Bhesajjakkhandhakaṃ
[25] Tena samayena buddho bhagavā sāvatthiyaṃ viharati jetavane
anāthapiṇḍikassa ārāme . tena kho pana samayena bhikkhūnaṃ
sāradikena ābādhena phuṭṭhānaṃ yāgupi pītā uggacchati bhattaṃpi
bhuttaṃ uggacchati . te tena kisā honti lūkhā dubbaṇṇā
uppaṇḍuppaṇḍukajātā dhamanisanthatagattā . addasā kho
bhagavā te bhikkhū kise lūkhe dubbaṇṇe uppaṇḍuppaṇḍukajāte
dhamanisanthatagatte disvāna āyasmantaṃ ānandaṃ āmantesi
kinnu kho ānanda etarahi bhikkhū kisā lūkhā dubbaṇṇā
uppaṇḍuppaṇḍukajātā dhamanisanthatagattāti . etarahi bhante
bhikkhūnaṃ sāradikena ābādhena phuṭṭhānaṃ yāgupi pītā uggacchati
bhattaṃpi bhuttaṃ uggacchati te tena kisā [1]- lūkhā dubbaṇṇā
uppaṇḍuppaṇḍukajātā dhamanisanthatagattāti.
{25.1} Athakho bhagavato rahogatassa paṭisallīnassa evaṃ cetaso
parivitakko udapādi etarahi kho bhikkhūnaṃ sāradikena ābādhena
phuṭṭhānaṃ yāgupi pītā uggacchati bhattaṃpi bhuttaṃ uggacchati te
tena kisā lūkhā dubbaṇṇā uppaṇḍuppaṇḍukajātā
dhamanisanthatagattā kinnu kho ahaṃ bhikkhūnaṃ bhesajjaṃ anujāneyyaṃ yaṃ
bhesajjañceva assa bhesajjasammatañca lokassa āhāratthañca 2-
phareyya na ca oḷāriko āhāro paññāyeyyāti . athakho
@Footnote: 1 Ma. honti. 2 Yu. āhārattañca.
Bhagavato etadahosi imāni kho pañca bhesajjāni seyyathīdaṃ sappi
navanītaṃ telaṃ madhu phāṇitaṃ bhesajjāni ceva bhesajjasammatāni ca
lokassa āhāratthañca pharanti na ca oḷāriko āhāro paññāyati
yannūnāhaṃ bhikkhūnaṃ imāni pañca bhesajjāni anujāneyyaṃ kāle
paṭiggahetvā kāle paribhuñjitunti.
{25.2} Athakho bhagavā sāyaṇhasamaye paṭisallānā vuṭṭhito
etasmiṃ nidāne etasmiṃ pakaraṇe dhammiṃ kathaṃ katvā bhikkhū āmantesi
idha mayhaṃ bhikkhave rahogatassa paṭisallīnassa evaṃ cetaso parivitakko
udapādi etarahi kho bhikkhūnaṃ sāradikena ābādhena phuṭṭhānaṃ yāgupi
pītā uggacchati bhattaṃpi bhuttaṃ uggacchati te tena kisā lūkhā dubbaṇṇā
uppaṇḍuppaṇḍukajātā dhamanisanthatagattā kinnu kho ahaṃ bhikkhūnaṃ
bhesajjaṃ anujāneyyaṃ yaṃ bhesajjañceva assa bhesajjasammatañca lokassa
āhāratthañca phareyya na ca oḷāriko āhāro paññāyeyyāti
tassa mayhaṃ bhikkhave etadahosi imāni kho pañca bhesajjāni seyyathīdaṃ
sappi navanītaṃ telaṃ madhu phāṇitaṃ bhesajjāni ceva bhesajjasammatāni ca
lokassa āhāratthañca pharanti na ca oḷāriko āhāro paññāyati
yannūnāhaṃ bhikkhūnaṃ imāni pañca bhesajjāni anujāneyyaṃ kāle
paṭiggahetvā kāle paribhuñjitunti . anujānāmi bhikkhave tāni
pañca bhesajjāni kāle paṭiggahetvā kāle paribhuñjitunti.
[26] Tena kho pana samayena bhikkhū tāni pañca bhesajjāni kāle
paṭiggahetvā kāle paribhuñjanti . tesaṃ yānipi tāni pākatikāni
lūkhāni bhojanāni tānipi nacchādenti pageva senesikāni 1- . te
tena ceva sāradikena ābādhena phuṭṭhā iminā ca bhattācchādakena 2-
tadubhayena bhiyyoso mattāya kisā honti lūkhā dubbaṇṇā
uppaṇḍuppaṇḍukajātā dhamanisanthatagattā . addasā
kho bhagavā te bhikkhū bhiyyoso mattāya kise lūkhe dubbaṇṇe
uppaṇḍuppaṇḍukajāte dhamanisanthatagatte disvāna āyasmantaṃ
ānandaṃ āmantesi kinnu kho ānanda etarahi bhikkhū bhiyyoso
mattāya kisā lūkhā dubbaṇṇā uppaṇḍuppaṇḍukajātā
dhamanisanthatagattāti . etarahi bhante bhikkhū tāni pañca bhesajjāni
kāle paṭiggahetvā kāle paribhuñjanti tesaṃ yānipi tāni
pākatikāni lūkhāni bhojanāni tānipi nacchādenti pageva
senesikāni te tena ceva sāradikena ābādhena phuṭṭhā iminā
ca bhattācchādakena tadubhayena bhiyyoso mattāya kisā lūkhā
dubbaṇṇā uppaṇḍuppaṇḍukajātā dhamanisanthatagattāti .
