พระไตรปิฎกเล่มที่ ๖ ภาษาบาลี อักษรไทย
พระวินัยปิฎกเล่มที่ ๖ วินย. จุลฺลวคฺโค (๑)

     [๑๗๔]   เตน สมเยน พุทฺโธ ภควา โกสมฺพิยํ วิหรติ โฆสิตาราเม ฯ
เตน   โข   ปน   สมเยน   อายสฺมา   ฉนฺโน   อาปตฺตึ  อาปชฺชิตฺวา
น   อิจฺฉติ  อาปตฺตึ  ปสฺสิตุํ  ฯ  เย  เต  ภิกฺขู  อปฺปิจฺฉา  ฯเปฯ  เต
อุชฺฌายนฺติ   ขียนฺติ   วิปาเจนฺติ   กถํ   หิ   นาม   อายสฺมา   ฉนฺโน
อาปตฺตึ    อาปชฺชิตฺวา    น    อิจฺฉิสฺสติ    อาปตฺตึ    ปสฺสิตุนฺติ   ฯ
อถ โข เต ภิกฺขู ภควโต เอตมตฺถํ อาโรเจสุํ ฯ
     [๑๗๕]   อถโข  ภควา  เอตสฺมึ  นิทาเน เอตสฺมึ ปกรเณ ภิกฺขุสงฺฆํ
สนฺนิปาตาเปตฺวา    ภิกฺขู    ปฏิปุจฺฉิ    สจฺจํ   กิร   ภิกฺขเว   ฉนฺโน
ภิกฺขุ   อาปตฺตึ   อาปชฺชิตฺวา   น  อิจฺฉติ  อาปตฺตึ  ปสฺสิตุนฺติ  ฯ  สจฺจํ
ภควาติ   ฯ   วิครหิ   พุทฺโธ   ภควา   อนนุจฺฉวิกํ   ฯเปฯ   กถํ  หิ
นาม   โส   ภิกฺขเว   โมฆปุริโส   อาปตฺตึ  อาปชฺชิตฺวา  น  อิจฺฉิสฺสติ
อาปตฺตึ   ปสฺสิตุํ   เนตํ   ภิกฺขเว   อปฺปสนฺนานํ  วา  ปสาทาย  ฯเปฯ
วิครหิตฺวา   ฯเปฯ   ธมฺมึ   กถํ   กตฺวา   ภิกฺขู   อามนฺเตสิ   เตนหิ
ภิกฺขเว   สงฺโฆ  ฉนฺนสฺส  ภิกฺขุโน  อาปตฺติยา  อทสฺสเน  อุกฺเขปนียกมฺมํ
กโรตุ   อสมฺโภคํ   สงฺเฆน   ฯ   เอวญฺจ   ปน  ภิกฺขเว  กาตพฺพํ  ฯ
ปฐมํ   ฉนฺโน   ภิกฺขุ   โจเทตพฺโพ  โจเทตฺวา  สาเรตพฺโพ  สาเรตฺวา
อาปตฺติ   อาโรเปตพฺพา   อาปตฺตึ   อาโรเปตฺวา   พฺยตฺเตน   ภิกฺขุนา
ปฏิพเลน สงฺโฆ ญาเปตพฺโพ
     {๑๗๕.๑}   สุณาตุ  เม  ภนฺเต  สงฺโฆ  อยํ  ฉนฺโน  ภิกฺขุ อาปตฺตึ
อาปชฺชิตฺวา   น   อิจฺฉติ   อาปตฺตึ  ปสฺสิตุํ  ฯ  ยทิ  สงฺฆสฺส  ปตฺตกลฺลํ
สงฺโฆ    ฉนฺนสฺส    ภิกฺขุโน    อาปตฺติยา   อทสฺสเน   อุกฺเขปนียกมฺมํ
กเรยฺย อสมฺโภคํ สงฺเฆน ฯ เอสา ญตฺติ ฯ
     {๑๗๕.๒}   สุณาตุ  เม  ภนฺเต  สงฺโฆ  อยํ  ฉนฺโน  ภิกฺขุ อาปตฺตึ
อาปชฺชิตฺวา   น   อิจฺฉติ  อาปตฺตึ  ปสฺสิตุํ  ฯ  สงฺโฆ  ฉนฺนสฺส  ภิกฺขุโน
อาปตฺติยา   อทสฺสเน   อุกฺเขปนียกมฺมํ   กโรติ   อสมฺโภคํ  สงฺเฆน  ฯ
ยสฺสายสฺมโต    ขมติ    ฉนฺนสฺส    ภิกฺขุโน    อาปตฺติยา    อทสฺสเน
อุกฺเขปนียกมฺมสฺส    กรณํ   อสมฺโภคํ   สงฺเฆน   โส   ตุณฺหสฺส   ยสฺส
นกฺขมติ โส ภาเสยฺย ฯ
     {๑๗๕.๓}   ทุติยมฺปิ      เอตมตฺถํ      วทามิ      ฯเปฯ
ตติยมฺปิ  เอตมตฺถํ  ๑-  วทามิ  ฯ  สุณาตุ  เม  ภนฺเต สงฺโฆ อยํ ฉนฺโน
ภิกฺขุ   อาปตฺตึ   อาปชฺชิตฺวา   น   อิจฺฉติ  อาปตฺตึ  ปสฺสิตุํ  ฯ  สงฺโฆ
ฉนฺนสฺส    ภิกฺขุโน    อาปตฺติยา    อทสฺสเน   อุกฺเขปนียกมฺมํ   กโรติ
อสมฺโภคํ    สงฺเฆน    ฯ    ยสฺสายสฺมโต   ขมติ   ฉนฺนสฺส   ภิกฺขุโน
อาปตฺติยา    อทสฺสเน   อุกฺเขปนียกมฺมสฺส   กรณํ   อสมฺโภคํ   สงฺเฆน
โส ตุณฺหสฺส ยสฺส นกฺขมติ โส ภาเสยฺย ฯ
     {๑๗๕.๔}   กตํ  สงฺเฆน  ฉนฺนสฺส  ภิกฺขุโน  อาปตฺติยา  อทสฺสเน
อุกฺเขปนียกมฺมํ   อสมฺโภคํ   สงฺเฆน   ขมติ   สงฺฆสฺส  ตสฺมา  ตุณฺหี  ฯ
เอวเมตํ ธารยามีติ ฯ
     {๑๗๕.๕}   อาวาสปรมฺปรญฺจ  ภิกฺขเว สํสถ ฉนฺโน ภิกฺขุ สงฺเฆน ๑-
อาปตฺติยา อทสฺสเน อุกฺเขปนียกมฺมกโต อสมฺโภคํ สงฺเฆนาติ ฯ
     [๑๗๖]   ตีหิ  ภิกฺขเว  องฺเคหิ  สมนฺนาคตํ  อาปตฺติยา  อทสฺสเน
อุกฺเขปนียกมฺมํ    อธมฺมกมฺมญฺเจว    โหติ   อวินยกมฺมญฺจ   ทุวูปสนฺตญฺจ
อสมฺมุขา   กตํ   โหติ  อปฺปฏิปุจฺฉา  กตํ  โหติ  อปฺปฏิญฺญาย  กตํ  โหติ
อิเมหิ   โข   ภิกฺขเว   ตีหงฺเคหิ   สมนฺนาคตํ   อาปตฺติยา   อทสฺสเน
อุกฺเขปนียกมฺมํ อธมฺมกมฺมญฺเจว โหติ อวินยกมฺมญฺจ ทุวูปสนฺตญฺจ ฯ
     [๑๗๗]   อปเรหิปิ   ภิกฺขเว   ตีหงฺเคหิ   สมนฺนาคตํ  อาปตฺติยา
อทสฺสเน    อุกฺเขปนียกมฺมํ    อธมฺมกมฺมญฺเจว    โหติ    อวินยกมฺมญฺจ
ทุวูปสนฺตญฺจ   อนาปตฺติยา   กตํ   โหติ   อเทสนาคามินิยา   อาปตฺติยา
@เชิงอรรถ: ๑ ม. ยุ. อยํ ปาโฐ น ทิสฺสติ ฯ
กตํ โหติ เทสิตาย อาปตฺติยา กตํ โหติ ฯเปฯ
     [๑๗๘]   อปเรหิปิ   ฯเปฯ  อโจเทตฺวา  กตํ  โหติ  อสาเรตฺวา
กตํ โหติ อาปตฺตึ อนาโรเปตฺวา กตํ โหติ ฯเปฯ
     [๑๗๙]   อปเรหิปิ   ฯเปฯ   อสมฺมุขา   กตํ   โหติ   อธมฺเมน
กตํ โหติ วคฺเคน กตํ โหติ ฯเปฯ
     [๑๘๐]   อปเรหิปิ   ฯเปฯ   อปฺปฏิปุจฺฉา   กตํ  โหติ  อธมฺเมน
กตํ โหติ วคฺเคน กตํ โหติ อิเมหิ โข ภิกฺขเว ฯเปฯ
     [๑๘๑]   อปเรหิปิ  ภิกฺขเว  ตีหงฺเคหิ สมนฺนาคตํ ฯเปฯ อปฺปฏิญฺญาย
กตํ โหติ อธมฺเมน กตํ โหติ วคฺเคน กตํ โหติ ฯเปฯ
     [๑๘๒]   อปเรหิปิ   ฯเปฯ   อนาปตฺติยา   กตํ  โหติ  อธมฺเมน
กตํ โหติ วคฺเคน กตํ โหติ ฯเปฯ
     [๑๘๓]   อปเรหิปิ   ฯเปฯ   อเทสนาคามินิยา   อาปตฺติยา  กตํ
โหติ อธมฺเมน กตํ โหติ วคฺเคน กตํ โหติ ฯเปฯ
     [๑๘๔]   อปเรหิปิ   ฯเปฯ   เทสิตาย   อาปตฺติยา   กตํ  โหติ
อธมฺเมน กตํ โหติ วคฺเคน กตํ โหติ ฯเปฯ
     [๑๘๕]   อปเรหิปิ   ฯเปฯ   อโจเทตฺวา   กตํ  โหติ  อธมฺเมน
กตํ โหติ วคฺเคน กตํ โหติ ฯเปฯ
     [๑๘๖]   อปเรหิปิ   ฯเปฯ   อสาเรตฺวา   กตํ  โหติ  อธมฺเมน
กตํ โหติ วคฺเคน กตํ โหติ ฯเปฯ
     [๑๘๗]   อปเรหิปิ   ฯเปฯ   อาปตฺตึ  อนาโรเปตฺวา  กตํ  โหติ
อธมฺเมน   กตํ   โหติ   วคฺเคน   กตํ   โหติ   อิเมหิ   โข  ภิกฺขเว
ตีหงฺเคหิ     สมนฺนาคตํ     อาปตฺติยา     อทสฺสเน    อุกฺเขปนียกมฺมํ
อธมฺมกมฺมญฺเจว      โหติ      อวินยกมฺมญฺจ      ทุวูปสนฺตญฺจ     ฯ
อาปตฺติยา อทสฺสเน อุกฺเขปนียกมฺเม อธมฺมกมฺมทฺวาทสกํ นิฏฺฐิตํ ฯ
     [๑๘๘]   ตีหิ  ภิกฺขเว  องฺเคหิ  สมนฺนาคตํ  อาปตฺติยา  อทสฺสเน
อุกฺเขปนียกมฺมํ    ธมฺมกมฺมญฺเจว    โหติ    วินยกมฺมญฺจ    สุวูปสนฺตญฺจ
สมฺมุขา    กตํ    โหติ    ปฏิปุจฺฉา    กตํ    โหติ   ปฏิญฺญาย   กตํ
โหติ    อิเมหิ    โข    ภิกฺขเว   ตีหงฺเคหิ   สมนฺนาคตํ   อาปตฺติยา
อทสฺสเน     อุกฺเขปนียกมฺมํ     ธมฺมกมฺมญฺเจว    โหติ    วินยกมฺมญฺจ
สุวูปสนฺตญฺจ ฯ
     [๑๘๙]   อปเรหิปิ   ภิกฺขเว   ตีหงฺเคหิ   สมนฺนาคตํ  อาปตฺติยา
อทสฺสเน     อุกฺเขปนียกมฺมํ     ธมฺมกมฺมญฺเจว    โหติ    วินยกมฺมญฺจ
สุวูปสนฺตญฺจ    อาปตฺติยา    กตํ   โหติ   เทสนาคามินิยา   อาปตฺติยา
กตํ โหติ อเทสิตาย อาปตฺติยา กตํ โหติ ฯเปฯ
     [๑๙๐]   อปเรหิปิ   ฯเปฯ   โจเทตฺวา   กตํ  โหติ  สาเรตฺวา
กตํ โหติ  อาปตฺตึ อาโรเปตฺวา กตํ โหติ ฯเปฯ
     [๑๙๑]   อปเรหิปิ   ฯเปฯ   สมฺมุขา   กตํ  โหติ  ธมฺเมน  กตํ
โหติ สมคฺเคน กตํ โหติ ฯเปฯ
     [๑๙๒]   อปเรหิปิ   ฯเปฯ   ปฏิปุจฺฉา  กตํ  โหติ  ธมฺเมน  กตํ
โหติ สมคฺเคน กตํ โหติ ฯเปฯ
     [๑๙๓]   อปเรหิปิ   ฯเปฯ   ปฏิญฺญาย   กตํ   โหติ   ธมฺเมน
กตํ โหติ สมคฺเคน กตํ โหติ ฯเปฯ
     [๑๙๔]   อปเรหิปิ  ฯเปฯ  อาปตฺติยา  กตํ  โหติ   ธมฺเมน  กตํ
โหติ สมคฺเคน กตํ โหติ ฯเปฯ
     [๑๙๕]   อปเรหิปิ  ฯเปฯ  เทสนาคามินิยา  อาปตฺติยา  กตํ  โหติ
ธมฺเมน กตํ โหติ สมคฺเคน กตํ โหติ ฯเปฯ
     [๑๙๖]   อปเรหิปิ   ฯเปฯ   อเทสิตาย   อาปตฺติยา  กตํ  โหติ
ธมฺเมน กตํ โหติ สมคฺเคน กตํ โหติ ฯเปฯ
     [๑๙๗]   อปเรหิปิ   ฯเปฯ  โจเทตฺวา  กตํ  โหติ  ธมฺเมน  กตํ
โหติ สมคฺเคน กตํ โหติ ฯเปฯ
     [๑๙๘]   อปเรหิปิ   ฯเปฯ  สาเรตฺวา  กตํ  โหติ  ธมฺเมน  กตํ
โหติ สมคฺเคน กตํ โหติ ฯเปฯ
     [๑๙๙]   อปเรหิปิ   ฯเปฯ   อาปตฺตึ   อาโรเปตฺวา  กตํ  โหติ
ธมฺเมน   กตํ   โหติ   สมคฺเคน   กตํ   โหติ   อิเมหิ   โข  ภิกฺขเว
ตีหงฺเคหิ     สมนฺนาคตํ     อาปตฺติยา     อทสฺสเน    อุกฺเขปนียกมฺมํ
ธมฺมกมฺมญฺเจว       โหติ      วินยกมฺมญฺจ      สุวูปสนฺตญฺจ      ฯ
อาปตฺติยา อทสฺสเน อุกฺเขปนียกมฺเม ธมฺมกมฺมทฺวาทสกํ นิฏฺฐิตํ ฯ
     [๒๐๐]   ตีหิ  ภิกฺขเว  องฺเคหิ  สมนฺนาคตสฺส ภิกฺขุโน อากงฺขมาโน
สงฺโฆ   อาปตฺติยา   อทสฺสเน   อุกฺเขปนียกมฺมํ   กเรยฺย  ภณฺฑนการโก
โหติ      กลหการโก      วิวาทการโก      ภสฺสการโก     สงฺเฆ
อธิกรณการโก    พาโล   โหติ   อพฺยตฺโต   อาปตฺติพหุโล   อนปทาโน
คิหิสํสฏฺโฐ   วิหรติ   อนนุโลมิเกหิ   คิหิสํสคฺเคหิ   อิเมหิ  โข  ภิกฺขเว
ตีหงฺเคหิ   สมนฺนาคตสฺส   ภิกฺขุโน   อากงฺขมาโน   สงฺโฆ   อาปตฺติยา
อทสฺสเน อุกฺเขปนียกมฺมํ กเรยฺย ฯ
     [๒๐๑]   อปเรหิปิ   ภิกฺขเว   ตีหงฺเคหิ   สมนฺนาคตสฺส  ภิกฺขุโน
อากงฺขมาโน   สงฺโฆ   อาปตฺติยา   อทสฺสเน   อุกฺเขปนียกมฺมํ  กเรยฺย
อธิสีเล    สีลวิปนฺโน    โหติ    อชฺฌาจาเร    อาจารวิปนฺโน   โหติ
อติทิฏฺฐิยา    ทิฏฺฐิวิปนฺโน    โหติ   อิเมหิ   โข   ภิกฺขเว   ตีหงฺเคหิ
สมนฺนาคตสฺส   ภิกฺขุโน   อากงฺขมาโน   สงฺโฆ   อาปตฺติยา   อทสฺสเน
อุกฺเขปนียกมฺมํ กเรยฺย ฯ
     [๒๐๒]   อปเรหิปิ   ภิกฺขเว   ตีหงฺเคหิ   สมนฺนาคตสฺส  ภิกฺขุโน
อากงฺขมาโน   สงฺโฆ   อาปตฺติยา   อทสฺสเน   อุกฺเขปนียกมฺมํ  กเรยฺย
พุทฺธสฺส    อวณฺณํ    ภาสติ    ธมฺมสฺส    อวณฺณํ    ภาสติ    สงฺฆสฺส
อวณฺณํ    ภาสติ    อิเมหิ    โข   ภิกฺขเว   ตีหงฺเคหิ   สมนฺนาคตสฺส
ภิกฺขุโน   อากงฺขมาโน   สงฺโฆ   อาปตฺติยา   อทสฺสเน  อุกฺเขปนียกมฺมํ
กเรยฺย ฯ
     [๒๐๓]   ติณฺณํ  ภิกฺขเว  ภิกฺขูนํ  อากงฺขมาโน  สงฺโฆ  อาปตฺติยา
อทสฺสเน   อุกฺเขปนียกมฺมํ   กเรยฺย  เอโก  ภณฺฑนการโก  โหติ  ฯเปฯ
สงฺเฆ     อธิกรณการโก     เอโก     พาโล     โหติ    อพฺยตฺโต
อาปตฺติพหุโล   อนปทาโน   เอโก   คิหิสํสฏฺโฐ   วิหรติ   อนนุโลมิเกหิ
คิหิสํสคฺเคหิ    อิเมสํ    โข   ภิกฺขเว   ติณฺณํ   ภิกฺขูนํ   อากงฺขมาโน
สงฺโฆ อาปตฺติยา อทสฺสเน อุกฺเขปนียกมฺมํ กเรยฺย ฯ
     [๒๐๔]   อปเรสมฺปิ  ภิกฺขเว  ติณฺณํ  ภิกฺขูนํ  อากงฺขมาโน  สงฺโฆ
อาปตฺติยา    อทสฺสเน    อุกฺเขปนียกมฺมํ    กเรยฺย   เอโก   อธิสีเล
สีลวิปนฺโน   โหติ   เอโก   อชฺฌาจาเร   อาจารวิปนฺโน  โหติ  เอโก
อติทิฏฺฐิยา   ทิฏฺฐิวิปนฺโน   โหติ   อิเมสํ   โข   ภิกฺขเว  ติณฺณํ  ภิกฺขูนํ
อากงฺขมาโน สงฺโฆ อาปตฺติยา อทสฺสเน อุกฺเขปนียกมฺมํ กเรยฺย ฯ
     [๒๐๕]   อปเรสมฺปิ  ภิกฺขเว  ติณฺณํ  ภิกฺขูนํ  อากงฺขมาโน  สงฺโฆ
อาปตฺติยา    อทสฺสเน    อุกฺเขปนียกมฺมํ    กเรยฺย   เอโก   พุทฺธสฺส
อวณฺณํ   ภาสติ   เอโก   ธมฺมสฺส   อวณฺณํ   ภาสติ   เอโก   สงฺฆสฺส
อวณฺณํ   ภาสติ   อิเมสํ   โข   ภิกฺขเว   ติณฺณํ   ภิกฺขูนํ  อากงฺขมาโน
