PaliRoman Vol.36

Asaṅgahitenasaṅgahitapadaniddeso [175] Vedanākkhandhena ye dhammā saññākkhandhena ye dhammā saṅkhārakkhandhena ye dhammā samudayasaccena ye dhammā maggasaccena ye dhammā khandhasaṅgahena asaṅgahitā āyatanasaṅgahena saṅgahitā dhātusaṅgahena saṅgahitā te dhammā katīhi khandhehi katīhāyatanehi katīhi dhātūhi saṅgahitā te dhammā asaṅkhataṃ khandhato ṭhapetvā tīhi khandhehi ekenāyatanena ekāya dhātuyā saṅgahitā. [176] Nirodhasaccena ye dhammā khandhasaṅgahena asaṅgahitā Āyatanasaṅgahena saṅgahitā dhātusaṅgahena saṅgahitā te dhammā catūhi khandhehi ekenāyatanena ekāya dhātuyā saṅgahitā. [177] Jīvitindriyena ye dhammā khandhasaṅgahena asaṅgahitā āyatanasaṅgahena saṅgahitā dhātusaṅgahena saṅgahitā te dhammā asaṅkhataṃ khandhato ṭhapetvā dvīhi khandhehi ekenāyatanena ekāya dhātuyā saṅgahitā. [178] Itthindriyena ye dhammā purisindriyena ye dhammā sukhindriyena ye dhammā dukkhindriyena ye dhammā somanassindriyena ye dhammā domanassindriyena ye dhammā upekkhindriyena ye dhammā saddhindriyena ye dhammā viriyindriyena ye dhammā satindriyena ye dhammā samādhindriyena ye dhammā paññindriyena ye dhammā anaññātaññassāmītindriyena ye dhammā aññindriyena ye dhammā aññātāvindriyena ye dhammā avijjāya ye dhammā avijjāpaccayā saṅkhārena ye dhammā saḷāyatanapaccayā phassena ye dhammā phassapaccayā vedanāya ye dhammā vedanāpaccayā taṇhāya ye dhammā taṇhāpaccayā upādānena ye dhammā upādānapaccayā kammabhavena ye dhammā khandhasaṅgahena asaṅgahitā āyatanasaṅgahena saṅgahitā dhātusaṅgahena saṅgahitā te dhammā asaṅkhataṃ khandhato ṭhapetvā tīhi khandhehi ekenāyatanena ekāya dhātuyā saṅgahitā. [179] Jātiyā ye dhammā jarāya ye dhammā maraṇena ye dhammā jhānena ye dhammā khandhasaṅgahena asaṅgahitā āyatanasaṅgahena saṅgahitā dhātusaṅgahena saṅgahitā te dhammā asaṅkhataṃ khandhato ṭhapetvā dvīhi khandhehi ekenāyatanena ekāya dhātuyā saṅgahitā. [180] Sokena ye dhammā dukkhena ye dhammā domanassena ye dhammā upāyāsena ye dhammā satipaṭṭhānena ye dhammā sammappadhānena ye dhammā appamaññāya ye dhammā pañcahi indriyehi ye dhammā pañcahi balehi ye dhammā sattahi bojjhaṅgehi ye dhammā ariyena aṭṭhaṅgikena maggena ye dhammā phassena ye dhammā vedanāya ye dhammā saññāya ye dhammā cetanāya ye dhammā adhimokkhena ye dhammā manasikārena ye dhammā hetūhi dhammehi ye dhammā hetūhi ceva sahetukehi ca dhammehi ye dhammā hetūhi ceva hetusampayuttehi ca dhammehi ye dhammā khandhasaṅgahena asaṅgahitā āyatanasaṅgahena saṅgahitā dhātusaṅgahena saṅgahitā te dhammā asaṅkhataṃ khandhato ṭhapetvā tīhi khandhehi ekenāyatanena ekāya dhātuyā saṅgahitā. [181] Appaccayehi dhammehi ye dhammā asaṅkhatehi dhammehi ye dhammā khandhasaṅgahena asaṅgahitā āyatanasaṅgahena saṅgahitā dhātusaṅgahena saṅgahitā te dhammā catūhi khandhehi ekenāyatanena