Athakho bhagavā etasmiṃ nidāne etasmiṃ pakaraṇe dhammiṃ kathaṃ katvā
bhikkhū āmantesi anujānāmi bhikkhave tāni pañca bhesajjāni
paṭiggahetvā kālepi vikālepi paribhuñjitunti.
@Footnote: 1 Po. sineha-kāni. Ma. senesitāni. 2 Po. bhattacchādakena. Ma. Yu.
@bhattācchandakena.
[27] Tena kho pana samayena gilānānaṃ bhikkhūnaṃ vasehi bhesajjehi
attho hoti . bhagavato etamatthaṃ ārocesuṃ . anujānāmi bhikkhave
vasāni bhesajjāni acchavasaṃ macchavasaṃ susukāvasaṃ 1- sūkaravasaṃ gadrabhavasaṃ
kāle paṭiggahitaṃ kāle nipakkaṃ 2- kāle saṃsaṭṭhaṃ 3- telaparibhogena
paribhuñjituṃ . vikāle ce bhikkhave paṭiggahitaṃ vikāle nipakkaṃ
vikāle saṃsaṭṭhaṃ tañce paribhuñjeyya āpatti tiṇṇaṃ dukkaṭānaṃ .
Kāle ce bhikkhave paṭiggahitaṃ vikāle nipakkaṃ vikāle saṃsaṭṭhaṃ
tañce paribhuñjeyya āpatti dvinnaṃ dukkaṭānaṃ . kāle ce
bhikkhave paṭiggahitaṃ kāle nipakkaṃ vikāle saṃsaṭṭhaṃ tañce
paribhuñjeyya āpatti dukkaṭassa . kāle ce bhikkhave paṭiggahitaṃ
kāle nipakkaṃ kāle saṃsaṭṭhaṃ tañce paribhuñjeyya anāpattīti.
[28] Tena kho pana samayena gilānānaṃ bhikkhūnaṃ mūlehi bhesajjehi
attho hoti . bhagavato etamatthaṃ ārocesuṃ . anujānāmi bhikkhave
mūlāni bhesajjāni haliddaṃ siṅgiveraṃ vacaṃ vacatthaṃ ativisaṃ kaṭukarohiṇiṃ
usīraṃ bhaddamuttakaṃ yāni vā panaññānipi atthi mūlāni bhesajjāni
neva khādanīye khādaniyatthaṃ 4- pharanti na bhojanīye bhojanīyatthaṃ 5- pharanti
tāni paṭiggahetvā yāvajīvaṃ pariharituṃ sati paccaye paribhuñjituṃ
asati paccaye paribhuñjantassa āpatti dukkaṭassāti . tena kho
@Footnote: 1 Ma. susumārasaṃ. 2 Sī. nippakkaṃ. 3 Sī. Po. saṃsattaṃ. 4 Yu. khādanīyattaṃ.
@5 Yu. bhojanīyattaṃ.
Pana samayena gilānānaṃ bhikkhūnaṃ mūlehi bhesajjehi piṭṭhehi attho
hoti . bhagavato etamatthaṃ ārocesuṃ . anujānāmi bhikkhave
nisadaṃ nisadapotanti 1-.
[29] Tena kho pana samayena gilānānaṃ bhikkhūnaṃ kasāvehi bhesajjehi
attho hoti . bhagavato etamatthaṃ ārocesuṃ . anujānāmi bhikkhave
kasāvāni bhesajjāni nimbakasāvaṃ kuṭajakasāvaṃ paṭolakasāvaṃ 2-
paggavakasāvaṃ nattamālakasāvaṃ yāni vā panaññānipi atthi kasāvāni
bhesajjāni neva khādanīye khādanīyatthaṃ pharanti na bhojanīye bhojanīyatthaṃ
pharanti tāni paṭiggahetvā yāvajīvaṃ pariharituṃ sati paccaye
paribhuñjituṃ asati paccaye paribhuñjantassa āpatti dukkaṭassāti.
[30] Tena kho pana samayena gilānānaṃ bhikkhūnaṃ paṇṇehi
bhesajjehi attho hoti . bhagavato etamatthaṃ ārocesuṃ. Anujānāmi
bhikkhave paṇṇāni bhesajjāni nimbapaṇṇaṃ kuṭajapaṇṇaṃ paṭolapaṇṇaṃ
sulasipaṇṇaṃ kappāsipaṇṇaṃ 3- yāni vā panaññānipi atthi
paṇṇāni bhesajjāni neva khādanīye khādanīyatthaṃ pharanti na bhojanīye
bhojanīyatthaṃ pharanti tāni paṭiggahetvā yāvajīvaṃ pariharituṃ sati
paccaye paribhuñjituṃ asati paccaye paribhuñjantassa āpatti
dukkaṭassāti.
[31] Tena kho pana samayena gilānānaṃ bhikkhūnaṃ phalehi bhesajjehi
attho hoti . bhagavato etamatthaṃ ārocesuṃ . anujānāmi bhikkhave
@Footnote: 1 Po. Ma. nisadapotakanti. 2 Ma. Yu. paṭolakasāvanti pāṭho natthi. 3 Yu.
@kappāsikapaṇṇaṃ.
Phalāni bhesajjāni vilaṅgaṃ pipphaliṃ 1- maricaṃ harītakaṃ vibhītakaṃ 2- āmalakaṃ
goṭhaphalaṃ 3- yāni vā panaññānipi atthi phalāni bhesajjāni neva
khādanīye khādanīyatthaṃ pharanti na bhojanīye bhojanīyatthaṃ pharanti tāni
paṭiggahetvā yāvajīvaṃ pariharituṃ sati paccaye paribhuñjituṃ asati
paccaye paribhuñjantassa āpatti dukkaṭassāti.