สงฺโฆ อาปตฺติยา อทสฺสเน อุกฺเขปนียกมฺมํ กเรยฺย ฯ
         อาปตฺติยา อทสฺสเน อุกฺเขปนียกมฺเม อากงฺขมานจฺฉกฺกํ นิฏฺฐิตํ ฯ
     [๒๐๖]   อาปตฺติยา  อทสฺสเน  อุกฺเขปนียกมฺมกเตน ภิกฺขเว ภิกฺขุนา
สมฺมา   วตฺติตพฺพํ   ฯ   ตตฺรายํ   สมฺมาวตฺตนา   น   อุปสมฺปาเทตพฺพํ
น    นิสฺสโย    ทาตพฺโพ    น    สามเณโร    อุปฏฺฐาเปตพฺโพ   น
ภิกฺขุโนวาทกสมฺมติ      สาทิตพฺพา     สมฺมเตนปิ     ภิกฺขุนิโย     น
โอวทิตพฺพา    ยาย    อาปตฺติยา    สงฺเฆน    อาปตฺติยา   อทสฺสเน
อุกฺเขปนียกมฺมํ   กตํ  โหติ  สา  อาปตฺติ  น  อาปชฺชิตพฺพา  อญฺญา  วา
ตาทิสิกา   ตโต   วา   ปาปิฏฺฐตรา   กมฺมํ  น  ครหิตพฺพํ  กมฺมิกา  น
ครหิตพฺพา   น   ปกตตฺตสฺส   ภิกฺขุโน  อภิวาทนํ  ปจฺจุฏฺฐานํ  อญฺชลิกมฺมํ
สามีจิกมฺมํ     อาสนาภิหาโร    เสยฺยาภิหาโร    ปาโททกํ    ปาทปีฐํ
ปาทกถลิกํ     ปตฺตจีวรปฏิคฺคหณํ    นหาเน    ปิฏฺฐิปริกมฺมํ    สาทิตพฺพํ
น   ปกตตฺโต   ภิกฺขุ   สีลวิปตฺติยา   อนุทฺธํสิตพฺโพ  น  อาจารวิปตฺติยา
อนุทฺธํสิตพฺโพ    น   ทิฏฺฐิวิปตฺติยา   อนุทฺธํสิตพฺโพ   น   อาชีววิปตฺติยา
อนุทฺธํสิตพฺโพ   น   ภิกฺขู   ภิกฺขูหิ   เภเทตพฺพา   ๑-   น   คิหิทฺธโช
ธาเรตพฺโพ   น   ติตฺถิยทฺธโช   ธาเรตพฺโพ   น   ติตฺถิยา  เสวิตพฺพา
ภิกฺขู   เสวิตพฺพา   ภิกฺขุสิกฺขา  สิกฺขิตพฺพา  ๒-  น  ปกตตฺเตน  ภิกฺขุนา
สทฺธึ   เอกจฺฉนฺเน   อาวาเส   วตฺถพฺพํ   น   เอกจฺฉนฺเน  อนาวาเส
วตฺถพฺพํ   น   เอกจฺฉนฺเน   อาวาเส   วา   อนาวาเส  วา  วตฺถพฺพํ
ปกตตฺตํ   ภิกฺขุํ   ทิสฺวา   อาสนา   วุฏฺฐาตพฺพํ   น   ปกตตฺโต   ภิกฺขุ
อาสาเทตพฺโพ    อนฺโต   วา   พหิ   วา   น   ปกตตฺตสฺส   ภิกฺขุโน
อุโปสโถ    ฐเปตพฺโพ    น    ปวารณา    ฐเปตพฺพา   น   สวจนียํ
กาตพฺพํ    น   อนุวาโท   ปฏฺฐเปตพฺโพ   น   โอกาโส   กาเรตพฺโพ
น  โจเทตพฺโพ  น  สาเรตพฺโพ  น  ภิกฺขู  ภิกฺขูหิ  สมฺปโยเชตพฺพนฺติ  ฯ
         อาปตฺติยา อทสฺสเน อุกฺเขปนียกมฺเม เตจตฺตาฬีสวตฺตํ นิฏฺฐิตํ ฯ
     [๒๐๗]   อถ  โข  สงฺโฆ  ฉนฺนสฺส  ภิกฺขุโน  อาปตฺติยา  อทสฺสเน
อุกฺเขปนียกมฺมํ   อกาสิ  อสมฺโภคํ  สงฺเฆน  ฯ  โส  สงฺเฆน  อาปตฺติยา
อทสฺสเน    อุกฺเขปนียกมฺมกโต    ตมฺหา    อาวาสา   อญฺญํ   อาวาสํ
อคมาสิ   ตตฺถ  ภิกฺขู  เนว  อภิวาเทสุํ  น   ปจฺจุฏฺเฐสุํ  น  อญฺชลิกมฺมํ
@เชิงอรรถ: ๑ โป. ม. ยุ. น ภิกฺขุ ภิกฺขูหิ เภเทตพฺโพ ฯ    ๒ ม. ยุ. ภิกฺขุสิกฺขาย
@สิกฺขิตพฺพํ ฯ อิโต ปรํ อีทิสเมว ฯ
น  สามีจิกมฺมํ  อกํสุ  น  สกฺกรึสุ  น  ครุกรึสุ ๑- น มาเนสุํ น ปูเชสุํ ฯ
โส   ภิกฺขูหิ   อสกฺกริยมาโน  อครุกริยมาโน  อมานิยมาโน  อปูชิยมาโน
อสกฺการกโต   ๒-   ตมฺหาปิ  อาวาสา  อญฺญํ  อาวาสํ  อคมาสิ  ตตฺถปิ
ภิกฺขู   เนว   อภิวาเทสุํ  น  ปจฺจุฏฺเฐสุํ  น  อญฺชลิกมฺมํ  น  สามีจิกมฺมํ
อกํสุ  น  สกฺกรึสุ  น  ครุกรึสุ  ๑-  น  มาเนสุํ  น ปูเชสุํ ฯ โส ภิกฺขูหิ
อสกฺกริยมาโน  อครุกริยมาโน  อมานิยมาโน อปูชิยมาโน อสกฺการกโต ๒-
ตมฺหาปิ   อาวาสา   อญฺญํ   อาวาสํ   อคมาสิ   ตตฺถปิ   ภิกฺขู   เนว
อภิวาเทสุํ   น   ปจฺจุฏฺเฐสุํ   น   อญฺชลิกมฺมํ   น   สามีจิกมฺมํ   อกํสุ
น สกฺกรึสุ น ครุกรึสุ ๑- น มาเนสุํ น ปูเชสุํ ฯ
     {๒๐๗.๑}   โส  ภิกฺขูหิ  อสกฺกริยมาโน อครุกริยมาโน อมานิยมาโน
อปูชิยมาโน   อสกฺการกโต   ๒-   ปุนเทว   โกสมฺพึ   ปจฺจาคจฺฉิ  โส
สมฺมา   วตฺตติ   โลมํ   ปาเตติ  เนตฺถารํ  วตฺตติ  ภิกฺขู  อุปสงฺกมิตฺวา
เอวํ    วเทติ    อหํ    อาวุโส    สงฺเฆน    อาปตฺติยา   อทสฺสเน
อุกฺเขปนียกมฺมกโต    สมฺมา    วตฺตามิ    โลมํ    ปาเตมิ   เนตฺถารํ
วตฺตามิ   กถนฺนุ   โข   มยา   ปฏิปชฺชิตพฺพพนฺติ   ฯ   เต  ๓-  ภิกฺขู
ภควโต   เอตมตฺถํ   อาโรเจสุํ   ฯ   เตนหิ  ภิกฺขเว  สงฺโฆ  ฉนฺนสฺส
ภิกฺขุโน อาปตฺติยา อทสฺสเน อุกฺเขปนียกมฺมํ ปฏิปฺปสฺสมฺเภตุ ฯ
     [๒๐๘]   ปญฺจหิ  ภิกฺขเว  องฺเคหิ  สมนฺนาคตสฺส ภิกฺขุโน อาปตฺติยา
อทสฺสเน     อุกฺเขปนียกมฺมํ    น    ปฏิปฺปสฺสมฺเภตพฺพํ    อุปสมฺปาเทติ
@เชิงอรรถ: ๑ ม. ครุํ. กรึสุ ฯ อิโต ปรํ สพฺพตฺถ ญาตพฺพํ ฯ ๒ ม. ยุ. อสกฺการปกโต ฯ อิโต
@ปรํสพฺพตฺถ ญาตพฺพํ ฯ    ๓ โป. ม. ยุ. เตติ น ทิสฺสติ ฯ
นิสฺสยํ    เทติ   สามเณรํ   อุปฏฺฐาเปติ   ภิกฺขุโนวาทกสมฺมตึ   สาทิยติ
สมฺมโตปิ    ภิกฺขุนิโย   โอวทติ   อิเมหิ   โข   ภิกฺขเว   ปญฺจหงฺเคหิ
สมนฺนาคตสฺส    ภิกฺขุโน    อาปตฺติยา   อทสฺสเน   อุกฺเขปนียกมฺมํ   น
ปฏิปฺปสฺสมฺเภตพฺพํ ฯ
     [๒๐๙]   อปเรหิปิ   ภิกฺขเว  ปญฺจหงฺเคหิ  สมนฺนาคตสฺส  ภิกฺขุโน
อาปตฺติยา    อทสฺสเน   อุกฺเขปนียกมฺมํ   น   ปฏิปฺปสฺสมฺเภตพฺพํ   ยาย
อาปตฺติยา   สงฺเฆน   อาปตฺติยา   อทสฺสเน  อุกฺเขปนียกมฺมํ  กตํ  โหติ
ตํ   อาปตฺตึ   อาปชฺชติ   อญฺญํ   วา   ตาทิสิกํ  ตโต  วา  ปาปิฏฺฐตรํ
กมฺมํ   ครหติ   กมฺมิเก   ครหติ   อิเมหิ   โข   ภิกฺขเว  ปญฺจหงฺเคหิ
สมนฺนาคตสฺส    ภิกฺขุโน    อาปตฺติยา   อทสฺสเน   อุกฺเขปนียกมฺมํ   น
ปฏิปฺปสฺสมฺเภตพฺพํ ฯ
     [๒๑๐]   อปเรหิปิ   ภิกฺขเว  ปญฺจหงฺเคหิ  สมนฺนาคตสฺส  ภิกฺขุโน
อาปตฺติยา     อทสฺสเน     อุกฺเขปนียกมฺมํ     น    ปฏิปฺปสฺสมฺเภตพฺพํ
ปกตตฺตสฺส    ภิกฺขุโน   อภิวาทนํ   ปจฺจุฏฺฐานํ   อญฺชลิกมฺมํ   สามีจิกมฺมํ
อาสนาภิหารํ     สาทิยติ     อิเมหิ    โข    ภิกฺขเว    ปญฺจหงฺเคหิ
สมนฺนาคตสฺส    ภิกฺขุโน    อาปตฺติยา   อทสฺสเน   อุกฺเขปนียกมฺมํ   น
ปฏิปฺปสฺสมฺเภตพฺพํ ฯ
     [๒๑๑]   อปเรหิปิ   ภิกฺขเว  ปญฺจหงฺเคหิ  สมนฺนาคตสฺส  ภิกฺขุโน
อาปตฺติยา     อทสฺสเน     อุกฺเขปนียกมฺมํ     น    ปฏิปฺปสฺสมฺเภตพฺพํ
ปกตตฺตสฺส    ภิกฺขุโน   เสยฺยาภิหารํ   ปาโททกํ   ปาทปีฐํ   ปาทกถลิกํ
ปตฺตจีวรปฏิคฺคหณํ    นหาเน    ปิฏฺฐิปริกมฺมํ    สาทิยติ    อิเมหิ   โข
ภิกฺขเว   ปญฺจหงฺเคหิ   สมนฺนาคตสฺส   ภิกฺขุโน   อาปตฺติยา   อทสฺสเน
อุกฺเขปนียกมฺมํ น ปฏิปฺปสฺสมฺเภตพฺพํ ฯ
     [๒๑๒]   อปเรหิปิ   ภิกฺขเว  ปญฺจหงฺเคหิ  สมนฺนาคตสฺส  ภิกฺขุโน
อาปตฺติยา   อทสฺสเน   อุกฺเขปนียกมฺมํ   น   ปฏิปฺปสฺสมฺเภตพฺพํ  ปกตตฺตํ
ภิกฺขุํ  สีลวิปตฺติยา  อนุทฺธํเสติ  อาจารวิปตฺติยา  อนุทฺธํเสติ  ทิฏฺฐิวิปตฺติยา
อนุทฺธํเสติ     อาชีววิปตฺติยา     อนุทฺธํเสติ    ภิกฺขู    ๑-    ภิกฺขูหิ
เภเทติ   อิเมหิ   โข   ภิกฺขเว   ปญฺจหงฺเคหิ   สมนฺนาคตสฺส  ภิกฺขุโน
อาปตฺติยา อทสฺสเน อุกฺเขปนียกมฺมํ น ปฏิปฺปสฺสมฺเภตพฺพํ ฯ
     [๒๑๓]   อปเรหิปิ   ภิกฺขเว  ปญฺจหงฺเคหิ  สมนฺนาคตสฺส  ภิกฺขุโน
อาปตฺติยา   อทสฺสเน   อุกฺเขปนียกมฺมํ   น   ปฏิปฺปสฺสมฺเภตพฺพํ  คิหิทฺธชํ
ธาเรติ  ติตฺถิยทฺธชํ  ธาเรติ  ติตฺถิเย  เสวติ  ภิกฺขู น เสวติ ภิกฺขุสิกฺขาย
น   สิกฺขติ   อิเมหิ   โข   ภิกฺขเว  ปญฺจงฺเคหิ  สมนฺนาคตสฺส  ภิกฺขุโน
อาปตฺติยา อทสฺสเน อุกฺเขปนียกมฺมํ น ปฏิปฺปสฺสมฺเภตพฺพํ ฯ
     [๒๑๔]   อปเรหิปิ   ภิกฺขเว  ปญฺจหงฺเคหิ  สมนฺนาคตสฺส  ภิกฺขุโน
อาปตฺติยา     อทสฺสเน     อุกฺเขปนียกมฺมํ     น    ปฏิปฺปสฺสมฺเภตพฺพํ
ปกตตฺเตน   ภิกฺขุนา   สทฺธึ   เอกจฺฉนฺเน  อาวาเส  วสติ  เอกจฺฉนฺเน
อนาวาเส   วสติ   เอกจฺฉนฺเน   อาวาเส  วา  อนาวาเส  วา  วสติ
ปกตตฺตํ    ภิกฺขุํ    ทิสฺวา    อาสนา   น   วุฏฺฐาติ   ปกตตฺตํ   ภิกฺขุํ
@เชิงอรรถ: ๑ ม. ยุ. ภิกฺขุํ ฯ อิโต ปรํ อีทิสเมว ฯ
อาสาเทติ   อนฺโต   วา   พหิ  วา  อิเมหิ  โข  ภิกฺขเว  ปญฺจหงฺเคหิ
สมนฺนาคตสฺส    ภิกฺขุโน    อาปตฺติยา   อทสฺสเน   อุกฺเขปนียกมฺมํ   น
ปฏิปฺปสฺสมฺเภตพฺพํ ฯ
     [๒๑๕]   อฏฺฐหิ  ภิกฺขเว  องฺเคหิ  สมนฺนาคตสฺส ภิกฺขุโน อาปตฺติยา
อทสฺสเน   อุกฺเขปนียกมฺมํ   น   ปฏิปฺปสฺสมฺเภตพฺพํ   ปกตตฺตสฺส  ภิกฺขุโน
อุโปสกํ   ฐเปติ   ปวารณํ   ฐเปติ  สวจนียํ  กโรติ  อนุวาทํ  ปฏฺฐเปติ
โอกาสํ  กาเรติ  โจเทติ  สาเรติ  ภิกฺขู  ภิกฺขูหิ  สมฺปโยเชติ อิเมหิ โข
ภิกฺขเว   อฏฺฐหงฺเคหิ   สมนฺนาคตสฺส   ภิกฺขุโน   อาปตฺติยา   อทสฺสเน
อุกฺเขปนียกมฺมํ น ปฏิปฺปสฺสมฺเภตพฺพํ ฯ
     อาปตฺติยา   อทสฺสเน   อุกฺเขปนียกมฺเม   น   ปฏิปฺปสฺสมฺเภตพฺพ-
เตจตฺตาฬีสกํ นิฏฺฐิตํ ฯ
     [๒๑๖]   ปญฺจหิ  ภิกฺขเว  องฺเคหิ  สมนฺนาคตสฺส ภิกฺขุโน อาปตฺติยา
อทสฺสเน     อุกฺเขปนียกมฺมํ    ปฏิปฺปสฺสมฺเภตพฺพํ    น    อุปสมฺปาเทติ
น   นิสฺสยํ   เทติ   น   สามเณรํ  อุปฏฺฐาเปติ  น  ภิกฺขุโนวาทกสมฺมตึ
สาทิยติ   สมฺมโตปิ   ภิกฺขุนิโย   น   โอวทติ   อิเมหิ   โข   ภิกฺขเว
ปญฺจหงฺเคหิ     สมนฺนาคตสฺส     ภิกฺขุโน     อาปตฺติยา     อทสฺสเน
อุกฺเขปนียกมฺมํ ปฏิปฺปสฺสมฺเภตพฺพํ ฯ
     [๒๑๗]   อปเรหิปิ   ภิกฺขเว  ปญฺจหงฺเคหิ  สมนฺนาคตสฺส  ภิกฺขุโน
อาปตฺติยา     อทสฺสเน    อุกฺเขปนียกมฺมํ    ปฏิปฺปสฺสมฺเภตพฺพํ    ยาย
อาปตฺติยา   สงฺเฆน   อาปตฺติยา   อทสฺสเน  อุกฺเขปนียกมฺมํ  กตํ  โหติ
ตํ   อาปตฺตึ   น  อาปชฺชติ  อญฺญํ  วา  ตาทิสิกํ  ตโต  วา  ปาปิฏฺฐตรํ
กมฺมํ    น    ครหติ   กมฺมิเก   น   ครหติ   อิเมหิ   โข   ภิกฺขเว
ปญฺจหงฺเคหิ     สมนฺนาคตสฺส     ภิกฺขุโน     อาปตฺติยา     อทสฺสเน
อุกฺเขปนียกมฺมํ ปฏิปฺปสฺสมฺเภตพฺพํ ฯ
     [๒๑๘]   อปเรหิปิ   ภิกฺขเว  ปญฺจหงฺเคหิ  สมนฺนาคตสฺส  ภิกฺขุโน
อาปตฺติยา     อทสฺสเน     อุกฺเขปนียกมฺมํ     ปฏิปฺปสฺสมฺเภตพฺพํ    น
ปกตตฺตสฺส    ภิกฺขุโน   อภิวาทนํ   ปจฺจุฏฺฐานํ   อญฺชลิกมฺมํ   สามีจิกมฺมํ
อาสนาภิหารํ     สาทิยติ     อิเมหิ    โข    ภิกฺขเว    ปญฺจหงฺเคหิ
สมนฺนาคตสฺส     ภิกฺขุโน     อาปตฺติยา    อทสฺสเน    อุกฺเขปนียกมฺมํ
ปฏิปฺปสฺสมฺเภตพฺพํ ฯ
     [๒๑๙]   อปเรหิปิ   ภิกฺขเว  ปญฺจหงฺเคหิ  สมนฺนาคตสฺส  ภิกฺขุโน
อาปตฺติยา     อทสฺสเน     อุกฺเขปนียกมฺมํ     ปฏิปฺปสฺสมฺเภตพฺพํ    น
ปกตตฺตสฺส    ภิกฺขุโน   เสยฺยาภิหารํ   ปาโททกํ   ปาทปีฐํ   ปาทกถลิกํ
ปตฺตจีวรปฏิคฺคหณํ    นหาเน    ปิฏฺฐิปริกมฺมํ    สาทิยติ    อิเมหิ   โข
ภิกฺขเว   ปญฺจหงฺเคหิ   สมนฺนาคตสฺส   ภิกฺขุโน   อาปตฺติยา   อทสฺสเน
อุกฺเขปนียกมฺมํ ปฏิปฺปสฺสมฺเภตพฺพํ ฯ
     [๒๒๐]   อปเรหิปิ   ภิกฺขเว  ปญฺจหงฺเคหิ  สมนฺนาคตสฺส  ภิกฺขุโน
อาปตฺติยา   อทสฺสเน   อุกฺเขปนียกมฺมํ    ปฏิปฺปสฺสมฺเภตพฺพํ  น  ปกตตฺตํ
