikkhu atthatakaṭhino disaṅgamiko pakkamati cīvarapaṭivisaṃ
apavilāyamāno . tamenaṃ disaṅgataṃ bhikkhū pucchanti kahaṃ tvaṃ āvuso
vassaṃ vuttho kattha ca te cīvarapaṭivisoti . so evaṃ vadeti amukasmiṃ
āvāse vassaṃ vutthomhi tattha ca me cīvarapaṭivisoti . te evaṃ
vadenti gacchāvuso taṃ cīvaraṃ āhara mayante idha cīvaraṃ karissāmāti.
So taṃ āvāsaṃ gantvā bhikkhū pucchati kahaṃ me āvuso cīvarapaṭivisoti.
Te evaṃ vadenti ayante āvuso cīvarapaṭivisoti. So taṃ cīvaraṃ ādāya
taṃ āvāsaṃ gacchati . tassa taṃ āvāsaṃ gatassa evaṃ hoti idhevimaṃ cīvaraṃ
kāressaṃ na paccessanti . so taṃ cīvaraṃ kāreti . tassa bhikkhuno
niṭṭhānantiko kaṭhinuddhāro.
{124.1} Bhikkhu atthatakaṭhino disaṅgamiko pakkamati .pe. nevimaṃ
cīvaraṃ kāressaṃ na paccessanti . tassa bhikkhuno sanniṭṭhānantiko
kaṭhinuddhāro . bhikkhu atthatakaṭhino disaṅgamiko pakkamati .pe. idhevimaṃ
cīvaraṃ kāressaṃ na paccessanti . so taṃ cīvaraṃ kāreti. Tassa taṃ cīvaraṃ
kayiramānaṃ nassati. Tassa bhikkhuno nāsanantiko kaṭhinuddhāro.
Apavilāyananavakaṃ niṭṭhitaṃ.
[125] Bhikkhu atthatakaṭhino phāsuvihāriko cīvaraṃ ādāya pakkamati
amukaṃ nāma āvāsaṃ gamissāmi tattha ce me 1- phāsu bhavissati
@Footnote: 1 Sī. tattha ca me. Ma. Yu. tattha me.
Vasissāmi no ce me phāsu bhavissati amukaṃ nāma āvāsaṃ
gamissāmi tattha ce me phāsu bhavissati vasissāmi no ce
me phāsu bhavissati amukaṃ nāma āvāsaṃ gamissāmi tattha ce
me phāsu bhavissati vasissāmi no ce me phāsu bhavissati
paccessanti . tassa bahisīmagatassa evaṃ hoti idhevimaṃ cīvaraṃ
kāressaṃ na paccessanti . so taṃ cīvaraṃ kāreti . tassa
bhikkhuno niṭṭhānantiko kaṭhinuddhāro.
{125.1} Bhikkhu atthatakaṭhino phāsuvihāriko cīvaraṃ ādāya pakkamati
amukaṃ nāma āvāsaṃ gamissāmi tattha ce me phāsu bhavissati vasissāmi
no ce me phāsu bhavissati amukaṃ nāma āvāsaṃ gamissāmi tattha ce me
phāsu bhavissati vasissāmi no ce me phāsu bhavissati amukaṃ nāma āvāsaṃ
gamissāmi tattha ce me phāsu bhavissati vasissāmi no ce me phāsu bhavissati
paccessanti . tassa bahisīmagatassa evaṃ hoti nevimaṃ cīvaraṃ kāressaṃ na
paccessanti. Tassa bhikkhuno sanniṭṭhānantiko kaṭhinuddhāro.
{125.2} Bhikkhu atthatakaṭhino phāsuvihāriko cīvaraṃ ādāya pakkamati
amukaṃ nāma āvāsaṃ gamissāmi tattha ce me phāsu bhavissati vasissāmi
no ce me phāsu bhavissati amukaṃ nāma āvāsaṃ gamissāmi tattha ce me
phāsu bhavissati vasissāmi no ce me phāsu bhavissati amukaṃ nāma
āvāsaṃ gamissāmi tattha ce me phāsu bhavissati vasissāmi
No ce me phāsu bhavissati paccessanti . tassa bahisīmagatassa
evaṃ hoti idhevimaṃ cīvaraṃ kāressaṃ na paccessanti . so
taṃ cīvaraṃ kāreti . tassa taṃ cīvaraṃ kayiramānaṃ nassati . tassa
bhikkhuno nāsanantiko kaṭhinuddhāro.
{125.3} Bhikkhu atthatakaṭhino phāsuvihāriko cīvaraṃ ādāya
pakkamati amukaṃ nāma āvāsaṃ gamissāmi tattha ce me phāsu
bhavissati vasissāmi no ce me phāsu bhavissati amukaṃ nāma āvāsaṃ
gamissāmi tattha ce me phāsu bhavissati vasissāmi no ce me phāsu
bhavissati amukaṃ nāma āvāsaṃ gamissāmi tattha ce me phāsu bhavissati
vasissāmi no ce me phāsu bhavissati paccessanti . so bahisīmagato
taṃ cīvaraṃ kāreti . so katacīvaro paccessaṃ paccessanti bahiddhā
kaṭhinuddhāraṃ vītināmeti. Tassa bhikkhuno sīmātikkantiko kaṭhinuddhāro.