[32] Tena kho pana samayena gilānānaṃ bhikkhūnaṃ jatūhi bhesajjehi
attho hoti . bhagavato etamatthaṃ ārocesuṃ . anujānāmi bhikkhave
jatūni bhesajjāni hiṅguṃ hiṅgujatuṃ 4- hiṅgusipātikaṃ takaṃ takapattiṃ
takapaṇṇiṃ sajjulasaṃ yāni vā panaññānipi atthi jatūni bhesajjāni
neva khādanīye khādanīyatthaṃ pharanti na bhojanīye bhojanīyatthaṃ pharanti
tāni paṭiggahetvā yāvajīvaṃ pariharituṃ sati paccaye paribhuñjituṃ
asati paccaye paribhuñjantassa āpatti dukkaṭassāti.
[33] Tena kho pana samayena gilānānaṃ bhikkhūnaṃ loṇehi bhesajjehi
attho hoti . bhagavato etamatthaṃ ārocesuṃ . anujānāmi bhikkhave
loṇāni bhesajjāni sāmuddaṃ kāḷaloṇaṃ sindhavaṃ ubbhidaṃ 5- bilaṃ 6-
yāni vā panaññānipi atthi loṇāni bhesajjāni neva khādanīye
khādanīyatthaṃ pharanti na bhojanīye bhojanīyatthaṃ pharanti tāni
paṭiggahetvā yāvajīvaṃ pariharituṃ sati paccaye paribhuñjituṃ asati
paccaye paribhuñjantassa āpatti dukkaṭassāti.
[34] Tena kho pana samayena āyasmato ānandassa
@Footnote: 1 Ma. pippaliṃ. Yu. pippalaṃ. 2 Po. Ma. vibhedagaṃ. 3 Po. Ma. koṭṭhaphalaṃ.
@4 Po. Yu. hiṅgujatu. 5 Ma. ubbhiraṃ. 6 Po. viḷahaṃ.
Upajjhāyassa āyasmato velaṭṭhasīsassa thullakacchābādho hoti .
Tassa lasikāya cīvarāni kāye lagganti . tāni bhikkhū udakena
temetvā temetvā apakaḍḍhanti . addasā kho bhagavā
senāsanacārikaṃ āhiṇḍanto te bhikkhū tāni cīvarāni udakena
temetvā temetvā apakaḍḍhante disvāna yena te bhikkhū
tenupasaṅkami upasaṅkamitvā te bhikkhū etadavoca kimimassa
bhikkhave bhikkhuno ābādhoti . imassa bhante āyasmato
thullakacchābādho lasikāya cīvarāni kāye lagganti tāni mayaṃ
udakena temetvā temetvā apakaḍḍhāmāti . atha kho bhagavā
etasmiṃ nidāne etasmiṃ pakaraṇe dhammiṃ kathaṃ katvā bhikkhū
āmantesi anujānāmi bhikkhave yassa kaṇḍu vā piḷakā vā
assāvo vā thullakacchā vā ābādho kāyo vā duggandho
cuṇṇāni bhesajjāni agilānassa chakanaṃ mattikaṃ rajananipakkaṃ
anujānāmi bhikkhave udukkhalaṃ musalanti.
[35] Tena kho pana samayena gilānānaṃ bhikkhūnaṃ cuṇṇehi
bhesajjehi cālitehi attho hoti . bhagavato etamatthaṃ ārocesuṃ.
Anujānāmi bhikkhave cuṇṇacālaninti 1- . saṇhehi attho hoti .
Anujānāmi bhikkhave dussacālaninti.
[36] Tena kho pana samayena aññatarassa bhikkhuno amanussikābādho
hoti . taṃ ācariyupajjhāyā upaṭṭhahantā nāsakkhiṃsu arogaṃ
kātuṃ . so sūkarasūnaṃ gantvā āmakamaṃsaṃ khādi āmakalohitaṃ
@Footnote: 1 Po. cuṇṇapālinanti. Ma. cuṇṇacālinanti.
Pivi 1- . tassa so amanussikābādho paṭippassambhi . bhagavato
etamatthaṃ ārocesuṃ . anujānāmi bhikkhave amanussikābādhe
āmakamaṃsaṃ āmakalohitanti 2-.
[37] Tena kho pana samayena aññatarassa bhikkhuno cakkhurogābādho
hoti . taṃ bhikkhū 3- pariggahetvā uccāraṃpi passāvaṃpi nikkhāmenti.
Addasā kho bhagavā senāsanacārikaṃ āhiṇḍanto te bhikkhū taṃ bhikkhuṃ
pariggahetvā uccāraṃpi passāvaṃpi nikkhāmente disvāna yena te
bhikkhū tenupasaṅkami upasaṅkamitvā te bhikkhū etadavoca kimimassa
bhikkhave bhikkhuno ābādhoti . imassa bhante āyasmato cakkhurogābādho
imaṃ mayaṃ pariggahetvā uccāraṃpi passāvaṃpi nikkhāmemāti . athakho
bhagavā etasmiṃ nidāne etasmiṃ pakaraṇe dhammiṃ kathaṃ katvā bhikkhū
āmantesi anujānāmi bhikkhave añjanaṃ kāḷañjanaṃ rasañjanaṃ sotañjanaṃ
gerukaṃ kapallanti . añjanupapiṃsanehi 4- attho hoti . bhagavato
etamatthaṃ ārocesuṃ . anujānāmi bhikkhave candanaṃ tagaraṃ kāḷānusāriyaṃ
tālīsaṃ 5- bhaddamuttakanti . tena kho pana samayena bhikkhū piṭṭhāni
añjanāni thālakesupi 6- sarāvakesupi nikkhipanti tiṇacuṇṇehipi
paṃsukehipi okiriyanti . bhagavato etamatthaṃ ārocesuṃ . anujānāmi
bhikkhave añjaninti.