ภิกฺขุํ    สีลวิปตฺติยา    อนุทฺธํเสติ    น   อาจารวิปตฺติยา   อนุทฺธํเสติ
น    ทิฏฺฐิวิปตฺติยา   อนุทฺธํเสติ   น   อาชีววิปตฺติยา   อนุทฺธํเสติ   น
ภิกฺขู    ภิกฺขูหิ    เภเทติ    อิเมหิ    โข    ภิกฺขเว    ปญฺจหงฺเคหิ
สมนฺนาคตสฺส     ภิกฺขุโน     อาปตฺติยา    อทสฺสเน    อุกฺเขปนียกมฺมํ
ปฏิปฺปสฺสมฺเภตพฺพํ ฯ
     [๒๒๑]   อปเรหิปิ   ภิกฺขเว  ปญฺจหงฺเคหิ  สมนฺนาคตสฺส  ภิกฺขุโน
อาปตฺติยา   อทสฺสเน   อุกฺเขปนียกมฺมํ   ปฏิปฺปสฺสมฺเภตพฺพํ   น  คิหิทฺธชํ
ธาเรติ   น   ติตฺถิยทฺธชํ   ธาเรติ   น  ติตฺถิเย  เสวติ  ภิกฺขู  เสวติ
ภิกฺขุสิกฺขาย     สิกฺขติ     อิเมหิ     โข     ภิกฺขเว    ปญฺจหงฺเคหิ
สมนฺนาคตสฺส     ภิกฺขุโน     อาปตฺติยา    อทสฺสเน    อุกฺเขปนียกมฺมํ
ปฏิปฺปสฺสมฺเภตพฺพํ ฯ
     [๒๒๒]   อปเรหิปิ   ภิกฺขเว  ปญฺจหงฺเคหิ  สมนฺนาคตสฺส  ภิกฺขุโน
อาปตฺติยา     อทสฺสเน     อุกฺเขปนียกมฺมํ     ปฏิปฺปสฺสมฺเภตพฺพํ    น
ปกตตฺเตน  ภิกฺขุนา  สทฺธึ  เอกจฺฉนฺเน  อาวาเส  วสติ  น  เอกจฺฉนฺเน
อนาวาเส  วสติ  น  เอกจฺฉนฺเน  อาวาเส  วา  อนาวาเส  วา  วสติ
ปกตตฺตํ    ภิกฺขุํ    ทิสฺวา    อาสนา   วุฏฺฐาติ   น   ปกตตฺตํ   ภิกฺขุํ
อาสาเทติ   อนฺโต   วา   พหิ  วา  อิเมหิ  โข  ภิกฺขเว  ปญฺจหงฺเคหิ
สมนฺนาคตสฺส     ภิกฺขุโน     อาปตฺติยา    อทสฺสเน    อุกฺเขปนียกมฺมํ
ปฏิปฺปสฺสมฺเภตพฺพํ ฯ
     [๒๒๓]   อฏฺฐหิ  ภิกฺขเว  องฺเคหิ  สมนฺนาคตสฺส ภิกฺขุโน อาปตฺติยา
อทสฺสเน     อุกฺเขปนียกมฺมํ     ปฏิปฺปสฺสมฺเภตพฺพํ     น    ปกตตฺตสฺส
ภิกฺขุโน   อุโปสถํ   ฐเปติ   น   ปวารณํ   ฐเปติ  น  สวจนียํ  กโรติ
น   อนุวาทํ   ปฏฺฐเปติ  น  โอกาสํ  กาเรติ  น  โจเทติ  น  สาเรติ
น   ภิกฺขู   ภิกฺขูหิ   สมฺปโยเชติ   อิเมหิ   โข   ภิกฺขเว  อฏฺฐหงฺเคหิ
สมนฺนาคตสฺส     ภิกฺขุโน     อาปตฺติยา    อทสฺสเน    อุกฺเขปนียกมฺมํ
ปฏิปฺปสฺสมฺเภตพฺพํ ฯ
     อาปตฺติยา     อทสฺสเน    อุกฺเขปนียกมฺเม    ปฏิปฺปสฺสมฺเภตพฺพ-
เตจตฺตาฬีสกํ นิฏฺฐิตํ ฯ
     [๒๒๔]   เอวญฺจ   ปน   ภิกฺขเว   ปฏิปฺปสฺสมฺเภตพฺพํ   ฯ  เตน
ภิกฺขเว   ฉนฺเนน   ภิกฺขุนา   สงฺฆํ   อุปสงฺกมิตฺวา  เอกํสํ  อุตฺตราสงฺคํ
กริตฺวา    วุฑฺฒานํ    ภิกฺขูนํ   ปาเท   วนฺทิตฺวา   อุกฺกุฏิกํ   นิสีทิตฺวา
อญฺชลึ    ปคฺคเหตฺวา    เอวมสฺส    วจนีโย   อหํ   ภนฺเต   สงฺเฆน
อาปตฺติยา    อทสฺสเน    อุกฺเขปนียกมฺมกโต   สมฺมา   วตฺตามิ   โลมํ
ปาเตมิ   เนตฺถารํ   วตฺตามิ   อาปตฺติยา   อทสฺสเน  อุกฺเขปนียกมฺมสฺส
ปฏิปฺปสฺสทฺธึ    ยาจามีติ    ฯ    ทุติยมฺปิ    ยาจิตพฺพา   ฯ   ตติยมฺปิ
ยาจิตพฺพา ฯ พฺยตฺเตน ภิกฺขุนา ปฏิพเลน สงฺโฆ ญาเปตพฺโพ
     {๒๒๔.๑}   สุณาตุ  เม  ภนฺเต  สงฺโฆ  อยํ  ฉนฺโน  ภิกฺขุ สงฺเฆน
อาปตฺติยา    อทสฺสเน    อุกฺเขปนียกมฺมกโต    สมฺมา   วตฺตติ   โลมํ
ปาเตติ   เนตฺถารํ   วตฺตติ   อาปตฺติยา   อทสฺสเน   อุกฺเขปนียกมฺมสฺส
ปฏิปฺปสฺสทฺธึ   ยาจติ   ฯ   ยทิ   สงฺฆสฺส   ปตฺตกลฺลํ   สงฺโฆ  ฉนฺนสฺส
ภิกฺขุโน   อาปตฺติยา   อทสฺสเน   อุกฺเขปนียกมฺมํ   ปฏิปฺปสฺสมฺเภยฺย   ฯ
เอสา ญตฺติ ฯ
     {๒๒๔.๒}   สุณาตุ  เม  ภนฺเต  สงฺโฆ  อยํ  ฉนฺโน  ภิกฺขุ สงฺเฆน
อาปตฺติยา อทสฺสเน อุกฺเขปนียกมฺมกโต
สมฺมา   วตฺตติ   โลมํ  ปาเตติ  เนตฺถารํ  วตฺตติ  อาปตฺติยา  อทสฺสเน
อุกฺเขปนียกมฺมสฺส     ปฏิปฺปสฺสทฺธึ    ยาจติ    ฯ    สงฺโฆ    ฉนฺนสฺส
ภิกฺขุโน    อาปตฺติยา   อทสฺสเน   อุกฺเขปนียกมฺมํ   ปฏิปฺปสฺสมฺเภติ   ฯ
ยสฺสายสฺมโต    ขมติ    ฉนฺนสฺส    ภิกฺขุโน    อาปตฺติยา    อทสฺสเน
อุกฺเขปนียกมฺมสฺส   ปฏิปฺปสฺสทฺธิ   โส   ตุณฺหสฺส   ยสฺส   นกฺขมติ   โส
ภาเสยฺย ฯ
     {๒๒๔.๓}   ทุติยมฺปิ  เอตมตฺถํ  วทามิ  ฯเปฯ  ตติยมฺปิ  เอตมตฺถํ
วทามิ   ฯ   สุณาตุ   เม   ภนฺเต  สงฺโฆ  อยํ  ฉนฺโน  ภิกฺขุ  สงฺเฆน
อาปตฺติยา    อทสฺสเน    อุกฺเขปนียกมฺมกโต    สมฺมา   วตฺตติ   โลมํ
ปาเตติ   เนตฺถารํ   วตฺตติ   อาปตฺติยา   อทสฺสเน   อุกฺเขปนียกมฺมสฺส
ปฏิปฺปสฺสทฺธึ    ยาจติ    ฯ    สงฺโฆ   ฉนฺนสฺส   ภิกฺขุโน   อาปตฺติยา
อทสฺสเน     อุกฺเขปนียกมฺมํ    ปฏิปฺปสฺสมฺเภติ    ยสฺสายสฺมโต    ขมติ
ฉนฺนสฺส     ภิกฺขุโน     อาปตฺติยา     อทสฺสเน     อุกฺเขปนียกมฺมสฺส
ปฏิปฺปสฺสทฺธิ โส ตุณฺหสฺส ยสฺส นกฺขมติ โส ภาเสยฺย ฯ
     {๒๒๔.๔}   ปฏิปฺปสฺสทฺธํ   สงฺเฆน   ฉนฺนสฺส  ภิกฺขุโน  อาปตฺติยา
อทสฺสเน   อุกฺเขปนียกมฺมํ   ขมติ   สงฺฆสฺส  ตสฺมา  ตุณฺหี  ฯ  เอวเมตํ
ธารยามีติ ฯ
     อาปตฺติยา อทสฺสเน อุกฺเขปนียกมฺมํ ปญฺจมํ นิฏฺฐิตํ ๑- ฯ
     [๒๒๕]   เตน สมเยน พุทฺโธ ภควา โกสมฺพิยํ วิหรติ โฆสิตาราเม ฯ
เตน     โข     ปน     สมเยน     อายสฺมา    ฉนฺโน    อาปตฺตึ
อาปชฺชิตฺวา  น  อิจฺฉติ  อาปตฺตึ  ปฏิกาตุํ  ฯ  เย  เต  ภิกฺขู  อปฺปิจฺฉา
@เชิงอรรถ: ๑ ม. ยุ. นิฏฺฐิตํ ปญฺจมํ.
ฯเปฯ   เต   อุชฺฌายนฺติ   ขียนฺติ  วิปาเจนฺติ  กถํ  หิ  นาม  อายสฺมา
ฉนฺโน   อาปตฺตึ   อาปชฺชิตฺวา   น   อิจฺฉิสฺสติ  อาปตฺตึ  ปฏิกาตุนฺติ  ฯ
อถโข  เต  ภิกฺขู  ภควโต  เอตมตฺถํ  อาโรเจสุํ ฯ อถโข ภควา เอตสฺมึ
นิทาเน   เอตสฺมึ   ปกรเณ  ภิกฺขุสงฺฆํ  สนฺนิปาตาเปตฺวา  ภิกฺขู  ปฏิปุจฺฉิ
สจฺจํ   กิร   ภิกฺขเว   ฉนฺโน   ภิกฺขุ  อาปตฺตึ  อาปชฺชิตฺวา  น  อิจฺฉติ
อาปตฺตึ   ปฏิกาตุนฺติ   ฯ   สจฺจํ   ภควาติ   ฯ  วิครหิ  พุทฺโธ  ภควา
อนนุจฺฉวิกํ   ฯเปฯ   อกรณียํ   กถํ  หิ  นาม  โส  ภิกฺขเว  โมฆปุริโส
อาปตฺตึ    อาปชฺชิตฺวา    น    อิจฺฉิสฺสติ    อาปตฺตึ   ปฏิกาตุํ   เนตํ
ภิกฺขเว   อปฺปสนฺนานํ   วา  ปสาทาย  ฯเปฯ  วิครหิตฺวา  ฯเปฯ  ธมฺมึ
กถํ   กตฺวา   ภิกฺขู   อามนฺเตสิ   เตนหิ   ภิกฺขเว   สงฺโฆ   ฉนฺนสฺส
ภิกฺขุโน   อาปตฺติยา   อปฺปฏิกมฺเม   อุกฺเขปนียกมฺมํ   กโรตุ   อสมฺโภคํ
สงฺเฆน ฯ
     [๒๒๖]   เอวญฺจ  ปน  ภิกฺขเว  กาตพฺพํ  ฯ  ปฐมํ  ฉนฺโน  ภิกฺขุ
โจเทตพฺโพ     โจเทตฺวา     สาเรตพฺโพ     สาเรตฺวา     อาปตฺติ
อาโรเปตพฺพา   อาปตฺตึ   อาโรเปตฺวา   พฺยตฺเตน   ภิกฺขุนา  ปฏิพเลน
สงฺโฆ ญาเปตพฺโพ
     {๒๒๖.๑}   สุณาตุ  เม  ภนฺเต  สงฺโฆ  อยํ  ฉนฺโน  ภิกฺขุ อาปตฺตึ
อาปชฺชิตฺวา   น   อิจฺฉติ  อาปตฺตึ  ปฏิกาตุํ  ฯ  ยทิ  สงฺฆสฺส  ปตฺตกลฺลํ
สงฺโฆ    ฉนฺนสฺส   ภิกฺขุโน   อาปตฺติยา   อปฺปฏิกมฺเม   อุกฺเขปนียกมฺมํ
กเรยฺย อสมฺโภคํ สงฺเฆน ฯ เอสา ญตฺติ ฯ
     {๒๒๖.๒}   สุณาตุ    เม    ภนฺเต    สงฺโฆ    อยํ   ฉนฺโน
ภิกฺขุ         อาปตฺตึ         อาปชฺชิตฺวา        น        อิจฺฉติ
อาปตฺตึ   ปฏิกาตุํ  ฯ  สงฺโฆ  ฉนฺนสฺส  ภิกฺขุโน  อาปตฺติยา  อปฺปฏิกมฺเม
อุกฺเขปนียกมฺมํ    กโรติ    อสมฺโภคํ    สงฺเฆน    ฯ    ยสฺสายสฺมโต
ขมติ   ฉนฺนสฺส   ภิกฺขุโน   อาปตฺติยา   อปฺปฏิกมฺเม   อุกฺเขปนียกมฺมสฺส
กรณํ    อสมฺโภคํ    สงฺเฆน    โส   ตุณฺหสฺส   ยสฺส   นกฺขมติ   โส
ภาเสยฺย ฯ
     {๒๒๖.๓}   ทุติยมฺปิ  เอตมตฺถํ  วทามิ  ฯเปฯ  ตติยมฺปิ  เอตมตฺถํ
วทามิ   ฯ   สุณาตุ   เม   ภนฺเต  สงฺโฆ  อยํ  ฉนฺโน  ภิกฺขุ  อาปตฺตึ
อาปชฺชิตฺวา    น   อิจฺฉติ   อาปตฺตึ   ปฏิกาตุํ   ฯ   สงฺโฆ   ฉนฺนสฺส
ภิกฺขุโน   อาปตฺติยา   อปฺปฏิกมฺเม   อุกฺเขปนียกมฺมํ   กโรติ   อสมฺโภคํ
สงฺเฆน    ฯ    ยสฺสายสฺมโต   ขมติ   ฉนฺนสฺส   ภิกฺขุโน   อาปตฺติยา
อปฺปฏิกมฺเม    อุกฺเขปนียกมฺมสฺส    กรณํ    อสมฺโภคํ    สงฺเฆน   โส
ตุณฺหสฺส ยสฺส นกฺขมติ โส ภาเสยฺย ฯ
     {๒๒๖.๔}   กตํ  สงฺเฆน  ฉนฺนสฺส  ภิกฺขุโน  อาปตฺติยา อปฺปฏิกมฺเม
อุกฺเขปนียกมฺมํ   อสมฺโภคํ   สงฺเฆน   ขมติ   สงฺฆสฺส  ตสฺมา  ตุณฺหี  ฯ
เอวเมตํ ธารยามีติ ฯ
     {๒๒๖.๕}   อาวาสปรมฺปรญฺจ  ภิกฺขเว สํสถ ฉนฺโน ภิกฺขุ สงฺเฆน ๑-
อาปตฺติยา อปฺปฏิกมฺเม อุกฺเขปนียกมฺมกโต อสมฺโภคํ สงฺเฆนาติ ฯ
     [๒๒๗]   ตีหิ  ภิกฺขเว  องฺเคหิ  สมนฺนาคตํ  อาปตฺติยา อปฺปฏิกมฺเม
อุกฺเขปนียกมฺมํ    อธมฺมกมฺมญฺเจว    โหติ   อวินยกมฺมญฺจ   ทุวูปสนฺตญฺจ
อสมฺมุขา    กตํ    โหติ    อปฺปฏิปุจฺฉา    กตํ    โหติ   อปฺปฏิญฺญาย
กตํ     โหติ     อิเมหิ    โข    ภิกฺขเว    ตีหงฺเคหิ    สมนฺนาคตํ
@เชิงอรรถ: ๑ ม. ยุ. อยํ ปาโฐ นตฺถิ ฯ
อาปตฺติยา    อปฺปฏิกมฺเม    อุกฺเขปนียกมฺมํ    อธมฺมกมฺมญฺเจว    โหติ
อวินยกมฺมญฺจ ทุวูปสนฺตญฺจ ฯ
     [๒๒๘]    อปเรหิปิ   ภิกฺขเว   ตีหงฺเคหิ   สมนฺนาคตํ  อาปตฺติยา
อปฺปฏิกมฺเม    อุกฺเขปนียกมฺมํ    อธมฺมกมฺมญฺเจว   โหติ   อวินยกมฺมญฺจ
ทุวูปสนฺตญฺจ   อนาปตฺติยา   กตํ   โหติ   อเทสนาคามินิยา   อาปตฺติยา
กตํ โหติ เทสิตาย อาปตฺติยา กตํ โหติ ฯเปฯ
     [๒๒๙]   อปเรหิปิ   ฯเปฯ  อโจเทตฺวา  กตํ  โหติ  อสาเรตฺวา
กตํ โหติ อาปตฺตึ อนาโรเปตฺวา กตํ โหติ ฯเปฯ
     [๒๓๐]   อปเรหิปิ   ฯเปฯ  อสมฺมุขา  กตํ  โหติ  อธมฺเมน  กตํ
โหติ วคฺเคน กตํ โหติ อิเมหิ โข ภิกฺขเว ตีหงฺเคหิ ฯเปฯ
     [๒๓๑]   อปเรหิปิ   ฯเปฯ   อปฺปฏิปุจฺฉา   กตํ  โหติ  อธมฺเมน
กตํ โหติ วคฺเคน กตํ โหติ อิเมหิ โข ภิกฺขเว ตีหงฺเคหิ ฯเปฯ
     [๒๓๒]   อปเรหิปิ  ฯเปฯ  อปฺปฏิญฺญาย  กตํ  โหติ  อธมฺเมน  กตํ
โหติ วคฺเคน กตํ โหติ อิเมหิ โข ภิกฺขเว ตีหงฺเคหิ ฯเปฯ
     [๒๓๓]   อปเรหิปิ   ฯเปฯ   อนาปตฺติยา   กตํ  โหติ  อธมฺเมน
กตํ โหติ วคฺเคน กตํ โหติ อิเมหิ โข ภิกฺขเว ตีหงฺเคหิ ฯเปฯ
     [๒๓๔]   อปเรหิปิ  ฯเปฯ  อเทสนาคามินิยา  อาปตฺติยา  กตํ โหติ
อธมฺเมน กตํ โหติ วคฺเคน กตํ โหติ ฯเปฯ
     [๒๓๕]   อปเรหิปิ   ฯเปฯ   เทสิตาย   อาปตฺติยา   กตํ  โหติ
อธมฺเมน กตํ โหติ วคฺเคน กตํ โหติ ฯเปฯ
     [๒๓๖]   อปเรหิปิ   ฯเปฯ   อโจเทตฺวา   กตํ  โหติ  อธมฺเมน
กตํ โหติ วคฺเคน กตํ โหติ อิเมหิ โข ภิกฺขเว ตีหงฺเคหิ ฯเปฯ
     [๒๓๗]   อปเรหิปิ   ฯเปฯ   อสาเรตฺวา   กตํ  โหติ  อธมฺเมน
กตํ โหติ วคฺเคน กตํ โหติ อิเมหิ โข ภิกฺขเว ตีหงฺเคหิ ฯเปฯ
     [๒๓๘]   อปเรหิปิ   ฯเปฯ   อาปตฺตึ  อนาโรเปตฺวา  กตํ  โหติ
อธมฺเมน   กตํ   โหติ   วคฺเคน   กตํ   โหติ   อิเมหิ   โข  ภิกฺขเว
ตีหงฺเคหิ     สมนฺนาคตํ    อาปตฺติยา    อปฺปฏิกมฺเม    อุกฺเขปนียกมฺมํ
อธมฺมกมฺมญฺเจว      โหติ      อวินยกมฺมญฺจ      ทุวูปสนฺตญฺจ     ฯ
