paliTIPITAKA Volume 15 - Sutta Pitaka 7

Tatiyaṃ dhajaggasuttaṃ [863] Ekaṃ samayaṃ bhagavā sāvatthiyaṃ viharati jetavane anāthapiṇḍikassa ārāme . tatra kho bhagavā bhikkhū āmantesi Bhikkhavoti. Bhadanteti te bhikkhū bhagavato paccassosuṃ. [864] Bhagavā etadavoca bhūtapubbaṃ bhikkhave devāsurasaṅgāmo samupabyūḷho ahosi . atha kho bhikkhave sakko devānamindo deve tāvatiṃse āmantesi sace mārisā devānaṃ saṅgāmagatānaṃ uppajjeyya bhayaṃ vā chambhitattaṃ vā lomahaṃso vā mameva tasmiṃ samaye dhajaggaṃ ullokeyyātha . mamañhi vo dhajaggaṃ ullokayataṃ yambhavissati bhayaṃ vā chambhitattaṃ vā lomahaṃso vā so pahīyissati . No ce me dhajaggaṃ ullokeyyātha atha pajāpatissa devarājassa dhajaggaṃ ullokeyyātha . pajāpatissa hi vo devarājassa dhajaggaṃ ullokayataṃ yambhavissati bhayaṃ vā chambhitattaṃ vā lomahaṃso vā so pahīyissati. {864.1} No ce pajāpatissa devarājassa dhajaggaṃ ullokeyyātha atha varuṇassa devarājassa dhajaggaṃ ullokeyyātha . varuṇassa hi vo devarājassa dhajaggaṃ ullokayataṃ yambhavissati bhayaṃ vā chambhitattaṃ vā lomahaṃso vā so pahīyissati . no ce varuṇassa devarājassa dhajaggaṃ ullokeyyātha atha īsānassa devarājassa dhajaggaṃ ullokeyyātha . Īsānassa hi vo devarājassa dhajaggaṃ ullokayataṃ yambhavissati bhayaṃ vā chambhitattaṃ vā lomahaṃso vā so pahīyissatīti . taṃ kho pana bhikkhave sakkassa vā devānamindassa dhajaggaṃ ullokayataṃ pajāpatissa vā devarājassa dhajaggaṃ ullokayataṃ varuṇassa vā devarājassa dhajaggaṃ ullokayataṃ īsānassa vā devarājassa dhajaggaṃ ullokayataṃ Yambhavissati bhayaṃ vā chambhitattaṃ vā lomahaṃso vā so pahīyethāpi nopi pahīyetha taṃ kissa hetu sakko hi bhikkhave devānamindo avītarāgo avītadoso avītamoho bhīru chambhī utrāsī palāyīti. [865] Ahañca kho bhikkhave evaṃ vadāmi sace tumhākaṃ bhikkhave araññagatānaṃ vā rukkhamūlagatānaṃ vā suññāgāragatānaṃ vā uppajjeyya bhayaṃ vā chambhitattaṃ vā lomahaṃso vā mameva tasmiṃ samaye anussareyyātha itipi so bhagavā arahaṃ sammāsambuddho vijjācaraṇasampanno sugato lokavidū anuttaro purisadammasārathi satthā devamanussānaṃ buddho bhagavāti . mamaṃ hi vo bhikkhave anussarataṃ yambhavissati bhayaṃ vā chambhitattaṃ vā lomahaṃso vā so pahīyissati . no ce maṃ anussareyyātha atha dhammaṃ anussareyyātha svākkhāto bhagavatā dhammo sandiṭṭhiko akāliko ehipassiko opanayiko paccattaṃ veditabbo viññūhīti . dhammaṃ hi vo bhikkhave anussarataṃ yambhavissati bhayaṃ vā chambhitattaṃ vā lomahaṃso vā so pahīyissati . no ce dhammaṃ anussareyyātha atha saṅghaṃ anussareyyātha supaṭipanno bhagavato sāvakasaṅgho ujupaṭipanno bhagavato sāvakasaṅgho ñāyapaṭipanno bhagavato sāvakasaṅgho sāmīcipaṭipanno bhagavato sāvakasaṅgho yadidaṃ cattāri purisayugāni aṭṭha purisapuggalā esa bhagavato sāvakasaṅgho āhuneyyo pāhuneyyo dakkhiṇeyyo añjalikaraṇīyo anuttaraṃ puññakkhettaṃ lokassāti . saṅghaṃ hi vo bhikkhave Anussarataṃ yambhavissati bhayaṃ vā chambhitattaṃ vā lomahaṃso vā so pahīyissati taṃ kissa hetu tathāgato hi bhikkhave arahaṃ sammāsambuddho vītarāgo vītadoso vītamoho abhīru acchambhī anuttarāsī apalāyīti. [866] Idamavoca bhagavā idaṃ vatvāna sugato athāparaṃ etadavoca satthā araññe rukkhamūle vā suññāgāreva bhikkhavo anussaretha sambuddhaṃ bhayaṃ tumhāka no siyā no ce buddhaṃ sareyyātha lokajeṭṭhaṃ narāsabhaṃ atha dhammaṃ sareyyātha niyyānikaṃ sudesitaṃ no ce dhammaṃ sareyyātha niyyānikaṃ sudesitaṃ atha saṅghaṃ sareyyātha puññakkhettaṃ anuttaraṃ evaṃ buddhaṃ sarantānaṃ dhammaṃ saṅghañca bhikkhavo bhayaṃ vā chambhitattaṃ vā lomahaṃso na hessatīti.

The Pali Tipitaka in Roman Character Volume 15 page 320-323. http://84000.org/tipitaka/pitaka_item/roman_item_s.php?book=15&item=863&items=4 Classified by [Item Number] :- http://84000.org/tipitaka/pitaka_item/roman_item_s.php?book=15&item=863&items=4&mode=bracket Compare with The Pali Tipitaka in Thai Character :- http://84000.org/tipitaka/read/pali_item_s.php?book=15&item=863&items=4 Compare with The Royal Version of Thai Tipitaka :- http://84000.org/tipitaka/read/byitem_s.php?book=15&item=863&items=4 Study Atthakatha :- http://84000.org/tipitaka/attha/attha.php?b=15&i=863 The Pali Atthakatha in Thai :- http://84000.org/tipitaka/atthapali/read_th.php?B=11&A=8360 The Pali Atthakatha in Roman :- http://84000.org/tipitaka/atthapali/read_rm.php?B=11&A=8360 Contents of The Tipitaka Volume 15 http://84000.org/tipitaka/read/?index_15