{37.1} Tena kho pana samayena chabbaggiyā bhikkhū uccāvacā
añjaniyo dhārenti sovaṇṇamayaṃ rūpiyamayaṃ . manussā
@Footnote: 1 Po. āmakamaṃsañca khādi āmakalohitañca pivi. 2 Po. ... amussikābādhena āmakamaṃsaṃ
@khādituṃ pivituṃ āmakalohitanti. 3 Po. Yu. bhikkhuṃ. 4 Po. -padhiṃsanehi. Ma. Yu.
@papisanehi. 5 Po. tālisapattaṃ. 6 Ma. carukesu. Yu. thālikesu.
Ujjhāyanti khīyanti vipācenti seyyathāpi nāma 1- gihī kāmabhoginoti.
Bhagavato etamatthaṃ ārocesuṃ. Na bhikkhave uccāvacā añjanī 2- dhāretabbā
yo dhāreyya āpatti dukkaṭassa anujānāmi bhikkhave aṭṭhimayaṃ dantamayaṃ
visāṇamayaṃ naḷamayaṃ veḷumayaṃ kaṭṭhamayaṃ jatumayaṃ phalamayaṃ lohamayaṃ saṅkhanābhimayanti.
Tena kho pana samayena añjanī 3- apārutā honti tiṇacuṇṇehipi
paṃsukehipi okiriyanti . bhagavato etamatthaṃ ārocesuṃ . anujānāmi
bhikkhave apidhānanti . apidhānaṃ nipatati . anujānāmi bhikkhave suttakena
bandhitvā añjaniyā bandhitunti . añjanī phalati 4- . anujānāmi
bhikkhave suttakena sibbetunti . tena kho pana samayena bhikkhū aṅguliyā
añjanti akkhīni dukkhāni honti . bhagavato etamatthaṃ ārocesuṃ .
Anujānāmi bhikkhave añjanīsalākanti.
{37.2} Tena kho pana samayena chabbaggiyā bhikkhū uccāvacā
añjanīsalākāyo dhārenti sovaṇṇamayaṃ rūpiyamayaṃ . manussā
ujjhāyanti khīyanti vipācenti seyyathāpi gihī kāmabhoginoti .
Bhagavato etamatthaṃ ārocesuṃ . na bhikkhave uccāvacā añjanīsalākā
dhāretabbā yo dhāreyya āpatti dukkaṭassa anujānāmi bhikkhave
aṭṭhimayaṃ dantamayaṃ visāṇamayaṃ .pe. saṅkhanābhimayanti . tena kho pana
samayena añjanīsalākā bhūmiyaṃ patati 5- pharusā hoti. Bhagavato etamatthaṃ
@Footnote: 1 Ma. Yu. ayaṃ pāṭho na dissati. 2-3 Po. Ma. añjanīyo. 4 Po. añjanīyo
@phālanti. Ma. Yu. añjanī nipatati. 5 Yu. patitā.
Ārocesuṃ . anujānāmi bhikkhave salākodhāniyanti 1- . tena kho
pana samayena bhikkhū añjaniṃpi añjanīsalākaṃpi hatthena pariharanti .
Bhagavato etamatthaṃ ārocesuṃ . anujānāmi bhikkhave añjanitthavikanti.
Aṃsavaddhako 2- na hoti . bhagavato etamatthaṃ ārocesuṃ. Anujānāmi
bhikkhave aṃsavaddhakaṃ bandhanasuttakanti.
[38] Tena kho pana samayena āyasmato pilindavacchassa sīsābhitāpo
hoti. Bhagavato etamatthaṃ ārocesuṃ. Anujānāmi bhikkhave muddhani telakanti.
Nakkhamanīyo hoti . bhagavato etamatthaṃ ārocesuṃ. Anujānāmi bhikkhave
natthukammanti . natthu galati . Bhagavato etamatthaṃ ārocesuṃ. Anujānāmi
bhikkhave natthukaraṇinti.
{38.1} Tena kho pana samayena chabbaggiyā bhikkhū uccāvacā
natthukaraṇiyo dhārenti sovaṇṇamayaṃ rūpiyamayaṃ . manussā ujjhāyanti
khīyanti vipācenti seyyathāpi gihī kāmabhoginoti . bhagavato
etamatthaṃ ārocesuṃ . na bhikkhave uccāvacā natthukaraṇī
dhāretabbā yo dhāreyya āpatti dukkaṭassa anujānāmi bhikkhave
aṭṭhimayaṃ .pe. saṅkhanābhimayanti . natthu visamaṃ āsiñciyati .
Bhagavato etamatthaṃ ārocesuṃ . anujānāmi bhikkhave yamakaṃ
natthukaraṇinti 3- . nakkhamanīyo hoti . Bhagavato etamatthaṃ ārocesuṃ.
Anujānāmi bhikkhave dhūmaṃ pātunti . taññeva vaṭṭiṃ ālimpetvā
@Footnote: 1 Ma. salākāṭhāniyanti. Po. salākādhāniyanti. 2 Sī. aṃsavaḍḍhako.
@Yu. aṃsabandhako. 3 Po. Ma. Yu. yamaka natthukaraṇinti.
Pivanti kaṇṭho 1- dahati . bhagavato etamatthaṃ ārocesuṃ .