     อาปตฺติยา อปฺปฏิกมฺเม อุกฺเขปนียกมฺเม อธมฺมกมฺมทฺวาทสกํนิฏฺฐิตํ ฯ
     [๒๓๙]   ตีหิ  ภิกฺขเว  องฺเคหิ  สมนฺนาคตํ  อาปตฺติยา อปฺปฏิกมฺเม
อุกฺเขปนียกมฺมํ    ธมฺมกมฺมญฺเจว    โหติ    วินยกมฺมญฺจ    สุวูปสนฺตญฺจ
สมฺมุขา   กตํ   โหติ   ปฏิปุจฺฉา   กตํ   โหติ   ปฏิญฺญาย   กตํ  โหติ
อิเมหิ   โข   ภิกฺขเว   ตีหงฺเคหิ   สมนฺนาคตํ  อาปตฺติยา  อปฺปฏิกมฺเม
อุกฺเขปนียกมฺมํ ธมฺมกมฺมญฺเจว โหติ วินยกมฺมญฺจ สุวูปสนฺตญฺจ ฯ
     [๒๔๐]   อปเรหิปิ   ภิกฺขเว   ตีหงฺเคหิ   สมนฺนาคตํ  อาปตฺติยา
อปฺปฏิกมฺเม    อุกฺเขปนียกมฺมํ    ธมฺมกมฺมญฺเจว    โหติ    วินยกมฺมญฺจ
สุวูปสนฺตญฺจ    อาปตฺติยา    กตํ   โหติ   เทสนาคามินิยา   อาปตฺติยา
กตํ   โหติ   อเทสิตาย   อาปตฺติยา   กตํ  โหติ  อิเมหิ  โข  ภิกฺขเว
ตีหงฺเคหิ     สมนฺนาคตํ    อาปตฺติยา    อปฺปฏิกมฺเม    อุกฺเขปนียกมฺมํ
ธมฺมกมฺมญฺเจว โหติ วินยกมฺมญฺจ สุวูปสนฺตญฺจ ฯ
     [๒๔๑]   อปเรหิปิ   ภิกฺขเว   ตีหงฺเคหิ   สมนฺนาคตํ  อาปตฺติยา
อปฺปฏิกมฺเม    อุกฺเขปนียกมฺมํ    ธมฺมกมฺมญฺเจว    โหติ    วินยกมฺมญฺจ
สุวูปสนฺตญฺจ   โจเทตฺวา   กตํ   โหติ   สาเรตฺวา  กตํ  โหติ  อาปตฺตึ
อาโรเปตฺวา   กตํ   โหติ   อิเมหิ  โข  ภิกฺขเว  ตีหงฺเคหิ  สมนฺนาคตํ
อาปตฺติยา       อปฺปฏิกมฺเม       อุกฺเขปนียกมฺมํ      ธมฺมกมฺมญฺเจว
โหติ วินยกมฺมญฺจ สุวูปสนฺตญฺจ ฯ
     [๒๔๒]   ตีหิ  ภิกฺขเว  องฺเคหิ  สมนฺนาคตํ  อาปตฺติยา อปฺปฏิกมฺเม
อุกฺเขปนียกมฺมํ    ธมฺมกมฺมญฺเจว    โหติ    วินยกมฺมญฺจ    สุวูปสนฺตญฺจ
สมฺมุขา   กตํ   โหติ  ธมฺเมน  กตํ  โหติ  สมคฺเคน  กตํ  โหติ  อิเมหิ
โข    ภิกฺขเว    ตีหงฺเคหิ    สมนฺนาคตํ    อาปตฺติยา    อปฺปฏิกมฺเม
อุกฺเขปนียกมฺมํ        ธมฺมกมฺมญฺเจว        โหติ        วินยกมฺมญฺจ
สุวูปสนฺตญฺจ ฯเปฯ
     [๒๔๓]   อปเรหิปิ   ฯเปฯ   ปฏิปุจฺฉา  กตํ  โหติ  ธมฺเมน  กตํ
โหติ สมคฺเคน กตํ โหติ ฯเปฯ
     [๒๔๔]   อปเรหิปิ   ฯเปฯ   ปฏิญฺญาย   กตํ   โหติ   ธมฺเมน
กตํ โหติ สมคฺเคน กตํ โหติ อิเมหิ โข ภิกฺขเว ตีหงฺเคหิ ฯเปฯ
     [๒๔๕]   อปเรหิ   ฯเปฯ   อาปตฺติยา  กตํ  โหติ  ธมฺเมน  กตํ
โหติ สมคฺเคน กตํ โหติ อิเมหิ โข ภิกฺขเว ตีหงฺเคหิ ฯเปฯ
     [๒๔๖]   อปเรหิ  ฯเปฯ  เทสนาคามินิยา  อาปตฺติยา  กตํ  โหติ
ธมฺเมน กตํ โหติ สมคฺเคน กตํ โหติ ฯเปฯ
     [๒๔๗]   อปเรหิปิ   ฯเปฯ   อเทสิตาย   อาปตฺติยา  กตํ  โหติ
ธมฺเมน กตํ โหติ สมคฺเคน กตํ โหติ ฯเปฯ
     [๒๔๘]   อปเรหิปิ   ฯเปฯ  โจเทตฺวา  กตํ  โหติ  ธมฺเมน  กตํ
โหติ สมคฺเคน กตํ โหติ อิเมหิ โข ภิกฺขเว ตีหงฺเคหิ ฯเปฯ
     [๒๔๙]   อปเรหิปิ   ฯเปฯ  สาเรตฺวา  กตํ  โหติ  ธมฺเมน  กตํ
โหติ สมคฺเคน กตํ โหติ อิเมหิ โข ภิกฺขเว ตีหงฺเคหิ ฯเปฯ
     [๒๕๐]   อปเรหิปิ   ฯเปฯ   อาปตฺตึ   อาโรเปตฺวา  กตํ  โหติ
ธมฺเมน   กตํ   โหติ   สมคฺเคน   กตํ   โหติ   อิเมหิ   โข  ภิกฺขเว
ตีหงฺเคหิ     สมนฺนาคตํ    อาปตฺติยา    อปฺปฏิกมฺเม    อุกฺเขปนียกมฺมํ
ธมฺมกมฺมญฺเจว       โหติ      วินยกมฺมญฺจ      สุวูปสนฺตญฺจ      ฯ
     อาปตฺติยา อปฺปฏิกมฺเม อุกฺเขปนียกมฺเม ธมฺมกมฺมทฺวาทสกํ นิฏฺฐิตํ ฯ
     [๒๕๑]   ตีหิ  ภิกฺขเว  องฺเคหิ  สมนฺนาคตสฺส ภิกฺขุโน อากงฺขมาโน
สงฺโฆ   อาปตฺติยา   อปฺปฏิกมฺเม  อุกฺเขปนียกมฺมํ  กเรยฺย  ภณฺฑนการโก
โหติ   กลหการโก   วิวาทการโก   ภสฺสการโก  สงฺเฆ  อธิกรณการโก
พาโล   โหติ   อพฺยตฺโต   อาปตฺติพหุโล  อนปทาโน  คิหิสํสฏฺโฐ  วิหรติ
อนนุโลมิเกหิ     คิหิสํสคฺเคหิ    อิเมหิ    โข    ภิกฺขเว    ตีหงฺเคหิ
สมนฺนาคตสฺส   ภิกฺขุโน   อากงฺขมาโน   สงฺโฆ  อาปตฺติยา  อปฺปฏิกมฺเม
อุกฺเขปนียกมฺมํ กเรยฺย ฯ
     [๒๕๒]   อปเรหิปิ   ภิกฺขเว   ตีหงฺเคหิ   สมนฺนาคตสฺส  ภิกฺขุโน
อากงฺขมาโน     สงฺโฆ    อาปตฺติยา    อปฺปฏิกมฺเม    อุกฺเขปนียกมฺมํ
กเรยฺย    อธิสีเล    สีลวิปนฺโน   โหติ   อชฺฌาจาเร   อาจารวิปนฺโน
โหติ    อติทิฏฺฐิยา    ทิฏฺฐิวิปนฺโน    โหติ     อิเมหิ   โข   ภิกฺขเว
ตีหงฺเคหิ   สมนฺนาคตสฺส   ภิกฺขุโน   อากงฺขมาโน   สงฺโฆ   อาปตฺติยา
อปฺปฏิกมฺเม อุกฺเขปนียกมฺมํ กเรยฺย ฯ
     [๒๕๓]   อปเรหิปิ   ภิกฺขเว   ตีหงฺเคหิ   สมนฺนาคตสฺส  ภิกฺขุโน
อากงฺขมาโน     สงฺโฆ    อาปตฺติยา    อปฺปฏิกมฺเม    อุกฺเขปนียกมฺมํ
กเรยฺย    พุทฺธสฺส    อวณฺณํ    ภาสติ    ธมฺมสฺส    อวณฺณํ    ภาสติ
สงฺฆสฺส   อวณฺณํ   ภาสติ  อิเมหิ  โข  ภิกฺขเว  ตีหงฺเคหิ  สมนฺนาคตสฺส
ภิกฺขุโน   อากงฺขมาโน  สงฺโฆ  อาปตฺติยา  อปฺปฏิกมฺเม   อุกฺเขปนียกมฺมํ
กเรยฺย ฯ
     [๒๕๔]   ติณฺณํ  ภิกฺขเว  ภิกฺขูนํ  อากงฺขมาโน  สงฺโฆ  อาปตฺติยา
อปฺปฏิกมฺเม     อุกฺเขปนียกมฺมํ     กเรยฺย     เอโก    ภณฺฑนการโก
โหติ   กลหการโก   วิวาทการโก   ภสฺสการโก  สงฺเฆ  อธิกรณการโก
เอโก   พาโล   โหติ   อพฺยตฺโต   อาปตฺติพหุโล   อนปทาโน   เอโก
คิหิสํสฏฺโฐ   วิหรติ   อนนุโลมิเกหิ   คิหิสํสคฺเคหิ   อิเมสํ  โข  ภิกฺขเว
ติณฺณํ    ภิกฺขูนํ    อากงฺขมาโน    สงฺโฆ    อาปตฺติยา    อปฺปฏิกมฺเม
อุกฺเขปนียกมฺมํ กเรยฺย ฯ
     [๒๕๕]   อปเรสํปิ   ภิกฺขเว  ติณฺณํ  ภิกฺขูนํ  อากงฺขมาโน  สงฺโฆ
อาปตฺติยา    อปฺปฏิกมฺเม   อุกฺเขปนียกมฺมํ   กเรยฺย   เอโก   อธิสีเล
สีลวิปนฺโน    โหติ    เอโก    อชฺฌาจาเร    อาจารวิปนฺโน    โหติ
เอโก    อติทิฏฺฐิยา    ทิฏฺฐิวิปนฺโน    โหติ    อิเมสํ   โข   ภิกฺขเว
ติณฺณํ    ภิกฺขูนํ    อากงฺขมาโน    สงฺโฆ    อาปตฺติยา    อปฺปฏิกมฺเม
อุกฺเขปนียกมฺมํ กเรยฺย ฯ
     [๒๕๖]   อปเรสํปิ   ภิกฺขเว  ติณฺณํ  ภิกฺขูนํ  อากงฺขมาโน  สงฺโฆ
อาปตฺติยา    อปฺปฏิกมฺเม   อุกฺเขปนียกมฺมํ   กเรยฺย   เอโก   พุทฺธสฺส
อวณฺณํ   ภาสติ   เอโก   ธมฺมสฺส   อวณฺณํ   ภาสติ   เอโก   สงฺฆสฺส
อวณฺณํ   ภาสติ   อิเมสํ   โข   ภิกฺขเว   ติณฺณํ   ภิกฺขูนํ  อากงฺขมาโน
สงฺโฆ อาปตฺติยา อปฺปฏิกมฺเม อุกฺเขปนียกมฺมํ กเรยฺย ฯ
     [๒๕๗]   อาปตฺติยา   อปฺปฏิกมฺเม   อุกฺเขปนียกมฺมกเตน  ภิกฺขเว
ภิกฺขุนา    สมฺมา    วตฺติตพฺพํ    ฯ    ตตฺรายํ    สมฺมาวตฺตนา    น
อุปสมฺปาเทตพฺพํ     น     นิสฺสโย     ทาตพฺโพ     น    สามเณโร
อุปฏฺฐาเปตพฺโพ  น  ภิกฺขุโนวาทกสมฺมติ  สาทิตพฺพา  สมฺมเตนปิ  ภิกฺขุนิโย
น   โอวทิตพฺพา   ยาย   อาปตฺติยา   สงฺเฆน  อาปตฺติยา  อปฺปฏิกมฺเม
อุกฺเขปนียกมฺมํ    กตํ    โหติ    สา    อาปตฺติ    น   อาปชฺชิตพฺพา
อญฺญา    วา    ตาทิสิกา    ตโต    วา    ปาปิฏฺฐตรา   กมฺมํ   น
ครหิตพฺพํ    กมฺมิกา    น    ครหิตพฺพา    น    ปกตตฺตสฺส   ภิกฺขุโน
อภิวาทนํ     ปจฺจุฏฺฐานํ     อญฺชลิกมฺมํ    สามีจิกมฺมํ    อาสนาภิหาโร
เสยฺยาภิหาโร     ปาโททกํ    ปาทปีฐํ   ปาทกถลิกํ   ปตฺตจีวรปฏิคฺคหณํ
นหาเน   ปิฏฺฐิปริกมฺมํ   สาทิตพฺพํ   น   ปกตตฺโต   ภิกฺขุ   สีลวิปตฺติยา
อนุทฺธํเสตพฺโพ   น   อาจารวิปตฺติยา   อนุทฺธํเสตพฺโพ  น  ทิฏฺฐิวิปตฺติยา
อนุทฺธํเสตพฺโพ    น    อาชีววิปตฺติยา    อนุทฺธํเสตพฺโพ    น    ภิกฺขู
ภิกฺขูหิ    เภเทตพฺพา   น   คิหิทฺธโช   ธาเรตพฺโพ   น   ติตฺถิยทฺธโช
ธาเรตพฺโพ   น   ติตฺถิยา   เสวิตพฺพา   ภิกฺขู   เสวิตพฺพา  ภิกฺขุสิกฺขา
สิกฺขิตพฺพา   น   ปกตตฺเตน   ภิกฺขุนา   สทฺธึ   เอกจฺฉนฺเน   อาวาเส
วตฺถพฺพํ    น    เอกจฺฉนฺเน   อนาวาเส   วตฺถพฺพํ   น   เอกจฺฉนฺเน
อาวาเส   วา   อนาวาเส   วา   วตฺถพฺพํ   ปกตตฺตํ   ภิกฺขุํ   ทิสฺวา
อาสนา    วุฏฺฐาตพฺพํ   น   ปกตตฺโต   ภิกฺขุ   อาสาเทตพฺโพ   อนฺโต
วา    พหิ    วา   น   ปกตตฺตสฺส   ภิกฺขุโน   อุโปสโถ   ฐเปตพฺโพ
น    ปวารณา    ฐเปตพฺพา   น   สวจนียํ   กาตพฺพํ   น   อนุวาโท
ปฏฺฐเปตพฺโพ    น    โอกาโส    กาเรตพฺโพ   น   โจเทตพฺโพ   น
สาเรตพฺโพ      น     ภิกฺขู     ภิกฺขูหิ     สมฺปโยเชตพฺพนฺติ     ฯ
     อาปตฺติยา อปฺปฏิกมฺเม อุกฺเขปนียกมฺเม เตจตฺตาฬีสวตฺตํ นิฏฺฐิตํ ฯ
     [๒๕๘]   อถโข  สงฺโฆ  ฉนฺนสฺส  ภิกฺขุโน  อาปตฺติยา  อปฺปฏิกมฺเม
อุกฺเขปนียกมฺมํ   อกาสิ  อสมฺโภคํ  สงฺเฆน  ฯ  โส  สงฺเฆน  อาปตฺติยา
อปฺปฏิกมฺเม    อุกฺเขปนียกมฺมกโต   ตมฺหา   อาวาสา   อญฺญํ   อาวาสํ
อคมาสิ  ฯ  ตตฺถ  ภิกฺขู  เนว  อภิวาเทสุํ  น  ปจฺจุฏฺเฐสุํ  น อญฺชลิกมฺมํ
น  สามีจิกมฺมํ  อกํสุ  น  สกฺกรึสุ  น  ครุกรึสุ  น  มาเนสุํ  น ปูเชสุํ ฯ
โส     ภิกฺขูหิ     อสกฺกริยมาโน     อครุกริยมาโน     อมานิยมาโน
อปูชิยมาโน      อสกฺการกโต      ตมฺหาปิ      อาวาสา      อญฺญํ
อาวาสํ   อคมาสิ   ฯ   ตตฺถปิ  ภิกฺขู  เนว  อภิวาเทสุํ  น  ปจฺจุฏฺเฐสุํ
น   อญฺชลิกมฺมํ   น   สามีจิกมฺมํ   อกํสุ   น  สกฺกรึสุ  น  ครุกรึสุ  น
มาเนสุํ   น   ปูเชสุํ   ฯ   โส  ภิกฺขูหิ  อสกฺกริยมาโน  อครุกริยมาโน
อมานิยมาโน   อปูชิยมาโน   อสกฺการกโต   ตมฺหาปิ   อาวาสา   อญฺญํ
อาวาสํ   อคมาสิ   ฯ   ตตฺถปิ  ภิกฺขู  เนว  อภิวาเทสุํ  น  ปจฺจุฏฺเฐสุํ
น   อญฺชลิกมฺมํ   น   สามีจิกมฺมํ   อกํสุ   น  สกฺกรึสุ  น  ครุกรึสุ  น
มาเนสุํ   น   ปูเชสุํ   ฯ   โส  ภิกฺขูหิ  อสกฺกริยมาโน  อครุกริยมาโน
อมานิยมาโน  อปูชิยมาโน  อสกฺการกโต  ปุนเทว  โกสมฺพึ  ปจฺจาคจฺฉิ ฯ
โส    สมฺมา    วตฺตติ    โลมํ   ปาเตติ   เนตฺถารํ   วตฺตติ   ภิกฺขู
อุปสงฺกมิตฺวา  เอวํ  วเทติ  อหํ  อาวุโส  สงฺเฆน อาปตฺติยา อปฺปฏิกมฺเม
อุกฺเขปนียกมฺมกโต    สมฺมา    วตฺตามิ    โลมํ    ปาเตมิ   เนตฺถารํ
วตฺตามิ   กถํ   นุ   โข  มยา  ปฏิปชฺชิตพฺพนฺติ  ฯ  เต  ภิกฺขู  ภควโต
เอตมตฺถํ   อาโรเจสุํ   ฯ   เตนหิ   ภิกฺขเว  สงฺโฆ  ฉนฺนสฺส  ภิกฺขุโน
อาปตฺติยา อปฺปฏิกมฺเม อุกฺเขปนียกมฺมํ ปฏิปฺปสฺสมฺเภตุ ฯ
     [๒๕๙]   ปญฺจหิ  ภิกฺขเว  องฺเคหิ  สมนฺนาคตสฺส ภิกฺขุโน อาปตฺติยา
อปฺปฏิกมฺเม    อุกฺเขปนียกมฺมํ    น    ปฏิปฺปสฺสมฺเภตพฺพํ   อุปสมฺปาเทติ
นิสฺสยํ      เทติ     สามเณรํ     อุปฏฺฐาเปติ     ภิกฺขุโนวาทกสมฺมตึ
สาทิยติ    สมฺมโตปิ    ภิกฺขุนิโย    โอวทติ    อิเมหิ   โข   ภิกฺขเว
ปญฺจหงฺเคหิ     สมนฺนาคตสฺส     ภิกฺขุโน    อาปตฺติยา    อปฺปฏิกมฺเม
อุกฺเขปนียกมฺมํ น ปฏิปฺปสฺสมฺเภตพฺพํ ฯ
