พระไตรปิฎกเล่มที่ ๑๙ ภาษาบาลี อักษรไทย
 พระสุตตันตปิฎกเล่มที่ ๑๑ สุตฺต. สํ. มหาวารวคฺโค

     [๖๐๑]   สาวตฺถีนิทานํ  ฯ  อถ  โข  สคารโว ๑- พฺราหฺมโณ เยน
ภควา     เตนุปสงฺกมิ    อุปสงฺกมิตฺวา    ภควตา    สทฺธึ    สมฺโมทิ
สมฺโมทนียํ    กถํ    สาราณียํ    วีติสาเรตฺวา   เอกมนฺตํ   นิสีทิ   ฯ
เอกมนฺตํ นิสินฺโน โข สคารโว พฺราหฺมโณ ภควนฺตํ เอตทโวจ
@เชิงอรรถ: ๑ ม. ยุ. สงฺคารโว ฯ เอวมุปริ ฯ
     [๖๐๒]   โก  นุ  โข  โภ  โคตม  เหตุ  โก  ปจฺจโย เยเนกทา
ทีฆรตฺตํ   สชฺฌายกตาปิ   มนฺตา   นปฺปฏิภนฺติ   ปเคว  อสชฺฌายกตา  ฯ
โก   ปน   โภ   โคตม   เหตุ   โก   ปจฺจโย   เยเนกทา  ทีฆรตฺตํ
อสชฺฌายกตาปิ มนฺตา ปฏิภนฺติ ปเคว สชฺฌายกตาติ ฯ
     [๖๐๓]   ยสฺมึ  โข  พฺราหฺมณ  สมเย  กามราคปริยุฏฺฐิเตน เจตสา
วิหรติ    กามราคปเรเตน    อุปฺปนฺนสฺส    จ   กามราคสฺส   นิสฺสรณํ
ยถาภูตํ  นปฺปชานาติ  น  ปสฺสติ  ๑-  อตฺตตฺถมฺปิ  ตสฺมึ  สมเย  ยถาภูตํ
นปฺปชานาติ   น   ปสฺสติ  ปรตฺถมฺปิ  ตสฺมึ  สมเย  ยถาภูตํ  นปฺปชานาติ
น   ปสฺสติ   อุภยตฺถมฺปิ  ตสฺมึ  สมเย  ยถาภูตํ  นปฺปชานาติ  น  ปสฺสติ
ทีฆรตฺตํ สชฺฌายกตาปิ มนฺตา นปฺปฏิภนฺติ ปเคว อสชฺฌายกตา ฯ
     [๖๐๔]   เสยฺยถาปิ   พฺราหฺมณ  อุทปตฺโต  สํสฏฺโฐ  ลาขาย  วา
หลิทฺทิยา   วา   นีลิยา   วา   มญฺชิฏฺฐาย  วา  ตตฺถ  จกฺขุมา  ปุริโส
สกํ  มุขนิมิตฺตํ  ปจฺจเวกฺขมาโน  ยถาภูตํ  นปฺปชาเนยฺย  น  ปสฺเสยฺย  ฯ
เอวเมว   โข   พฺราหฺมณ  ยสฺมึ  สมเย  กามราคปริยุฏฺฐิเตน   เจตสา
วิหรติ    กามราคปเรเตน    อุปฺปนฺนสฺส    จ   กามราคสฺส   นิสฺสรณํ
ยถาภูตํ   นปฺปชานาติ   น   ปสฺสติ   อตฺตตฺถมฺปิ  ตสฺมึ  สมเย  ยถาภูตํ
นปฺปชานาติ    น    ปสฺสติ    ปรตฺถมฺปิ    ฯเปฯ   อุภยตฺถมฺปิ   ตสฺมึ
สมเย    ยถาภูตํ   นปฺปชานาติ   น   ปสฺสติ   ทีฆรตฺตํ   สชฺฌายกตาปิ
มนฺตา นปฺปฏิภนฺติ ปเคว อสชฺฌายกตา ฯ
@เชิงอรรถ: ๑ ม. ยุ. น ปสฺสตีติ น ทิสฺสติ ฯ เอวมุปริ ฯ
     [๖๐๕]   ปุน  จปรํ  พฺราหฺมณ  ยสฺมึ  สมเย  พฺยาปาทปริยุฏฺฐิเตน