Anujānāmi bhikkhave dhūmanettanti.
{38.2} Tena kho pana samayena chabbaggiyā bhikkhū uccāvacāni
dhūmanettāni dhārenti sovaṇṇamayaṃ rūpiyamayaṃ . manussā ujjhāyanti
khīyanti vipācenti seyyathāpi gihī kāmabhoginoti . bhagavato etamatthaṃ
ārocesuṃ . na bhikkhave uccāvacāni dhūmanettāni dhāretabbāni yo
dhāreyya āpatti dukkaṭassa anujānāmi bhikkhave aṭṭhimayaṃ .pe.
Saṅkhanābhimayanti.
{38.3} Tena kho pana samayena dhūmanettāni apārutāni honti
pāṇakā pavisanti . bhagavato etamatthaṃ ārocesuṃ . anujānāmi
bhikkhave apidhānanti . tena kho pana samayena bhikkhū dhūmanettāni
hatthena pariharanti . bhagavato etamatthaṃ ārocesuṃ . anujānāmi
bhikkhave dhūmanettatthavikanti . ekato ghaṃsiyanti . bhagavato etamatthaṃ
ārocesuṃ . anujānāmi bhikkhave yamakatthavikanti . aṃsavaddhako
na hoti . bhagavato etamatthaṃ ārocesuṃ . anujānāmi bhikkhave
aṃsavaddhakaṃ bandhanasuttakanti.
[39] Tena kho pana samayena āyasmato pilindavacchassa
vātābādho hoti . vejjā evamāhaṃsu telaṃ pacitabbanti .
Bhagavato etamatthaṃ ārocesuṃ . anujānāmi bhikkhave telapākanti .
Tasmiṃ kho [2]- telapāke majjaṃ pakkhipitabbaṃ hoti. Bhagavato etamatthaṃ
ārocesuṃ . anujānāmi bhikkhave telapāke majjaṃ pakkhipitunti .
@Footnote: 1 Ma. Yu. kaṇṭhaṃ. 2 Ma. Yu. pana.
Tena kho pana samayena chabbaggiyā bhikkhū atipakkhittamajjāni 1-
telāni pacanti tāni pivitvā majjanti . bhagavato etamatthaṃ
ārocesuṃ . na bhikkhave atipakkhittamajjaṃ telaṃ pātabbaṃ yo
piveyya yathādhammo kāretabbo . anujānāmi bhikkhave yasmiṃ
telapāke majjassa na vaṇṇo na gandho na raso paññāyati
evarūpaṃ majjapakkhittaṃ telaṃ pātunti.
{39.1} Tena kho pana samayena bhikkhūnaṃ bahuṃ atipakkhittamajjaṃ telaṃ
pakkaṃ hoti . athakho bhikkhūnaṃ etadahosi kathannu kho atipakkhittamajje
tele paṭipajjitabbanti . bhagavato etamatthaṃ ārocesuṃ . anujānāmi
bhikkhave abbhañjanaṃ adhiṭṭhātunti.
{39.2} Tena kho pana samayena āyasmato pilindavacchassa
bahuṃ 2- telaṃ pakkaṃ hoti . telabhājanaṃ na vijjati 3- . Bhagavato
etamatthaṃ ārocesuṃ . anujānāmi bhikkhave tīṇi tumbāni lohatumbaṃ
kaṭṭhatumbaṃ phalatumbanti.
{39.3} Tena kho pana samayena āyasmato pilindavacchassa
aṅgavāto hoti . bhagavato etamatthaṃ ārocesuṃ . anujānāmi
bhikkhave sedakammanti . nakkhamanīyo hoti . bhagavato etamatthaṃ
ārocesuṃ . anujānāmi bhikkhave sambhārasedanti . nakkhamanīyo
hoti . anujānāmi bhikkhave mahāsedanti . nakkhamanīyo
hoti . anujānāmi bhikkhave bhaṅgodakanti . nakkhamanīyo hoti .
Anujānāmi bhikkhave udakakoṭṭhakanti.
@Footnote: 1 Po. Ma. atikkhittamajjāni. 2 Ma. Yu. bahutaraṃ. 3 Yu. saṃvijjati.
[40] Tena kho pana samayena āyasmato pilindavacchassa pabbavāto
hoti . bhagavato etamatthaṃ ārocesuṃ . anujānāmi bhikkhave
lohitaṃ mocetunti . nakkhamanīyo hoti . bhagavato etamatthaṃ
ārocesuṃ . anujānāmi bhikkhave lohitaṃ mocetvā visāṇena
gahetunti 1-.
[41] Tena kho pana samayena āyasmato pilindavacchassa pādā
phālitā honti . bhagavato etamatthaṃ ārocesuṃ . anujānāmi
bhikkhave pādabbhañjananti . nakkhamanīyo hoti . bhagavato etamatthaṃ
ārocesuṃ. Anujānāmi bhikkhave pajjaṃ abhisaṅkharitunti.
[42] Tena kho pana samayena aññatarassa bhikkhuno gaṇḍābādho
hoti . bhagavato etamatthaṃ ārocesuṃ. Anujānāmi bhikkhave satthakammanti.
Kasāvodakena attho hoti . anujānāmi bhikkhave kasāvodakanti .
Tilakakkena attho hoti . anujānāmi bhikkhave tilakakkanti .
Kabaḷikāya attho hoti . anujānāmi bhikkhave kabaḷikanti .