     [๒๖๐]   อปเรหิปิ   ภิกฺขเว  ปญฺจหงฺเคหิ  สมนฺนาคตสฺส  ภิกฺขุโน
อาปตฺติยา     อปฺปฏิกมฺเม    อุกฺเขปนียกมฺมํ    น    ปฏิปฺปสฺสมฺเภตพฺพํ
ยาย   อาปตฺติยา   สงฺเฆน   อาปตฺติยา   อปฺปฏิกมฺเม   อุกฺเขปนียกมฺมํ
กตํ    โหติ   ตํ   อาปตฺตึ   อาปชฺชติ   อญฺญํ   วา   ตาทิสิกํ   ตโต
วา ปาปิฏฺฐตรํ กมฺมํ ครหติ กมฺมิเก ครหติ ฯเปฯ
     [๒๖๑]   อปเรหิปิ    ฯเปฯ   ปกตตฺตสฺส   ภิกฺขุโน   อภิวาทนํ
ปจฺจุฏฺฐานํ อญฺชลิกมฺมํ สามีจิกมฺมํ อาสนาภิหารํ สาทิยติ ฯเปฯ
     [๒๖๒]   อปเรหิปิ   ฯเปฯ   ปกตตฺตสฺส   ภิกฺขุโน  เสยฺยาภิหารํ
ปาโททกํ     ปาทปีฐํ     ปาทกถลิกํ     ปตฺตจีวรปฏิคฺคหณํ     นหาเน
ปิฏฺฐิปริกมฺมํ สาทิยติ ฯเปฯ
     [๒๖๓]   อปเรหิปิ  ฯเปฯ  ปกตตฺตํ  ภิกฺขุํ  สีลวิปตฺติยา  อนุทฺธํเสติ
อาจารวิปตฺติยา   อนุทฺธํเสติ   ทิฏฺฐิวิปตฺติยา   อนุทฺธํเสติ  อาชีววิปตฺติยา
อนุทฺธํเสติ ภิกฺขู ภิกฺขูหิ เภเทติ ฯเปฯ
     [๒๖๔]   อปเรหิปิ  ฯเปฯ  คิหิทฺธชํ  ธาเรติ  ติตฺถิยทฺธชํ  ธาเรติ
ติตฺถิเย เสวติ น ภิกฺขู เสวติ ภิกฺขุสิกฺขาย น สิกฺขติ ฯเปฯ
     [๒๖๕]   อปเรหิปิ  ฯเปฯ  ปกตฺตเตน  ภิกฺขุนา  สทฺธึ  เอกจฺฉนฺเน
อาวาเส   วสติ   เอกจฺฉนฺเน  อนาวาเส  วสติ  เอกจฺฉนฺเน  อาวาเส
วา   อนาวาเส   วา   วสติ   ปกตตฺตํ   ภิกฺขุํ   ทิสฺวา   อาสนา  น
วุฏฺฐาติ   ปกตตฺตํ   ภิกฺขุํ   อาสาเทติ   อนฺโต   วา  พหิ  วา  อิเมหิ
โข    ภิกฺขเว    ปญฺจหงฺเคหิ    สมนฺนาคตสฺส    ภิกฺขุโน   อาปตฺติยา
อปฺปฏิกมฺเม อุกฺเขปนียกมฺมํ น ปฏิปฺปสฺสมฺเภตพฺพํ ฯ
     [๒๖๖]   อฏฺฐหิ  ภิกฺขเว  องฺเคหิ  สมนฺนาคตสฺส ภิกฺขุโน อาปตฺติยา
อปฺปฏิกมฺเม     อุกฺเขปนียกมฺมํ    น    ปฏิปฺปสฺสมฺเภตพฺพํ    ปกตตฺตสฺส
ภิกฺขุโน    อุโปสถํ    ฐเปติ    ปวารณํ    ฐเปติ    สวจนียํ   กโรติ
อนุวาทํ    ปฏฺฐเปติ    โอกาสํ    กาเรติ   โจเทติ   สาเรติ   ภิกฺขู
ภิกฺขูหิ     สมฺปโยเชติ     อิเมหิ     โข     ภิกฺขเว    อฏฺฐหงฺเคหิ
สมนฺนาคตสฺส    ภิกฺขุโน    อาปตฺติยา    อปฺปฏิกมฺเม    อุกฺเขปนียกมฺมํ
น ปฏิปฺปสฺสมฺเภตพฺพํ ฯ
     อาปตฺติยา   อปฺปฏิกมฺเม   อุกฺเขปนียกมฺเม  น  ปฏิปฺปสฺสมฺเภตพฺพ-
เตจตฺตาฬีสกํ นิฏฺฐิตํ ฯ
     [๒๖๗]   ปญฺจหิ    ภิกฺขเว   องฺเคหิ   สมนฺนาคตสฺส   ภิกฺขุโน
อาปตฺติยา     อปฺปฏิกมฺเม    อุกฺเขปนียกมฺมํ    ปฏิปฺปสฺสมฺเภตพฺพํ    น
อุปสมฺปาเทติ    น   นิสฺสยํ   เทติ   น   สามเณรํ   อุปฏฺฐาเปติ   น
ภิกฺขุโนวาทกสมฺมตึ  สาทิยติ  สมฺมโตปิ  ภิกฺขุนิโย  น  โอวทติ  อิเมหิ โข
ภิกฺขเว   ปญฺจหงฺเคหิ   สมนฺนาคตสฺส   ภิกฺขุโน  อาปตฺติยา  อปฺปฏิกมฺเม
อุกฺเขปนียกมฺมํ ปฏิปฺปสฺสมฺเภตพฺพํ ฯ
     [๒๖๘]   อปเรหิปิ   ภิกฺขเว  ปญฺจหงฺเคหิ  สมนฺนาคตสฺส  ภิกฺขุโน
อาปตฺติยา    อปฺปฏิกมฺเม    อุกฺเขปนียกมฺมํ   ปฏิปฺปสฺสมฺเภตพฺพํ    ยาย
อาปตฺติยา    สงฺเฆน   อาปตฺติยา   อปฺปฏิกมฺเม   อุกฺเขปนียกมฺมํ   กตํ
โหติ    ตํ   อาปตฺตึ   นาปชฺชติ   อญฺญํ   วา   ตาทิสิกํ   ตโต   วา
ปาปิฏฺฐตรํ กมฺมํ น ครหติ กมฺมิเก น ครหติ ฯเปฯ
     [๒๖๙]   อปเรหิปิ   ฯเปฯ   น   ปกตตฺตสฺส  ภิกฺขุโน  อภิวาทนํ
ปจฺจุฏฺฐานํ อญฺชลิกมฺมํ สามีจิกมฺมํ อาสนาภิหารํ สาทิยติ ฯเปฯ
     [๒๗๐]   อปเรหิปิ  ฯเปฯ  น  ปกตตฺตสฺส  ภิกฺขุโน  เสยฺยาภิหารํ
ปาโททกํ     ปาทปีฐํ     ปาทกถลิกํ     ปตฺตจีวรปฏิคฺคหณํ     นหาเน
ปิฏฺฐิปริกมฺมํ สาทิยติ ฯเปฯ
     [๒๗๑]   อปเรหิปิ   ฯเปฯ   น   ปกตตฺตํ   ภิกฺขุํ   สีลวิปตฺติยา
อนุทฺธํเสติ    น    อาจารวิปตฺติยา    อนุทฺธํเสติ    น   ทิฏฺฐิวิปตฺติยา
อนุทฺธํเสติ    น    อาชีววิปตฺติยา    อนุทฺธํเสติ    น   ภิกฺขู   ภิกฺขูหิ
เภเทติ ฯเปฯ
     [๒๗๒]   อปเรหิปิ   ฯเปฯ  น  คิหิทฺธชํ  ธาเรติ  น  ติตฺถิยทฺธชํ
ธาเรติ     น    ติตฺถิเย    เสวติ    ภิกฺขู    เสวติ    ภิกฺขุสิกฺขาย
สิกฺขติ ฯเปฯ
     [๒๗๓]   อปเรหิปิ  ฯเปฯ  น  ปกตตฺเตน ภิกฺขุนา สทฺธึ เอกจฺฉนฺเน
อาวาเส     วสติ     น    เอกจฺฉนฺเน    อนาวาเส    วสติ    น
เอกจฺฉนฺเน   อาวาเส   วา   อนาวาเส   วา   วสติ  ปกตตฺตํ  ภิกฺขุํ
ทิสฺวา   อาสนา   วุฏฺฐาติ   น  ปกตตฺตํ  ภิกฺขุํ  อาสาเทติ  อนฺโต  วา
พหิ   วา   อิเมหิ   โข   ภิกฺขเว  ปญฺจหงฺเคหิ  สมนฺนาคตสฺส  ภิกฺขุโน
อาปตฺติยา อปฺปฏิกมฺเม อุกฺเขปนียกมฺมํ ปฏิปฺปสฺสมฺเภตพฺพํ ฯ
     [๒๗๔]   อฏฺฐหิ    ภิกฺขเว   องฺเคหิ   สมนฺนาคตสฺส   ภิกฺขุโน
อาปตฺติยา     อปฺปฏิกมฺเม    อุกฺเขปนียกมฺมํ    ปฏิปฺปสฺสมฺเภตพฺพํ    น
ปกตตฺตสฺส    ภิกฺขุโน    อุโปสถํ   ฐเปติ   น   ปวารณํ   ฐเปติ   น
สวจนียํ   กโรติ   น   อนุวาทํ   ปฏฺฐเปติ   น   โอกาสํ  กาเรติ  น
โจเทติ   น   สาเรติ   น   ภิกฺขู   ภิกฺขูหิ   สมฺปโยเชติ  อิเมหิ  โข
ภิกฺขเว   อฏฺฐหงฺเคหิ   สมนฺนาคตสฺส   ภิกฺขุโน  อาปตฺติยา  อปฺปฏิกมฺเม
อุกฺเขปนียกมฺมํ ปฏิปฺปสฺสมฺเภตพฺพํ ฯ
     อาปตฺติยา    อปฺปฏิกมฺเม    อุกฺเขปนียกมฺเม   ปฏิปฺปสฺสมฺเภตพฺพ-
เตจตฺตาฬีสกํ นิฏฺฐิตํ ฯ
     [๒๗๕]   เอวญฺจ  ปน  ภิกฺขเว  ปฏิปฺปสฺสมฺเภตพฺพํ  ฯ  เตน [๑]-
ภิกฺขเว   ฉนฺเนน   ภิกฺขุนา   สงฺฆํ   อุปสงฺกมิตฺวา  เอกํสํ  อุตฺตราสงฺคํ
กริตฺวา    วุฑฺฒานํ    ภิกฺขูนํ   ปาเท   วนฺทิตฺวา   อุกฺกุฏิกํ   นิสีทิตฺวา
อญฺชลึ    ปคฺคเหตฺวา    เอวมสฺส    วจนีโย   อหํ   ภนฺเต   สงฺเฆน
อาปตฺติยา   อปฺปฏิกมฺเม   อุกฺเขปนียกมฺมกโต   สมฺมา   วตฺตามิ   โลมํ
ปาเตมิ   เนตฺถารํ   วตฺตามิ  อาปตฺติยา  อปฺปฏิกมฺเม  อุกฺเขปนียกมฺมสฺส
ปฏิปฺปสฺสทฺธึ    ยาจามีติ    ฯ    ทุติยมฺปิ    ยาจิตพฺพา   ฯ   ตติยมฺปิ
ยาจิตพฺพา ฯ พฺยตฺเตน ภิกฺขุนา ปฏิพเลน สงฺโฆ ญาเปตพฺโพ
     {๒๗๕.๑}   สุณาตุ  เม  ภนฺเต  สงฺโฆ  อยํ  ฉนฺโน  ภิกฺขุ สงฺเฆน
อาปตฺติยา    อปฺปฏิกมฺเม   อุกฺเขปนียกมฺมกโต   สมฺมา   วตฺตติ   โลมํ
ปาเตติ   เนตฺถารํ   วตฺตติ   อาปตฺติยา  อปฺปฏิกมฺเม  อุกฺเขปนียกมฺมสฺส
ปฏิปฺปสฺสทฺธึ   ยาจติ   ฯ   ยทิ   สงฺฆสฺส   ปตฺตกลฺลํ   สงฺโฆ  ฉนฺนสฺส
@เชิงอรรถ: ๑ ม. หิ ฯ
ภิกฺขุโน   อาปตฺติยา   อปฺปฏิกมฺเม   อุกฺเขปนียกมฺมํ  ปฏิปฺปสฺสมฺเภยฺย  ฯ
เอสา ญตฺติ ฯ
     {๒๗๕.๒}   สุณาตุ  เม  ภนฺเต  สงฺโฆ  อยํ  ฉนฺโน  ภิกฺขุ สงฺเฆน
อาปตฺติยา     อปฺปฏิกมฺเม     อุกฺเขปนียกมฺมกโต     สมฺมา    วตฺตติ
โลมํ     ปาเตติ     เนตฺถารํ    วตฺตติ    อาปตฺติยา    อปฺปฏิกมฺเม
อุกฺเขปนียกมฺมสฺส     ปฏิปฺปสฺสทฺธึ    ยาจติ    ฯ    สงฺโฆ    ฉนฺนสฺส
ภิกฺขุโน   อาปตฺติยา   อปฺปฏิกมฺเม   อุกฺเขปนียกมฺมํ   ปฏิปฺปสฺสมฺเภติ  ฯ
ยสฺสายสฺมโต    ขมติ    ฉนฺนสฺส    ภิกฺขุโน   อาปตฺติยา   อปฺปฏิกมฺเม
อุกฺเขปนียกมฺมสฺส    ปฏิปฺปสฺสทฺธิ    โส    ตุณฺหสฺส    ยสฺส    นกฺขมติ
โส ภาเสยฺย ฯ
     {๒๗๕.๓}   ทุติยมฺปิ  เอตมตฺถํ  วทามิ  ฯเปฯ  ตติยมฺปิ  เอตมตฺถํ
วทามิ  ฯ  สุณาตุ  เม  ภนฺเต  สงฺโฆ อยํ ฉนฺโน ภิกฺขุ สงฺเฆน อาปตฺติยา
อปฺปฏิกมฺเม    อุกฺเขปนียกมฺมกโต    สมฺมา    วตฺตติ   โลมํ   ปาเตติ
เนตฺถารํ     วตฺตติ     อาปตฺติยา    อปฺปฏิกมฺเม    อุกฺเขปนียกมฺมสฺส
ปฏิปฺปสฺสทฺธึ    ยาจติ    ฯ    สงฺโฆ   ฉนฺนสฺส   ภิกฺขุโน   อาปตฺติยา
อปฺปฏิกมฺเม     อุกฺเขปนียกมฺมํ    ปฏิปฺปสฺสมฺเภติ    ฯ    ยสฺสายสฺมโต
ขมติ   ฉนฺนสฺส   ภิกฺขุโน   อาปตฺติยา   อปฺปฏิกมฺเม   อุกฺเขปนียกมฺมสฺส
ปฏิปฺปสฺสทฺธิ โส ตุณฺหสฺส ยสฺส นกฺขมติ โส ภาเสยฺย ฯ
     {๒๗๕.๔}   ปฏิปฺปสฺสทฺธํ   สงฺเฆน   ฉนฺนสฺส  ภิกฺขุโน  อาปตฺติยา
อปฺปฏิกมฺเม    อุกฺเขปนียกมฺมํ    ขมติ    สงฺฆสฺส   ตสฺมา   ตุณฺหี   ฯ
เอวเมตํ ธารยามีติ ฯ
     อาปตฺติยา อปฺปฏิกมฺเม อุกฺเขปนียกมฺมํ ฉฏฺฐํ นิฏฺฐิตํ ๑- ฯ
@เชิงอรรถ: ๑ ม. ยุ. นิฏฺฐิตํ ฉฏฺฐํ ฯ
     [๒๗๖]   เตน  สมเยน  พุทฺโธ  ภควา  สาวตฺถิยํ  วิหรติ เชตวเน
อนาถปิณฺฑิกสฺส   อาราเม   ฯ   เตน   โข   ปน   สมเยน  อริฏฺฐสฺส
นาม   ภิกฺขุโน  คนฺธพาธิปุพฺพสฺส  ๑-  เอวรูปํ  ปาปกํ  ทิฏฺฐิคตํ  อุปฺปนฺนํ
โหติ    ตถาหํ   ภควตา   ธมฺมํ   เทสิตํ   อาชานามิ   ยถา   เยเม
อนฺตรายิกา     ธมฺมา     วุตฺตา     ภควตา     เต     ปฏิเสวโต
อนฺตรายายาติ   ฯ  อสฺโสสุํ  โข  สมฺพหุลา  ภิกฺขู  อริฏฺฐสฺส  กิร  นาม
ภิกฺขุโน    คนฺธพาธิปุพฺพสฺส    เอวรูปํ    ปาปกํ    ทิฏฺฐิคตํ    อุปฺปนฺนํ
ตถาหํ   ภควตา   ธมฺมํ   เทสิตํ  อาชานามิ  ยถา  เยเม  อนฺตรายิกา
ธมฺมา วุตฺตา ภควตา เต ปฏิเสวโต นาลํ อนฺตรายายาติ ฯ
     {๒๗๖.๑}   อถโข  เต  ภิกฺขู เยน อริฏฺโฐ ภิกฺขุ คนฺธพาธิปุพฺโพ ๒-
เตนุปสงฺกมึสุ   อุปสงฺกมิตฺวา   อริฏฺฐํ   ภิกฺขุํ   คนฺธพาธิปุพฺพํ  เอตทโวจุํ
สจฺจํ   กิร   เต   อาวุโส   อริฏฺฐ  เอวรูปํ  ปาปกํ  ทิฏฺฐิคตํ  อุปฺปนฺนํ
ตถาหํ   ภควตา   ธมฺมํ   เทสิตํ  อาชานามิ  ยถา  เยเม  อนฺตรายิกา
ธมฺมา   วุตฺตา   ภควตา   เต   ปฏิเสวโต   นาลํ  อนฺตรายายาติ  ฯ
เอวํ   พฺยา   โข   อหํ   อาวุโส   ภควตา  ธมฺมํ  เทสิตํ  อาชานามิ
ยถา     เยเม    อนฺตรายิกา    ธมฺมา    วุตฺตา    ภควตา    เต
ปฏิเสวโต    นาลํ    อนฺตรายายาติ    ฯ    มา    อาวุโส   อริฏฺฐ
เอวํ    อวจ   มา   ภควนฺตํ   อพฺภาจิกฺขิ   น   หิ   สาธุ   ภควโต
@เชิงอรรถ: ๑ ม. ยุ. คทฺธพาธิปุพฺพสฺส ฯ อปรํปิ อีทิสเมว ฯ  ๒ ม. ยุ. คทฺธพาธิปุพฺโพ ฯ
อพฺภกฺขานํ   น   หิ   ภควา   เอวํ  วเทยฺย  อเนกปริยาเยน  อาวุโส
อริฏฺฐ    อนฺตรายิกา   ธมฺมา   วุตฺตา   ภควตา   อลญฺจ   ปน   เต
ปฏิเสวโต    อนฺตรายาย    อปฺปสฺสาทา    กามา    วุตฺตา   ภควตา
พหุทุกฺขา   พหูปายาสา   ๑-   อาทีนโว  เอตฺถ  ภิยฺโย  อฏฺฐิกงฺกลูปมา
กามา   วุตฺตา   ภควตา   พหุทุกฺขา   พหูปายาสา   อาทีนโว   เอตฺถ
ภิยฺโย    มํสเปสูปมา   กามา   วุตฺตา   ภควตา   ฯเปฯ   ติณุกฺกูปมา
กามา   วุตฺตา   ภควตา   ฯเปฯ  ๒-  องฺคารกาสูปมา  กามา  วุตฺตา
ภควตา  ฯเปฯ  สุปินกูปมา  กามา  วุตฺตา  ภควตา  ฯเปฯ  ยาจิตกูปมา
กามา  วุตฺตา  ภควตา  ฯเปฯ  รุกฺขผลูปมา  กามา วุตฺตา ภควตา ฯเปฯ
อสิสูนูปมา     กามา     วุตฺตา     ภควตา    ฯเปฯ    สตฺติสูลูปมา
กามา   วุตฺตา   ภควตา   ฯเปฯ  สปฺปสิรูปมา  กามา  วุตฺตา  ภควตา
พหุทุกฺขา พหูปายาสา อาทีนโว เอตฺถ ภิยฺโยติ ฯ