เจตสา    วิหรติ    พฺยาปาทปเรเตน    อุปฺปนฺนสฺส   จ   พฺยาปาทสฺส
นิสฺสรณํ   ยถาภูตํ   นปฺปชานาติ   น   ปสฺสติ  อตฺตตฺถมฺปิ  ตสฺมึ  สมเย
ยถาภูตํ    นปฺปชานาติ    น   ปสฺสติ   ปรตฺถมฺปิ   ฯเปฯ   อุภยตฺถมฺปิ
ตสฺมึ   สมเย   ยถาภูตํ  นปฺปชานาติ  น  ปสฺสติ  ทีฆรตฺตํ  สชฺฌายกตาปิ
มนฺตา นปฺปฏิภนฺติ ปเคว อสชฺฌายกตา ฯ
     [๖๐๖]   เสยฺยถาปิ   พฺราหฺมณ   อุทปตฺโต   อคฺคินา   สนฺตตฺโต
อุกฺกุฏฺฐิโต  ๑-  อุสฺมาทกชาโต  ๒-  ตตฺถ  จกฺขุมา  ปุริโส สกํ มุขนิมิตฺตํ
ปจฺจเวกฺขมาโน   ยถาภูตํ   นปฺปชาเนยฺย   น   ปสฺเสยฺย  ฯ  เอวเมว
โข   พฺราหฺมณ   ยสฺมึ   สมเย   พฺยาปาทปริยุฏฺฐิเตน   เจตสา  วิหรติ
พฺยาปาทปเรเตน    อุปฺปนฺนสฺส    จ   พฺยาปาทสฺส   นิสฺสรณํ   ยถาภูตํ
นปฺปชานาติ    น    ปสฺสติ    อตฺตตฺถมฺปิ    ตสฺมึ    สมเย   ยถาภูตํ
นปฺปชานาติ     น    ปสฺสติ    ปรตฺถมฺปิ    ตสฺมึ    สมเย    ฯเปฯ
อุภยตฺถมฺปิ   ตสฺมึ   สมเย   ยถาภูตํ   นปฺปชานาติ  น  ปสฺสติ  ทีฆรตฺตํ
สชฺฌายกตาปิ มนฺตา นปฺปฏิภนฺติ ปเคว อสชฺฌายกตา ฯ
     [๖๐๗]   ปุน   จปรํ  พฺราหฺมณ  ยสฺมึ  สมเย  ถีนมิทฺธปริยุฏฺฐิเตน
เจตสา   วิหรติ   ถีนมิทฺธปเรเตน   อุปฺปนฺนสฺส  จ  ถีนมิทฺธสฺส  นิสฺสรณํ
ยถาภูตํ   นปฺปชานาติ   น   ปสฺสติ   อตฺตตฺถมฺปิ  ตสฺมึ  สมเย  ยถาภูตํ
นปฺปชานาติ    น    ปสฺสติ    ปรตฺถมฺปิ    ฯเปฯ   อุภยตฺถมฺปิ   ตสฺมึ
@เชิงอรรถ: ๑ ม. ปกฺกุถิโต ฯ ยุ. อุกฺกฏฺฐิโต ฯ ๒ ม. ยุ. อุสฺมุทกชาโต ฯ
สมเย    ยถาภูตํ   นปฺปชานาติ   น   ปสฺสติ   ทีฆรตฺตํ   สชฺฌายกตาปิ
มนฺตา นปฺปฏิภนฺติ ปเคว อสชฺฌายกตา ฯ
     [๖๐๘]   เสยฺยถาปิ   พฺราหฺมณ  อุทปตฺโต  เสวาลปณกปริโยนทฺโธ
ตตฺถ    จกฺขุมา   ปุริโส   สกํ   มุขนิมิตฺตํ   ปจฺจเวกฺขมาโน   ยถาภูตํ
นปฺปชาเนยฺย   น  ปสฺเสยฺย  ฯ  เอวเมว  โข  พฺราหฺมณ  ยสฺมึ  สมเย
ถีนมิทฺธปริยุฏฺฐิเตน    เจตสา    วิหรติ    ถีนมิทฺธปเรเตน   อุปฺปนฺนสฺส
จ    ถีนมิทฺธสฺส    นิสฺสรณํ    ยถาภูตํ    นปฺปชานาติ    น    ปสฺสติ