Vaṇabandhanacolena attho hoti . anujānāmi bhikkhave vaṇabandhana-
colanti 2- . vaṇo kaṇḍavati . anujānāmi bhikkhave sāsapakuḍḍena
dhovitunti 3- . vaṇo kilijjittha . anujānāmi bhikkhave dhūmaṃ
kātunti . vaḍḍhamaṃsaṃ vuṭṭhāti . anujānāmi bhikkhave
loṇasakkharikāya chinditunti . vaṇo na rūhati . anujānāmi
bhikkhave vaṇatelanti . telaṃ galati . bhagavato etamatthaṃ ārocesuṃ.
@Footnote: 1 Po. goṇavisāṇena gāhetunti. Ma. gāhetunti. 2 Po. vaṇabandhanacoḷakanti.
@3 Ma. Yu. sāsapakuttena phositunti.
Anujānāmi bhikkhave vikāsikaṃ sabbaṃ vaṇapaṭikammanti.
[43] Tena kho pana samayena aññataro bhikkhu ahinā daṭṭho hoti.
Bhagavato etamatthaṃ ārocesuṃ . anujānāmi bhikkhave cattāri mahāvikaṭāni
dātuṃ gūthaṃ muttaṃ chārikaṃ mattikanti. Athakho bhikkhūnaṃ etadahosi appaṭiggahitāni
nu kho udāhu paṭiggahetabbānīti . bhagavato etamatthaṃ ārocesuṃ .
Anujānāmi bhikkhave sati kappiyakārake paṭiggahāpetuṃ asati kappiyakārake
sāmaṃ gahetvā paribhuñjitunti . tena kho pana samayena aññatarena
bhikkhunā visaṃ pītaṃ hoti . bhagavato etamatthaṃ ārocesuṃ. Anujānāmi
bhikkhave gūthaṃ pāyetunti . athakho bhikkhūnaṃ etadahosi appaṭiggahito
nu kho udāhu paṭiggahetabboti . bhagavato etamatthaṃ ārocesuṃ .
Anujānāmi bhikkhave yaṃ karonto paṭiggaṇhāti sveva paṭiggaho kato
na puna paṭiggahetabboti.
[44] Tena kho pana samayena aññatarassa bhikkhuno gharadinnakābādho
hoti . bhagavato etamatthaṃ ārocesuṃ . anujānāmi bhikkhave
sītāloḷiṃ pāyetunti . tena kho pana samayena aññataro
bhikkhu duṭṭhagahaṇiko 1- hoti . bhagavato etamatthaṃ ārocesuṃ .
Anujānāmi bhikkhave āmisakhāraṃ pāyetunti . tena kho pana samayena
aññatarassa bhikkhuno paṇḍurogābādho hoti . bhagavato etamatthaṃ
@Footnote: 1 Sī. duṭṭhugahaṇiko.
Ārocesuṃ . anujānāmi bhikkhave muttaharīṭakaṃ pāyetunti . tena kho
pana samayena aññatarassa bhikkhuno chavidosābādho hoti . bhagavato
etamatthaṃ ārocesuṃ. Anujānāmi bhikkhave gandhālepaṃ kātunti.
{44.1} Tena kho pana samayena aññataro bhikkhu abhisannakāyo
hoti . bhagavato etamatthaṃ ārocesuṃ . anujānāmi bhikkhave
virecanaṃ pātunti . acchakañjiyā attho hoti . bhagavato
etamatthaṃ ārocesuṃ . anujānāmi bhikkhave acchakañjikanti .
Akaṭayūsena attho hoti . bhagavato etamatthaṃ ārocesuṃ .
Anujānāmi bhikkhave akaṭayūsanti . kaṭākaṭena attho hoti .
Bhagavato etamatthaṃ ārocesuṃ . anujānāmi bhikkhave kaṭākaṭanti .
Paṭicchādanīyena attho hoti . bhagavato etamatthaṃ ārocesuṃ .
Anujānāmi bhikkhave paṭicchādanīyanti.
[45] Tena kho pana samayena āyasmā pilindavaccho 1- rājagahe
pabbhāraṃ sodhāpeti lenaṃ kattukāmo . athakho rājā māgadho
seniyo bimbisāro yena āyasmā pilindavaccho tenupasaṅkami
upasaṅkamitvā āyasmantaṃ pilindavacchaṃ abhivādetvā ekamantaṃ
nisīdi . ekamantaṃ nisinno kho rājā māgadho seniyo bimbisāro
āyasmantaṃ pilindavacchaṃ etadavoca kiṃ bhante thero kārāpetīti .
Pabbhāraṃ mahārāja sodhāpemi lenaṃ kattukāmoti . attho bhante
@Footnote: 1 Sī. pilindivaccho.
Ayyassa ārāmikenāti . na kho mahārāja bhagavatā ārāmiko
anuññātoti . tenahi bhante bhagavantaṃ paṭipucchitvā mama
āroceyyāthāti . evaṃ mahārājāti kho āyasmā pilindavaccho
rañño māgadhassa seniyassa bimbisārassa paccassosi . athakho
āyasmā pilindavaccho rājānaṃ māgadhaṃ seniyaṃ bimbisāraṃ dhammiyā
kathāya sandassesi samādapesi samuttejesi sampahaṃsesi . athakho
rājā māgadho seniyo bimbisāro āyasmatā pilindavacchena
dhammiyā kathāya sandassito samādapito samuttejito sampahaṃsito
uṭṭhāyāsanā āyasmantaṃ pilindavacchaṃ abhivādetvā padakkhiṇaṃ katvā
pakkāmi . athakho āyasmā pilindavaccho bhagavato santike dūtaṃ
pāhesi rājā bhante māgadho seniyo bimbisāro ārāmikaṃ
dātukāmo kathaṃ nu kho bhante paṭipajjitabbanti.