ekāya Dhātuyā saṅgahitā. [182] Āsavehi dhammehi ye dhammā āsavehi ceva sāsavehi ca dhammehi ye dhammā āsavehi ceva āsavasampayuttehi ca dhammehi ye dhammā khandhasaṅgahena asaṅgahitā āyatanasaṅgahena saṅgahitā dhātusaṅgahena saṅgahitā te dhammā asaṅkhataṃ khandhato ṭhapetvā tīhi khandhehi ekenāyatanena ekāya dhātuyā saṅgahitā. [183] Saññojanehi dhammehi ye dhammā ganthehi dhammehi ye dhammā oghehi dhammehi ye dhammā yogehi dhammehi ye dhammā nīvaraṇehi dhammehi ye dhammā parāmāsehi dhammehi ye dhammā parāmāsehi ceva parāmaṭṭhehi ca dhammehi ye dhammā khandhasaṅgahena asaṅgahitā āyatanasaṅgahena saṅgahitā dhātusaṅgahena saṅgahitā te dhammā asaṅkhataṃ khandhato ṭhapetvā tīhi khandhehi ekenāyatanena ekāya dhātuyā saṅgahitā. [184] Cetasikehi dhammehi ye dhammā cittasampayuttehi dhammehi ye dhammā cittasaṃsaṭṭhehi dhammehi ye dhammā cittasaṃsaṭṭhasamuṭṭhānehi dhammehi ye dhammā cittasaṃsaṭṭhasamuṭṭhānasahabhūhi dhammehi ye dhammā cittasaṃsaṭṭhasamuṭṭhānānuparivattīhi dhammehi ye dhammā khandhasaṅgahena asaṅgahitā āyatanasaṅgahena saṅgahitā dhātusaṅgahena saṅgahitā te dhammā asaṅkhataṃ khandhato ṭhapetvā ekena khandhena ekenāyatanena ekāya dhātuyā saṅgahitā. [185] Cittasahabhūhi dhammehi ye dhammā cittānuparivattīhi dhammehi ye dhammā khandhasaṅgahena asaṅgahitā āyatanasaṅgahena saṅgahitā dhātusaṅgahena saṅgahitā te dhammā na kehici khandhehi ekenāyatanena ekāya dhātuyā saṅgahitā. [186] Upādānehi dhammehi ye dhammā kilesehi dhammehi ye dhammā kilesehi ceva saṅkilesikehi ca dhammehi ye dhammā kilesehi ceva saṅkiliṭṭhehi ca dhammehi ye dhammā kilesehi ceva kilesasampayuttehi ca dhammehi ye dhammā khandhasaṅgahena asaṅgahitā āyatanasaṅgahena saṅgahitā dhātusaṅgahena saṅgahitā te dhammā katīhi khandhehi katīhāyatanehi katīhi dhātūhi saṅgahitā te dhammā asaṅkhataṃ khandhato ṭhapetvā tīhi khandhehi ekenāyatanena ekāya dhātuyā saṅgahitā. Asaṅgahitenasaṅgahitapadaniddeso niṭṭhito. -------------

The Pali Tipitaka in Roman Character Volume 36 page 35-39. https://84000.org/tipitaka/read/roman_read.php?B=36&A=692 Compare with The Pali Tipitaka in Thai Character :- https://84000.org/tipitaka/read/pali_read.php?B=36&A=692 Compare with The Royal Version of Thai Tipitaka :- https://84000.org/tipitaka/read/byitem.php?book=36.1&item=175&items=12 Compare with The MCU Version of Thai Tipitaka :- https://84000.org/tipitaka/pitaka_item/m_siri.php?B=36&siri=4 Study Atthakatha :- https://84000.org/tipitaka/attha/attha.php?b=36&i=175 The Pali Atthakatha in Thai :- https://84000.org/tipitaka/atthapali/read_th.php?B=55&A=239 The Pali Atthakatha in Roman :- https://84000.org/tipitaka/atthapali/read_rm.php?B=55&A=239 Contents of The Tipitaka Volume 36 https://84000.org/tipitaka/read/?index_36 https://84000.org/tipitaka/english/?index_36