อตฺตตฺถมฺปิ    ตสฺมึ    สมเย    ยถาภูตํ    นปฺปชานาติ    น   ปสฺสติ
ปรตฺถมฺปิ   ฯเปฯ   อุภยตฺถมฺปิ   ตสฺมึ   สมเย   ยถาภูตํ   นปฺปชานาติ
น    ปสฺสติ    ทีฆรตฺตํ    สชฺฌายกตาปิ   มนฺตา   นปฺปฏิภนฺติ   ปเคว
อสชฺฌายกตา ฯ
     [๖๐๙]   ปุน  จปรํ  พฺราหฺมณ ยสฺมึ สมเย อุทฺธจฺจกุกฺกุจฺจปริยุฏฺฐิเตน
เจตสา    วิหรติ   อุทฺธจฺจกุกฺกุจฺจปเรเตน   อุปฺปนฺนสฺส   จ   อุทฺธจฺจ-
กุกฺกุจฺจสฺส   นิสฺสรณํ   ยถาภูตํ   นปฺปชานาติ   น   ปสฺสติ  อตฺตตฺถมฺปิ
ตสฺมึ   สมเย   ยถาภูตํ   นปฺปชานาติ   น   ปสฺสติ   ปรตฺถมฺปิ  ฯเปฯ
อุภยตฺถมฺปิ   ตสฺมึ   สมเย   ยถาภูตํ   นปฺปชานาติ  น  ปสฺสติ  ทีฆรตฺตํ
สชฺฌายกตาปิ มนฺตา นปฺปฏิภนฺติ ปเคว อสชฺฌายกตา ฯ
     [๖๑๐]   เสยฺยถาปิ  พฺราหฺมณ อุทปตฺโต วาเตริโต จลิโต ภงฺโค ๑-
อูมิชาโต   ตตฺถ   จกฺขุมา   ปุริโส   สกํ   มุขนิมิตฺตํ   ปจฺจเวกฺขมาโน
@เชิงอรรถ: ๑ ม. ยุ. ภนฺโต ฯ
ยถาภูตํ   นปฺปชาเนยฺย   น   ปสฺเสยฺย   ฯ   เอวเมว  โข  พฺราหฺมณ
ยสฺมึ   สมเย   อุทฺธจฺจกุกฺกุจฺจปริยุฏฺฐิเตน   เจตสา   วิหรติ   อุทฺธจฺจ-
กุกฺกุจฺจปเรเตน     อุปฺปนฺนสฺส     จ    อุทฺธจฺจกุกฺกุจฺจสฺส    นิสฺสรณํ
ยถาภูตํ   นปฺปชานาติ   น   ปสฺสติ   อตฺตตฺถมฺปิ  ตสฺมึ  สมเย  ยถาภูตํ
นปฺปชานาติ   น   ปสฺสติ   ปรตฺถมฺปิ   ฯเปฯ  อุภยตฺถมฺปิ  ตสฺมึ  สมเย
ยถาภูตํ    นปฺปชานาติ   น   ปสฺสติ   ทีฆรตฺตํ   สชฺฌายกตาปิ   มนฺตา
นปฺปฏิภนฺติ ปเคว อสชฺฌายกตา ฯ
     [๖๑๑]   ปุน  จปรํ  พฺราหฺมณ  ยสฺมึ  สมเย  วิจิกิจฺฉาปริยุฏฺฐิเตน
เจตสา   วิหรติ   วิจิกิจฺฉาปเรเตน  อุปฺปนฺนาย  จ  วิจิกิจฺฉาย  นิสฺสรณํ
ยถาภูตํ   นปฺปชานาติ   น   ปสฺสติ   อตฺตตฺถมฺปิ  ตสฺมึ  สมเย  ยถาภูตํ
นปฺปชานาติ    น    ปสฺสติ    ปรตฺถมฺปิ    ฯเปฯ   อุภยตฺถมฺปิ   ตสฺมึ
สมเย    ยถาภูตํ   นปฺปชานาติ   น   ปสฺสติ   ทีฆรตฺตํ   สชฺฌายกตาปิ
มนฺตา นปฺปฏิภนฺติ ปเคว อสชฺฌายกตา ฯ
     [๖๑๒]   เสยฺยถาปิ  พฺราหฺมณ  อุทปตฺโต  อาวิโล  ลุฬิโต กลลีภูโต