{45.1} Athakho bhagavā etasmiṃ nidāne etasmiṃ pakaraṇe dhammiṃ
kathaṃ katvā bhikkhū āmantesi anujānāmi bhikkhave ārāmikanti .
Dutiyampi kho rājā māgadho seniyo bimbisāro yenāyasmā
pilindavaccho tenupasaṅkami upasaṅkamitvā āyasmantaṃ pilindavacchaṃ
abhivādetvā ekamantaṃ nisīdi . ekamantaṃ nisinno kho rājā
māgadho seniyo bimbisāro āyasmantaṃ pilindavacchaṃ etadavoca
anuññāto bhante bhagavatā ārāmikoti . evaṃ mahārājāti. Tenahi
bhante ayyassa ārāmikaṃ dammīti . athakho rājā māgadho seniyo
Bimbisāro āyasmato pilindavacchassa ārāmikaṃ paṭissuṇitvā
vissaritvā cirena satiṃ paṭilabhitvā aññataraṃ sabbatthakaṃ mahāmattaṃ
āmantesi yo mayā bhaṇe ayyassa ārāmiko paṭissuto dinno
so ārāmikoti 1- . na kho deva ayyassa ārāmiko dinnoti.
Kīvaciraṃ nu kho bhaṇe ito ratti 2- hotīti . Athakho so mahāmatto
rattiyo gaṇetvā 3- rājānaṃ māgadhaṃ seniyaṃ bimbisāraṃ etadavoca
pañca deva rattisatānīti . tenahi bhaṇe ayyassa pañca ārāmikasatāni
dehīti 4- . evaṃ devāti kho so mahāmatto rañño māgadhassa
seniyassa bimbisārassa paṭissuṇitvā āyasmato pilindavacchassa
pañca ārāmikasatāni adāsi 5- . pāṭiyekko gāmo nivisi .
Ārāmikagāmakotipi naṃ āhaṃsu pilindavacchagāmakotipi 6- naṃ āhaṃsu.
[46] Tena kho pana samayena āyasmā pilindavaccho tasmiṃ
gāmake kulupako hoti . athakho āyasmā pilindavaccho
pubbaṇhasamayaṃ nivāsetvā pattacīvaramādāya pilindavacchagāmakaṃ 7-
piṇḍāya pāvisi . tena kho pana samayena tasmiṃ gāmake ussavo hoti.
Dārakā alaṅkatā mālākitā kīḷanti . athakho āyasmā pilindavaccho
@Footnote: 1 Po. dinno hoti so ārāmikoti. 2 Po. paṭisataṃ. Sī. Ma. Yu. hitaṃ.
@3 Sī. Yu. vigaṇetvā. 4 Po. Sī. Ma. Yu. dethāti. 5 Sī. Ma. Yu. pādāsi.
@6 Sī. pilindigāmakotipi. Yu. pilindagāmakotipi. 7 Po. Ma. Yu. pilindagāmaṃ.
Pilindavacchagāmake 1- sapadānaṃ piṇḍāya caramāno yena aññatarassa
ārāmikassa nivesanaṃ tenupasaṅkami upasaṅkamitvā paññatte
āsane nisīdi . tena kho pana samayena tassā ārāmikiniyā
dhītā aññe dārake alaṅkate 2- mālākite passitvā rodati
mālaṃ me detha alaṅkāraṃ me dethāti . athakho āyasmā
pilindavaccho taṃ ārāmikiniṃ etadavoca kissāyaṃ dārikā rodatīti .
Ayaṃ bhante dārikā aññe dārake alaṅkate 3- mālākite passitvā
rodati mālaṃ me detha alaṅkāraṃ me dethāti kuto amhākaṃ
duggatānaṃ mālā kuto alaṅkāroti 4-.
{46.1} Athakho āyasmā pilindavaccho aññataraṃ tiṇaṇḍūpakaṃ
gahetvā taṃ ārāmikiniṃ etadavoca handimaṃ tiṇaṇḍūpakaṃ tassā
dārikāya sīse paṭimuñcāhīti 5- . athakho sā ārāmikinī taṃ
tiṇaṇḍūpakaṃ gahetvā tassā dārikāya sīse paṭimuñci . sā
ahosi suvaṇṇamālā abhirūpā dassanīyā pāsādikā . natthi
tādisā raññopi antepure suvaṇṇamālā . manussā rañño
māgadhassa seniyassa bimbisārassa ārocesuṃ amukassa deva
ārāmikassa ghare suvaṇṇamālā abhirūpā dassanīyā pāsādikā
natthi tādisā devassāpi antepure suvaṇṇamālā kuto tassa
duggatassa nissaṃsayaṃ corikāya ābhatāti . athakho rājā
māgadho seniyo bimbisāro taṃ ārāmikakulaṃ bandhāpesi .
@Footnote: 1 Po. Ma. Yu. pilindagāmake. 2-3 Po. Ma. dārike alaṅkite. 4 Po. Yu.
@alaṅkārāti. 5 Po. Sī. Ma. Yu. paṭimuñcāti.
Dutiyampi kho āyasmā pilindavaccho pubbaṇhasamayaṃ nivāsetvā
pattacīvaramādāya pilindavacchagāmakaṃ piṇḍāya pāvisi pilindavacchagāmake
sapadānaṃ piṇḍāya caramāno yena tassa ārāmikassa nivesanaṃ
tenupasaṅkami upasaṅkamitvā paṭivissake pucchi 1- kahaṃ idaṃ 2-
ārāmikakulaṃ gatanti . etissā bhante suvaṇṇamālāya kāraṇā
raññā bandhāpitanti.