     {๒๗๖.๒}   เอวํปิ   โข   อริฏฺโฐ   ภิกฺขุ  คนฺธพาธิปุพฺโพ  เตหิ
ภิกฺขูหิ   วุจฺจมาโน  ตเถว  ตํ  ปาปกํ  ทิฏฺฐิคตํ  ถามสา  ปรามสฺส  ๔-
อภินิวิสฺส  โวหรติ  เอวํ  พฺยา  โข  อหํ  อาวุโส  ภควตา  ธมฺมํ เทสิตํ
อาชานามิ   ยถา   เยเม   อนฺตรายิกา   ธมฺมา  วุตฺตา  ภควตา  เต
ปฏิเสวโต  นาลํ  อนฺตรายายาติ  ฯ  ยโต  จ ๕- โข เต ภิกฺขู นาสกฺขึสุ
อริฏฺฐํ   ภิกฺขุํ  คนฺธพาธิปุพฺพํ  เอตสฺมา  ปาปกา  ทิฏฺฐิคตา  วิเวเจตุํ  ฯ
อถโข   เต   ภิกฺขู  เยน  ภควา  เตนุปสงฺกมึสุ  อุปสงฺกมิตฺวา  ภควโต
เอตมตฺถํ อาโรเจสุํ ฯ
@เชิงอรรถ: ๑ ม. พหุปายาสา ฯ   ๒ ม. อิโต ปรํ สตฺต เปยฺยาลา นตฺถิ ฯ  ๓ ม. ปรามาสา ฯ
@๔ ยุ. จสทฺโท น ทิสฺสติ ฯ
     [๒๗๗]   อถโข   ภควา   เอตสฺมึ   นิทาเน   เอตสฺมึ  ปกรเณ
ภิกฺขุสงฺฆํ    สนฺนิปาตาเปตฺวา   อริฏฺฐํ   ภิกฺขุํ   คนฺธพาธิปุพฺพํ   ปฏิปุจฺฉิ
สจฺจํ   กิร   เต   อริฏฺฐ   เอวรูปํ   ปาปกํ  ทิฏฺฐิคตํ  อุปฺปนฺนํ  ตถาหํ
ภควตา   ธมฺมํ   เทสิตํ   อาชานามิ  ยถา  เยเม  อนฺตรายิกา  ธมฺมา
วุตฺตา   ภควตา   เต   ปฏิเสวโต   นาลํ   อนฺตรายายาติ   ฯ  เอวํ
พฺยา   โข   อหํ   ภนฺเต   ภควตา   ธมฺมํ   เทสิตํ  อาชานามิ  ยถา
เยเม   อนฺตรายิกา   ธมฺมา   วุตฺตา   ภควตา  เต  ปฏิเสวโต  นาลํ
อนฺตรายายาติ   ฯ   กสฺส   นุ  โข  นาม  ตฺวํ  โมฆปุริส  มยา  เอวํ
ธมฺมํ    เทสิตํ   อาชานาสิ   นนุ   มยา   โมฆปุริส   อเนกปริยาเยน
อนฺตรายิกา   ธมฺมา   วุตฺตา  อลญฺจ  ปน  เต  ปฏิเสวโต  อนฺตรายาย
อปฺปสฺสาทา   กามา   วุตฺตา   มยา   พหุทุกฺขา  พหูปายาสา  อาทีนโว
เอตฺถ    ภิยฺโย    อฏฺฐิกงฺกลูปมา   กามา   วุตฺตา   มยา   พหุทุกฺขา
พหูปายาสา   อาทีนโว   เอตฺถ   ภิยฺโย   มํสเปสูปมา   กามา  วุตฺตา
มยา   ฯเปฯ  ติณุกฺกูปมา  กามา  วุตฺตา  มยา  ฯเปฯ  องฺคารกาสูปมา
กามา   วุตฺตา   มยา  ฯเปฯ  สุปินกูปมา  กามา  วุตฺตา  มยา  ฯเปฯ
ยาจิตกูปมา  กามา  วุตฺตา  มยา  ฯเปฯ  รุกฺขผลูปมา กามา วุตฺตา มยา
ฯเปฯ   อสิสูนูปมา   กามา   วุตฺตา  มยา  ฯเปฯ  สตฺติสูลูปมา  กามา
วุตฺตา   มยา   ฯเปฯ   สปฺปสิรูปมา   กามา   วุตฺตา  มยา  พหุทุกฺขา
พหูปายาสา   อาทีนโว   เอตฺถ   ภิยฺโย   อถ  จ  ปน  ตฺวํ  โมฆปุริส
อตฺตนา  ทุคฺคหิเตน  ทิฏฺฐิคเตน  ๒-  อเมฺห  เจว อพฺภาจิกฺขสิ อตฺตานญฺจ
@เชิงอรรถ: ๑ ม. อิโต ปรํ สตฺตเปยฺยาลา นตฺถิ ฯ    ๒ ม. ยุ. อยํ ปาโฐ นตฺถิ ฯ
ขณสิ    พหุญฺจ   อปุญฺญํ   ปสวสิ   ตํ   หิ   เต   โมฆปุริส   ภวิสฺสติ
ทีฆรตฺตํ    อหิตาย    ทุกฺขาย    เนตํ   โมฆปุริส   อปฺปสนฺนานํ   วา
ปสาทาย  ปสนฺนานํ  วา  ภิยฺโยภาวาย  ฯเปฯ  วิครหิตฺวา  ฯเปฯ  ธมฺมึ
กถํ   กตฺวา   ภิกฺขู   อามนฺเตสิ   เตนหิ   ภิกฺขเว   สงฺโฆ  อริฏฺฐสฺส
ภิกฺขุโน     คนฺธพาธิปุพฺพสฺส     ปาปิกาย    ทิฏฺฐิยา    อปฺปฏินิสฺสคฺเค
อุกฺเขปนียกมฺมํ กโรตุ อสมฺโภคํ สงฺเฆน ฯ
     [๒๗๘]   เอวญฺจ   ปน   ภิกฺขเว  กาตพฺพํ  ปฐมํ  อริฏฺโฐ  ภิกฺขุ
คนฺธพาธิปุพฺโพ   ๑-   โจเทตพฺโพ   โจเทตฺวา  สาเรตพฺโพ  สาเรตฺวา
อาปตฺติ   อาโรเปตพฺพา  ๒-  อาปตฺตึ  อาโรเปตฺวา  พฺยตฺเตน  ภิกฺขุนา
ปฏิพเลน สงฺโฆ ญาเปตพฺโพ
     {๒๗๘.๑}   สุณาตุ   เม   ภนฺเต   สงฺโฆ   อริฏฺฐสฺส   ภิกฺขุโน
คนฺธพาธิปุพฺพสฺส     เอวรูปํ    ปาปกํ    ทิฏฺฐิคตํ    อุปฺปนฺนํ    ตถาหํ
ภควตา   ธมฺมํ   เทสิตํ   อาชานามิ  ยถา  เยเม  อนฺตรายิกา  ธมฺมา
วุตฺตา   ภควตา   เต   ปฏิเสวโต   นาลํ  อนฺตรายายาติ  ฯ  โส  ตํ
ทิฏฺฐึ    นปฺปฏินิสฺสชฺชติ    ฯ    ยทิ    สงฺฆสฺส    ปตฺตกลฺลํ    สงฺโฆ
อริฏฺฐสฺส      ภิกฺขุโน      คนฺธพาธิปุพฺพสฺส     ปาปิกาย     ทิฏฺฐิยา
อปฺปฏินิสฺสคฺเค    อุกฺเขปนียกมฺมํ    กเรยฺย    อสมฺโภคํ   สงฺเฆน   ฯ
เอสา ญตฺติ ฯ
     {๒๗๘.๒}   สุณาตุ   เม   ภนฺเต   สงฺโฆ   อริฏฺฐสฺส   ภิกฺขุโน
คนฺธพาธิปุพฺพสฺส     เอวรูปํ    ปาปกํ    ทิฏฺฐิคตํ    อุปฺปนฺนํ    ตถาหํ
ภควตา   ธมฺมํ   เทสิตํ   อาชานามิ  ยถา  เยเม  อนฺตรายิกา  ธมฺมา
วุตฺตา  ภควตา  เต  ปฏิเสวโต  นาลํ  อนฺตรายายาติ  ฯ  โส  ตํ ทิฏฺฐึ
@เชิงอรรถ: ๑ ม. ยุ. อยํ ปาโฐ นตฺถิ ฯ   ๒ ม. อาปตฺตึ อาโรเปตพฺโพ ฯ ยุ. อาปตฺตึ โรเปตพฺโพ ฯ
@สพฺพตฺถ อีทิสเมว ฯ
นปฺปฏินิสฺสชฺชติ    ฯ    สงฺโฆ    อริฏฺฐสฺส   ภิกฺขุโน   คนฺธพาธิปุพฺพสฺส
ปาปิกาย   ทิฏฺฐิยา   อปฺปฏินิสฺสคฺเค   อุกฺเขปนียกมฺมํ   กโรติ  อสมฺโภคํ
สงฺเฆน   ฯ   ยสฺสายสฺมโต   ขมติ  อริฏฺฐสฺส  ภิกฺขุโน  คนฺธพาธิปุพฺพสฺส
ปาปิกาย   ทิฏฺฐิยา   อปฺปฏินิสฺสคฺเค   อุกฺเขปนียกมฺมสฺส  กรณํ  อสมฺโภคํ
สงฺเฆน โส ตุณฺหสฺส ยสฺส นกฺขมติ โส ภาเสยฺย ฯ
     {๒๗๘.๓}   ทุติยมฺปิ  เอตมตฺถํ  วทามิ  ฯเปฯ  ตติยมฺปิ  เอตมตฺถํ
วทามิ  ฯ  สุณาตุ  เม  ภนฺเต  สงฺโฆ  อริฏฺฐสฺส ภิกฺขุโน คนฺธพาธิปุพฺพสฺส
เอวรูปํ   ปาปกํ   ทิฏฺฐิคตํ   อุปฺปนฺนํ   ตถาหํ   ภควตา   ธมฺมํ  เทสิตํ
อาชานามิ   ยถา   เยเม   อนฺตรายิกา   ธมฺมา  วุตฺตา  ภควตา  เต
ปฏิเสวโต   นาลํ  อนฺตรายายาติ  ฯ  โส  ตํ  ทิฏฺฐึ  นปฺปฏินิสฺสชฺชติ  ฯ
สงฺโฆ    อริฏฺฐสฺส    ภิกฺขุโน    คนฺธพาธิปุพฺพสฺส   ปาปิกาย   ทิฏฺฐิยา
อปฺปฏินิสฺสคฺเค    อุกฺเขปนียกมฺมํ    กโรติ    อสมฺโภคํ    สงฺเฆน   ฯ
ยสฺสายสฺมโต   ขมติ   อริฏฺฐสฺส   ภิกฺขุโน   คนฺธพาธิปุพฺพสฺส   ปาปิกาย
ทิฏฺฐิยา   อปฺปฏินิสฺสคฺเค   อุกฺเขปนียกมฺมสฺส   กรณํ   อสมฺโภคํ  สงฺเฆน
โส ตุณฺหสฺส ยสฺส นกฺขมติ โส ภาเสยฺย ฯ
     {๒๗๘.๔}   กตํ   สงฺเฆน   อริฏฺฐสฺส   ภิกฺขุโน  คนฺธพาธิปุพฺพสฺส
ปาปิกาย     ทิฏฺฐิยา     อปฺปฏินิสฺสคฺเค    อุกฺเขปนียกมฺมํ    อสมฺโภคํ
สงฺเฆน ขมติ สงฺฆสฺส ตสฺมา ตุณฺหี ฯ เอวเมตํ ธารยามีติ ฯ
     {๒๗๘.๕}   อาวาสปรมฺปรญฺจ   ภิกฺขเว   สํสถ   อริฏฺโฐ   ภิกฺขุ
คนฺธพาธิปุพฺโพ    สงฺเฆน    ๑-   ปาปิกาย   ทิฏฺฐิยา   อปฺปฏินิสฺสคฺเค
@เชิงอรรถ: ๑ ม. ยุ. อยํ ปาโฐ นตฺถิ ฯ
อุกฺเขปนียกมฺมกโต อสมฺโภคํ สงฺเฆนาติ ฯ
     [๒๗๙]   ตีหิ   ภิกฺขเว   องฺเคหิ  สมนฺนาคตํ  ปาปิกาย  ทิฏฺฐิยา
อปฺปฏินิสฺสคฺเค     อุกฺเขปนียกมฺมํ     อธมฺมกมฺมญฺเจว     ๑-    โหติ
อวินยกมฺมญฺจ    ทุวูปสนฺตญฺจ    อสมฺมุขา    กตํ    โหติ   อปฺปฏิปุจฺฉา
กตํ   โหติ   อปฺปฏิญฺญาย   กตํ   โหติ  อิเมหิ  โข  ภิกฺขเว  ตีหงฺเคหิ
สมนฺนาคตํ     ปาปิกาย    ทิฏฺฐิยา    อปฺปฏินิสฺสคฺเค    อุกฺเขปนียกมฺมํ
อธมฺมกมฺมญฺเจว ๑- โหติ อวินยกมฺมญฺจ ทุวูปสนฺตญฺจ ฯ
     [๒๘๐]   อปเรหิปิ  ฯเปฯ  อนาปตฺติยา  กตํ โหติ อเทสนาคามินิยา
อาปตฺติยา      กตํ      โหติ      เทสิตาย     อาปตฺติยา     กตํ
โหติ ฯเปฯ
     [๒๘๑]   อปเรหิปิ   ฯเปฯ  อโจเทตฺวา  กตํ  โหติ  อสาเรตฺวา
กตํ โหติ อาปตฺตึ อนาโรเปตฺวา กตํ โหติ ฯเปฯ
     [๒๘๒]   อปเรหิปิ   ฯเปฯ   อสมฺมุขา   กตํ   โหติ   อธมฺเมน
กตํ   โหติ   วคฺเคน   กตํ   โหติ   อิเมหิ   โข   ภิกฺขเว  ตีหงฺเคหิ
สมนฺนาคตํ ฯเปฯ
     [๒๘๓]   อปเรหิปิ   ฯเปฯ   อปฺปฏิปุจฺฉา   กตํ  โหติ  อธมฺเมน
กตํ   โหติ   วคฺเคน   กตํ   โหติ   อิเมหิ   โข   ภิกฺขเว  ตีหงฺเคหิ
สมนฺนาคตํ ฯเปฯ
     [๒๘๔]   อปเรหิปิ   ฯเปฯ   อปฺปฏิญฺญาย  กตํ  โหติ  อธมฺเมน
กตํ   โหติ   วคฺเคน   กตํ   โหติ   อิเมหิ   โข   ภิกฺขเว  ตีหงฺเคหิ
@เชิงอรรถ: ๑ ม. เอวสทฺโท นตฺถิ ฯ
สมนฺนาคตํ ฯเปฯ
     [๒๘๕]   อปเรหิปิ   ฯเปฯ   อนาปตฺติยา   กตํ  โหติ  อธมฺเมน
กตํ   โหติ   วคฺเคน   กตํ   โหติ   อิเมหิ   โข   ภิกฺขเว  ตีหงฺเคหิ
สมนฺนาคตํ ฯเปฯ
     [๒๘๖]   อปเรหิปิ   ฯเปฯ   อเทสนาคามินิยา   อาปตฺติยา  กตํ
โหติ อธมฺเมน กตํ โหติ วคฺเคน กตํ โหติ ฯเปฯ
     [๒๘๗]   อปเรหิปิ   ฯเปฯ   เทสิตาย   อาปตฺติยา   กตํ  โหติ
อธมฺเมน   กตํ   โหติ   วคฺเคน   กตํ   โหติ   อิเมหิ   โข  ภิกฺขเว
ตีหงฺเคหิ ฯเปฯ
     [๒๘๘]   อปเรหิปิ   ฯเปฯ   อโจเทตฺวา   กตํ  โหติ  อธมฺเมน
กตํ   โหติ   วคฺเคน   กตํ   โหติ    อิเมหิ   โข  ภิกฺขเว  ตีหงฺเคหิ
สมนฺนาคตํ ฯเปฯ
     [๒๘๙]   อปเรหิปิ  ฯเปฯ  อสาเรตฺวา กตํ โหติ อธมฺเมน กตํ โหติ
วคฺเคน กตํ โหติ อิเมหิ โข ภิกฺขเว ตีหงฺเคหิ สมนฺนาคตํ ฯเปฯ
     [๒๙๐]   อปเรหิปิ   ฯเปฯ   อาปตฺตึ  อนาโรเปตฺวา  กตํ  โหติ
อธมฺเมน   กตํ   โหติ   วคฺเคน   กตํ   โหติ   อิเมหิ   โข  ภิกฺขเว
ตีหงฺเคหิ   สมนฺนาคตํ  ปาปิกาย  ทิฏฺฐิยา  อปฺปฏินิสฺสคฺเค  อุกฺเขปนียกมฺมํ
อธมฺมกมฺมญฺเจว โหติ อวินยกมฺมญฺจ ทุวูปสนฺตญฺจ ฯ
     ปาปิกาย  ทิฏฺฐิยา อปฺปฏินิสฺสคฺเค อุกฺเขปนียกมฺเม อธมฺมกมฺมทฺวาทสกํ
นิฏฺฐิตํ ฯ
     [๒๙๑]   ตีหิ   ภิกฺขเว   องฺเคหิ  สมนฺนาคตํ  ปาปิกาย  ทิฏฺฐิยา
อปฺปฏินิสฺสคฺเค    อุกฺเขปนียกมฺมํ    ธมฺมกมฺมญฺเจว   โหติ   วินยกมฺมญฺจ
สุวูปสนฺตญฺจ     สมฺมุขา     กตํ    โหติ    ปฏิปุจฺฉา    กตํ    โหติ
ปฏิญฺญาย   กตํ   โหติ   อิเมหิ   โข   ภิกฺขเว   ตีหงฺเคหิ  สมนฺนาคตํ
ปาปิกาย    ทิฏฺฐิยา    อปฺปฏินิสฺสคฺเค   อุกฺเขปนียกมฺมํ   ธมฺมกมฺมญฺเจว
โหติ วินยกมฺมญฺจ สุวูปสนฺตญฺจ ฯ
     [๒๙๒]   อปเรหิปิ   ภิกฺขเว   ตีหงฺเคหิ   สมนฺนาคตํ   ปาปิกาย
ทิฏฺฐิยา     อปฺปฏินิสฺสคฺเค    อุกฺเขปนียกมฺมํ    ธมฺมกมฺมญฺเจว    โหติ
วินยกมฺมญฺจ    สุวูปสนฺตญฺจ   อาปตฺติยา   กตํ   โหติ   เทสนาคามินิยา
อาปตฺติยา กตํ โหติ อเทสิตาย อาปตฺติยา กตํ โหติ ฯเปฯ
     [๒๙๓]   อปเรหิปิ   ฯเปฯ   โจเทตฺวา   กตํ  โหติ  สาเรตฺวา
กตํ โหติ อาปตฺตึ อาโรเปตฺวา กตํ โหติ ฯเปฯ
     [๒๙๔]   อปเรหิปิ   ฯเปฯ   สมฺมุขา   กตํ  โหติ  ธมฺเมน  กตํ
โหติ    สมคฺเคน    กตํ    โหติ   อิเมหิ   โข   ภิกฺขเว   ตีหงฺเคหิ
สมนฺนาคตํ ฯเปฯ
     [๒๙๕]   อปเรหิปิ   ฯเปฯ   ปฏิปุจฺฉา  กตํ  โหติ  ธมฺเมน  กตํ
โหติ สมคฺเคน กตํ โหติ อิเมหิ โข ภิกฺขเว ตีหงฺเคหิ ฯเปฯ
     [๒๙๖]   อปเรหิปิ   ฯเปฯ   ปฏิญฺญาย   กตํ   โหติ    ธมฺเมน
กตํ โหติ สมคฺเคน กตํ โหติ อิเมหิ โข ภิกฺขเว ตีหงฺเคหิ ฯเปฯ
     [๒๙๗]   อปเรหิปิ   ฯเปฯ   อาปตฺติยา   กตํ   โหติ   ธมฺเมน
กตํ โหติ สมคฺเคน กตํ โหติ อิเมหิ โข ภิกฺขเว ตีหงฺเคหิ ฯเปฯ
     [๒๙๘]   อปเรหิปิ  ฯเปฯ  เทสนาคามินิยา  อาปตฺติยา  กตํ  โหติ
ธมฺเมน กตํ โหติ สมคฺเคน กตํ โหติ ฯเปฯ
     [๒๙๙]   อปเรหิปิ   ฯเปฯ   อเทสิตาย   อาปตฺติยา  กตํ  โหติ