{125.4} Bhikkhu atthatakaṭhino phāsuvihāriko cīvaraṃ ādāya
pakkamati amukaṃ nāma āvāsaṃ gamissāmi tattha ce me phāsu bhavissati
vasissāmi no ce me phāsu bhavissati amukaṃ nāma āvāsaṃ gamissāmi
tattha ce me phāsu bhavissati vasissāmi no ce me phāsu bhavissati
amukaṃ nāma āvāsaṃ gamissāmi tattha ce me phāsu bhavissati
vasissāmi no ce me phāsu bhavissati paccessanti . so
bahisīmagato taṃ cīvaraṃ kāreti . so katacīvaro paccessaṃ paccessanti
sambhuṇāti kaṭhinuddhāraṃ. Tassa bhikkhuno saha bhikkhūhi kaṭhinuddhāro.
Phāsuvihārapañcakaṃ niṭṭhitaṃ.
[126] Dveme bhikkhave kaṭhinassa palibodhā dve apalibodhā.
Katame ca bhikkhave dve kaṭhinassa palibodhā . āvāsapalibodho
ca cīvarapalibodho ca . kathañca bhikkhave āvāsapalibodho hoti .
Idha bhikkhave bhikkhu vasati vā tasmiṃ āvāse sāpekkho 1- vā
pakkamati paccessanti . evaṃ kho bhikkhave āvāsapalibodho
hoti . kathañca bhikkhave cīvarapalibodho hoti . idha [2]- bhikkhave
bhikkhuno cīvaraṃ akataṃ vā hoti vippakataṃ vā cīvarāsā vā
anupacchinnā . evaṃ kho bhikkhave cīvarapalibodho hoti . ime
kho bhikkhave dve kaṭhinassa palibodhā.
{126.1} Katame ca bhikkhave dve kaṭhinassa apalibodhā .
Āvāsāpalibodho ca cīvarāpalibodho ca . kathañca bhikkhave
āvāsāpalibodho hoti . idha bhikkhave bhikkhu pakkamati tamhā
āvāsā cattena vantena muttena anapekkhena na paccessanti .
Evaṃ kho bhikkhave āvāsāpalibodho hoti . kathañca bhikkhave
cīvarāpalibodho hoti . idha bhikkhave bhikkhuno cīvaraṃ kataṃ vā hoti
naṭṭhaṃ vā vinaṭṭhaṃ vā daḍḍhaṃ vā cīvarāsā vā uppacchinnā .
Evaṃ kho bhikkhave cīvarāpalibodho hoti . ime kho bhikkhave dve
kaṭhinassa apalibodhāti.
Kaṭhinakkhandhakaṃ niṭṭhitaṃ sattamaṃ.
@Footnote: 1 Po. Sī. sāpekho. 2 Po. pana.
Imamhi khandhake vatthū doḷasa 1- peyyālamukhāni ekaṃ sataṃ aṭṭhārasa 2-.
----------
Tassuddānaṃ.
[127] Tiṃsa pāṭheyyakā 3- bhikkhū sāketukkaṇṭhitā vasuṃ
vassaṃ vutthokapuṇṇehi āgamuṃ jinadassanaṃ
idaṃ vatthu 4- kaṭhinassa kappissanti ca pañcakā
anāmantā asamācārā 5- tatheva gaṇabhojanaṃ
yāvadatthañca uppādo atthatānaṃ bhavissati.
Ñatti evatthatañceva evañceva anatthataṃ
ullikhi dhovanā ceva vicāraṇañca chedanaṃ
bandhanovaṭṭikaṇḍūsa- 6- daḷhikammānuvātikā
paribhaṇḍaṃ ovaṭṭeyyaṃ maddanā nimittakathā
kukku sannidhi nissaggi nakappaññatra te tayo
aññatra pañcātireke sañchinnena samaṇḍalī
nāññatra 7- puggalā sammā nissīmaṭṭhonumodati
kaṭhinaṃ anatthataṃ 8- hoti evaṃ buddhena desitaṃ
ahatakappapiloti- paṃsupāpaṇikāya ca
animittāparikathā akukku asannidhi ca
anissaggi kappakate tathā ticīvarena ca
pañcake vātireke vā chinne samaṇḍalīkate
@Footnote: 1 Po. soḷasa. 2 Po. aṭṭhārasanayāni. 3 Po. pāveyyakā. 4 Po. Ma. Yu.
@vatthuṃ. 5 Po. samādattā. 6 Po. Ma. Yu. -kaṇḍūka. 7 Po. aññattara.
@8 Po. atthataṃ.