อนฺธกาเร    นิกฺขิตฺโต    ตตฺถ    จกฺขุมา    ปุริโส   สกํ   มุขนิมิตฺตํ
ปจฺจเวกฺขมาโน   ยถาภูตํ   นปฺปชาเนยฺย   น   ปสฺเสยฺย  ฯ  เอวเมว
โข   พฺราหฺมณ   ยสฺมึ   สมเย   วิจิกิจฺฉาปริยุฏฺฐิเตน   เจตสา  วิหรติ
วิจิกิจฺฉาปเรเตน    อุปฺปนฺนาย    จ    วิจิกิจฺฉาย   นิสฺสรณํ   ยถาภูตํ
นปฺปชานาติ    น    ปสฺสติ    อตฺตตฺถมฺปิ    ตสฺมึ    สมเย   ยถาภูตํ
นปฺปชานาติ    น    ปสฺสติ    ปรตฺถมฺปิ    ตสฺมึ    สมเย    ยถาภูตํ
นปฺปชานาติ    น    ปสฺสติ    อุภยตฺถมฺปิ    ตสฺมึ    สมเย   ยถาภูตํ
นปฺปชานาติ     น     ปสฺสติ     ทีฆรตฺตํ     สชฺฌายกตาปิ    มนฺตา
นปฺปฏิภนฺติ ปเคว อสชฺฌายกตา ฯ
     [๖๑๓]   อยํ  โข  พฺราหฺมณ  เหตุ  อยํ ปจฺจโย เยเนกทา ทีฆรตฺตํ
สชฺฌายกตาปิ มนฺตา นปฺปฏิภนฺติ ปเคว อสชฺฌายกตา ฯ
     [๖๑๔]   ยสฺมิญฺจ  โข  พฺราหฺมณ  สมเย  น  กามราคปริยุฏฺฐิเตน
เจตสา   วิหรติ   น   กามราคปเรเตน   อุปฺปนฺนสฺส   จ  กามราคสฺส
นิสฺสรณํ    ยถาภูตํ    ปชานาติ    ปสฺสติ   อตฺตตฺถมฺปิ   ตสฺมึ   สมเย
ยถาภูตํ    ปชานาติ    ปสฺสติ    ปรตฺถมฺปิ    ตสฺมึ   สมเย   ยถาภูตํ
ปชานาติ    ปสฺสติ    อุภยตฺถมฺปิ   ตสฺมึ   สมเย   ยถาภูตํ   ปชานาติ
ปสฺสติ     ทีฆรตฺตํ     อสชฺฌายกตาปิ     มนฺตา    ปฏิภนฺติ    ปเคว
สชฺฌายกตา ฯ
     [๖๑๕]   เสยฺยถาปิ  พฺราหฺมณ  อุทปตฺโต  อสํสฏฺโฐ  ลาขาย  วา
หลิทฺทิยา   วา   นีลิยา   วา   มญฺชิฏฺฐาย  วา  ตตฺถ  จกฺขุมา  ปุริโส
สกํ   มุขนิมิตฺตํ   ปจฺจเวกฺขมาโน   ยถาภูตํ   ปชาเนยฺย   ปสฺเสยฺย  ฯ
เอวเมว    โข   พฺราหฺมณ   ยสฺมึ   สมเย   น   กามราคปริยุฏฺฐิเตน
เจตสา   วิหรติ   น   กามราคปเรเตน   อุปฺปนฺนสฺส   จ  กามราคสฺส
นิสฺสรณํ ยถาภูตํ ปชานาติ ปสฺสติ ฯเปฯ
     [๖๑๖]   ปุน  จปรํ  พฺราหฺมณ  ยสฺมึ  สมเย น พฺยาปาทปริยุฏฺฐิเตน
เจตสา       วิหรติ       น      พฺยาปาทปเรเตน      อุปฺปนฺนสฺส
จ    พฺยาปาทสฺส   นิสฺสรณํ   ยถาภูตํ   ปชานาติ   ปสฺสติ   อตฺตตฺถมฺปิ