ธมฺเมน กตํ โหติ สมคฺเคน กตํ โหติ ฯเปฯ
     [๓๐๐]   อปเรหิปิ   ฯเปฯ  โจเทตฺวา  กตํ  โหติ  ธมฺเมน  กตํ
โหติ สมคฺเคน กตํ โหติ อิเมหิ โข ภิกฺขเว ตีหงฺเคหิ ฯเปฯ
     [๓๐๑]   อปเรหิปิ   ฯเปฯ  สาเรตฺวา  กตํ  โหติ  ธมฺเมน  กตํ
โหติ    สมคฺเคน    กตํ    โหติ   อิเมหิ   โข   ภิกฺขเว   ตีหงฺเคหิ
สมนฺนาคตํ ฯเปฯ
     [๓๐๒]   อปเรหิปิ   ฯเปฯ   อาปตฺตึ   อาโรเปตฺวา  กตํ  โหติ
ธมฺเมน   กตํ   โหติ   สมคฺเคน   กตํ   โหติ   อิเมหิ   โข  ภิกฺขเว
ตีหงฺเคหิ      สมนฺนาคตํ     ปาปิกาย     ทิฏฺฐิยา     อปฺปฏินิสฺสคฺเค
อุกฺเขปนียกมฺมํ ธมฺมกมฺมญฺเจว โหติ วินยกมฺมญฺจ สุวูปสนฺตญฺจ ฯ
     ปาปิกาย      ทิฏฺฐิยา      อปฺปฏินิสฺสคฺเค      อุกฺเขปนียกมฺเม
ธมฺมกมฺมทฺวาทสกํ นิฏฺฐิตํ ฯ
     [๓๐๓]   ตีหิ    ภิกฺขเว    องฺเคหิ    สมนฺนาคตสฺส   ภิกฺขุโน
อากงฺขมาโน   สงฺโฆ  ปาปิกาย  ทิฏฺฐิยา  อปฺปฏินิสฺสคฺเค  อุกฺเขปนียกมฺมํ
กเรยฺย   ภณฺฑนการโก   โหติ   กลหการโก  วิวาทการโก  ภสฺสการโก
สงฺเฆ    อธิกรณการโก    พาโล    โหติ    อพฺยตฺโต   อาปตฺติพหุโล
อนปทาโน     คิหิสํสฏฺโฐ     วิหรติ     อนนุโลมิเกหิ     คิหิสํสคฺเคหิ
อิเมหิ   โข   ภิกฺขเว   ตีหงฺเคหิ  สมนฺนาคตสฺส  ภิกฺขุโน  อากงฺขมาโน
สงฺโฆ ปาปิกาย ทิฏฺฐิยา อปฺปฏินิสฺสคฺเค อุกฺเขปนียกมฺมํ กเรยฺย ฯ
     [๓๐๔]   อปเรหิปิ   ภิกฺขเว   ตีหงฺเคหิ   สมนฺนาคตสฺส  ภิกฺขุโน
อากงฺขมาโน      สงฺโฆ     ปาปิกาย     ทิฏฺฐิยา     อปฺปฏินิสฺสคฺเค
อุกฺเขปนียกมฺมํ    กเรยฺย    อธิสีเล   สีลวิปนฺโน   โหติ   อชฺฌาจาเร
อาจารวิปนฺโน    โหติ    อติทิฏฺฐิยา    ทิฏฺฐิวิปนฺโน    โหติ    อิเมหิ
โข   ภิกฺขเว   ตีหงฺเคหิ   สมนฺนาคตสฺส  ภิกฺขุโน  อากงฺขมาโน  สงฺโฆ
ปาปิกาย ทิฏฺฐิยา อปฺปฏินิสฺสคฺเค อุกฺเขปนียกมฺมํ กเรยฺย ฯ
     [๓๐๕]   อปเรหิปิ   ภิกฺขเว   ตีหงฺเคหิ   สมนฺนาคตสฺส  ภิกฺขุโน
อากงฺขมาโน      สงฺโฆ     ปาปิกาย     ทิฏฺฐิยา     อปฺปฏินิสฺสคฺเค
อุกฺเขปนียกมฺมํ     กเรยฺย     พุทฺธสฺส    อวณฺณํ    ภาสติ    ธมฺมสฺส
อวณฺณํ    ภาสติ    สงฺฆสฺส   อวณฺณํ   ภาสติ   อิเมหิ   โข   ภิกฺขเว
ตีหงฺเคหิ    สมนฺนาคตสฺส   ภิกฺขุโน   อากงฺขมาโน   สงฺโฆ   ปาปิกาย
ทิฏฺฐิยา อปฺปฏินิสฺสคฺเค อุกฺเขปนียกมฺมํ กเรยฺย ฯ
     [๓๐๖]   ติณฺณํ   ภิกฺขเว  ภิกฺขูนํ  อากงฺขมาโน  สงฺโฆ  ปาปิกาย
ทิฏฺฐิยา   อปฺปฏินิสฺสคฺเค   อุกฺเขปนียกมฺมํ  กเรยฺย  เอโก  ภณฺฑนการโก
โหติ      กลหการโก      วิวาทการโก      ภสฺสการโก     สงฺเฆ
อธิกรณการโก    เอโก    พาโล    โหติ    อพฺยตฺโต   อาปตฺติพหุโล
อนปทาโน    เอโก   คิหิสํสฏฺโฐ   วิหรติ   อนนุโลมิเกหิ   คิหิสํสคฺเคหิ
อิเมสํ   โข   ภิกฺขเว   ติณฺณํ   ภิกฺขูนํ  อากงฺขมาโน  สงฺโฆ  ปาปิกาย
ทิฏฺฐิยา อปฺปฏินิสฺสคฺเค อุกฺเขปนียกมฺมํ กเรยฺย ฯ
     [๓๐๗]   อปเรสมฺปิ  ภิกฺขเว  ติณฺณํ  ภิกฺขูนํ  อากงฺขมาโน  สงฺโฆ
ปาปิกาย   ทิฏฺฐิยา   อปฺปฏินิสฺสคฺเค   อุกฺเขปนียกมฺมํ   กเรยฺย   เอโก
อธิสีเล    สีลวิปนฺโน    โหติ    เอโก   อชฺฌาจาเร   อาจารวิปนฺโน
โหติ   เอโก   อติทิฏฺฐิยา   ทิฏฺฐิวิปนฺโน   โหติ   อิเมสํ  โข  ภิกฺขเว
ติณฺณํ   ภิกฺขูนํ   อากงฺขมาโน  สงฺโฆ  ปาปิกาย  ทิฏฺฐิยา  อปฺปฏินิสฺสคฺเค
อุกฺเขปนียกมฺมํ กเรยฺย ฯ
     [๓๐๘]   อปเรสมฺปิ  ภิกฺขเว  ติณฺณํ  ภิกฺขูนํ  อากงฺขมาโน  สงฺโฆ
ปาปิกาย   ทิฏฺฐิยา   อปฺปฏินิสฺสคฺเค   อุกฺเขปนียกมฺมํ   กเรยฺย   เอโก
พุทฺธสฺส     อวณฺณํ    ภาสติ    เอโก    ธมฺมสฺส    อวณฺณํ    ภาสติ
เอโก    สงฺฆสฺส    อวณฺณํ    ภาสติ   อิเมสํ   โข   ภิกฺขเว   ติณฺณํ
ภิกฺขูนํ    อากงฺขมาโน    สงฺโฆ   ปาปิกาย   ทิฏฺฐิยา   อปฺปฏินิสฺสคฺเค
อุกฺเขปนียกมฺมํ กเรยฺย ฯ
     ปาปิกาย       ทิฏฺฐิยา      อปฺปฏินิสฺสคฺเค      อุกฺเขปนียกมฺเม
อากงฺขมานจฺฉกฺกํ นิฏฺฐิตํ ฯ
     [๓๐๙]   ปาปิกาย   ทิฏฺฐิยา  อปฺปฏินิสฺสคฺเค  อุกฺเขปนียกมฺมกเตน
ภิกฺขเว   ภิกฺขุนา   สมฺมา   วตฺติตพฺพํ   ฯ   ตตฺรายํ  สมฺมาวตฺตนา  น
อุปสมฺปาเทตพฺพํ   น  นิสฺสโย  ทาตพฺโพ  น  สามเณโร  อุปฏฺฐาเปตพฺโพ
น         ภิกฺขุโนวาทกสมฺมติ         สาทิตพฺพา         สมฺมเตนปิ
ภิกฺขุนิโย    น   โอวทิตพฺพา   ยาย   อาปตฺติยา   สงฺเฆน   ปาปิกาย
ทิฏฺฐิยา   อปฺปฏินิสฺสคฺเค   อุกฺเขปนียกมฺมํ   กตํ   โหติ   สา   อาปตฺติ
น   อาปชฺชิตพฺพา   อญฺญา   วา   ตาทิสิกา   ตโต   วา  ปาปิฏฺฐตรา
กมฺมํ    น    ครหิตพฺพํ    กมฺมิกา   น   ครหิตพฺพา   น   ปกตตฺตสฺส
ภิกฺขุโน    อุโปสโถ    ฐเปตพฺโพ    น    ปวารณา   ฐเปตพฺพา   น
สวจนียํ    กาตพฺพํ    น    อนุวาโท    ปฏฺฐเปตพฺโพ   น   โอกาโส
กาเรตพฺโพ   น   โจเทตพฺโพ   น   สาเรตพฺโพ   น   ภิกฺขู   ภิกฺขูหิ
สมฺปโยเชตพฺพนฺติ ฯ
     ปาปิกาย      ทิฏฺฐิยา      อปฺปฏินิสฺสคฺเค      อุกฺเขปนียกมฺเม
อฏฺฐารสวตฺตํ ๑- นิฏฺฐิตํ ฯ
     [๓๑๐]   อถโข   สงฺโฆ   อริฏฺฐสฺส   ภิกฺขุโน   คนฺธพาธิปุพฺพสฺส
ปาปิกาย   ทิฏฺฐิยา   อปฺปฏินิสฺสคฺเค   อุกฺเขปนียกมฺมํ   อกาสิ  อสมฺโภคํ
สงฺเฆน    ฯ    โส    สงฺเฆน   ปาปิกาย   ทิฏฺฐิยา   อปฺปฏินิสฺสคฺเค
อุกฺเขปนียกมฺมกโต   วิพฺภมิ   ฯ  เย  เต  ภิกฺขู  อปฺปิจฺฉา  ฯเปฯ  เต
อุชฺฌายนฺติ    ขียนฺติ    วิปาเจนฺติ   กถํ   หิ   นาม   อริฏฺโฐ   ภิกฺขุ
คนฺธพาธิปุพฺโพ      สงฺเฆน     ปาปิกาย    ทิฏฺฐิยา    อปฺปฏินิสฺสคฺเค
อุกฺเขปนียกมฺมกโต    วิพฺภมิสฺสตีติ   ฯ   อถโข   เต   ภิกฺขู   ภควโต
เอตมตฺถํ อาโรเจสุํ ฯ
     [๓๑๑]   อถโข   ภควา   เอตสฺมึ   นิทาเน   เอตสฺมึ  ปกรเณ
ภิกฺขุสงฺฆํ    สนฺนิปาตาเปตฺวา   ภิกฺขู   ปฏิปุจฺฉิ   สจฺจํ   กิร   ภิกฺขเว
@เชิงอรรถ: ๑ ม. เตจตฺตาลีสวตฺตํ ฯ
อริฏฺโฐ     ภิกฺขุ    คนฺธพาธิปุพฺโพ    สงฺเฆน    ปาปิกาย    ทิฏฺฐิยา
อปฺปฏินิสฺสคฺเค  อุกฺเขปนียกมฺมกโต  วิพฺภมตีติ  ๑-  ฯ  สจฺจํ  ภควาติ  ฯ
วิครหิ   พุทฺโธ  ภควา  ฯเปฯ  กถํ  หิ  นาม  โส  ภิกฺขเว  โมฆปุริโส
สงฺเฆน    ปาปิกาย    ทิฏฺฐิยา    อปฺปฏินิสฺสคฺเค    อุกฺเขปนียกมฺมกโต
วิพฺภมิสฺสติ    เนตํ    ภิกฺขเว   อปฺปสนฺนานํ   วา   ปสาทาย   ฯเปฯ
วิครหิตฺวา  ธมฺมึ  กถํ  กตฺวา  ภิกฺขู  อามนฺเตสิ  เตนหิ  ภิกฺขเว  สงฺโฆ
ปาปิกาย ทิฏฺฐิยา อปฺปฏินิสฺสคฺเค อุกฺเขปนียกมฺมํ ปฏิปฺปสฺสมฺเภตุ ฯ
     [๓๑๒]   ปญฺจหิ  ภิกฺขเว  องฺเคหิ  สมนฺนาคตสฺส  ภิกฺขุโน ปาปิกาย
ทิฏฺฐิยา     อปฺปฏินิสฺสคฺเค    อุกฺเขปนียกมฺมํ    น    ปฏิปฺปสฺสมฺเภตพฺพํ
อุปสมฺปาเทติ   นิสฺสยํ   เทติ  สามเณรํ  อุปฏฺฐาเปติ  ภิกฺขุโนวาทกสมฺมตึ
สาทิยติ        สมฺมโตปิ       ภิกฺขุนิโย       โอวทติ       อิเมหิ
โข   ภิกฺขเว   ปญฺจหงฺเคหิ   สมนฺนาคตสฺส  ภิกฺขุโน  ปาปิกาย  ทิฏฺฐิยา
อปฺปฏินิสฺสคฺเค อุกฺเขปนียกมฺมํ น ปฏิปฺปสฺสมฺเภตพฺพํ ฯ
     [๓๑๓]   อปเรหิปิ   ภิกฺขเว  ปญฺจหงฺเคหิ  สมนฺนาคตสฺส  ภิกฺขุโน
ปาปิกาย      ทิฏฺฐิยา      อปฺปฏินิสฺสคฺเค      อุกฺเขปนียกมฺมํ     น
ปฏิปฺปสฺสมฺเภตพฺพํ    ยาย    อาปตฺติยา   สงฺเฆน   ปาปิกาย   ทิฏฺฐิยา
อปฺปฏินิสฺสคฺเค   อุกฺเขปนียกมฺมํ   กตํ   โหติ   ตํ   อาปตฺตึ   อาปชฺชติ
อญฺญํ    วา    ตาทิสิกํ    ตโต    วา    ปาปิฏฺฐตรํ   กมฺมํ   ครหติ
กมฺมิเก   ครหติ   อิเมหิ   โข   ภิกฺขเว   ปญฺจหงฺเคหิ   สมนฺนาคตสฺส
ภิกฺขุโน    ปาปิกาย    ทิฏฺฐิยา    อปฺปฏินิสฺสคฺเค   อุกฺเขปนียกมฺมํ   น
@เชิงอรรถ: ๑ ม. วิพฺภมีติ ฯ
ปฏิปฺปสฺสมฺเภตพฺพํ ฯ
     [๓๑๔]   อฏฺฐหิ  ภิกฺขเว  องฺเคหิ  สมนฺนาคตสฺส  ภิกฺขุโน ปาปิกาย
ทิฏฺฐิยา     อปฺปฏินิสฺสคฺเค    อุกฺเขปนียกมฺมํ    น    ปฏิปฺปสฺสมฺเภตพฺพํ
ปกตตฺตสฺส    ภิกฺขุโน    อุโปสถํ   ฐเปติ   ปวารณํ   ฐเปติ   สวจนียํ
กโรติ    อนุวาทํ    ปฏฺฐเปติ   โอกาสํ   กาเรติ   โจเทติ   สาเรติ
ภิกฺขู    ภิกฺขูหิ    สมฺปโยเชติ    อิเมหิ   โข   ภิกฺขเว   อฏฺฐหงฺเคหิ
สมนฺนาคตสฺส     ภิกฺขุโน     ปาปิกาย     ทิฏฺฐิยา     อปฺปฏินิสฺสคฺเค
อุกฺเขปนียกมฺมํ น ปฏิปฺปสฺสมฺเภตพฺพํ ฯ
     ปาปิกาย      ทิฏฺฐิยา      อปฺปฏินิสฺสคฺเค      อุกฺเขปนียกมฺเม
นปฏิปฺปสฺสมฺเภตพฺพอฏฺฐารสกํ ๑- นิฏฺฐิตํ ฯ
     [๓๑๕]   ปญฺจหิ  ภิกฺขเว  องฺเคหิ  สมนฺนาคตสฺส  ภิกฺขุโน ปาปิกาย
ทิฏฺฐิยา     อปฺปฏินิสฺสคฺเค    อุกฺเขปนียกมฺมํ    ปฏิปฺปสฺสมฺเภตพฺพํ    น
อุปสมฺปาเทติ    น   นิสฺสยํ   เทติ   น   สามเณรํ   อุปฏฺฐาเปติ   น
ภิกฺขุโนวาทกสมฺมตึ    สาทิยติ    สมฺมโตปิ    ภิกฺขุนิโย    น   โอวทติ
อิเมหิ   โข   ภิกฺขเว   ปญฺจหงฺเคหิ   สมนฺนาคตสฺส  ภิกฺขุโน  ปาปิกาย
ทิฏฺฐิยา อปฺปฏินิสฺสคฺเค อุกฺเขปนียกมฺมํ ปฏิปฺปสฺสมฺเภตพฺพํ ฯ
     [๓๑๖]   อปเรหิปิ   ภิกฺขเว  ปญฺจหงฺเคหิ  สมนฺนาคตสฺส  ภิกฺขุโน
ปาปิกาย   ทิฏฺฐิยา   อปฺปฏินิสฺสคฺเค   อุกฺเขปนียกมฺมํ   ปฏิปฺปสฺสมฺเภตพฺพํ
ยาย    อาปตฺติยา    สงฺเฆน    ปาปิกาย    ทิฏฺฐิยา   อปฺปฏินิสฺสคฺเค
อุกฺเขปนียกมฺมํ   กตํ   โหติ   ตํ   อาปตฺตึ   น   อาปชฺชติ  อญฺญํ  วา
@เชิงอรรถ: ๑ ม. ...เตจตฺตาลีสกํ ฯ
ตาทิสิกํ    ตโต    วา    ปาปิฏฺฐตรํ    กมฺมํ   น   ครหติ   กมฺมิเก
น    ครหติ    อิเมหิ    โข    ภิกฺขเว   ปญฺจหงฺเคหิ   สมนฺนาคตสฺส
ภิกฺขุโน     ปาปิกาย     ทิฏฺฐิยา     อปฺปฏินิสฺสคฺเค    อุกฺเขปนียกมฺมํ
ปฏิปฺปสฺสมฺเภตพฺพํ ฯ
     [๓๑๗]   อฏฺฐหิ  ภิกฺขเว  องฺเคหิ  สมนฺนาคตสฺส  ภิกฺขุโน ปาปิกาย
ทิฏฺฐิยา     อปฺปฏินิสฺสคฺเค    อุกฺเขปนียกมฺมํ    ปฏิปฺปสฺสมฺเภตพฺพํ    น
ปกตตฺตสฺส    ภิกฺขุโน    อุโปสถํ   ฐเปติ   น   ปวารณํ   ฐเปติ   น
สวจนียํ    กโรติ    น   อนุวาทํ   ปฏฺฐเปติ   น   โอกาสํ   กาเรติ
น   โจเทติ   น   สาเรติ   น   ภิกฺขู   ภิกฺขูหิ   สมฺปโยเชติ  อิเมหิ
โข   ภิกฺขเว   อฏฺฐหงฺเคหิ   สมนฺนาคตสฺส  ภิกฺขุโน  ปาปิกาย  ทิฏฺฐิยา
อปฺปฏินิสฺสคฺเค อุกฺเขปนียกมฺมํ ปฏิปฺปสฺสมฺเภตพฺพํ ฯ
     ปาปิกาย      ทิฏฺฐิยา      อปฺปฏินิสฺสคฺเค      อุกฺเขปนียกมฺเม
ปฏิปฺปสฺสมฺเภตพฺพอฏฺฐารสกํ ๑- นิฏฺฐิตํ ฯ
     [๓๑๘]   เอวญฺจ  ปน  ภิกฺขเว  ปฏิปฺปสฺสมฺเภตพฺพํ  เตน  ภิกฺขเว
ปาปิกาย    ทิฏฺฐิยา    อปฺปฏินิสฺสคฺเค    อุกฺเขปนียกมฺมกเตน   ภิกฺขุนา