{46.2} Athakho āyasmā pilindavaccho yena rañño māgadhassa
seniyassa bimbisārassa nivesanaṃ tenupasaṅkami upasaṅkamitvā
paññatte āsane nisīdi.
{46.3} Athakho rājā māgadho seniyo bimbisāro yenāyasmā
pilindavaccho tenupasaṅkami upasaṅkamitvā āyasmantaṃ pilindavacchaṃ
abhivādetvā ekamantaṃ nisīdi . ekamantaṃ nisinnaṃ kho rājānaṃ
māgadhaṃ seniyaṃ bimbisāraṃ āyasmā pilindavaccho etadavoca kissa
mahārāja ārāmikakulaṃ bandhāpitanti . tassa bhante ārāmikassa
ghare suvaṇṇamālā abhirūpā dassanīyā pāsādikā natthi tādisā
amhākaṃpi antepure suvaṇṇamālā kuto tassa duggatassa
nissaṃsayaṃ corikāya ābhatāti . athakho āyasmā pilindavaccho
rañño māgadhassa seniyassa bimbisārassa pāsādaṃ suvaṇṇanti
adhimucci . so [3]- ahosi sabbasovaṇṇamayo 4- . idaṃ pana te
mahārāja tāvabahuṃ suvaṇṇaṃ kutoti 5- . aññātaṃ bhante ayyassa
@Footnote: 1 Ma. pucchati. 2 Po. Sī. Ma. Yu. imaṃ. 3 Ma. pāsādo. 4 Ma. sabbaso suvaṇṇamayo.
@5 Po. kuto laddhanti.
Seveso 1- iddhānubhāvoti taṃ ārāmikakulaṃ muñcāpesi.
[47] Manussā ayyena kira pilindavacchena sarājikāya parisāya
uttarimanussadhammaṃ iddhipāṭihāriyaṃ dassitanti attamanā abhippasannā
āyasmato pilindavacchassa pañca bhesajjāni abhihariṃsu seyyathīdaṃ
sappiṃ navanītaṃ telaṃ madhuṃ phāṇitaṃ . pakatiyāpicāyasmā pilindavaccho
lābhī hoti pañcannaṃ bhesajjānaṃ laddhaṃ laddhaṃ parisāya vissajjeti .
Parisā cassa hoti bāhullikā laddhaṃ laddhaṃ kolambepi 3- ghaṭepi
pūretvā paṭisāmeti parissāvanānipi thavikāyopi pūretvā vātapānesu
laggeti 4- . tāni olīnavīlināni tiṭṭhanti . undurehipi vihārā
okiṇṇavikiṇṇā honti . manussā vihāracārikaṃ āhiṇḍantā passitvā
ujjhāyanti khīyanti vipācenti antokoṭṭhāgārikā ime samaṇā
sakyaputtiyā seyyathāpi rājā māgadho seniyo bimbisāroti .
Assosuṃ kho bhikkhū tesaṃ manussānaṃ ujjhāyantānaṃ khīyantānaṃ vipācentānaṃ.
Ye te bhikkhū appicchā .pe. te ujjhāyanti khīyanti vipācenti
kathaṃ hi nāma bhikkhū evarūpāya bāhullāya cetessantīti.
{47.1} Athakho te bhikkhū bhagavato etamatthaṃ ārocesuṃ. Saccaṃ kira bhikkhave
bhikkhū evarūpāya bāhullāya cetessantīti 5- . saccaṃ bhagavāti .pe.
Vigarahitvā dhammiṃ kathaṃ katvā bhikkhū āmantesi yāni kho pana tāni gilānānaṃ
@Footnote: 1 Po. Sī. Ma. Yu. ayyassa eso. 2 Ma. Yu. phāṇitanti. 3 Po. kolumbepi.
@Ma. koḷumbepi. 4 Ma. Yu. lagganti. 5 Ma. Yu. cetentīti.
Bhikkhūnaṃ paṭisāyanīyāni bhesajjāni seyyathīdaṃ sappi navanītaṃ telaṃ madhu
phāṇitaṃ tāni paṭiggahetvā sattāhaparamaṃ sannidhikārakaṃ paribhuñjitabbāni
taṃ atikkāmayato yathādhammo kāretabboti.
Bhesajjaanuññātabhāṇavāraṃ paṭhamaṃ.
The Pali Tipitaka in Roman Character Volume 5 page 38-58.
http://84000.org/tipitaka/read/roman_item_s.php?book=5&item=25&items=23
Classified by [Item Number] :-
http://84000.org/tipitaka/read/roman_item_s.php?book=5&item=25&items=23&mode=bracket
Compare with The Pali Tipitaka in Thai Character :-
http://84000.org/tipitaka/read/pali_item_s.php?book=5&item=25&items=23
Compare with The Royal Version of Thai Tipitaka :-
http://84000.org/tipitaka/read/byitem_s.php?book=5&item=25&items=23
Study Atthakatha :-
http://84000.org/tipitaka/attha/attha.php?b=5&i=25
The Pali Atthakatha in Thai :-
http://84000.org/tipitaka/atthapali/read_th.php?B=3&A=3866
The Pali Atthakatha in Roman :-
http://84000.org/tipitaka/atthapali/read_rm.php?B=3&A=3866
Contents of The Tipitaka Volume 5
http://84000.org/tipitaka/read/?index_5
บันทึก ๑๔ พฤศจิกายน พ.ศ. ๒๕๖๐.
การแสดงผลนี้อ้างอิงข้อมูลจากพระไตรปิฎกฉบับภาษาบาลี อักษรโรมัน.
หากพบข้อผิดพลาด กรุณาแจ้งได้ที่ [email protected]