ตสฺมึ   สมเย   ยถาภูตํ    ปชานาติ   ปสฺสติ  ปรตฺถมฺปิ  ฯ  อุภยตฺถมฺปิ
ฯเปฯ ทีฆรตฺตํ อสชฺฌายกตาปิ มนฺตา ปฏิภนฺติ ปเคว สชฺฌายกตา ฯ
     [๖๑๗]   เสยฺยถาปิ   พฺราหฺมณ  อุทปตฺโต  น  อคฺคินา  สนฺตตฺโต
น    อุกฺกุฏฺฐิโต   น   อุสฺมาทกชาโต   ตตฺถ   จกฺขุมา   ปุริโส   สกํ
มุขนิมิตฺตํ   ปจฺจเวกฺขมาโน  ยถาภูตํ  ปชาเนยฺย  ปสฺเสยฺย  ฯ  เอวเมว
โข   พฺราหฺมณ   ยสฺมึ  สมเย  น  พฺยาปาทปริยุฏฺฐิเตน  เจตสา  วิหรติ
น   พฺยาปาทปเรเตน   อุปฺปนฺนสฺส   จ   พฺยาปาทสฺส  นิสฺสรณํ  ยถาภูตํ
ปชานาติ    ปสฺสติ    อตฺตตฺถมฺปิ   ตสฺมึ   สมเย   ยถาภูตํ   ปชานาติ
ปสฺสติ   ปรตฺถมฺปิ   ฯ   อุภยตฺถมฺปิ   ฯเปฯ   ทีฆรตฺตํ   อสชฺฌายกตาปิ
มนฺตา ปฏิภนฺติ ปเคว สชฺฌายกตา ฯ
     [๖๑๘]   ปุน  จปรํ  พฺราหฺมณ  ยสฺมึ  สมเย  น ถีนมิทฺธปริยุฏฺฐิเตน
เจตสา    วิหรติ   น   ถีนมิทฺธปเรเตน   อุปฺปนฺนสฺส   จ   ถีนมิทฺธสฺส
นิสฺสรณํ    ยถาภูตํ    ปชานาติ    ปสฺสติ   อตฺตตฺถมฺปิ   ตสฺมึ   สมเย
ยถาภูตํ   ปชานาติ   ปสฺสติ   ปรตฺถมฺปิ  ฯ  อุภยตฺถมฺปิ  ฯเปฯ  ทีฆรตฺตํ
อสชฺฌายกตาปิ มนฺตา ปฏิภนฺติ ปเคว สชฺฌายกตา
     [๖๑๙]   เสยฺยถาปิ  พฺราหฺมณ  อุทปตฺโต  น เสวาลปณกปริโยนทฺโธ
ตตฺถ     จกฺขุมา     ปุริโส     สกํ     มุขนิมิตฺตํ    ปจฺจเวกฺขมาโน
ยถาภูตํ   ปชาเนยฺย   ปสฺเสยฺย   ฯ   เอวเมว   โข  พฺราหฺมณ  ยสฺมึ
สมเย   น   ถีนมิทฺธปริยุฏฺฐิเตน   เจตสา   วิหรติ  น  ถีนมิทฺธปเรเตน
อุปฺปนฺนสฺส    จ    ถีนมิทฺธสฺส   นิสฺสรณํ   ยถาภูตํ   ปชานาติ   ปสฺสติ
อตฺตตฺถมฺปิ   ตสฺมึ   สมเย   ยถาภูตํ   ปชานาติ   ปสฺสติ  ปรตฺถมฺปิ  ฯ
อุภยตฺถมฺปิ    ฯเปฯ    ทีฆรตฺตํ    อสชฺฌายกตาปิ    มนฺตา    ปฏิภนฺติ
ปเคว สชฺฌายกตา ฯ
     [๖๒๐]   ปุน  จปรํ  พฺราหฺมณ  ยสฺมึ  สมเย  น  อุทฺธจฺจกุกฺกุจฺจ-
ปริยุฏฺฐิเตน   เจตสา   วิหรติ   น  อุทฺธจฺจกุกฺกุจฺจปเรเตน  อุปฺปนฺนสฺส
จ     อุทฺธจฺจกุกฺกุจฺจสฺส     นิสฺสรณํ    ยถาภูตํ    ปชานาติ    ปสฺสติ
อตฺตตฺถมฺปิ   ตสฺมึ   สมเย   ยถาภูตํ   ปชานาติ   ปสฺสติ  ปรตฺถมฺปิ  ฯ