สงฺฆํ   อุปสงฺกมิตฺวา   เอกํสํ   อุตฺตราสงฺคํ   กริตฺวา   วุฑฺฒานํ  ภิกฺขูนํ
ปาเท   วนฺทิตฺวา   อุกฺกุฏิกํ   นิสีทิตฺวา   อญฺชลึ  ปคฺคเหตฺวา  เอวมสฺส
วจนีโย   อหํ   ภนฺเต   สงฺเฆน   ปาปิกาย   ทิฏฺฐิยา   อปฺปฏินิสฺสคฺเค
อุกฺเขปนียกมฺมกโต    สมฺมา    วตฺตามิ    โลมํ    ปาเตมิ   เนตฺถารํ
วตฺตามิ     ปาปิกาย    ทิฏฺฐิยา    อปฺปฏินิสฺสคฺเค    อุกฺเขปนียกมฺมสฺส
@เชิงอรรถ: ๑ ม. ...เตจตฺตาลีสกํ ฯ
ปฏิปฺปสฺสทฺธึ    ยาจามีติ    ฯ    ทุติยมฺปิ    ยาจิตพฺพา   ฯ   ตติยมฺปิ
ยาจิตพฺพา ฯ พฺยตฺเตน ภิกฺขุนา ปฏิพเลน สงฺโฆ ญาเปตพฺโพ
     {๓๑๘.๑}   สุณาตุ  เม  ภนฺเต สงฺโฆ อยํ อิตฺถนฺนาโม ภิกฺขุ สงฺเฆน
ปาปิกาย     ทิฏฺฐิยา    อปฺปฏินิสฺสคฺเค    อุกฺเขปนียกมฺมกโต    สมฺมา
วตฺตติ    โลมํ    ปาเตติ    เนตฺถารํ    วตฺตติ   ปาปิกาย   ทิฏฺฐิยา
อปฺปฏินิสฺสคฺเค     อุกฺเขปนียกมฺมสฺส     ปฏิปฺปสฺสทฺธึ     ยาจติ     ฯ
ยทิ   สงฺฆสฺส   ปตฺตกลฺลํ   สงฺโฆ   อิตฺถนฺนามสฺส   ภิกฺขุโน   ปาปิกาย
ทิฏฺฐิยา     อปฺปฏินิสฺสคฺเค     อุกฺเขปนียกมฺมํ    ปฏิปฺปสฺสมฺเภยฺย    ฯ
เอสา ญตฺติ ฯ
     {๓๑๘.๒}   สุณาตุ  เม  ภนฺเต สงฺโฆ อยํ อิตฺถนฺนาโม ภิกฺขุ สงฺเฆน
ปาปิกาย     ทิฏฺฐิยา    อปฺปฏินิสฺสคฺเค    อุกฺเขปนียกมฺมกโต    สมฺมา
วตฺตติ    โลมํ    ปาเตติ    เนตฺถารํ    วตฺตติ   ปาปิกาย   ทิฏฺฐิยา
อปฺปฏินิสฺสคฺเค    อุกฺเขปนียกมฺมสฺส   ปฏิปฺปสฺสทฺธึ   ยาจติ   ฯ   สงฺโฆ
อิตฺถนฺนามสฺส     ภิกฺขุโน     ปาปิกาย     ทิฏฺฐิยา     อปฺปฏินิสฺสคฺเค
อุกฺเขปนียกมฺมํ   ปฏิปฺปสฺสมฺเภติ   ฯ   ยสฺสายสฺมโต  ขมติ  อิตฺถนฺนามสฺส
ภิกฺขุโน     ปาปิกาย    ทิฏฺฐิยา    อปฺปฏินิสฺสคฺเค    อุกฺเขปนียกมฺมสฺส
ปฏิปฺปสฺสทฺธิ โส ตุณฺหสฺส ยสฺส นกฺขมติ โส ภาเสยฺย ฯ
     {๓๑๘.๓}   ทุติยมฺปิ    เอตมตฺถํ    วทามิ    ฯเปฯ   ตติยมฺปิ
เอตมตฺถํ   วทามิ   ฯ   สุณาตุ   เม  ภนฺเต  สงฺโฆ  อยํ  อิตฺถนฺนาโม
ภิกฺขุ   สงฺเฆน   ปาปิกาย   ทิฏฺฐิยา  อปฺปฏินิสฺสคฺเค  อุกฺเขปนียกมฺมกโต
สมฺมา   วตฺตติ   โลมํ   ปาเตติ   เนตฺถารํ  วตฺตติ  ปาปิกาย  ทิฏฺฐิยา
อปฺปฏินิสฺสคฺเค    อุกฺเขปนียกมฺมสฺส   ปฏิปฺปสฺสทฺธึ   ยาจติ   ฯ   สงฺโฆ
อิตฺถนฺนามสฺส     ภิกฺขุโน     ปาปิกาย     ทิฏฺฐิยา     อปฺปฏินิสฺสคฺเค
อุกฺเขปนียกมฺมํ   ปฏิปฺปสฺสมฺเภติ   ฯ   ยสฺสายสฺมโต  ขมติ  อิตฺถนฺนามสฺส
ภิกฺขุโน     ปาปิกาย    ทิฏฺฐิยา    อปฺปฏินิสฺสคฺเค    อุกฺเขปนียกมฺมสฺส
ปฏิปฺปสฺสทฺธิ โส ตุณฺหสฺส ยสฺส นกฺขมติ โส ภาเสยฺย ฯ
     {๓๑๘.๔}   ปฏิปฺปสฺสทฺธํ   ๑-   สงฺเฆน   อิตฺถนฺนามสฺส  ภิกฺขุโน
ปาปิกาย    ทิฏฺฐิยา   อปฺปฏินิสฺสคฺเค   อุกฺเขปนียกมฺมํ   ขมติ   สงฺฆสฺส
ตสฺมา       ตุณฺหี       ฯ       เอวเมตํ      ธารยามีติ      ฯ
ปาปิกาย ทิฏฺฐิยา อปฺปฏินิสฺสคฺเค อุกฺเขปนียกมฺมํ สตฺตมํ นิฏฺฐิตํ ฯ
                             กมฺมกฺขนฺธกํ นิฏฺฐิตํ ปฐมํ ฯ
                              อิมมฺหิ ขนฺธเก วตฺถู สตฺต ฯ
                                   ------------------
                                        ตสฺสุทฺทานํ
     [๓๑๙]   ปณฺฑุกโลหิตกา ภิกฺขู          สยํ ภณฺฑนการกา
               ตาทิเส อุปสงฺกมฺม             อุสฺสาหึสุ จ ภณฺฑเน
               อนุปฺปนฺนานิ ๒- ชายนฺติ    อุปฺปนฺนานิปิ วฑฺฒเร
               อปฺปิจฺฉา เปสลา ภิกฺขู        อุชฺฌายนฺติ ปรีสโต ๓-
               สทฺธมฺมฏฺฐิติโก พุทฺโธ        สยมฺภู อคฺคปุคฺคโล
               อาณาเปสิ ตชฺชนียํ             กมฺมํ สาวตฺถิยํ ชิโน ฯ
@เชิงอรรถ: ๑ โป. ปฏิปฺปสฺสมฺภิตํ ฯ ๒ ม. ยุ. อนุปฺปนฺนาปิ ฯ ๓ ม. ปทสฺสโต ฯ ยุ. ปทสฺสโก ฯ
               อสมฺมุขาปฺปฏิปุจฺฉา          อปฺปฏิญฺญาย กตญฺจ ยํ
               อนาปตฺติ อเทสเน             เทสิตาย กตญฺจ ยํ
               อโจเทตฺวา อสาเรตฺวา        อนาโรเปตฺวา จ ยํ กตํ
               อสมฺมุขา อธมฺเมน             วคฺเคนาปิ จ ยํ กตํ ๑-
               อปฺปฏิปุจฺฉา อธมฺเมน       วคฺเคนาปิ จ ยํ กตํ ๒-
               อปฺปฏิญฺญาย อธมฺเมน     วคฺเคนาปิ จ ยํ กตํ ๓-
               อนาปตฺติยา อธมฺเมน        วคฺเคนาปิ จ ยํ กตํ ๔-
               อเทสนาคามินิยา              อธมฺมวคฺคเมว จ
               เทสิตาย อธมฺเมน              วคฺเคนาปิ ตเถว จ
               อโจเทตฺวา อธมฺเมน           วคฺเคนาปิ ตเถว จ
               อสาเรตฺวา อธมฺเมน           วคฺเคนาปิ ตเถว จ
               อนาโรเปตฺวา อธมฺเมน       วคฺเคนาปิ ตเถว จ
               กณฺหวารนเยเนว               สุกฺกวารํ วิชานิยา ๕- ฯ
               สงฺโฆ อากงฺขมาโน ว ๖-     ยสฺส ตชฺชนียํ กเร
               ภณฺฑนํ พาโล สํสฏฺโฐ        อธิสีเล อชฺฌาจเร
               อติทิฏฺฐิยา วิปนฺนสฺส         สงฺโฆ ตชฺชนิยํ กเร ฯ
@เชิงอรรถ: ๑ ม. ยุ. วคฺเคน จาปิ ยํ กตํ ฯ    ๒-๓-๔ ม. ยุ. ปุน วคฺเคน ยํ กตํ ฯ
@๕ ม. ยุ. สุกฺกวารํปิ ชานิยํ ฯ    ๖ ม. ยุ. จ ฯ
               พุทฺธธมฺมสฺส สงฺฆสฺส         อวณฺณํ โย จ ภาสติ ฯ
               ติณฺณนฺนมฺปิ จ ภิกฺขูนํ        สงฺโฆ ตชฺชนิยํ กเร
               ภณฺฑนการโก เอโก           พาโล สํสคฺคนิสฺสิโต ฯ
               อธิสีเล อชฺฌาจาเร             ตเถว อติทิฏฺฐิยา
               พุทฺธธมฺมสฺส สงฺฆสฺส         อวณฺณํ โย จ ภาสติ ฯ
               ตชฺชนียกมฺมกโต                เอวํ สมฺมานุวตฺตนา
               อุปสมฺปทา นิสฺสโย            สามเณรอุปฏฺฐนา
               ภิกฺขุโนวาทกสมฺมโต ๑-     น กเร ตชฺชนีกโต
               นาปชฺเช ตญฺจ อาปตฺตึ       ตาทิสญฺจ ตโต ปรํ
               กมฺมญฺจ กมฺมิเก เจว ๒-     น ครเห ตถาวิโธ
               อุโปสถํ ปวารณํ                 ปกตตฺตสฺส นฏฺฐเป
               น ๓- สวจนียํ อนุวาโท ๔-  โอกาโส โจทเนน จ
               สารณํ สมฺปโยคญฺจ           น กเรยฺย ตถาวิโธ ฯ
               อุปสมฺปทา นิสฺสโย            สามเณรอุปฏฺฐนา
               โอวาทกสมฺมเตนาปิ          ปญฺจหงฺเคหิ สมฺมติ ๕- ฯ
               ตญฺจาปชฺชติ อาปตฺตึ ๖-    ตาทิสญฺจ ตโต ปรํ
               กมฺมญฺจ กมฺมิเก จาปิ        ครหนฺโต น สมฺมติ ฯ
@เชิงอรรถ: ๑ ม. ยุ. โอวาทสมฺมเตนาปิ ฯ   ๒ ม. ยุ. จาปิ ฯ  ๓ ม. ยุ. นสทฺโท น ทิสฺสติ ฯ
@๔ ม. ยุ. สวจนิอนุวาโท ฯ  ๕ ยุ. ปญฺจองฺโค น สมฺมติ ฯ ม. ปญฺจองฺเคหิ น สมฺมติ ฯ
@๖ ยุ. ตํ อาปชฺชตาปตฺติญฺจ ฯ
               อุโปสถํ ปวารณํ                สวจนียานุวาโท ๑-
               โอกาโส โจทนญฺเจว          สารณา สมฺปโยชนา
               อิเมหฏฺฐงฺเคหิ โย ยุตฺโต     ตชฺชนา นูปสมฺมติ ฯ
               กณฺหวารนเยเนว               สุกฺกวารํ วิชานิยา ฯ
               พาโล อาปตฺติพหุโล          สํสฏฺโฐปิ จ เสยฺยโส
               นิยสฺสกมฺมํ สมฺพุทฺโธ         อาณาเปสิ มหามุนิ ฯ
               กิฏาคิริสฺมึ เทฺว ภิกฺขู          อสฺสชิปุนพฺพสุกา ๒-
               อนาจารมฺปิ วิวิธํ               อาจรึสุ อสญฺญตา
               ปพฺพาชนียํ สมฺพุทฺโธ         กมฺมํ สาวตฺถิยํ ชิโน ฯ
               มจฺฉิกาสณฺเฑ สุธมฺโม        จิตฺตสฺสาวาสิโก อหุ
               ชาติวาเทน ขุํเสติ               สุธมฺโม จิตฺตุปาสกํ
               ปฏิสารณียํ กมฺมํ               อาณาเปสิ ตถาคโต ฯ
               โกสมฺพิยํ ฉนฺนํ ภิกฺขุํ           นิจฺฉนฺตาปตฺติ ปสฺสิตุํ ฯ
               อทสฺสเน อุกฺเขปิตุํ              อาณาเปสิ ชินุตฺตโม ฯ
               ฉนฺโน ตํเยว อาปตฺตึ           ปฏิกาตุํ น อิจฺฉติ
               อุกฺเขปนาปฺปฏิกมฺเม          อาณาเปสิ วินายโก ฯ
               ปาปทิฏฺฐิ อริฏฺฐสฺส            อาสิ อญฺญาณนิสฺสิตา
               ทิฏฺฐิอปฺปฏินิสฺสคฺเค           อุกฺเขปํ ชินภาสิตํ ฯ
               นิยสฺสกมฺมํ ปพฺพชฺชํ ๓-      ตเถว ปฏิสารณี ฯ
@เชิงอรรถ: ๑ ม. ...จโนวาโท ฯ    ๒ ยุ. อสฺสชิปุนพฺพสู ฯ     ๓ ยุ. ปพฺพาชํ ฯ
               อทสฺสนาปฺปฏิกมฺเม           อนิสฺสคฺเค จ ทิฏฺฐิยา
               ทวานาจารุปฆาตี               มิจฺฉาอาชีวเมว จ
               ปพฺพาชนียกมฺมมฺหิ            อติเรกปทา อิเม ฯ
               อลาภาวณฺณา เทฺว ปญฺจ    เทฺว ปญฺจกาตินามกา
               ปฏิสารณียกมฺมมฺหิ            อติเรกปทา อิเม ฯ
               ตชฺชนียํ นิยสฺสญฺจ             ทุเว กมฺมาปิ สาทิสา ฯ
               ปพฺพชฺชา ๑- ปฏิสาริ จ      ทฺวฏฺฐอูนาริตฺตกา ๒-
               ตโย อุกฺเขปนียกมฺมา ๓-    สทิสา เต วิภตฺติโต
               ตชฺชนียนเยนาปิ                เสสํ กมฺมํ วิชานิยาติ ฯ
@เชิงอรรถ: ๑ ยุ. ปพฺพาชา ฯ  ๒ ม. ยุ. ปฏิสาริ จ อตฺถิ ปทาติริตฺตตา ฯ
@๓ ม. ยุ. อุกฺเขปนา กมฺมา ฯ


             เนื้อความพระไตรปิฎกฉบับภาษาบาลีอักษรไทย เล่มที่ ๖ หน้าที่ ๗๕-๑๒๗.
http://84000.org/tipitaka/read/pali_item_s.php?book=6&item=174&items=146&modeTY=2
             อ่านโดยใช้เครื่องหมาย [เลขข้อ] เป็นเกณฑ์แบ่งข้อ :-
http://84000.org/tipitaka/read/pali_item_s.php?book=6&item=174&items=146&modeTY=2&mode=bracket
             อ่านเทียบพระไตรปิฎกฉบับภาษาบาลีอักษรโรมัน :-
http://84000.org/tipitaka/read/roman_item_s.php?book=6&item=174&items=146&modeTY=2
             อ่านเทียบพระไตรปิฎกภาษาไทยฉบับหลวง :-
http://84000.org/tipitaka/read/byitem_s.php?book=6&item=174&items=146&modeTY=2
             ศึกษาอรรถกถานี้ได้ที่ :-
http://84000.org/tipitaka/attha/attha.php?b=6&i=174
             The Pali Atthakatha in Thai :-
http://84000.org/tipitaka/atthapali/read_th.php?B=3&A=5742
             The Pali Atthakatha in Roman :-
http://84000.org/tipitaka/atthapali/read_rm.php?B=3&A=5742
             สารบัญพระไตรปิฎกเล่มที่ ๖
http://84000.org/tipitaka/read/?index_6