Puggalassattharā sammā sīmaṭṭho anumodati
evaṃ kaṭhinattharaṇaṃ ubbhārassaṭṭhamātikā
pakkamananti naṭṭhānaṃ sanniṭṭhānañca nāsanaṃ
savanaṃ āsāvacchedi sīmāsaubbharaṭṭhamī 1-
katacīvaramādāya na paccessanti gacchati
tassa taṃ kaṭhinuddhāro hoti pakkamanantiko
ādāya cīvaraṃ yāti nissīme idha cintayi
kāressaṃ na paccessanti niṭṭhāne kaṭhinuddharo 2-.
Ādāya nissīmaṃ neva na paccessanti mānaso
tassa taṃ kaṭhinuddhāro sanniṭṭhānantiko bhave
ādāya cīvaraṃ yāti nissīme idha cintayi
kāressaṃ na paccessanti kayirantassa nassati
tassa taṃ kaṭhinuddhāro bhavati nāsanantiko
ādāya yāti paccessaṃ bahi kāreti cīvaraṃ
katacīvaro 3- suṇāti ubbhataṃ kaṭhinaṃ tahiṃ
tassa taṃ kaṭhinuddhāro bhavati savanantiko
ādāya yāti paccessaṃ bahi kāreti cīvaraṃ
katacīvaro bahiddhā nāmeti kaṭhinuddharaṃ
tassa taṃ kaṭhinuddhāro sīmātikkantiko bhave
ādāya yāti paccessaṃ bahi kāreti cīvaraṃ
@Footnote: 1 Po. Ma. sīmassaubbharaṭṭhamī. 2 Po. Ma. Yu. kaṭhinuddhāro. 3 Po. Yu. cīvarakato.
@Ma. cīvaraṃkato.
Katacīvaro paccessaṃ sambhoti kaṭhinuddharaṃ 1-
tassa taṃ kaṭhinuddhāro saha bhikkhūhi jāyati
ādāya ca samādāya 2- satta satta vidhī bhave 3-
pakkamanantikā natthi chakke vippakate 4- gati
ādāya nissīmagataṃ kāressaṃ iti jāyati
niṭṭhānaṃ sanniṭṭhānañca nāsanañca ime tayo
ādāya na paccessanti bahisīme karomiti
niṭṭhānaṃ sanniṭṭhānampi nāsanampi idantayo
anadhiṭṭhitena nevassa heṭṭhā tīṇi nayā vidhī
ādāya yāti paccessaṃ bahisīme 5- karomiti
na paccessanti kāreti niṭṭhāne kaṭhinuddharo
sanniṭṭhānaṃ nāsanañca savanaṃ sīmatikkamā
saha bhikkhūhi jāyetha evaṃ paṇṇarasaṃ gati
samādāya vippakatā samādāya punā tathā
ime te caturo vārā sabbe paṇṇarasā vidhī
anāsāya ca āsāya karaṇīyo ca te tayo
nayato taṃ vijāneyya tayo dvādasa dvādasa
apavilāyamāneva 6- phāsu pañcavidhī 7- tahiṃ
palibodhāpalibodhā uddānaṃ nayato katanti.
@Footnote: 1 Po. Ma. Yu. kaṭhinuddhāraṃ. 2 Ma. Yu. ādāya samādāya ca. 3 Ma. Yu. gati. 4 Yu.
@chaccā vippakatā. 5 Po. Ma. Yu. bahisīmaṃ. 6 Po. apavinayamāneva. Ma. apavilānā
@na vettha. Yu. apacinanā na vettha. 7 Ma. pañcavidhā.
The Pali Tipitaka in Roman Character Volume 5 page 135-167.
http://84000.org/tipitaka/read/roman_item_s.php?book=5&item=95&items=33
Classified by [Item Number] :-
http://84000.org/tipitaka/read/roman_item_s.php?book=5&item=95&items=33&mode=bracket
Compare with The Pali Tipitaka in Thai Character :-
http://84000.org/tipitaka/read/pali_item_s.php?book=5&item=95&items=33
Compare with The Royal Version of Thai Tipitaka :-
http://84000.org/tipitaka/read/byitem_s.php?book=5&item=95&items=33
Study Atthakatha :-
http://84000.org/tipitaka/attha/attha.php?b=5&i=95
The Pali Atthakatha in Thai :-
http://84000.org/tipitaka/atthapali/read_th.php?B=3&A=4277
The Pali Atthakatha in Roman :-
http://84000.org/tipitaka/atthapali/read_rm.php?B=3&A=4277
Contents of The Tipitaka Volume 5
http://84000.org/tipitaka/read/?index_5
บันทึก ๑๔ พฤศจิกายน พ.ศ. ๒๕๖๐.
การแสดงผลนี้อ้างอิงข้อมูลจากพระไตรปิฎกฉบับภาษาบาลี อักษรโรมัน.
หากพบข้อผิดพลาด กรุณาแจ้งได้ที่ [email protected]