อุภยตฺถมฺปิ    ฯเปฯ    ทีฆรตฺตํ    อสชฺฌายกตาปิ    มนฺตา    ปฏิภนฺติ
ปเคว สชฺฌายกตา ฯ
     [๖๒๑]   เสยฺยถาปิ  พฺราหฺมณ  อุทปตฺโต  น  วาเตริโต  น จลิโต
น   ภงฺโค   น   อูมิชาโต   ตตฺถ   จกฺขุมา   ปุริโส   สกํ  มุขนิมิตฺตํ
ปจฺจเวกฺขมาโน   ยถาภูตํ   ปชาเนยฺย   ปสฺเสยฺย   ฯ   เอวเมว  โข
พฺราหฺมณ    ยสฺมึ    สมเย    น   อุทฺธจฺจกุกฺกุจฺจปริยุฏฺฐิเตน   เจตสา
วิหรติ   น   อุทฺธจฺจกุกฺกุจฺจปเรเตน   อุปฺปนฺนสฺส   จ  อุทฺธจฺจกุกฺกุจฺจสฺส
นิสฺสรณํ    ยถาภูตํ    ปชานาติ    ปสฺสติ   อตฺตตฺถมฺปิ   ตสฺมึ   สมเย
ยถาภูตํ    ปชานาติ    ปสฺสติ    ปรตฺถมฺปิ    ฯ   อุภยตฺถมฺปิ   ฯเปฯ
ทีฆรตฺตํ อสชฺฌายกตาปิ มนฺตา ปฏิภนฺติ ปเคว สชฺฌายกตา ฯ
     [๖๒๒]   ปุน  จปรํ  พฺราหฺมณ  ยสฺมึ  สมเย น วิจิกิจฺฉาปริยุฏฺฐิเตน
เจตสา   วิหรติ   น   วิจิกิจฺฉาปเรเตน   อุปฺปนฺนาย   จ   วิจิกิจฺฉาย
นิสฺสรณํ    ยถาภูตํ    ปชานาติ    ปสฺสติ   อตฺตตฺถมฺปิ   ตสฺมึ   สมเย
ยถาภูตํ    ปชานาติ    ปสฺสติ    ปรตฺถมฺปิ    ตสฺมึ   สมเย   ยถาภูตํ
ปชานาติ    ปสฺสติ    อุภยตฺถมฺปิ   ตสฺมึ   สมเย   ยถาภูตํ   ปชานาติ
ปสฺสติ ฯเปฯ
     [๖๒๓]   เสยฺยถาปิ   พฺราหฺมณ   อุทปตฺโต   อจฺโฉ   วิปฺปสนฺโน
อนาวิโล   อาโลเก   นิกฺขิตฺโต   ตตฺถ  จกฺขุมา  ปุริโส  สกํ  มุขนิมิตฺตํ
ปจฺจเวกฺขมาโน    ยถาภูตํ    ปชาเนยฺย    ปสฺเสยฺย    ฯ   เอวเมว
โข    พฺราหฺมณ    ยสฺมึ   สมเย   น   วิจิกิจฺฉาปริยุฏฺฐิเตน   เจตสา
วิหรติ   น   วิจิกิจฺฉาปเรเตน   อุปฺปนฺนาย   จ   วิจิกิจฺฉาย   นิสฺสรณํ
ยถาภูตํ    ปชานาติ    ปสฺสติ    อตฺตตฺถมฺปิ   ตสฺมึ   สมเย   ยถาภูตํ
ปชานาติ    ปสฺสติ    ปรตฺถมฺปิ    ตสฺมึ   สมเย   ยถาภูตํ   ปชานาติ
ปสฺสติ    อุภยตฺถมฺปิ    ตสฺมึ    สมเย    ยถาภูตํ   ปชานาติ   ปสฺสติ
ทีฆรตฺตํ อสชฺฌายกตาปิ มนฺตา ปฏิภนฺติ ปเคว สชฺฌายกตา ฯ
     [๖๒๔]   อยํ   โข   พฺราหฺมณ   เหตุ  อยํ  ปจฺจโย  เยเนกทา
ทีฆรตฺตํ อสชฺฌายกตาปิ มนฺตา ปฏิภนฺติ ปเคว สชฺฌายกตา ฯ
     [๖๒๕]   สตฺติเมปิ   พฺราหฺมณ   โพชฺฌงฺคา  อนาวรณา  อนีวรณา
เจตโส   อนุปกฺกิเลสา   ภาวิตา   พหุลีกตา   วิชฺชาวิมุตฺติผลสจฺฉิกิริยาย
สํวตฺตนฺติ   ฯ   กตเม   สตฺต   ฯ   สติสมฺโพชฺฌงฺโค   โข   พฺราหฺมณ
อนาวรโณ    อนีวรโณ    เจตโส   อนุปกฺกิเลโส   ภาวิโต   พหุลีกโต
วิชฺชาวิมุตฺติผลสจฺฉิกิริยาย     สํวตฺตติ    ฯเปฯ    อุเปกฺขาสมฺโพชฺฌงฺโค
โข   พฺราหฺมณ   อนาวรโณ   อนีวรโณ  เจตโส  อนุปกฺกิเลโส  ภาวิโต
พหุลีกโต   วิชฺชาวิมุตฺติผลสจฺฉิกิริยาย   สํวตฺตติ  ฯ  อิเม  โข  พฺราหฺมณ
สตฺต   โพชฺฌงฺคา  อนาวรณา  อนีวรณา  เจตโส  อนุปกฺกิเลสา  ภาวิตา
พหุลีกตา วิชฺชาวิมุตฺติผลสจฺฉิกิริยาย สํวตฺตนฺตีติ ฯ
     [๖๒๖]   เอวํ  วุตฺเต  สคารโว  พฺราหฺมโณ  ภควนฺตํ  เอตทโวจ
อภิกฺกนฺตํ   โภ   โคตม   ฯเปฯ   อุปาสกํ   มํ  ภวํ  โคตโม  ธาเรตุ
อชฺชตคฺเค ปาณุเปตํ สรณงฺคตนฺติ ฯ

             เนื้อความพระไตรปิฎกฉบับภาษาบาลี อักษรไทย เล่มที่ ๑๙ หน้าที่ ๑๖๖-๑๗๕.
https://84000.org/tipitaka/read/pali_read.php?B=19&A=3196&w=&modeTY=2
             อ่านเทียบพระไตรปิฎกฉบับภาษาบาลี อักษรโรมัน :-
https://84000.org/tipitaka/read/roman_read.php?B=19&A=3196&modeTY=2
             อ่านเทียบพระไตรปิฎกภาษาไทยฉบับหลวง :-
https://84000.org/tipitaka/read/byitem.php?book=19&item=601&items=26
             อ่านเทียบพระไตรปิฎกฉบับมหาจุฬาฯ :-
https://84000.org/tipitaka/pitaka_item/m_siri.php?B=19&siri=127
             ศึกษาอรรถกถานี้ได้ที่ :-
https://84000.org/tipitaka/attha/attha.php?b=19&i=601
             อ่านอรรถกถาภาษาบาลีอักษรไทย :-
https://84000.org/tipitaka/atthapali/read_th.php?B=13&A=5303
             The Pali Atthakatha in Roman :-
https://84000.org/tipitaka/atthapali/read_rm.php?B=13&A=5303
             สารบัญพระไตรปิฎกเล่มที่ ๑๙
https://84000.org/tipitaka/read/?index_19
https://84000.org/tipitaka/english/?index_19